Линклар

Шошилинч хабар
15 май 2021, Тошкент вақти: 11:25

Donetsk aeroporti urush markaziga aylandi


Donetsk aeroportining bugungi ahvoli.

Rossiyaparast ayirmachilar va Ukraina hukumat kuchlari o‘zaro sulh shartlariga Ukraina sharqidagi aksar hududda amal qilmoqdalar. Ammo kunu tun ayirmachilar hujumi ostida qolib¸ hozirda haqiqiy urush manzarasi tasviriga aylangan Donetsk aeroporti bundan mustasno.

Rossiyaparast qurolli guruhlarning aeroportga qilayotgan tinimsiz xurujlarini qaytarishga urinayotgan hukumat harbiylari ham separatchilar o‘z qarorgohiga aylantirgan turar-joy hududlariga qarshi javob hujumlari uyushtirmoqda.

Donetsk markazidan atigi 10 kilometr masofada joylashgan aeroport binosi hozirga qadar vayronaga aylanib ulgurgan – uchqichlar uchib-qo‘nishini nazorat qiluvchi dispetcherlik minorasi qulab¸ uchish yo‘laklari snaryad portlashlaridan o‘yilib ketgan.

Aeroport bo‘lmay qolganiga qaramay¸ bu ob‘ektning ramziy va strategik ahamiyati bois¸ har ikkala tomon ham janglarni to‘xtatish fikridan yiroq ko‘rinadi.

- Ayirmachilar o‘zlari e‘lon qilgan mustaqil respublika ramzini saqlab qolishga urinmoqda. Mustaqil respublika bo‘lishning unsurlaridan biri esa¸ qolgan dunyo bilan aloqa qilish imkonini beruvchi aeroportdir¸ deydi rossiyalik harbiy tahlilchi Igor Sutyagin.

Ayni paytda¸ tahlilchilarga ko‘ra¸ Donetsk aeroporti harbiy ahamiyatga ham ega:

- Bevosita harbiy qimmatga kelsak¸ uchish yo‘laklari tinimsiz hujumlardan so‘ng deyarli ishdan chiqib bo‘lgan. Lekin bu yo‘laklarni tezgina ta‘mirlab¸ yana mudofaa zahiralari olib keluvchi uchqichlar uchun muhim koridorga aylantirish mumkin¸ deydi Londondagi xavfsizlik tadqiqotlari markazi xodimi Duglas Barriyer.

Ayrim kuzatuvchilar¸ rossiyaparast ayirmachilarning Donetsk aeroportini qo‘lga olish uchun jon olib jon berayotgani ortida boshqa sabablar ham borligini taxmin qilmoqda.

Ular fikricha¸ ayirmachilar Ukraina hukumat kuchlari bilan to‘qnashuvlarda ishlatish uchun qiruvchi uchqichlar kelishiga qo‘nalg‘a hozirlashga urinmoqda.

Bunday uchqichlarning Donetsk aeroportiga kelish-kelmasligi haqida qaror berish esa¸ to‘lig‘icha Kreml ixtiyorida¸ deyishmoqda ayrim tahlilchilar.

Ularga ko‘ra¸ Putin hukumati Ukraina sharqini ajratib olishga urinayotgan qurolli guruhlar ixtiyoriga qiruvchi uchqichlar berishni ehtimoldan soqit qilmayotir.

Tahlilchilar farazicha¸ Kreml yaqin o‘tmish tajribasidan kelib chiqib¸ Ukraina ichida Abxaziya¸ Janubiy Osetiya¸ Dnestrbo‘yida qilgani kabi muzlatilgan mojaro manbaini yaratishni rejalayotgan bo‘lishi mumkin.

Nomiga Ukraina tarkibiy qismi sifatida qolib¸ amalda Rossiya protektoratiga aylanadigan Donetsk xalq respublikasi kabi hududni saqlab qolish uchun Rossiyaga harbiy infrastruktura¸ xususan¸ katta aeroport kerak¸ degan fikrda Donetsk aeroporti ahamiyatini sharhlayotgan ayrim kuzatuvchilar.

Ayni paytda BMT 5 sentabr kuni Ukraina hukumati va rossiyaparast ayirmachilar o‘rtasida sulh bitimi imzolanganidan beri sharqiy hududlarda kamida 331 odamning o‘ldirilganini ma‘lum qildi.

Aprel oyida Ukraina sharqida boshlangan qurolli to‘qnashuvlar oqibatida hozirga qadar¸ BMT hisob-kitobicha¸ 3660 nafar odam o‘lgan¸ 8756 nafari jarohatlangan.

XS
SM
MD
LG