O‘zbekistonlik chavandozlar 10 sentabr kuni o‘tkazilgan “Ko‘pkari” chavandozlik musobaqasida Turkiya jamoasini yengdi. O‘zbek kurashchilari esa 4 bronza medalni qo‘lga kiritdi. “To‘qqiz qumaloq” intellektual o‘yinida o‘zbek sportchilari musobaqalarning 5 turiga yo‘llanma oldi.
“Ko‘pakari” bo‘yicha Turkiya bilan bellashgan o‘zbekistonlik chavandozlar raqiblarini 6:2 hisobida mag‘lub etdi. Bu bilan A guruhida O‘zbekiston ochkolar bo‘yicha Qirg‘izistondan keyin ikkinchi o‘rinda bormoqda. Bugun o‘zbek chavandozlari Qirg‘iziston jamoasi bilan maydonga tushdi. Ammo o‘zbek chavandozlari bugungi o‘yinda Qirg‘iziston jamoasiga 11:0 hisobida boy berdi
Kurash musobaqalarida esa o‘zbek pahlavonlari 4 bronza medalni qo‘lga kiritdi va medallar soni bo‘yicha Mongoliya bilan bir qatorda 6 - o‘rinda turibdi. Bronza medallarni vazni 84 kilogacha bo‘lgan polvonlar bellashuvida Qudrat Bozorboyev va Kamoliddin Mahkamov qo‘lga kiritdi.
Qirg‘iziston kurash bo‘yicha 8 ta oltin, 12 kumush, 5 bronza, jami 25 medal bilan birinchi va ikkinchi o‘rinni egallamoqda. Turkmaniston kurashchilari 3 oltin, 2 bronza medal bilan uchinchi o‘rinda, Qozog‘iston 1 oltin,1 kumush, 5 bronza medal bilan to‘rtinchi, Tojikiston 1 oltin, 2 bronza medal bilan beshinchi o‘rinda turibdi.
“To‘qqiz qumaloq” intellektual o‘yinida o‘zbekistonlik Jaksibek Xolmurodov AQSh va rossiyalik raqiblaridan ustun kelib 4 o‘yinda 3 g‘alabani qo‘lga kiritdi. U hozir turnir jadvalining 5 o‘rnida bormoqda.
Yana bir o‘zbekistonlik sportchi Bekzod Hayitboyev 4 o‘yinda 2 ochko to‘plab, turnir jadvalining 9 o‘rnini egallagan. “To‘qqiz qumaloq” bo‘yicha yakuniy natijalar 14 sentabrda e‘lon qilinadi. Jaksibek Xolmurodov keyingi o‘yinlarda yaxshi natija ko‘rsatib, ikkinchi yoki uchinchi o‘rinni egallash imkoniyatiga ega.
Бутунжаҳон кўчманчилар ўйини ўтказилаётган ҳудуд этношаҳарчага айлантирилди
Birinchi Butunjahon ko‘chmanchi o‘yinlari 9 -14 sentabr kunlari Qirg‘izistonning Cho‘lponota shahrida o‘tkaziladi. O‘yinlarda dunyoning 17 davlati – Ozarbayjon, Avstriya, AQSh, Rossiya, Braziliya, Belarus, Germaniya, Qozog‘iston, Litva, O‘zbekiston, Mongoliya, Afg‘onistonn, Tojikiston, Turkmaniston, Turkiya, Shvetsiya va Janubiy Koreyadan kelgan sportchilar ishtirok etmoqda.
