Линклар

Шошилинч хабар
28 июн 2022, Тошкент вақти: 13:51

Халқаро хабарлар

Европа Кенгаши Британиянинг иттифоқдан чиқиши бўйича жараён бошланганини маълум қилди

Дональд Туск Британия бош вазиридан олинган мактубни намойиш этмоқда. Брюссел, 2017 йилнинг 29 марти.

Европа кенгаши президенти Дональд Туск 29 март куни Британия бош вазири Тереза Мэйнинг Бирлашган Қироллик Европа иттифоқидан чиқиш жараёнини бошлаши тўғрисидаги мактубини қабул қилиб олганини расман тасдиқлади.

-Британия бош вазири Тереза Мэйнинг мактуби 6 саҳифадан иборат. Бу мактуб Бирлашган Қироллик Европа иттифоқидан чиқиш бўйича расмий музокараларни бошлаганини англатади, - деди Дональд Туск.

2016 йил июнида Британияда ўтган референдумда овоз берувчиларнинг асосий қисми Европа Иттифоқидан чиқиш ташаббусини қўллаб қувватлаган эди.

2017 йил мартида Британия парламенти вазирлар маҳкамасига европа Иттифоқидан чиқиш бўйича жараённи бошлаш ҳуқуқини берувчи қонунни қабул қилган.

Британиянинг Европа Иттифоқидан чиқиш и бўйича музокаралар 2 йил давом этади.

Кун янгиликлари

АҚШ баскетбол юлдузи Гринер Россияда 10 йилга қамалиши мумкин

Москва вилоятидаги Химки шаҳар суди АҚШ баскетбол юлдузи Бритни Гринер ишини кўриб чиқиш 1 июлдан бошланишини маълум қилди. Икки марта олимпиада чемпиони бўлган Бритни Гринер Россияда наркотикларни ноқонуний сақлаш ва контрабанда қилишда айбланмоқда. Мазкур айблов билан у 10 йилгача қамалиши мумкин.

Бритни Гринер жорий йил февралида Москвага келганида Шереметьево аэропортида божхоначилар унинг багажидан таркибида кўкнори мойи бўлган электрон сигаретлар катрижи топилганини билдирганди.

У Россия Украинага бостириб кирган 24 февраль куни қўлга олинган эди. Унга нисбатан қамоқда сақлаш эҳтиёт чораси қўлланилган.

Гринернинг қамоққа олиниши ортидан матбуотда турли таҳминлар пайдо бўлди. Баъзи таҳминларга қараганда, Москва Гринерни АҚШда қамоқда сақланаётган айрим маҳбусларга алмаштиришни режалаштираётган бўлиши эҳтимол. Масалан, апрель ойида Россия АҚШ собиқ ҳарбийси Тревор Ридни наркотик савдосига алоқадорликда гумонланиб АҚШда қамоқда сақланаётган рус учувчисига алмаштирган.

Айни пайтда Россияда АҚШ собиқ ҳарбийси Пол Уилан жосусликда айбланиб қамоқда сақланмоқда. Вашингтон Уланга Москва томонидан қўйилган айблов асоссиз эканини билдирган.

НАТО Европадаги тезкор кучлари сони кескин оширилишини маълум қилди

Йенс Столтенберг

НАТО мамлакатлари ташкилотнинг шарқий қанотидаги қўшинлари миқдорини кескин оширишни режаламоқда. Шимолий Атлантика альянси бош котиби Йенс Столтенберг 27 июнь куни Брюсселда ўтказилган матбуот анжуманида ана шундай баёнот берди.

Столтенбергга кўра, НАТО шарқий чегараларидаги ҳарбийлари сонини ҳозирги 40 мингдан 300 минг нафаргача кўпайтиради. Европадаги айрим ҳарбий тузилмалар кенгайтирилиб, бир неча минг аскарга эга жанговар бўлинмалар – бригадаларга айлантирилиши мумкин. Мазкур қарор Европа хавфсизлигига Россия тарафидан бўлаётган таҳдидларга бевосита боғлиқдир.

“Аминманки, Москва ҳамда шахсан президент Путин бизда коллектив хавфсизлик кафолатлари мавжудлигини билишади, НАТОга аъзо мамлакатга ҳужум қилиш оқибатларини яхши тушунишади. Бир мамлакатга ҳужум бўлган тақдирда бутун альянс жавоб чораларини кўради. Биз йўлланажак мужданинг жиддийлигини урғулаш мақсадида шарқий ҳудудлардаги аскарларимиз сонини оширяпмиз”, деган НАТО бош котиби.

Янги стратегия концепцияси НАТОнинг 28 июнь куни Мадридда очилажак саммитида муҳокама қилинади. Ушбу чоралар қабул қилинган тақдирда НАТОнинг Европадаги ҳарбий қудрати Совуқ уруш давридан бери энг юқори даражага етади.

НАТОнинг тезкор кучлари ерусти, ҳаво ҳамда денгиз қўшинларини ўз ичига олади. Россия 2014 йилда Қримни аннексия қилганидан сўнг Европада улар сони маҳаллий армияларнинг аскар ва зобитлари билан бирга 13 мингдан 40 минг нафарга етказилган эди. Россия Украинага қарши кенг кўламли уруш бошлаганидан сўнг кўплаб бўлинмалар илк бор жанговар шайлик ҳолатига келтирилган. НАТО жанговар гуруҳлари ҳозирда Эстония, Литва, Латвия ҳамда Польшада мавжуд. Уларни, шунингдек, Болгария, Венгрия, Руминия ва Словакияга ҳам жойлаштириш режаланган.

Би-би-си ҳарбий таҳлилчиси Жонатан Бил қайдича, тезкор кучларга мансуб бўлинмаларни 15 дақиқа ичида жанговар шай ҳолатга келтириш мумкин.

Литва муассасалари Россия тарафидан ялпи киберҳужумга учради

Литвадаги давлат муассасалари ва хусусий ташкилотлар 27 июнь куни киберҳужумлардан зарар кўрган. Бу ҳақда Литва Киберхавфсизлик миллий маркази баёнот берди.

Марказ қайдича, хусусан, Давлат солиқ инспекцияси, Миграция департаменти, шунингдек транспорт ширкатлари ва бир неча ОАВ сайтлари ишламаган.

Киберхавфсизлик миллий маркази директори Йонас Скардинскасга кўра, ҳужумлар Россиядан туриб амалга оширилган. Ҳужумлар учун масъулиятни кремлпараст Killnet ҳакерлар гуруҳи ўз зиммасига олган. Гуруҳ ўз телеграм-каналида эълон қилган видеода Литвадан “Калининградни қамалдан чиқариш”ни талаб қилган, акс ҳолда эса ҳужумлар давом этажаги ҳақида огоҳлантирган.

Йонас Скардинскас катта эҳтимол билан яқин кунларда мамлакатнинг транспорт, энергетика ва молия тармоқларига оид сайтларга ҳужумлар уюштирилади, деган фикрда.

Ҳакерлар “Калининград қамали” деганда Литва санкция остига тушган юклар ортилмиш Россия юк поездларини ўз ҳудуди орқали Калининград вилоятига ўтказишдан бош тортаётганини назарда тутишган. Литва орқали Калининградга ташиш тақиқланган юклар орасида кўмир, металл, цемент, ёғоч ва юқори технологик буюмлар мавжуд.

Литванинг LTG темир йўл ширкати вакили Мантас Дубаукас ўз ширкати Европа Иттифоқининг Россияга қарши июнь ойи ўрталаридан тўлиқ кучга кирган санкцияларига риоя этажагини таъкидлаган. Москва гап импорт ҳақида эмас, балки Россиянинг бир ҳудудидан бошқа ҳудудига юкларни транзит қилиш ҳақида бораётганини эслатиб, Литва қарорига қатъий қарши чиққан ва қаттиққўллик билан жавоб чораларини кўришни ваъда қилган.

Москвада мухолифатчи Илья Яшин қўлга олинди

Илья Яшин (архив сурати)

Россия пойтахти Москвада мухолифатдаги сиёсатчи Илья Яшин тутиб кетилди. Бу ҳақда журналист Ирина Баблоян ўз Телеграм-каналида маълум қилди. Баблоян мухолифатчи ўзи билан паркда айланиб юрган жойидан полициячилар томонидан ҳеч бир изоҳсиз олиб кетилганинин қайд этган.

Мазкур маълумотни “ОВД-Инфо” лойиҳасига Яшиннинг дўсти ҳам тасдиқлаган. Унга кўра, сиёсатчи Лужникидаги полиция бўлимига олиб кетилган.

Май ойида Москвадаги туман судларидан бири Яшинга Россия Қуролли кучларини “обрўсизлантирганлик”ка оид иш бўйича 90 минг рубль (1600 АҚШ доллари) миқдорида жарима тайин қилган эди. Ўшанда у ўз телеграм-каналида, жумладан, америкалик хиппилар Вьетнамдаги урушга қарши норозилик билдираётган фотосурат илова қилинмиш постни ёйинлаганликда айбдор деб топилган эди.

Путин Тожикистон ва Туркманистонга расмий сафар билан боради

Владимир Путин ва Эмомали Раҳмон.

Россия президенти Владимир Путин Украина уруши бошланганидан бери илк маротаба хорижга сафар қилади, деб хабар берди Reuters агентлиги ўз манбасига таянган ҳолда. Хабарда билдирилишича, Путиннинг жорий ҳафтада Тожикистон ва Туркманистонга расмий сафар билан бориши кутилмоқда.

Душанбеда Путин Тожикистон президенти Эмомали Раҳмон билан музокаралар ўтказади. Шундан сўнг Путин Ашхободда Озарбайжон, Қозоғистон, Эрон ва Туркманистон лидерлари билан Каспий бўйи давлатлари саммитида иштирок этади.

Кремль матбуот котиби Дмитрий Песков мазкур учрашувларда қандай масалалар муҳокама этилиши тўғрисидаги саволларга жавоб бермади.

Бунгача Путин июнь ойи охирларида Беларусга сафар қилиши хабар қилинганди. Бироқ кейинроқ Беларус ва Россия президентлари ўртасидаги учрашув онлайн тарзда ўтказилиши маълум қилинди.

Россия Украинага бостириб кирганидан сўнг қатор давлатлар, жумладан, АҚШ ва Канада Путинга ўз ҳудудига киришни тақиқлаган эди.

БМТ: Афғонистондаги зилзила оқибатида 155 бола ҳалок бўлди

Толибон ҳукумати зилзиладан 1150 киши ўлганини билдирган.

Афғонистондаги зилзила оқибатида 155 бола қурбон бўлди, 255 бола жароҳатланди. Бу ҳақда Бирлашган Миллатлар ташкилотининг гуманитар мувофиқлаштириш агентлиги 26 июнь куни маълум қилди.

Толибон ҳукумати Афғонистоннинг Пактика ва Хўст вилоятларида 22 июнга ўтар кечаси юз берган зилзилада 1150 киши ҳалок бўлгани ва 1600 га яқин киши жароҳатланганини билдирган эди. БМТ ҳисоб-китобича ер қимирлашидан қурбон бўлганлар сони 770 кишидир. Бу рақам яна кўпайиши мумкин.

БМТнинг таъкидлашича энг кўп бола Пактика вилоятининг Ғивон туманида нобуд бўлди. Бундан ташқари бу ерда 65 бола ота-онасидан ажраб қолган.

БМТнинг Афғонистондаги ходимлари зилзиладан кейинги бошоломонда ота-онасини йўқотган болаларга яқинларини топишда кўмак кўрсатмоқда.

Жанубий Африка полицияси 21 ўсмирнинг оммабоп барда сирли тарзда ўлганини тергов қилмоқда

Ос-Лонден шаҳридаги барлардан бирида ҳалок бўлган ўсмирларнинг 13 нафари ўғил, 8 нафари қиз бола.

Жанубий Африка полицияси Ос-Лонден шаҳридаги барлардан бирида 21 кишининг сирли тарзда ҳалок бўлганини тергов қилмоқда. Барда ҳалок бўлганларнинг барчаси ўсмирлардир.

Генерал Тембинкоси Кинана 26 июнь куни бар мижозлари ўлимига нима сабаб бўлганини айтишга эрталигини, ҳозирда ўлим сабаблари аниқланаётганини билдирди. Генералга кўра, ўсмирлар мазкур барда мактабни битириш оқшомини ўтказаётган эдилар.

Ҳалок бўлганларнинг танасида жароҳат излари топилмаган. Уларнинг жасадлари столда, стулда, ерда ётган ҳолатда топилган. Ўлимларга заҳарланиш сабаб бўлиши мумкинлиги ҳам таҳмин қилинмоқда.

Ҳукумат расмийларига кўра, ҳалок бўлганлардан 13 нафари ўғил, 8 нафари қиз боладир. Улардан 17 нафари барда, уч нафари эса касалхонада ўлган.

Норвегияда 25 июндаги террор қурбонлари хотирланди

Норвегияда террор қурбонларини хотирлаш куни.

Норвегия пойтахти Ослода 26 июнда бир кун аввал содир этилган террор қурбонлари хотирланди. Ослонинг учта жойида, жумладан, гей барда 25 июнь куни кечқурун террорчилар отган ўқдан икки киши ҳалок бўлди ва 21 киши яраланди.

Осло черковида бўлиб ўтган хотирлаш маросимида Норвегия валиаҳд маликаси Метте-Марит ва бош вазир Йонас Гар Стёре иштирок этди. Черков меҳробига камалакранг мато тўшалди. Норвегия протестант черкови «бутун мамлакат мотамда» деб эълон қилди.

Бош вазир Стёре ўз нутқи давомида «тунги отишма гей параддан сўнг бўлиб ўтди, аммо бу воқеа бизни дискриминацияга, бидьат хурофотларга қарши курашдан ва бу курашни янада кучайтиришдан тўхтатиб қололмайди», деб айтди.

25 июнда Осло кўчаларида ўқ отган шахс кўп ўтмай полиция томонидан қўлга олинди. У келиб чиқиши эронлик бўлган 42 ёшли норвегиялик экани билдирилди.

Истанбулдаги гей парадда камида 200 киши қўлга олинди

Истанбул. Гей парад иштирокчилари қўлга олинаётган пайт.

Истанбул полицияси 26 июнь куни рухсат берилмаган гей парад иштирокчиларини тарқатиб юборди ва камида 200 кишини қўлга олди. Истанбул ҳокимияти Тақсим майдонида гей парад ўтказишни тақиқлаганига қарамай, бу ерга камалакранг байроқларни кўтарган юзлаб киши йиғилган эди.

Гей парад ташкилотчилари полиция камида 200 кишини қўлга олганини таъкидлар экан, уларнинг олдига адвокатлар киритилмаётганини билдирди. Айрим қўлга олинганлар бир неча соат полицияда ушлаб турилгач, уйларига қўйиб юборилган.

Туркия журналистлар иттифоқининг маълум қилишича, қўлга олинганлардан кўпчилиги полиция томонидан калтакланган. Истанбул ҳокимияти ҳам, полиция ҳам қўлга олинганлар бўйича бирорта маълумот бермади.

Европа Кенгашининг инсон ҳуқуқлари бўйича комиссари Дунья Миятович 24 июнь куни Туркия ҳукуматини гей парадга рухсат бериш ва унинг хавфсизлигини таъминлашга чақирган эди.

Туркияда 2003 йилдан бошлаб гей парадлар ўтказишга рухсат берилган. Бироқ 2015 йилдан бошлаб хавфсизлик нуқтаи назаридан гей парадлар ўтказиш тўхтатиб қўйилган.

The Sunday Times: Шаҳзода Чарльз Қатар шайхидан бир неча миллион еврони қабул қилиб олган

Шаҳзода Чарльз.

Британия шаҳзодаси Чарльз 2011 йилдан 2015 йилгача Қатар шайхи Ҳамад бин Жассим ал Танийдан уч миллион евро миқдоридаги нақд пулни қабул қилиб олган. Бу ҳақда The Sunday Times маълум қилди.

Нашрнинг ёзишича, бу маблағ шаҳзода Чарльзнинг меҳр-мурувват фондига ўтказиб берилган. Бу пулни санаш жараёнида иштирок этган шаҳзода Чарльзнинг ёрдамчиларидан бири, Қатар шайхидан хайр-эҳсонни қабул қилиш пайтида ходимлар жуда ўнғайсиз аҳволда қолганларини айтиб берди. Кейинроқ шайхнинг вакилларидан шаҳзода Чарльзга тўғридан-тўғри нақд пул бермаслик илтимос қилинган.

The Sunday Times бу тўлов ноқонуний бўлгани тўғрисида шубҳалар мавжуд эмаслигини билдирган. Бироқ қирол оиласи аъзоларига нақд пул қабул қилиб олиш тақиқланади. Қирол оиласи фондларига бериладиган хайр-эҳсон эса чек сифатида тақдим этилиши лозим.

Февраль ойида Британия полицияси шаҳзода Чарльзнинг фондини текшира бошлаган эди. Бунга фонд Саудия Арабистони ватандошига Британия паспортини олишга кўмаклашгани тўғрисидаги хабарлар сабаб бўлганди. Фонд ходимлари бу воқеага шаҳзода Чарльз алоқадор эмаслигини билдирганлар.

Қирғизистондан Қозоғистонга ноқонуний йўл билан 30 тонна шакар олиб ўтмоқчи бўлган ҳайдовчи ушланди

Иллюстратив сурат

Қирғиз-қозоқ чегарасидаги “Чўнг-Қапқа” назорат-ўтказиш пунктида 25 июнь куни 30 тонна шакарни Қозоғистонга ноқонуний равишда олиб ўтиб кетмоқчи бўлган юк машинаси ҳайдовчиси қўлга олинган. Бу ҳақда Озодликнинг қирғиз хизмати Қирғизистон Миллий хавфсизлик давлат қўмитаси Чегара хизматидан олинган маълумотга таянган ҳолда хабар қилди. Қирғизистон Вазирлар маҳкамаси ўтган ой охирида шакар экспортига вақтинча тақиқ жорий этган эди.

Чегара хизмати қайдича, 38 ёшли қозоғистонлик А. К. бошқарувидаги КамАЗ автомашинасини текширувдан ўтказиш чоғида юкхонадан мамлакатлар олиб чиқилиши маҳсулот топишган. Контрабанда моли селитрали қоплар ортига яшириб қўйилгани айтилмоқда. Юкка оид ҳужжатларда ҳайдовчи ўғит олиб кетаётгани қайд қилинган. Хабарномада ҳайдовчи ва юк текширувни давом эттириш учун “салоҳиятли идоралар ходимларига топширилган”и айтилган.

Қирғизистонда шу йил 1 июнидан эътиборан олти ойга мамлакатдан шакар экспорт қилишга тақиқ қўйилган. Ҳукумат мазкур тақиқни мамлакатда озиқ-овқат хавфсизлигини таъминлаш ва бозорда шакар нархини тутиб туриш истаги билан изоҳлаган.

Қирғизистонда шакарга бўлган талаб май ойи охирида кескин ошиб кетган, ўшанда савдогарлар мазкур маҳсулот Қозоғистонга олиб чиқиб кетилаётганини айтишган. Ўша пайтда мамлакатдаги йирик савдо тармоқлари шакарга белгиланган имтиёзли нархни кўтариб қўйишган.

Қозоғистон ҳам 23 майдан бошлаб шакар экспортини ярим йилга тақиқлаб қўйган.

G7 лидерлари Хитой билан рақобат ва Украинага ёрдам масалаларини муҳокама қилишди

G7 лидерлари учрашувидан лавҳа, Бавария (Германия), 2022 йил 26 июни

Инфляция ошиши ва иқтисодий ўсиш секинлашуви манзарасида юзага келаётган глобал инқироз “Катта еттилик” (G7) давлатлари лидерларининг барчасини бирдек ташвишга солмоқда. Бу ҳақда Германия канцлер Олаф Шольц 26 июнь куни G7 саммити доирасидаги жаҳон иқтисодиётига бағишланган сессиядан кейин маълум қилди.

“Катта еттилик” мамлакатлари Хитойнинг кўп триллионли “Бир макон, бир йўл” лойиҳасига қарши туришга қаратилган ташаббус доирасида ривожланаётган мамлакатлар инфратузилмасини ривожлантиришга 2027 йилгача 600 миллиард доллар жалб қилиш ниятидалар. Бунинг 200 миллиарди АҚШ томонидан жалб қилинади.

Оқ уй сайтида ёйинланган меморандумда АҚШ президенти Жо Байден ва G7 мамлакатларининг бошқа лидерлари ривожланаётган давлатлар инфратузилмасидаги камчиликларни бартараф этиш, жаҳон иқтисодиёти ва товар етказиб бериш занжирини мустаҳкамлаш ҳамда миллий хавфсизлик соҳасида Вашингтон манфаатларини олға суришга қаратилган расмий ҳамкорликни йўлга қўяётганлари айтилган.

Бунда молиявий маблағлар иқлим ва энергия хавфсизлиги, рақамли алоқа, соғлиқни сақлаш ва гендер тенглиги каби соҳаларга йўналтирилади.

Учрашув чоғида Шольц ва Байден Украинага ҳарбий ёрдам кўрсатишни давом эттириш юзасидан келишувга эришганлар. Bloomberg агентлигининг ёзишича, G7 декларацияси лойиҳасида “Катта еттилик” лидерлари ҳарбий, гуманитар, дипломатик соҳаларда Украинага “қанча лозим бўлса, шунча” кўмак кўрсатишлари қайд этилган.

Германия Бавариясидаги Эльмау саройида 26 июнь куни бошланган G7 саммити 28 июнгача бўлиб ўтиши айтилган. “Катта еттилик”ка Буюк Британия, Германия, Италия, Канада, Франция, Япония ва АҚШ каби мамлакатлар киради. Бу йилги тадбирга Индонезия ва Ҳиндистон вакиллари ҳам таклиф этилган.

Анқара вакили: Туркия ўз иқтисодиётига зарар етказмаслик учун Россияга қарши санкция жорий этмаяпти

Иброҳим Қалин

Россияга қарши санкциялар жорий этиш Россиядан кўра, Туркия иқтисодиётига кўпроқ зарар беради. Бу ҳақда Туркия президенти вакили Иброҳим Қалин билдирди.

Анқара ўз манфаатларини ҳимоя қилмоқда, шунинг учун ҳам Украинага босқиндан кейин кўп мамлакатлар томонидан Россияга қарши жорий этилган санкцияларга қўшилган эмас. Қалинга кўра, Ғарб бу позицияни тушуниш билан қабул қилган.

Анқара вакили Туркия хориждан келадиган энергия манбаларига қарам эканини, шунинг учун ҳам “худди Эрон билан бўлгани каби Россия билан ҳам муносабатларни ривожлантираётгани”ни урғулаган.

Россия қўшинлари Украинага бостириб кириши ортидан Ғарб мамлакатлари Москвага қарши олтита санкция пакетини киритган. Айрим мамлакатлар бошқа маҳсулотлар қаторида Россиянинг энергия захираларига ҳам эмбарго жорий этишган.

Яқин орада Россиядан олтин импорт қилишга ҳам тақиқ жорий этилиши кутилмоқда. Британия бош вазири Борис Жонсонга кўра, бу тақиқ зарбаси сўнгги пайтларда ўз активларини олтинга ўтказаётган россиялик олигархлар ва “Путиннинг ҳарбий машинаси”га қарши қаратилган.

Тожикистонда болаларга жинсий зўравонлик қилганлик учун жазо кучайтирилди

Иллюстратив сурат.

Тожикистон парламенти қуйи палатаси Жиноят Кодексига вояга етмаган болаларга жинсий зўравонлик қилганлик учун жазо муддатини кучайтириш тўғрисида киритилган ўзгартишни тасдиқлади.

Бундан буён педофиллар 25 йилгача қамоқ жазосига ҳукм қилиниши мумкин. Аввал жазо муддати 7 йилдан 20 йилгача эди. Бундан ташқари, мазкур айблов асосида қамалганлар жазо муддатини ўтаб чиққанидан сўнг ўқитувчилик, болалар шифокори, болаларни ижтимоий ҳимоя қилиш, болалар спорти ва болалар санъати соҳаларида фаолият юритиши тақиқланади.

Тожикистонда болаларга жинсий зўравонлик қилганларга нисбатан жазони кучайтириш талаби кўп йиллардан бери жамоатчилик томонидан айтилиб келинган. Сўнгги марта фуқаролик жамияти бу талабни 8 ёшли Руфайда Иноятова ўлдирилганида кун тартибига чиқарган эди.

Руфайда Иноятова 2021 йилнинг 4 июлида Рудаки тумани Навобод қишлоғида ўлдириб кетилган эди. Унинг ўлимида айбланган 30 ёшли Рахматулло Гадоев 2021 йил октябрида умрбод қамоққа ҳукм қилинган.

Тожикистон омбудсмени идорасининг билдиришича, 2019-2021 йиллар давомида 45 болага нисбатан жинсий зўравонлик ҳолатлари аниқланган.

Польшада ҳосилни йиғиб олиш учун украинлар ўрнига ўзбекларни жалб қилиш таклиф этилди

Польша парламенти депутати ва маҳаллий боғдорчилик ассоциацияси президенти Мирослав Малишевский етиштирилган ҳосилни йиғиб олиш учун украинлар ўрнига ўзбек мигрантларини жалб қилишни таклиф этмоқда. Бу ҳақда Wiadomosci ze swiata нашри хабар берди.

Нашрнинг ёзишича, Украинадан ҳарбий хизмат ўташи мумкин бўлган ёшдаги шахсларнинг четга чиқарилмаётгани ортидан ҳосил йиғим-теримида ишчи кучи етишмаяпти. Бунинг ортидан ҳосил нобуд бўлмоқда.

“Ишчилар етишмаяпти. Энг аввало юк машинаси ва трактор ҳайдаш, ўғит сочиш каби оғир ишларни ўз зиммасига оладиган эркаклар етишмаяпти”,-деди депутат.

Унга кўра, кўпчилик фермерлар мева-чевалар чириб кетаётганидан, истеъмолчилар эса нархнинг қимматлаётганидан шикоят қилмоқдалар. Шунинг учун поляклар ўзбекистонлик мигрантларни ишга жалб қилиш масаласини ўрганмоқда.

“Бугунги кунда тўрт миллиондан ортиқ ўзбек Россиядаги инқироз оқибатида ватанига қайтди. Улар ҳозир ишсиз ва Польшага келишга тайёр”, -деди Мирослав Малишевский.

Давомини ўқинг

XS
SM
MD
LG