Бир ҳафтадан буён Тошкент, Андижон, Фарғона ва Наманган вилоятларида аҳоли рақамли тюнерлар орқали кўриб ўтирган 13 ўзбек ТВ каналлари ёнига яна 15 та канал қўшилди. Улар орасида 8 рус каналарлари ҳам бор. Бундан ташқари телетомошабинлар рус ва инглиз тилидаги EuroNews ва National Geographic каналларни кўришлари мумкин. UZDIGITAL TV компанияси расмийларига кўра, айни пайтда бу вилоятларда янги рақамли телевидениенинг Т-2 режими синаб кўриляпти. Янги йилдан бошлаб ТВ томошабинлари учун кўрсатувлар пуллик бўлиши айтиляпти. Ўзбекистонда рақамли телевидениени тадбиқ этиш мақсатида ташкил этилган UZDIGITAL TV компанияси расмий сайтида пуллик каналлар тарифлари 24 декабрдан бошлаб амал қилиши айтилган.
Наманган вилоятининг Поп туманида истиқомат қиладиган ўқитувчи Шариф Абдуллаевнинг айтишича, бир ҳафтадан буён одамлар телевизорда Россия каналларини томоша қилмоқда:
“Аввалига ўн бешта рус канали очилган эди. Кейин бештаси “нет сигнала”га ўтиб кетди. Лекин қолган ўнтаси кўрсатяпти. Россиянинг биринчи канали, РТР, НТВ, Звезда ва бошқа каналлари жуда тиниқ кўрсатяпти. Шу Ўзбекистон телевидениелари оладиган антеннадан кўрсатиляпти. Биздагилар бу яхши бўлди, энди сунъий йўлдош антеннаси ўрнатиш ҳам шарт эмас, дейишяпти”, дейди Шариф Абдуллаев.
Наманганлик телевизор устаси Нўъмонжоннинг айтишича, Ўзбекистон ТВси кўрсатувларини сифатли кўриш учун одамлар томдаги антеннага тюнер улаб олишган:
“Ҳозир тюнер деган бир ускуна чиққан. Шуни антенага қўшиб олсангиз рақамли ТВга уланасиз, кўрсатувлар сифати жуда яхши бўлади. Кимнинг ана шундай тюнери бўлса ўшаларнинг телевизори рус каналларини кўрсатяпти. Ҳозир деярли ҳамма шу тюнердан улаб олган”, дейди Нўъмонжон.
UZDIGITAL TV компаниясининг ўзини таништирмаган мутахассиси Россия телеканалларининг Ўзбекистоннинг катта вилоятларида кўрсатилаётганини тасдиқлар экан, бу янги рақамли телевидениенинг тест синови эканлигини таъкидлади:
“Ҳозирча бу тестовий режимда, синов тариқасида бўляпти. Худо хоҳласа янги йилдан очилсак, янги оборудование сотиб олиб ишлатишса бўлади. Ҳозир Ўзбекистоннинг 12 каналини “Стандарт” тариф режасида кўришяпти, энди Т-2 режимини синаяпмиз. Бунда бошқа каналлар ҳам қўшилади, жумладан Россия каналлари ҳам. Янги йилдан бошлаб рақамли телевидениега уланиш пуллик бўлади”, деди компания мулозими.
UzDigital TV 3 та дастурлар пакетини таклиф қилмоқда:
Эконом - қўшимча 4та Россия канали - 4000 минг сўм
Стандарт - қўшимча 13 та канал (Россия, Европа ва АҚШ) - 10 минг сўм
Микс - қўшимча 47 та канал -(кўплаб Росся каналлари) 15 мин сўм
Янги режимдаги рақамли телевидениени кўриш учун антеннага махсус тюнер сотиб олиш шарт бўлади. Ўз исми айтилишини истамаган андижонлик журналистнинг айтишича, бу тюнерларни бугун бозордан арзонга сотиб олиш мумкин.
“Бу тюнерлар ҳозир бозорда 150-200 минг сўм атрофида туради. Асосан Хитойда ишлаб чиқарилган тюнерлар. Лекин мен олган маълумотга кўра, янги рақамли телевидение ишга тушганидан кейин Ўзбекистоннинг “Артел” компанияси ишлаб чиқарган тюнерларга мослаштирилади. Яъни ўша тюнерларга ўрнатилган махсус чиплар орқали тўловни амалга ошириш имкони бўлади”, деди журналист.
Ўзбекистонлик мустақил журналист Алимардон Аннаевнинг айтишича, ўзбек телевидениеси мустақил бўлмаган ва у бутунлай цензура қилинадиган бир шароитда Россия телеканалларининг Ўзбекистонда кўриш осонлашаётгани ҳавотирга сабаб бўлиши мумкин:
“Ўзбекистонда йиллар давомида яратилган информацион биқиқлик сабабли одамларнинг холис ахборотга бўлган эҳтиёжи жуда ошиб кетди. Ҳозир одамлар асосий хабарларни Ўзбекистондаги интернет сайтларидан ўқияпти. Ана шу сайтларда берилаётган хабарларнинг 90 фоизи русча интернетлардан таржима қилиняпти. Яъни, бу хабарларга рус журналистлари, Кремль призмаси орқали қараляпти. Уларнинг воқеаларга муносабатлари, қарашлари сингдириляпти. Энди, бутун Ўзбекистон барча рус каналларини кўра бошласачи? Балки ундаги кўнгилочар дастурларга эҳтиёж бордир, лекин Кремль идеологларининг бу телевидениелар орқали айтадиган гаплари ўзбекистонликлар учун қанчалик зарарли эканлигини тасаввур қилиш қийин эмас”, дейди Алимардон Аннаев.
Мустақил журналист Алимардон Аннаев билан суҳбатнинг тўлиғини қуйида тингланг:
