Мониторингми ёки цензура?

август 17, 2004

Басира Хабарларга кўра, Ўзбекистон матбуот ва ахборот агентлигининг Бухоро вилояти бошқармаси 23 июнь куни вилоятда фаолият кўрсатадиган барча оммавий ахборот воситаларига расмий хат жўнатган. Хатда ёзилишича, агентликдан 14 июнь куни олинган факсограммага асосан вилоят ОАВда июнь ойидан декабргача мониторинг ўтказиш йўлга қўйилади. Мониторингга сайлов қонунчилиги, жорий йил декабрда ўтказиладиган сайловларга тайёргарлик ва Конститутия тарғиботига доир эълон қилинган мақола, телекўрсатув ва радиоэшиттиришлар ҳақидаги маълумотлар киритиш лозимлиги белгиланган.

Вилоят журналистларининг “Репортёр” клуби раҳбари Обид Шабонов клуб ҳам шу мазмундаги расмий хат олганини маълум қилди. Унинг фикрича, мониторинг ўтказилиши ОАВда кучли назорат ўрнатилишидан дарак беради.

“Албатта, ОАВ сайлов жараёнларини мавжуд қонун-қоидаларга риоя қилган ҳолда ёритиши керак. Лекин бунақа ўзига хос кузатишлар, қаттиқ назоратлар фақат цензурани намоён этяпти”, деди О.Шабонов.

Хатда ёзилишича, мониторинг учун тайёрланадиган маълумотда ахборотларнинг мавзуси ва жанри, чиқиш қилаётган мансабдор шахс ва фуқаролар, депутатликка номзодларга доир материаллар аниқ кўрсатилиши шарт.

Агентликнинг вилоят бошқармаси бошлиғи вазифасини бажарувчи Бобур Саидовнинг таъкидлашича, мониторинг сайлов тўғрисидаги қонунчиликни тарғиб этиш мақсадида амалга оширилмоқда. Маҳаллий журналистлар бири эса бу ҳаракатлар сайлов олдидан цензурани кучайтириш мақсадида амалга оширилаётганини тахмин қилди.

Хабарларга кўра, вилоят оммавий ахборот воситалари ҳар ойнинг йигирма иккинчи санасида мониторингга оид маълумотларни бошқармага тақдим этиши лозим.