Ozodlikka o‘z manbalaridan ma‘lum bo‘lishicha¸ Samarqand markazidagi Beruniy mahallasidagilarning ko‘pchiligi ayni kunlarda o‘z uyida yashamaydi – ularning ko‘pi Rossiya yoki boshqa xorij davlatiga ishlashga ketgan¸ qolganlari esa¸ mahallada na svet va na gaz yo‘qligi sabab¸ qishlash uchun boshqa joyda kun o‘tkazmoqda.
Ozodlik suhbatlashgan shu mahalla faollaridan biri¸ kimlardir dala hovlisiga ketib¸ o‘tin-ko‘mir yoqib qishlayotgani¸ boshqalar esa¸ gaz ta‘minoti zaif bo‘lsa-da¸ uzilmagan shaharning ko‘p qavatlik uylarida yashab¸ hovli-joyidan kunora xabar olib turishini aytadi.
- Avvaliga mahalladagi uylarga o‘g‘ri oralagani haqida xabar eshitdik. Kunduzlari borib uydan xabar olib turdik. Lekin 1 yanvar kuni borsak¸ darvozani buzmasdan¸ uyga o‘g‘ri tushganini ko‘rdik. Taxminimizcha¸ o‘g‘rilar tomdan oshib kirgan. Har bir xonaga qulf o‘rnatib¸ hammasini yopib ketgan edik. Eshiklarni buzmasdan¸ oynalarning mixchalarini olib¸ uyga kirishgan. Pul yo‘q edi¸ lekin tilla taqinchoqlar bor edi. Hamma yoqni tit-pit qilib¸ faqat tillalarni olib ketishgan. Bu bir kishining ishi emasligi shundoq ko‘rinib turibdi. Ertasiga qo‘shnining uyini ham o‘g‘ri bosdi¸ deydi Beruniy mahallasidagi tunalgan hovlilardan birida yashovchi samarqandlik.
Uyini o‘g‘ri urgan samarqandliklarning aytishicha¸ darhol militsiyaga murojaat qilishganiga qaramay¸ o‘zlarini Yangi yil archasini qo‘rish bilan band ekanini iddao qilgan ichki ishlar xodimlari¸ voqeadan uch kun o‘tib o‘g‘irlik joyiga kelgan. Kelgach¸ "sizlar o‘g‘irlik joyiga kirib¸ narsalarga tegib¸ izlarni yo‘qotibsiz¸ deb bizlarni urishdi"¸ deydi tunalgan uy egalaridan biri:
- O‘g‘rilarni topamiz¸ deyishdan boshqa gap yo‘q. Lekin o‘g‘rilik to‘xtagani yo‘q. Kecha peshinda mahallamizda yana bir xonadonni tunab ketishdi. Ularnikidan ham bir necha ming dollar¸ tillalarni olib ketishgan. Yig‘lab o‘tiribdi. Qizig‘i¸ o‘g‘rilik kuppa-kunduzi¸ uyda odam bor paytida bo‘lgan. Taxminimizcha¸ bu ishlarni biladigan odamlar qilayapti. Mahalladagilardan kimdir aralashgan bunga. O‘g‘ri tushgan 11 ta hovlining 9 tasida odam turmaydi – yo chet elda¸ yoki kvartirada sovuqdan jon saqlab o‘tiribdi. Shu odam doim turmaydigan xonadonlarga o‘g‘ri tushayotganidan¸ kimdir ularga ma‘lumot berayotganini taxmin qilayapmiz¸ deydi suhbatdosh.
Beruniy mahallasida ikki hafta ichida 11 ta o‘g‘irlik sodir bo‘lganini e‘tirof etgan shahar ichki ishlar boshqarmasidagi manba¸ har bir ish yuzasidan jinoiy ish ochilganini bildirdi. Rasmiy manbaga ko‘ra¸ hozirda o‘g‘irlikda gumonlangan bir necha kishi hibsga olingan va tergov ishlari bormoqda.
Ozodlik muxbiri suhbatlashgan samarqandliklardan biriga ko‘ra¸ bu o‘g‘irliklar haqida shahar ommaviy axborot vositalari lom-mim deb xabar bermayotganiga qaramay¸ aholi orasida tarqab bo‘lgan va jiddiy xavotir uyg‘otgan:
- Hozir uchastka nozirlari uyma-uy kirib¸ ehtiyot bo‘linglar¸ kunduzlari ham uyingizni qulflab o‘tiringlar¸ deb yuribdi. 14 yanvar kuni mahallalarda katta majlislar bo‘lib¸ ichki ishlar xodimlari vaziyat haqida aholi bilan gaplashar ekan. Hozir hamma xavotirda¸ deydi samarqandlik suhbatdosh.
Uning ta‘kidicha¸ mahalla faollari va nozirlar aholini Rossiyadan mehnat muhojirlarining ommaviy qaytayotgani jinoyatchilikning oshishiga olib kelishi haqida ochiq ogohlantirmoqda.
- Kecha biznikiga ham melisa kelib¸ Rossiyadan massoviy qaytish bo‘layapti¸ endi boxabar bo‘lib turinglar. Yaqinda katta majlis bo‘ladi¸ shu masalada¸ chiqinglar¸ deb ketdi. Gazetaga yozmasayam¸ televizorda aytmasayam¸ odamlar o‘g‘irliklar ko‘payganini eshitib bo‘ldi. Rossiyadagilarning ko‘pchiligi 15 yanvargacha qaytadi¸ deyishayapti. Ishlash tartibi o‘zgarar emish Rossiyada¸ shunga qaytisharmish. Bu yerda ish bo‘lmasa¸ bular nima qiladi. O‘zi¸ bola-chaqasi och qolsa¸ o‘g‘irlik qiladida¸ boshqa nima qilsin? Tojiklarda bir maqol bor¸ och odam sherdan ham qo‘rqmaydi¸ degan. Bularga ish topib bermasa¸ boshqa nima qiladi¸ deydi samarqandlik suhbatdosh.
Beruniy mahallasida yashovchi Ozodlik manbasi¸ militsiya xodimlarining bu o‘g‘irliklarga loqaydlik bilan qarayotgani va aholi mulkini himoyalash bo‘yicha deyarli hech narsa ish qilmayotganidan hafsalasi pir bo‘lgan mahalladoshlari¸ tunlari uxlamay¸ qo‘riqchilik qilishga kirishganini bildirdi.