Линклар

Шошилинч хабар
28 март 2024, Тошкент вақти: 15:44

Ҳиндистонда ўзбекистонлик аёл қутқарилди


Ўзбекистонлик аёлни Гоа штати Калангут шаҳри полицияси қутқарди.
Ўзбекистонлик аёлни Гоа штати Калангут шаҳри полицияси қутқарди.
Ҳиндистоннинг Гоа штатидаги Калангут шаҳрида полиция фоҳишалик билан шуғулланишга мажбурланган ўзбекистонлик аёлни қутқарди.

Бу ҳақда хабар қилган Times of India нашрига кўра, унинг қўшмачиси, деб гумон қилинган бир эркак ўтган ҳафтада қўлга олинган ва жиноий жавобгарликка тортилиши кутилмоқда.

Айтилишича, Калангут шаҳри полицияси ўз манбасидан бир чет эллик аёл фоҳишалик билан шуғулланиш учун мижози ҳузурига кетаётгани тўғрисида маълумот олгач ўша машинани тўхтатиб аёлни ва сўнгра унинг қўшмачиси, деб гумон қилинган шахсни қўлга олган.

Қўшмачи, деб гумон қилинган шахс аёлга мижоз топиб берганликда ҳамда фоҳишаликдан топилган даромадга кун кечирганликда айбланиши мумкин.

Полицияга кўра, ўзбекистонлик аёл Ҳиндистон ҳудудида муҳлати ўтиб кетган виза билан яшаб юрган. Аёл, шунингдек, чет ээликлар тўғрисидаги қонунни бузганликда айбланиши мумкин.

Times of India нашри хабарига кўра, ўзбекистонлик аёл ижтимоий ҳимоя марказига олиб кетилган.

Сўнгги 8 ой ичида Калангут шаҳрида одам савдосининг 41 қурбони қутқарилган, фоҳишалик ва қўшмачиликда айбланган 52 шахс қамоққа олинган.
XS
SM
MD
LG