O‘zbekistonda taniqli kinochilar suratga olgan “Yor-yor”¸ “Abdullajon”¸ “Vatan”¸ “Alpomish” kabi filmlar qaychilanib efirga uzatilmoqda. O‘zbekistonlik taniqli kino ustasi Zulfiqor Musoqov o‘zi yaratgan filmlarning qaychilangani yuzasidan izoh so‘rab O‘zbekiston teleradioshirkati raisi Alisher Xo‘jaevga murojaat qildi.
Musoqovning aytishicha “Vatan” filmidan 8 ta epizod senzura tarafidan kesib tashlangan.
O‘zbekistonda u yoki bu san’atkor “istalmagan shaxsga” aylanganidan keyin uning qiyofasi filmlardan qaychilanishi odatga kirgan.
Qo‘shiqchi Abdulaziz Karimning mamlakatdan ketgani ortidan u qatnashgan Toxir va Zuhra filmidagi epizod qaychilangan. Shuningdek “Alpomish” filmidan Obid Asomov qatnashgan sahnalar kesib tashlangan.
Obid Asomov "Amerika ovozi" muxbiri bilan suhbatda shunday degan edi:
“Oq bino oqshomlari” filmidan esa Sherali Jo‘raev qo‘shig‘i yangragan sahnalar qaychilangan.
“Oq bino oqshomlari” filmining ssenariy muallifi Nurilla Otaxonov Ozodlik bilan suhbatda tarixiy kinolarning qaychilanishi tarafdori emasligini bildirdi:
Qanaqa sahnasi qaychilangani muhim. Milliyligimizga teskari joyi (o‘zbek kinochilarining deyarli hammasiga tekkan kasal) olib tashlangan bo‘lsa, tarafdorman. Siyosiy g‘oyasi yo hur fikri uchun qaychilangan bo‘lsa, qarshiman. Shu, xolos¸ deydi yozuvchi.
Ozodlikka ma’lum bo‘lishicha taniqli kinochi Ali Hamroev tomonidan 1965 yili suratga olingan “Yor-yor” filmidagi ko‘p sahnalar¸ jumladan to‘ydagi kelin-kuyovlarning o‘pishish sahnasi olib tashlangan.
Ali Hamraev Ozodlik bilan suhbatda “Sovet ittifoqidagi senzura yana ham badbashara tarzda O‘zbekistonda yashayotganligini” ta’kidladi.
