Линклар

Шошилинч хабар
15 май 2021, Тошкент вақти: 16:27

Ўзбекистон хабарлари

Ўзбек мардикорлари оғудан ҳалок бўлди

Россиянинг Пушкин шаҳрида шанба куни икки нафар ўзбекистонлик нейротроп оғусидан заҳарланиб ўлган. Яна тўрт нафар ишчи касалхонага ётқизилган.

Россия ахборот агентликлари хабарига кўра, ўзбек фуқароларининг жасадлари вагон-уйча ичида топилган.

Уларнинг организмида нейротроп борлиги аниқланган.

Дастлабки маълумотларга кўра, жабрланганлар спиртли ичимлик ўрнига номаълум суюқликни истеъмол қилган бўлишлари мумкин.

Кун янгиликлари

"Ўзбекистон" меҳмонхонаси нега Исроил байроғига бурканганини изоҳлади

Ижтимоий тармоқларда Тошкентдаги “Ўзбекистон” меҳмонхонаси биносидаги экранда Исроил байроғи акс этгани тасвирланган сурат ва виделар ижтимоий тармоқларда муҳокамаларга сабаб бўлди.

Бу ҳолат Яқин Шарқда зўравонликлар бўлаётган кезда рўй берди.

"Ўзбекистон" меҳмонхонаси бино экрани бундан роппа-роса бир ой аввал, 14 апрель куни – Исроил мустақиллигининг 73 йиллиги муносабати билан шу давлат байроғи тусига киргани, бунинг Яқин Шарқдаги ҳозирги вазиятга алоқаси йўқлигини маълум қилди.

Меҳмонхона ходимининг сўзларига кўра, бунинг учун Исроилнинг Ўзбекистондаги элчихонаси билан шартнома тузилган.

“Ўзбекистон дипломатик алоқа ўрнатган давлатлар байроқларини қўйиб борамиз. Бу қонун доирасида”, деб айтган меҳмонхона ходими.

Яқин Шарқда зўравонликлар беш кундирки давом этмоқда.

Душанба кунидан буён юздан ортиқ фаластинлик ҳалок бўлди. Исроилликлар орасида талафотлар сони саккиз кишини ташкил этмоқда.

Ғазо ва Исроилдаги сўнгги зўравонликлар 2014 йилдан буён кузатилган энг ёмони экани айтилади.

Россиялик овчи Ўзбекистонда Тяншан қўнғир айиғини ўлдириш учун қанча ҳақ тўлагани маълум қилинди

Ўзбекистон Адлия вазирлиги мамлакат ҳудудида ҳайвонларни ов қилиш маълум ҳақ эвазига амалга оширилишини маълум қилди.

Вазирликнинг бу баёноти Тошкент вилоятида россиялик овчи Ўзбекистон "Қизил китоби"га киритилган Тяншан қўнғир айиғини отиб ўлдиргани муҳокамаларга сабаб бўлаётган кезда янгради.

Адлия вазирлиги матбуот хизматига кўра, Экология ва атроф-муҳитни муҳофаза қилиш давлат қўмитаси 10 декабрга қадар (қўшимча квота учун 10 майга қадар) бўлган муддатда Фанлар академиясининг хулосаси асосида ёввойи ҳайвонларни тутишга доир квоталарни тасдиқлайди ва тегишли тартибда қўмитанинг маҳаллий бошқармаларига юборади. Қўмитанинг ҳудудий органлари эса ҳайвонот дунёсидан фойдаланишга доир рухсатномаларни беради.

"Ов қилиш ва овчилик хўжалиги тўғрисида"ги қонунда, шунингдек, Ўзбекистон "Қизил китоб"ига киритилган камёб ва йўқолиб бораётган сутемизувчилар турлари бўйича алоҳида тўлов миқдорлари белгиланган", - дейилади Адлия вазирлиги матбуот хизмати билдирувида.

Ўзбекистонда ёввойи ҳайвонларни овлаш учун нархлар рўйхатида Тяншан қўнғир айиғини илмий, тиббий ва назорат мақсадида тутиш учун ўзбекистонликларга 19,6 миллион сўм, спорт, ҳаваскорлик ва ўлжа олиш мақсадида тутиш учун эса 24,5 миллион сўм тўлов белгиланган.

Хорижлик фуқароларга эса ушбу ҳайвонни ов қилишнинг барча турлари бўйича тутишга 3 минг доллар миқдорида тўлов белгиланган.

Мирзиёев журналистлар билан мулоқотда гематология ва онкология соҳаси муаммолари ҳақида гапирди

Ўзбекистон президенти Шавкат Мирзиёев Тошкентнинг Учтепа туманига ташриф чоғида журналистлар билан суҳбатда гематология ва онкология шифохоналарини керакли ускуналар билан таъминлашга ваъда берди.

"Бизда тана аъзоларини кўчириш соҳасида мутахассис ҳам йўқ, марказ ҳам йўқ, ускуналар ҳам йўқ. Шунинг учун бу борада катта тажрибага эга Россия, Корея, Германиядан ускуналар олиб келиб ҳамма вилоятда марказлар очамиз. Фақат Тошкентда эмас, Тошкент вилоятида ҳам ташкил қиламиз. Тошкентда 10 гектарга яқин жой ажратиб энг замонавий марказ ташкил қиламиз", деди Шавкат Мирзиёев.

Ўзбекистон президенти муаммоларни бир қарор билан ҳал қилиб бўлмаслиги, қарорлар ижросини назорат қилишда журналистлар ва оммавий ахборот воситалари вакиллари кўмачки бўлиши кераклигини урғулади.

Сўнгги пайтларда Ўзбекистон президенти жойларга уюштирилган сафарлари чоғида журналистлар қаршисида чиқиш қилиши кузатилмоқда.

Бу каби жонли мулоқотларнинг биринчиси Мирзиёевнинг шу йил февраль ойида Наманган вилоятига қилган сафари пайтида амалга ошган.

Мазкур чиқишларда журналистлар, матбуот анжуманларида бўлганидек, президентга ўзлари истаган саволни бериш имконига эга бўлмаган бўлсалар-да, бундай жонли мулоқотлар халқаро кузатувчилар томонидан “муҳим ҳодиса” ўлароқ баҳоланмоқда.

Коронавирусга чалинганларнинг умумий сони 96 минг нафардан ошди

Ўзбекистонда коронавирус инфекцияси қайд этилганлар сони, 2021 йил 13 май ҳолатига кўра, 96 минг 117 нафарни ташкил этган.

Соғлиқни сақлаш вазирлиги қайдича, ўтган кеча-кундузда мамлакатнинг истисносиз барча ҳудудларида жами 291 киши коронавирус юқтириб олган.

Айни пайтда Рамазон ҳайити куни Бухоро, Наманган, Хоразм, Тошкент вилоятлари ва Тошкент шаҳрида 136 нафар бемор соғайиб, тузалганларнинг жами 91 минг 507 нафарга етган.

Касалхоналарда муолажаси давом этаётган беморлар сони эса шу кунда 3 минг 943 нафарни ташкил этмоқда.

ССВ аввалроқ Ўзбекистонда коронавирус қурбонлари сони 667 нафарга етгани ҳақида билдирган эди.

ССВ масъули Ўзбекистонга Хитойнинг яна бир вакцинаси олиб келиниши мумкинлигини билдирди

Ўзбекистонга Хитойда ишлаб чиқарилган Sinovac вакцинасидан олиб келиниши мумкин. Бу ҳақда Соғлиқни сақлаш вазирлиги Коронавирусга қарши курашиш штаби аъзоси Нурмат Отабеков 12 май куни АОКАда ўтказилган брифингда маълум қилган.

“Жаҳон соғлиқни сақлаш ташкилотининг маълумотларига кўра, COVAX дастури доирасида Хитойнинг Sinopharm фирмасида ишлаб чиқарилган Sinovac вакцинаси Ўзбекистонга олиб келиниши эҳтимоли бор”, деган вазирлик мулозими.

Хитойнинг Sinovac хусусий компанияси ва Sinopharm давлат фирмаси томонидан ишлаб чиқарилган вакциналар Мексика, Туркия, Индонезия, Венгрия, Бразилия ва Туркия сингари ўнлаб мамлакатга тарқатилган. Аммо мазкур ширкатлар ўз вакциналарининг сўнгги босқич клиник синовлари ҳақида нуфузли илмий журналларда маълумот чоп этмагани учун танқидга учраган. Турли мамлакатларда ўтказилган синовлар “Sinovac” вакцинаси самарадорлиги 50 фоиздан 83 фоизгача ўзгаришини кўрсатган.

Н. Отабековга кўра, айни пайтда Россиянинг “Спутник V” вакцинасидан 1 миллон доза олиш учун буюртма берилган. Ҳозирги пайтда 50 минг аҳолини эмлаш учун мазкур вакцинадан 100 минг доза олиб келинган. Қолган буюртмалар келиши билан хавф остидан ташқари бўлган аҳолига ҳам таклиф этилади.

Ўзбекистонда аҳолини коронавирусга қарши эмлаш тадбирлари 1 апрелдан бошланган. Эмловда Хитойнинг Zhifei Longcom Biopharmaceutical Co. Ltd ширкати томонидан ўзбекистонлик мутахассислар ҳаммуаллифлигида яратилган ZF-UZ-VAC2001 ҳамда Британияда ишлаб чиқарилган AstraZeneca вакцинаси қўлланилган. 28 апрелдан бошлаб эса эмловда Россиянинг “Спутник V” вакцинасидан ҳам фойдаланила бошлаган.

Расмий: Пандемия шароитида Тошкент масжидларида 10 минглаб одам ҳайит намози ўқиди

Тошкентдаги “Ҳазрати Имом” масжидида ўқилган ҳайит намози (архив сурати)

Рамазон ҳайити муносабати билан 13 май тонгидаги ибодатга Тошкентдаги “Ҳазрати Имом” мажмуасига 18 мингдан зиёд, “Шайх Зайниддин” масжидига 30 мингдан зиёд, “Қуддуси Шариф” масжидига эса 20 мингга яқин намозхон ташриф буюрган. Бу ҳақда Дин ишлари бўйича қўмита раисининг биринчи ўринбосари Музаффар Комилов пайшанба куни АОКАда ўтказилган брифинг чоғида маълум қилди.

Мулозимга кўра, кеча Ўзбекистон бўйича 2090 та масжиддан 2021 тасида умумий ҳисобда 2 миллион 576 минг ўзбекистонлик Рамазон ҳайити намозини адо этган. Пойтахтдаги 106 та масжидга эса байрам ибодати учун 497 минг намозхон келган.

Айни пайтда М. Комилов мамлакат бўйлаб ҳайит намози Республика махсус комиссияси томонидан белгиланган талабларга тўлиқ риоя қилинган ҳолда адо этилганини иддао қилган. Унинг айтишича, жойларда ҳайит тадбирларини юқори савияда ташкил этиш, ҳайит намози ўтказиладиган масжид ҳудудлари ва халқ сайиллари ўтказиладиган жойларда карантин талаблари, жамоат хавфсизлигини таъминлаш чоралари кўрилган. Хусусан, намозни тартибли ва карантин қоидаларига мувофиқ ўтказиш мақсадида 13 мингга яқин ички ишлар ва бошқа мутасадди ташкилотлар ходимлари, 5 мингдан зиёд тиббиёт ходимлари, 2 мингга яқин махсус транспорт воситалари жалб этилган.

Дин ишлари бўйича қўмита мутасаддиси ҳайит муносабати билан ижтимоий ҳимояга муҳтож аҳолига жами 13 миллиард 4 миллион сўмга яқин моддий ёрдам кўрсатилганини қўшимча қилган.

Бош вазир Расулзода етакчилигидаги Тожикистон делегацияси Тошкентга келади

Ўзбекистон бош вазири А. Арипов ва Тожикистон бош вазири Қ. Расулзода (архив сурати)

Тожикистон бош вазири Қоҳир Расулзода бошчилигидаги делегация 14 май куни Ўзбекистонга ташриф буюради.

Бу ҳақда маълумот тарқатган Ўзбекистон бош вазири матбуот хизматига кўра, қўшни давлат расмийлари Тошкентга Ўзбекистон Республикаси ва Тожикистон Республикаси ўртасида Савдо-иқтисодий ҳамкорлик бўйича Ҳукуматлараро комиссиянинг 14-15 май кунлари бўлиб ўтадиган 8-йиғилишида иштирок этиш учун келмоқда.

Тожикистон ҳукумат делегациясининг Ўзбекистонга ташрифи дастуридан Тошкент шаҳридаги бир қатор саноат объектлари фаолияти билан яқиндан танишиш ўрин олган.

Айни пайтда жума ва шанба кунлари бўлиб ўтажак Ҳукуматлараро комиссия йиғилиши якунлари бўйича қатор ҳужжатлар имзоланиши кўзда тутилган.

Қўшни давлат расмийларининг Тошкентга сафари масаласи Ўзбекистон президенти Шавкат Мирзиёев билан Тожикистон президенти Эмомали Раҳмон ўртасида 13 май куни бўлиб ўтган телефон мулоқоти чоғида ҳам муҳокама қилинган.

Мулоқот чоғида Ш. Мирзиёев ва Э. Раҳмон Марказий Осиёда барқарорлик ва хавфсизликни таъминлашнинг муҳим омили сифатида Тожикистон-Қирғизистон чегарасидаги вазият барқарорлашганини мамнуният билан қайд этганлар.

Рамазон ҳайити куни Ўзбекистон президенти Қирғизистон президенти билан ҳам телефон орқали мулоқот қилгани хусусида Озодлик аввалроқ хабар қилган эди.

Кейинги ойдан Тошкент билан Ар-Риёд ўртасида мунтазам авиақатнов йўлга қўйилади

Ўзбекистон билан Саудия Арабистони пойтахтлари ўртасида жорий йилнинг 12 июнидан бошлаб мунтазам авиақатновни йўлга қўйиш режаланмоқда.

“Дунё” ахборот агентлиги хабарига кўра, бу ҳақда куни кеча Ўзбекистоннинг мутасадди вазирлик ва идоралари ҳамда Саудия Арабистонининг “Flynas” авиакомпанияси ва “Seera” туристик агентлиги вакиллари ўртасида видеоконференция шаклидаги ташкил этилган мулоқот чоғида билдирилган.

Мулоқотда Саудия Арабистони подшоҳлиги делегациясининг жорий йил январь ойида Ўзбекистонга ташрифи доирасида Бухоро шаҳрида ўтказилган бизнес-форумда “Uzbekistan airways” АЖ ва Саудиянинг “Flynas” авиаширкати ўртасида туризмни ривожлантириш тўғрисида имзоланган Англашув меморандумида белгиланган вазифаларнинг амалий натижалари хусусида фикр алмашилган. Шунингдек, Саудия Арабистонида Ўзбекистон туризм салоҳиятини кенг тарғиб этиш орқали саудияликларнинг Ўзбекистонга саёҳатларини уюштириш истиқболлари муҳокама қилинган.

“Flynas” вакиллари кейинги ойдан “Ар-Риёд–Тошкент–Ар-Риёд” йўналиши бўйича ҳафтасига уч марта мунтазам авиақатнов амалга ошириш режаланганини маълум қилишган.

Коронавирус пандемияси туфайли Саудия Арабистони ўтган йили ўз фуқаролари учун хорижга чиқиш бўйича вақтинча чекловлар ўрнатган эди. Айни пайтда мазкур мамлакат расмийлари саудияликларга коронавирус билан боғлиқ вазият яхшиланган давлатларга жорий йил 17 майидан бошлаб сафар қилишга рухсат берган.

Ўзбекистонда коронавирусдан ўлганлар сони яна биттага кўпайди

Янги касалланиш ҳолатларининг 163 таси Тошкент шаҳрида аниқланди.

Ўзбекистонда 12 май куни коронавирусга чалинган беморлардан яна бири вафот этди. Бу билан мазкур касалликдан ўлганлар сони 667 кишига етди.

Соғлиқни сақлаш вазирлиги 12 май куни яна 359 кишида коронавирус аниқланганини, бугунги кунгача коронавирус инфекцияси қайд этилганлар сони 95826 нафарни ташкил этаётганини билдирди.

Янги касалланиш ҳолатларининг 163 таси Тошкент шаҳрида, 63таси Тошкент вилоятида ва 65 нафари Самарқанд вилоятида аниқланган.

Касалликдан соғайганлар жами 91301 нафарга етди ва соғайиш кўрсаткичи 95 фоизни ташкил этмоқда.
Айни пайтда тиббиёт муассасаларида 3858 нафар бемор даволанмоқда.

Мирзиёев Жапаров билан телефон орқали гаплашди. Расмий маълумотда чегарадаги муштлашув эсланмади

Садир Жапаров Шавкат Мирзиёев билан 11-12 март куни Тошкентда музокаралар олиб борган.

Ўзбекистон президенти Шавкат Мирзиёев 13 май куни Қирғизистон президенти Садир Жапаров билан телефон орқали Қирғизистон-Тожикистон чегарасидаги вазиятни барқарорлаштириш масаласида суҳбатлашди.

Ўзбекистон президенти матбуот хизматининг билдиришича, мулоқот пайтида Марказий Осиё минтақасида дўстлик, яхши қўшничилик ва шериклик муносабатларини мустаҳкамлаш масаласи ҳам тилга олинган.

Бироқ расмий маълумотда 13 май куни Ўзбекистоннинг Чашма ва Қирғизистоннинг Сай қишлоғи аҳолиси ўртасида юз берган инцендент ҳақида маълумот берилмади.

Аввалроқ Қирғизистон томони 13 май куни Ўзбекистоннинг Сўх тумани Чашма қишлоғи ва Қирғизистоннинг Боткен тумани Қиштут қишлоқ ҳукуматига қарашли Сай овули аҳолиси ўртасида “келишмовчилик оқибатида муштлашув содир этилган”и, бунинг ортидан икки қишлоқ аҳолиси чегара атрофига йиғилгани ҳақида маълум қилган эди. Мазкур ҳодиса юзасидан хабарни мана бу жойда ўқишингиз мумкин.

28,29, 30 апрель ва 1 май кунлари Қирғизистон-Тожикистон ҳарбийлари ўртасида отишма бўлган ва унда қирғиз томонидан камида 36 киши, тожик томонидан эса 19 тожикистонлик ҳалок бўлгани хабар қилинган.

Ўзбекистон президенти матбуот хизматининг билдиришича, мулоқот чоғида президентлар муқаддас Рамазон ҳайити муносабати билан бир-бирларини самимий қутлаб, “биродар халқларимизга тинчлик, фаровонлик ва равнақ тилаб, эзгу истакларини изҳор қилдилар”.

Қашқадарёда рўй берган ЙҲТ икки гўдак дохил 7 кишининг умрига зомин бўлди

Қашқадарёдаги автоҳалокат иштирокчиси бўлган автомобиллардан бири (Касби туман ҳокимлиги ахборот хизмати фотоси)

Қашқадарё вилояти Касби туман Тошқўрғон маҳалласи ҳудудидан ўтувчи “Қарши-Таллиқўрғон-Касби-Жейнов” автомобиль йўлининг 26 километрида 8 май содир бўлган йўл транспорт ҳодисасида 7 киши нобуд бўлган.

Касби туман ҳокимлиги ахборот хизмати маълумотига кўра, ўтган ҳафта охирида ҳаракат қоидаларини қўпол равишда бузиб, катта тезликда келаётган ВАЗ-2101 автомашинаси ва йўлнинг қарама-қарши томонидан катта тезликда ҳаракатланаётган Нексия автомашинаси бир-бири билан тўқнашган. Тунги соат 22:10 да содир бўлган бу автоҳалокат бирданига 7 кишининг умрига якун ясаган.

Қайд этилишича, ЙТҲ қурбонларининг бири 1 яшар, яна бири 4 яшар бола бўлган, қолган беш қурбон ҳам ёши қирққа етмаган кишилар бўлгани айтилмоқда.

Биржада чигит нархи арзонлади, бунинг ортидан ёғ баҳоси ҳам пасайди

Жорий йилнинг 6−12 май кунлари Ўзбекистон республика товар-хом ашё биржасида ўтказилган очиқ биржа савдолари якунлари кўра техник пахта чигитининг биржадаги нархи 31,2 фоизга пасайиб, 12 май ҳолатига кўра маҳсулотнинг бир тоннаси учун ўртача 3 миллион 403 минг 900 сўмни ташкил этди. Бу ҳақда Газета.uz нашри Ўзбекистон республика товар-хом ашё биржаси (UzEx) маълумотларига таянган ҳолда хабар қилди.

Қайд этилишича, ўтган ҳафта ичида биржа савдоларига сотувчи-корхоналар томонидан 7 961 тонна пахта чигити қўйилган ва улардан 5 903 минг тоннаси, яъни 74,1 фоизи сотилган.

“Техник пахта чигитининг биржадаги нархларини пасайишига унинг бошланғич нархларини сотувчи-корхоналар, яъни пахта-тўқимачилик кластерлари томонидан пасайтирилганлиги ўз ижобий таъсирини ўтказди”, дейилган UzEx хабарномасида.

Техник пахта чигити нархининг пасайиши оқибатида пахта ёғининг бошланғич қиймати ва биржадаги нархлари ҳам пасайган. Хусусан, ўтган даврда пахта ёғининг бошланғич нархи ўртача 5,3 фоизга, биржа савдолари натижасида шаклланган нархи эса 11,3 фоизга пасайиб, бугунги кунда маҳсулотнинг бир тоннаси учун 14 миллион 739 минг 300 сўмни ташкил қилмоқда.

Аввалроқ Монополияга қарши курашиш қўмитаси биржада техник чигитнинг бошланғич нархларини келишиб сунъий ошириш аломатлари билан 34 та пахта кластерига нисбатан иш қўзғатгани ҳақида хабар қилган эдик.

Рамазон ҳайити арафасида Ўзбекистонда юз нафар фуқаро афв этилди

Ўзбекистон президенти Шавкат Мирзиёев Рамазон ҳайитини арафасида “Озодликдан маҳрум этиш жазосини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида”ги фармонни имзолаган.

“Фармонга мувофиқ, Ўзбекистон Республикаси Конституциясининг 93-моддаси 23-бандига асосан жазо муддатини ўтаётган ҳамда қилмишига чин кўнгилдан пушаймон бўлган ва тузалиш йўлига қатъий ўтган 100 нафар фуқаро афв этилди”, дейилган ЎзА хабарида.

Афв этилганларнинг 3 нафари асосий жазодан тўлиқ озод этилган, 43 нафари жазони ўташдан муддатидан илгари шартли озод қилинган, 10 нафарининг озодликдан маҳрум этиш жазоси енгилроқ жазо билан алмаштирилган ҳамда 44 нафар шахсга тайинланган озодликдан маҳрум этиш жазосининг муддатлари қисқартирилган.

Қайд этилишича, афв этилганларнинг 12 нафари чет эл фуқароси, 4 нафари ёши 60 дан ошган эркак, 6 нафари аёл, 52 нафари эса тақиқланган ташкилотлар фаолиятида қатнашган шахслардир.

Мирзиёев Ўзбекистон халқини Рамазон ҳайити билан табриклади

Тошкентдаги жомеъларидан бирида ўқилган ҳайит намози (архив сурати)

Президент Шавкат Мирзиёев Ўзбекистон “мўмин-мусулмонлари ва бутун халқини ер юзидаги ислом уммати томонидан кенг нишонланаётган улуғ ва муборак айём – Рамазон ҳайити билан” муборакбод этди.

Ўтган вақт ичида кўплаб хайрли ишлар амалга оширилганини таъкидлаган президент кўлами ва миқёси тобора кенгайиб бораётган бу каби амалий ишлар “янги Ўзбекистонни барпо этиш, мамлакатда Учинчи ренессанс пойдеворини яратиш, Ватан равнақи, халқ фаровонлигини оширишдек эзгу мақсадларга уйғун ва ҳамоҳанг” эканига эътибор қаратган.

Ўз табригида Мирзиёев ўзбек маърифатпарвари Маҳмудхўжа Беҳбудийнинг “Дунёда турмоқ учун дунёвий фан ва илм лозимдур” деган сўзлари бугун ҳам долзарблигини урғулаб, “диний қадриятларимизни, миллий ўзлигимизни улуғлаб яшаш билан бирга, давр талаби бўлган замонавий илм-фан ютуқлари, ахборот технологияларини эгаллашга алоҳида эътибор қаратишимиз, ёш авлодимизни умуминсоний қадриятлар руҳида тарбиялашимиз керак”, дея қайд этган.

Қуддусда сулҳ ўрнатиш чақириқларига расмий Тошкент ҳам қўшилди

Исроил зарбаларидан кейинги Ғазо минтақаси , 2021 йил 12 майи

Ўзбекистон расмийлари Шарқий Қуддусдаги вазият кескинлашганидан чуқур хавотир изҳор қилдилар. Бунга оид баёнот 12 май оқшомида Ташқи ишлар вазирлиги томонидан тарқатилди.

Томонларни зўравонликка чек қўйиш, вазиятни беқарорлаштиришдан сақланиш ва бундан буён қон тўкилишига йўл қўймаслик ҳамда мусулмон олами учун муқаддас ҳисобланган Ийд ал-Фитр арафасида можарони ҳал этиш бўйича барча имкониятларни сафарбар этишга чақирамиз”, дейилган ТИВ баёнотида.

Ўзбек дипломатлари мулоҳазасича, Ал-Ақсо масжиди ва Қуддусдаги бошқа муқаддас қадамжоларнинг дахлсизлигини – статус-квога риоя этилишини таъминлаш зарур.

Фаластин-Исроил муаммоси халқаро ҳуқуқ меъёрлари, Бирлашган Миллатлар Ташкилоти Хавфсизлик Кенгаши томонидан аввал қабул қилинган резолюциялар ҳамда “икки халқ учун икки давлат” тамойили асосида ҳал этилиши лозим”, деб ҳисоблайди ўзбек дипломатлари.

Ўз уйларини яҳудийлар тортиб олаётганига норозилик билдираётган фаластинликлар ва Исроил полицияси ўртасида Қуддусдаги Ал-Ақсо масжиди яқинида бошланиб кетган тўқнашувлар бир неча ҳафтадан бери давом этаётгани ҳақида Озодлик илгарироқ хабар қилган. Бу ердаги тўқнашувларда элликка яқин фаластинлик ва камида 6 нафар исроиллик вафот этгани, 500 чоғли одам жароҳатлангани айтилмоқда.

Аввалроқ БМТ масъуллари, АҚШ, Европа Иттифоқи ва Россия расмийлари Қуддусда сулҳ ўрнатиш чақириқлари билан чиққан эдилар.

Жиззах шаҳар ҳокими ўринбосари пора билан қўлга тушгани айтилмоқда

Иллюстратив сурат.

Жиззах шаҳар ҳокимининг биринчи ўринбосари вазифасини вақтинча бажарувчи Ойбек Нурматов 2 минг доллар пора олаётганида қўлга тушгани ҳақида davletovuz телеграм канали 12 май куни хабар қилди.

Амалдорларнинг коррупцияга алоқадорлиги тўғрисидаги маълумотларни тарқатиш орқали танилган канал муаллифининг ёзишича, “Ёшлар” телеканалининг “Янги давр” ахборот дастурида бу борада лавҳа намойиш этилган.

Билдирилишича, Ойбек Нурматов тадбиркорлардан биридан қурилиш-таъмирлаш ишлари бўйича ўтказиладиган тендер савдоларини олиб бериш эвазига 2 минг доллар пора талаб қилган.

Gazeta.uz нашрининг билдиришича, Ойбек Нурматовнинг асосий лавозими Жиззах шаҳар молия бўлими бошлиғи бўлган. У ҳокимнинг биринчи ўринбосари лавозимини вақтинча бажариб турган.

Чирчиқда намойишга чиққан ишчиларга ойликлари тўланди, ширкат раҳбари жаримага тортилди

Чирчиқлик ишчилар қурилишларда ишлаган.

Чирчиқдаги “Водий саркор дизайн” ширкати раҳбари Меҳнат Кодексининг 154-161 моддалари бузилганлиги учун маъмурий жавобгарлик тўғрисидаги кодекснинг 49-моддаси 1-қисми асосида жаримага тортилди.

Бандлик ва меҳнат муносабатлари вазирлиги матбуот хизмати расмий маълумотида раҳбар қанча миқдорда жаримага тортилгани аниқ айтилган эмас.

“Тошкент вилояти Пскент туманида жойлашган “Водий саркор дизайн” МЧЖ раҳбари Хусанов Зиёдулла Сурҳондарё ва Фарғоналик фуқароларни, Чирчиқ шаҳар 1-кичик нохия ҳудудидаги кўп қаватли уйларнинг қурилиш ишларига жалб қилгани ва уларнинг ишлаган даврлари учун ойлик иш хаққини ўз вақтида бермаганлиги норозиликка сабаб бўлган”, -дейилади расмий хабарда (Иқтибос Меҳнат вазирлиги матбуот хизмати матбуотга тақдим этган матндан сўзма-сўз кўчирилган - муҳаррир).

Вазирликнинг билдиришича, Чирчиқ шаҳар ҳокимияти ва Давлат меҳнат ҳуқуқ инспектори аралашуви билан ишчиларнинг ишлаган даври учун 280 миллион сўм иш хаққи тўлаб берилди ва “Водий саркор дизайн”га маошларнинг қолган қисмини 18 майгача тўлаш мажбурияти юклатилди.

Озодлик радиоси чирчиқлик ўнлаб ишчилар иш ҳақи ўз вақтида тўланмаганига норозилик билдириб шаҳар ҳокимияти биноси олдига йиғилгани тўғрисидаги видеолар 11 май куни ижтимоий тармоқларда кенг равишда тарқатилгани тўғрисида аввалроқ хабар берган эди.

Таниқли устазода санъаткор Шавкат Мирзаев вафот этди

Шавкат Мирзаев 1942 йилнинг 10 февралида Тошкентда туғилган.

Ўзбекистонда хизмат кўрсатган артист, профессор Шавкат Мирзаев 79 ёшида вафот этгани ҳақида Маданият вазирлиги маълум қилди.

Шавкат Мирзаев 1942 йилнинг 10 февралида Тошкентда машшоқ ва бастакор Муҳаммаджон Мирзаев оиласида туғилган.

12-13 ёшидан рубоб чала бошлаган Мирзаев 16 ёшида отаси билан бир ансамблда ишлай бошлагани ҳақида айтган эди.
У 1978 йилдан бошлаб Ўзбекистон халқ артисти Муножот Йўлчиевага устозлик қилиб келган.

Шавкат Мирзаев шогирди Муножот Йўлчиева билан ўзбек мусиқасини жаҳонга танитган санъаткорлардан бири ҳисобланади. У 2011 йилнинг августида Би-Би-Си радиосига берган интервьюсида:

“Дунёда бормаган жойимиз қолмади. Франциянинг ўзида 48 марта бўлибмиз. Концертларимиз доимо олқишлар билан кутиб олинди, биз ҳақимизда ҳужжатли филмлар олишди. Мусиқа албомларимиз чиқди”,- деб айтган эди.

Жорий йилнинг дастлабки 4 ойида Ўзбекистонга хориждан жўнатилган пул миқдори кўпайди

Коронавирус пандемияси туфайли хориждан Ўзбекистонга жўнатилаётган пул жўнатмалари кескин озайиб кетгани хабар қилинган.

Ўзбекистонга хориж давлатларидан жўнатилган пул миқдори 2021 йилнинг январь-апрель ойларида 1 миллиард 990 миллион долларни ташкил этди. Бу ўтган йилнинг шу даврига солиштирилганида 663 миллион долларга кўпроқдир.

Марказий банкнинг билдиришича, жорий йилнинг январь-апрель ойлари оралиғида чет элга Ўзбекистондан 478 миллион доллар пул чиқарилган.

Марказий банк аввалроқ 2021 йилнинг январидан мартигача хориждан Ўзбекистонга 1 миллиард 420 миллион доллар пул жўнатилганини маълум қилган эди. Шундан келиб чиқиладиган бўлса, апрель ойида хорижадан 570 миллион доллар пул келган.

Ўтган йили коронавирус пандемияси туфайли хориждан Ўзбекистонга жўнатилаётган пул жўнатмалари кескин озайиб кетгани хабар қилинган.

Олий Мажлис ижтимоий тармоқлар Ўзбекистон қонунига амал қилмаётганидан норози

Telegram, Facebook, TikTok, Google ва Yandex 16 апрелдан бошлаб Ўзбекистон фуқароларининг шахсий маълумотларини мамлакат ичида жойлашган серверларда қайта ишлашга мажбурлиги тўғрисидаги қонунга амал қилмаётганликлари Олий Мажлис норозилигига сабаб бўлди.

“Қонун нормаси кучга кирганига 1 ой бўлган бўлсада ваколатли давлат органи томонидан мазкур соҳа бўйича кўзга кўринадиган натижаларга эришилмаганлиги депутатларнинг жиддий эътирозига сабаб бўлди”, -дейилади Олий Мажлис Қонунчилик палатаси расмий сайтида.

Ўзбекистонда қабул қилинган “Шахсий маълумотлар тўғрисида"ги Қонуннинг 27−1-моддасига асосан 16 апрелдан бошлаб ижтимоий тармоқлар ва жаҳон интернет компаниялари Ўзбекистон фуқароларининг шахсий маълумотларини мамлакат ҳудудидаги серверларда қайта ишлаши шарт экани белгилаб қўйилган.

Давлат персоналлаштириш маркази раҳбари Улуғбек Тошхўжаев 12 май куни Олий Мажлис Қонунчилик палатасининг Инновацион ривожланиш, ахборот сиёсати ва ахборот технологиялари масалалари қўмитаси йиғилишида бу ҳақда маълумот берар экан, Telegram, Facebook, TikTok, Google ва Yandex ширкатларига Ўзбекистон қонунчилиги талабларига риоя қилиш тўғрисида хатлар юборилгани тўғрисида маълумот берган. Расмийга кўра, бу хатларга шу кунгача жавоб олинмаган ва қонун талабига риоя этилиши ортга сурилмоқда.

Қонунга асосан мазкур ижтимоий тармоқларнинг шахсга доир маълумотлар базалари Ўзбекистон давлат реестрида рўйхатдан ўтказиши шарт. Бу талабга амал қилмаган ширкатларга нисбатан жиноят иши қўзғатилиши мумкин.

Йиғилишда депутатларнинг таъкидлашича, сўнгги йилларда мазкур ижтимоий тармоқлар ва интернет компанияларга турли киберҳужумлар уюштириб келинмоқда. Натижада Ўзбекистон фуқароларининг шахсий маълумотлари ҳам ўғирланган.

HRW Отабек Сатторийнинг қамалишини Ўзбекистондаги сўз эркинлигига зарба ўлароқ баҳолади

Сурхондарёлик блогер Отабек Сатторий

Ўзбекистонда маҳаллий расмийларнинг коррупцияга аралашган-аралашмаганини ўрганган мустақил блогер Отабек Сатторийнинг қамалиши ҳақида суд томонидан чиқарилган ҳукм Ўзбекистонда сўз эркинлигига қарши зарба ва маҳкама хатоси бўлиб ҳисобланади. Бу ҳақда Human Rights Watch халқаро ташкилоти томонидан 11 май куни ёйинланган баёнотда айтилган.

10 май куни жиноят ишлари бўйича Музработ туман суди Ўзбекистон Жиноят кодексининг бир неча моддаларида айбдор деб топилган блогер Отабек Сатторийни олти ярим йилга озодликдан маҳрум қилиш тўғрисида ҳукм чиқарганди.

HRW ўз баёнотида блогерга нисбатан очилган жиноят иши, унга нисбатан қўйилган айбловлар шубҳали эканини урғулаган. Ташкилот блогернинг адвокати Умид Давлатовнинг сўзларига таянган ҳолда Сатторий ўзига қўйилган айбловларни тан олмагани ва суд ҳукми юзасидан шикоят аризаси киритмоқчи эканини қайд этган.

HRW вакилларига кўра, Ўзбекистон раҳбарияти, жумладан президент Шавкат Мирзиёев мамлакатда ўтказилаётган ислоҳотлар марказига инсон ҳақларига ҳурмат тамойили қўйилаётганини баралла айтиб келмоқда, аммо бу ўринда амаллар сўзларга зид келмоқда.

Ҳуқуқ фаоллари қайдича, номақбул блогернинг қамоққа йўлланиши бугунги кунда Ўзбекистонда сўз эркинлиги учун қатағон муҳити мавжудлигига оид ҳақиқатни очиб ташлаган.

Отабек Сатторийнинг қамалиши аввалроқ Журналистларни ҳимоя қилиш қўмитаси (CPJ) ва Чегара билмас мухбирлар каби халқаро ташкилотларда ҳам норозилик уйғотган эди.

Йирик шаҳарларда одамларга 24 соат хизмат кўрсатадиган кўнгилочар кўчалар ташкил этилади

Шаҳарларда туну кун фаолият юритадиган кўчалар ташкил этилишига оид қарорни президент Ш. Мирзиёев 2021 йилнинг 11 майида имзолаган.

Ўзбекистонда жорий йилнинг 1 сентябрига қадар йирик шаҳарлар, вилоят ва туман марказларида савдо ва кўнгилочар кўчалар ташкил этилади. Бу кўрсатма президент Ш. Мирзиёев томонидан 11 май куни имзоланган “Хизматлар соҳасини жадал ривожлантириш чора-тадбирлари тўғрисида”ги қарорда акс этган.

Ҳужжатда савдо ва кўнгилочар кўчаларда барча тадбиркорлик субъектларига 24 соат мобайнида туну кун фаолият юритиш ҳуқуқи берилиши ҳамда бу ерда кўчма савдо объектлари учун жойлар тадбиркорлик субъектларига электрон онлайн-аукцион асосида сотилиши билдирилган.

Қайд этилишича, Тикланиш ва тараққиёт жамғармасидан хизматлар соҳасини ривожлантириш учун тижорат банкларига 300 миллион АҚШ доллари эквивалентида кредит линияси очилади. “Ўзмиллийбанк” 2021 йил якунига қадар халқаро молия институтларининг 200 миллион АҚШ доллари миқдоридаги маблағларини жалб қилади.

Айни пайтда, қарорда айтилишича, 2021-2023 йиллар давомида туман (шаҳар)ларда 15 та деҳқон бозори ва 115 та савдо комплекслари барпо этилади. Янги ташкил этиладиган деҳқон бозорлари ва савдо комплекслари устав капиталида маҳаллий давлат ҳокимияти органларининг мажбурий иштироки бекор қилинади.

Мирзиёев Қозон гимназиясидаги ҳодиса муносабати билан Путинга ҳамдардлик билдирди

Қозондаги 175-гимназия олдида отишма қурбонларини ёдлаш учун қўйилган қўлбола хотира лавҳи, 2021 йил 11 майи

Ўзбекистон президенти Шавкат Мирзиёев Қозондаги гимназияда содир бўлган қуролли хуруж муносабати билан россиялик ҳамкасби Владимир Путинга ҳамдардлик мактуби йўллади.

“Фожиали воқеа – Қозон шаҳридаги мактабда содир бўлган отишма оқибатида бегуноҳ болалар ва ёши катталар ҳалок бўлгани ҳақидаги хабар мени чуқур қайғу ва ларзага солди”, деб бошланган президент матбуот хизмати томонидан ёйинланган хат.

Ўзбекистон президенти мактубда ўз мамлакати “ҳеч қандай важ билан оқлаб бўлмайдиган ушбу мудҳиш зўравонлик ҳаракатини қатъий қоралаши”ни билдирган ҳамда Россия президентига, ҳодиса чоғида қурбон бўлганларнинг ота-оналари ва яқинларига ҳамдардлик изҳор этган.

“Ушбу мусибатли дамларда Ўзбекистоннинг кўпмиллатли халқи Россия халқи учраган жудоликка қайғудошдир”, дея якунланган Мирзиёевнинг Путинга мактуби.

Татаристон пойтахти Қозон шаҳридаги Жавдат Файзи кўчасида жойлашган 175-сонли гимназияда 11 май куни отишма юз бериб, унда камида 8 киши нобуд бўлгани ҳақида Озодлик аввалроқ хабар қилган.

Татаристон Соғлиқни сақлаш вазирлиги маълумотларига кўра, ҳодиса ортидан аксарияти мактаб ўқувчилари бўлган 20 дан ортиқ одам шифохонага ётқизилган. Улардан 6 нафари шифохонанинг жонлантириш бўлимида ётгани айтилмоқда.

Ўзбекистон ташқи ишлар вазири Хитойда қирғизистонлик ҳамкасби билан учрашди

Ўзбекистон ташқи ишлар вазири Абдулазиз Комилов 11 май куни Хитойнинг Сиан шаҳрида қирғизистонлик ҳамкасби Руслан Қазақбаев билан учрашув ўтказган.

ТИВ матбуот хизмати маълумотига кўра, учрашув Ўзбекистон делегациясининг “Марказий Осиё – Хитой” форматида иккинчи учрашувидаги иштироки доирасида ўтказилган.

Қайд этилишича, учрашувда Комилов ва Қазақбаев икки томонлама алоқалар ривожланиши билан боғлиқ долзарб масалалар ҳамда минтақавий ҳамкорлик истиқболлари юзасидан фикр алмашганлар. Бироқ вазирлар ўртасида апрель ойи сўнгида қирғиз-тожик чегарасида юз берган можаро муҳокама қилинганми-йўқми – бунга аниқлик киритилган эмас.

“Томонлар Саноат кооперацияси бўйича “Йўл харитаси”ни, мультимодал транспорт коридори ҳамда “Хитой – Қирғизистон – Ўзбекистон” темир йўли лойиҳасини имкон қадар тез муддатда амалга оширишнинг муҳимлигини қайд этдилар”, дейилган Ўзбекистон ТИВ хабарномасида.

Бу орада Қирғизистон ТИВ матбуот хизмати тарқатган маълумотга мувофиқ. икки вазир учрашуви чоғида қирғи-тожик чегарасида юзага келган вазиятга алоҳида эътибор қаратгани урғуланган. Томонлар кўплаб қурбонларга олиб келган можаровий вазият сиёсий-дипломатик музокаралар йўли билангина ҳал этилиши лозимлиги хусусида якдил фикр билдирганлар.

Айни пайтда вазирлик Сианга ташриф доирасида Абдулазиз Комилов 11 май куни хитойлик ҳамкасби Ван И билан ҳам учрашган.

Музокаралар чоғида икки вазир Ўзбекистон ва Хитой ўртасидаги ҳар томонлама стратегик шерикликнинг ҳозирги ҳолати ва уни ривожлантириш истиқболлари муҳокама қилган.

ТИВ қайдича, томонлар биргаликдаги саъй-ҳаракатлар натижасида иқтисодиёт соҳасидаги ҳамкорликнинг жадал ривожланишини таъминлашга эришилганлигини мамнуният билан эътироф этишиб, ўзаро савдо ҳажмлари ва номенклатурасини янада оширишнинг муҳимлигини таъкидлашган. “Хитой – Қирғизистон – Ўзбекистон” мультимодал транспорт маршрутини ривожлантириш ва “Хитой – Қирғизистон – Ўзбекистон” темир йўлини қуриш лойиҳасини биргаликда ҳаётга татбиқ қилиш бўйича тезроқ амалий чоралар кўришнинг долзарблиги қайд этилган.

Вазирлар халқаро ва минтақавий ташкилотлар доирасидаги ҳамкорлик, минтақавий хавфсизликни таъминлаш, Афғонистонда мустаҳкам тинчликка эришишга ва унинг иқтисодиётини тиклашга кўмаклашиш механизмларига ҳам алоҳида эътибор қаратганлар.

ТИВ вазир А. Комилов сешанба куни Сиан шаҳрида Хитой Халқ Республикаси Шенси провинцияси губернатори Чжао Иде билан ҳам музокаралар ўтказгани ҳақида маълум қилган.

Махсус комиссия қарори ортидан Uzbekistan Airways Японияга қатновни вақтинча тўхтатди

Uzbekistan Airways авиаширкати Республика махсус комиссияси қарорига мувофиқ равишда Японияга авиақатновларни вақтинча бекор қилган ва бу ҳолат мазкур давлатда санитария-эпидемиология ҳолати яхшилангунига қадар давом этади. Икки давлат ўртасидаги қатновлар пандемия туфайли 2020 йили тўхтатилган эди.

Uzbekistan Airways матбуот хизмати қайдича, авиаширкат учун Токио қатновлари устувор ҳисобланиб, Ўзбекистондан Японияга рейслар 20 йилдан ортиқ муддат давомида амалга оширилиб келинган.

“Авиакомпания вакиллари қилган ҳаракатларининг шарофати билан сўров ошиб борган ва мавсумда нафақат мунтазам рейсларни йўлга қўйиш, балки Япониянинг турли шаҳарларига ҳам барқарор йўловчилар юкламасини таъминлашни уддалашди”, дейилган Uzbekistan Airways хабарномасида.

Ўзбекистондан Японияга мунтазам авиақатновлар мамлакатлардаги эпидемиологик вазият барқарор бўлганидан кейин 2022 йилнинг баҳор-ёз навигация даврига режалаштирилгани билдирилган.

Давомини ўқинг

XS
SM
MD
LG