Qo‘qonning Muqimiy mahallasida yashovchi oila o‘z yaqinlari orqali Ozodlikka murojaat qilib¸ yanvar oyidan beri bedarak ketgan 28 yashar o‘g‘li Akmaljon Ne‘matovni ko‘rgan-bilganlarga murojaat qildi.
O‘zini Ne‘matovlar oilasi do‘sti deb tanishtirgan suhbatdoshga ko‘ra¸ Qo‘qon bozoridagi savdosi kasob bo‘lgach¸ ikki yilcha muqaddam Moskvaga kelgan Akmaljon¸ so‘nggi bor joriy yil yanvarida onasi tug‘ilgan kuni bilan tabriklashga telefon qilgan.
Na Moskvadagi manzili¸ na tayinli ish joyi ma‘lum Akmal¸ yaqinlariga ko‘ra¸ shundan beri aloqaga chiqmagan. U sim qoqqan so‘nggi raqamga bog‘lanish ham uning taqdiriga oydinlik kiritishga yordam bermagan.
O‘zbekistonda sudlanib¸ bir yil manzil koloniyasida jazo o‘tagan Akmaljon¸ Rossiyada ham ma‘muriy javobgarlikka tortilgan.
Yaqinlari taxminicha¸ Akmal yana Rossiya huquq tizimlari qo‘liga tushib¸ jazoga tortilgan bo‘lishi mumkin.
- Oilaning bor umidi¸ uning hayot ekanidan xabar topishdir. Qayerda bo‘lsa ham¸ sog‘ bo‘lsa¸ tirik bo‘lsa¸ bo‘ldi¸ deydi Ozodlikka bog‘langan Ne‘matovlar oilasi do‘sti.
Akmalning ichib-chekib yurgan "ko‘cha bolasi" ekanini ta‘kidlagan suhbatdosh¸ uning Rossiyadagi o‘zbek mehnat muhojirlari orasida faol bo‘lgan turli diniy-ekstremistik guruhlar safiga qo‘shilgani¸ ular safida Suriya va Iroqdagi jihodchilar oldiga ketgani ehtimolini deyarli soqit qiladi.
Ayni paytda¸ ekstremistlar uni "gunohlardan tozalanish va jannat va‘dasi bilan avragan bo‘lish" ehtimoli ham yo‘q emas¸ degan fikrda Akmalning yaqinlari.
Ozodlik Akmal Ne‘matovni tanigan-bilgan muhojirlardan uning taqdiriga oid so‘nggi ma‘lumotlarni sharh sifatida yozib qoldirish¸ yoxud OzodSkype, OzodOvoz, OzodlikOnline Skype manzillariga bog‘lanib ma‘lum qilishlarni so‘raydi.
Akmal Ne‘matovga oid uning yaqinlari so‘rovi bilan Ozodlikka bog‘langan muhojir bilan suhbatni quyida tinglashingiz mumkin: