Линклар

logo-print

Афсонавий боксчи Муҳаммад Али 70 ёшга тўлди


Муҳаммад Али, Вашингтон, 2011 йил 24 май.

Муҳаммад Али, Вашингтон, 2011 йил 24 май.

Профессионал бокс бўйича оғир вазндаги уч карра жаҳон чемпиони, 1960 йилги Олимпиада ўйинида ярим оғир вазнда олтин медал соҳиби бўлган америкалик афсонавий боксчи Муҳаммад Али 17 январ куни 70 ёшга тўлди.


АҚШнинг Кентакки штати Луисвилл шаҳридаги Муҳаммад Али Марказида 14 январ куни кечқурун Алининг юбилейига бағишланган анжуман ўтказилди.

Тадбирда Муҳаммад Алининг ҳаёти ва спорт карьераси билан боғлиқ суҳбатлар ва жамғармага пул тўплаш кампанияси ўтказилди.

Муҳаммад Али марказининг матбуот котиби Жани Канкега кўра, Муҳаммад Али 70 йиллик юбилейини ўз яқинлари, жумладан, мураббийси Анжело Дунди билан нишонламоқда.

Ассосиэйтед Пресс ахборот агентлигига кўра, ҳар йили Муҳаммад Али марказига 85 минг одам ташриф буюради.

Муҳаммад Али спортдаги фаолияти давомида 56 марта рингга тушиб 37 жангни нокаут билан муддатидан олдин тугатган. Али атиги беш марта мағлубиятга учраган.

1942 йилда туғилганида насроний ота-онаси Кассиус Клэй деб исм берган бокски 1964 йилда Ислом динини қабул қилгани ва Муҳаммад Али исмини олганини эълон қилади.

1978 йилда оғир вазндаги бокс бўйича учинчи марта жаҳон чемпиони камарини қўлга киритганидан сўнг Муҳаммад Али профессионал боксни тарк этган.

1980 йилнинг октябр ойида яна рингга қайтишга ҳаракат қилган Муҳаммад Али Ларри Холмсга ютқазган.

1981 йилда Тревор Бербикка томонидан мағлубиятга учраганидан кейин Муҳаммад Али рингга қайтиш истагидан воз кечди.

Британиядаги нуфузли оммавий ахборот воситалари 1999 йилда Муҳаммад Алини “Аср спортчиси” деб эълон қилди.

Ҳозирда Муҳаммад Али дунё бўйлаб кўп саёҳат қилади.

У Кот-д’Ивуар, Индонезия, Мексика, Марокаш ва бошқа давлатлардаги ёрдамга мухтож болаларга инсонпарварлик ёрдами кўрсатиш билан шуғулланади.

Айни пайтда Муҳаммад Али Паркинсон касаллигининг оғир кўринишидан азият чекиб келмоқда.

Шарҳларни кўрсатинг

XS
SM
MD
LG