Линклар

logo-print

Ғазо бўҳрони: Дипломатик уринишлар кучаймоқда


Исроил армияси Ғазо минтақаси устидан артиллерия снарядларини дўл каби ëғдирмоқда.

Исроил армияси Ғазо минтақаси устидан артиллерия снарядларини дўл каби ëғдирмоқда.

Исроил армияси Ғазо минтақасини қайта ишғол қилишни кучайтирган айни пайтда¸ мазкур бўҳронга барҳам бериш уринишлари ҳам фаоллашмоқда.


Ҳаво ва денгиз кучлари томонидан қувватланган Исроил қуруқлик қўшинлари ва танклари якшанба куни Ғазо секторини иккига бўлиб¸ ҳудудни ишғол қилишга ўтди.

Ҳамас раҳбарияти 9 кундан бери давом этаëтган тўқнашувларни тўхтатиш талабини рад этганидан сўнг¸ Исроил қўшинлари Ҳамаснинг ракета отиш майдонларини ўз назоратига олди¸ шаҳар марказини қамал қилди.

1¸5 миллион одам яшовчи Ғазо ҳудуди Исроил ҳужумлари оқибатида электр қувватисиз қолди¸ аҳоли орасида қўрқув ва саросима кучайди.

Минтақадаги мухбирларга кўра¸ Исроил ҳужумлари оқибатида нобуд бўлган фаластинликлар сони 500 дан ошди ва уларнинг камида 100 нафари тинч аҳоли вакилларидир.

Ғазо минтақасини бошқариб келаëтган Ҳамас ҳукумати Исроил қуруқлик қўшинлари мазкур ҳудудга бостириб кириш орқали ўзларини қопқонга тутиб беришлари ҳақида огоҳлантирган эди.

Ҳозирча шаҳар ташқарисида бораëтган ўзаро тўқнашувлар шаҳар ичкарисига кўчса¸ оддий аҳоли орасидаги қурбонлар сонининг кескин ошиши тахмин қилинмоқда.

Буни Яқин Шарқ тинчлик музокараларидаги Фаластин гуруҳи раҳбари Саэб Эрекат ҳам таъкидлади.

- Ҳозирнинг ўзида Ғазода инсоний фожеа юз бермоқда. Ғазода 1¸5 миллион аҳоли яшайди¸ бу бир квадрат метрда 6 одам деганидир. Бу одамлар сувсиз¸ тиббий таъминотсиз¸ электрсиз кун ўтказмоқда. Ғазо аҳолиси¸ Ғазодаги бизнинг халқимиз том маънодаги инсоний фожеада турибди. Мен халқаро ҳамжамиятнинг биз билан бирга бўлиб¸ бу ердаги вазият учун маъсулиятга шерик бўлишига умид қиламан¸ деди Фаластин бош музокарачиси.

Ғазода инсоний фожеанинг жадаллашаëтгани ҳақидаги бу каби баëнотларни инкор этаëтган Исроил ҳукумати¸ аксинча¸ минтақага энг зарур истеъмол маҳсулотларининг етказилаëтганини даъво қилмоқда.

Исроил ҳукумати мустақил хориж мухбирларининг Ғазога киришига изн бермаëтгани боис¸ бу каби иддаоларни текшириш имконсиз қолмоқда.

Айни пайтда¸ халқаро ҳамжамиятнинг зудлик билан сулҳ битими тузиш тўғрисидаги чақириқларига муносабат кўрсатган Исроил томони Ҳамас истеҳкомларига қарши жангларнинг ҳали бир неча кун¸ балки ҳафта давом этиши ва бундай чақириқларга эрта эканини билдирди.

БМТ Хавфсизлик кенгашининг Ғазо бўҳрони юзасидан Франция талабига мувофиқ ўтказилган учинчи фавқулодда йиғини ҳам якшанба куни самарасиз тугади.

Ҳамас ҳукумати ўзаро келишувга амал қилмайди¸ деган асосда АҚШ ўт очишни дарҳол тўхтатиш ҳақидаги кенгаш резолюциясининг қабул қилинишига имкон бермади.

Россия президенти Дмитрий Медведев идораси Кремл раҳбарининг Исроил бош вазири Эхуд Олмертга сим қоқиб¸ Ғазода тинч аҳоли орасида қурбонлар сонининг кўпайиб бораëтганидан ташвиш билдирганини маълум қилди.

Яқин Шарқ тинчлик жараëнидаги тўртлик аъзоси бўлган Россия¸ минтақадаги вазиятни барқарорлаштириш учун Москвада АҚШ¸ ЕИ ва БМТ дан иборат мазкур тўртлик йиғинини ўтказишга чақирмоқда.

Айни пайтда¸ Фаластин президенти Маҳмуд Аббос ва Араб лигасига аъзо саккиз давлат ташқи ишлар вазирлари душанба куни БМТ нинг Ню-Йоркдаги бош қароргоҳига етиб келди. Айтилишича¸ араб давлатлари БМТ Хавфсизлик кенгашидан бўҳронни тўхтатиш борасида бирор амалий чора кўришни талаб қилмоқдалар.

Ғазо бўҳрони


Гарчи ЕИ га президентлик қилиш навбати 1 январдан бошлаб Чехия ҳукуматига ўтган бўлса-да¸ душанба куни Франция президенти Николя Саркози Яқин Шарққа келди ва томонларни ўзи таклиф қилган ўт очишни тўхтатиш келишувига кўндириш ҳаракатини бошлади.

Иттифоқнинг жорий президенти Чехия ташқи ишлар вазири Карл Шварценберг етакчилигидаги гуруҳи ҳам Миср пойтахти Қоҳирада вазиятга ечим топиш уринишларини олиб бормоқда.

- Биз сафаримизни бошлаëтган Миср ҳукумати Ҳамас билан мулоқотга эга ва кейинги ой давомида Ғазони бошқараëтган Ҳамас билан Ғарбий соҳилни идора қилаëтган Фатаҳ ҳаракатларини ўзаро келишувга эриштиришда воситачилик қилаëтган эди.

Биз ҳозирги вазиятдаги Ҳамас позицияси ҳақида Мисрда хабар топиш ва сўнгра музокараларни давом эттиришга умид қилмоқдамиз¸ деди ЕИ музокарачилари раҳбари Шварценберг.

Тўлиғича ўз диққатини мазкур бўҳронга қаратиш мақсадида АҚШ Давлат котиби Кондолиза Райс Хитойга белгиланган сафарини бекор қилди.

Айни пайтда¸ халқаро жамоатчилик янги сайланган АҚШ президенти Барак Обаманинг Ғазо бўҳронига муносабат билдириши ва унга ечим топиш борасида кўшиш қилишини кутмоқда.

Аммо Обама идораси АҚШ ни бир пайтнинг ўзида икки президент бошқармаслигини такрорлаб¸ вазият билан иш кўриш¸20 январга қадар тўлиғича Буш маъмурияти маъсулиятида эканини таъкидлаш билан чекланмоқда.

Халқаро ҳамжамият диққат-марказида қолаëтган Ғазо бўҳронига муносабат билдирган Ўзбекистон ташқи ишлар вазирлиги қошидаги Жаҳон ахборот агентлиги Ўзбекистон жамоатчилиги ҳам Ғазодаги вазиятнинг кескинлашиб бораëтганини хавотир билан кузатаëтгани ва томонларни ҳарбий амалиëтларни тўхтатиб¸ муаммони музокаралар орқали ҳал этишга чақираëтганини маълум қилди.

XS
SM
MD
LG