Бундан тўрт йил аввал янги талаба қабул қилиш учун квотадан маҳрум этилган Тошкент вилояти Давлат педагогика институтининг юзлаб ўқитувчи ва техник ходими 25 августдан бошлаб ишсизга айланади. Вазирлар Маҳкамасининг ҳозирча қабул қилинмаган қарори асосида ишдан бўшатилаëтган бу кадрлар¸ ҳукуматдан ИШ ва ҲАҚ сўрамоқда.
30 июндан фаолияти тўхтатилиб¸ ўқитувчи ва техник ходимлари 25 августга қадар меҳнат таътилига чиқарилган Ангрен пединститути жамоаси Ўзбекистон Вазирлар Маҳкамаси¸ Халқ таълими вазирлиги¸ Адлия ва Меҳнат вазирлигига мурожаат қилиб¸ ўз кейинги тақдирига оид қандай қарор қабул қилинганига оид ҳозирча тайинли маълумот ола олмади.
Озодликка мурожаат қилган жамоа сўровига муносабат билдирган институт раҳбарияти вакили¸ “давлат ҳеч кимни кўчага чиқариб ташламаслиги”ни таъкидлади:
- Ҳали Вазирлар Маҳкамасининг қарори чиққани йўқ. Талаба қолмади¸ талаба бўлмагандан кейин¸ ўқитувчи-ходимлар ишдан бўшатилади. Институтнинг тақдири бўйича сўнгги қарор қабул қилиш Вазирлар Маҳкамаси ихтиëрида. Институтда ўтган йили 168 нафар ўқитувчи ишлади. Давлат буларни кўчага чиқариб ҳайдамайди. Қарор чиққандан кейин¸ ўқитувчиларни иш билан таъминлаш бошланади. Институт базасида таълим муассасаси ташкил этилади. 5-синфдан 9-синфгача ўқитиладиган мактаб-интернат ташкил этилади. Бизнинг ўқитувчиларнинг ҳаммаси мактаб йўналишидаги ўқитувчилар эди. Бундан ташқари Жаҳон тиллари институти қошидаги академик лицей ташкил этилади. Ўқитувчиларимиз тўлиқ иш билан таъминланади¸ деди Ангрен пединститути ректорати расмийси.
Расмийнинг таъкидича¸ институтнинг сайлов ва танловлардан ўтиб¸ узоқ муддатли шартнома асосида ишлаб келган ўқитувчиларига иш ўрнини йўқотгани учун компенсация тўланади¸ улар иш билан таъминланади.
Аммо институт билан бир йиллик меҳнат шартномаси асосида ишлаб келганлар¸ шартнома муддати тугагани боис¸ бундай имтиëзлардан фойдалана олмайди.
Ваъдалар қоп-қоп...
Институт жамоаси номидан Озодлик билан суҳбатлашган ўқитувчилар¸ бундай ваъдага ишонмасликлари¸ ўзларининг ҳеч қандай товон пули ва ишсиз кўчага ташланаëтганларини билдирдилар.
- Кеча Меҳнат вазирлиги¸ Халқ таълими вазирлигидан вакил келиб¸ Академик лицей очилади¸ Темир йўл коллежи очилади¸ мактаб-интернат очилади¸ деган гаплар фақат лойиҳа шаклида экан ва уларни тасдиқлаб¸ амалга оширгунча бир неча йил кетиши мумкинлигини айтишди. Меҳнат биржасидан келган бизга токарь ва слесарлик бўйича 10 ойлик курс очилади¸ шунга ëзилинглар¸ деб кетишди¸ дейди Озодликка ўз шахси очиқланмаслиги шарти билан гапирган институт ўқитувчиларидан бири.
Ўзларининг Меҳнат Кодекси ва бошқа қонунларда кафолатланган ҳақ-ҳуқуқлари бузилаëтгани хусусида институт ўқитувчилари жамоаси маҳкамага ҳам мурожаат қилган.
18 июль куни Мирзо Улуғбек туманлараро фуқаролик суди¸ Вазирлар Маҳкамасининг сўнгги қарори ҳали қабул қилинмагани ва ўқитувчи-ходимларни ëппасига ишдан бўшатиш тўғрисида буйруқ чиқарилмагани боис¸ “низо йўқ” деган қарорга келган.
“Институт порахўрлик ва савияси пастлиги учун ëпилди”
1966 йилда ташкил топган Ангрен педагогика институти¸ собиқ ўқитувчилардан бирининг айтишича¸ квота тугатилиб¸ ëпилиши аниқ бўлгандан кейинги тўрт йил ичида¸ бу ерда ишловчилар учун “пенсия фонди”га айланган.
Институт ëпилгач¸ кўчада қолишидан чўчиган аксар ўқитувчилар¸ келажак учун бир нарса йиғиб қолиш учун¸ очиқчасига таъмагирлик ва порахўрликка ўтишди¸ дейди бу суҳбатдош.
Озодликка ижтимоий тармоқлар орқали келаëтган мактуб ва хабарларда ҳам¸ айнан Ангрен пединститутидаги порахўрлик¸ алоҳида мавзуга айланган эди.
Институтнинг Озодлик суҳбатлашган ўқитувчиларидан бири¸ анчайин кичик бўлган Ангренда¸ бу институт домлаларининг порахўрлиги боис ëпилди¸ деган гап-сўзлар тарқаб кетганини эътироф этди:
“Институт нега ëпилди¸ деб борган ангренликларга Вазирлар Маҳкамасида гўë¸ “булар порахўр ва саводсиз бўлгани учун ëпилди” дейишган эмиш. Мен умримнинг асос қисмини шу даргоҳда ўтказдим. Энди бунақа таъна билан кўчага чиқариб ташлашларини истамайман. Порахўрлик қаерда йўқ? Аттестациядан ўтолмаган ўқитувчилар кўплиги¸ савия пастлиги учун ҳам институтни ëпишибди¸ деган гаплар ҳам юрибди. Бу ëлғон¸ ҳаммамиз аттестациядан ўтганмиз. Шунинг учун Вазирлар Маҳкамаси ва Халқ таълими вазирлигидан Ангрен пединститутининг қандай асос¸ қайси сабабларга кўра ликвидация қилинганини очиқ тушунтириб¸ бизнинг тақдиримиз нима бўлиши аниқ кўрсатилган қарор чиқариб беришни сўраймиз¸ деди Ангрен пединститутининг ишсиз қолган ўқитувчиларидан бири.
"Биз бундай тамға билан ëпилмасак¸ бизни иш билан таъминлашса¸ муаммо ҳал"¸ дейди қарийб 30 йил Ангрен пединститутида ўқитувчилик қилган Озодлик суҳбатдоши.
