Тоҳир Йўлдош яна "тилга кирди"
Ўзбекистон исломий ҳаракати ўз етакчиси тириклигини кўрсатиш учун тақдим қилган сўнгги суратлардан бири.
27.11.2009
Покистон армияси ва ўзини Ўзбекистон исломий ҳаракатининг собиқ аъзоси деганлар ҳаракат раҳбари Тоҳир Йўлдошнинг ўлганини хабар қилганидан уч ойча вақт ўтиб¸ Тоҳир Йўлдошнинг Қурбон ҳайити табриги¸ деб даъво қилинган аудио ëзув пайдо бўлди.
Жума куни Ўзбекистон исломий ҳаракати ўз веб саҳифасида айни ҳаракат етакчиси Тоҳир Йўлдошнининг Қурбон ҳайит табриги экани айтилган аудиоёзувни эълон қилди. Овоз соҳиби мурожаатида бугунги сана - ҳижрий 1430 йил зулҳижжа ойининг 10-куни тилга олган. Аммо қарийб 15 дақиқалик мурожаатда табрикнинг айнан 2009 йилнинг 27 ноябрида қилинганини тасдиқловчи бирор далил йўқ.
Ҳозирча бу аудио баёнотнинг ҳақиқий экани¸ яъни унинг Жундуллоҳ студиясидаги техник имконлар маҳсули эмаслигини мустақил манбалардан тасдиқлашнинг имкони йўқ.
Аввалроқ, Ўзбекистон Исломий ҳаракати етакчиси Тоҳир Йўлдошнинг ҳалок бўлгани хабар қилинган эди.
Сентябр ойи охирларида Покистондан ўзини Тоҳир Йўлдошнинг сафдоши ва тансоқчиси деб танитган кимса Озодлик радиосига телефон қилиб, ўша ой бошида Тоҳир Йўлдош яраланиб бир оёғидан айрилгани ва эртаси куни жон таслим қилганини маълум қилган эди.
Саноқли кунлар ўтиб ўзини Ўзбекистон исломий ҳаркатининг вакили Абдул Фаттоҳ Аҳмадий деб танитган шахс Озодлик радиосига электрон мактуб йўллаб, Тоҳир Йўлдошнинг ўлими тўғрисидаги хабарлар ҳақиқатдан йироқлигини маълум қилган эди.
Аммо шу пайтгача Тоҳир Йўлдошнинг ўзи бу ҳақида ҳеч бир баёнот бермаган.
"У бу каби турли миш-мишларга жавоб беришни ўзига эп кўрмайди. Аммо тез орада у бундан кўра жиддийроқ масала бўйича баёнот бермоқчи", деб билдирган эди Ўзбекистон исломий ҳаракати вакили.
Яқинда, Вашингтонда жойлашган Яқин Шарқ мамлакатлари оммавий ахборот воситаларини тадқиқ этиш институти MEMRI Ўзбекистон Исломий ҳаракатининг Вазиристонда суратга олинган видеоёзуви Тоҳир Йўлдошнинг тирик эканидан дарак бериши ҳақда билдирган.
Ҳозирча Интернетда очиқ намойишга қўйилмаган видеотасвирда Тоҳир Йўлдошнинг саккиз ярим дақиқа давомида унча катта бўлмаган мужоҳидлар гуруҳи олдида нутқ сўзлаётгани акс этган.
Аммо, видеотасвир суратга олинган сана тилга олинмаган. Тоҳир Йўлдош ҳалок бўлгани ҳақда аввал ҳам бир неча бор хабар қилинган ва Тоҳир Йўлдош ўзининг ўлими ҳақидаги хабарларни инкор этиб келган.