Toshkent bozorlarida bahorgi gavjumlik kuzatilmoqda. Ba‘zi mavsumiy mahsulotlarning bozorga kirishi, ayrim mahsulotlarning esa kamayishi narxlarga o‘z ta‘sirini o‘tkazayapti.
Bozorlarga qulupnay va dovuchcha oraladi
Qulupnay sotuvchisi Saodat ayaning aytishicha, aprel oyi oxirlarida yangi qulupnay narxi juda baland bo‘lishiga qaramay, xaridor arimayotkan ekan:
- To‘g‘risini aytsam, qulupnaylar qimmat. Masalan, maydalari 11 000 – 12 000 so‘mdan ketayapti. O‘rtachalari 20 000 atrofida, mundayroq kliyentlar kelsa, mana marhamat - yiriklari 30 000 dan bor. Xudoga shukur, savdo yaxshi, odamlar yangilik, deb olishyapti, dedi Saodat aya.
Ne‘mat ota esa dovuchcha sotish bilan mashg‘ul. Uning aytishicha, ayni kunda savdo qizg‘in.
- Dovuchcha Qashqadaryoniki. Tuklisining bir stakani 1 500 so‘mdan. Kilosini esa 12 000 so‘mdan sotayapmiz. Tuksizi esa 2 000 so‘m, kilosini 15 000 so‘mdan berib yuboraveramiz. Savdo yaxshi, ko‘z tegmasin. Buni homilador ayollar oilalari so‘rab, ko‘p kelib turishipti, - deydi Ne‘mat ota.
Sabzining narxi ikki barobar oshdi
Bozorlarda qizil va sariq sabzi anchagina kamayib qolgan, narxlari esa ko‘tarilgan. Buni sabzavot sotuvchi Hosilatxon quyidagicha izohlaydi:
- Endi buni saqlashning o‘zi oson emas, o‘ralarda ivib ketayapti. O‘zi har yili yangi sabzi chiqishi arafasida shunday oshib ketadi narxi. Avval 1000 – 1200 so‘mdan sotayotgan bo‘lsak, hozir 2 000 so‘mga chiqib ketdi sabzining narxi. Biz olibsotar bo‘lsak, qaysi narxda olib kelishsa, ustiga foydamizni quyib sotaveramiz, - deydi Hosilatxon sabzi narxining oshishi sotuvchilarga bog‘liq emasligini aytarkan.
Yangi kartoshka safiga yangi piyoz ham qo‘shildi
Kartoshka shu kunda Toshkent bozorlarida 3000 - 3500 so‘m atrofida sotilmoqda. Yangi piyoz narxi esa 2 000 so‘mdan tushayotgani yo‘q.
Toshkentning Yunusobod bozordagi mahsulotlarning dam olish kungi narxi
Mahsulot turi | Narxi |
Mol go‘shti (suyakli) – 1 kg | 23 000 so‘mdan 24 000 so‘mgacha |
Mol go‘shti (lahm) – 1 kg | 26 500 so‘mdan 27 500 so‘mgacha |
Qo‘y go‘shti – 1 kg | 25 500 so‘mdan 27 500 so‘mgacha |
Tovuq go‘shti (brillo) – 1 kg | 9 500 so‘mdan 11 500 so‘mgacha |
Shakar – 1 kg | 2 800 so‘m |
Tuz (yodlangan) – 1 kg | 1 100 so‘mdan 1 200 so‘mgacha |
O‘simlik yog‘i – 1 litr | 5 200 so‘mdan 5 500 so‘mgacha |
Un (Oltin don) – 1 kg | 2 000 so‘mdan 2 200 so‘mgacha |
Sariyog‘ (har xil turdagi) – 1 kg | 7 500 so‘mdan 27 500 so‘mgacha |
Kartoshka – 1 kg | 3 000 so‘mdan 3 500 so‘mgacha |
Sabzi – 1 kg | 2 000 so‘m |
Piyoz – 1 kg | 2 000 so‘m |
Guruch (har xil nav) - 1 kg | 3 500 so‘mdan 6 500 so‘mgacha |
Pomidor - 1 kg | 8 500 so‘mdan 9 000 so‘mgacha |
Bodring (Orzu) - 1 kg | 5 000 so‘mdan 6 500 so‘mgacha |
Tandir non (shu jumladan, patir) - 1 dona | 700 so‘mdan 3 500 so‘mgacha |