Колумбия университети тиббиёт маркази изланувчилари кексаларда ақлий қобилиятнинг сустлашини олдини олиш йўлини топишди. Изланиш натижлари “Неврология” журналида чоп этилди.
Изланиш натижларига кўра, 65 ёшдан ўтган одамлар ўрта даражадаги ёки жадал жисмоний машқларни қилиб турса, уларда хотира ва ақлий қобилият секинроқ суратда пастлайди.
Изланувчилар ушбу натижани аниқлаш учун “Шимолий Манхэттен изланиши”да иштирок этган 876 шахсга тегишли маълумотларни ўрганиб чиқишган.
Изланиш иштирокчилари дастлабки текширувдан беш йил ўтиб қайтадан текширилган.
Изланишни олиб борган олимлардан бири доктор Митчел Элкинд: “Изланишларимиз машқ қилмаган ёки енгил машқ қилган одамлар ўрта ёки жадал даражада машқ қилган шахсларга солиштирганда ўз ақлий қобилиятларини 10 йил қаришга тенг келадиган даражада тезроқ йўқотганини кўрсатди”, деди.
Иштирокчиларнинг 90 фоизи умуман жисмоний машқ қилмаганини ёки енгил машқ қилганини айтган. Енгил машқларга юриш ҳамда йога мисол бўла олади. Қолган 10 фоизи эса ўрта ёки жадал машқлар билан шуғулланганини айтган. Бундай машқларга югуриш, аэробика ёки пластик гимнастика мисол бўла олади.
Изланиш бошида хотираси ва ақлий қобилияти жойида эканлиги аниқланган шахслар орасида жисмоний машқ билан кам ёки умуман шуғулланмаганлар беш йил ичида жадал машқ қилганларга солиштирганда тезроқ ақлий қобилиятларини йўқотган.
Иштирокчиларнинг оддий вазифаларни бажариши ҳамда рўйхатга киритилган сўзларнинг нечтасини эслаб қола олиши текширилган. Машқ қилганлар билан қилмаганлар ўртасидаги фарқ 10 йилга мос келади.
