Нью Йоркда судга тортилган Ўзбекистон фуқароси 26 яшар Дилҳаёт Қосимов "Исломий давлат"ни қувватлаб, пул йиққанига оид айбловни инкор қилди. Бруклин федерал судида ўтган маҳкамага Қосимов билан бирга келтирилган яна уч ўзбек - 24 яшар Абдурасул Жўрабоев, 30 яшар Аброр Ҳабибов ва қозоғистонлик 19 яшар Аҳрор Саидахметовлар ҳам айбловни бўйнига олмаслигини такрорлади.
Reuters агентлигининг хабар қилишича, ИДга қўшилишни истаган шахс учун 1 минг 600 АҚШ доллари миқдорида пул йиғишда иштирок этганликда айбланган Дилҳаёт Қосимов ва унга жиноий шерик кўрилган яна уч ўзбек устидан чоршанба куни Бруклин судида маҳкама бўлиб ўтган.
Маҳкамада тўрт айбланувчининг адвокатлари ўз ҳимояланувчилари уларга қўйилган айбловларни тан олмаслиги ҳақидаги кўрсатмани судга тақдим қиллди.
Reuters чоршанба кунги маҳкамада айбловни тақдим қилган прокурор Александр Соломон судланувчиларга нисбатан даъво қилинган жиноятни "бегуноҳ қурбонларни пичоқдан ўтказиш учун пул беришга тенг" деб таърифлаганини ёзди.
Шунингдек, Қосимов учун давлат томонидан ёлланган адвокат Фредерик Коҳн "судловнинг ҳали бошланғич босқичда" эканини айтиб, изоҳдан тийилаётгани ҳам хабар қилинди.
6 апрель куни АҚШ прокурори ҳибсдаги тўртинчи ўзбек Дилҳаёт Қосимовни ўзбекистонлик Aброр Ҳaбибов билaн биргaликдa қозоғистонлик Aҳрор Сaидaхметовнинг Суриягa бориб “Исломий дaвлaт” гуруҳигa қўшилиши учун 1600 доллaр йиғишда айблаган.
Аввалига Қосимов февраль ойида Нью Йоркда миграция қонунларини бузганликда гумонланиб қўлга олинган ва айблов эълон қилингунига қадар Нью Жерсидаги ҳибсхонада сақланаётган эди.
"Исломий давлат"ни қувватлаши ва молиявий кўмак беришга уринишга оид айбловларни тан олмаётган қолган уч ўзбек ҳам шу йилнинг февраль ойида Ню Йорк ва Флорида штатларида қўлга олинган.
Ҳибсдан бир неча кун ўтиб, АҚШ суди ўзбекистонлик Абдурасул Жўрабоев, Аброр Ҳабибов ва қозоғистонлик Аҳрор Саидахметовларга “Исломий давлат” гуруҳига молиявий кўмак кўрсатишга ҳаракат қилганлик ва Туркия орқали Сурияга ўтиб, жиҳодий гуруҳига қўшилмоқчи бўлганлик" айбини қўйган.
Прокурорлар бу тўрттовлондан бири - қозоғистонлик Аҳрор Саидахметовни 25 феврaль куни Нью Йоркдаги Кеннеди хaлқaро aэропортидa Туркиягa учишга чоғланган пайтида ҳибсгa олган ва бу айбловнинг асосий далилларидан бири бўлиб қолмоқда.
Ҳибсга олиш чоғида Саидахметовнинг ёнидан нақд пул ҳам чиққан ва дастлабки хабарларда унинг бу пулни жиноий шерикликда айбланаётган ўзбеклар йиғиб берганини тан олгани айтилган эди.
Суд ҳужжaтлaридa aйтилишичa, Дилҳаёт Косимов Сaидaхметовгa пул бергaнини тaн олгaн ва унинг Суриягa бормоқчи эканини aввaлдaн билгaнини айтган.
Бундан ташқари, айбловда прокурорлар тергов давомида Қосимов интернет мулоқотларда бошқа ҳамюртларини қуролли жиҳодга чақирганини аниқлагани даъво қилинмоқда.
Нью Йоркдa истиқомат қилиб келган марказий осиёлик уччовлон 13 март кунги маҳкамада ҳам ўзлaригa қўйилгaн aйбловлaрни тaн олмaслигини билдирган.
Бунга қадар АҚШда 2012 йилдан бери бир қатор ўзбеклар террорчи гуруҳлар билан алоқадорликда гумонланиб қўлга олинган.
2012 йил 13 июль куни АҚШнинг Бирмингем округидаги Федерал суд ҳакамлари президент Барак Обамани ўлдирмоқчи бўлганини тан олган 22 яшар ўзбекистонлик Улуғбек Қодировни 15 йилга озодликдан маҳрум қилган эди.
2012 йилнинг 21 январь куни Чикагонинг О’Ҳара халқаро аэропортида 35 ёшли Ўзбекистон фуқароси Жамшид Мухторов ҳибсга олинган . АҚШдан сиёсий бошпана олган¸ Ўзбекистонда расман рўйхатга олинган "Эзгулик" инсон ҳуқуқлари жамиятининг Жиззах бўлимини бошқарган Мухторов Исломий жиҳод иттифоқига аъзоликда айбланиб¸ ҳибсда сақланмоқда.
Айни 2012 йилнинг мартида Филаделфия шаҳрида яна бир Ўзбекистон фуқароси Бахтиëр Жумаев террорчиликка алоқадорликда гумонланиб ҳибсга олинганди.
Мухторовга яқинлик ортидан ФБР агентлари назарига тушган яна бир ўзбекистонлик Фазлиддин Қурбонов 2013 йилнинг 16 май куни Айдаҳо штатининг Бойси шаҳрида террорчи гуруҳга ëрдам берганликда гумонланиб ҳибсга олинди.
АҚШ маҳкамаси ҳозирча бир-бирига алоқадор бўлган Жамшид Мухторов¸ Бахтиëр Жумаев ва Фазлиддин Қурбоновлар иши юзасидан ҳукм чиқарганича йўқ.
