Prezident Shavkat Mirziyoev viloyatlarga safar qilib¸ bu yerdagi vaziyat bilan bevosita o‘zi tanishishda davom etarkan¸ hali prezident bormagan viloyat rahbarlari bunday tashrifni hadik¸ asabiylik va oshig‘ich taraddud bilan kutmoqda. Xususan¸ safar kuni aniq bo‘lmagan bir vaziyatda Farg‘ona viloyatidagi aksar tumanlarda har kun prezident kelishiga hozirlik ko‘rilmoqda.
“Prezidentimiz yo‘llariga rayhon ekayapmiz”
Ozodlikka ma’lum bo‘lishicha¸ prezident Shavkat Mirziyoevning Farg‘ona viloyatiga qiladigan tashrifi davomida uning Tojikiston bilan chegaraoldi hududlariga ham borishi kutilmoqda.
O‘zbek-tojik chegarasida joylashgan Furqat tumani hokimligi prezidentning “ana erta-ana indin” bo‘lib qolishi mumkin safariga har kun hozirlanmoqda.
“Bizga hech kim aniq vaqtini hali aytmadi. Andijonga kelganda¸ Farg‘onaga ham o‘tib qolishar¸ deb rosa kutdik. Lekin bizga kirmay¸ Toshkentga qaytib ketdilar. Prezidentimiz bormagan viloyat faqat Farg‘ona va Namangan bo‘laëtgani uchun¸ navbat bizga keldi endi. Shunga hamma yoqni obodonlashtirib¸ chiroyli qilib kutayapmiz”¸ dedi Furqat tuman hokimligi vakili va bu jarayonda hech qanday favquloddalik yo‘qligini ta’kidladi.
“Uylarimizni chiroyli qilib qo‘ysak¸ oldilarini kelinlarimizga supurtirib¸ suv septirsak¸ yo‘l bo‘ylariga rayhonu jambillar eksak¸ buning nimasi yomon? Faqat Farg‘onadamas¸ hamma yoqda shunaqa qilishayaptiku! Oldin ham prezident yo Bosh vazir kelsa¸ shunaqa bo‘lardi¸ bunga hech kimning e’tirozi yo‘q!”¸ dedi Ozodlik suhbatlashgan hokimlik vakili.
E’tiroz
Farg‘ona viloyatiga safari davomida prezident Mirziyoev Tojikistonning Asht tumaniga tutash chegara hududiga ham borishi mumkin. Bu hududga eltuvchi katta yo‘l esa¸ aytilishicha¸ Furqat tumanining Shoimbek va Bekobod qishloqlaridan o‘tadi.
Ana shu qishloqda yashovchilardan birining Ozodlikka o‘z shaxsi ochiqlanmaslik sharti bilan bildirishicha¸ prezident o‘tishi kutilayotgan katta yo‘l bo‘yiga qo‘yilayotgan beton tuvaklaru ularga ekilayotgan gullar puli aholi va tadbirkordan majburan undirilmoqda.
“Furqat tumani prezidentni kutmoqda. Ko‘chalar tozalanib¸ yo‘l bo‘yidagi uylar egalariga majburan bo‘yatilmoqda.Tuman hokimligi va obodonlashtirish tashkiloti tomonidan yo‘l chetlariga o‘rnatilayotgan kichik beton gul tuvaklar majburan yo‘l yoqasidagi uy egalari va savdo do‘koni egalariga 3500 so‘mdan sotilayapti. Aslida¸ tuman hokimligi obodonlashtirish va tuman yo‘l qurilishi hisobidan o‘rnatilaëtgan ushbu tuvaklarni majburan sottirishda¸ ayniqsa¸ Shoimbek va Bekobod qishloq fuqarolar yig‘ini raislari va posbonlari jonbozlik qilmoqda.
Ular yo‘l yoqasidagi uylarda yurib¸ bu uylar ro‘parasiga o‘rnatilgan gul tuvaklar uchun pul talab qilmoqda. Pul berishdan bosh tortgan do‘kon va uy egalarini uchastkovoy “tuzumga qarshi chiqib¸ hukumat ishlariga qarshilik qilganlikda ayblamoqda”¸ deydi shaxsan o‘zi mahallaqo‘m va posbonning shunday tahdidiga guvoh bo‘lganini ta’kidlagan furqatliklardan biri.
Bu suhbatdosh ta’kidicha¸ do‘koni qarshisiga gul tuvak qo‘yib ketilgan tadbirkorlar¸ pulini bermasa¸ soliqchi bosishidan¸ uch sutkaga hibs etilishdan ogohlantirilmoqda.
“Tuvak va gullar bor gap¸ lekin ular pulini homiylarimiz o‘z xohishi bilan to‘layapti”
Ozodlik bilan suhbatda¸ nomi tilga olingan Shoimbek va Bekobod mahallasi faollari¸ prezidentning bu hududda to‘xtashi kutilmayotgan bo‘lsa-da¸ u o‘tadigan yo‘l bo‘yini “obodonlashtirish” ishlari qizg‘in ekanini e’tirof etdi.
“Tojikiston bilan chegaraga yo‘l bizning qishloqdan o‘tadi. Bu yo‘ldan prezidentimiz Bosh vazirlik paytida ham bir necha marta o‘tgan¸ shunga yo‘l bo‘yidagi hovlilar risoladagiday bo‘yalgan. Hozir shu yo‘l bo‘yiga rayhon¸ oppoq bo‘lib ochiladigan boshqa gullarni o‘tqazib chiqayapmiz. Yo‘l bo‘yida gul ekishga¸ tuvakda gul sotib olishga qurbi yetmaydigan oilalar ham bor. Shunday joylarga qo‘yilayotgan gullarni homiylarimiz o‘z ixtiyorlari bilan olib berayapti”¸ dedi Furqat tuman Bekobod qishloq fuqarolar yig‘ini faoli.
Bu faol¸ mahalla fuqarolar yig‘ini aholi va tadbirkorni tuvak va gulga pul to‘lashga majburlayotganini inkor qila turib¸ ayni paytda¸ posbonlarning nima qilayotganidan bexabarligini qo‘shib o‘tdi.
“Rishtonda yakshanba kuni o‘qituvchi yana farroshlik qildi”
Aytilishicha¸ Andijondan keyin prezident Farg‘onaga qo‘qqisdan o‘tib qoladi¸ degan qo‘rquv bu viloyatdagi Rishton tumanidagi "to‘rtlik"ka ham uyqu bermagan va yakshanba sahardan byudjet tashkilotlari xodimlari¸ eski an’anaga ko‘ra¸ yana o‘qituvchi va tibbiyotchilar xizmatkorlikka majburlangan.
“Yakshanba¸ dam olish kuni ekaniga qaramay¸ Rishton tumani kollej o‘qituvchilari majburiy tarzda yo‘l yoqasida ishlashga chiqarildi. Sababi¸ Mirziyoevning Andijondan keyin oldindan aytmasdan¸ Farg‘onaga o‘tib qolish ehtimoli. Agar prezident tumandagi ahvoldan qoniqmasa¸ to‘rtlik – hokim¸ prokuror¸ soliq va militsiya boshliqlarini ishdan olib tashlashi mumkin. Shuning uchun amalini yo‘qotib qo‘yishdan qo‘rqqan bu to‘rtlik pastki bo‘g‘in¸ birinchi navbatda¸ byudjet tashkilotlari xodimlariga bosim o‘tkazmoqda”¸ deydi o‘zi ham shunday bosimga uchragan rishtonliklardan biri.
"Potyomkin qishloqlari"
Marhum prezident Islom Karimovning viloyatlarga safari davomida¸ u boradigan joylar¸ o‘tadigan yo‘l bo‘ylari xo‘jako‘rsinga bo‘yab-bejashlar va “Potyomkin qishloqlari”ga mengzaladigan bunday hatti-harakatlar chiqimi ham¸ odatda mahalliy tadbirkorlar zimmasiga yuklatilar edi.
Haftalik videolektorlaridan birida yangi prezident Shavkat Mirziyoev¸ haqiqiy vaziyatni nihoyatda yaxshi bilishini ta’kidlab¸ hokimiyat vakillarini har xil ko‘zbo‘yamachiliklarni to‘xtatishga chaqirayotganiga qaramay¸ Mirziyoev Bosh vazirligi davrida keng tarqalgan prezident ko‘zini quvnatish uchun obodonlashtirish harakatlari va uning xarajat va mehnatini aholiga majburlashning yangi prezident davrida ham ayni tarzda davom etayotgani ko‘riladi