“Ассалому алайкум ҳурматли Озодлик радиоси ходимлари!!! Мен ҳозирги пайтда Россиянинг Москва шаҳрида ишлайман. Мени анчадан буён ўйлантираётган нарса шуки, қачон бизни Ўзбекистон дунё миқёсига чиқиши...Агар шу ҳолда кетаверса, умуман бизни миллатимиз ҳеч кимга кераксиз¸ қолоқ миллат бўлиб қолади....Россияда яшаб кўп нарсаларни кўрдим, кўпчилик руслар билан мулоқотда бўламан, бу ердаги кўпчилик бошқа миллат соҳиблари ўша бизнинг "буюк" ўзбекларимиз ҳақида ёмон фикр қилишади. Яъни ўзбеклар ўта қолоқ миллат дейишади, баъзида бундай гаплардан сўнг мен ич ичимдан куйиниб кетаман. Наҳотки биз ҳеч кимга кераксиз , йуққа чиққан миллат бўлиб қолсак.....Баъзида Юртбошимизга тиз чўкиб, у кишидан бу йўлдан халқимизни ёруғ йўлга олиб чиқишларини сўрагим келади, аммо менга ўхшаган оддий бир фуқарони сўзларини ким ҳам тингларди...афсус...дея Sharif...."
"Дард" деб номланган бу хатни ўқиб¸ бекорчи хаëлимга Москвада мардикорлик қилаëтган Ҳамидулла аканинг бундан 7 йилча аввал телефонда жавраганлари келди.
"Эййй¸ нимасини айтай сизга¸ бугун ўзбек мўлтонидан ҳам беқадр¸ хор бўлди. Қозоқ билан ўриснинг эшигида қул бўлаëтган ҳам ўзбек. Россияда туалет юваëтган¸ кўча тозалаëтган¸ ҳаммолга айланган¸ калтак еяëтган¸ скинҳед қўлида ўлаëтган ҳам яна шу ўзбек. Ўрислар мендан "Ўзи сизлар қанақа халқсизлар¸ сизларни қўй дейишар эди¸ қўйга ҳам ўхшамай қолибсизлар?" деб сўрайди. Бу кетишда бош кўтаролмай қоламизку!"¸ деган эди "Қалай энди Москвадаги ўзбеклар?" деган саволимга Ҳамидулла ака.
Ҳамидулла аканинг бу аламли ҳайқириғи кўп ўтмай бошқа Ҳамидулла аканинг ўғлининг синиқ қалбида акс-садо берди: Хайрулла Ҳамидовнинг минглаган қалблардаги оғриқ устига оғриқ қўшган "Ўзбекларга нима бўляпти?" шеъри қўлма қўл бўлиб кетди.
Борган сари гуноҳ тўляпти,
Ҳолимизга ҳамма куляпти,
Бутун дунё турибди ҳайрон,
Ўзбекларга нима бўляпти?
дея аламли саволларга кўмилган эди кўп ўтмай ”кераксиз” саволларга берилгани учун жисми зиндонбанд этилган бу ҳассос йигит.
Бу орада Ўш¸ Жалолобод қирғини юз берди. Юз минглаган ўзбек фақат ўзбек бўлгани учунгина азоб-уқубатга йўлиқди – аëлию боласи фақат ўзбекман дегани учун сўйилди¸ ëндирилди¸ таҳқирланди. Аммо номини ўзбекдан олган каттагина давлат¸ жимитдеккина қўшнисига¸ ”ҳей¸ ўзбекни тинч қўй!” деган бир мужда юбормади. Бу яна оғриқ устига оғриқ қўшди ўзбекман деганнинг дилига.
”Ўзбеклигимдан ҳазар қиламан!” дейишгача борди ўз миллатдошларининг беҳимоя қолганидан аччиқланган ўзбеклар Озодликка сим қоқиб.
”Ўзбекман дейишга уяладиган бўлиб қолдим. Шунча ўзбекнинг уволи бизнинг ҳам бошимизда ахир!” деди муҳожирликдаги ўзбеклардан бири.
Бу сатрларни ўқиëтганларнинг аксарияти учун бу аччиқ туйғулар бегона эмас.
Келинг¸ бугун ана шу туйғуларни очиққа олиб чиқиб¸ очиқ гаплашайлик.
Ўзимизни мазохистларча камситиш ëхуд биз зўр миллатмиз деб ўтмиш билан чираниш учун эмас¸ бугунги ҳолимизга ойна тутиш ва ўзлигимизни яхшироқ англаш учун ҳалол диллашайлик:
Нега бугун ўзбекман дейишдан уяладиган бўлиб қолдик?
Форум 13 октябр¸ Тошкент вақти билан 21:00 га қадар Сиз учун очиқ.