Линклар

logo-print

Россия Теннис федерацияси Мария Шарапова Бразилияда бўладиган бу йилги Олимпияда ўйинларида ўз мамлакатини тақдим қилади, деб умид билдирди.

Федерация раҳбари Шамил Тарпишчев 8 март куни - Шарапова спортчилар учун тақиқланган дорини истеъмол қилгани учун ўйиндан четлатилганидан бир кун ўтиб баёнот берди.

7 март куни Мария Шарапова Австралиядаги 2016 йилги очиқ чемпионат давомида ўтказилган допинг-тестдан ўтолмаганини тан олди.

Лос-Анджелесда ўтган матбуот анжуманидаги чиқишида спортчи 10 йил давомида мелдоний моддаси мавжуд дорини истеъмол қилиб келганини тан олди:

"Мен катта хатога йўл қўйдим. Аммо, спортдаги карьерамни бу шаклда тугатишни истамас эдим. Умид қиламанки, менга теннисда қолишим учун яна бир имконият берилади", деди Шарапова.

Бу модда 2016 йилнинг 1 январидан бошлаб допинг сифатида спортчилар учун тақиқланди.

28 яшар теннисчи дунёдаги энг йирик 4 теннис турнирларида 5 бора чемпион бўлган.

Допинг хабари ортидан Nike спорт кийимлари ва TAG Heuer соат ишлаб чиқарувчи брендлар Мария Шарапова билан ҳамкорликни тўхтатиши мумкинлигини маълум қилди.

XS
SM
MD
LG