Германияда Гессен федерал ери бош прокуратураси асли ўзбекистонлик миллиардер Алишер Усмоновга нисбатан пул ювиш гумони билан очилган иш терговини ёпган. Бу ҳақда Озодликнинг рус хизмати мухбири хабар қилди.

Озодлик журналисти билан суҳбатда бош прокурор Георг Унгефук “Россия Федерациясидан бўлган 71 ёшли тадбиркорга нисбатан пул ювиш гумон билан очилган иш бўйича тергов айбланувчининг розилиги билан 2024 йил 11 октябрида тўхтатилган”ини қайд этган.

Айни пайтда айбланувчи 4 миллион евро маблағ тўлайдиган бўлган. Бунинг 1,5 миллиони жамоатчилик учун манфаатли фаолият билан шуғулланувчи кўплаб муассасалар эҳтиёжларига кетади, 2,5 миллион евро эса давлат ҳисобига ўтказилади. Маблағ ҳисобрақамларга келиб тушганидан кейин жараён ёпилади.

ГФР қонунчилиги, агар “юклатилган пул мажбуриятларини бажариш йўли билан жиноий таъқиб зарурати бартараф қилинган бўлса”, прокуратура ва судларга жиноят терговини тўхтатиш имконини беради. Билдирилган айблов оғирлиги бунга монелик қилмаслиги лозим.

Қарор қабул қилишда прокуратура Усмоновга айблов билдирилаётган хатти-ҳаракатлар учун ГФРда ҳам, Гессен федерал ерида ҳам тергов қилиш имконсизлиги ҳолатини ҳисобга олган. Бундан ташқари, бошқа мамлакатда содир этилган жиноятлар Германиядаги жисмоний ва юридик шахсларга зарар етказмаган. Айбланувчининг хатти-ҳаракатлари оқибатида ГФРда молиявий зарар юзага келган эмас, жиноят содир этилганидан бери эса анча вақт ўтиб кетган.

Жиноят ҳуқуқи бўйича берлинлик эксперт Озодликка Усмоновга нисбатан қўлланилган қонунчилик параграфи қўйилган айбловнинг ўта оғир экани, бироқ жиноят иши уни тергов қилиш қарийб имконсизлиги учун тўхтатилганидан далолат беришини айтган.

Агар иш судгача етиб борганда, далиллар етарли бўлмагани сабабли ҳукмдан воз кечишга ва Усмоновни оқлашга тўғри келган бўларди. Ҳуқуқшуносга кўра, россиялик тадбиркорнинг оқланиши реал вазият ва жиноятларнинг оғирлигига мувофиқ бўлмасди.

“Афтидан, Гессен бош прокуратураси максимал даражада юқори бўлган пул мажбуриятларини юклаб, терговни тўхтатишга қарор қилган”, дея таъкидлаган ҳуқуқшунос.

Эронда Теҳрон университетининг толибаси ОТМ кампусида устки кийимларини ечиб ташлагани ортидан қўлга олинди. Бу ҳақда биринчи бўлиб Эрон телеграм-каналлари ва ҳуқуқбонлар хабар қилишди.

Уларнинг иддаосича, толиба ҳижобни рисоладагидек ўрамагани учун хавфсизлик хизмати ходимлари томонидан жисмоний таъқибга учраган.

Ижтимоий тармоқларда хавфсизлик кучлари ходимлари ва ҳукуматпараст “Басиж” ёшлар ташкилоти вакиллари қўлга олинган толибанинг кийимларини йиртиб ташлашгани ҳақида ёзишмоқда. Айни пайтда айрим гувоҳлар толибанинг ўзи ечинганини иддао қилишяпти.

Маълумотларга кўра, толиба полицияга йўлланган ва у билан алоқа йўқ. Бу орада университет вакили қўлга олинган қиз руҳан соғлом эмаслигини, у клиникага йўлланганини билдирган.

Толибанинг исми очиқланган эмас.

БМТнинг инсон ҳуқуқлари бўйича Эрондаги махсус маърузачиси Теҳронда содир бўлган воқеани диққат билан кузатиб турганини билдирган. Amnesty International инсон ҳуқуқлари ташкилоти эса қўлга олинган толибанинг зудлик билан озод қилинишини, унинг ёнига адвокати ва оила аъзолари қўйилишини талаб қилиб чиққан.

Жорий йилнинг апрель ойида Эрон Ислом инқилоби посбонлари корпуси мамлакатда аёллар учун қатъий дресс-кодга риоя қилиш масалалари бўйича янги ҳуқуқ-тартибот органи тузилгани ҳақида эълон қилган. Мазкур баёнот Эрон расмийлари сўнгги кунларда ахлоқ қоидаларига мувофиқлик юзасидан текширувларни кучайтиргани, рейд иштирокчилари аёллар билан қўпол муомалада бўлаётганига оид хабарлар пайдо бўлгани ортидан берилган.

2022 йил сентябрида Эронда маҳаллий толибалардан Маҳса Аминий вафот этган эди. У ҳижобини нотўғри ўрагани учун қўлга олинганини иддао қилган Ахлоқ полицияси кейинроқ унинг “юрак хуружидан” ўлганини билдирган. Аминийнинг яқинлари толиба полициячилар томонидан ўлгунича калтакланганини таъкидлашган.

Аминийнинг ўлимидан кейин Эрон оммавий кўча намойишлари бошланган. Норозилик чиқишлари бир неча ой давом этган ва улар сўнгги бир неча ўн йил ичида Эроннинг консерватив раҳбариятига қарши энг жиддий қўзғалишлардан бири ўлароқ баҳоланган. Мазкур тўқнашувларда юзлаб одам ҳалок бўлган, минглаб киши ҳибсга олинган, норозилик намойишларининг бир неча иштирокчиси эса қатл этилган.

АҚШда 5 ноябрь кунига белгиланган президент сайловига икки кун қолар экан, якшанба куни Демократик партиядан президентликка номзод Камала Ҳаррис Мичиган штатидаги сайловолди тадбирларида қатнашди, унинг рақиби бўлган республикачи Дональд Трамп эса ҳали кимга овоз бериши маълум бўлмаган Пенсильвания, Шимолий Каролина ва Жоржия штатларига борди.

Ижтимоий сўровлар, аввалда бўлгани каби, номзодлар рейтингида фарқ жуда кичик эканини кўрсатмоқда. New York Times ва Сиена коллежи томонидан 3 ноябрь куни ёйинланган тадқиқотлар вице-президент Ҳаррис ва собиқ президент Трамп овоз бериш натижаси учун муҳим бўлган етти штатда ёнма-ён кетаётганини кўрсатган.

Жорий йилнинг 24 октябридан 2 ноябригача етти штатдаги 7800 дан зиёд муҳтамал сайловчи орасида ўтказилган сўров натижаларига мувофиқ, Камала Ҳаррис кичик фарқ билан Невада, Шимолий Каролина ва Висконсинда, Дональд Трамп эса Аризона, Мичиган, Жоржия ва Пенсильванияда олдинда боряпти. Етти штатнинг барчасида овозлар нисбати тақрибан 3,5 фоиз атрофида бўлиб турибди, дея қайд этилган “Америка овози” мақоласида.

Сўровга кўра, сайловчиларнинг 40 фоизга яқини шу кунгача овоз бериб бўлган ва бу сайловчилар орасида Ҳаррис 8 фоизга олдинда бормоқда, Трамп эса энди овоз беришини айтаётган сайловчилар орасида пешқадамлик қиляпти.

Пенсильванияда ҳар икки номзоднинг ғалаба имкониятлари тенглашган. New York Times нашрининг аввалги сўровларида Ҳаррис тўрт фоизлик фарқ билан олдинда бораётган бу штатда Трамп рақибини қувиб етиб олган.

Молдовадаги президент сайловининг иккинчи босқичида Майя Санду ғалаба қозонган. Бу ҳақда мамлакат Марказий сайлов комиссияси маълумот тарқатди.

Баённомаларнинг 98,9 фоизи қайта ишланганидан кейин Санду сайловчиларнинг 55 фоизи овозини олгани маълум бўлган. Унинг рақиби Александр Стояногло 45 фоиз овоз тўплаган. Бу Санду учун иккинчи президентлик муддати бўлади.

“Молдова, бугун сен ғалаба қилдинг. Биз биргаликда бирдамлигимиз ва демократия кучини ҳамда муносиб келажакка содиқлигимизни кўрсатдик”, деб ёзди Х ижтимоий тармоғида Санду Молдовадаги ва хориждаги юртдошларига миннатдорлик билдирар экан.

Санду асосан хориждаги сайлов участкалари ҳисобидан ғалаба қозонган: чет элдаги диаспора унга ёппасига овоз берган. Мамлакат ичида 51,2 фоиз овоз билан Стояногло ғолиб бўлган. Берилган овозларни санаш бошланганидан кейин у ҳаммани “рақамлар қандай бўлишидан қатъи назар, хотиржамликни сақлаш”га чақирган ва Молдовада “шу тобдан бошлаб сингдирилган нафрат ва бўлинишга нуқта қўйилиши”га умид билдирган.

Санду мамлакатнинг ғарбча йўл билан илгарилаши ва Европа Иттифоқига қўшилиши тарафдори. Стояногло эса мухолифатдаги россияпараст Социалистлар партиясидан номзод ўлароқ кўрсатилган. Сайловда давомат 54,3 фоизни ташкил қилган.

Молдова расмийлари овоз бериш (3 ноябрь) куни яна Москвани сайловга аралашганликда айблаб чиқишган. Кремль бу каби айбловларни аввал бир неча бор рад этган. Promo-LEX ҳуқуқбонлик миссияси кузатувчилари, Озодликнинг молдаван хизмати хабарига кўра, овоз бериш куни қонунбузарликларга оид 220 дан зиёд хабарни қайд этишганини маълум қилишган. Ўша пайтда полиция 190 дан ортиқ қонунбузарлик ҳақида билдирган.

Жорий йилнинг 20 октябрида бўлиб ўтган сайловнинг биринчи босқичида Санду 42,5 фоиз, Стояногло эса қарийб 26 фоиз овоз олган эди. Айни пайтда сайлов олдидан ўтказилган сўровларда Стояноглони сайловчиларнинг тақрибан 11 фоизи дастаклаётгани қайд этилган – сўралганларнинг катта қисми эса (41 фоизгача) кимга овоз беришга ҳали қарор қилмаганини айтган.

Валенсия вилоятининг Пайпорт шаҳрида тошқиндан жабр кўрган аҳолидан хабар олиш учун келган Испания қироли Филиппа VI га норози оломон томонидан лой ва тош отилга ҳамда ҳақорат ёғдирилган.

“Қотил”, дея қичқиришган йиғилганлар Испания қиролига қарата. Ҳақоратдан шаҳарга келган ҳукумат амалдорлари ҳам бенасиб қолмади. Одамлар улардан нима учун аввалроқ келишмаганини сўрашган. Бир муддат сўнг оломонни тутиб туриш учун полициячилар вазиятга аралашишига тўғри келган. Воқеа жойидан олинган кадрларда қўриқчилар Филипп VI ни соябонлар ёрдамида тўсишга уринаётгани акс этган.

Пайпортда олинган суратларда қиролича Летиция юзида ҳам лой изларини кўриш мумкин.

Кейинроқ маҳаллий манбалар қирол ва унинг рафиқаси тошқиндан жабрланган бошқа бир аҳоли пункти - Чивага сафарини қолдирганлари ҳақида маълум қилишган.

Сўнгги расмий маълумотларга кўра, тинимсиз жала туфайли ўтган ҳафтада юзага келган табиий офат натижасида 217 киши қурбон бўлган, уларнинг аксарияти мамлакат шарқидаги Валенсия вилояти турғунлари бўлган.

Тошқин чоғида кўплаб одам бедарак кетгани айтилмоқда.Телефон ва транспорт тармоғига жиддий шикаст етгани учун йўқолган одамларнинг аниқ сонини айтиш қийин бўлмоқда. Транспорт вазири Оскар Пуэнте El Pais нашрига берган интервьюсида тезкор хизматлар айрим участкаларга яна бир неча ҳафта мобайнида қуруқлик йўли орқали бора олмаслиги мумкинлигини билдирган.

Табиий офат чоғида минглаб одам уй-жойлари ва мол-мулкларидан ажраган. Тошқин кўприкларни вайрон қилган, қатор шаҳарларда кўчалар лой билан тўлган. Бир неча аҳоли пункти электр ва сув таъминотисиз қолган, шунингдек, у жойларга озиқ-овқат етказиб бериш ҳам мушкуллашган.

Маҳаллий аҳоли расмийларни жабрланганларга ёрдам ва уларни қутқариш чораларида кечикканлари учун танқид қилишмоқда. Уларнинг иддаосича, расмийлар табиий офат ҳақида одамларни ўз вақтида огоҳлантиришмаган.

Германия ГФР ва Эрон фуқароси Шамшид Шармаҳднинг қатл этилганига жавобан ўз ҳудудидаги Эроннинг барча бош консулхоналарини ёпади. Бу ҳақда Германия ташқи ишлар вазири Анналена Бербок маълум қилди, дея хабар қилди Tagesschau.

Қайд этилишича, Эроннинг Франкфурт, Мюнхень ва Ҳамбургдаги консулхоналари ёпилади. Tagesschau хабарига кўра, консулхоналарнинг 32 нафар ходими, агар уларда Германия фуқаролиги бўлмаса, мамлакатни тарк этишлари лозим бўлади.

Эроннинг Берлиндаги элчихонаси эса ўз ишини давом эттиради.

Шармаҳд Германия ва Эрон фуқаролигига, АҚШда эса яшаш учун рухсатномага эга бўлган. Эрон расмийлари унинг қўлга олингани ҳақида 2020 йил августида эълон қилишган. У 2008 йил 12 апрелида Шероздаги масжидда содир бўлган портлашга алоқадорликда айбланган. Ўша портлашда 14 киши нобуд бўлган, 200 дан зиёд одам яраланган эди. 2023 йили Эрон Олий суди уни ўлим жазосига ҳукм қилган, 2024 йил 28 октябрида эса ҳукм ижро этилган.

Қатл ортидан Эрон элчиси Германия Ташқи ишлар вазирлигига чақирилган. У ерда германиялик дипломатлар Эрон режими хатти-ҳаракатларига қарши қатъий норозилик изҳор қилиб, бунинг оқибатлари бўлишидан огоҳлантиришган.

Шармаҳднинг АҚШда яшовчи қизи Берлин ва Вашингтонни “гаровдагиларни озод қилиш бўйича барча музокараларда” унинг отасини ташлаб қўйганликда айблаган. У яқинлари Шармаҳд билан хўшлашиш имконига эга бўлишлари учун отасининг жасадини АҚШга қайтаришни талаб қилган.

Россия ҳукумати Украинада жанг қилаётган фуқароларни ишдан бўшатишни тўлиқ тақиқлашни режаламоқда. Мамлакат Меҳнат кодексига бунга оид тегишли ўзгартишлар киритилиши ҳақида бош вазир Михаил Мишустин маълум қилган.

Агар ҳукумат томонидан таклиф қилинаётган қонун лойиҳаси қабул қилинса, иш берувчилар Мудофаа вазирлиги шартномасига қўл қўйган уруш қатнашчилари билан тузилган шартномани уларнинг бутун хизмати даврида тўхтатиб туришга мажбур бўлади. Ҳозирда ходимни армиядаги хизматидан бир йил кейин ишдан бўшатиш мумкин.

Ҳукумат матбуот хизмати мазкур қонун лойиҳаси Россия Давлат думасига яқин орада киритилишини қўшимча қилган. Ўз навбатида, Мишустин ҳужжат қабул қилинишига шубҳа қилмаслигини билдирган.

Россия расмийлари Украинада шартнома асосида жанг қилаётган кишиларнинг аниқ сонини очиқлаган эмас. Владимир Путин фронтга кетган ҳарбийларнинг умумий сони 600 минг киши эканини айтган.

АҚШ Россиянинг Курск вилоятида бўлган шимолий кореялик ҳарбийлар яқин орада Украина Қуролли кучлари билан жангга киришишини кутмоқда. Бу ҳақда 31 октябрь куни АҚШ Давлат котиби Энтони Блинкен билдирди. “Америка овози” хабарига кўра, ўз сўзида Хитойни Пхенянни тийиб туриш учун ўз таъсиридан фойдаланишга чақирган.

АҚШ Давлат котиби Россия шимолий кореялик аскарларга артиллерия, дронлар билан ишлаш ҳамда қуруқликдаги амалиётларда қўл келадиган тактик приёмларга ўргатаётганини, бу эса мазкур кучлардан жабҳада фойдаланиш нияти борлигини кўрсатишини маълум қилган.

Блинкен Россияда 10 минг нафар шимолий кореялик ҳарбий юргани, уларнинг тақрибан 8 минг нафари аллақачон Курск вилоятида эканини қайд этган. Россиянинг бу вилоятида Украина қўшинлари август ойида эгаллаган мавқеларини қўлда тутиб туришибди.

Қўшма Штатлар ва Жанубий Корея мудофаа ва ташқи ишлар вазирлари ўзаро учрашувда бунга жавоб беришнинг қатор вариантларини муҳокама қилишгани айтган АҚШ бош дипломати Москва томонидан шимолий кореялик аскарларни Украинага қарши уруш “гўштқиймалагич”ида фойдаланилиши Кремль “заифлигининг очиқ белгиси” эканини қайд этган.

Шу куннинг ўзида Шимолий Корея томонидан қитъалараро баллистик ракета учирилгани ҳақида хабарлар пайдо бўлган. Ракета Корея яриморолининг шарқий соҳилидаги Шимолий Корея ҳудудий сувларига бориб тушишдан аввал илк бор 86 дақиқа давомида парвозда бўлган. Бу ҳақда Жанубий Корея ва Япония расмийлари маълум қилишган.

Жанубий Корея қўмондонлиги ракета Шимолий Корея пойтахти бўлмиш Пхеняндан маҳаллий вақт билан тахминан эрталабки соат 7:10 да учирилганини қайд этган.

Ракета қарийб вертикал равишда учирилган бўлиб, 7700 километр баландликка етган, дея хабар қилди Reuters агентлиги Япония Мудофаа вазирлигидан олинган маълумотга таянган ҳолда.

Токиода махсус чақирилган матбуот анжуманида Япония Вазирлар Маҳкамасининг бош котиби Ёсимаса Хаяси 31 октябрь куни синовдан ўтказилган Шимолий Корея ракетасига ўхшаш ракета оддий траектория бўйлаб учирилганда 15 минг километр масофага етиши мумкинлигини билдирган.

Испанияда тошқин оқибатида ҳалок бўлганлар сони 158 нафарга етди, дея хабар қилди El País нашри расмийлар маълумотига таянган ҳолда.

Мамлакат жанубидаги Валенсия вилоятида 155 киши, Кастилия-Ла-Манча ва Андалусияда бир нафардан киши ҳалок бўлган, яна бир киши қаерда ўлганига аниқлик киритилмаган.

Валенсия шаҳри яқинидаги 25 минг киши яшовчи Пайпортада 40 нафар турғун ҳалок бўлган. Расмийлар табиий офатдан жабр кўрган ҳудудлар аҳолисига уйларини тарк этмасликни тавсия қилган.

Қутқарув амалиёти давом этмоқда, қатор шаҳарларда, тезкор хизматлар маълумотига кўра, ҳали ҳам сув сатҳи баланд. Жойларда мародёрлик ҳолатлари кузатилмоқда, прокуратура гумонланувчиларни ҳибсга олишни сўраган. Автомобиллар ҳаракати учун 150 дан зиёд йўл ёпилган.

Испанияда дарёлар тошишига 29 октябрь куни мамлакатга ёпирилган “Дана” тўфони сабаб бўлган. Маҳаллий фаоллар расмийларни вазиятни изга сололмаётганликда айблашмоқда. Жамоат ташкилотлари ва касаба уюшмалари 9 ноябрь куни Валенсияда норозилик акцияси ўтказишмоқчи. Ташкилотчилар иддаосига кўра, минтақа расмийлари тўфон билан курашни ўта кеч бошлашган, бу эса қурбонлар сони бу қадар кўп бўлишининг сабабларидан биридир.

Валенсия вилоятининг Алфафар шаҳарчаси мэри Хуан Рамон минтақа расмийлари ҳам, марказий ҳокимият ҳам шаҳарчага сезиларли ёрдам бермаётганини, шу сабабли маҳаллий турғунларнинг бир қисми уйларида қурбонларнинг жасадлари билан бирга тунашга мажбур бўлаётганини билдирган.

Табиий офат оқибатларини бартараф этишга миллий гвардия ва ҳарбийлар жалб қилинган. Испанияда уч кунлик мотам эълон қилинган. Испания қироли Филипп VI Х ижтимоий тармоғида тўфон қурбонлари яқинларига таъзия изҳор этиб, тошқин кўламидан даҳшатга тушганини билдирган.

Кремлга яқин кўрилган сиёсатшунос Сергей Караганов Россия расмийларини яна ядровий қуролдан фойдаланишга чақирди.

“Тийиб туришдан қўрқитишга қадар: ядровий қурол, геосиёсат, коалицион стратегия” деб номланган ўз китоби тақдимотида Караганов Россияда ядровий бомбаларнинг борлигини “Парвардигорнинг аралашуви” деб атаган.

“Биз Худонинг ғазабини қўзғатмаслигимиз ва бизга ўзимизни қутқариш учун берилган қуролдан актив фойдаланишимиз лозим”, деган сиёсатшунос ядровий зарбалар беришдан бош тортиш “совет ва Россия халқи олдида гуноҳ бўлиб ҳисобланиши”ни қўшимча қилган.

Караганов аввал ҳам Россия расмийларини ядровий зарбалар беришга (хусусан, Европага) чақирган эди.

Айни пайтда, суриштирув журналистикаси билан шуғулланувчи ОАВ маълумотига кўра, сиёсатшуноснинг Германия ва Италияда кўчмас мулки бўлиб, ўзига қарши санкциялар киритилганига қарамай, у бу мулклардан мунтазам равишда даромад олиб келмоқда.

Сергей Караганов Россия Ташқи ва мудофаа сиёсати кенгаши раёсатининг фахрий раиси бўлиб ҳисобланади. Бу кенгаш Валдай клуби таъсисчиларидан бири бўлиб ҳисобланади ва мазкур клуб йиғилишларида Владимир Путин ҳам бир неча бор чиқиш қилган.

ОАВ Карагановни “Россия президентига яқин сиёсатшунос” ва салкам унинг маслаҳатчиси деб атайди.

Америкалик воситачилар Исроил ва Ливандаги “Ҳизбуллоҳ” радикал гуруҳи ўртасида 60 кунлик оташкесимдан бошлаб жанговар ҳаракатларни тўхтатишга оид таклиф устида иш олиб боришмоқда. Бу ҳақда Reuters агентлиги ўз манбаларидан олинган маълумотларга таянган ҳолда хабар қилди.

Агентлик суҳбатдошлари икки ойлик даврдан БМТ Хавфсизлик кенгашининг 2006 йилдаги резолюциясининг бажарилиши учун фойдаланилишини айтишган – мазкур ҳужжатга мувофиқ, Ливан жануби давлат назорати остида бўлмаган гуруҳлардан озод қилишини лозим.

Манбалар келишув натижа бермаслиги мумкинлигини ҳам истисно қилишмаяпти.

Оқ уй вакиллари 31 октябрь куни Ливан бўйича келишув муҳокамаси учун Исроилга келишади.

Ўз навбатида Исроил телевидениесининг 12-канали мамлакат бош вазири Бинямин Нетаняҳу ва хавфсизлик хизмати вакиллари Исроил “Ҳизбуллоҳ”га қарши кампания мақсадларига эришди ва эндиликда зиддиятни сиёсий йўл билан ҳал қилиш зарур, деган хулосага келишгани ҳақида хабар қилган.

Айни пайтда Исроилнинг Ливанда олиб борилаётган амалиёти давом этмоқда. 30 октябрь куни Исроил армияси (ЦАХАЛ) Ливан шарқидаги Баалбек шаҳри ва унга яқин икки қишлоқ аҳолисини эвакуацияга чақирган.

Чоршанба оқшомида Исроил ОАВ ва телеграм-каналлари ЦАХАЛ қирувчи учоқлари “Ҳизбуллоҳ”нинг Баалбек ҳудудидаги инфратузилмасига ҳамда Ливан жанубидаги Набатия ҳудудига ҳужум қилгани ҳақида хабар қилишган.

Ливан нашрлари тинч аҳоли орасида қурбонлар борлиги ҳақида хабар қилган. Муҳтамал қурбонлар ҳақида расмий маълумот ҳали берилганича йўқ.

“Ҳизбуллоҳ” АҚШ ва Исроилда террор ташкилоти деб тан олинган. Европа Иттифоқида “Ҳизбуллоҳ”нинг ҳарбий қаноти террор ташкилоти ўлароқ тан олинган, Ливан парламентида ўз депутатларига эга “Ҳизбуллоҳ” сиёсий партияси эса ЕИ наздида террор ташкилоти эмас.

Исроил ҳужумларидан бири чоғида гуруҳ лидери Ҳасан Насруллоҳ ўлдирилган.

“Ҳизбуллоҳ” Фаластиндаги ҲАМАС гуруҳининг (АҚШ ва ЕИда террор ташкилоти деб тан олинган) 2023 йил 7 октябридаги Исроил жанубига ҳужумининг эртасига Исроил ҳудудига ракеталар отган. Ўшандан буён Исроил-Ливан чегарасида қарийб ҳар куни отишмалар содир бўлиб турибди. Ҳар икки мамлакатнинг чегараолди ҳудудларидан ўн минглаб одам эвакуация қилинган.

Исроил Ливаннинг “Ҳизбуллоҳ” гуруҳига қарши “Шимол нишлари” амалиётини 23 сентябрь куни бошлаган. Амалиётдан мақсад террор ташкилотининг ҳарбий инфратузилмасини йўқ қилиш ва Исроил шимолидаги уйларини ташлаб кетган исроилликларни ортга қайтариш учун шарт-шароит яратиш экани айтилган.

Испания жанубий-шарқидаги Валенсия вилоятида юзага келган тошқин натижасида, сўнгги маълумотларга кўра, камида 95 киши ҳалок бўлган. Тошқинга 29 октябрь куни тинимсиз қуйган жала сабаб бўлган.

Ижтимоий тармоқларда минтақа турғунлари сув оқимидан қочиб, дарахтларга чиқиб жон сақлашга уринаётгани акс этган видеолар ҳамда ўт ўчирувчилар сув остида қолган автомобиллардан одамларни чиқариб олишга уринаётган кадрлар пайдо бўлган.

Валенсия вилояти раҳбари Карлос Масон матбуот анжуманида сув босган айрим ҳудудларга ҳали етиб боришга муваффақ бўлинмаганини билдирган. Ўнлаб одам бедарак кетгани айтилмоқда.

Қутқарув ишларига фавқулодда вазиятлар бўйича ҳарбий бўлинма жалб этилган. Тошқиндан энг кўп жабр кўрган ҳудудларда мактаблар ва асосий хизматлар фаолияти тўхтатилган, шунингдек, Мадрид билан Барселона ўртасидаги поезд қатнови бекор қилинган.

Валенсияда сўнгги йирик тошқин 2023 йил сентябрида содир бўлган эди: ўшанда Испанияда табиий офат натижасида камида уч киши ҳалок бўлган.

Олимларга кўра, минтақада экстремал об-ҳаво ҳодисаларининг тез-тез содир бўлишига иқлим ўзгариши сабаб бўлган. Метеорологлар фикрича, Ўртаер денгизида ҳароратнинг кўтарилиши сувнинг тез буғланишига олиб келмоқда, бу эса ёғингарчилик интенсивлигига сезиларли таъсир кўрсатяпти, деб ёзган Reuters агентлиги.

Грузия президенти Саломе Зурабишвили ўтган парламент сайловидаги муҳтамал сохталаштиришларга оид бўйича саволларга жавоб бериш учун таклиф қилинган прокуратурага боришдан бош тортди. Аввалроқ у сайловни нолегитим деб ҳисоблашини айтган, ундаги “Грузия орзуси” ҳукмрон партиясининг ғалабасини эса сохталаштирилган, дея баёнот берган эди.

Зурабишвили чоршанба кунги брифингда 31 октябрга белгиланган прокуратурадаги суҳбатга бормаслигини билдирди. У прокуратура қонунбузарликка оид далилларни давлат раҳбаридан талаб қилмай, ўзи қидириши лозимлигини қайд этди. У брифингни сайловни сохталаштириш технологиялари ҳақидаги видеони намойиш қилишдан бошлади.

“Мен прокуратурага ўз ишини бошлашни ва президент билан сиёсий ҳисоб-китоб қилишдан қочишни маслаҳат берган бўлардим. Мен прокуратурага мурожаат қиляпман: сиз халқ олдида ҳисобдорсиз, жамоатчилик сиздан менинг далилларимни эмас, зудлик билан текширишга киришишни талаб қилмоқда”, дея иқтибос келтирган Зурабишвили сўзларидан Озодликнинг грузин хизмати.

Грузияда парламент сайлови 26 октябрь куни бўлиб ўтди. МСК маълумотига кўра, унда Россияга мойил кайфиятдаги “Грузия орзуси” ҳукмрон партияси 54 фоиз овоз олган. Мухолифатдаги тўртта партия кўпи билан 10 фоиздан овоз олишган, қолганлари эса беш фоизли тўсиқдан ўта олмаган.

Мухолифатдаги сиёсатчилар сайлов натижалари “Грузия орзуси” фойдасига сохталаштирилганини билдиришиб, уларни тан олишдан бош тортишган. Президент Саломе Зурабишвили ҳам шу фикрда. У 28 октябрь куни Тбилисида 15 мингга яқин одам тўпланган норозилик митингида чиқиш қилган.

Мураккаб схемали сохталаштиришлар ҳақида бир неча фуқаровий ташкилотлар ҳам баёнот беришган. Грузия МСК расман мамлакат бош прокуратурасига мурожаат қилган ва бу борада тергов бошланган.

Россия билан Туркманистон ўртасидаги газ шартномаси бекор қилинган ва туркман газининг Россияга экспорти жорий йил ярмида тўхтатилган. Бу ҳақда Озодликнинг туркман хизмати “Туркменгаз” давлат концерни раиси Мақсат Бабаев сўзларига таянган ҳолда хабар қилди.

Россия нашрлари томонлар газ нархи бўйича келишувга эришолмагани ҳақида ёзишмоқда.

Россия 2016 йилда ҳам Туркманистондан газ сотиб олишни тўхтатиб қўйган эди. Уч йиллик танаффусдан сўнг 2019 йилда томонлар газ етказиб бериш бўйича беш йиллик янги шартномани имзолашган. Йилига беш миллиард куб метр газ етказиб бериш кўзда тутилган шартноманинг амал қилиш муддати 2024 йилнинг 30 июнида тугаган ва афтидан, томонлар шартнома муддатини узайтирмасликка қарор қилишган.

“Жорий йил ўртасидан томонларнинг ўзаро келишуви бўйича биз Россия Федерациясига табиий газ етказиб бермадик”, дея иқтибос келтирган “Туркменгаз” давлат концерни раисининг ўринбосари Мурат Арчаев сўзларидан Россия нашрлари.

Айни пайтда Туркманистон расмийлари газ экспорти йўналишлари ошганини билдирмоқда.

“Туркманистон доим экспорт йўналишларини диверсификация қилишга интилиб келган. Бугунги кунда биз янги йўналишлар ҳамда мавжуд шартномалар ва йўналишлар бўйича етказиб берилажак газ ҳажмини оширишдан манфаатдормиз”, деган “Туркменгаз” раҳбари.

2022 йил декабрь ойида Ўзбекистон Туркманистон билан илк бор 1,5 миллиард куб метр газ етказиб бериш бўйича “Газпром” иштирокисиз қисқа муддатли шартнома тузган эди. 2023 йил август ойида эса Ўзбекистон Туркманистон билан йилига 2 миллиард куб метргача газ етказиб бериш бўйича янги шартнома имзолаган.

Ўзбекистон Энергетика вазирлиги раҳбари Жўрабек Мирзамаҳмудов аввалроқ Тошкент ва Ашхобод газ етказиб бериш бўйича узоқ муддатли шартнома ишлаб чиқаётганини билдирган эди. Туркманистон билан истиқболда тузилажак газ шартномаси Ўзбекистон эҳтиёжининг қанча қисмини қоплаши ҳақида ҳозирча маълумот йўқ.

2023 йил 7 октябридан Ўзбекистон куз-қиш мавсумида республикада газ тақчиллигининг бир қисмини қоплаш учун Қозоғистон ҳудуди орқали Россиядан газ импорт қилишни бошлаган эди. Ўшанда газ сотиб олиш бўйича шартнома икки йилга тузилгани, харид ҳажми йилига қарийб 2,8 миллиард куб метрни ташкил этиши айтилган.

Россиянинг Красноярск ўлкасида Тергов қўмитаси ва ҳарбий комиссариат ходимлари томонидан ўтказилган навбатдаги рейд чоғида Ўзбекистон, Қирғизистон ва Тожикистондан бўлган 229 нафар меҳнат мигранти қўлга олинган. “Сибирский Экспресс” нашри хабарига кўра, улардан федерал базага киритиш учун “геном маълумоти материали олинган”.

Қайд этилишича, куч ишлатар тузилмалари ходимлари Красноярскдаги йирик супермаркетлар тармоғининг тақсимот маркази, ёғочни қайта ишлаш базаси ва саноат-логистика мажмуасида текширув ўтказишган.

“Буларнинг барчасида миграция қонунчилигининг жиддий бузилиши ҳолатлари аниқланган”, дея билдиришган полиция ходимлари. Сохта қайдга қўйиш, ноқонуний мигрантларга тураржой ёки транспорт воситасининг берилиши, маълумот тақдим этишдан бўйин товлаш ёки иммигрант мақомини аниқлаш чоғида нотўғри маълумотлар тақдим этиш кабилар шулар жумласидандир.

“Крокус Сити Холл”даги террор хуружи ортидан Россия расмийлари мамлакатга мигрантлар келиши тартиби ва шартларини кучайтира бошлашган. 2024 йил августида президент Путин ИИВ ходимларига хорижлик фуқароларни Россия ҳудудидан мустақил равишда чиқариб юбориш ҳуқуқини берувчи қонунни имзолаган. Мазкур қонун 2025 йил февралидан кучга киради.

Бундан ташқари, Россияда мамлакатда ноқонуний равишда юрган чет элликлар реестри тузилмоқда. Реестрга киритилганидан кейин мигрантлар транспорт воситаларини бошқариш, банк хизматларидан фойдаланиш, мол-мулкини рўйхатдан ўтказиш, никоҳ қуриш ва ажрашиш, фарзандларини боғча ва мактабларга бериш ҳуқуқидан маҳрум бўлишади.

Россия ички ишлар вазирининг биринчи ўринбосари Александр Горовой маълумотига кўра, ҳозирда Россияда хорижий давлат фуқароси бўлган 6,174 миллион киши юрибди. Россияда юрган хорижликлар сони бўйича илк ўнликка Ўзбекистон, Тожикистон, Қирғизистон, Беларусь, Украина, Арманистон, Озарбайжон, Қозоғистон, Хитой ва Туркманистон фуқаролари киради.