Озодликнинг “Эркин микрофон”ига мурожаат қилган бухоролик Зариф Бозоров¸ Ўзбекистондаги суд ижрочилари расмий ҳужжатларда мамлакатдаги ўртача иш ҳақини қарийб 1 миллион сўм деб белгилаганидан ҳайратда эканини айтади. Суҳбатдош¸ расмийлардан бу рақамнинг қайси асос¸ қайси кўрсаткичларга мувофиқ ҳисоблаб чиқилганини тушунтириб беришни сўради.
Бухоролик Зариф Бозоров¸ муқим иши йўқ¸ мавсумий устачилик билан шуғулланувчи ўғлининг суд ижрочилари таъқибидан қочиб қутула олмаëтганини айтади.
Отага кўра¸ маҳаллий суд ижрочилари биринчи оиласидан ажраб¸ иккинчиси билан бир хоналик уйда ижарада яшаëтган ишсиз ўғлини биринчи оиласига суд ҳукмида кўрсатилмаган миқдорда алимент тўлашга мажбурламоқда:
- Суд энг кам иш ҳақининг 16 фоизи миқдорида алимент тўлаш ҳақида қарор чиқарган. Ижрочилар¸ Ўзбекистонда ўртача иш ҳақи 970 минг сўм атрофида¸ шундан тўлайсиз¸ деяпти. Биринчидан¸ қаердан олган булар бунақа ўртача иш ҳақини? Иккинчидан¸ қаерда шунақа маошлик иш бор? Учинчидан¸ суд ижрочилари суд ҳукмини амалга оширадими¸ ëки ўзича ҳукм чиқарадими? Шу саволларимга жавоб берадиган топилмаяпти¸ дейди Озодликка мурожаат қилган Зариф Бозоров.
Қуйида бухоролик суҳбатдош мулоҳазаларини тинглашингиз мумкин.
