Россиядаги "Мемориал" инсон ҳуқуқлари ташкилотига кўра, Ўзбекистонда репрессиялар кўлами сўнгги ўн йил ичидаги энг юқори даражага кўтарилган.
2009-2010 йиллар орқалиғида Ўзбекистонда 868 одам сиёсий мотивлар билан судланган, 550-600 одам терроризмга қарши кураш тадбирлари доирасида қисқа муддатга хибсда ушлаб турилган.
"2009-2010 йилларда Ўзбекистондаги сиёсий қатағонлар" номи остида эълон этилган ҳисоботда келтирилишича, мамлакатда репрессия кўлами беш йил аввалги вазиятга қараганда ортган, лекин 1999-2001 йилдагига қараганда камайган.
"Мемориал" инсон ҳуқуқлари ташкилотининг Марказий Осиё бўйича тадқиқотчиси Виталий Пономоревнинг "Озодлик" радиосига айтишича, бу авваламбор халқаро ҳамжамиятнинг Ўзбекистондаги инсон ҳуқуқлари вазиятига етарли эътибор бермагани натижасидир.
- Ҳисоботни эълон қилишдан мақсад ҳам Ўзбекистондаги муаммо нақадар жиддий эканини урғулаш ва Ўзбекистоннинг халқаро ҳамкорларини бу мамлакатдаги минглаб сиёсий махбуслар тақдирига бефарқ бўлмасликка чақиришдир,- деди Пономорев.
Ушбу хафта Ҳюман райтс уотч халқаро инсон ҳуқуқлари ташкилоти Ўзбекистон ҳукумати Тошкентдаги идорасини ёпишга мажбур қилганини билдирган эди.
- Ҳюман райтс уотч масаласига келсак бу Ўзбекистон раҳбарининг Брюсселга ташрифидан кейин вазиятга нотўғри баҳо берилиши натижасидир бу. Каримов Андижон билан боғлиқ санкциялар бекор қилинди, Брюсселда олий даражада қабул қилинди ва ғарб энди Ўзбекистондаги инсон ҳуқуқлари қўпол бузилишиларига кўз юмади ва хавфсизлик борасида ҳамкорлик қилади деб ўйлади.
Албатта ғарбда шундай деб ўйловчи кучлар бор, лекин ҳозир Ҳюман райтс уотч билан боғлиқ бу холат катта шов-шув уйғотди ва айрим вақтда Тошкент ўйлаганидек бўлмаслиги ҳам мумкин,- дейди Виталий Пономорев.
