AQShda yashayotgan, shu mamlakatdagi moliya-kredit muassasalaridan birida xizmat qilayotgan moliyaviy masalalar bo‘yicha tahlilchi Farhod Inog‘omboev Ozodlik bilan suhbatda Respublikachi nomzod Donald Trampnining boshqa davlatlardan musulmonlarni Qo‘shma Shtatlarga kirishini taqiqlash g‘oyasiga qo‘shilmasligi, bir-ikki buzg‘unchi deb butun millatni “terrorchi” deyish noto‘g‘ri ekanini ta’kidladi.
4 avgust kuni AQShning Portland shahrida o‘z tarafdorlarining namoyishida janob Tramp boshqa davlatlardan musulmonlarni Qo‘shma Shtatlarga kirishini taqiqlash g‘oyasini yana bir marta ilgari surgan edi.
Jumladan, respublikachi nomzod Tramp o‘z chiqishida O‘zbekistonni "terrorchi davlat"lar qatorida tilga olar ekan AQShning Aydaxo shtatida terrorchilikni qo‘llaganlikda ayblanib, 25 yilga qamalgan o‘zbekistonlik Fazliddin Qurbonov bilan bog‘liq voqeani esladi.
- “Yubek”, bu nimaligini bilasizlarmi? O‘zbek muhojiri. Qarang, Aydahoda yashovchi o‘zbek muhojiri terrorchi tashkilotni dastaklaganlikda ayblandi. U yuz minglab muhojirlarga terrorchilikdan saboq berganlikda ayblandi va qo‘lga olindi. Bundaylar dunyoning eng xavfli joylaridan kelyapti. Qarang, o‘zbek muhojiri odamlarni terrorchilikka yollab, ularga bombani qanday yasashni o‘rgatyapti, zo‘r-a. Men bundaylarni mamlakatimizda istamayman, - dedi Tramp.
Tahlilchi Farhod Inog‘omboev Ozodlik bilan suhbatda bunday gaplarni aytayotgan shaxsning AQShga prezident bo‘lishi xavfli ekanini ta’kidladi.
