Линклар

Шошилинч хабар
10 август 2020, Тошкент вақти: 06:27

Ўзбекистон хабарлари

Ravon бренди остида ишлаб чиқарилаётган автомобиллар қатори кўпайтирилади

Ravon 4 автомашинаси.

Яқин кунларда Ўзбекистонда Ravon бренди остида ишлаб чиқарилаётган автомобиллар қатори кўпайтирилади.

Бу борада ширкат раҳбари Шароф Ашуровга таянган ҳолда Россия матбуоти 2 апрель куни хабар тарқатди.

Хабарда айтилишича, С-классдаги Chevrolet Cruze тез орада жамоатчиликка тақдим этилади.

Мазкур русмдаги автомобилнинг иккинчи модели АҚШда ишлаб чиқарилмоқда. Шунинг учун бу автомобилнинг биринчи моделини ишлаб чиқариш Ўзбекистонда давом эттирилади.

Бундан ташқари яқин келажакда Ўзбекистонда Chevrolet Tracker кроссоверларини ишлаб чиқариш йўлга қўйилиши режаланмоқда.

Дастлабки маълумотларга қараганда, 1,8 литр ҳажмга эга бўлган мазкур кроссовер 140 от кучига эга бўлади.

Кун янгиликлари

Тошкент шаҳар ҳокими пойтахтнинг тўртта туман ҳокимини жазолади, улар орасида шаҳарнинг собиқ ҳокими ҳам бор

Тошкент шаҳар ҳокими Жаҳонгир Ортиқхўжаев 8 август куни имзолаган қарорига кўра, шаҳарнинг Мирзо Улуғбек (Ш. Иргашев), Учтепа (Ф. Абдуллаев), Чилонзор (С. Маҳаметов), Яшнобод (Х. Тиллашайхов) туманлари ҳокимларига "ҳайфсан" интизомий жазосини берган.

Бу ҳақда хабар қилган Хабар.уз сайтига кўра, Ортиқхўжаев ҳокимларни пандемия даврида аҳоли томонидан кўплаб эътирозлар билдирилаётгани ҳамда белгиланган топшириқлар ижросини таъминлашда сусткашликка йўл қўйгани учун жазога тортган.

Интизомий жазога тортилганлар орасида пойтахтнинг собиқ ҳокими, ҳозирда Юнусобод тумани ҳокими бўлиб ишлаётган Р. Усмонов ҳам бор.

Ўзбекистонда коронавирусга чалинганлар сони 30197 кишига етди

Ўзбекистон Соғлиқни сақлаш вазирлиги хабарига кўра, 9 август соат 10:00 ҳолатига кўра коронавирус инфекциясини юқтириб олганлар сони расман 30 197 кишига етган. Сўнгги 11 соат ичида 279 та янги касалланиш ҳолати қайд этилган.

ССВга кўра, янги касалланиш ҳолатларининг 142 таси Тошкент шаҳрида, 133 таси Тошкент вилоятида ва 4 таси Қорақалпоғистонда қайд этилган.

"Шу билан бирга, Шайхонтоҳур туманида яшаган 84 ёшли Қ.Я. (эркак) ҳамда Зангиота туманида яшаган 62 ёшли С.Т. (эркак), жами 2 нафар коронавирусга чалинган бемор вафот этди", — дейилади ССВ ахборотида; шу тариқаси, ССВ ҳисоби бўйича Ўзбекистонда коронавирус инфекцияси асоратлари оқибатида вафот этганлар сони 190 нафарга етди.

9 август соат 10:00 ҳолатига кўра Ўзбекистонда коронавирусга чалинган 21 316 киши (жами касалланганларнинг 71 фоизи) соғайган. Айни вақтда 8 691 бемор даволанишни давом эттирмоқда — 1248 нафар беморнинг аҳволи оғир, шундан 274 нафарининг аҳволи эса ўта оғир деб баҳоланмоқда.

Сўх туманига авиақатнов йўлга қўйилади

Фарғона вилоятининг эксклав Сўх тумани

Ўзбекистонни Қирғизистон ҳудудидаги эксклави Фарғона вилоят, Сўх туманига авиақатновлар йўлга қўйилади.

Бу ҳақда хабар берган Кун.уз сайтига кўра, президент қарори билан бир ой муддатда Сўх туманида самолёт ва вертолётлар учун учиш-қўниш майдонини ташкил этиш вазифаси юклатилган.

Ўзбекистон президенти "2020-2021 йилларда Фарғона вилоятининг Сўх туманини комплекс ижтимоий-иқтисодий ривожлантириш чора-тадбирлари" тўғрисидагиқарорида Транспорт вазирлигига Қирғизистон Республикаси ҳаво ҳудудидан фойдаланиш масаласи тўлиқ ҳал этилгандан кейин бир ҳафта муддатда Фарғона шаҳридан Сўх туманига кичик авиация транспорти орқали аҳолига мақбул нархларда қатновлар йўлга қўйилишини таъминлаши ҳақида ёзилган эди.

Молия вазирлиги Фарғона шаҳридан Сўх туманига кичик авиация транспорти қатнови бўйича кўрилган зарарларни қоплаш учун компенсация тўловларини жорий йилда Вазирлар Маҳкамасининг захира жамғармасидан қопланишини ва келгуси йилларда Давлат бюджети параметрларида назарда тутилишини таъминлайди.

Ўзбекистонга қарашли Сўх тумани Қирғизистон ҳудудидаги эксклав бўлиб ҳисобланади. 2013 йили қирғиз-ўзбек чегарасидаги можародан кейин Сўх-Риштон йўли ёпиб қўйилган. 2019 йилда бу йўл 2 кунга очилиб, кейин яна ёпилган.

Талабанинг контракт тўлови миқдори ўзгармайди

8 август куни АОКАда бўлиб ўтган йиғилишда Олий ва ўрта-махсус таълим вазири Иномжон Мажидов 2020-2021 ўқув йилида талабаларнинг контракт тўлови ўзгаришсиз қолишини билдирди:

“2020-2021-ўқув йилида контракт тўлови миқдори ўзгаришсиз қолади, оширилмайди, камайтирилмайди. Қўшимча қилиш керакки, пандемия шароитида иккинчи ва ундан юқори курслар сентябрдан бошлаб масофадан таҳсил олишни бошлайдилар. Кириш имтиҳонлари сентябрда бўлиб ўтишини ҳисобга олсак, биринчи курс талабалари учун ўқув машғулотлари октябрдан бошланади".

Бундан аввал юзлаб ўзбекистонлик талабалар Телеграм ижтимоий тармоғидаги "Талабалар ҳаракати" саҳифасида контрак тўловлари қимматлиги ва уни камайтиришни сўраб Олий таълим вазирлигига мурожаат қилган эди.

Вазирлик пандемия муддатлари узайтирилиб, ўқиш онлайн тарзда давом эттирилган ҳолатда ҳам, тўлов-шартнома асосида таҳсил оладиган талабалар ва уларнинг ота-оналари хавотирланишга ҳеч қандай асос йўқлиги ҳақида изоҳ берган.

Ўзбекистонликларни Россиядан олиб келиш учун махсус поезд йўлга чиқди

Россия-Қозоғистон чегарасида қулбола чодирлар тикиб, ва оғир шароитда кун кечираётган ўзбек мигарнтлари ҳаётлари Россия, Қозоғистондаги қатор етакчи интернет нашрлари томонидан ёритилганди.

"Ўзбекистон темир йўллари" ўзининг навбатдаги йўловчи поезди ўзбекистонликларни Россиянинг Ростов вилоятидан олиб келишга Тошкентдан жўнаб кетганини маълум қилди.

Россия-Қозоғистон чегарасида қулбола чодирлар тикиб, ва оғир шароитда кун кечираётган ўзбек мигарнтлари ҳаётлари Россия, Қозоғистондаги қатор етакчи интернет нашрлари томонидан ёритилганди.

"Ўзбекистон темир йўллари" маълумотига кўра, Гниловская – Тошкент йўналишидаги поезд 918 нафар йўловчи билан 10 август куни йўлга чиқади. Ушбу йўловчи поездида оғир касалланганлар ва уларга ҳамроҳлик қилувчилар учун махсус жойлар ажратилган.

Мазкур рейс чипталари фақат Ўзбекистон Республикаси фуқаролари учун сотилмоқда. Йўналишдаги чипта нархи 2.079.700 сўм (14.855 рубль)ни ташкил этади. Йўл давомида йўловчи поездлар фақат техник кўрик учун тўхтатилади, яъни станция-вокзалларда йўловчиларнинг платформага тушишига рухсат этилмайди.

Поездлар Ўзбекистон Миллий гвардияси, Ички ишлар вазирлиги ва Соғлиқни сақлаш вазирлиги ходимлари кузатуви остида олиб келинади.

Қайд этилишича, ушбу рейсларда олиб келинган йўловчилар поездлардан тушиши биланоқ Наманган ва Тошкент вилоятларининг карантин зоналарига юборилади. Айнан шу жиҳатни инобатга олган ҳолда йўловчиларнинг қариндош ва яқинларидан уларни кутиб олиш мақсадида вокзалга ташриф буюрмасликлар сўралган.

Бош вазир моддий ёрдам пулларини тарқатишдаги камчиликлар учун маҳалла раисларини танқид қилди

Ўзбекистон бош вазири Абдулла Арипов моддий ёрдам ва кўмакка муҳтож оилаларга давлат бюджетидан ажратилган бир марталик моддий ёрдам пулларини тарқатишда "сусткашликка йўл қўйган" айрим маҳаллалар раислари кескин танқид қилди.

8 август куни ўтказилган ҳукумат селектор мажлисида бош вазир "буни ҳеч қайси мезон билан оқлаб" бўлмайди деб айтган.

Ўзбекистонда 4 август куни ҳукумат мажлисида пандемия даврида ижтимоий ҳимояга ва ёрдамга муҳтож аҳоли қатламларини моддий қўллаб-қувватлаш, кўмакка муҳтож оилалар рўйхатларини тўғри ва ҳаққоний шакллантириш, ажратилган маблағларни адолатли тарқатилиши ҳақида айтилганди.

Ўз навбатида, Бош прокуратура ҳам рўйхат асосида эҳтиёжманд оилаларга бир марталик ёрдам пули тарқатилиши жараёнида қонунбузилиш ҳолатлари кузатилаётганига оид ижтимоий тармоқларда пайдо бўлган хабарларга муносабат билдирди.

Унда ёрдам пули ажратилишидаги қонунбузилишлар юзасидан прокуратурага мурожаат қилиш сўралди.

Шу ҳафта бошида Ўзбекистоннинг бир қанча туман ва маҳаллаларида ҳукумат ваъда қилган ёрдамлар берилмаётгани норозиликка сабаб бўлганди.

Фарғона вилоятида ўнлаб одам вилоят ҳокимлиги олдида тўплангани ҳақида Озодлик хабар берганди.

Ўзбекистонда инсон ҳуқуқ ҳимоячилари учун кўкрак нишони таъсис этилмоқда

“Инсон ҳуқуқлари ҳимояси учун” кўкрак нишони.

Ўзбекистон Вазирлар Маҳкамаси “Инсон ҳуқуқлари ҳимояси учун” кўкрак нишони тўғрисида”ги қарори лойиҳасини эълон қилди.

Қарор лойиҳасида айтилишича, кўкрак нишони билан чет эл фуқаролари ва фуқаролиги бўлмаган шахслар, шунингдек, инсон ҳуқуқларини ҳимоя қилиш соҳаси фаолият олиб бораётган ташкилотлар ҳам тақдирланиши мумкин.

Кўкрак нишони билан тақдирланган шахсларга базавий ҳисоблаш миқдорининг ўн баравари миқдорида бирйўла тўланадиган пул мукофоти берилиши қарор лойиҳасида кўзда тутилган.

Фуқаролик жамияти институтлари, давлат органлари ва ташкилотлар ҳамда фуқаролар ҳар йили 1 сентябрга қадар кўкрак нишони билан тақдирлаш юзасидан таклифларни Инсон ҳуқуқлари бўйича Ўзбекистон Республикаси Миллий марказига тақдим этади.

Номзод бўйича тақдим этилган таклифларга илова сифатида номзод ҳақида маълумотнома, сўнгги уч йил давомида у томонидан инсон ҳуқуқлари ва эркинликларини ҳимоя қилиш борасида амалга оширган ишлари тақдим этилади.

Қарор лойиҳасида тўлиқ тақдим қилинмаган ҳужжатлар кўриб чиқилмаслиги айтилган.

Кўкрак нишони билан тақдирлашга оид таклифларни кўриб чиқиш юзасидан Марказ директори томонидан комиссия ташкил этилади.

Комиссия таркибига инсон ҳуқуқлари соҳасидаги фуқаролик жамияти институтлари вакиллари, олимлар ва мутахассислар, шунингдек, халқаро ташкилотлар вакиллари киритилиши айтилган.

Комиссия йиғилишида номзодлар бўйича ҳужжатлар ўрганилиб, 10 ноябрга қадар энг муносиб номзодлар бўйича якуний қарор қабул қилинади.

Кўкрак нишони ва унинг гувоҳномаси ҳар йили 10 декабрь – Халқаро инсон ҳуқуқлари кунида Марказ директори (ёки унинг топшириғига мувофиқ бошқа масъул шахслар) томонидан тантанали вазиятда топширилиши қарор лойиҳасида тилга олинган.

Ўзбекистонда инсон ҳуқуқлари ҳимоячилари таъқиб этилиши, мустақил инсон ҳуқуқлари ташкилотлари рўйхатга олинмагани халқаро ташкилотлар тарафидан танқид қилиб келинади.

Ўзбекистонликларни олиб келадиган баъзи чартер рейсларнинг вақти ўзгарди

Ўзбекистон фуқароларини ватанига олиб келиш учун 2 августдан 16 август кунлари давомида амалга оширилиши белгиланган чартер рейсларининг парвоз йўналишига қисман ўзгартириш киритилди.

Ўзбекистон Транспорт вазирлиги ахборот хизматига кўра:

  • 7 август куни Тошкент – Ростов-Дон – Наманган;
  • 8 август Тошкент – Санкт-Петербург – Наманган;
  • 9 августга белгиланган Тошкент – Москва – Наманган авиақатновлари Тошкент шаҳрига амалга оширилади.

Шунингдек, Республика махсус комиссиясининг қарори билан Россия Федерациясининг Оренбург ва Самара вилоятларидаги Ўзбекистон фуқароларини Ватанга қайтариш учун 2 та поезд қатнови ташкил этилди.

Мазкур поездларнинг биринчиси 9 август куни Наманган шаҳрига, иккинчиси эса 9 август куни Самарқанд шаҳрига кириб боради. Поездларда олиб келинган барча фуқаролар ўрнатилган тартибда карантинга жойлаштирилади.

"Россия Федерациясининг Ростов-Дон вилоятидаги фуқароларни олиб келиш мақсадида учинчи поезд қатнови ҳам ташкил этилди. Ушбу поезд 13 август куни Тошкент шаҳрига кириб келади", дейилган Транспорт вазирлиги билдирувида.

Транспорт вазирлиги йўловчилардан борди-ю чипталарни ҳарид қилиш вақтида ноқонуний хатти-ҳаракатлар содир этилиши билан боғлиқ вазиятларга дуч келган тақдирда, вазирликнинг 1167 қисқа рақамли ишонч телефонига, шунингдек, "Ўзбекистон темир йўллари" АЖнинг (71) 299-94-50 ишонч телефонига мурожаат этишларини сўраб қолган.

ССВ коронавирусга чалинганларни шифохонадан ташқарида даволаганлар жазоланишидан огоҳлантирди

Коронавирус инфекцияси билан касалланган беморларни белгиланган даволаш-профилактика муассасаларидан бошқа жойларда инъекцион ва инфузион дори воситаларидан фойдаланган ҳолда даволаш ва шифокор буюрган муолажаларни амалга ошириш тақиқланди.

Бу ҳақда Соғлиқни сақлаш вазирининг шу йилнинг 6 август куни қабул қилинган “Коронавирус инфекцияси билан касалланган беморларни даволаш мезонларини тартибга солиш ва ретро-проспектив таҳлил ўтказиш тўғрисида”ги буйруғида батафсил баён қилинган, дея маълум қилди вазирликнинг жамоатчилик билан алоқалар бўлими.

ССВ буйруғига кўра, коронавирус билан касалланган беморларни даволаш учун мослаштирилган даволаш-профилактика муассасаларидан ташқарида беморларни даволамаслик ва белгиланган муолажаларни олиб бормаслик тўғрисида Ўзбекистондаги барча тиббиёт муассасаларида фаолият юритаётган шифокор ва ўрта тиббиёт ходимларидан кафолат хатлари олинади. Вазирликнинг тиббий хизматлар сифатини назорат қилиш бошқармаси мазкур тартибга амал қилинишини назоратга олади.

Нодавлат тиббиёт ташкилотлари раҳбарларига ҳам ушбу қоидага амал қилиш тавсия этилган.

Мазкур тартибга риоя қилмаган ходимлар Соғлиқни сақлаш вазирининг шу йилнинг 5 август куни қабул қилинган “Ўзбекистон Республикасида коронавирус инфекциясига қарши курашиш борасидаги ишларни янада такомиллаштириш тўғрисида”ги буйруғига ва “COVID-19” билан касалланган беморларни даволаш бўйича вақтинчалик кўрсатмалар”нинг 6-нашрида белгиланган тартиб ва тавсияларга зид ҳаракат қилган деб топилиб, жавобгарликка тортилиши қатъий белгилаб қўйилди”, дейилади ССВ хабарномасида.

Ўзбекистонда коронавирус инфекцияси қайд этилганлар сони, 2020 йил 7 август соат 17:00 ҳолатига кўра, 29057 нафарни ташкил этган. Беморлардан 20059 нафари соғайиб кетган, 8817 нафар бемор даволанишда давом этмоқда. Қурбонлар сони эса 177 нафарга етган.

ОТМга тест синовлари 2 сентябрдан бошланади, COVID-19 га чалинганлар тестга қўйилмайди

Олий таълим муассасаларига 2020/2021 ўқув йили учун тест синовлари жорий йил 2 сентябридан бошланади. Бу ҳақда 7 август куни АОКА залида бўлиб ўтган матбуот анжуманида Давлат тест маркази директори ўринбосари Сардор Ражабов маълум қилган.

Мулозимга кўра, тест синовлари 14 кун мобайнида топширилади.

Аввалроқ Озодлик 6 август куни президент раислигида ўтказилган мажлисда имтиҳонлар Тошкент ва Нукус шаҳарлари ҳамда вилоятлар марказларидаги стадионларда ташкил этилиши билдирилгани ҳақида хабар қилганди.

АОКА залида бўлиб ўтган бугунги брифингда Жисмоний тарбия ва спорт вазири Дилмурод Набиев тест синовлари учун 155 стадиондан 40 га яқин стадион жалб этилиши режалаштирилганини билдирган.

Анжуманда коронавирус аниқланган абитуриентлар бу йилги тест синовларига қўйилмаслиги ҳам қайд этилган.

Давлат тест маркази бош бошқарма бошлиғи Барно Ражабовга кўра, коронавирусга чалингани туфайли тест имтиҳонларида иштирок эта олмаган абитуриентларнинг имтиҳон учун тўлаган пулларини қайтариш чоралари кўрилмоқда.

“Аэрофлот” Ўзбекистонга мунтазам парвозларни тикламай туришга қарор қилди

"Аэрофлот" авиаширкати учоғи.

Россиянинг “Аэрофлот” авиаширкати халқаро йўналишлар бўйича мунтазам қатновларнинг бир қисмини 31 августгача бекор қилишга мажбур эканини эълон қилди. Парвоз бекор қилинган йўналишлар орасида Ўзбекистон шаҳарлари ҳам бор.

Авиаширкат матбуот хизмати маълумотига кўра, Европа, Осиё ва Америка қитъаларидаги қарийб 90 шаҳарга рейсларни бекор қилишга оид қарор парвоз қилинажак мамлакатлардаги эпидемиологик чекловларни ҳисобга олган ҳолда қабул қилинган.

Жумладан, шу йил 31 августигача Ўзбекистон, Қирғизистон ва Қозоғистондаги Атирау, Ақтау, Ақтўбе, Бишкек, Бухоро, Нур-Султон, Олмаота, Тошкент, Чимкент, Ўш, Қарағанда, Қизилўрда ва Қўстанай шаҳарларига рейслар амалга оширилмайди.

Сотиб олинган чипталарни ваучерга алмаштириш ёки пулни қайтиб олиш мумкинлиги айтилмоқда.

Россия 1 августдан Буюк Британия, Туркия ва Танзания билан авиаалоқани тиклагани ҳақида Озодлик аввал хабар қилганди.

Биринчи курсдан бошқа курслар ўқишни онлайн тарзда бошлайди

Жорий йилнинг сентябрь ойидан 2, 3 ва 4-курс талабалари учун ўқиш онлайн тарзда бошланади. Бу ҳақда Республика Олий таълим кенгаши раиси Ўктам Умурзоқов ЎзА агентлигига маълум қилган.

Мулозим янги ўқув йилига тайёргарлик масаласи жуда мураккаб бўлиб турганини эътироф этган.

Март ойидан буён биз онлайн тизимида дарсларни ўтказяпмиз, лекин хоҳлаймизми, хоҳламаймизми – онлайн тизими одатий, юзма-юз дарс ўтиш тизимининг ўрнини боса олмайди. Ҳозирча сентябрь ойидан бошлаб 2, 3 ва 4-курс талабаларига ўқишни онлайн тарзда бошлаймиз, октябрь ойида 1-курсларни ҳам қабул қилиб олганимиздан кейин пандемия сал юмшаса, унда балки анъанавий тизимга яна қайтармиз”, деган Ўктам Умурзоқов.

Ўзбекистонда олий таълим муассасаларига кириш учун ўтказилажак тест синовлари санаси ҳали аниқ эмас. 6 август куни президент раислигида ўтказилган мажлисда имтиҳонлар Тошкент ва Нукус шаҳарлари ҳамда вилоятлар марказларидаги стадионларда ташкил этилиши, кунига 2 сменада уюштириладиган тест синовлари 12-14 кунда якунланиши мумкинлиги билдирилган.

Сенат ялпи мажлисида “Таълим тўғрисида”ги қонун маъқулланди

Сенат мажлислар зали (архив сурати).

Ўзбекистон Олий Мажлиси Сенатининг 7 август куни видеоконференцалоқа тарзида бошланган олтинчи ялпи мажлисида “Таълим тўғрисида”ги қонун муҳокама қилинган. Бу ҳақда Сенат матбуот хизмати маълумот тарқатди.

Хабарномада “Таълим тўғрисида”ги қонун 1997 йилда қабул қилингани ва таълим сифатини таъминлашга қўйилаётган бугунги талабларга жавоб бермай қўйгани урғуланган.

Қонуннинг янги таҳрири билан таълим муассасаси ходимлари, таълим олувчилар ва ота-оналарнинг ҳуқуқлари, мажбуриятлари ва жавобгарлиги, таълим жараёни қатнашчиларининг ижтимоий ҳимояси, таълим жараёнида меҳнат қилаётган минглаб мутахассисларнинг, миллионлаб ота-оналарнинг ҳуқуқий мақомига, уларнинг ижтимоий муҳофазасига доир жиҳатларга, айни вақтда мажбуриятларига ойдинлик киритилаётгани айтилган.

Қайд этилишича, қонун эндиликда таълимнинг нодавлат шаклини ривожлантиришга, жамиятда интелектуал мулк салоҳиятидан самарали фойдаланиш, илм-маърифатга доир иш жойлари кенгайишига имкон беради.

Мажлисда сенаторлар янги таҳрирдаги қонун кўплаб ўзбекистонликларнинг олий таълим, хорижда олинган таълим бўйича дипломларни тан олиш, таълим олувчилар учун вақтинча яшаш жойларини кафолатлаш, масофавий таълим, оилавий таълим, инклюзив таълим сингари ўз саволларига ечим топишга қийналаётган масалаларга ҳуқуқий ойдинлик киритилгани билан аҳамиятли бўлишини таъкидлаганлар ва мазкур қонунни маъқуллаганлар.

ОАВ: Элёр Ғаниев транспорт вазири лавозимидан озод этилди

Элёр Ғаниев 1997 йилдан бери ҳукумат таркибида ишлаб келган.

Элёр Ғаниев бошқа ишга ўтиши муносабати билан транспорт вазири лавозимидан озод этилди. Бу ҳақда маҳаллий матбуот хабар тарқатди.

Gazeta.uz ва Kun.uz нашрлари ҳукуматдаги манбаларига таянган ҳолда Элёр Ғаниев президентнинг 5 августдаги фармони билан озод этилганини маълум қилдилар.

Бироқ президент фармони ҳозирча расман эълон қилинмаган. Шунингдек, Ғаниев қайси ишга ўтгани ҳам ҳозирча номаълум.

Элёр Ғаниев 1997—2002 йилларда ташқи иқтисодий алоқалар вазири, 2005—2006 йилларда ташқи ишлар вазири, 2006—2010 ва 2012—2017 йилларда ташқи иқтисодий алоқалар, инвестициялар ва савдо вазири сифатида ишлаган.

2010—2012 ва 2019—2020 йилларда бош вазир ўринбосари бўлган. Элёр Ғаниев 2020 йил январида Очилбой Раматов ўрнига транспорт вазири этиб тайинланган эди.

Транспорт вазирлиги 2019 йил февралида автомобиль, темир йўл, ҳаво, дарё транспорти, метрополитен, шунингдек, йўл хўжалиги соҳасидаги давлат бошқаруви органи сифатида ташкил этилган эди.

Коронавирусдан ўлганлар сони камида 179 нафарга етди

Коронавирусга чалинганларнинг 19 587 нафари соғайди.

Ўзбекистонда коронавирус инфекцияси қайд этилганлар сони, 7 август соат 10:00 ҳолатига кўра, 28 809 нафарни ташкил этди. Беморлар сони 6 август соат 23:30 кўрсаткичдан яна 274 нафарга кўпайди.

Соғлиқни сақлаш вазирлигининг билдиришича, янги касалланиш ҳолатларининг 136 нафари Тошкент шаҳрида, 130 нафари Тошкент вилоятида ҳамда 8 нафари Қорақалпоғистон Республикасида тана ҳарорати кўтарилганлиги сабабли профилактика мақсадида ҳамда коронавирусга чалинган беморлар билан мулоқотда бўлганлиги сабабли намуна олинган фуқаролар орасида аниқланган.

6 август куни Олмазор туманида яшаган 39 ёшли Б.С. (эркак) ҳамда Учтепа туманида яшаган 68 ёшли Л.К. (аёл), жами 2 нафар коронавирусга чалинган бемор вафот этди.

Бу билан коронавирусдан ўлганлар сони 179 кишига етди.

Коронавирусга чалинганларнинг 19 587 нафари соғайди. 9 043 нафар бемор касалхонада қолмоқда. Улардан 728 нафари оғир, 217 нафари эса ўта оғир аҳволда.

Германия Ўзбекистонга 2 миллион евро миқдорида қўшимча ёрдам кўрсатади

Германия банклари ҳам Ўзбекистонга катта миқдорда пул ажратгани хабар қилинган эди.

Германия ҳукумати пандемияга қарши курашиш учун Ўзбекистонга қўшимча равишда яна 2 миллион евро ажратди.

“Кўмак турлари ва чора-тадбирлари икки давлат ўртасида муҳокама қилинмоқда” – дейилади Германиянинг Тошкентдаги элчихонаси 6 август куни тарқатган хабарда.

Бундан аввал июнь ойида ҳам Германия Жаҳон соғлиқни сақлаш ташкилотининг Тошкентдаги ваколатхонасига 480 минг евро молиявий кўмак кўрсатганди.

Июль ойида Германия Ўзбекистондан ташқари бошқа Марказий Осиё давлатларига тўғридан тўғри молиявий кўмак ажратишни тўхтатишини билдирган эди.

Германия – Ўзбекистоннинг Евроиттифоқдаги энг асосий савдо ҳамкорларидан бири.

«2020 йилнинг биринчи ярим йиллиги якунларига кўра, Германия Ўзбекистоннинг савдо ҳамкорлари ичида 7-ўринда қайд этилган, бу даврда икки давлат ўртасидаги савдо айланмаси 337 млн долларни ташкил этган. Шундан 305 млн доллар Германиядан импортга тўғри келади», -дейилади Кун уз хабарида.

Олмазор туманида ўзини симёғочдан ташлаб ўлдирмоқчи бўлган аёл қутқариб қолинди

Аввалроқ ижтимоий тармоқда бу аёл ўзини ўлдирмоқчи бўлаётгани тўғрисидаги видео тарқалиб кетган эди.

Тошкент шаҳар ички ишлар ходимлари 6 август куни юқори вольтли электрузатиш тармоғи устунига чиқиб, ўзини ўлдирмоқчи бўлган аёлни қутқариб қолди. Бу ҳақда Тошкент шаҳар Ички ишлар Бош бошқармаси маълум қилди.

“Олмазор туманида хизмат олиб борган профилактика инспекторлари А. Каримов ва З. Жабборбергановлар ҳамда патруль-пост хизмати автоэкипажи ходимлари Кичик халқа йўли кўчасида юқори вольтли электрузатиш тармоғи устунига чиқиб олган аёлни кўриб қолишди. Аёл атрофдагиларга ўзини тепадан ташлаб, ўз жонига қасд қилмоқчилигини айтган",-дейилади хабарда.

Ички ишлар ходимлари шу атрофда бўлган Сергели тумани 8-сон ёнғин-қутқариш қисми мутахассиси Шерзодбек Нурмуҳамедов ёрдамида аёлни пастга туширишган.

Аёл Олмазор тумани ИИО ФМБ 6-сон ИИБга етказилган. Аёлнинг шахси аниқланганида у Фарғона вилоятилик 36 ёшли Д.У. , бўлиб чиқди. У вақтинчалик пойтахтнинг Олмазор туманида яшаб келган. Ҳозирги вақтда психолог аёл билан иш олиб бормоқда.

Хабарда аёл нега ўзини ўлдирмоқчи бўлгани сабаблари маълум қилинмаган. Аввалда бу аёл ўзини ўлдирмоқчи бўлгани тўғрисидаги видео ижтимоий тармоқларда тарқалиб кетган эди.

Россия-Қозоғистон чегарасида тўпланган ўзбекларни уйларига қайтариш жараёни бошланди

Бузулукдаги чодир шаҳарчада яшаётган ўзбекистонликлар.

Россия-Қозоғистон чегарасидан ўтолмай Оренбург ва Самара вилоятларида тўпланиб қолган ўзбекистонликларни ватанига қайтариш жараёни бошланди. Бу ҳақда Ўзбекистон Транспорт вазирлиги маълум қилди.

Расмий хабарда айтилишича, 7 августга ўтар кечаси Тошкен – Бузулук – Тошкент йўналишидаги поезд 918 нафар йўловчи билан Ўзбекистон томон йўлга чиқди.

7 август куни Тошкент – Кинел – Тошкент йўналишидаги поезд ҳам 918 йўловчини Ўзбекистонга олиб келади.

“Ушбу рейс чипталари фақат Ўзбекистон Республикаси фуқаролари учун Бузулук ва Кинел вокзалларида сотилди. Бузулук - Тошкент йўналишидаги чипталар нархи 1 287 000 сўм (9. 259 рубл), Кинел - Тошкент – 1 357 000 сўм (9. 761 рубл)ни ташкил топди. Йўл давомида йўловчи поездлар фақат техник кўрик учун тўхтатилади, яъни станция-вокзалларда йўловчиларнинг платформага тушишига рухсат этилмайди",-дейилади билдирувда.

Поездлар Ўзбекистон Миллий гвардияси, Ички ишлар вазирлиги ва Соғлиқни сақлаш вазирлиги ходимлари кузатуви остида олиб келинади.

Ушбу рейсларда олиб келинган йўловчилар поездлардан тушиши биланоқ Наманган ва Тошкент вилоятларининг карантин зоналарига юборилади. Транспорт вазирлиги бу ҳолатни инобатга олган ҳолда йўловчиларнинг қариндош ва яқинлари уларни кутиб олиш мақсадида вокзалга келмасликларини илтимос қилган.

Россия ва Марказий Осиё давлатлари коронавирус пандемияси туфайли киритган карантин чекловлари ва чегараларнинг ёпилиши ортидан май ойидан буëн Самара ва Оренбург вилоятида минглаб ўзбекистонликлар чегарадан ўтолмай қолиб кетган эди. Кейинроқ уларнинг бир қисми Қозоғистон билан келишилган ҳолда чегарадан ўтказилиб, Ўзбекистонга олиб келинганди.

ОТМга кириш учун тест синовлари стадионларда ўтказилади

Тошкентдаги "Бунёдкор" стадиони (архив сурати).

Ўзбекистонда ёпиқ бинолар эпидемиологик талабга жавоб бермаслигини, ижтимоий масофага риоя қилинган тақдирда имтиҳонлар вақти анчага чўзилиб кетишини инобатга олиб, тест синовларини Тошкент ва Нукус шаҳарлари, вилоятлар марказларидаги стадионларда ташкил этишга топшириқ берилди. Бунда имтиҳонлар кунига 2 марта (ҳаво салқин пайтда) ўтказилса, барчасини тахминан 12-14 кунда якунлаш мумкин. Бу ҳақда президент Шавкат Мирзиёев раислигида олий таълим муассасаларига қабулни ташкил қилиш ва 2020/2021 ўқув йилига тайёргарлик кўриш масалаcи юзасидан ўтказилган йиғилишда айтилган.

Президент матбуот хизмати маълумотига кўра, йиғилишда мутасадди вазирлик ва идораларга стадионларни тест синовларига пухта тайёрлаш, уларнинг дислокацияси бўйича абитуриентларни тўлиқ хабардор қилиш юзасидан кўрсатмалар берилган.

Ш. Мирзиёев имтиҳонлар санасини Соғлиқни сақлаш вазирлиги ва Санитария-эпидемиология хизматининг эпидемиологик вазият борасидаги хулосасидан келиб чиққан ҳолда белгилаш, аҳоли саломатлигига хавфсизлигини таъминлаш лозимлигини таъкидлаган.

Қайд этилишича, тест синовларини шаффоф ҳолда ўтказиш учун, ёшларни ортиқча сарсон қилмаслик мақсадида Таълим муассасаларига ўқишга қабул қилиш бўйича Давлат комиссияси, ҳокимликлар, Ички ишлар вазирлиги, Миллий гвардия, Жисмоний тарбия ва спорт вазирлиги, Давлат хавфсизлиги хизмати томонидан зарур чоралар кўрилади.

Бу йил Ўзбекистондаги 91 та ОТМга бакалавриат йўналиши бўйича 1 миллион 484 минг 85 нафар абитуриент ҳужжат топширгани ҳақида Озодлик аввал хабар қилганди.

2020/2021 ўқув йили учун мамлакатдаги олий таълим муассасаларига бакалавриат босқичига 162 364 та, магистратурага эса 10 425 та ўрин ажратилган.

Мирзиёев қишлоқ хўжалиги масъулларига ҳар долларни уч долларга айлантиришни тавсия қилди

Ўзбекистон президенти Шавкат Мирзиёев.

Ўзбекистонда қишлоқ хўжалигига ажратилаётган ҳар бир долларни уч долларга айлантириш, имтиёзли кредитларни қайтариш бўйича аниқ ҳисоб-китоб асосида ишлаш зарур. Бу ҳақда президент Шавкат Мирзиёев 6 август куни Жаҳон банки иштирокида “Қишлоқ хўжалигини модернизация қилиш” лойиҳасини амалга оширишга бағишлаб ўтказилган видеоселектор йиғилиши чоғида таъкидлаган.

Йиғилишда Жаҳон банки томонидан Ўзбекистонга ажратилган 500 миллион доллар кредит маблағларини ўзлаштириш бўйича шакллантирилган лойиҳалар муҳокама қилинган.

Президент матбуот хизмати қайдича, Мирзиёев кўрсатмасига мувофиқ, лойиҳаларни ишлаб чиқишда фанни ривожлантиришга, илғор технологияларни жорий этишга устувор аҳамият қаратилган. Хусусан, жалб қилинаётган маблағнинг 87 миллион доллари қишлоқ хўжалиги соҳасидаги 10 та илмий-тадқиқот муассасаси, 4 та ихтисослашган марказ фаолиятини такомиллаштириш ва моддий-техник базасини яхшилашга ажратилади.

Шунингдек, 70 миллион доллар кўчатлар етказиб бериш, фитосанитария, геоахборот ва сертификатлаш хизматларини кўрсатадиган агрохизмат марказларини ташкил этишга йўналтирилади. Қишлоқ хўжалигини рақамлаштириш учун берилаётган 10 миллион доллар ҳисобига ерларнинг ҳосилдорлиги, тупроқ таркиби таҳлили, зарур минерал ўғитлар тури ва миқдори, солиқ, транспорт-логистика ва маҳсулотлар бозорлари ҳақида маълумотлар олиш имкони яратилади.

Йиғилишда сув хўжалиги, чорвачилик, карантин, кадастр, молия, солиқ ва бошқа тегишли идоралар маълумотлар базасини ушбу тизимга интеграция қилиш муҳимлиги таъкидланган.

Қишлоқ хўжалиги вазирлигига илмий-тадқиқот муассасалари ва ихтисослашган марказларни Академик Маҳмуд Мирзаев номидаги боғдорчилик, узумчилик ва виночилик илмий-тадқиқот институти ҳудудида жойлаштириб, лаборатория ускуналари ва техникалар билан таъминлаш, вилоятлардаги қишлоқ хўжалиги коллежлари негизида уларнинг филиалларини ташкил этиш вазифаси қўйилган. Ушбу муассасаларни юқори малакали мутахассислар билан тўлдириш, хориждан консультантлар жалб қилиб, уларни ўқитиш бўйича топшириқлар берилган.

Президент ҳар бир илмий-тадқиқот муассасаси ва марказ илмий ишланмаларини сотадиган тижорат ташкилотига айланиши зарурлигини таъкидлаган.

Қишлоқ хўжалигини илм билан қилмасак, харажатларимиз натижа бермайди. Ҳар бир лойиҳа манфаатдорликни таъминлаш, рентабелликни оширишга хизмат қилиши керак. Пировард маррамиз – экспорт. Илмий асосланган, стандартларга мос маҳсулот чиқарилса, бозор топилади”, деган Шавкат Мирзиёев.

Кооперативлар ва кластерларни ривожлантиришга мўлжалланган 200 миллион доллар ҳудудлар ўртасида тақсимланган. Бундан ташқари, халқаро молия ташкилотлари маблағлари ҳисобидан Фарғона водийси учун қўшимча 54 миллион доллар ҳамда Хоразм вилоятига 100 миллион доллар маблағ ажратилган.

Интенсив боғ майдонларини кенгайтиришга 65 миллион доллар йўналтириш белгиланган. Хусусан, бунинг ҳисобидан Тошкент вилоятида 500 гектар, Андижон, Бухоро, Наманган, Фарғона ва Самарқандда 300 гектардан, Жиззахда 250 гектар, Қашқадарё ҳамда Сурхондарёда 200 гектардан, Қорақалпоғистонда 100 гектар майдонда янги усулдаги интенсив боғлар яратилиши режалаштирилган.

Мутасаддиларга қисқа муддатда ерларни ажратиб, келгуси йил баҳорда боғларни фойдаланишга топшириш вазифаси юклатилган.

Кейинги ҳафтада инсон ҳуқуқлари бўйича халқаро веб-форум ўтказилади

Жорий йилнинг 12−13 август кунлари Инсон ҳуқуқлари бўйича Самарқанд форуми видеоконференция шаклида ўтказилади ва мазкур анжуман ёшлар ҳуқуқларини тарғиб қилишнинг долзарб масалаларига бағишланади. Бу ҳақда Газета.уз нашри Инсон ҳуқуқлари бўйича Ўзбекистон Миллий маркази матбуот хизмати маълумотига таянган ҳолда хабар қилган.

Бу ўзбек расмийлари ташкилотчилигида инсон ҳуқуқлари соҳасида халқаро ва минтақавий ҳамкорликни мустаҳкамлаш мақсадида ташкил этилаётган иккинчи халқаро анжумандир. “Инсон ҳуқуқлари бўйича Осиё форуми” деб номланган биринчи халқаро анжуман 2018 йил 22−23 ноябрь кунлари Самарқанд шаҳрида ўтказилганди.

Қайд этилишича, бу йилги Самарқанд Форумининг асосий мақсади ёшлар ҳуқуқларини ҳимоя қилиш ва рағбатлантиришга тааллуқли мавжуд халқаро ҳамда минтақавий механизмларни таҳлил қилишдан иборатдир. Мунозаралар жараёнида ушбу механизмларни такомиллаштириш имкониятлари ҳам кўриб чиқилиши айтилмоқда.

Маълумотларга кўра, Самарқанд форумида Бирлашган Миллатлар Ташкилоти, Европа Иттифоқи, Ислом Ҳамкорлик Ташкилоти, Мустақил Давлатлар Ҳамдўстлиги, Африка Иттифоқи тизимидаги ёшлар тузилмалари раҳбарлари, дипломатик корпус вакиллари, инсон ҳуқуқлари бўйича халқаро, минтақавий ва миллий институтлар, фуқаролик жамияти институтлари, ёшлар ташкилотлари вакиллари, олимлар ва экспертлар – жами 300 дан зиёд киши иштирок этиш истагини билдирган.

Пандемияга қарамай, МТВ боғчалар фаолияти тикланиши ҳақида билдирди

Ўзбекистондаги боғчалардан бири.

Мактабгача таълим ташкилотларида коронавирус инфекцияси пандемияси сабабли тўхтатилган фаолият жараёнини тиклашга тайёргарлик ишлари олиб борилмоқда. Бу ҳақда Мактабгача таълим вазирлиги матбуот хизмати маълум қилди.

Ушбу фаолиятни тиклашдан мақсад, ходимлар ва тарбияланувчилар учун хавфсиз муҳитни таъминлаш орқали, болаларни нормал маиший ҳаёт, ўйинлар ва таълим жараёнига қайтаришдир”, дейилади вазирлик хабарномаси.

МТВ вакилларига кўра, бунда вирус тарқалиши ва уни юқтириб олиш хавфини бартараф этиш мақсадида жорий этилган таъқиқ чораларини ҳисобга олган ҳолда, қўшимча хавфсизлик чоралари ҳам татбиқ этилиши кўзда тутилган.

Аммо болалар ўртасидаги оралиқ масофа уларнинг ижтимоий фаоллиги, амалий машғулотлари ва ривожлантирувчи ўйинларига халақит бермаслиги лозим”, дейилади хабарномада.

Ўзбекистонда коронавирус инфекцияси илк бор қайд этилган март ойидан бошлаб боғчалар фаолияти тўхтатилганди.

Аввал хабар қилганимиздек, жорий йил 15 июнидан яшил ва сариқ ҳудудларда нодавлат мактабгача таълим ташкилотлари фаолиятига рухсат берилган. Ўшанда давлатга қарашли боғчалар фаолиятига август ойидан рухсат берилиши айтилганди.

Давергеодезкадастр қўмитаси сирдарёлик ходимининг пора билан қўлга тушганини тасдиқлади

Иллюстратив сурат.

Ўзбекистон Ер ресурслари, геодезия, картография ва давлат кадастри давлат қўмитаси Сирдарё вилояти Сайхунобод туман кадастр филиали муҳандиси Х.С. фуқаро Г. га туманда шахсий уй-жой қуриши учун 3 сотих ер майдонини аукцион орқали олиб бериши эвазига 500 долларни олганда қўлга тушганига оид маълумотни тасдиқлади.

Мазкур ҳолат бўйича маълумот аввалроқ блогер Зафарбек Солижоновнинг Телеграм-канали орқали ёйинланганди.

Давергеодезкадастр қўмитаси қайдича, икки йилдан буён Сайхунобод туман кадастр филиалида фаолият олиб бораётган Х.С., раҳбарият томонидан коррупцион ҳолатларни келиб чиқиши олдини олиш бўйича олиб бораётган тарғибот-ташвиқот ишларига қарамай, фуқаро Г. дан 500 долларни олганда қўлга тушган.

Ҳозирда бу бўйича қўмита раисининг биринчи ўринбосари Т. Абдуллаев зудлик билан Сирдарё вилояти етиб борган ва ҳолатни ўрганмоқда”, дея билдирган қўмита вакиллари бу борада яна қўшимча маълумот беришни ваъда қилганлар.

Аввалроқ блогер З.Солижонов ўз канали орқали 500 доллар билан қўлга тушган Х.С.га нисбатан фирибгарлик моддаси доирасида иш қўзғатилгани, у ер аукционда сотилишини била туриб, Г.ни алдаб, пулини олмоқчи бўлгани, бу борада тергов ҳаракатлари давом этаётганини маълум қилган.

Хорижий автотранспорт ҳайдовчиларидан жарима ундириш бўйича янги тартиб жорий этилди

Ўзбекистон ҳудудида йўл ҳаракати қоидаларини бузган хорижий автотранспорт воситалари ҳайдовчилари ёки бошқа шахслардан жарима ундиришнинг янги тартиби жорий этилади. Бу ҳақда, ЎзА хабарига кўра, мамлакат ҳукумати томонидан жорий йил 5 августида қабул қилинган қарорда айтилган.

Ушбу жарималар бундан буён хорижий автотранспорт воситалари Ўзбекистондан олиб чиқиб кетилаётганда божхона органлари томонидан ундирилади. Бунда ички ишлар органлари “онлайн” режимда тақдим этган маълумотлар асос бўлади.

Янги тартиб Ўзбекистонда аккредитациядан ўтган хорижий давлатлар дипломатик ваколатхоналари ва консуллик муассасаларининг, шунингдек, уларга тенглаштирилган ташкилотларнинг автотранспорт воситаларига ҳамда Ўзбекистон ҳудудига вақтинча кирган ёки транзит ҳаракатланишда бўлган хорижий расмий делегациялар автотранспорт воситаларига нисбатан татбиқ этилмайди.

Ҳукумат қарори билан Ўзбекистонда йўл ҳаракати қоидаларини бузган хорижий автотранспорт воситалари ҳайдовчиларидан жарималарни ундириш тартиби тўғрисидаги низом ҳам тасдиқланган.

Коронавирусдан яна икки бемор вафот этди. Ўлганлар сони 173 кишига етди

Айни пайтда коронавирус юққан 18 783 нафар бемор соғайди.

Ўзбекистонда коронавирус инфекцияси қайд этилганлар сони, 6 август соат 10:00 ҳолатига кўра, 28 069 нафарни ташкил этмоқда. Бу 5 август соат 23:30даги ҳолатдан 276 кишига кўпдир.

Соғлиқни сақлаш вазирлигининг билдиришича, янги касалланиш ҳолатларининг 147 нафари Тошкент шаҳрида, 129 нафари Тошкент вилоятида тана ҳарорати кўтарилганлиги сабабли профилактика мақсадида ҳамда коронавирусга чалинган беморлар билан мулоқотда бўлганлиги сабабли намуна олинган фуқаролар орасида аниқланган.

Шу билан бирга, Мирзо Улуғбек туманида яшаган 48 ёшли К.Н., (эркак) ҳамда Юнусобод туманида яшаган 62 ёшли М.М., (аёл) коронавирусдан вафот этди.

Айни пайтда коронавирус юққан 18 783 нафар бемор соғайди ва соғайиш кўрсаткичи 67 фоизни ташкил қилди.

Ҳозирда касалхоналарда 9 113 нафар бемор даволанмоқда. Улардан 799 нафари оғир, 228 нафари эса ўта оғир аҳволда.

Давомини ўқинг

Кўрмай қолган бўлсангиз

XS
SM
MD
LG