Линклар

Шошилинч хабар
26 январ 2021, Тошкент вақти: 16:09

Ўзбекистон хабарлари

Ресторандаги Guli кўргазмаси ҳам пикет қилинди

Гулнора Каримовага қарши пикетлар энди ресторан рўпарасида давом этади.
Ню - Йоркдаги Мода ҳафталигининг сўнгги куни¸ бу кўргазмадан мосуво қилинган Гулнора Каримова ўз либосларини Ню Йоркнинг Манҳеттен мавзесидаги Cipriani ресторанида ўтказилди.

Айни ресторан олдида Ўзбекистонда инсон ҳуқуқлари ва мажбурий болалар меҳнатига қарши курашувчи ташкилотлар норозилик намойиши ўтказилди.
Бу намойишларда Ўзбекистон халқ ҳаракатининг АҚШдаги фаоллари ҳам иштирок этди.

Кейинги бир ҳафта ичида Гулнора Каримовага қарши намойишлар ўтказиб келаëтган Ўзбекистон халқ ҳаракати фаоли Исломиддн Долимов Ўзбекистондаги мажбурий болалар меҳнати маҳсули бўлган кўргазма лаънатга лойиқлигини яна бир бор таъкидлади.

- Ресторанда бўладими¸буфетдами¸подвалдами¸ қаерда бўлишидан қатиъй назар биз уни таъқиб қилиб норозилигимизни изҳор қилдик деди Долимов.

Меҳнаткашлар ҳуқуқини ҳимоя қилувчи ҳалқаро форум Cipriani ресторанлар тармоғи эгаларини, 15 сентябрга белгиланган Ўзбекистон президентининг тўнғичи Гулнора Каримова мода коллекцияси намойиши учун зални бермасликка чақирган эди.

“Бир неча йил аввал солиқларни яширгани ошкор бўлган Cipriani ресторани эгалари, Каримова томошалари учун зални тақдим этмасликлари керак», - дейилади Меҳнаткашлар ҳуқуқи ҳалқаро форуми (ILRF) сайтида чоп этилган петицияда.

ILRF шунингдек Каримова қўллашларини сўраб мурожаат этган Россия, Испания, Швейцария ва Бирлашган Араб Амирликларини ҳам Guli шоуси учун залларини бермасликка чақириб мурожаат этган.

(IMG Fashion Week) доирасида 15 сентябр куни Гулнора Каримова ўзининг Guli бренди остида адрас, атлас, ипак ва бошқа миллий матолардан тикилган либос ва тақинчоқларини тақдим этиши режаланган эди.

Аммо АҚШ матбуотидаги чиқишлар ва норозилик намойишларидан сўнг Гулнора Каримованинг чиқишлари бекор қилинди.

Кун янгиликлари

Концерт-томошага рухсат берилди. Ошхоналарга қўйилган чеклов бекор қилинди

Концерт-томоша тадбирларида томошабинлар сони залдаги ўринларнинг 50 фоизидан кўп бўлмаслиги шарт.

Республика махсус комиссиясининг қарори билан 28 январидан бошлаб концерт-томоша тадбирларини ўтказишга рухсат берилди.

Концерт-томоша тадбирларида томошабинлар сони залдаги ўринларнинг 50 фоизидан кўп бўлмаслиги, оралиқ масофани сақлаши ва ниқобда бўлиши шарт.

Шунингдек, Республика махсус комиссияси умумий овқатланиш ва кўнгилочар объектлар соат 8:00 дан 23:00 гача ишлаши мумкинлиги ҳақидаги чекловни бекор қилди. Эндиликда мазкур объектлар пандемия чекловлари жорий этилгунига қадар мавжуд бўлган иш тартиби асосида фаолият юритишлари мумкин.

“Республика махсус комиссияси халқимиздан коронавирус инфекциясини тарқалишини олдини олиш мақсадида санитария-эпидемиологик қоидаларга қатъи риоя этишлари ҳамда мамлакатимизда эпидемиологик барқарорликни таъминлаш борасида эришилган бугунги вазиятни бардавом бўлиши учун шахсий масъулиятни оширишларини сўраб қолади”,-дейилади расмий билдирувда.

“Чегара посбонлари” отрядлари ташкил этилади

Отрядларга 18 ёшдан 60 ёшгача бўлган Ўзбекистон фуқаролари ихтиёрий равишда қабул қилинади.

Ўзбекистон ҳукумати Давлат хавфсизлик хизмати Чегара қўшинларига кўмаклашувчи “Чегара посбонлари” отрядлари тўғрисидаги низомни тасдиқлади.

Низомга асосан “Чегара посбонлари” отрядлари чегара зонасида, давлат чегарасига туташ туманларда яшовчи фуқаролар, шунингдек, давлат чегараси яқинида жойлашган муассаса, корхона ва ташкилотларда ишлаётган ишчи ва хизматчилардан ташкил этилади.

Отрядларга 18 ёшдан 60 ёшгача бўлган, соғлом, фуқароларнинг ҳуқуқ ва эркинлигини ҳурмат қиладиган Ўзбекистон фуқаролари ихтиёрий равишда қабул қилинади.

Посбонлар Чегара қўшинлари назорати остида ҳудудларда кузатув олиб бориш ва тунги вақтларида жамоат жойлари, маҳаллалар ва чегарадош ҳудудлардаги қаровсиз жойларда патруллик қилади.

“Кўмаклашувчи отряд Чегара қўшинлари ҳарбий қисм бўлинмалари ҳузурида 1 нафар сардор ва 9 нафаргача бўлган отряд аъзоларидан иборат таркибда ташкил этилади”,-дейилади расмий билдирувда.

“Чегара посбонлари” сардорига меҳнатга ҳақ тўлашнинг энг кам миқдорининг 1,41 бараваригача, яъни 1 млн 54 минг сўм, посбонларга меҳнатга ҳақ тўлашнинг энг кам миқдорининг 1,06 бараваригача,яъни 792 минг сўм ҳақ тўланади.

Ўзбекистонда ҳар бир ўқитувчининг электрон портфолиоси тузилади

Ўзбекистонда 2021 йил 1 мартидан бошлаб ҳар бир халқ таълими ходимининг электрон портфолиоси шакллантирилади. Бу ҳақда мамлакат президенти томонидан 25 январь куни имзоланган “Халқ таълими соҳасидаги илмий-тадқиқот фаолиятини қўллаб қувватлаш ҳамда узлуксиз касбий ривожлантириш тизимини жорий қилиш чора-тадбирлари тўғрисида”ги қарорда айтилган.

Қарор билан жорий йилнинг март ойидан халқ таълими ходимларининг малака ошириш бўйича эҳтиёжлари ўрганилади ҳамда уларнинг индивидуал касбий ривожланиш траекторияси тузилиши, касбий ўқитишнинг уйғунлашган, иш жараёни билан биргаликда олиб бориладиган, масофавий ва бошқа турлари жорий этилиши кўзда тутилган.

Шу йил 1 сентябридан эса малака тоифасини бериш ва сақлаб қолиш бўйича мактабгача, умумий ўрта, ўрта махсус, профессионал ва мактабдан ташқари таълим ташкилотлари педагог кадрларини аттестациядан ўтказиш йил давомида амалга оширилиши, узрли сабабларга кўра (меҳнатга лаёқатсизлик, ҳомиладорлик, туғиш ҳамда болани парвариш қилиш таътили ва бошқалар) аттестациядан ўтмаган педагог кадрлар иш фаолиятига қайтганларига бир йил тўлгандан сўнг аттестацияга жалб этилиши ва мазкур давр мобайнида уларнинг малака тоифаси сақлаб қолиниши кутилмоқда.

Ҳужжатда Халқ таълими вазирлиги томонидан халқ таълими ходимлари малакасини ошириш фаолияти билан шуғулланаётган нодавлат таълим ташкилотларининг электрон реестри юритилиши, давлат бюджетидан маблағлар фақат Реестрга киритилган нодавлат таълим ташкилотларигагина ажратилиши қайд этилган.

Ўзбекистонлик олимлар “Британия штамми”ни аниқлайдиган тест тизими устида ишламоқда

Иллюстратив сурат

Ўзбекистонда Инновацион ривожланиш вазирлиги қошидаги Илғор технологиялар маркази олимлари томонидан COVID-19 вирусининг “Британия штамми”ни аниқловчи тест тизимини яратиш устида иш олиб бориляпти. Бу ҳақда Инновацион ривожланиш вазирининг биринчи ўринбосари Ш. Турдиқулова Япониянинг Ўзбекистондаги элчихонаси муваққат ишлар вакили Асуши Суда билан ўтган ҳафта якунида Тошкентда ўтказилган музокара чоғида билдирган.

Учрашувда Ш. Турдиқулова вазирлик томонидан коронавирусга қарши кураш бўйича амалга оширилаётган ишларга тўхталган. Хусусан, Хитойнинг “Anhui ZhifeiLongcom Biopharmaceutical” компанияси томонидан ишлаб чиқилган коронавирусга қарши вакцинанинг III фаза клиник синовларини ўтказиш жараёни, коронавирусни аниқловчи ПСР-тест тизимлари ишлаб чиқарилаётгани, Ўзбекистонда коронавирусга қарши курашга доир илмий тадқиқотлар ҳақида маълумот берган. Мулозима мазкур тадқиқотларни амалга оширишда Япониянинг ушбу соҳадаги илмий-тадқиқот ташкилотлари ва компаниялари билан ҳамкорликка тайёрлигини билдириб ўтган.

Музокара чоғида япониялик дипломатларнинг мазкур тадқиқотларни амалга оширишда ҳамкорликка тайёр япон ташкилотлари ва компанияларини топишда амалий кўмак бериш масаласини кўриб чиқишига келишилган.

ТИВ Пекинга борадиганлар учун карантин муддати 28 кунгача узайтирилганидан огоҳлантирди

Пекин кўчаларидан бири, 2021 йил 14 январи

Хорижий мамлакатлардан Хитой пойтахти Пекинга борадиганлар соғлигини назоратга олиш учун карантин муддати 2021 йил 19 январидан эътиборан 28 кунгача узайтирилган.

Ўзбекистон Ташқи ишлар вазирлиги Консуллик-ҳуқуқий департаменти маълумотига кўра, бундай тартиб сўнгги кунларда Хитойнинг турли ҳудудларида, жумладан, Пекин шаҳри аҳолиси ўртасида COVID-19 билан касалланишнинг янги ҳолатлари кузатилаётгани муносабати билан киритилган.

Янги тартибга мувофиқ, хориждан Хитойнинг бошқа шаҳарлари орқали Пекинга кирмоқчи бўлганлар пойтахтга киришдан олдин ўша шаҳарларда 21 кун карантинда бўлади. Пекинга етиб келгач, уларнинг саломатлиги яна 7 кун давомида кузатувга олинади.

ТИВ Хитойдан Ўзбекистонга қайтиш истагида бўлган ватандошларга “Сиан–Тошкент-Сиан” йўналишида чартер ҳаво қатновларини амалга ошираётган Хитой авиакомпанияси хизматларидан фойдаланишни тавсия этган.

Шунингдек, ўзбекистонликлар ХХР ҳудудидан Сеул шаҳрига (Корея Республикаси пойтахти) етиб олиши ва аэропорт транзит ҳудудидан чиқмаган ҳолда ҳафтанинг ҳар жума куни “Uzbekistan Airways” АЖ амалга ошираётган “Тошкент-Сеул-Тошкент” йўналишидаги рейслар орқали ватанга қайтишлари мумкин.

Вазирлик Ўзбекистонга қайтган ва ўқиш ёки меҳнат фаолиятини давом эттириш мақсадида Хитойга қайтишни режалаштираётган ватандошларга таълим муассасаси ёки иш берувчи билан боғланиб, ўзларининг Хитойга қайтишлари бўйича маслаҳатлашиб олишни тавсия қилган.

Мирзиёев Саудия Арабистони инвестициялар вазири бошчилигидаги делегацияни қабул қилди

Ўзбекистон президенти Ш. Мирзиёевнинг Саудия Арабистони делегацияси билан учрашуви, Тошкент, 2021 йил 25 январи (president.uz сайти фотосурати)

Ўзбекистон президенти Шавкат Мирзиёев 25 январь куни Саудия Арабистони подшоҳлиги инвестициялар вазири Холид ал-Фалиҳ бошчилигидаги делегацияни қабул қилган.

Президент матбуот хизмати маълумотига кўра, учрашувда Ўзбекистон-Саудия кўп қиррали муносабатларини янада мустаҳкамлашнинг долзарб масалалари кўриб чиқилган.

Қайд этилишича, музокаралар чоғида амалий ҳамкорликнинг аниқ лойиҳалари муҳокама қилинган.

Энергетика, нефть-газ, газ-кимё ва кимё, саноат, қишлоқ хўжалиги тармоқларида, соғлиқни сақлаш, фармацевтика соҳалари ва бошқа йўналишларда, шу жумладан давлат-хусусий шериклик принципларини жорий қилиш асосида янги лойиҳаларни тайёрлаш ва амалга ошириш юзасидан келишувларга эришилган.

Қўшма дастур ва лойиҳаларни молиявий қўллаб-қувватлаш воситаларини ривожлантириш, жумладан, Ўзбекистонда инвестиция компаниялари ва микромолиявий ташкилотларни тузиш масалаларига алоҳида эътибор қаратилган.

Ушбу ташаббусларни ўрганиш ва илгари суриш мақсадида “йўл харитаси”ни қабул қилиб, амалга ошириш, ҳукуматлараро комиссия фаолиятини қайта тиклаш, устувор лойиҳалар бўйича ишчи гуруҳларни шакллантиришга келишиб олинган.

Саудия Арабистони делегациясининг Ўзбекистонга ташрифи арафасида Бухоро шаҳрида қўшма бизнес-форум муваффақиятли ўтказилиб, Ишбилармонлик кенгашини ташкил этиш тўғрисида қарор қабул қилинди, йирик кооперация лойиҳаларини амалга ошириш бўйича келишувлар имзоланган.

Шу йил 24 январрида Сирдарё вилоятида “ACWA Power” корпорацияси иштирокида қуввати 1200 мегаватт бўлган замонавий иссиқлик электр станциясини қуриш лойиҳасига старт берилган. Бундан ташқари, мазкур компания томонидан Бухоро ва Навоий вилоятларида умумий қиймати 1000 мегаваттли шамол электр станциялари барпо этилиши кўзда тутилган.

Uzbekistan Airports Халқаро аэропортлар кенгашига аъзо бўлиб қўшилди

Uzbekistan Airports Airports Council International (ACI) ташкилотига расман аъзо бўлди. Бу ҳақда ташкилотнинг ахборот хизмати маълум қилди.

Қайд этилишича, Uzbekistan Airports’нинг Халқаро аэропортлар кенгаши вакиллари билан стратегик ҳамкорликка бағишланган онлайн мулоқотлари 2020 йилнинг охирларида ниҳоясига етган.

“Мулоқотларда Ўзбекистоннинг барча халқаро аэропортларида парвозлар хавфсизлигини таъминлаш, йўловчиларга сифатли ва малакали хизмат кўрсатишни ташкил қилиш, ҳаво дарвозаларини дунё талаблари даражасида модернизация қилиш, парвозлар кўламини кенгайтириш орқали халқаро алоқаларни янада мустаҳкамлаш масалаларига эътибор қаратилди. Ўзбекистон томонидан ташкилотга тақдим қилинган ҳужжатлар бир овоздан маъқулланди”, дейилган хабарномада.

Uzbekistan Airports вакилларига кўра, ACIга аъзолик аввало хизматлар ишончлилигини кафолатлайди. Ўзбекистонда ҳаво транспорти тизимини тубдан ислоҳ қилиш, соҳа фаолиятини халқаро меъёрларга тенглаштириш, сайёҳликни ривожлантириш, инвестициялар оқимини жадаллаштиришга имкон яратади. Коронавирус инфекциясига қарши глобал чоралар кўриш, авиақатновлар мобайнида йўловчиларни пандемия хавфидан огоҳлантириш ва эҳтиётлаш, бу борада самарали дастурлар ишлаб чиқишда ҳам ACI хизматларига таянилади.

Қароргоҳи Канадада жойлашган Халқаро аэропортлар кенгаши (ACI) 1991 йилда ташкил топган бўлиб, ташкилотнинг Европа, Африка, Осиё, Лотин ва Шимолий Америка давлатларида минтақавий ваколатхоналари мавжуд. Қарийб 670 аъзони бирлаштирган ACI 176 мамлакатдаги 1 минг 979 та аэропортга хизмат кўрсатиб келмоқда. Халқаро аэропортлар кенгашининг фаолияти Халқаро ҳаво транспорти ассоциацияси (IATA), Халқаро фуқаро авиацияси ташкилоти (ICAO), Фуқаро авиациясида аэронавигация хизматини кўрсатиш ташкилоти (CANSO) билан ҳам чамбарчас боғлаган.

Президент сайлови муддатидан аввал ўтказилиши мумкин

Ўзбекистонда президент сайлови бундан буён октябрь ойида ўтказилиши мумкин.

Қайд этилишича, мазкур масалага 25 январь куни Олий Мажлис Қонунчилик палатасининг галдаги мажлисида тўхталинган.

Аввал мамлакатда президент сайлови ҳамда парламент ва маҳаллий кенгаш сайловлари, амалдаги қонунчиликка мувофиқ, декабрь ойи учинчи ўн кунлигининг биринчи якшанбасида ўтказиб келинган.

Душанба куни кўриб чиқилган “Сайлов қонунчилиги такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонун лойиҳасида сайлов кунини декабрь ойи учинчи ўн кунлигининг биринчи якшанбасига кўчириш таклиф қилинган. Агар бу ўзгартишлар тасдиқланса, Ўзбекистонда 2021 йилдаги президент сайлови 24 октябрь куни бўлиб ўтиши мумкин.

Жорий йилда президент сайлови бўлиб ўтиши ҳақида Шавкат Мирзиёев ўтган йил декабрида парламентга мурожаатида айтиб ўтган. Ўша нутқида президент “Ўзбекистонда 2021 йили бўлиб ўтадиган президент сайлови халқаро стандартларга мувофиқ равишда ўтказилиши керак”лигини урғулаган.

Ўзбекистон Республикаси Конституциясининг 90-моддасида президент мамлакат фуқаролари томонидан умумий, тенг ва тўғридан-тўғри сайлов ҳуқуқи асосида яширин овоз бериш йўли билан беш йил муддатга сайланиши қайд этилган.

Ўзбекистонда сўнгги президент сайлови 2016 йил 4 декабрида ўтказилган. Унда, расмий маълумотларга кўра, сайловчиларнинг 88,61 фоиз овозини олган Ш. Мирзиёев ғалаба қозонган.

АҚШ Ўзбекистонда эпидемиологларни ўқитиш дастурини амалга оширмоқда

АҚШ Касалликларни назорат қилиш ва олдини олиш марказлари (CDC) Санитария-эпидемиологик осойишталик ва жамоат саломатлиги хизматининг 20 нафар ходими ҳамда Тошкент тиббиёт академиясининг 10 нафар мураббийи учун беш кунлик дала эпидемологияси дастурини (FETP) бошлаган.

АҚШнинг Ўзбекистондаги элчихонаси маълумотига кўра, мазкур дастурни Ўзбекистонда муваффақиятли амалга ошириш учун CDC Ўзбекистон соғлиқни сақлаш вазирлиги, Санитария-эпидемиологик осойишталик ва жамоат саломатлиги хизмати ҳамда Тошкент тиббиёт академияси билан ҳамкорлик қилади.

Ўқув дастури ишдан ажралмаган ҳолда уч ойлик модулни ўз ичига олиб, у касалликларнинг олдини олиш ва эпидемияга қарши курашда олдинги сафларда ишловчи эпидемиологларда муҳим кўникмаларни ривожлантиради.

Дастур касалликларни аниқлаш, ҳисобот бериш ва жавоб чораларини яхшилашга эътиборни кучайтирган ҳолда касалликларни кузатишни маҳаллий даражада такомиллаштиришга қаратилган.

Аксилкоррупция агентлиги Coca-Cola’даги хусусийлаштириш ишларини тўхтатиб туришни таклиф қилди

Коррупцияга қарши курашиш агентлиги “Coca-Cola Ichimligi Uzbekiston, Ltd” МЧЖ устав фондининг 57,118 фоизга тенг давлат улуши сотувга қўйилишини тўхтатиб туришни таклиф қилди.

Агентлик қайдича, сотувга қўйилиш жараёни амалдаги қонунчилик ва тартибларга зид равишда ўтказилаётганлиги тўғрисида кўплаб тадбиркорлар ва фуқаролар, шунингдек ижтимоий тармоқ фойдаланувчилари томонидан мурожаатлар келиш тушган.

“Мурожаатларни ўрганиш жараёнида Коррупцияга қарши курашиш агентлиги томонидан “Coca-Cola Ichimligi Uzbekiston, Ltd” МЧЖ (CCIU) устав фондидаги давлат улушини хусусийлаштириш бўйича олиб борилаётган чора-тадбирларнинг амалдаги қонунчилик нормаларига мувофиқлиги ва коррупция хатари мавжудлиги таҳлил қилинди”, дейилган агентлик хабарида.

Давлат активларини бошқариш агентлиги “Coca-cola Ichimligi Uzbekiston, ltd” устав капиталидаги давлатга қарашли 57,118 фоиз улушини хусусийлаштиришни режалаётгани ҳақида Озодлик ўтган йил ёзида хабар қилганди.

Маълумотларга кўра, 2020 йил 16 декабрь куни Давлат активларини бошқариш агентлигининг расмий веб-сайтида Ўзбекистонда алкоголсиз ичимлик ишлаб чиқарувчи “Coca-Cola Ichimligi Uzbekiston, Ltd” МЧЖ (CCIU) нинг давлат улуши сотувга қўйилиши очиқланган. Эълонда тендерда иштирокчиларни саралаш ва ғолибни танлаш жараёнида бир нечта мезонлар қўлланилиши баён қилинган.

Коррупцияга қарши курашиш агентлиги ўрганишлар “Coca-Cola Ichimligi Uzbekiston, Ltd” МЧЖ (CCIU) устав фондидаги давлат улушини сотиш бўйича ўтказилаётган тендер шартларига киритилган бир қатор талаблар савдоларда қатнаша оладиган шахслар доирасини кескин кисқартиришга ҳамда қатор коррупцион омилларни келтириб чиқаришга шароит яратишини кўрсатганини билдирган.

Агентлик фикрича, ушбу мезонлар ўта юқори ва асослантирилмаган талаблар ҳисобланади ва савдоларда иштирок этиши мумкин бўлган эҳтимолий иштирокчилар сонини сунъий чеклашга олиб келади.

Шу муносабат билан агентлик мазкур тендер жараёнларини тўхтатиш юзасидан тегишли идораларга тақдимнома киритилган.

Аксилкоррупция агентлиги қайдича, тендер савдоларида иштирок этишга кўпроқ талабгорларни жалб қилиш ҳамда тенг имконият ва шароитлар яратиш мақсадида халқаро молиявий ва ҳуқуқий маслаҳатчиларнинг хулосалари асосида тендер шартларини юмшатиш бўйича ишларни олиб бориш керак.

Вазир: Ўтган йили бандлик марказларига иш сўраб келганларнинг учдан бири ишга жойлаштирилди

Бандлик ва меҳнат муносабатлари вазири Нозим Ҳусанов

Ўтган 2020 йилда Бандликка кўмаклашиш марказларига 1 миллион 96 минг нафар фуқаро мурожаат қилган. Бу ҳақда Бандлик ва меҳнат муносабатлари вазири Нозим Ҳусанов 25 январь куни АОКАда ўтказилган матбуот анжуманида билдирган.

Уларнинг 362 минг нафарига ишга жойлашиш бўйича кўмак берилди, 521 минг нафари вақтинчалик ҳақ тўланадиган жамоат ишларига жалб қилинди, 36 минг нафар фуқароларга деҳқончилик қилиши учун субсидиялар ажратилди, 12 минг нафар фуқарога тадбиркорлик фаолиятини бошлаш учун субсидия берилди”, деган вазир Н. Ҳусанов.

Мулозим ўтган йили пандемия муносабати билан турли корхоналар фаолиятини тугатишга мажбур бўлгани, бунинг ортидан фуқаролар ишсиз қолганини эътироф этган.

Матбуот анжуманида вазир янги таҳрирдаги “Аҳоли бандлиги тўғрисида”ги қонун кучга кириши билан ишсизлик нафақасини тўлаш тартиби ҳам ўзгаришини қайд этган.

Унга кўра, агар аввал ишсизлик нафақаси илгари ишламаган ва биринчи бор иш қидираётганларга 12 ойлик давр мобайнида фақат 13 ҳафта тўланган бўлса, эндиликда ишсизлик нафақаси барча тоифадаги ишсиз шахсларга 12 ойлик давр ичида 26 календарь ҳафта давомида тўланиши белгиланмоқда.

Мазкур чоралар натижасида ишсизлар иш қидириш даврида моддий қўллаб-қувватланади ва 80 мингга яқин ишсизга нафақа тайинланади”, деган Нозим Ҳусанов.

Россияда оғир аҳволда қолган ўзбеклар ватанига қайтарилди

Хорижликларни сақлаш марказида ўзининг Ўзбекистонга депортация қилиниши кутаётган мигрантлардан бири.

Ташқи меҳнат миграцияси агентлиги Россиянинг Хорижий фуқароларни вақтинчалик сақлаш марказларида сақланаётган 13 кишини ўз уйига қайтарди.

Расмий маълумотда айтилишича, Ташқи меҳнат миграцияси агентлиги бу ишни бир қатор ваколатли ва халқаро ташкилотлар кўмагида амалга оширган.

13 нафар ўзбекистонлик 23 январь куни Москва – Тошкент чартер рейс орқали уйларига етиб келди.

Расмий хабарда айтилишича, “Ўзбекистонга қайтаритлган фуқаролар билан Ташқи меҳнат миграцияси агентлиги вакиллари профилактик ва тушунтириш тадбирларини ўтказган”.

Доллар ва евро ўзбек сўмига нисбатан яна қимматлади

Тижорат банкларида 1 доллар 10550 сўмдан сотилаётгани хабар қилинди.

Ўзбекистон Марказий банки 26 январдан бошлаб доллар ва евро яна қимматлагани ҳақидаги маълумотни эълон қилди.

26 январдан хорижий валюталарнинг ўзбек сўмига нисбатан янги қиймати қуйидагича белгиланди:

1 доллар - 10 518,99 сўм,
1 евро -12 789,46 сўм.

Бу сўнгги бир ҳафта ичида долларнинг расмий курси 18,18 сўмга, евронинг расмий курси 115,58 сўмга кўтарилганини англатади.

Давлат органлари бир йилда деярли 6 минг тадбиркорнинг ҳуқуқларини бузди

Ўзбекистондаги цехлардан бири.

Давлат органларининг тадбиркорлар фаолиятига ноқонуний аралашуви ва бюрократик тўсиқлар оқибатида 5 минг 833 та тадбиркорнинг ҳуқуқи бузилган. Бу ҳақда АОКАда ўтган брифингда Бош прокуратура бошқармаларидан бирининг бошлиғи Хуршид Шуҳратжонов маълум қилди.

Расмийнинг айтишича, тадбиркорлар ҳуқуқини асосан солиқ идоралари, маҳаллий ҳокимликлар, банк муассасалари, қурилиш, кадастр, коммунал хизмат кўрсатиш идоралари бузмоқда.

Жумладан, 1 минг 281 нафар тадбиркорнинг банкдаги ҳисоб варақлари бўйича операциялари асоссиз тўхтатиб қўйилган, 347 нафар тадбиркордан ортиқча маблағ ундирилган.

Бундан ташқари 466 тадбиркорнинг мурожаати эътиборсиз қолдирилган, 408 тадбикорга лицензия ва рухсат бериш тартиби бузилган, 838 тадбиркорнинг имтиёзлар ва преференцияларга бўлган ҳуқуқи топталган.

Қашқадарёда Ислом Каримов бюсти учун ўқитувчилардан пул йиғилаётгани инкор қилинди

Ислом Каримов бюсти 450 минг сўмдан сотилаётгани айтилган эди.

Қашқадарё вилояти халқ таълими бошқармаси Озодлик радиосида 22 январда эълон қилинган “Қашқадарёлик ўқитувчилар: Ислом Каримов бюсти учун мажбуран пул йиғилмоқда” сарлавҳали мақолага муносабат билдирди.

Мазкур мақолада қашқадарёлик ўқитувчилар марҳум президент Ислом Каримов бюсти учун ўзларидан пул йиғилаётганидан норозилик билдиришган.

Ўқитувчиларга кўра, ҳокимлик вилоятдаги 200та мактабга нархи 450 минг сўм бўлган Каримов бюстларини мажбуран тарқатган ва пулини ўқитувчилардан ундирмоқда.

Қашқадарё вилояти ҳокимлиги мулозими Озодлик билан суҳбатда ўқитувчиларнинг Каримов бюсти учун пул йиғаётгани ҳақидаги даъволарини рад қилишга уринган эди.

Қашқадарё вилояти халқ таълими бошқармаси ҳам Каримов бюстлари учун ўқитувчилардан пул йиғилаётганини инкор қилди.

Таълим бошқармасининг билдиришича, ҳақиқатан ҳам вилоят халқ таълими бошқармасига тақсимот учун Ислом Каримовнинг 200 дона бюсти берилган. Мазкур бюстлар туман халқ таълими бўлимларига тақсимлаб берилган.

“Ҳозирда туман (шаҳар) халқ таълими бўлимларида ҳомийлик ёки бюджетдан ташқари тушган маблағ асосида шакллантириб мактабларга тарқатиш учун сақланмоқда. Қолган 5 та туманда Биринчи Президентимиз И.Каримовнинг бюстлари, ўзлари ташуббус кўрсатган мактаб директорларига тарқатилган. Жумладан, Чироқчи, Муборак, Қарши, Косон, Деҳқонобод туманлари мактабларига тарқатилиши тақсимот қилинган бўлиб, пул маблағлари мактаблар жамоасидан йиғиб олинмаганлиги маълум бўлди”,-дейилади расмий муносабатда.

Урганчда ҳали туғилмаган боласини сотмоқчи бўлган эр-хотин ушланди

2017-2020 йилларда Ўзбекистонда чақалоқ савдоси билан боғлиқ 185 та ҳолат аниқланган.

Урганч тумани Бекобод қишлоғида яшовчи П.К., никоҳсиз яшаётган эри билан тил бириктириб, ҳали туғилмаган 4 ойлик хомиласини сотмоқчи бўлди.

Ички ишлар вазирлигига қарашли “Постда” нашрининг маълум қилишича, ҳазорасплик Т. Б., ҳали туғилмаган чақалоққа харидор бўлган. 4 ойлик хомила туғилганидан сўнг 9000 долларга сотилиши келишиб олинди.

“П.К., турмуш ўртоғи билан келишилган пулнинг 6000 АҚШ долларини олаётган пайтида ашёвий-далиллар билан қўлга олинди. Айни кунда ушбу ҳолат юзасидан жиноят иши қўзғатилган”,-дейилади хабарда.

Ички ишлар вазирлиги маълумотларига қараганда, 2017-2020 йилларда Ўзбекистонда чақалоқ савдоси билан боғлиқ 185 та ҳолат аниқланган.

Янги қонун: Товарларнинг нархлари чет-эл валюталарига боғланиши мумкин

“Валютани тартибга солиш тўғрисида”ги қонунга ўзгартишлар киритилди.

“Валютани тартибга солиш тўғрисида”ги қонунга киритилган қўшимчаларга асосан, эндиликда президент қарорлари асосида давлат-хусусий шериклик тўғрисидаги битимлар ва ҳукумат орқали жалб этилган чет эл инвестициялари лойиҳалари бўйича Ўзбекистонда реализация қилинадиган товарлар (ишлар, хизматлар) нархлари чет эл валюталарига ва шартли бирликларга боғланиши мумкин.

Адлия вазирлигининг билдиришича, бу борада 2021 йилнинг 22 январида Ўзбекистон Республикасининг айрим қонун ҳужжатларига ўзгартиш ва қўшимчалар киритилди. Бундан олдин мазкур тартиб мавжуд эмас эди.

Қонунларга киритилган ўзгартишларга асосан, эндиликда фақатгина қиймати 1 миллион доллардан ортиқ лойиҳаларининг тендер ҳужжатлари ва давлат-хусусий шериклик тўғрисидаги битимларнинг лойиҳалари келишилади.

Бундан ташқари давлат-хусусий шериклик лойиҳаларига оид маълумотларнинг эълон қилинадиган қисми аниқлаштирилди. Жумладан, расмий веб-сайтларга лойиҳа тарафларининг номи, лойиҳанинг фаолият йўналиши, лойиҳанинг жойлашган ери, лойиҳани амалга ошириш муддати, лойиҳанинг умумий қиймати. давлат томонидан қўллаб-қувватлаш ҳажми ва турлари тўғрисидаги маълумотлар жойлаштирилиши шарт.

Коронавирусга қарши Хитой вакцинаси синовида қатнашиш учун 9,5 минг киши кўнгилли бўлди

2021 йилнинг 7 январида Ўзбекистонда коронавирусга қарши Хитой вакцинасини синовида жами 1328 киши иштирок этгани айтилган.

Хитойнинг Zhifei Loncom Biofarmaceutical компанияси томонидан коронавирусга қарши яратилган ZF 2001 вакцинасини Ўзбекистонда синаш жараёнида 9596 нафар ўзбекистонлик кўнгилли иштирок этиш ниятини билдирди.

Инновацион ривожланиш вазирлигининг 24 январда хабар беришича, шу кунгача 4281 нафар кўнгилли вакцинанинг 1-дозаси билан ва 251 нафар кўнгилли вакцинанинг 2-дозаси билан эмланди.

Вазирлик коронавирусга қарши Хитой вакцинасининг учинчи синов босқичи Ўзбекистонда 2020 йилнинг 12 декабрида бошланганини билдирди.

“Синовда 18 ёшдан катта, сурункали касалликларга чалинмаган, 5000 та кўнгилли иштирокчиларни жалб этиш режалаштирилган. Кўнгиллилар синов жараёнида жами уч доза вакцина билан эмланиши кўзда тутилган”,- дейилади расмий хабарда.

Инновацион ривожланиш вазирлиги 2021 йилнинг 7 январида Ўзбекистонда коронавирусга қарши Хитой вакцинасининг III босқич синовларида иштирок этган фуқаролар сони жами 1328 кишини ташкил этгани тўғрисида хабар берган эди.

Маданият вазирлиги: Бундан буён болалар боғчаларида мақом куйланади

Болалар боғчаларида мақом эшиттириш тўғрисида меморандум имзоланди.

Ўзбекистон маданият вазири Озодбек Назарбековнинг боғчаларда ҳар куни мақом ва миллий куйлар қўйиш таклифи яқин кунларда амалга оширилиши кутилмоқда.

Маданият вазирлиги матбуот хизматининг билдиришича, болаларга мақом ва бошқа миллий куйлар қўйиб бериш лойиҳаси юзасидан Маданият ва Мактабгача таълим вазирлиги ўртасида меморандум имзоланган.

“Маданият вазирлиги мактабгача таълим муассасалари учун мақом куйларидан сараланган махсус мусиқий тўплам яратган. Болаларни мунтазам мақом куйлари билан баҳраманд этиш режалаштирилган. Болаларга уларнинг тушлик дам олиш вақтларида белгиланган меъёр асосида мақом куйлари қўйиб берилади”,-дейилади расмий хабарда.

2020 йилнинг 10 ноябридан бошлаб Ўзбекистон мактабларида дарсдан олдин мадҳия куйланиб, танаффусда махсус радиокарнайлардан ватан мавзусидаги шеър ва қўшиқлар эшиттирила бошланганди.

Халқ таълими вазирлиги Маънавият бошқармаси вакили Акбар Тоғаев Озодлик билан суҳбатда бу тадбир ўқувчиларни ватанпарварлик руҳида тарбиялаш учун жорий қилинганлигини таъкидлаган эди.

Коронавирусдан яна бир киши вафот этди

Айни пайтда тиббиёт муассасаларида даволанаётган беморларнинг 32 нафари ўта оғир аҳволда.

Ўзбекистонда 22 январь куни яна бир киши коронавирусдан вафот этди. Соғлиқни сақлаш вазирлигининг билдиришича, бу билан коронавирусдан ўлганлар сони Ўзбекистонда камида 621 кишига етди.

23 январь ҳолатига кўра, Ўзбекистонда коронавирус инфекцияси қайд этилганлар сони 78375 нафарни ташкил этмоқда. Сўнгги бир сутка ичида вирус юққан яна 58 бемор аниқланган.

Янги касалланиш ҳолатларининг 28 нафари Тошкент шаҳрида коронавирусга чалинган беморлар билан мулоқотда бўлганлиги сабабли намуна олинган фуқаролар орасида аниқланган.
Касалликдан соғайганлар жами 76815 нафарга етди ва соғайиш кўрсаткичи 98 фоизни ташкил қилмоқда.

Айни пайтда тиббиёт муассасаларида даволанаётган 939 нафар бемордан 158 нафари оғир, 32 нафари эса ўта оғир аҳволда.

“Янги Ангрен” ИЭСда портлаш юз берган цех бошлиғи ўзини осди

“Янги Ангрен” иссиқлик электр станцияси.

“Янги Ангрен” ИЭСда цех бошлиғи бўлган 40 ёшли С.Ш., 23 январь куни уйида ўзини осиб ўлди. Бу ҳақда Тошкент вилояти ҳокимлиги матбуот хизмати раҳбари Беҳзод Қобулов ва яна бир мутсақил манбага таянган ҳолда Kun.uz хабар берди.

Маълум қилинишича, ўлимидан олдин С.Ш., ИЭСда содир бўлган портлаш юзасидан терговга чақирилган. ИЭСдаги портлаш айнан у раҳбарлик қиладиган цехда содир бўлган.

“Янги Ангрен” ИЭСи раҳбарияти 23 январь куни иссиқлик электр станциясидаги портлаш “Энергоқозонтозалаш” ширкати ходимлари 5-қозон агрегатини кимёвий тозалаш пайтида техника хавфсизлиги қоидаларига риоя қилмагани ортидан содир бўлганини билдирган эди.

Озодлик радиоси 20 январь куни ИЭСнинг таъмир учун тўхтатилган 5-блокида портлаш содир бўлгани, портлаш оқибатида 3 киши ўлганм ва 3 киши оғир жароҳат билан шифохонага ётқизилгани ҳақида хабар қилган.

Бу сўнгги 1 йилда “Янги Ангрен” ИЭСда содир бўлган иккинчи ҳалокат. 2020 йилнинг 30 январида чиққан ёнғинда станциянинг 4-3-блоклари томи ёниб кетган, унда ҳеч кимга шикаст етмагани айтилган эди.

Фарғонанинг Ўзбекистон туманидаги бозорда ёнғин содир бўлди

Фарғона вилоятининг Ўзбекистон туманидаги бозорда ёнғин содир бўлди.

Вилоят Фавқулодда вазиятлар бошқармасига кўра, ёнғинга 2021 йил 22 январь куни содир бўлган кучли шамол оқибатидаги электр симларининг қисқа туташуви сабаб бўлган бўлиши мумкин.

"2021 йилнинг 22 январь куни соат 05:30 да Ўзбекистон тумани «Бозор Яйпан» МФЙ, Ибн Сино кўчасида жойлашган «Янги Бозор СМР» МЧЖ савдо мажмуасида ёнғин келиб чиққан. Ҳодиса оқибатида тан жароҳати олганлар йўқ. Ёнғин тегишли куч воситалар ёрдамида ўз вақтида бартараф этилган", - дейилади ФВВ бошқармаси маълумотида.

Мазкур ҳолат юзасидан Ўзбекистон туман ИИБ ҳузуридаги тергов бўлими ҳамда Фавқулодда вазиятлар бўлими ходимлари томонидан текширув ўтказилмоқда.

Эслатиб ўтамиз, аввалроқ Андижондаги кучли шамол сабаб бир нечта бино талафот кўргани, қурилиши битмаган уй томи эса Damas’ни босиб қолгани ҳақида хабар берилганди

Мирзиёев: Бухоро бошқа вилоятлардан ўн йил орқада

Бухорога сафар қилган Ўзбекистон президенти Шавкат Мирзиёев вилоят ўн йил орқада қоляпти деб айтган.

– Бухоронинг бугунги ривожи маъқулми, деган саволга менинг жавобим: йўқ. Бошқа вилоятлардаги ривожланишдан 10 йил орқада қоляпти. Коррупция, порахўрлик барҳам топмаяпти, - дея таъкидлаган Мирзиёев.

Ўзбекистон раҳбари вилоятда оилавий тадбиркорлик, ёшлар бизнес лойиҳаларига 390 миллиард сўм имтиёзли кредитлар ажратилишини билдирди.

– Ёшларда жуда кўп ғоя, интилиш бор. Уларга шароит яратиб, елкадош бўлсак, улар жуда катта куч, қудрат, имконият ва келажак эгаси бўлади, – дея таъкидлади Шавкат Мирзиёев.

Мирзиёев Бухоро вилоятига вертолётда келди. У 2020 йил ноябрь ойидан буён Бухоро вилояти ҳокими вазифасини вақтинча бажариб келаётган Ботир Зариповни вилоят ҳокими этиб тайинлади.

Жиззах вилоятидаги қурилиш тендерлари юзасидан жиноят иши қўзғатилди

Жиззах шаҳрида 10 январь куни қулаб тушган уй

Жиззах вилоят прокуратураси томонидан вилоятдаги қурилиш обеъктларида тендер, танлов савдолари ва нархларни шакллантириш иши бўйича жиноят иши қўзғатилди.

Ўзбекистон Миллий ахборот агентлигининг 22 январдаги хабарига кўра,
вилоят ҳокимининг собиқ ўринбосари Акрам Раҳмонқулов, тендер комиссияси мансабдорлари ва қурилиш компаниялари раҳбарлари жавобгарликка тортилган.

Улар "ўзлаштириш", "мансаб ваколатини суиистеъмол қилиш" ва "мансаб сохтакорлиги"да айбланмоқда.

Хабарда айтилишича, терговолди суриштирувлари Жиззах вилояти ҳокимлигининг «Ягона буюртмачи хизмати» Qurilish Ta’minoti, J-Quruvchi ва Abduvohid Qurilish Ta’mir ширкатларига 292,1 миллиард сўмлик давлат буюртмаларини ўзлаштиришга кўмаклашганини ўртага чиқарган.

А. Раҳмонқулов бошчилигидаги тендер комиссияси танланган ширкатларга тендер савдоларида юқори балл ва кўрсаткичлар бериб, уларнинг танловда ғолиб бўлишини таъминлагани айтилади.

Шу йилнинг 15 январида президент Шавкат Мирзиёев пойтахтнинг Юнусобод туманига ташрифи чоғида Жиззах вилояти ҳокими ўринбосари ва унинг командасининг “президент сиёсатига хиёнат қилгани” ва жавобгарликка тортилишини айтганди.

Президент Бош прокурор Ниғматилла Йўлдошевга вазиятни назоратга олиш ва уларга нисбатан чора кўриш ҳақида кўрсатма берган.

10 январь куни Жиззах шаҳрида янги қурилаётган олти қаватли уйнинг бир қисми қулаб тушган эди. Ҳодисада, расмийларга кўра, ҳеч ким жабрланмаган. Бош вазир ўринбосари Очилбой Раматов бошчилигида ҳукумат комиссияси тузилганидан бир кун ўтиб, Бош прокуратура бинонинг қулаши юзасидан жиноят иши қўзғатилганини маълум қилган.

15 январь куни Қурилиш вазири Ботир Зокиров Жиззах шаҳридаги бинонинг қулашига қурилишдаги "ўғриликлар" сабабчи эканини айтганди.

“Пудратчи ташкилотнинг хаёли ўғрилик бўлган... Қурилиш конструкцияларида ишлатиладиган бетон маркаси 250-300-400 бўлади. Бу ҳолатда бетон маркаси 3-4 бараварга туширилган. Шунинг учун устунларнинг кўтариш имкони йўқ» деб айтган вазир.

Ўтган йили Сардоба сув омбори тўғонининг ёрилиши ортидан президент Мирзиёев "қурилишларда коррупция ҳоллари кўп" эканини айтганди.

Энергетика вазирлиги: "Янги Ангрен" ИЭС даги портлаш қурбонларига моддий ёрдам кўрсатилган

"Янги-Ангрен" ИЭС нинг Озодлик гаплашган ишчилари станцияда хавфсизлик қоидаларига етарли даражада амал қилинмаганини айтишган

Ўзбекистон Республикаси Энергетика вазирлиги матбуот хизматининг 22 январда тарқатган хабарига кўра, "Янги Ангрен" ИЭС тизимидаги “Востокэнерготеплоизоляция” АЖнинг вафот этган ва “Энергоқозонтозалаш” МЧЖнинг жароҳат олган ходимларининг оила-аъзоларига моддий ва маънавий ёрдам кўрсатилган.

Жумладан, “Энергоқозонтозалаш” МЧЖнинг жароҳат олган 2 нафар ходимларига дори-дармонлардан ташқари 1,8 миллион сўм ва бир нафарига 3,2 миллион сўмдан ёрдам пули берилган.

Вазирлик “Востокэнерготеплоизоляция”нинг вафот этган 2 нафар ходими оила-аъзоларига дафн харажатлари учун 4 миллион 866 минг сўмдан ёрдам кўрсатилганини айтган.

“Ташкилотнинг тегишли норматив-ҳуқуқий ҳужжатларига асосан, яна қўшимча (тўлиқ) равишда моддий ёрдамлари кўрсатилади. Ҳозирда уларнинг оила аъзолари ҳолидан тўлиқ хабар олиб турилибди. Ташкилот томонидан моддий ва маънавий ёрдам кўрсатилиши таъминланади”, дейилади Энергетика вазирлиги хабарида.

“Янги Ангрен” иссиқлик электр станциясидаги (ИЭС) портлашда нобуд бўлган ишчи оиласи ҳодисанинг жиддий тергов қилинишини талаб қилаётгани ҳақида Озодлик 21 январь куни хабар қилганди.

Вафот этган ишчилардан бири – 40 яшар Назира Режабоеванинг яқинлари портлашга электр станциясида хавфсизлик қоидасига амал қилинмаганини айтишган. Озодлик гаплашган ишчиларга кўра, станциядаги муаммолар зудликда ҳал қилинмаса, фожиа яна такрорланиши мумкин.

Ўзбекистон Фавқулодда вазиятлар вазирлиги (ФВВ) берган маълумотга кўра, 20 январь куни маҳаллий вақт билан соат 11 яримларда содир бўлган портлашда “Янги Ангрен” ИЭСнинг 3 нафар ишчиси нобуд бўлган, яна 3 киши жароҳатланган.

Давомини ўқинг

XS
SM
MD
LG