Линклар

logo-print

Расмий ўзбек телеканалининг билдиришича¸ Ҳаж зиёратига бормоқчи бўлган элликка яқин одамни чув туширган фирибгарларга нисбатан жиноий иш очилган. Улар орасида Кўкалдош мадрасаси ва банк ходимлари бор.

5 апрел куни Ўзбекистон телевидениеси биринчи канали орқали эфирга узатилган “Ҳаж ва фирибгарлик” кўрсатувида айтилишича, Ҳаж ва Умра маркази вакиллари, Ташқи иқтисодий фаолият Миллий банки мансабдорлари ва масжид имом-хатиблари билиб-билмай жиноятчиларга кўмак берган.

Фирибгар – Дин ишлари қўмитаси расмийсининг қўшниси

Кўрсатувда ҳикоя қилинишича, Ўзбекистон Вазирлар Маҳкамаси ҳузуридаги Дин ишлари бўйича қўмита расмийси Нусратилла Нодировнинг қўшниси бўлган Аброрхон Музаффаров ўнлаб фуқароларга фириб берган.



“Новза” масжидида жойлашган Ҳаж ва Умра марказига ариза топшириш учун келган фуқаролардан катта миқдорда пул йиғиб олган Музаффаров юқори рутбали қўшниси номини сотган.

Шу тариқа, Музаффаров дастлаб 40га яқин одамдан 128 минг доллар ва 58 миллион сўм маблағ олиб, “бировлар ҳисобидан дабдабали ҳаёт кечира бошлаган”.

Музаффаров Макка ва Мадина зиёратига отланган фуқароларга сафар йўлланмасини навбатсиз тўғрилаб беришга ваъда берган.

Кейинроқ у айни ваъда билан яна ўнга яқин фуқародан 33 минг доллар ва 23 миллион сўм олган.

2011 йилги Ҳаж мавсумида фуқаролардан сафар харажатлари учун пул қабул қилиш Ташқи иқтисодий фаолият Миллий банки Янгийўл бўлимига топширилган.

Теледастурда айтилишича, Миллий банкнинг Янгийўл бўлими бошқарувчиси Муроджон Содиқов “лақмалиги ва ишига совуққонлик билан қараши билан” фирибгарга фуқароларни алдашда ёрдам берган.

Фарғона вилояти Ҳаж ва Умра маркази собиқ ходими Абдуваҳоб Маърупов, Тошкент шаҳридаги Бурҳониддин Марғилоний масжиди имом-хатиби Юсуфхон Рустамов ҳам мижоз топишга Музаффаровга қарашиб юборган.

Қаллоблар орасида Кўкалдош мадрасаси ходими ҳам бор

Ҳаж зиёратига орзуманд бўлганларни алдаб, йиққан-терганини ўзлаштирган қаллоблар орасида Тошкент шаҳридаги Кўкалдош мадрасасида ишлаган Абдухолиқ Жўраев ҳам бор.

Ўзбекистон расмий каналига кўра, Жўраев ўнга яқин фуқародан Ҳаж ваъдаси билан пул олиб, шахсий манфаати йўлида ишлатиб юборган.

Кўрсатув давомида фуқаролар пешона тери билан топган пулини ҳийла-найранг билан олиб қўймоқчи бўлган товламачилардан эҳтиёт бўлиш зарурлиги таъкидланган.

Хусусан, Тошкент шаҳри бош имоми Анвар қори Турсунов мусулмонларни Ҳажга бориш учун пора бермаслик, ноқонуний йўллардан фойдаланмаслик, чегараларни бузмасликка даъват қилган.

Бу Ҳаж сафари билан боғлиқ илк фирибгарлик эмас. Аввал ҳам муборак зиёратга отланган кишиларни алдаб кетган қаллоблар ҳақида хабар берилган.

Масалан, 2010 йилда Андижондаги масжид имом ноиби Фазлиддин Ҳафизов айни шундай жинояти учун жазоланган.

Ҳаж ва пора

Ўзбекистондан ҳар йили 5000 киши Ҳажга юборилади. Аммо 28 миллион аҳолига эга бўлган мамлакатда Макка ва Мадина зиёрати орзусидагилар жуда ҳам кўп.

Шу боис, фуқаролар сафар учун бир неча йил аввал ариза бериб, навбат келишини кутиши зарур.

Саудия Арабистони ҳукумати ҳар бир мамлакатга Ҳаж учун квота белгиларкан, ҳар минг кишига биттадан ўрин ажратган.

Кузатувчиларга кўра, Ўзбекистон Саудия подшоҳлиги берган чекловга амал қилган тақдирда ҳам, амалдаги 5000 та ўрнига 28 мингтагача зиёратчи олиб бориш имконига эга.

Фуқаролар орасида Ҳаж ва Умра сафарига навбатсиз кетиш учун пора бериш ҳоллари учраши айтилади.

Бироқ муборак сафарни ташкил қилишга масъул идоралар порахўрлик мавжудлигини инкор қилиб келади.

Амалдаги тартибга кўра, Ҳаж ва Умра зиёрати учун аризалар маҳалла қўмиталарига топширилади. Сафар билан боғлиқ асосий масалалар эса ҳокимликлар ҳузуридаги махсус комиссия томонидан ҳал этилади.

2011 йилда Ўзбекистон фуқаролари учун Ҳаж харажати киши бошига 5 миллион 800 минг сўмдан тўғри келган.

2012 йилги тўлов миқдори ҳозир эълон қилинганича йўқ.

Жорий йилда муборак сафарга 2008 йили ариза топширган фуқаролар йўл олиши кутилмоқда.

Шарҳларни кўрсатинг

XS
SM
MD
LG