Линклар

Шошилинч хабар
23 январ 2021, Тошкент вақти: 23:02

Ўзбекистон хабарлари

Нажмиддин Комилов оламдан ўтди

Бугун филология фанлари доктори, профессор Нажмиддин Комилов 73 ёшида оламдан ўтди.

Адабиётшунос олим Комилов тасаввуф ва нақшбандия тариқати бўйича бир қатор ишлар қилган.

Унинг тасаввуфга оид икки китоби нашр этилган. Шунингдек, Комиловнинг "Тафаккур карвонлари", "Бу қадимий санъат", "Дўстлик кўприклари" каби китоблари чоп этилган.

Комилов Тошкент Давлат университети, Шарқшунослик институти, Давлат ва Жамият қурилиши академиясида бир неча йиллар давомида фаолият кўрсатган.

Нажмиддин Комилов сиёсий саҳнада ҳам фаолият юритиб, 1999 -2001 йилларда Ўзбекистон Марказий Сайлов комиссияси раиси лавозимида ишлаган эди.

Комилов 1939 йилда Тожикистоннинг Панжакент туманида туғилган эди.

Кун янгиликлари

Фарғонанинг Ўзбекистон туманидаги бозорда ёнғин содир бўлди

Фарғона вилоятининг Ўзбекистон туманидаги бозорда ёнғин содир бўлди.

Вилоят Фавқулодда вазиятлар бошқармасига кўра, ёнғинга 2021 йил 22 январь куни содир бўлган кучли шамол оқибатидаги электр симларининг қисқа туташуви сабаб бўлган бўлиши мумкин.

"2021 йилнинг 22 январь куни соат 05:30 да Ўзбекистон тумани «Бозор Яйпан» МФЙ, Ибн Сино кўчасида жойлашган «Янги Бозор СМР» МЧЖ савдо мажмуасида ёнғин келиб чиққан. Ҳодиса оқибатида тан жароҳати олганлар йўқ. Ёнғин тегишли куч воситалар ёрдамида ўз вақтида бартараф этилган", - дейилади ФВВ бошқармаси маълумотида.

Мазкур ҳолат юзасидан Ўзбекистон туман ИИБ ҳузуридаги тергов бўлими ҳамда Фавқулодда вазиятлар бўлими ходимлари томонидан текширув ўтказилмоқда.

Эслатиб ўтамиз, аввалроқ Андижондаги кучли шамол сабаб бир нечта бино талафот кўргани, қурилиши битмаган уй томи эса Damas’ни босиб қолгани ҳақида хабар берилганди

Мирзиёев: Бухоро бошқа вилоятлардан ўн йил орқада

Бухорога сафар қилган Ўзбекистон президенти Шавкат Мирзиёев вилоят ўн йил орқада қоляпти деб айтган.

– Бухоронинг бугунги ривожи маъқулми, деган саволга менинг жавобим: йўқ. Бошқа вилоятлардаги ривожланишдан 10 йил орқада қоляпти. Коррупция, порахўрлик барҳам топмаяпти, - дея таъкидлаган Мирзиёев.

Ўзбекистон раҳбари вилоятда оилавий тадбиркорлик, ёшлар бизнес лойиҳаларига 390 миллиард сўм имтиёзли кредитлар ажратилишини билдирди.

– Ёшларда жуда кўп ғоя, интилиш бор. Уларга шароит яратиб, елкадош бўлсак, улар жуда катта куч, қудрат, имконият ва келажак эгаси бўлади, – дея таъкидлади Шавкат Мирзиёев.

Мирзиёев Бухоро вилоятига вертолётда келди. У 2020 йил ноябрь ойидан буён Бухоро вилояти ҳокими вазифасини вақтинча бажариб келаётган Ботир Зариповни вилоят ҳокими этиб тайинлади.

Жиззах вилоятидаги қурилиш тендерлари юзасидан жиноят иши қўзғатилди

Жиззах шаҳрида 10 январь куни қулаб тушган уй

Жиззах вилоят прокуратураси томонидан вилоятдаги қурилиш обеъктларида тендер, танлов савдолари ва нархларни шакллантириш иши бўйича жиноят иши қўзғатилди.

Ўзбекистон Миллий ахборот агентлигининг 22 январдаги хабарига кўра,
вилоят ҳокимининг собиқ ўринбосари Акрам Раҳмонқулов, тендер комиссияси мансабдорлари ва қурилиш компаниялари раҳбарлари жавобгарликка тортилган.

Улар "ўзлаштириш", "мансаб ваколатини суиистеъмол қилиш" ва "мансаб сохтакорлиги"да айбланмоқда.

Хабарда айтилишича, терговолди суриштирувлари Жиззах вилояти ҳокимлигининг «Ягона буюртмачи хизмати» Qurilish Ta’minoti, J-Quruvchi ва Abduvohid Qurilish Ta’mir ширкатларига 292,1 миллиард сўмлик давлат буюртмаларини ўзлаштиришга кўмаклашганини ўртага чиқарган.

А. Раҳмонқулов бошчилигидаги тендер комиссияси танланган ширкатларга тендер савдоларида юқори балл ва кўрсаткичлар бериб, уларнинг танловда ғолиб бўлишини таъминлагани айтилади.

Шу йилнинг 15 январида президент Шавкат Мирзиёев пойтахтнинг Юнусобод туманига ташрифи чоғида Жиззах вилояти ҳокими ўринбосари ва унинг командасининг “президент сиёсатига хиёнат қилгани” ва жавобгарликка тортилишини айтганди.

Президент Бош прокурор Ниғматилла Йўлдошевга вазиятни назоратга олиш ва уларга нисбатан чора кўриш ҳақида кўрсатма берган.

10 январь куни Жиззах шаҳрида янги қурилаётган олти қаватли уйнинг бир қисми қулаб тушган эди. Ҳодисада, расмийларга кўра, ҳеч ким жабрланмаган. Бош вазир ўринбосари Очилбой Раматов бошчилигида ҳукумат комиссияси тузилганидан бир кун ўтиб, Бош прокуратура бинонинг қулаши юзасидан жиноят иши қўзғатилганини маълум қилган.

15 январь куни Қурилиш вазири Ботир Зокиров Жиззах шаҳридаги бинонинг қулашига қурилишдаги "ўғриликлар" сабабчи эканини айтганди.

“Пудратчи ташкилотнинг хаёли ўғрилик бўлган... Қурилиш конструкцияларида ишлатиладиган бетон маркаси 250-300-400 бўлади. Бу ҳолатда бетон маркаси 3-4 бараварга туширилган. Шунинг учун устунларнинг кўтариш имкони йўқ» деб айтган вазир.

Ўтган йили Сардоба сув омбори тўғонининг ёрилиши ортидан президент Мирзиёев "қурилишларда коррупция ҳоллари кўп" эканини айтганди.

Энергетика вазирлиги: "Янги Ангрен" ИЭС даги портлаш қурбонларига моддий ёрдам кўрсатилган

"Янги-Ангрен" ИЭС нинг Озодлик гаплашган ишчилари станцияда хавфсизлик қоидаларига етарли даражада амал қилинмаганини айтишган

Ўзбекистон Республикаси Энергетика вазирлиги матбуот хизматининг 22 январда тарқатган хабарига кўра, "Янги Ангрен" ИЭС тизимидаги “Востокэнерготеплоизоляция” АЖнинг вафот этган ва “Энергоқозонтозалаш” МЧЖнинг жароҳат олган ходимларининг оила-аъзоларига моддий ва маънавий ёрдам кўрсатилган.

Жумладан, “Энергоқозонтозалаш” МЧЖнинг жароҳат олган 2 нафар ходимларига дори-дармонлардан ташқари 1,8 миллион сўм ва бир нафарига 3,2 миллион сўмдан ёрдам пули берилган.

Вазирлик “Востокэнерготеплоизоляция”нинг вафот этган 2 нафар ходими оила-аъзоларига дафн харажатлари учун 4 миллион 866 минг сўмдан ёрдам кўрсатилганини айтган.

“Ташкилотнинг тегишли норматив-ҳуқуқий ҳужжатларига асосан, яна қўшимча (тўлиқ) равишда моддий ёрдамлари кўрсатилади. Ҳозирда уларнинг оила аъзолари ҳолидан тўлиқ хабар олиб турилибди. Ташкилот томонидан моддий ва маънавий ёрдам кўрсатилиши таъминланади”, дейилади Энергетика вазирлиги хабарида.

“Янги Ангрен” иссиқлик электр станциясидаги (ИЭС) портлашда нобуд бўлган ишчи оиласи ҳодисанинг жиддий тергов қилинишини талаб қилаётгани ҳақида Озодлик 21 январь куни хабар қилганди.

Вафот этган ишчилардан бири – 40 яшар Назира Режабоеванинг яқинлари портлашга электр станциясида хавфсизлик қоидасига амал қилинмаганини айтишган. Озодлик гаплашган ишчиларга кўра, станциядаги муаммолар зудликда ҳал қилинмаса, фожиа яна такрорланиши мумкин.

Ўзбекистон Фавқулодда вазиятлар вазирлиги (ФВВ) берган маълумотга кўра, 20 январь куни маҳаллий вақт билан соат 11 яримларда содир бўлган портлашда “Янги Ангрен” ИЭСнинг 3 нафар ишчиси нобуд бўлган, яна 3 киши жароҳатланган.

Энергетика инқирозини бошдан кечираётган Ўзбекистонга совуқ ҳаво қайтди - талафотлар бор

Ўзбекистонда охирги йиллардаги энг қаттиқ совуқ ва ўткир энергетика тақчиллиги кузатилмоқда

Ўзбекистон Гидрометерология маркази хабарига кўра, 22 январь куни Ўзбекистон ҳудудига ғарбий Қозоғистон орқали шарқий Европа ва Россия ҳудудида шаклланган совуқ ва нам ҳаво оқими кириб келди

21-22 январь кунлари мамлакат бўйлаб ёққан қор қалинлиги тоғ олди ҳудудларда 40 сантиметрдан ошди.

22 январь куни тунда мамлакат шимолида ҳаво ҳарорати -15 даражагача пасайиши, шамол тезлиги эса 17-22 м/с га етиши кутилади.

Ўзбекистон Республикаси Фавқулодда вазиятлар вазирлиги мамлакатни Фарғона водийси билан боғловчи Қамчиқ довонида қор кўчкиси ва бошқа табиий офатлардан огоҳлантирди.

Ижтимоий тармоқлар 21 январь куни тунда водий вилоятларида шамол бир қанча вайронагарчиликларни юзага келтиргани ҳақида хабар қилмоқда.

Журналист Зафарбек Солижонов Facebokдаги ижтимоий блогида Наманган вилоятининг Мингбулоқ туманида табиий офат келтирган зарарлар ҳақидаги видеоларни эълон қилди.

Китоблик журналист Асадулла Жўраев эса, ўз саҳифасига қор қалинлигини ўлчаётгани акс этган фотоларни жойлади. Унда қор қалинлиги 45 сантиметр экани кўринади.

Шунингдек, маҳаллий нашрлар қаттиқ шамол Андижон вилоятининг бир неча туманларини электр энергиясисиз қолдиргани ҳақида ёзмоқда.

Ўзбекистонда охирги йиллардаги энг қаттиқ совуқ ва ўткир энергетика тақчиллиги кузатилмоқда.

Ботир Зарипов Бухоро вилояти ҳокимлигига тасдиқланди

Ботир Зарипов ўтган йил ноябрида вилоят ҳокими вазифасини бажарувчи этиб тайинланган эди (Президент матбуот хизмати)

22 январь куни Халқ депутатлари Бухоро вилояти кенгашининг навбатдан ташқари сессиясида президент Мирзиёевнинг таклифи билан Ботир Зарипов вилоят ҳокими лавозимига тасдиқланди.

Сессия ишида қатнашган Мирзиёев вилоятда ишсизлик ва бошқа ижтимоий муаммолар йиғилиб қолганини танқид қилган.


“Мендан сизга Бухоронинг ривожланиши маъқулми, деб сўрасангиз айтаман – номаъқул. Вилоятда 2 миллионга яқин аҳоли бор. Лекин ишсизлик, муаммолар жуда кўп. Ҳокимлар халқ олдидаги менинг вакилим сифатида кўнгилдагидек ишлай оляптими? Энг катта муаммолардан бири, бу-кадрлар масаласи. Бухоро вилояти етакчисини танлаб олиши ҳам жуда муҳим”, дея президентнинг сўзларидан иқтибос келтирмоқда Kun.uz нашри.

Муқаддам “Ўзсаноатқурилишматериаллари” уюшмаси бошқаруви раиси лавозимида фаолият юритган Ботир Зарипов ўтган йил ноябрида вилоят ҳокими вазифасини бажарувчи этиб тайинланганди.

Вилоятнинг собиқ ҳокими Карим Камолов 2020 йил 22 августида коронавирус хасталигидан вафот этган.

Давстатқўм ўтган йили Ўзбекистон газ экспортини қарийб 5 баравар камайтиргани ҳақида маълум қилди

Ўзбекистон 2020 йилда хориждан 50,4 млн долларлик газ сотиб олган, газ экспорти ҳажми эса қиймат жиҳатидан 4,7 баравар камайган. Бу ҳақда Газета.уз нашри Давлат статистика қўмитасининг ташқи савдо айланмаси тўғрисидаги ҳисоботига таянган ҳолда хабар қилди.

Энергетика вазирлиги нашрнинг газ қаердан ва қай ҳажмда импорт қилинганига оид сўрови бўйича изоҳ беришдан бош тортган. Бу орада Газета.уз манбалари газ Туркманистондан сотиб олинганини айтганлар.

Қайд этилишича, газ экспорти қиймати бўйича 4,7 бараварга, яъни 2,2 млрд доллардан 478,1 млн долларга камайган. Бу Россияга газ экспорти тўхтатилгани ҳамда пандемия шароитида Хитойга етказиб бериш ҳажми уч баравар камайгани туфайли рўй берган.

Давстатқўм маълумотига мувофиқ, ўтган йили Ўзбекистонда газ қазиб олиш ҳажми 2019 йилга нисбатан 10,8 млрд кубометрга ёки 17,8 фоизга, яъни 60,5 млрд дан 49,7 млрд кубометргача камайган.

Президент Шавкат Мирзиёев 16 декабрь кунги видеоселекторда ҳукуматга газ экспорти ҳажмини қисқартириб, ички истеъмолга йўналтириш ҳақида топшириқ берганини маълум қилган. Унга кўра, Ўзбекистон бўйлаб газ таъминотида суткасига 20 миллион метр куб танқислик мавжуд. Президент кунига 7−8 миллион метр куб қўшимча газ аҳоли эҳтиёжи учун йўналтирилишини қайд этган.

Россия нашрлари аввалроқ экспорт ҳажми кескин қисқаргани боис Ўзбекистонда газ заҳиралари ортиб қолаётгани ва ички эҳтиёж учун ортиқча табиий газ пайдо бўлгани ҳақида ёзган. Ҳукуматнинг ортиб қолган газни аҳоли эҳтиёжига йўналтиришига ҳозиргача нима тўсқинлик қилгани маълум эмас. Мирзиёев бир ой аввалги чиқишида бунга изоҳ бермаган.

Фарғона водийси вилоятларида кучсиз ер силкиниши кузатилди

Жорий йилнинг 22 январь куни Тошкент вақти билан 09:02 да Тожикистон-Қирғизистон чегарасида зилзила содир бўлди. Бу ҳақда Ўзбекистон Фавқулодда вазиятлар вазирлигининг Сейсмопрогностик мониторинг республика маркази маълум қилди.

Қайд этилишича, зилзила маркази жанубий-шарқий йўналиш бўйича пойтахт Тошкентдан 353 километр узоқликда бўлган.

Ер силкиниши Ўзбекистоннинг Андижон ва Фарғона вилоятларида сезилиб, унинг кучи ҳар икки вилоятда ҳам 2 баллга тенг бўлган.

Мирзиёев Бухорода ўтган йилги табиий офат ортидан амалга оширилган тикланиш ишларини кўздан кечирди

Президент Ш. Мирзиёев 2020 йил 28 апрелида Бухоро вилоятига бориб, Олот ва Қоракўлдаги табиий офатдан зарар кўрган жойларни вертолётда кўздан кечирганди

Ўзбекистон президенти Шавкат Мирзиёев шу йилнинг 21 январь куни Бухоро вилоятига бориб, ўтган йил апрелида юз берган кучли шамол оқибатида зарар кўрган ҳудудларни вертолётда кўздан кечирди.

2020 йилнинг 28 апрелига ўтар кечаси Бухоро, Навоий, Самарқанд ва Қашқадарёда кучли шамол бўлгани, бунинг оқибатида Бухоро вилоятида 1 одам вафо этгани, камида 41 одам жароҳатлангани ҳақида Озодлик аввал хабар қилган.

Табиий офат туфайли Бухорода 5200 дан зиёд бинога (4800 таси аҳоли уйи) шикаст етган. Ш. Мирзиёев ҳодисанинг эртасига Бухоро вилоятига бориб, Олот ва Қоракўлни вертолётда айланганди.

Президент матбуот хизмати маълумотига кўра, табиий офат ортидан Олот, Қоракўл, Жондор, Ромитан, Пешку ва Шофиркон туманларида 45 мингта уй, 204 та кўп қаватли турар жой таъмирланган. Мингдан ортиқ ижтимоий соҳа ва тадбиркорлик объектлари, йўллар, электр, газ ва алоқа тармоқлари тикланган.

Олотга сафари чоғида Шавкат Мирзиёев мазкур туман вакилларидан ташқари Қоракўл, Жондор ва Шофиркор туманлари фаоллари ҳамда маҳалла раислари билан учрашган.

МБ асосий фоиз ставкасини яна 14 фоиз даражасида ўзгаришсиз қолдирди

Тошкентдаги Марказий банк биноси

Ўзбекистон Марказий банки бошқаруви 2021 йил 21 январида асосий ставкани йиллик 14 фоиз даражасида ўзгаришсиз қолдириш тўғрисида қарор қабул қилди. Бу ҳақда МБ матбуот хизмати маълумот тарқатди.

“Ушбу қарор инфляция динамикасини янада пасайтириш, иқтисодиётда реал фоиз ставкаларини ижобий даражада сақлаб қолиш, шунингдек, иқтисодий фаолликнинг тикланиши учун қулай шарт-шароитлар яратиб бориш мақсадида қабул қилинди”, дейилган МБ хабарномасида.

Марказий банк 2021 йилда Ҳукумат билан биргаликда инфляциянинг йил охирига 10 фоиздан паст бўлган оралиқ мақсадли кўрсаткичига эришиш учун барча зарурий чораларни кўриб боришини билдирган.

Ўзбекистон Марказий банки бошқаруви сентябрь ойида асосий ставкани 1 фоизга пасайтириб, йиллик 14 фоиз даражасида белгилаган, октябрь ва декабрь ойларида эса бу кўрсаткични ўзгаришсиз қолдирганди.

Хабарномада айтилишича, МБ ташқи ва ички шароитларни ҳисобга олган ҳолда инфляция хатарлари ва омиллари характерини чуқур ўрганишда давом этади ҳамда инфляциянинг прогноз динамикасидан келиб чиққан ҳолда асосий ставка бўйича тегишли қарорларни қабул қилади.

Марказий банк бошқарувининг асосий ставкани кўриб чиқиш бўйича галдаги йиғилиши 2021 йилнинг 11 мартига белгиланган.

Хоразмда қалин қор ёғиши ортидан айрим туманлар электрсиз қолди

Хоразмда 21 январь куни ёққан қалин қор айрим туманлар ҳамда вилоят маркази Урганчда электр таъминотида узилишларга сабаб бўлди.

"Хоразм ҳудудий электр тармоқлари" корхонаси матбуот хизмати маълумотига кўра, тармоқларда юзага келган узилишларни бартараф этиш учун барча ходимлар жалб этилган. Корхона “ҳудудларда рўй берган электр энергиясидаги узилишларни бартараф этиш учун ҳавонинг совуқлиги ва тун яримлаб қолган бўлишига қарамасдан” барча ходимлар ўз вазифаларини “фидойилик билан” бажараётганини билдирган.

Аввалроқ Озодлик 19 январь куни Хоразм вилояти Урганч тумани Чолиш шаҳарчаси аҳолиси газ ва электр тақчиллиги туфайли норозилик билдириб, Чолиш-Урганч трассасини тўсиб қўйгани, норозилар билан учрашган вилояти ҳокими Фарҳод Эрманов шаҳарчада электр энергияси таъминотини яхшилаш учун янги трансформатор ўрнатишга ваъда бергани ҳақида хабар қилган эди.

Аввалроқ “Ўзгидромет” ҳафтанинг иккинчи ярмида Ўзбекистонда ҳаво ҳарорати кескин совиши, кучли қор ёғиши, республика шимолида ҳатто - 15 даражагача тушиб кетиши ҳақида маълум қилган.

Қашқадарёда фарзандларини ўлдириш билан таҳдид қилган ота ҳибсга олинди

Қашқадарёда вояга етмаган икки фарзандини ўлдириш билан қўрқитиб, ҳақоратлаб, тазйиқ ўтказиб келган фуқаро А.Р. қўлга олинди. Бу ҳақда вилоят прокуратураси матбуот хизмати маълумот тарқатди.

Аввалроқ ижтимоий тармоқларда Қарши шаҳрида ота балоғатга етмаган икки ўғлини уятли сўзлар билан ҳақоратлаб, уларга ўлим билан таҳдид қилаётгани акс этган видео тарқалганди.

Қайд этилишича, 21 январь куни Қашқадарё вилоят прокурори Э.Тожиев бу икки болакайни бувиси ҳамроҳлигида вилоят прокуратурасига таклиф қилиб, мутасадди ташкилот вакиллари иштирокида улар билан суҳбат ўтказган. Суҳбат асносида болалар отаси томонидан муттасил қийнаб, уриб, ҳақоратлаб келингани аниқланган.

Мазкур ҳолат юзасидан шу куннинг ўзида ЖКнинг 110-моддаси 2-қисми “а” банди билан жиноят иши қўзғатилиб, А.Р. қамоққа олинди”, дейилган хабарномада.

Вилоят прокуратураси масъуллари вояга етмаган шахслар ижтимоий ҳимояга олиниб, тергов ҳаракатлари юзасидан назорат ўрнатилганини қўшимча қилганлар.

МБ: Расмий захира активлари қарийб 35 миллиард долларга етди

Ўзбекистоннинг расмий халқаро захиралари ҳажми ўтган йил декабридан бери 2 миллиард долларга ошган.

Марказий банк қайдича, 2021 йил 1 январидаги ҳолатга кўра, мамлакатнинг расмий захира активлари 34 миллиард 904 миллион АҚШ долларига тенг бўлган. 2020 йил 1 декабрь ҳолатига кўра, мазкур кўрсаткич 32 миллиард 892 миллион 800 минг долларни ташкил этганди.

Захираларнинг 20 миллиард 216 миллион 700 минг доллари олтин шаклида, 14 миллиард 303 миллион 900 минг доллари эса хорижий валюта ва депозитлар шаклида сақланмоқда.

Аввалроқ Озодлик Ўзбекистон жорий йилнинг январь-август ойлари оралиғида рекорд даражада – 5 миллиард 800 миллион долларлик олтин сотгани ҳақида хабар қилган эди. Газета.уз маълумотига кўра, Ўзбекистон куздан бери захирадаги олтинларни сотишни тўхтатган.

Олтин-валюта захираси ҳар бир мамлакатнинг “қора кун”га асралган мулки бўлиб ҳисобланади.

Мирзиёев Вашингтондаги инаугурация маросимидан бир кун ўтганидан сўнг Байденга табрик йўллади

АҚШнинг 46-президенти Жо Байден Оқ уйда, 2021 йил 20 январи

Ўзбекистон президенти Шавкат Мирзиёев АҚШ президенти Жозеф Байденга унинг давлат раҳбари лавозимига киришгани муносабати билан табрик йўллади. Бу ҳақда президент матбуот хизмати 21 январь куни маълумот тарқатди.

Жо Байден шу йил 20 январида Вашингтондаги Капитолий биносида қасамёдга келтирилгани ҳақида Озодлик аввал хабар қилган.

Ўтган йилнинг 3 ноябрь куни ўтказилган АҚШ президенти сайловида демократлар номзоди Байден 51 та штат Сайловчилар коллегиялари ихтиёридаги 538 овоздан 306 тасини олган. Сайловдан бир неча кун ўтиб, аниқроғи, 8 ноябрга келиб Жо Байденни Ғарб мамлакатларининг кўплаб лидерлари, улар орасида Ўзбекистонга қўшни бўлган Қозоғистоннинг президенти Қасим-Жомарт Тоқаев ҳам қутлаган.

Байденнинг ғалабаси 14 декабрь куни сайловчилар коллегияси томонидан тасдиқланганидан ортидан унга ҳатто Россия президент Владимир Путин ҳам табрик телеграммаси йўллаган.

Бироқ Ш. Мирзиёев на ноябрь ойида, на декабрь ойида, на-да Байденнинг ғалабаси АҚШ Конгресси томонидан тасдиқланган 6 январдан кейин ҳам уни билан табрикламаган эди.

Ўзбекистон президентининг Байденни лавозимга киришгунича нима учун табрикламагани сабаби маълум эмас. АҚШ президенти сайлови ўтганига бир ой тўлган кунда Озодликнинг “Ўзбекистон шу кунгача ҳам Байденни табрикламагани нима билан изоҳланади?” деган саволига Ўзбекистон Ташқи ишлар вазирлиги матбуот хизмати вакили Мирзоҳид Эшонқулов: “Изоҳ йўқ”, деб жавоб берган.

ИИВ вакиллари Сардобадаги масжидларга аталган пуллар Сурияга йўлланганини иддао қилди

Ўзбекистонда Сардобадаги тошқинда талофат кўрган масжидларни қайта қуриш учун Telegram’да хайрия гуруҳи очиб, йиғилган маблағни Сурияга жўнатиш билан шуғулланган гуруҳ қўлга олинган. Бу ҳақда Сирдарё вилояти ИИБ ахборот хизмати маълум қилди.

Тартиб посбонлари иддаосича, 21 январь куни Сирдарё вилояти бўйича ДХХ бошқармаси ҳамда вилоят ИИБ ходимлари ҳамкорлигида ўтказилган тезкор тадбир чоғида Сирдарё вилоятида “жиходчилар” экстремистик оқимининг яширин гуруҳи фаолиятига чек қўйилган.

Хабарномада мазкур гуруҳнинг икки етакчиси Россия ишлаш давомида радикал гуруҳлар таъсирига тушиб қолгани, Ўзбекистонга қайтиб келганларидан кейин эса экстемистик ғояларни тарғиб қилиб юрганлари айтилган. Шунингдек, улар Суриядаги тўқнашувларда иштирок этувчи террорчи гуруҳларни молиялаштириш билан шуғулланганликда гумонланмоқда.

“Қўлга олинганлардан баъзилари карантин чекловлари бекор қилингач, Сурияга чиқиб кетишни режалаштириш мақсадида ушбу мамлакат ҳудудидаги маслакдошлари билан алоқада бўлиб келганлар”, дейилган хабарномада.

Ҳозирда гуруҳнинг барча аъзолари қўлга олинган, улар устидан қўзғатилган жиноят иши доирасида тергов-суриштирув ишлари олиб борилмоқда.

Тошкент касалхоналарида даволаниш ордер тизими асосида амалга оширилади

Ҳар бир беморга ордер асосида даволаниш учун бюджетдан маблағ ажратилади.

Тошкентда аҳолининг имтиёзга эга бўлмаган қатлами -18 ёшдан 60 ёшгача бўлган эркаклар ва 18 ёшдан 55 ёшгача бўлган аёллар бундан буён давлат бюджети ҳисобидан даволаниш учун бериладиган йўлланма (ордер)лар асосида касалхоналарга қабул қилинади.

Соғлиқни сақлаш вазирлигининг билдиришича, бу борада Тошкент шаҳар соғлиқни сақлаш бош бошқармаси қарор қабул қилган. Қарорга асосан, пойтахтдаги 11 та шаҳар кўп тармоқли марказий поликлиникалари ва 64 та оилавий поликлиника шифокорлари режали равишда стационар даволанишга муҳтож шахсларга ордер беради.

Соғлиқни сақлаш вазири ўринбосари, Тошкент шаҳар соғлиқни сақлаш бош бошқармаси бошлиғи Анвар Алимовнинг маълум қилишича, ордер асосида шу кунгача имтиёзга эга бўлмаган 60 минг нафардан ортиқ фуқаро йил давомида бюджет маблағлари ҳисобидан кафолатланган режали стационар даволанишга жўнатилади.

Расман билдирилишича, касалхонага ордер асосида ётқизилган ҳар бир бемор учун 2,5-3 миллион сўмдан маблағ ажратилади.

Соғлиқни сақлаш вазирлигининг таъкидлашича, бунга қадар республика тасарруфидаги тиббиёт муассасалари (клиник шифохоналар ва илмий-амалий тиббиёт марказлари) ҳамда шаҳар клиник шифохоналари томонидан фақатгина имтиёзга эга бўлган аҳоли қатламига, яъни ёши 60дан ошган эркакларга ва 55дан ошган аёлларга бепул тиббий хизмат кўрсатиб келинган эди.

Қибрайда 460 гектар ер учун тадбиркордан 3,7 миллион доллар сўраган шахс қўлга олинди

Хабарда айтилишича, “давлат томонидан ажратиб берилган ерни ноқонуний сотишга ҳаракат қилган" тадбирокр ушланган.

Тошкент вилоятининг Қибрай туманида боғдорчилик ва яйлов учун 460 гектар ерни ажратиб бериш эвазига 3,7 миллион доллар сўраган шахс Давлат хавфсизлик хизмати ва Бош прокуратуранинг иқтисодий жиноятларга қарши кураш департаменти ўтказган қўшма амалиёт пайтида қўлга олинди.

Маҳаллий матбуотнинг ДХХ ва Бош прокуратурага таяниб хабар беришича, тадбиркор бунга қадар ер ажратиб берилишини илтимос қилиб қатор давлат органларига мурожаат қилган. Аммо унинг илтимоси қаноатлантирилмаган.

Бундан хабар топган Asiyan Milk Best ширкати раҳбари Қ.Т., тадбиркордан Қуйи Чирчиқ туманидаги 360 гектар суғориладиган ерни ва ҳозирда норасмий фойдаланиб келаётган туман захирасидаги 100 гектар ерни унинг номига ўтказиб беришини айтиб, эвазига 3,7 миллион АҚШ доллари сўраган.

Хабарда айтилишича, бу ҳолат “давлат томонидан ажратиб берилган ерни ноқонуний сотиш” сифатида кўрилади.

Қ.Т., ерни расмийлаштириб бериш учун 3,7 миллион доллардан ташқари яна Қуйи Чирчиқ тумани ҳокимлигидаги мансабдор шахсга пора сифатида 20 минг доллар берилиши шартлигини айтган.

Расман билдирилишича, Қ.Т., тадбиркордан жами 3 миллион 720 минг доллар олаётган пайтда қўлга тушган. Унга нисбатан Жиноят кодексининг 168 -ва 211-моддалари (фирибгарлик, пора бериш) асосида жиноят иши қўзғатилган.

Президент Бухоро вилоятига жўнаб кетди

Президент Шавкат Мирзиёев.

Президент Шавкат Мирзиёев 21 январь куни Бухоро вилоятига жўнаб кетди.

Президент матбуот хизматининг билдиришича, сафар ҳудудлар ривожи, аҳоли ҳаёти билан яқиндан танишиш мақсадида амалга оширилмоқда.

"Сафар давомида агросаноат, тўқимачилик, ахборот технологиялари, тиббиёт соҳаларидаги корхоналар, шаҳар ва туманлардаги бунёдкорлик ишларини кўздан кечириш режалаштирилган",-дейилади хабарда.

Янги қонун кучга кирди. Ишсизлик нафақаси бир йилда фақат 26 ҳафта берилади

Ишсиз қолганларга меҳнатга ҳақ тўлашнинг энг кам миқдоридан оз бўлмаган миқдорда ишсизлик нафақаси тўланади.

Адлия вазирлигининг маълум қилишича, 21 январдан бошлаб “Аҳоли бандлиги тўғрисида”ги қонун кучга кирди.

Мазкур қонунга асосан ишсизлик нафақаси 12 ойлик давр ичида кўпи билан 26 ҳафта давомида тўланади.

Қонунда белгиланишича, ишдан ва иш ҳақидан сўнгги 12 ойлик давр ичида маҳрум бўлган шахсларга аввалги иш жойидаги ўртача ойлик иш ҳақининг 50 фоизи миқдорида, лекин меҳнатга ҳақ тўлашнинг энг кам миқдори – 679 330 сўмдан оз бўлмаган миқдорда ишсизлик нафақаси тўланади.

1 йилдан ортиқ ишсиз юрган, аммо меҳнат фаолиятини қайта бошлашга ҳаракат қилаётган шахсларга меҳнатга ҳақ тўлашнинг 1 баравари миқдорида, илгари ишламаган, биринчи марта иш қидираётган шахсларга эса меҳнатга ҳақ тўлашнинг камида 75 фоизи миқдорида нафақа ажратилади.

Ўсмир қизни зўрлаганлардан бири ўлик ҳолда топилди. Зўрланган қиз йўқолди

Иллюстратив сурат.

Самарқанд вилояти Каттақўрғон туманида 16 ёшли қизни зўрлаганлардан бири 13 январь куни ўз уйида ўлик ҳолда топилди. Зўрлангани айтилаётган қиз эса бедарак йўқолди. Бу ҳақда Самарқанд вилоят прокуратураси 20 январда маълум қилди.

Билдирилишича, 2 январь куни 2004 йилда туғилган П.Э., Каттақўрғон туман ИИБга И.С., уни “Чинобод” маҳалласига олиб бориб зўрлагани, шундан сўнг С.Р., исмли фуқаро ҳам “Сув омбори” ҳудудига олиб бориб, зўрлик билан жинсий алоқа қилгани ҳақида ариза ёзган.

“Ишда тўпланган далилларга асосан Ўзбекистон Республикаси ЖКнинг 118-моддаси 1-қисми билан жиноят иши қўзғатилиб, ҳозирда жиноят иши юзасидан ҳудудий тегишлилиги бўйича Каттақўрғон шаҳар ИИБ ҳузуридаги ТБ (тергов бошқармаси) томонидан дастлабки тергов ҳаракатлари олиб борилмоқда”,-дейилади расмий билдирувда.

Прокуратуранинг билдиришича, вояга етмаган қизни зўрлаганлардан бири С.Р.,13 январь куни ўзининг Каттақўрғон туман “Саройқўрғон” маҳалласида жойлашган уйида ўлган ҳолда топилган. Унинг ўлим сабаблари текширилмоқда.

14 январь куни эса Каттақўрғон шаҳар прокуратурасига зўрланган қизнинг ота-онаси мурожаат қилган. Уларнинг билдиришича, П.Э., 10 январь куни уйидан чиқиб кетган ва бедарак йўқолган.

“Мазкур ҳолат юзасидан Каттақўрғон шаҳар прокуратураси томонидан терговга қадар текшириш ҳаракатлари олиб борилмоқда”,-дейилади хабарда.

МБ: Банк орқали нақд пул айланмаси 360 триллион сўмдан ошди

Ўзбекистонда 2020 йили банклар орқали нақд пул айланмаси ҳажми 360 триллион 100 миллиард сўмни ташкил этган, бу кўрсаткич 2019 йилга нисбатан 25,4 фоизга кўпдир. Бу ҳақда Марказий банк томонидан 20 январь куни эълон қилинган “Нақд пул муомаласи бўйича қисқача шарҳ”да айтилган.

МБ қайдича, ўтган йили банклар кассаларига нақд пул тушумлари 179 триллион 900 миллиард сўмни, чиқим қилинган нақд пуллар эса 180 триллион 200 миллиард сўмни ташкил этган.

Шарҳда коронавирус пандемияси шароитида банклар кассаларига нақд пул тушумларида йилнинг II чорагида сезиларли пасайиш кузатилгани, бу вақтда тушумларнинг I чоракка нисбатан 26 фоизга камайгани, карантин талабларининг юмшатилиши ортидан иқтисодий фаолликнинг ортиши натижасида IV чоракда II чоракка нисбатан 76 фоизга кўпайгани билдирилган.

Марказий банк ҳисоботида муомаладаги нақд пуллар таркибида асосан йирик номиналдаги банкнотлар салмоғининг ошиши ҳисобига банкнотлар умумий сони сезиларли даражада камайганига эътибор қаратган.

Жумладан, 2020 йил давомида муомалага чиқарилган нақд пуллар таркибида уларнинг сўмдаги миқдори бўйича 100 000 сўмлик банкнотлар улуши 12,5 фоиздан 27,3 фоизга етган бўлса, 50 000 сўмликнинг улуши 40,1 фоиздан 38,8 фоизга, 10 000 сўмликнинг улуши 20,3 фоиздан 15,7 фоизга, 5000 сўмлик улуши 22,6 фоиздан 16,1 фоизга, 1000 сўмгача бўлган банкнотлар улуши эса 4,5 фоиздан 2,1 фоизга тушган.

“Янги Ангрен” ИЭСдаги чақнаш чоғида уч киши нобуд бўлди

"Янги Ангрен" ИЭС

“Янги Ангрен” иссиқлик электр станциясининг профилактика чораларини кўриш учун тўхтатилган 5-энергия блокида 20 январь куни соат 11:42 да чанг-кўмирли ҳаво аралашмасининг чақнаши содир бўлган.

Бу ҳақда маълумот тарқатган Фавқулодда вазиятлар вазирлигига кўра, ҳодиса чоғида уч киши олинган жароҳат сабабли вафот этган, яна уч киши турли даражада куйиш тан жароҳатини олган.

Вафот этган ва жароҳат олганлар 5-энергия блокида профилактика ишларини олиб бораётган хизмат кўрсатиш ходимлари бўлган”, дейилган хабарномада.

ФВВ ўз ходимлари воқеа жойида портлаш оқибатларини бартараф этиш ишларини олиб бораётгани, чақнашнинг келиб чиқиш сабаблари бўйича суриштирув ишлари бошланганини билдирган.

Вазирлик қайдича, ҳодиса натижасида “Янги Ангрен” ИЭС инфратузилмаси ва технологик ускуналарига шикаст етмаган.

Бу орада Бош прокуратура матбуот хизмати ИЭСдаги ҳодиса юзасидан Ангрен шаҳар прокуратураси томонидан терговга қадар текширув ҳаракатлари олиб борилаётганини маълум қилди.

Икки ҳафта муқаддам Таллимаржон иссиқлик электр станциясидаги ҳар бирининг қуввати 450 МВт бўлган иккита энергоблок тўхтагани, бунинг оқибатида Қашқадарё вилоятининг қатор туманларида сув ва электр энергияси таъминоти тўхтаб қолгани ҳақида Озодлик аввалроқ хабар қилганди.

ЕТТБ пандемия даврида Ўзбекистонга ярим миллиард доллардан кўпроқ қарз берган

Европа тикланиш ва тараққиёт банки (ЕТТБ) 2020 йилда Ўзбекистонга 521 миллион доллар миқдорида қарз берган.

Банк маълумотига кўра, маблағлар Ўзбекистонда банк сектори, кичик ва ўрта корхоналар, инфратузилмани модернизация қилиш ҳамда қайта тикланадиган энергия манбалари ривожига кўмаклашишга қаратилган 18 та лойиҳага йўналтирилган.

Хусусан, 220 миллион доллар миқдоридаги савдо-сотиқни молиялаштириш пакети Ўзбекистон Миллий банки, “Асака” банк, “Ипотека” банк ва Ўзсаноатқурилиш банкка тақдим этилган. Бу ўзбекистонлик экспортчи ва импортчиларга савдо-сотиқ ва мол етказиб беришда оғир бозор шартлари туфайли юзага келган узилишларни юмшатишда ёрдам берган. Хусусий кредитор бўлган “Ипак йўли” банки ҳам ЕТТБдан 5 миллион АҚШ доллари олган.

Ўзбекистонда ЯИМнинг 50 фоизини ташкил қилган ва ишчиларнинг 80 фоизини банд қилган кичик ва ўрта корхоналарга кредитлар ажратиш учун ЕТТБ “Асака” банк, Ипотека банк, “Ипак йўли” банк ва “Давр” банк қарийб 100 миллион доллар, Ўзсаноатқурилиш банкка эса 40 миллион доллар ажратган.

“Аёллар Марказий Осиё бизнесида” лойиҳаси доирасида халқаро Европа тикланиш ва тараққиёт банки “Ипотека” банк ва “Давр” банкка 12 миллион доллар миқдорида кредит берган.

Ўзбекистоннинг яшил энергетикага ўтишини дастаклаш мақсадида ЕТТБ Навоий вилоятида 100 МВт қувватга эга бўлган қуёш электр станцияси қурилишига кредит ажратган.

Бундан ташқари, банк Сурхондарё вилоятида сув таъминоти ва электр таъминоти инфратузилмасини янгилаш учун 150 миллион доллар миқдорида қарз ажратган.

ЕТТБ хусусий тармоқ лойиҳалари учун ҳам 55 миллион доллардан кўпроқ маблағ берган. Хусусан, Korzinka тармоғи учун ажратилган 40 миллион доллар, ўғит ишлаб чиқарувчи Indorama Kokand учун ажратилган 12,5 миллион доллар, тиббий анжомлари ишлаб чиқаридан “Healthline” учун ажратилган 2,8 миллион доллар шулар жумласидандир.

Ўзгидромет ҳафта охирига бориб ҳаво ҳарорати -15 даражага совиши мумкинлигидан огоҳлантирди

Жорий йилнинг 22-23 январь кунлари Ўзбекистон шимолида ҳаво ҳарорати кечалари -12 -15 даражагача, кундуз кунлари эса -5 -8 даражагача совийди.

Ўзгидромет матбуот хизмати маълумотига кўра, бу кунлари ўртача кеча-кундузлик ҳаво ҳарорати меъёрдан 8-10 даражага паст бўлади.

Ташкилот ҳарорат пасайишига Ўзбекистон ҳудудига ғарбий Қозоғистон орқали Россияда шаклланган совуқ ва нам ҳаво массалари кириб келиши сабаб бўлишини билдирган.

Қайд этилишича, ҳафтанинг иккинчи ярмида республика бўйлаб ёғингарчилик кутилади,баъзи жойларда кучли қор ёғади, йўллар музлаши мумкин.

Бу йил Ўзбекистонда совуқ кунлар одатдагидан эртароқ ва шиддатлироқ бошлангани кузатилди. Хусусан, ўтган йилнинг ноябрь ойи ўрталаридан ҳарорат -15 даражагача пасайиб, мамлакат ҳудудида совуқ оқим узоқ вақт ҳукм сурди. Бу ҳолат қишга тайёргарлиги яхши бўлмаган республика бўйлаб энергетик коллапс юзага келишига сабаб бўлди.

ФИФА ҳаками Шерзод Қосимов келишилган ўйиндаги иштироки учун футболдан четлатилди

Ўзбек футбол жамоаси.

Ўзбекистон футбол ассоциацияси -ЎФА ҳакам Шерзод Қосимовни келишилган ўйинлардаги иштироки учун уч йил муддатга футболдан четлатди.

Шерзод Қосимов Жаҳон футбол федерацияси - ФИФА ва Осиё футбол конфедерацияси - ОФК ҳаками ҳисобланади.

ЎФА баёнотида қайд этилишича, “футбол ўйинларида учрашувга ёки унинг натижасига таъсир ўтказиш мақсадида келишувларда қатнашган футбол ҳакамларини аниқлаш бўйича” амалий ишлар давом этмоқда.

Мана шу ҳаракат доирасида 19 январда ЎФА Этика қўмитасининг навбатдаги йиғилишида Шерзод Қосимов бўйича аниқланган ҳолатлар кўриб чиқилди.

“Қўмита томонидан Ш.Қосимов ЎФА интизом кодексининг 5.44. бандига асосан бир қатор футбол учрашувларида учрашувга ёки унинг натижасига таъсир ўтказиш мақсадида келишувларда қатнашгани учун 3 (уч) йил муддатга футбол билан боғлиқ ҳар қандай фаолиятдан четлаштириш хусусидаги қарор қабул қилинди”,-дейилади расмий баёнотда.

Мазкур қарор ЎФА томонидан расмий тарзда эълон қилинган кундан бошлаб кучга кирди.

Давомини ўқинг

XS
SM
MD
LG