Линклар

logo-print

Ahmadboy dramasi: Kreditorlar orasida aqldan ozganlar bor!


Ahmad Tursunboev hibsga olinishi ortidan kreditorlar uning uyi o‘ngiga to‘plana boshlashdi

Ahmad Tursunboev hibsga olinishi ortidan kreditorlar uning uyi o‘ngiga to‘plana boshlashdi

Ozodlik suhbatlashgan toshkentliklardan ikkitasi¸ o‘zi bilgan odamlardan kamida ikkitasining Ahmadboy qamalganini eshitib¸ aqldan ozib qolganini bildirdi.

Ayni paytda "Toshkent" telekanali ham chinozlik Ahmad Tursunboevga bor-budini berib¸ chuv tushganlar dramasi haqida yangi ko‘rsatuv hozirlamoqda.

Teleko‘rsatuv qahramonlari – chuv tushganlar

21 iyun kuni Toshkent viloyati Chinoz tumanida Ahmad Tursunboev moliyaviy piramidasiga bor-budini tikkan kreditorlar haqida yangi videolavha suratga olindi.

Ahmadboyning "aldov va firibgarlik" texnologiyasi haqidagi ko‘rsatuvning joriy hafta "Toshkent" telekanali orqali namoyish etilishi kutilmoqda.

Ozodlik manbalariga ko‘ra¸ bu syujetda Ahmadboydan kuyganlarning ichki ishlar tizimlariga ariza bilan murojaat qilishlari rag‘batlantirilgan.

Ozodlik bilan suhbatda Chinoz hokimligi rasmiylaridan biri¸ 21 iyungi suratga olishlar Ahmadboyning ofislari barobarida¸ tuman hokimligida ham bo‘lib o‘tganini bildirdi.

"Hokimlikka besh-oltita Ahmadboyga pul berganlarni olib kelib¸ gapirtirishdi. Ular qanday qilib bor-yo‘qlarini unga berganlari haqida gapirishdi. Ikki-uch kun ichida ko‘rsatiladigan bu programmada Ahmadboyga pul berganlarni Chinoz ROVDga kelib¸ ariza tashlab ketishga chaqirishdi"¸ dedi Chinoz hokimiyati mulozimi.

Teleko‘rsatuvni suratga olish jarayoni chinozliklar orasida yangi mish-mishlarning tug‘ilishiga turtki bo‘ldi.

Ozodlikka ma’lum bo‘lishicha¸chinozliklar hokimiyat binosi oldidagi harakatlarni "Ahmadboyni olib kelishib¸ majlis qilishibdi," deya talqin qilishgan.

Ayni paytda¸ nafaqat chinozliklar¸ balki Ahmadboyning butun O‘zbekiston bo‘ylab tarqalgan kreditorlari orasida turli mish-mishlar urchib bormoqda.

Ulardan biriga ko‘ra¸ Toshkentda Shanxay Hamkorlik Tashkiloti sammiti o‘tib bo‘lishi bilan¸ aniqrog‘i¸ 28 iyundan Ahmad Tursunboevning uyiga qaytib¸ o‘z ishini davom ettirishi¸ pul olganlarga pulini qaytib berishi haqidagi ovozalardir.

O‘zini Ahmadboyning vakili deb tanishtirgan shaxsning ijtimoiy tarmoqlar orqali tarqatilgan audiosuhbatida aytilgan bu gap - Ozodlik suhbatlashgan kreditorlardan biriga ko‘ra¸ Ahmadboyga uyi¸ mashinasi¸ molini sotib¸ pulini olib borib berganlarni “yurak xurujidan ushlab turgan” so‘nggi umid.

"Ko‘p odamdan eshitayapman¸ 28 iyungacha kutib turaylik¸ degan gapni. 28 da Ahmadboyga pul berganlarning kamida yarim pulini qaytib berishadi¸ degan gap tarqagan. Bu gap qaerdan¸ kimdan chiqqan¸ biz ham bilmay o‘tiribmiz. Bu odamlar yuragi yorilib o‘lmasligi uchun o‘zlarini ovutishga o‘ylab topgan gap bo‘lsa keragov¸" deydi mashinasini Ahmadboyga topshirgan yangiyo‘lliklardan biri.

To‘ylar to‘xtatildi¸ oilalar buzilmoqda

Ozodlik suhbatlashgan toshkentliklardan biriga ko‘ra¸ bor jamg‘armasini Ahmadboyga "aylantirib" pul qilish uchun bergan ko‘p oilalar ro‘za tugashiga belgilangan nikoh to‘ylarini bekor qilishga majbur qolgan¸ kreditorlar orasida aqldan ozayotganlar va oilasidan ajrayotganlar bor.

"Mahallamizda uchta oilada shunaqa bo‘ldi. Og‘aynilarim to‘yi bekor bo‘ldi. Hamma pulni Ahmadboyga berib¸ uni olganidan keyin to‘y qilmoqchi bo‘lishgan. Endi to‘yga puli yo‘q. Ishxonamdagilardan bittasi¸ qo‘shnisining o‘ziga-o‘ziga gapiradigan bo‘p qolganini aytdi. Qizini uzatishga to‘plagan pulini ko‘paytirib olay deb¸ Ahmadboyga bergan ekan. Qamalganini eshitib¸ aqldan ozib qopti. Yangiyo‘lning Rabochiy degan joyida 47 yoshlardagi bir odam o‘zini osibdi¸ degan gap yuripti¸ buni aniq bilmayman lekin. Biz bitta mashina bergan bo‘lsak¸ amakilarim uchtalab mashina bergan Ahmadboyga. Nafasini ichiga yutib o‘tiribdi. Hozircha da’vo qilmaymiz¸ deyishayapti¸ yana kim biladi¸" deydi Ozodlik suhbatdoshlaridan biri.

"Aqldan ozish oson ekan"

“Rodnoy tog‘am jinni bo‘p qoldilar¸ kennoyim insulьt bo‘ldilar¸ bir taraflari ishlamay¸ yotiptilar”¸ deb xabar berdi yana bir toshkentlik Ozodlikka.

"Onamning ukasi¸ tog‘am bir umr yiqqan pulini Ahmadboyga bergan ekan. Aniq qanchaligini bilmaymiz¸ aytmayaptilar¸ chunki aqldan ozib qoptilar. Ahmadboy qamaldi¸ deyishi bilan uylarini zinasidan tusharmishlar-chiqarmishlar¸ chiqarmishlar-tusharmishlar. Qo‘llarida bloknot emish. Onam borib rosa yig‘lab keldilar. Domlaga oborib¸ o‘qitib kelishibdi¸ lekin haliyam shu ahvolmish. Bu yog‘da amakimning xotini¸ Ahmadboy xabarini eshitib¸ insult bo‘lib yotibdi. Chap tarafi umuman ishlamay qopti. Kaptiva bergan ekanlar. Bizning mahallada kuymagan hech kim qolmadi¸ chunki hamma borini Ahmadga bergan ekan. Biz ham Kobaltimizni Murodga¸ naqd pulimizni Ahmadga bergan edik. Qulog‘ini ushlab ketdi endi¸" deydi toshkentliklardan yana biri.

Zaif bayonot

21 iyun kuni Ozodlik muxbiri Ahmad Tursunboevga bor-yo‘g‘ini berib¸ xonavayron bo‘layotgan o‘n minglab o‘zbekistonlikka nima bo‘ladi¸ degan savolga javob izlab¸ voqealar qaynog‘i joylashgan Chinoz tuman hokimligiga murojaat qildi.

Hokimiyat vakili¸ "davlat o‘z fuqarolarini tashlab qo‘ymasligi¸ hozirda Ahmadboyga aldanganlarga qanday yordam berish masalasi ko‘rib chiqilayotganini iddao qildi.

Rasmiyga ko‘ra¸ Ahmad Tursunboevga pul¸ mashina yoki boshqa qimmatbaho narsa berganlar¸ firibgarlik qurboni hisoblanadi va ular Tursunboev ustidan shikoyat arizasi bilan Chinoz tuman ichki ishlar bo‘limiga murojaat qilishlari lozim.

"Murojaat qilganlar ishi¸ albatta¸ ko‘rib chiqiladi. Davlat hozir musodara qilingan pul va mulk bilan aldanganlarga ko‘rgan zararining qaysidir qismini qoplash ustida bosh qotirayapti. Ular ariza berishdan qo‘rqmasliklari kerak. Jinoyatni ular emas¸ Ahmadboy qilgan axir"¸ dedi o‘zini tanishtirmagan hokimiyat vakili jumladan.

XS
SM
MD
LG