Линклар

Шошилинч хабар
02 декабр 2020, Тошкент вақти: 09:32

Ўзбекистон хабарлари

Содиқ Сафоев Ўзбекистоннинг ЕОИИга аъзо бўлиши масаласи ҳамон очиқ қолаётганини қайд этди

Сенат раисининг биринчи ўринбосари Содиқ Сафоев

Ўзбекистоннинг Евросиё Иқтисодий Иттифоқига (ЕОИИ) кириши унинг Жаҳон савдо ташкилотига (ЖСТ) аъзо бўлишидан кўра кўпроқ баҳс-мунозараларга сабаб бўлмоқда, шунинг учун ҳам бу масала очиқ қоляпти. Бу ҳақда, Газета.uz нашри хабарига кўра, Ўзбекистон Олий Мажлиси Сенати раисининг биринчи ўринбосари Содиқ Сафоев 17 ноябрь куни Вашингтондаги Атлантика кенгашида қилган чиқишида билдирган.

ЖСТга аъзо бўлиш Ўзбекистон учун устувор мақсад бўлиб ҳисобланади ва биз мазкур ташкилотга қўшилишга ҳозирлик кўришдаги улкан ёрдами учун АҚШдан миннатдормиз. Ўтган ҳафтада Ўзбекистон бош вазири ўринбосари Сардор Умурзоқов ва АҚШ савдо вазири Уилбур Росс (видеоконференция шаклида) жуда муваффақиятли музокара ўтказдилар. Биз яна бир бор АҚШ Ўзбекистонни дастаклаётганига ишонч ҳосил қилдик”, деган Содиқ Сафоев.

Сенат раисининг биринчи ўринбосари мамлакатдаги қатор экспертлар ЖСТга аъзо бўлинса, Ўзбекистондаги корхоналар глобал рақобатга дош бера олмай қолиши мумкинлигидан хавотирда эканини эътироф этган.

Айни пайтда у аҳоли орасида кўпчилик, ҳукумат ва парламент ЖСТга қўшилиш бўйича консенсусга келганини қўшимча қилган.

ЕОИИ хусусида гапирар экан, Содиқ Сафоев бу борада жамоатчилик ичида кўплаб ихтилофли фикрлар мавжудлигини қайд этган.

ЕОИИга қўшилиш-қўшилмаслик борасида қарашлар турлича, бироқ Евросиё Иқтисодий Иттифоқига муҳтамал аъзоликни кўриб чиқишга ундаган уч асосий омил бор. Биринчидан, республиканинг миллионлаган фуқароси ЕОИИ мамлакатларида ишлайди. Бу биз учун, фуқароларимиз учун, уларнинг ҳуқуқларини ҳимоя қилиш ва пул топишда яхши имкониятлар яратиш учун жуда муҳим. Иккинчидан, география. Асосий бозорларимиз учун бизга янги транспорт йўналишлари зарур. Бу ташкилотга қўшилсак, имтиёзлар тизимига ҳам эга бўламиз, бу эса экспорт ва импорт учун транспорт харажатларини озайтиради. Учинчидан, Ўзбекистон ўз молларини экспорт қиладиган жойлар ЕОИИга аъзо мамлакатлар бўлиб ҳисобланади”, деган Содиқ Сафоев.

Сенаторга кўра, Тошкент ЕОИИга қўшилиш билан боғлиқ ҳолатларни баҳолаш учун ҳадаф гуруҳини шакллантирган ҳамда ҳозирда мазкур ташкилотга қўшилиш Ўзбекистоннинг ташқи савдо сиёсатидаги мустақиллигига путур етказиш-етказмаслиги масаласи ўрганилмоқда.

Шулардан хулоса қилган ҳолда, ЕОИИга аъзо бўлиш-бўлмаслик масаласини ҳукумат ва парламент ҳал қилишини қайд этган Сафоев бунинг “ҳамон очиқ қолаётган масала” эканини урғулаган.

Шу йил май ойида сенаторлар Ўзбекистоннинг ЕОИИга “кузатувчи давлат” сифатида киришини маъқуллаган эдилар. Маълумотларга кўра, 100 сенатордан 91 нафари қатнашган овоз беришда 71 сенатор Ўзбекистоннинг ЕОИИга “кузатувчи давлат” сифатида киришини ёқлаган, 16 нафари қарши чиққан, тўрт нафари эса бетараф қолган.

Аввалроқ Озодлик 15-22 ноябрь кунлари ўзбекистонлик расмийлар (улар орасида Сенат раисининг биринчи ўринбосари Содиқ Сафоев ҳам бор) АҚШда бўлиб, америкалик масъуллар билан музокаралар ўтказиши ҳақида хабар қилгандик.

Кун янгиликлари

Тўртта вилоятда қўғирчоқ ва мусиқали драма театрлари ташкил этилади

Санъат ва маданият институтида “Қўғирчоқ ясаш технологияси” таълим йўналиши очилади.

Наманган, Сирдарё, Навоий ва Тошкент вилоятларида қўғирчоқ театрлари ташкил этилади. Бу борада Вазирлар Маҳкамасининг “Республикада айрим давлат театрлари фаолиятини ташкил этиш чора-тадбирлари тўғрисида”ги қарорида кўрсатма берилди.

Адлия вазирлигининг билдиришича, Наманган ва Сирдарё вилоятларида қўғирчоқ театрлари, Навоий ва Тошкент вилоятларида қўғирчоқ театрлари ва мусиқали драма театрлари фаолияти ташкил этилади.

Қўғирчоқ театрлари ва мусиқали драма театрлари фаолияти самарадорлигини ошириш, уларнинг ижодий фаолиятини ривожлантириш ва моддий-техника базасини мустаҳкамлаш мақсадида “дўстлар клублари” фаолияти йўлга қўйилади.

Бундан ташқари, қарорга асосан, 2021/2022 ўқув йилидан санъат ва маданият институтида “Қўғирчоқ ясаш технологияси” таълим йўналиши очилади. Қўғирчоқ театри режиссёрлиги, актёрлиги ва драматургия йўналиши бўйича махсус сиртқи бўлимлар ташкил этилади.

Камолиддин Беҳзод номидаги Миллий рассомлик ва дизайн институтида “Қўғирчоқ театри рассоми” ихтисослиги бўйича таълим йўналишини очиш чоралари кўрилади.

Судлар ички ишлар ходимлари билан тил бириктириб, катта миқдордаги пулни ўғирлашди

Судьялар 5 мингта сохта қарор чиқарган. Фотосурат "Газета уз"дан олинди.

Маъмурий ишлар бўйича Тошкент шаҳар судининг бир неча судьяси йўл ҳаракати хавфсизлиги бошқармаси ходимлари билан келишган ҳолда 8 миллиард сўмни ноқонуний ўзлаштиришган. Мазкур ҳолат бўйича жиноят иши очилди.

“Газета уз” нашрининг ёзишича, бу ҳақда Коррупцияга қарши кураш бўйича агентлик директорининг ўринбосари Умида Тўхташева маълум қилди.

Тил бириктирган судья ва йўл ҳаракати хавфсизлиги бошқармаси ходимлари йўл қоидалари бузилиши юзасидан тузилган маъмурий баёномаларни суд канцеляриясида рўйхатдан ўткизмаган, маъмурий ишларни тарафлар иштирокида кўриб чиқмаган ва баённомаларни йўқ қилиб ташлаган.

Умида Тўхташеванинг айтишича, бунинг оқибатида судлар томонидан 5 мингта сохта қарор чиқарилган ва мазкур қарорлар асосида 8 миллиард сўм ўғирланган.

Бу ҳолат юзасидан Жиноят кодексининг 167 –(ўзлаштириш ёки растрата йўли билан талон-торож қилиш) ва 209 – (мансаб сохтакорлиги) моддалари асосида жиноят иши қўзғатилди.

Фарғонадаги футбол беллашуви муштлашувга уланиб кетди

Ўзбекистоннинг суперлигасига йўлланма олиш учун Фарғонанинг “Нефтчи” ва Яйпаннинг “Турон” командалари ўртасида 1 декабрь куни ўтказилган ўйин оммавий муштлашувга уланиб кетди.

Маълумотларга кўра, беллашув “Турон” фойдасига 1:0 ҳисоби билан тугаган. Шундан сўнг ютқазган команда ўйинчилари ҳакамга эътироз билдира бошлаганлар, пировардида бу тортишув тартибсизликка айланиб кетган, муштлашаётган футболчиларга ўйинни томоша қилиб ўтирган ишқибозлар ҳам қўшилиб кетган.

Ўзбекистон Профессионал футбол лигаси ўйин пайтида юз берган кўнгилсиз ҳодиса юзасидан шарҳ бергани йўқ. ПФЛ сайтида Про лига 20-туридан ўрин олган “Нефтчи” ҳамда “Турон” жамоалари ўртасидаги ўйин ўз ниҳоясига етгани, Фарғонадаги “Истиқлол” стадионида кечган учрашувда яйпанликлар 1:0 ҳисобида ғалаба қозонгани ҳақидагина хабар берилган, холос.

Айни пайтда Фарғона вилояти ички ишлар бошқармаси мазкур ҳолат тартиб посбонлари томонидан назоратга олинганлиги ҳақида маълумот тарқатди.

“Ҳозирда барча ҳуқуқбузарлар ушланиб, терговга қадар текширув ҳаракатлари олиб борилмокда”, дейилади ИИБ расмий баёнотида.

Фарғоналик ҳуқуқ-тартиботчилар воқеага алоқадор ҳар бир иштирокчининг ҳаракатига қонуний баҳо берилишини билдирганлар.

Хотинига памперс едирган самарқандлик эркак 6 йилга қамалди

Жиноят ишлари бўйича Самарқанд шаҳар суди рафиқасига мажбурлаб памперс едирган Ш.К.ни 6 йилга озодликдан маҳрум қилиш ҳақида ҳукм чиқарди. “Дарё” нашри хабарига кўра, ҳукм судья Зарифа Аҳмедова томонидан 1 декабрь куни чиқарилган.

Қайд этилишича, 35 ёшли судланувчи Ўзбекистон Жиноят кодексининг 103-моддаси (ўзини ўзи ўлдириш даражасига етказиш) ва 105-моддаси 2-қисми “г” банди (ўта шафқатсизлик билан қасддан баданга ўртача оғир шикаст етказиш) билан айбдор деб топилган.

Судланувчи сўнгги сўзида бундай ишларни бошқа такрорламаслиги, уч ой ичида барча қилмишларини тушуниб етганлигини билдирган. У қўйилаётган айбловнинг “ўзини ўзи ўлдириш даражасига етказиш” қисмини тан олмаслигини айтган, бироқ рафиқасини калтаклаганини эътироф этган. Жабрланувчи Мустаҳкам Ваҳобова эса судга ишонишини ва унинг чиқарган қароридан розилигини қайд этган.

Ўтган ҳафта бўлиб ўтган судда прокурор Ш.К. га 8,5 йил қамоқ жазоси сўрагани ҳақида хабар қилган эдик.

Самарқандлик 25 ёшли М. Ваҳобованинг эри томонидан аёвсиз калтакланганига оид видео шу йил ёзида ижтимоий тармоқларда қизғин муҳокамаларга сабаб бўлганди. Маҳаллий блогер ва журналистлар билан суҳбатда аёл эри уни анча йиллардан бери таҳқирлаб келгани ҳамда унга мажбурлаб 3 кунлик “памперс” едирганини айтиб берганди.

Ш.К.нинг зўравонлиги акс этган видео интернетда тарқаб кетганидан кейин у уйидан қочиб кетган, бироқ шу йил 23 августида Тошкентда қўлга олиниб, Самарқандга олиб кетилганди. Мазкур иш бўйича суд 12 ноябрь куни бошланган эди.

Энергетика вазирлиги рад қилган маълумотни Монополияга қарши курашиш қўмитаси тасдиқлади

Ўзбекистонда цемент ишлаб чиқарувчиларга етказиб бериладиган газ босимининг пасайиши оқибатида “Қувасойцемент” АЖ ва “Оҳангаронцемент” АЖ томонидан цемент ишлаб чиқарилиши тўхтатилган. Шу боис иккала ишлаб чиқарувчининг цемент маҳсулоти ўтган ҳафтада фонд биржа рўйхатига олинмаган. Бу ҳақда Монополияга қарши курашиш қўмитаси (МҚКҚ) ўз Телеграм-канали орқали билдирди.

Қўмита вакилларига кўра, биржага цемент кам миқдорда чиққани сабабли унинг нархи ошиб кетган.

Айтайлик, ҳафта бошида 1 кг цемент 512 сўм бўлган бўлса, ҳафта охирида у 539,1 сўмгача (ёки 5 фоизга) кўтарилган”, дейилган МҚКҚ хабарномасида.

Ўтган ҳафта Энергетика вазирлиги цемент ишлаб чиқарувчи корхоналар фаолият тўхтаганига оид маълумотни рад этган ва бу ҳақда хабар тарқатаётган манбаларни ёлғон маълумот тарқатишдан огоҳлантирганди.

Қайд этиш жоизки, Монополияга қарши курашиш қўмитаси ўз хабарномасида “Қувасойцемент” ва “Оҳангаронцемент” ўз фаолиятини газ таъминотидаги муаммолар боис тўхтатганини, Энергетика вазирлиги эса мазкур корхоналарга электр энергияси аввалгидек етказиб берилаётганию улар фаолияти тўхтамагани ҳақида сўз юритган.

Энергия манбалари ўртасидаги фарқдан қатъи назар бу ўринда эътиборли жиҳат корхоналар фаолиятининг тўхтатилган-тўхтатилмагани ҳамда бунинг Ўзбекистонда цемент нархи ошишига кўрсатган таъсири бўлиб ҳисобланади.

Тошкент аэропортида йўловчилар ўзини ўзи рўйхатдан ўтказиш имкониятига эга бўлди

Тошкент халқаро аэропорти.

Ўзбекистондаги барча халқаро аэропортларда босқичма-босқич йўловчиларнинг мустақил равишда ўзини ўзи рўйхатдан ўтказиш – Self Check-In замонавий тизими жорий қилинмоқда. Бу ҳақда “Uzbekistan Airports” акциядорлик жамияти ахборот хизмати маълум қилди.

Ширкат маълумотига кўра, мазкур тизим ҳаво транспорти коммуникациялари ва ахборот технологиялари соҳасида дунёда етакчи - SITA компанияси томонидан ишлаб чиқилган бўлиб, шу кунларда И. Каримов номидаги Тошкент халқаро аэропортида 4 та шундай киоск ўрнатилган.

Ўзини ўзи рўйхатдан ўтказиш – Self Check-In хизмати орқали йўловчиларнинг рўйхатдан тез ва осон ўтишлари таъминланади. Самолётнинг исталган ўриндиғидан жойни банд этиш ва бир вақтнинг ўзида жойлашиш ҳақидаги талонни ҳам олиш мумкин. Саёҳатга отланганлар юкларини киоскдан мустақил рўйхатдан ўтказиб, парвоздан аввал уларни тегишли хизматларга топшириш имкониятлари мавжуд”, дейилган хабарномада.

Қайд этилишича, Uzbekistan Airports Тошкент халқаро аэропортига мунтазам парвозларни амалга ошираётган барча авиакомпанияларга Self Check-In киоскларига уланиш, хизматдан самарали фойдаланиш таклифини киритган. Аммо пандемия чекловлари туфайли ҳозир бу киоск хизматларидан фақатгина Turkish Airlines авиаширкати йўловчиларигина фойдаланмоқда.

Хабарномада Uzbekistan Airports ва Тошкент халқаро аэропорти ҳозирда SITA компанияси билан йўловчиларнинг юкларини ҳам автоматик рўйхатдан ўтказиш – Self BagDrop тизимини йўлга қўйиш бўйича музокаралар олиб бораётгани қўшимча қилинган. Режага кўра, бу амалиёт тизимли равишда Ўзбекистондаги 11 та халқаро аэропортнинг ҳаммасига татбиқ этилади.

АҚШ ва Ўзбекистон бош дипломатлари телефон орқали мулоқот қилди

Ўзбекистон ташқи ишлар вазири Абдулазиз Комилов (ў) ва АҚШ Давлат котиби Майкл Помпео (ч), Тошкент, 2020 йил 3 феврали

Ўзбекистон ташқи ишлар вазири Абдулазиз Комилов ва АҚШ Давлат котиби Майкл Помпео ўртасида 30 ноябрь куни телефон орқали мулоқот бўлиб ўтган.

Ўзбекистон Ташқи ишлар вазирлиги матбуот хизмати маълумотига кўра, мулоқот чоғида М. Помпео АҚШнинг Ўзбекистон мустақиллиги, суверенитети ва ҳудудий яхлитлигини, шунингдек президент Шавкат Мирзиёев бошчилигида олиб борилаётган ислоҳотлар дастурини изчил қўллаб-қувватлашда собит эканлигини тасдиқлаган.

Шу йил 16-20 ноябрь кунлари А. Комилов бошчилигидаги ўзбек делегацияси Вашингтонга сафар қилгани ва қатор расмийлар билан учрашгани ҳақида Озодлик аввалроқ хабар қилган. Хусусан, 20 ноябрь куни делегация Ўзбекистон – АҚШ сиёсий маслаҳатлашувларининг саккизинчи раундида иштирок этган.

Давлат котиби кечаги мулоқотда сиёсий маслаҳатлашувлар шакли Ўзбекистон ва АҚШ ўртасидаги кўп қиррали ҳамкорлик даражаси ва суръатини акс эттирувчи Стратегик шериклик мулоқотига ўзгарганлигининг аҳамиятини алоҳида таъкидлаган.

АҚШ Давлат департаменти маълумотига кўра, мулоқот чоғида икки дипломат диний эркинликларни кенгайтириш, одам савдосига қарши кураш ҳамда фуқаролик жамияти ва журналистлар фаолияти учун майдонни кенгайтириш дохил инсон ҳуқуқлари соҳасида олиб борилаётган ислоҳотлар ривожини муҳокама қилганлар. Шунингдек, улар Ўзбекистон юритаётган хусусийлаштириш ҳамда бозор ривожланиши учун қулай сиёсат қабатида америкалик экспортёрлар ва инвесторлар учун имкониятларни муҳокама қилганлар.

Ўзбекистон ТИВ матбуот хизмати А. Комилов ва М. Помпео мулоқоти чоғида минтақавий ҳамкорлик, “C5+1” форматидаги ўзаро муносабатлар, Афғонистондаги вазиятни тартибга солиш, ушбу мамлакатни ижтимоий-иқтисодий қайта тиклаш ва барқарорликни таъминлаш масалалари бўйича ўзаро фикр алмашилганига эътибор қаратган.

Мазкур мулоқот президент Ш. Мирзиёев администрацияси ҳузуридаги Ахборот ва оммавий коммуникациялар агентлиги томонидан Ўзбекистондаги қатор мустақил нашрларга “огоҳлантириш хати” йўлланганидан бир неча кун ўтиб амалга ошди. Мустақил нашрлар АОКАнинг бу қадамини ўзларига нисбатан босим ўлароқ баҳолаганлар.

АОКАнинг бу ҳаракати Ўзбекистонда фаолият олиб бораётган қатор дипломатлар томонидан қораланган, хусусан, АҚШ элчиси Даниэл Розенблюм бунинг расмий Тошкент олиб бораётган ислоҳотлар руҳига зид эканини таъкидлаганди.

Энергетика вазири портлаб кетаётганига қарамай "барибир "Технопарк" ҳисоблагичларини ўрнатамиз", деб айтди

Андижонда ўрнатилганидан 2 соатча ўтиб-ўтмай портлаган газ ҳисоблагичи Osten брендидаги қурилмадир.

Энергетика вазири Алишер Султонов портлаб кетаётганига қарамай, “Технопарк” компаниясининг электрон газ ҳисоблагичларини аҳоли хонадонларига ўрнатиш давом эттирилишини билдирди.

Вазир Alter Ego лойиҳасига берган интервьюсида “Технопарк” газ ҳисоблагичларининг портлаши “ёмон ниятдаги одамлар томонидан махсус” уюштирилаётганини иддао қилди:

“Бу атайлаб амалга оширилган. Биз текширув ўтказдик ва буни аниқладик. Ушбу “оғайнилар” биз билан қанчалик курашмасин, барибир ҳисоблагичларни ўрнатамиз ва одамларни истеъмол қилган нарсаси учун пул тўлашга мажбур қиламиз. Тартиб ўрнатамиз ва ўғирликларга барҳам берамиз”, — деб айтган вазир.

Алишер Султоновга кўра, электрон газ ҳисоблагичларни ўрнатиш бўйича очиқ ўтказилган тендерда “Технопарк” ғолиб бўлган.

Озодлик радиоси жорий йилда “Суриштирув: $555 млнлик газ ҳисоблагич лойиҳаси Tошкент ҳокими Ортиқхўжаевга алоқадор компанияларга берилди”, “Андижонда портлаш: Жаҳонгир Ортиқхўжаев бренди билан 3,5 миллион хонадонга мажбуран ўрнатилаëтган газ ҳисоблагич хавфсизлиги савол остида”, “Ҳужжатлар Ортиқхўжаев билан тузилган $583 млнлик шартнома қонунийлигини савол остига қўймоқда” каби қатор мақолаларни эълон қилган эди.

Мазкур мақолалардан бирида бу ташкилот томонидан ўрнатилаётган газ ҳисоблагичлари портлаб кетаётгани ҳақида гап боради.

Озодлик суриштирувида келтирилган факт ва маълумотларга ҳозирга қадар на бу жараëн тепасида турган Вазирлар Маҳкамаси¸ на давлат буюртмачиси ролидаги “Ҳудудтаъминотгаз”¸ на Жаҳонгир Ортиқхўжаев раҳбар бўлган Тошкент шаҳар ҳокимлиги ва на унинг бу лойиҳага алоқадор хусусий бизнес структуралари бирор шаклда муносабат билдирган эмас.

Пахта ҳосили ўтган йилга нисбатан 9 фоизга кўп бўлди

Ўзбекистондаги пахта даласи.

Жорий йилда Ўзбекистонда 1 миллион 34 минг гектар ерга пахта экилиб, ҳосил 3 миллион 82 минг тоннани ташкил қилди. Бу 2019 йилга нисбатан 109 фоизга кўпдир.

Қишлоқ хўжалиги вазирлигининг билдиришича, энг кўп пахта ҳосили Фарғона вилоятида (107,7 фоиз) етиштирилган.

Қашқадарёда (95,8 %), Сирдарёда (93,5 %), Бухоро (89,1 %), Сурхондарё (82,3 %) вилоятларидан бошқа барча вилоятларда режа юз фоиздан кўпроққа бажарилган.

Вазирликнинг билдиришича, пахта етиштирувчи 136 та тумандан пахта йиғим-теримини тизимли ташкил этган 104 таси, 97 та пахта-тўқимачилик кластеридан 78 таси, 11 та пахта кооперациясидан 8 таси ҳамда 29 мингта фермер хўжаликларидан 23 мингтаси шартномани бажарди.

Республикада ҳар гектар пахта майдонида ўртача ҳосилдорлик 29,8 центнерни ташкил қилди.

“Жорий йилда фаолият юритган 97 та пахта-тўқимачилик кластерлари томонидан 927 минг гектар майдондан 2 млн 794 тонна ва 11 та кооперациялар томонидан 106,6 гектар майдондан 288 минг тонна пахта хомашёси етиштирилди”,-дейилади расмий билдирувда.

Мирзиёев телефон орқали Путин билан мулоқот қилди

Президент матбуот хизматининг билдиришича, “суҳбат ҳар доимгидек самимий, дўстона ва конструктив руҳда ўтди”.

Ўзбекистон президенти Шавкат Мирзиёев 30 ноябрь куни Россия президенти Владимир Путин билан телефон орқали мулоқот қилди.

Президент матбуот хизматининг билдиришича, мулоқот давомида икки мамлакат ўртасидаги стратегик шериклик муносабатларини янада мустаҳкамлаш ва кўп қиррали ҳамкорликни кенгайтиришнинг долзарб масалалари кўриб чиқилди.

Бундан ташқари декабрь ойида видеоанжуман шаклида ўтказилиши режалаштирилган МДҲ саммитига тайёргарлик кўриш масаласига алоҳида эътибор қаратилди. Жорий йилги МДҲ саммитига Ўзбекистон раислик қилади.

“Ўзбекистон ва Россия Президентлари коронавирус пандемиясининг тарқалиши оқибатида келиб чиққан глобал инқироз шароитида икки томонлама савдо-иқтисодий алоқалар барқарор суръат билан ривожланиб бораётганини катта мамнуният билан қайд этдилар”,-дейилади хабарда.

Президент матбуот хизматининг билдиришича, “суҳбат ҳар доимгидек самимий, дўстона ва конструктив руҳда ўтди”.

Андижонда қизининг ўлими учун товон талаб қилган аёл ўзига ўт қўйди

Бош прокуратура бу воқеа юзасидан тезкор хабар тарқатди.

Бош прокуратуранинг маълум қилишича, 30 ноябрь куни соат 13:20 ларда Андижон вилоят прокуратураси олдида қизининг ўлими учун айбланувчидан “Спарк” автомашинасини товон сифатида ундириб беришни талаб қилган аёл ўзига ўт қўйди.

“Шу вақтда воқеалар ривожини кузатиб турган Андижон вилоят ИИБ пост-патруль хизмати ходимлари томонидан С.Б.,нинг эгнида ёнаётган кийимлари ечиб олиниб, унинг куйиб оғир тан жароҳати олиши олди олинган. Айни вақтда С.Б.,нинг юзи, қўллари, бўйин ва кўкрак қафаси соҳалари жами танасининг 15 фоиз қисми куйиш ташхиси билан шифохонага жойлаштирилди. Мазкур ҳолат бўйича Андижон шаҳар прокуратураси томонидан терговга қадар текширув ҳаракатлари олиб борилмоқда”,-дейилади расмий баёнотда.

Бош прокуратуранинг билдиришича, жорий йилнинг 24 июль куни соат 23:00 ларда Марҳамат тумани, “Тош йўли” МФЙ, “Садоқат” кўчасида яшовчи 1999 йилда туғилган Н.М. , севган йигитини кутиб турган вояга етмаган Т.М.,ни уяли телефонига расмга олиб, ушбу фотосуратларни унинг ота-онаси ва профилактика инспекторига кўрсатишини айтган.

Бу маълумот бошқаларга ошкор бўлишидан қўрққан қиз ўзини осиб, жонига қасд қилган. Мазкур ҳолат юзасидан Жиноят кодексининг 141-1-моддаси (Шахсий ҳаёт дахлсизлигини бузиш) билан жиноят иши қўзғатилган ва ҳозирда тергов ҳаракатлари олиб борилмоқда.

Бош прокуратура баёнотида айтилишича, марҳуманинг онаси С.Б., олиб борилаётган тергов ҳаракатларидан норози бўлиб, 30 ноябрь куни соат 12-15 ларда Андижон вилоят прокуратурасига келган ва вилоят прокурорининг биринчи ўринбосари Ф. Раҳмонов томонидан қабул қилинган.

С.Б.,қизининг ўлими учун товон сифатида айбланувчи Н.М.,дан “Спарк” автомашинасини ундириб беришни талаб қилган. Аммо “Спарк” автомашинасини ундириш тергов органларининг ваколатига кирмаслиги тўғрисида маълумот олгач, ўзига ўзи ўт қўйишини айтиб, прокуратурадан чиқиб кетган.

“Шу куни соат 13-20 ларда С.Б., вилоят прокуратураси автомашиналар тураргохида бақириб, бошқа шахсларни ўзига жалб қилиб, турмуш ўртоғи Х.Т.дан 1 литрли пластмасса идишда бўлган “Бензин” ёқилғиси ва гугуртни олиб, ўзининг елка қисмларига қуйган ва турмуш ўртоғи Х.Т. томонидан ўзини ёқиши ва вилоят прокуратураси биноси ичига югуриб кириб кетиши ҳақида кўрсатма олганидан сўнг ўзига ўт қўйиб ёқиб юборган”,-дейилади баёнотда.

Коронавирусга чалинганлар 73 мингдан ошди. Вазирлик ўлганлар ҳақида маълумот беришни тўхтатди

30 ноябрь куни янги касалланган 67 кишининг барчаси Тошкент шаҳрида аниқланган.

Ўзбекистонда коронавирус инфекцияси қайд этилганлар сони 73 041 кишига етди. Бу ҳақда Соғлиқни сақлаш вазирлиги маълум қилди.

Маълумотга қараганда, 30 ноябрь куни янги касалланган 67 кишининг барчаси Тошкент шаҳрида аниқланган.

Айни пайтда вазирлик 28 ноябрдан бери коронавирусдан ўлганлар тўғрисидаги маълумотларни бермай келмоқда. 28 ноябрь куни Соғлиқни сақлаш вазирлиги ўлганлар сони 608 кии бўлганини қайд этган эди.

Аммо жамоатчилик Соғлиқни сақлаш вазирлиги берган маълумотларга ишончсизлик билдириб, ўлганлар сони расмий кўрсаткичдан кўра кўпроқ деб ҳисоблаб келмоқда.

Коронавирусдан ўлимлар сони бўйича мустақил статистикани олиб бораётган “Дарё” нашрининг ёзишича, 1 декабрь ҳолатига кўра, коронавирусдан камида 627 киши ўлган.

Соғлиқни сақлаш вазирлиги коронавирус юққанлардан 70 303 нафари тузилиб, соғайиш кўрсаткичи 96 фоизни ташкил қилганини билдирди. Ҳозирда касалхоналарда 2130 нафар бемор даволанмоқда.

Мирзиёев Ўзбекистонда ишлаб чиқарилаётган автобуслар нархини пасайтириш муҳимлигини таъкидлади

Ўзбекистон президенти Шавкат Мирзиёев

Ўзбекистонда ишлаб чиқарилаётган автобусларнинг нархи хорижникига нисбатан юқори, шу боис маҳаллийлаштириш даражасини ошириб, автобус ва микроавтобуслар нархини тушириш муҳим. Бу ҳақда президент Шавкат Мирзиёев 30 ноябрь куни ҳудудларда жамоат транспортини ривожлантириш чора-тадбирлари муҳокама қилинган мажлисда таъкидлаган.

Президент матбуот хизмати маълумотига кўра, мажлисда туманлардан вилоят марказларига қатновчи автобуслар эскиргани, айримлари хизмат муддатидан ортиқ фойдаланилаётгани кўрсатиб ўтилган. Қайд этилишича, Ўзбекистонда бугунги кунда автобуслар билан таъминланганлик даражаси ҳар 100 минг аҳолига 24 тани ташкил этади. Бу кўрсаткич Сурхондарё, Қашқадарё, Наманган ва Андижонда 15 тага ҳам етмайди.

Мажлисда Ўзбекистон бўйича кунига қарийб 20 миллион йўловчидан бор-йўғи 4,4 миллиони ёки 22 фоизи жамоат транспортидан фойдаланаётгани, бу кўрсаткич Андижон, Қашқадарё, Наманган, Хоразм, Самарқанд, Фарғона, Бухоро ва Тошкент вилоятларида бундан ҳам пастлиги, 1 минг 200 та қишлоқ туман марказигача бўлган йўналишда жамоат транспорти билан қамраб олинмагани урғуланган.

Президент қишлоқдан туман марказигача ҳамда у ердан вилоят марказигача бўлган транспорт хизматлари кўламини кенгайтириш ва уларнинг сифатини ошириш зарурлигига эътибор қаратган.

Одамлар учун шаҳар, туман ва қишлоқлар орасида транспортни қулай, хавфсиз ва осон қилиш керак. Бу хизматлардан халқ рози бўлиши керак”, деган жумладан Ш. Мирзиёев.

Йиғилишда аҳоли талабидан келиб чиқиб, янги йўналишлар очиш, мавжудларини қайта кўриб чиқиш, автобус бекатларини реконструкция қилиш, бунга хусусий секторни жалб қилиш зарурлиги таъкидланган. Бу борадаги чора-тадбирлар ижроси жойларга чиққан ҳолда ўрганиб борилиши, халқ депутатлари кенгашларида ҳар уч ойда транспорт тизими раҳбарларининг ҳисоботлари эшитилиб, аниқ вазифалар қўйилиши белгиланган. Соҳага оид қонунларнинг бугунги кун талабига жавоб бермайдиганларини такомиллаштириш зарурлиги қайд этилган.

Тошкент вилоятининг COVID-19 дан вафот этган бош имоми ўрнига янги бош имом-хатиб тайинланди

Тошкент вилоятининг аввалги бош имом-хатиби Хайруллоҳ домла Турматов

Тошкент шаҳри бош имом-хатиби ўринбосари вазифасида ишлаб келаётган Жасур Раупов Тошкент вилояти бош имом-хатиби лавозимига тайинланди.

Ўзбекистон мусулмонлари идораси матбуот хизмати маълумотига кўра, мазкур масала 30 ноябрь куни бўлиб ўтган Тошкент вилояти имом-хатиблари йиғилишида кўриб чиқилган.

Қайд этилишича, Жасур Раупов Имом Бухорий номидаги Тошкент ислом институти ва Андижон давлат университетини тамомлаган. 1999 йилдан шу кунгача Тошкент шаҳридаги бир неча масжидда имом-хатиб вазифасида ишлаган. У 2010 йилдан бери Тошкент шаҳар бош имом-хатиби ўринбосари лавозимида ҳам фаолият юритиб келган.

Тошкент вилояти бош имом-хатиби Хайруллоҳ домла Турматов оламдан ўтган ҳақида Озодлик сентябрь ойи ўрталарида хабар қилганди. Имомнинг вафотига коронавирус инфекцияси юқтириб олган сабаб бўлгани айтилган эди.

UzAutoMotors хориждан 150 миллион еврогача қарз олмоқчи

UzAuto Motors АЖ Credit Suisse AG компаниянинг Лондон бўлими билан 150 миллион еврогача бўлган суммада халқаро синдикатлашган кредит тўғрисида келишув имзолаган.

Ширкат матбуот хизмати маълумотига кўра, келишув доирасида олинган маблағлар UzAuto Motors’нинг инвестиция лойиҳаларини молиялаштиришга, заводни модернизациялаш ва техник жиҳозлашга ҳамда айланма маблағларни оширишга йўналтирилади.

“Бу инвестиция лойиҳаларини амалга ошириш UzAuto Motors’га GEM плафтормасида General Motors’нинг янги моделларини ишлаб чиқаришни йўлга қўйиш имконини беради”, дейилган хабарномада.

Айни пайтда ўзбекистонлик автомобилсозлар хориждан олинаётган қарзлар мамлакатда ишлаб чиқарилаётган автомобиллар нархида қандай акс этиши ҳақида маълумот берган эмаслар.

АҚШ доллари ва евронинг расмий курси ошишда давом этмоқда

Ўзбекистон Марказий банки жорий йил 1 декабридан валюталарнинг сўмга нисбатан янги қийматини белгилади.

МБ маълумотига кўра, сешанбадан АҚШ долларининг расмий курси ўтган ҳафтага нисбатан 12 сўм 52 тийинга ошиб, 10 минг 427 сўм 38 тийинни ташкил этади (ўтган ҳафта 23 сўм 93 тийинга кўтарилиб, 10 минг 414 сўм 86 тийин бўлган эди). Бу АҚШ доллари расмий курсининг Ўзбекистонда кетма-кетига олтинчи ҳафта ошишидир.

Евронинг расмий курси эса олдинги курсга нисбатан 128 сўм 50 тийинга юқорилаб, 12 минг 473 сўм 23 тийинга тенг бўлади (ўтган ҳафта евро курси 50 сўм 18 тийинга ошиб, 12 минг 344 сўм 73 тийин бўлган).

Валюта қийматини белгилаш чоғида Марказий банк мазкур валюталарни ушбу қийматда сотиш ёки сотиб олиш мажбуриятини зиммасига олмаган.

АҚШнинг Ўзбекистондаги элчиси АОКА босими ислоҳотлар руҳига зид эканини билдирди

АҚШнинг Ўзбекистондаги элчиси Даниэл Розенблюм

АҚШнинг Ўзбекистондаги фавқулодда ва мухтор элчиси Даниэл Розенблюм Twitter микроблогидаги ўз саҳифаси орқали ёйинлаган постида Ўзбекистон президенти администрацияси ҳузуридаги Ахборот ва оммавий коммуникациялар агентлиги томонидан “мустақил оммавий ахборот воситаларига ўтказилаётган босим” юзасидан муносабат билдирди.

“Ахборот ва оммавий коммуникациялар агентлиги томонидан мустақил нашрларга босим ўтказиш мақсадида амалга оширилган яқиндаги хатти-ҳаракатлардан ҳафсалам пир бўлди. Ўзбекистон улкан ислоҳотлар бўйича муваффақиятга эришиши учун матбуот эркин ва очиқ бўлиши талаб этилади. АОКА томонидан бўлаётган босим бунга зиддир”, деб ёзган элчи Розенблюм.

Ўтган ҳафта мамлакат жамоатчилиги Ўзбекистондаги етакчи интернет нашрларининг Ахборот ва оммавий коммуникациялар агентлиги билан очиқ зиддиятига гувоҳ бўлганди. Аввалига Кун.уз, сўнгра Газета, Дарë ва Подробно.уз нашрлари АОКА раҳбари Асаджон Ходжаев номидан ўзларига “огоҳлантириш хати” келганини очиқлашиб, бу борада ўз норозиликларини билдиришганди.

Бунга жавобан АОКА мазкур хатларнинг юборилишига "айрим оммавий ахборот воситалари, ижтимоий тармоқ ва турли мессенжерларда тасдиқланмаган ахборотларни чоп этиш” кузатилаётгани, “ёлғон маълумотларни тарқатиш фактлари мавжуд”лиги сабаб бўлганини қайд этган.

Аввалроқ Ўзбекистондаги етакчи нашрларнинг долзарб муаммоларни ëритгани учун президент администрациясидан таҳдид хати олгани юзасидан Буюк Британия ва Германиянинг Ўзбекистондаги элчилари ҳам хавотир изҳор қилишган.

Янгийўлда газ портлаши оқибатида икки киши ҳалок бўлди

Тошкент вилояти Янгийўл туманидаги уйлардан бирида газ портлаши оқибатида икки киши ўлди ва яна икки киши жароҳатланди.

Фавқулодда вазиятлар вазирлигининг билдиришича, Тошкент вилояти Янгийўл тумани Истиқлол кўчаси, «Қирариқ» МФЙ да жойлашган 80-сонли уйда 30 ноябрь куни соат 7:42 да газ портлаган.

Портлашга газ-ҳаво аралашмаси чақнаши сабаб бўлгани тахмин қилинмоқда. Портлаш оқибатида ёнғин юз берган ва уйнинг бир қисми қулаб тушган.

“Бирламчи маълумотларга кўра, чақнаш натижасида уйнинг бир қисми қулаб тушган ва хонадон соҳиблари вайроналар остида қолган. Турар-жойнинг зарар етган қисмидан 1984 йилда туғилган И.С., 1987 йилда туғилган И.Н., 2006 йилда туғилган И.Р.Э ва 2009 йилда туғилган И.С., олиб чиқилиб, тиббиёт муассасасига юборилган”,-дейилади хабарда.

Касалхонада 1984 йилда туғилган И.С., ва 2006 йилда туғилган И.Р., вафот этган. 1987 йилда туғилган И.Н., ва 2009 йилда туғилган И.С., турли даражада тан жароҳатлари олган.

Ўзбекистон бир неча ой ичида коронавирусга қарши Россия вакцинасини синовдан ўтказмоқчи

Ўзбекистон Россиядан синов учун 500 доза вакцина сўрамоқда.

Ўзбекистон Соғлиқни сақлаш вазирлиги 2020 йилнинг охири ва 2021 йилнинг бошларида COVID-19га қарши Россия ишлаб чиқарган "Спутник V" вакцинаси синовини бошлашни режалаштирмоқда. Бу ҳақда Новости агентлиги соғлиқни сақлаш вазири Абдуҳаким Хожибоевга таяниб хабар берди.

Сентябрда Россия тўғридан-тўғри инвестициялар фонди (РТИФ) Ўзбекистондаги Laxisam фармацевтика ширкати билан 2020-2021 йилларда 35 миллион доза "Спутник V" вакцинасини етказиб бериш бўйича келишиб олгани тўғрисида маълум қилганди. Кейинроқ Laxisam Ўзбекистоннинг мувофиқлаштирувчи давлат органлари билан бу йўналишда иш олиб борилаётганини билдирган.

“Ижобий жавоб олинган тақдирда жорий йилнинг охири ёки келгуси йилнинг бошида бу вакцинанинг клиник синовларини бошлашни режалаштираяпмиз”,-деган вазир шанба куни журналистлар билан учрашуви чоғида.

Абдуҳаким Хожибоев РТИФга 500 доза вакцинага сўров юборганини айтди. Аввалроқ Соғлиқни сақлаш вазирлиги РТИФдан 5 минг доза вакцина сўралгани ҳақида хабар берганди.

Абдуҳаким Хожибоевга кўра, айни пайтда Ўзбекистонга синовдан ўтказиш учун Хитойдан 6 минг доза вакцина келтирилган.

Ноябрнинг ўрталарида Озодлик Ўзбекистонда Хитойнинг коронавирусга қарши вакцинаси синовининг учинчи босқичини ўтказишга тайёргарлик кўрилаётгани, вакцина 5 минг кўнгиллида синаб кўрилиши ҳақида хабар қилган.

Аввалроқ инновацион ривожланиш вазири Иброҳим Абдураҳмонов “Халқ сўзи” нашрига берган суҳбатида Ўзбекистонда Хитой, Россия, Европа ва АҚШ вакциналарини синовдан ўтказиш режаланганини билдирган эди.

Ургутда қалбаки пул ишлаб чиқарган шахс қўлга олинди

Самарқанд вилоят ИИБ томонидан Ургутда топилган қалбаки пуллар. Самарқанд ИИБ фотосурати.

Самарқанд вилоятининг Ургут туманида юз минг сўмлик қалбаки пулларни ишлаб чиқарган шахс қўлга олинди.

Самарқанд вилоят ИИБнинг маълум қилишича, Ургут тумани Қолдувойжар маҳалласида яшовчи Б.И., ўз уйида рангли принтери орқали юз минг сўмлик купюрадаги қалбаки пулларни ишлаб чиқариб, муомалага киритиб келганлиги аниқланди.

Бундан ташқари, Б.И.,нинг қариндоши Д., нинг уйи тинтув қилинганида жами 3,5 миллион сўмлик қалбаки пул топилган.

“Мазкур ҳолатлар юзасидан Ургут тумани бўйича ИИО ФМБ ҳузуридаги тергов бўлими томонидан дастлабки тергов ҳаракатлари олиб борилмоқда”,-дейилади хабарда.

ЮНИСЕФ: Камбағалларнинг 52 фоизига давлат ҳеч қандай ижтимоий ёрдам кўрсатмайди

Халқаро ташкилот ўз ҳисоботида ногирон болаларнинг 48 фоизи нафақа ололмаётгани ҳақида маълум қилган.

Ўзбекистонда 9 ёшгача бўлган болаларнинг тахминан 30 фоизи ва 10 ёшдан 14 ёшгача бўлган болаларнинг 24 фоизи энг камбағал оилаларда яшайди. ЮНИСЕФнинг “2019/2020: Ўзбекистондаги болалар вазиятининг таҳлили” ҳисоботида мана шундай ҳолат қайд этилди.

Ҳисоботда таъкидланишича, 2018 йилда Ўзбекистон аҳолисининг 11,4 фоизи миллий камбағаллик даражасида яшаган.

ЮНИСЕФ ҳисоботида Ўзбекистондаги камбағал оилаларнинг 52 фоизи ижтимоий ҳимоя тизимидан ҳеч қандай ёрдам олмаслиги таъкидланади.

Бундан ташқари болалар учун нафақа олувчилар сони ҳам йилдан йилга пасайиб бормоқда.

ЮНИСЕФ Ўзбекистонда 2 ёшгача бўлган болани парваришлаш учун нафақа олувчилар сони 2009 йилдан бошлаб 60 фоизга камайганига эътибор қаратади. Бундан ташқари 2 ёшдан 14 ёшгача болалари бор оилаларга тўланадиган нафақалар қисқариб бормоқда ва бугунги кунда бундай нафақа фақат болаларнинг 10 фоизига берилмоқда.

“Ҳозирги вақтда 0–17 ёшдаги болаларнинг фақат 17 фоизи бола учун бирор турдаги нафақа (болани парваришлаш учун нафақа, оилавий нафақа ёки болалар ногиронлиги бўйича нафақа) оладиган уй хўжаликларида яшайди”, – дейилади ҳисоботда.

Халқаро ташкилот ўз ҳисоботида ногирон болаларнинг 48 фоизи нафақа ололмаётгани ҳақида маълум қилган.

ЮНИСЕФ ўзининг аввалги ҳисоботида Ўзбекистонда “бола пули”га эҳтиёжи бор оилаларнинг 75 фоизи нафақа олмаслиги ҳақида билдирган эди.

МИБнинг айрим ваколатлари бекор қилинди

Бош прокуратура ҳузуридаги МИБ Шавкат Мирзиëев ташаббуси билан тузилган.

Марказий ижро бюросидан электр, иссиқлик энергияси, газ, водопроводдан фойдаланиш қоидаларини бузишга оид жиноятларни аниқлаш ваколати олиб ташланди. Бу меъёр "Суд ҳужжатлари ва бошқа органлар ҳужжатларини ижро этиш тизимини яна-да такомиллаштириш чора-тадбирлари тўғрисида”ги президент фармонда белгилаб қўйилди.

Фармонга асосан, бундан буён электр, иссиқлик энергияси, газ, водопроводдан фойдаланиш қоидаларини бузишга оид жиноятларни аниқлаш, бартараф этиш ва уларнинг олдини олиш билан Бош прокуратура ҳузуридаги Иқтисодий жиноятларга қарши курашиш департаменти шуғулланади.

Электр, иссиқлик энергияси, газдан фойдаланиш билан боғлиқ маъмурий ҳуқуқбузарликларни аниқлаш, бартараф этиш ва уларнинг олдини олиш эса ички ишлар органлари зиммасига юқланди.

Бундан ташқари, фармон билан 2020 йил 1 декабрдан бошлаб маъмурий жарима қўллаш тўғрисидаги ижро ҳужжатлари МИБ органларига жаримани ихтиёрий тўлаш учун муддатлар тугаганидан сўнг тақдим этилади.

Шунингдек, мулкий тусга эга бўлган ижро ҳужжатлари бўйича ундириладиган ижро йиғими ундирув суммаси БҲМнинг 1000 баравари (223 миллион сўм)дан ортиқ бўлмаган ижро ҳужжатлари бўйича ундирилаётган сумманинг 5 фоизи, ундирув суммаси БҲМнинг 1000 баравари (223 миллион сўм)дан ортиқ бўлган ижро ҳужжатлари бўйича ундирилаётган сумманинг 2 фоизи миқдорида ўрнатилади.

Монополия қўмитаси чигит савдосини чеклаган 3 та ҳокимлик устидан иш қўзғатганини маълум қилди

Монополияга қарши курашиш қўмитаси Қашқадарё, Сурхондарё ва Хоразм вилоят ҳокимликларининг пахта чигитини бошқа вилоятларга чиқармаслик қарорини ноқонуний, деб топди.

Қўмита сайтида берилган баёнотда айтилишича, бу ҳокимликлар олиб чиқилаётган чигитни тўхтатиб қолиш ҳақида ҳудудий ИИБларга оғзаки топшириқ берган ва бу топшириқ ноқонуний равишда берилган.

Қўмита матбуот хизматининг маълум қилишича, биржа савдоларида чигит савдоси бўйича ҳудудий чекловлар назарда тутилмаган, аммо ҳокимликлар чигитни фақатгина ўз ҳудудида сотиб олиниши ва ташқарига чиқармаслик бўйича кўрсатма бермоқда.

"Бугунги кунда қўмита томонидан юқорида тилга олинган вилоятлар ҳокимликлари ҳамда Ички ишлар бошқармаларига нисбатан тегишли иш қўзғатди", дейилади қўмита баёнотида.

Айни пайтда, қўмита қўзғаган иш, бу ҳокимларга қандай ҳуқуқий оқибатларни олиб келиши мумкинлиги ҳақида маълумот берилмади.

Аввалроқ Gazeta.uz нашри, вилоят ҳокимиятлардан биридаги ахборот манбасига таяниб, ҳокимликлар ўрнатиб олган тақиқ тадбиркорларга жиддий зарар келтираётгани, уруғлик чигит кластерлари эса тўловни вақтида ўтказа олмаётгани ҳақида ёзган эди.

АОКА маҳаллий нашрларга юборган огоҳлантириш хатига изоҳ берди

АОКА раҳбари Асаджон Ходжаев

Ахборот ва оммавий коммуникациялар агентлиги АОКА маҳаллий Интернет нашрларига юборган огоҳлантириш хатлари бўйича баёнот берди.

Баёнотда айтилишича, кейинги пайтларда "айрим оммавий ахборот воситалари, ижтимоий тармоқ ва турли мессенжерларда тасдиқланмаган ахборотларни чоп этиш кузатилмоқда, ёлғон маълумотларни тарқатиш фактлари мавжуд".

Баёнотда, 20-23 ноябрь кунлари «Kun.uz», «Daryo.uz», «Gazeta.uz», «Podrobno.uz», «Repost» Интернет нашрларида "қонунчилик талабларига мос келмайдиган ахборотларни тарқатиш ҳолатлари" аниқлангани учун огоҳлантириш хатлари юборилгани айтилган.

Агентлик хулосасига кўра, «Kun.uz» сайтида ижтимоий тармоқ фойдаланувчиларининг "ҳақоратли фикрлари ва чақириқлари жамоатчилик фикри сифатида тақдим этилган".

«Gazeta.uz», «Daryo.uz», «Podrobno.uz», «Repost» сайтларида жойлаштирилган материалларда "коронавирус инфекцияси билан касалланганлар статистикаси шубҳа остига олинган". Дарвоқе, бу нашрлар иккита расмий манба - президент матбуот хизмати ва Соғлиқни сақлаш вазирлигининг коронавирус беморлари ҳақида берган рақамлари ўртасидаги тафовутни ёзгани учун АОКАдан огоҳлантириш олган.

"Агентлик журналист ва блогерларга давлат органларининг ОАВ билан конструктив ва очиқ мулоқотда бўлишлари учун ҳар томонлама амалий ёрдам кўрсатишга тайёрлигини билдиради, шунингдек, мамлакатда сўз эркинлиги ва оммавий ахборот воситалари ривожланишини таъминлашни кафолатлайди" дейилади баёнотда.

Аммо, агентликнинг маҳаллий нашрларга йўллаган бу огоҳлантируви ушбу нашрлар ва халқаро ташкилотлар томонидан маҳаллий матбуотга босим сифатида баҳоланмоқда.

Хусусан, мустақил нашрларнинг ўзи, танқидий чиқишлар учун "жиддий ҳуқуқий оқибатлардан" огоҳлантирган АОКАни босим ўтказишга уринишда айбламоқда.

Ўзбек ҳукумати Суриядан ватандошларининг навбатдаги гуруҳини олиб келмоқчи

Ўзбекистон делегацияси Сурияга ташриф буюриб, ушбу мамлакатда қийин аҳволга тушиб қолган республика фуқаролари, аёллар ва болаларни ватанига қайтариш бўйича навбатдаги акциянинг ташкилий масалаларини муҳокама қилган.

Бу ҳақда Ўзбекистон Ташқи ишлар вазирлигининг "Дунё" агентлиги хабар берди.

"Ушбу мақсаддаги чора-тадбирларни амалга ошириш жараёнида фақат инсонпарварлик тамойилларига таянилади", — дейилади хабарда.

Суриядан қанча ўзбекистонлик олиб келиш мўлжалланаётгани ҳақда хабарда маълумот келтирилмаган.

Айни пайтда Туркия матбуоти Ўзбекистон бош вазири маслаҳатчиси Меҳриддин Ҳайриддинов бошлиқ делегация 26 ноябр куни Сурия шимолига сафар қилиб, у ердаги автономия маъмурият раҳбарлари, жумладан Абдул Карим Умар ва унинг муовини Фанар Қайитлар билан музокара ўтказгани ҳақда хабар қилди.

Абдул Карим Умар Туркия доҳил АҚШ ва Европа Иттифоқи ҳам террор ташкилоти деб тан олган ПКК Курдистон Ишчилар Партияси ташқи алоқалар бюроси ҳамраисларидан бири экани айтилади.

Ўзбекистон ҳукумати илк бор 2019 йил май ойи охирида 156 нафар ўзбекистонлик, асосан аёллар ва болаларни Uzbekistan Airways’нинг Сурия пойтахти Дамашқдан амалга оширилган махсус рейси билан Ўзбекистонга олиб келган эди.

Кейинчалик ушбу операция давомида Ўзбекистон томони маълум бир қийинчиликларга дуч келгани аён бўлган эди. Хусусан, Ўзбекистон Президенти Шавкат Мирзиёев бир давлат Суриядан ватандошларни олиб қайтиш учун Ўзбекистон самолётини уриб тушириш билан таҳдид қилганини маълум қилган эди.

Давомини ўқинг

XS
SM
MD
LG