Линклар

Шошилинч хабар
20 ноябр 2019, Тошкент вақти: 09:58

Ўзбекистон хабарлари

Beeline ва Ucell лицензия талабларини бузаётгани маълум қилинди

UNITEL МЧЖ (Beeline савдо маркаси) ва COSCOM МЧЖ (Ucell савдо маркаси) мобил операторлари радиоэлектрон воситалар ва радиочастота спектридан фойдаланишни қўпол равишда бузмоқда. Бу ҳақда Алоқа, ахборотлаштириш ва телекоммуникация технологиялари соҳасида назорат бўйича давлат инспекциясига таяниб, кун.уз сайти хабар қилди.

Инспекциянинг таъкидлашича, 2017 йилнинг май ва июнь ойиларида база станциялари ва ушбу операторларнинг мобиль алоқа тармоқлари радиорелейли линиялардан фойдаланиши бўйича тартиб талаблари бузилган.

Инспекция маълумотларига кўра, мобил операторлар база станциялари ва радиорелейли линиялардан фойланишга қабул қилиб олиш акти ва радиоэлектрон воситалар ҳамда радиочастоталардан техник фойдаланиш бўйича тегишли рухсатни расмийлаштирмасдан, ноқонуний равишда тижорий мақсадларда фойдаланишган.

Хусусан, қоидабузарликлар Тошкент, Жиззах, Сирдарё, Самарқанд, Сурхондарё ва Қашқадарё вилоятлари, шунингдек, Қорақалпоғистон Республикасида аниқланган.

Инспекциянинг эслатишича, операторлар “норматив-ҳуқуқий актлар ва лицензия келишувлари талабларини тизимли равишда ҳамда қўпол бузишлари, шунингдек, кўрсатилаётган мобил алоқа хизматлари сифати кўрсаткичлари пасайгани учун” огоҳлантирилган ва маъмурий жавобгарликка тортилган.

Кун янгиликлари

Вазирлар маҳкамаси енгил автомашиналарни чегарадан 15 дақиқа ичида ўтказишга кўрсатма берди

Ўзбекистон-Қирғизистон чегараси олдида.

Бундан буён автотранспорт воситалари ва уларда бораётган йўловчиларни чегарадан ўтказиш ярим соатдан ошмаслиги лозим. Бу ҳақда Вазирлар Маҳкамаси 18 ноябрда махсус нимзомни тасдиқлади.

Низомга асосан чегарадан ўтиш «Ягона дарча» божхона ахборот тизими асосида амалга оширилади. Чегарадан енгил автотранспорт воситалари 15 дақиқа, юк автотранспорт воситалари 30 дақиқадан кўп бўлмаган муддатда ўтказилиши шарт.

Низомга асосан Ўзбекистонга кириб келаётган енгил ва юк автомашиналарини текшириш вақти қуйида белгиланган тартибдан кўп вақтни олмаслиги лозим:

санитария-карантин назорати (ҳайдовчи санитария назоратидан ўтказилади) — 3 дақиқа;

чегара назорати (Давлат чегарасини кесиб ўтиш ҳуқуқни берувчи ҳужжатлар мавжудлиги ва паспорт текширилади) — 4 дақиқа;

божхона назорати (ҳайдовчи, товарлар ва автотранспорт воситаси божхона назорати ва расмийлаштирувидан ўтказилади) — 15 дақиқа;

фитосанитария назорати (олиб ўтилаётган товар фитосанитария назорати объекти бўлса, фитосанитария назоратидан ўтказилади) — 4 дақиқа;

ветеринария назорати (олиб ўтилаётган товар ветеринария назорати объекти бўлса, ветеринария назоратидан ўтказилади) — 4 дақиқа.

Ўтказиш пунктида фаолият олиб борувчи давлат назорати органлари қонунбузарлик ҳолатларини аниқлаганида назоратдан ўтиш вақти белгиланган муддатдан ортиқ бўлиши мумкин.

ИИБ: Актриса Гавҳар Шарипованинг ўлимига ҳайдовчининг шилқимлиги сабаб бўлган

Актриса Гавҳар Шарипова.

Таниқли актриса Гавҳар Шарипова юк машинасидан ўзини ерга ташлаб ҳалок бўлган. Бу ҳақда маҳаллий нашрлар Қашқадарё вилояти ИИБ ЙҲХБга таянган ҳолда хабар берди.

Хабарда айтилишича, 19 ноябрга ўтар кечаси соат 02:20 ларда Гавҳар Шарипова Самарқанд—Ғузор автомобиль йўлининг 140-километрида ҳалок бўлган.

Бунга актриса бораётган Isuzu юк автомашинаси ҳайдовчиси шилқимлик қилгани сабаб бўлган. Актриса ҳайдовчининг шилқимлигидан қутилиш учун 140 километр тезликда кетаётган машинадан сакраган.

“Сурхондарё вилояти Шўрчи туманида яшовчи 1990 йилда туғилган Ш.Ф. бошқарувида бўлган Isuzu юк автомашинаси соатига 140 км тезликда ҳаракатланиб келаётган пайтда ҳайдовчи бир қўлида автомобилини бошқариб туриб, ўнг қўли билан автомобиль салонида йўловчи сифатида кетаётган актрисанинг елка ва қўлларидан ушлаб шилқимлик қилган”, дейилади хабарда.

Ғузор туман Ички ишлар бошқармаси мазкур ҳолат юзасидан жиноят иши қўзғатган ва ҳайдовчи қўлга олинган. Агар у айбдор деб топилса, етти йилгача қамалиши мумкин.

Аввалроқ “Ўзбеккино” актриса Гавҳар Шарипова 18 ноябрь куни Қашқадарё вилоятида юз берган автоҳалокат натижасида вафот этгани ҳақида хабар берган эди.

Гавҳар Шарипова 1980 йилда Навоий шаҳрида туғилган. 2001 йилда Тошкент Давлат санъат институти (ҳозирги Ўзбекистон Давлат санъат ва маданият институти)ни драма-театр ва кино актёрлиги йўналиши бўйича тамомлаган. Ўзбек Миллий академик драма театрида фаолият кўрсатган ва кинофильмларда қатор ёрқин образларни яратган.

Чироқчида консервадан заҳарланган оила аъзоларидан бири вафот этди, икки нафари комада қолмоқда

Иллюстратив сурат.

Чироқчи туманидаги Тутли қишлоғида консервадан заҳарланиб касалхонага тушган бир оиланинг 7 аъзосидан бир нафари вафот этди, яна икки нафари кома ҳолатида қолмоқда. Бу ҳақда 19 ноябрь куни Соғлиқни сақлаш вазирлиги маълум қилди.

Билдирувда айтилишича, 18 ноябрь куни соат тахминан 08.00 атрофида мазкур оила бошлиғининг турмуш ўртоғи Ю.У. вафот этди. Айни пайтда ота ва катта ўғилнинг аҳволи ҳам ўта оғирлигича қолмоқда. Улар сунъий нафас олдириш аппаратида сақланмоқда.

Вазирликнинг билдиришича, оила бошлиғи, унинг турмуш ўртоғи ва катта ўғлига “Ботулизм касаллигининг оғир даражаси, ўткир токсемия даври, токсик нейропатия, ўткир нафас етишмовчилиги I даражаси” ташхиси қўйилган эди.

“Оиланинг қолган тўрт нафар аъзоси вилоят юқумли касалликлар шифохонасида даволанмоқда. Уларнинг аҳволи қониқарли”, дейилади хабарда.

Оила аъзолари уй шароитида тайёрланган помидор консервасидан заҳарланиб, вилоят марказидаги шифохоналарга ётқизилган эди.

Тошкент вилоятида VI-VII​ асрлардаги кўчманчиларга оид қабристон топилди

Иллюстратив сурат.

Тошкент вилоятида милоддан кейинги VI-VII​ асрларга оид Турк хоқонлиги даври кўчманчиларининг қабристони топилди.

ЎзАнинг хабар беришича, қабристон пойтахтдан юз километр шимоли-шарқда, Ғарбий Тяншан тоғларининг денгиз сатҳидан 1000 метр баландликдаги этакларида жойлашган.

“Ушбу қадимий қабристон сел, қор ва ёмғирлар юзидан емирилиши натижасида очилиб қолган бўлиб, бу ҳақда археологларга Тошкент халқаро мактаби ўқитувчиси Скот Бекер хабар берган эди”, дейилади хабарда.

Топилма ортидан Ўзбекистон Фанлар академияси Миллий археология марказида Ғарбий Тяншан ҳудудидаги кўчманчи маданиятни ўрганиш учун махсус гуруҳ ташкил этилди.

Хабарда айтилишича, VI​ асрда Қора денгиздан Тинч океанига қадар ҳудудни эгаллаган Турк хоқонлигининг маъмурий марказларидан бири ўша пайтларда Чоч деб аталган Тошкент шаҳри бўлган.

“Тошкент вилояти ҳудудида бундай топилмаларнинг оз учраши эса ушбу янги археологик ёдгорликнинг аҳамиятини янада орттиради. Шунинг учун ҳам йилдан-йилга емирилиб бораётган бу қабристондаги очилиб қолган қабрлар тезлик билан қазиб ўрганилиши керак”, дейилади хабарда.

Ўзбекистон футболчилари реванш олди. Фаластин жамоасини мағлуб этди

Фаластин терма жамоаси.

Футбол бўйича Ўзбекистон миллий терма жамоаси 19 ноябрь куни реванш олиб, Фаластин футболчиларини 2:0 ҳисобида мағлуб этди. Бундан аввал - 5 сентябрдаги ўйинда Фаластин Ўзбекистонни 2:0 ҳисобида ютган эди.

Ўйин “Пахтакор” стадионида 2022 йилги Жаҳон чемпионати Осиё саралаш босқичининг иккинчи раунди доирасида бўлиб ўтди.

Фаластин дарвозасига ҳар иккала голни Элдор Шомуродов киритди. Биринчи гол ўйиннинг 18-дақиқасида, иккинчи гол 58-дақиқада урилди.

5 сентябрь куни Фаластиннинг Ал-Рам шаҳрида ўтган ўйинда Ўзбекистон тарихда биринчи марта Фаластин жамоасига 2:0 ҳисобида ютқизганди.

Бунга қадар Ўзбекистон ва Фаластин жамоалари тўрт марта учрашган, бу учрашувлар ўзбек футболчилари ғалабаси билан якун топган эди.

Айни пайтда Ўзбекистон 9 очко билан саралаш босқичининг Д гуруҳида биринчи ўринга кўтарилди, Фаластин эса 4 очко билан тўртинчи ўринда қолди. Саудия Арабистони (8), Яман (5) ва Сингапур (4) ҳали ўз ўйинларини ўтказишмаган.

Тергов департаменти Озодликнинг Булунғур ИИБдаги ўлимга оид хабари юзасидан баёнот берди

16 ноябрь куни эрталаб Самарқанд вилоят, Булунғур туман Ички ишлар бўлимига олиб келинган 57 яшар Насриддин Жабборов бир неча соатдан сўнг оламдан ўтган.

ИИВ ҳузуридаги Тергов департаменти Озодликнинг 18 ноябрдаги «ИИБда сўроқ қилинган шахс ўлди. Яқинлари унинг уриб ўлдирилганини иддао қилмоқда» сарлавҳаси остидаги мақоласи юзасидан ўз расмий сайтида баёнот эълон қилди..

Тергов департаменти баёнотида бундай дейилган:

Аниқланишича, 16 ноябрь куни фуқаро Н.Ж. туман ИИБ бошлиғи номига, «О» исмли шахс «марихуана» гиёҳвандлик воситасини қонунга хилоф равишда сотиш билан шуғулланаётганлигини, унга нисбатан қонуний чора кўришни сўраб мурожаат қилган.

Шу куни соат 13:30 ларда Булунғур туман ИИБ Жиноят қидирув бошқармаси ходимлари томонидан ўтказилган тезкор тадбирда фуқаро О.Р. 150 минг сўм эвазига Н.Ж.га вазни 3,71 грамм «марихуана» гиёҳвандлик воситасини сотган вақтида ушланиб, ёнидан вазни 0,78 грамм «марихуана» гиёҳвандлик воситаси ва тадбирда ишлатилган 150 минг сўм пуллар ашёвий далил сифатида олинган.

Ҳолат юзасидан шу куннинг ўзида Булунғур тумани ИИБ ҳузуридаги Тергов бўлими томонидан Жиноят кодексининг 273-моддаси 2-қисми билан жиноят иши қўзғатилиб, О.Р.га нисбатан айблов эълон қилинган ва «қамоққа олиш» эҳтиёт чораси қўлланилган.

Дастлабки тергов давомида Н.Ж. терговга олиб келинмаган ва жиноят иши юзасидан сўроқ қилинмаганлиги аниқланган.

16 ноябрь куни соат 16:10 ларда Н.Ж. Булунғур тумани ИИБ ЖҚБ хизмат хонасида бирламчи ҳужжатларни расмийлаштириш жараёнида соғлиғи ёмонлашиб, қон босими кўтарилиши ва юрак хуружи билан Тез тиббий ёрдам машинасида Булунғур тумани тиббиёт бирлашмаси жонлантириш бўлимига олиб борилган ҳамда шу ерда вафот этганлиги маълум бўлган.

Суд тиббий экспертизасининг маълумотига кўра, Н.Ж.нинг танасида тан жароҳатлари аниқланмаганлиги, дастлабки суд тиббий ташхиси — ўткир юрак қон томир етишмовчилиги, коронарокардиосклероз, юракнинг ишимик касаллиги эканлиги аниқланган.

Ҳозирда Н.Ж.нинг вафот этганлиги ҳолати юзасидан Булунғур туман прокуратураси томонидан терговга қадар текширув ҳаракатлари олиб борилмоқда ва тегишли экспертиза тайинланган.

Озодликнинг 18 ноябрдаги мақоласидан:

  • Насриддин Жабборов¸ унинг яқинларига кўра¸ узоқ йиллар давомида ИИБ томонидан махсус амалиëтларда роль ўйнаб беришга мажбурлаб келинган.
  • Ўтмишда уч марта қамашган. Олдинлари наша чеккан¸ лекин охирги марта қамоқдан чиққанидан кейин ичиш ва чекишни ташлаган эди. Ўзини ҳам Россиядан қайтиб келганидан кейин подстава билан наркотиклар савдосида айблаб¸ қамашган. Яна икки марта фирибгарлик билан қамашганди. Биз билан ҳамкорлик қиласан¸ деб уни муддатидан олдин чиқаришган. Махсус учëтда турарди. Уни жиноят қидирувдагилар подстава учун ишлатишарди. Айби бўлмаган одамларни қамашда роль ўйнашга мажбурлашарди. Бундан норози бўлиб президент портали¸ вилоят прокуратурасига шикоят ҳам ëзган. Бегуноҳ одамларни ўзларинг наркотик ташлаб қамаяпсизлар¸ деб оперлар билан очиқчасига урушган. Шунга шанба куни улар буни ўласи қилиб уриб¸ биратўла қутулиб қўя қолишди”¸ деган Озодликка Насриддин Жабборов оиласи вакили.

Таниқли киноактриса Гавҳар Шарипова автоҳалокатда вафот этди

Гавҳар Шарипова

Ўзбек киносининг ёш вакилларидан бири, актриса Гавҳар Шарипова 18 ноябрь куни Қашқадарё вилоятида юз берган автоҳалокат натижасида вафот этди. Айни пайтда ҳуқуқ-тартибот идоралари томонидан ҳодиса тафсилотлари ўрганилмоқда. Бу ҳақда "Ўзбеккино" хабар қилди.

Гавҳар Шарипова 1980 йилда Навоий шаҳрида туғилган. 2001 йилда Тошкент Давлат санъат институти (ҳозирги Ўзбекистон Давлат санъат ва маданият институти)ни драма-театр ва кино актёрлиги йўналиши бўйича тамомлаган. Ўзбек Миллий академик драма театрида фаолият кўрсатган. Г.Лессингнинг “Донишманд Натан” спектаклида Реха ролини маҳорат билан ижро этган.

Гавҳар ўзбек киносида ҳам ўзининг бир қатор такрорланмас образлари билан томошабинлар ёдида қолди. “Алпомиш” (2001) фильмида Қалдирғоч, “Алданган аёл” (2011) фильмида Мастура, “Опа-сингиллар” (2010) телесериалида Нафиса сингари қаҳрамонларни гавдалантирди. У қатор фильмларга овоз бериб, дубляж санъатида ҳам ўз имкониятларини намоён этди.

У нафақат актриса, балки шоира ҳам бўлиб, шеърлар ёзган, унинг шеърлари бир неча хонандалар томонидан қўшиқ қилиб куйланган.

“Ўзбеккино” Миллий агентлиги жамоаси ҳамда Ўзбекистон киноарбоблари уюшмаси марҳуманинг вафоти муносабати билан унинг яқинларига чуқур таъзия билдирди.

ДСҚ мамлакатда қанча корхона ишлаётганини хабар қилди

Иллюстратив сурат

2019 йил 1 ноябрь ҳолатига республикада жами фаолият кўрсатаётган корхоналар ва ташкилотлар сони 391,0 мингтага етди, деб хабар қилди Давлат статистика қўмитаси.

Ишлаётган корхоналарнинг 256,8 мингтаси хизмат кўрсатиш корхоналари бўлиб, шу жумладан савдо билан шуғулланувчи корхоналар 38 фоиздир..

Яшаш ва овқатланиш бўйича хизматларини кўрсатувчи корхоналар ва ташкилотларнинг сони 9,7 фоизни ташкил этди.

Ташиш ва сақлаш фаолияти билан шуғулланувчи ва хизматлар соҳасидаги тегишли фаолият кўрсатаётган корхоналар ва ташкилотларнинг уларнинг умумий сонидаги улуши 5,9 фоизга етди.

Ахборот фаолияти билан шуғулланувчи ва алоқа хизматларини кўрсатувчи корхоналар ва ташкилотларнинг улуши 3,1 фоизга тенг бўлди.

Соғлиқни сақлаш, шунингдек, ижтимоий хизматлар соҳасида фаолият кўрсатаётган корхоналар ва ташкилотларнинг улуши 3,0 фоизни ташкил этди.

Хизмат кўрсатиш соҳасидаги корхона ва ташкилотларнинг 40,3 фоизини ДСҚ "Бошқалар" категориясига киритиган.

Маълумот учун: 2018 йил 1 ноябрь ҳолатига, хизматлар соҳасида 210,3 мингта корхона ва ташкилот фаолият кўрсатган. Уларнинг умумий таркибида савдо хизматлари - 33,1 фоиз, яшаш ва овқатланиш бўйича хизматлар - 9,2 фоиз, ташиш ва сақлаш - 6,2 фоиз, ахборот ва алоқа - 3,3 фоиз, соғлиқни сақлаш ва ижтимоий хизматлар кўрсатиш - 3,2 фоиз, бошқа турлар - 45,0 фоизни ташкил этган,

Ўтган йилнинг шу даврига нисбатан фаолият кўрсатаётган корхоналар ва ташкилотлар сони 46,5 мингтага кўпайган.

Сайловолди ташвиқотларини бошлашга рухсат берилди

Сиёсий партиялар лидерлари МСКда.

18 ноябрдан Олий Мажлис Қонунчилик палатаси ҳамда маҳаллий кенгашлар депутатлари сайлови олдидан сиёсий партияларнинг ва депутатликка номзодларнинг сайловолди ташвиқотига старт берилди.

Бу ҳақда Адлия вазирлиги хабар қилди.

Сайлов кодексининг 44-моддасига мувофиқ, сайловолди ташвиқоти номзодларни рўйхатга олиш учун белгиланган охирги куннинг эртасидан эътиборан бошланади. Сайлов куни ва овоз беришга бир кун қолганида ташвиқотга йўл қўйилмайди.

22 декабрда Олий Мажлис Қонунчилик палатаси депутатлари ва маҳаллий кенгашлар депутатлари сайлови бўлиб ўтади.

Бош прокурор ўринбосари Светлана Ортиқова Фарғона водийсида сайёр қабулларни ўтказди

Светлана Ортиқова имконияти чекланган одамлар ҳолидан хабар олди.

Бош прокурор ўринбосари Светлана Ортиқова Наманган, Андижон ва Фарғона вилоятларида 11—16 ноябрь кунлари сайёр қабуллар ўтказиб, аҳолини қабул қилди.

Бош прокуратура матбуот хизматининг билдиришича, қабул давомида Светлана Ортиқова имконияти чекланган одамлар ҳолидан хабар олди ва уларга ногиронлар аравачаларини топширди.

“Сайёр қабуллар давомида жами 283 нафар фуқаронинг мурожаатлари қабул қилинди. Мурожаатларнинг 85 таси суд масалалари, 50 таси прокуратура, 57 таси ички ишлар иш юритувига ҳамда 91 таси бошқа масалаларга оид мурожаатни ташкил этган. Ушбу мурожаатларнинг ижроси бош прокуратура томонидан назоратга олинган. Бу борадаги ишлар давом этмоқда”, дейилади хабарда.

Светлана Ортиқова президентнинг жорий йил 7 ноябрдаги фармонига асосан Бош прокурорнинг ўринбосари лавозимига тайинланган эди. Бундан аввал у Ўзбекистон Сенати раиси ўринбосари лавозимида ишлаб келган.

“Ўзтрансгаз” автомобилга газ қуйишда муаммолар юзага келиши мумкинлигидан огоҳлантирди

Иллюстратив сурат.

“Ўзтрансгаз” автомобил ҳайдовчиларини яқин кунларда автомашиналарга сиқилган газ қуйишда муаммолар пайдо бўлиши эҳтимолидан огоҳлантирди.

Ширкатнинг 18 ноябрда расман билдиришича, Ўзбекистоннинг барча ҳудудларида об-ҳавонинг кескин совиб кетиши соат 17-00 дан 22-00 гача газ таъминоти тизимида айрим муаммоларни келтириб чиқариши мумкин.

“Ҳурматли автотранспорт эгалари! Куннинг кечки вақтларида (соат 17-00 дан 22-00 гача) аҳолига, ижтимоий аҳамиятга эга объектларга, шунингдек республиканинг иссиқлик, электр-энергия ишлаб чиқарувчи корхоналарига табиий газ максимум етказиб берилишини инобатга олиб, Сизлардан автомашиналарингизга сиқилган газ қуйишда ушбу вақтларда вужудга келиши мумкин бўлган вазиятларга тушунган ҳолда муносабатда бўлишингизни сўраймиз. АЖ истеъмолчиларни табиий газ билан таъминлашдаги узилишларнинг олдини олиш учун барча чораларни кўради”, дейилади хабарда.

“Ўзтрансгаз” аввалдан келиб чиқиши мумкин бўлган вақтинчалик ноқулайликлар учун ҳайдовчилардан узр сўради.

Фарғонада алимент тўлашни истамаган ота собиқ хотини ва икки боласини сувга чўктириб ўлдирди

Иллюстратив сурат.

Фарғонада 22 миллион сўмлик алимент пулини тўлашни истамаган 29 ёшли шахс ҳали қонунан ажрашмаган хотини ва икки боласини Катта Фарғона каналига чўктириб юборди.

MY5 телеканалининг «Марказий студия» кўрсатувида айтилишича, терговда у бу ишни шаръий никоҳдаги хотини билан келишган ҳолда амалга оширгани аниқланган.

Маълум қилинишича, 29 ёшли шахс 2011 йилда турмуш қурган биринчи хотини билан 2013 йилда ажрашган. У бир неча йил алимент тўламагани учун қарздорлиги 22 миллион сўмга етган.

Суд ҳукми билан эркак 19 йилга, унинг шаърий хотини эса 13 йилга озодликдан маҳрум этилди.

"Меҳр ва Оқибат" итга ўт қўйган одам ҳақида маълумот берганларга 2 миллион сўм ваъда қилди

Иллюстратив сурат.

Ташкентдаги ҳайвонларни ҳимоя қилиш “Меҳр ва Оқибат” жамияти фаоллари итнинг устига бензин сочиб ёқиб юборган одам ҳақида маълумот берган шахсларга 2 миллион сўм миқдорида мукофот ваъда қилди.

Меҳр ва Оқибат” жамияти 18 ноябрь куни Facebook тармоғидаги саҳифасида бу одамнинг исми Баҳодир бўлиши мумкинлигини билдирган.

Устига бензин сочилиб ёқиб юборилган ит видеоси октябрь ойининг охирларида ижтимоий тармоқларда пайдо бўлиб, одамларни ларзага солган эди.

“Меҳр ва Оқибат” жамияти бу одам тўғрисида тўпланган маълумотларни ички ишлар органларига тегишли тарзда жазо чоралари кўрилиши учун тақдим этишини маълум қилган.

Ўзбекистон қонунчилигида ҳайвонларга бешафқат муносабатда бўлингани учун энг кам иш ҳақининг 1дан 3гача бўлган миқдорида, яъни 203 минг сўмдан 608 минг сўмгача жаримага тортиш назарда тутилган.

Ўзбекистон тарихида биринчи марта бешкураш бўйича Олимпиада лицензиясини олган россияликларга мукофотлар топширилди

Бешкураш бўйича терма жамоа аъзолари. МОҚ сайтидан олинган сурат.

Ўзбекистон тарихида биринчи марта бешкураш бўйича Олимпиада лицензиясини қўлга киритган Александр Савкин ва Алисэ Фахрутдинова Тошкентда тантанали кутиб олинди ҳамда уларнинг ҳар бирига юз миллион сўмдан мукофот пули топширилди. Бу ҳақда 18 ноябрь куни Миллий Олимпия қўмитаси маълум қилди.

Россия спорт фуқаролигини тарк этиб, Ўзбекистон спорт фуқаролигини қабул қилган Александр Савкин ва Алисэ Фахрутдинова Токио олимпиадасига йўлланмага 12 ноябрь куни Хитойнинг Ухан шаҳрида ўтган Осиё ва Океания чемпионатида сазовор бўлган. Бунга қадар спортнинг бошқа турлари бўйича Ўзбекистон Токио олимпиадасига 11та йўлланмани қўлга киритган эди.

Бешкураш чемпионатида жамоа ҳисобида Ўзбекистон Жанубий Корея ва Япониядан кейинги учинчи ўринни эгаллади. Тўртинчи ва бешинчи ўринлар эса Хитой ва Қозоғистонга насиб қилди.

Жорий йилнинг 21 августида Алисэ Фахрутдинова ва Александр Савкин Россия ва Ўзбекистон Бешкураш федерациялари ўртасидаги имзоланган ҳамкорлик тўғрисидаги меморандум доирасида Тошкент спорт фуқаролигига ўтказилган эди.

29 ёшли Фахрутдинова эстафета бўйича жаҳон чемпионатида бронза, Европа чемпионатида кумуш медални қўлга киритган. У икки марта Россия чемпиони бўлган.

31 ёшли Савкин эса 2013 йилда эстафета бўйича жаҳон чемпиони бўлган. У, шунингдек, икки марта Европа ва беш карра Россия чемпиони ҳисобланади.

Бешкураш (пентатлон) спортнинг мураккаб турларидан бири бўлиб, унда спортчилар конкур, қиличбозлик, ўқ отиш, югуриш ва сувда сузиш мусобақаларида иштирок этадилар.

Самарқандда афюн сотмоқчи бўлган тожикистонликлар узоқ йилларга қамалди

Иллюстратив сурат.

Жорий йилнинг июнь ойида Самарқандда олти пакетга жойлаштирилган афюн моддасини сотмоқчи бўлган пайтда қўлга олинган икки нафар тожикистонлик 11 ва 12 йилданга қамалди. Бу ҳақда 18 ноябрь куни Ички ишлар вазирлиги Тергов департаменти маълум қилди.

Тожикистоннинг 34 ва 36 ёшдаги фуқаролари Хоразм вилоят Ички ишлар бошқармаси ва ДХХнинг қўшма амалиёти пайтида қўлга олинган эди. Улар 5 июнь куни ВАЗ-2110 автомашинасининг бензобакида олтита сув қоғозга ўралган афюн моддасини олиб ўтишган ҳамда Самарқандда 20 минг долларга сотишга ҳаракат қилган пайтларида қўлга олинган.

Тожикистонликларнинг афюн моддасига харидор ролини Ички ишлар вазирлиги ходими ўйнаган.

Хабарда айтилишича, ўтган йили Ўзбекистонда наркотик моддалар ноқонуний савдоси билан шуғуллангани учун хориж давлатларининг 45 нафар фуқароси қўлга олинган. Улардан 1960 килограмм гиёҳванд модда мусодара қилинган.

Британия элчиси Тошкент шаҳар ҳокимининг журналистларга таҳдидидан ташвиш билдирди

Буюк Британиянинг Ўзбекистондаги элчиси Тим Торлот

Буюк Британиянинг Ўзбекистондаги элчиси Тим Торлот Тошкент шаҳар ҳокими Жаҳонгир Ортиқхўжаевнинг журналистлар билан мулоқоти чоғида уларга таҳдид қилганидан ташвиш билдириб, бу масалани у билан учрашув чоғида муҳокама қилишини билдирди.

Твиттер орқали баёнотида Британия элчиси “журналистлар хавфсизлиги матбуот эркинлигининг тамал принципи эканлигини, Буюк Британия ҳар доим эркин матбуот ва журналистлар ҳимоясини қўллаб-қувватлвчилар ортида туражагини” билдирди.

16 ноябрь куни тармоққа чиқарилган ва Жаҳонгир Ортиқхўжаев овози, деб иддао қилинаётган аудиоёзувда, овоз эгаси кўча тилида журналистларни гейга чиқариш ва сазойи қилиши билан таҳдид қилган.

Бош прокуратура ижтимоий тармоқлар ва маҳаллий нашрларда тарқалган ҳамда Тошкент шаҳар ҳокими Жаҳонгир Ортиқхўжаевга тегишли экани иддао қилинган аудиоёзув бўйича суриштирув бошлаганини билдирди.

Мактаб билан ароқ магазини ўртасидаги масофа 300 метрга қисқарди

МХХ ташкил этилганига бағишлаб чиқарилган ароқ

Таълим, спорт ва диний муассасаларга 200 метргача масофада жойлашган савдо объектларига алкогол ва тамаки маҳсулотларини сотишга рухсат берилди. Бу ҳақда хабар қилган gazeta.uzга кўра, бунга қадар ушбу масофа 500 метрни ташкил этар эди.

14 ноябрь куни президент томонидан имзоланган тузатишлар киритиш тўғрисидаги қонун 15 ноябрдан кучга кирди.

Бунда савдо объекти умумий савдо майдони минг квадрат метрдан ортиқ бўлган савдо мажмуаларининг (бозорларнинг) ва ярмарка павильонларининг ҳудудларида жойлашган ҳоллар мустасно.

Алкогол ва тамаки савдосидаги чекловларга ўзгартишлар киритиш президентнинг 5 февралдаги фармонида кўзда тутилган эди.

Самарқандда икки ишчи тупроқ босиб қолиб ўлди

Иллюстратив сурат

Самарқанд шаҳар, Боғимирзо маҳалла фуқаролар йиғини ҳудудидаги Хишрав кўчасида сувоқава қувурида таъмирлаш ишларини олиб бораётган икки ёлланма ишчи тупроқ босиб қолиши оқибатида ҳалок бўлди.

Бу ҳақда 18 ноябрда хабар қилган "Постда" газетасига кўра, воқеа 13 ноябрь, соат 12:30 ларда содир бўлган. Нашр ҳалок бўлганлар исм-фамилияси бош ҳарфларидан (Н. Р. ва П. Д.) бошқа уларнинг шахсига оид маълумотларни ва воқеа тафсилотларини очиқламаган.

Айни пайтда суриштирув ишлари олиб борилаётгани хабар қилинди.

"Mont Blanc" хусусий шифохонаси билан боғлиқ ўлим ҳолатлари бўйича жиноят иши қўзғатилди

13 ноябрда Москвада вафот этган 22 яшар самарқандлик талаба Ўлмасхон Баҳронов ҳам дастлаб "Mont Blanc" пациенти бўлган.

Тошкентдаги "Mont Blanc" хусусий шифохонасида ўтказилган жарроҳлик амалиётидан сўнг беморлар ўлими ҳолатлари бўйича Бош прокуратура жиноят иши қўзғади.

18 ноябрда Бош прокуратуранинг маълум қилишича, 12 ноябрда ЖКнинг 116-моддаси (Касб юзасидан ўз вазифаларини лозим даражада бажармаслик) 4-қисми «а,б» бандлари билан жиноят иши қўзғатилган.

Ҳозирда ушбу жиноят иши бўйича Шайхонтоҳур туман прокуратурасида дастлабки тергов ҳаракатлари олиб борилмоқда, унинг бориши Бош прокуратура томонидан назоратга олинган.

Бундан ташқари, туман прокуратураси томонидан юқоридаги каби ҳолатларни келгусида содир этилишини олдини олиш бўйича Соғлиқни сақлаш вазирлигига тақдимнома киритилган.

"Mont Blanc" хусусий шифохонаси устидан жиноят иши очилишига асос бўлган ҳолатлар тўғрисида Озодлик хабар қилган эди.

13 ноябрда Москва шифохоналаридан бирида шу йилнинг августидан буён комада ётган 22 яшар самарқандлик талаба Ўлмасхон Баҳронов вафот этди. Жума, 15 ноябрга ўтар кечаси Ўлмасхоннинг жасади Ўзбекистон консуллиги ва Ташқи меҳнат миграцияси агентлиги кўмагида Самарқандга юборилди.

Баҳроновлар оиласи ҳимоячилари Ўлмасхоннинг комага тушишида Тошкентдаги Mont Blanc​ хусусий клиникаси врачлари қўли борлигини иддао қилган.

Жорий йилнинг 24 августида Тошкентнинг Mont Blanc хусусий пластик хирургия клиникасида жарроҳлик амалиётидан ўтаётган 20 яшар самарқандлик Гулшан Шарифова вафот этган эди. Бундан 5 кун олдин, 19 август куни, худди шунақа операция пайтида клиникада 42 яшар қозоғистонлик Лилия Апостолова ҳам вафот этгани тўғрисида Озодлик хабар қилганди.

Фарғонада газ портлади, 1 киши жароҳат олди

18 ноябрь, соат тахминан 12:00 да Фарғона вилоят, Олтиариқ туман, Х.Олимжон маҳалласидаги икки қаватли уйларнинг бирида содир бўлган портлашдан 1 киши жароҳат олди.

Бу ҳақда хабар қилган ИИВ ҳузуридаги Тергов департаментига кўра, тўпланиб қолган газ портлаган.

Ҳодиса содир бўлган жойига зудлик билан етиб борган тергов тезкор гуруҳи ишлаётгани хабар қилинди.

Ўзбекистонда бир ой ичида ис газидан заҳарланиб ўлганлар сони камида 15 нафарга етди.

“Туркистон ислом ҳаракати” гуруҳи аъзоси 9 йилга қамалди

“Туркистон ислом ҳаракати” аъзолари.

Андижон вилоятининг Асака туманида туғилган 33 ёшли Ботир Мадаминов “Туркистон ислом ҳаракати” гуруҳига аъзо бўлганлик ва Покистондаги жанговар ҳаракатларда иштирок этганликда айбдор деб топилиб, 9 йилга қамалди.Унга нисбатан суд жараёни Ўзбекистонда ўтказилган.

ЎзАнинг хабар беришича, Ботир Мадаминов 2008-2011 йилларда Россияда ишлаган.

“У 2011 йилнинг декабрь ойида фарғоналик Абдураҳим ва андижонлик Умид исмли шахслар билан биргаликда қурилиш ишларида ишлайди. Аммо бу икки кимса “Жиҳодчилар” диний экстремистик ташкилотининг “Москва жамоати” аъзолари бўлганликлари боис, улар аста-секин Ботирни “ҳижрат”, “жиҳод” қилишга даъват этишади. Натижада Ботир уларга эргашиб, “Жиҳодчилар” оқимининг “Москва жамоати” аъзосига айланади”, деб ёзади агентлик.

Ботир Мадаминов 2011 йил декабрь ойида Покистоннинг Мир-Али шаҳрига бориб, “Туркистон ислом ҳаракати” халқаро террористик ташкилотига қўшилади.

2012-2013 йиллар давомида “Носир” тахаллуси остида Покистон ҳукумати қўшинларига қарши жанговар ҳаракатларда иштирок этади.

2015 йилнинг охирида Ботир Мадаминов “Ислом Давлати Хуросон вилояти” террор гуруҳига аъзо бўлади. 2019 йилнинг 3 апрель куни у ватанига қайтганида қўлга олинган.

Петербургда яна бир ўзбекистонликка ҳужум қилган тўрт ўсмир қўлга олинди

Рус миллатчилари.

Санкт-Петербургнинг Ленин туман суди Ўзбекистон фуқаросига миллий нафрат асосида ҳужум қилганликда гумонланиб қўлга олинган тўрт ўсмирдан бир нафарини эҳтиёт чораси сифатида 2020 йилнинг 13 январигача қамоқда қолдирди, қолган тўрт ўсмирга эса уй қамоғи жазосини тайинлади.

Санкт-Петербург судлари бирлашган матбуот хизматининг билдиришича, бундай қарор 16 ноябрь куни чиқарилган.

15 ноябрь куни Ўзбекистон фуқаросига ҳужум қилган 15-17 ёшли ўсмирлар қўлга олингани билдирилган эди. Улар Петербургдаги боғлардан бирида ўзбекистонликни калтаклаб, ундан Россияни тарк этишни талаб қилишган.

14 ноябрь куни ҳам Санкт-Петербургнинг Красногвардейский туман суди 38 яшар ўзбекистонликка ҳужум қилган 3 нафар коллеж талабасини ҳибсга олган эди.

Ўсмирлар ўзбекистонлик меҳнат муҳожирини пичоқлаб, ундан қўл телефони ва пулини тортиб олган.

Беш жойидан пичоқланган, танасининг бошқа қисми лат еган ва мияси чайқалган ўзбекистонлик маҳаллий шифохоналардан бирида ўрта оғирликдаги аҳволда қолмоқда.

Марказий Осиё давлатлари президентлари Тошкентда қачон учрашиши аниқ бўлди

Минтақа давлатлари раҳбарларининг биринчи норасмий учрашуви 2018 йилда Остона (ҳозирги Нур-Султон)да ўтказилган эди.

Марказий Осиё давлатлари президентларининг иккинчи консультатив учрашуви Тошкентда 29 ноябрь куни ўтказилади. Бу ҳақда Ташқи ишлар вазирлиги маълум қилди.

Аввалроқ агентликлар 12 ноябрь куни Қозоғистоннинг биринчи президенти Нурсултон Назарбоев Тошкент учрашуви 27 ноябрда ўтказилишини айтгани ҳақида хабар берган эди.

Назарбоев 27 ноябрга мўлжалланган учрашув кечиктирилмасдан, ўз вақтида ўтказилишига умид билдирганди.

2018 йилнинг март ойида Остона (ҳозирги Нур-Султон)да Марказий Осиё давлатлари раҳбарларининг биринчи консультатив учрашуви бўлиб ўтган.

Иккинчи консультатив учрашув 2019 йил мартида Тошкентда ўтказилиши режалаштирилганди. Бироқ Ўзбекистон Ташқи ишлар вазирлиги июль ойида учрашув кузда ўтказилишини билдирган, аммо учрашувнинг аниқ кунини маълум қилмаган эди.

Ўзбекистон президенти Шавкат Мирзиёев 2017 йил сентябрида БМТ Бош Ассамблеясининг 72-сессиясида сўзлаган нутқида минтақа давлатлари раҳбарларининг норасмий учрашувини ташкил этиш ғоясини олға сурган эди.

Kun.uz ўз журналистларини ҳақорат қилган Тошкент шаҳар ҳокими билан "муросага келгани"ни билдирди

Тошкент ҳокими Жаҳонгир Ортиқхўжаев.

Kun.uz таҳририяти Тошкент шаҳри ҳокими Жаҳонгир Ортиқхўжаев билан ўзаро муросага келди. Бу ҳақда Kun.uz 17 ноябрда хабар берди.

Нашрнинг ёзишича, 17 ноябрь куни Kun.uz таҳририяти вакиллари Жаҳонгир Ортиқхўжаев билан учрашган.

“Шуни расман маълум қилмоқчимизки, мазкур мулоқот якунига кўра сайт жамоаси ва пойтахт ҳокимлиги раҳбарияти ўртасидаги барча тушунмовчиликлар барҳам топди. Томонлар бир-бирини тушуниб, ўзаро муросага келди”, дейилади хабарда.

Kun.uz бошқа нашрлардан “бу масалани ортиқ муҳокама қилмасликни сўраймиз, зеро фақат икки тарафгагина тегишли бу низо турли сиёсий кучлар ва шахслар томонидан тор манфаатлар йулида қурол сифатида фойдаланилишини хоҳламаймиз”, деб илтимос қилган..

16 ноябрь куни ижтимоий тармоқларда Жаҳонгир Ортиқхўжаевга тегишли экани иддао қилинган аудиоёзув тарқатилган эди.

Ёзувда, овоз эгаси журналистларни жисмонан йўқ қилиш, гейга чиқариб маҳалласида сазойи қилишини айтиб, очиқдан-очиқ таҳдид қилади.

Kun.uz нашри бу таҳдидлар нашр мухбирлари - Раҳматилла Исроилов, Шерзод Эгамбердиев ва Баҳодир Аҳмедовлар ҳоким қабулида бўлган чоғда янграгани ҳақида ёзган эди.

Бош прокуратура 17 ноябрда аудиоёзув бўйича суриштирув бошлаганини билдирганди.

Байроқ қабул қилинган кун муносабати билан вазирлар пиёда марафонга чиқди

Соғлиқни сақлаш вазирлиги ташаббуси билан 16 ноябрь куни Тошкентда пиёда юриш марафони ўтказилди.

Расмий хабарга кўра, Тошкентдаги “Ашхобод” сайилгоҳида ўтказилган марафонда минглаб одам иштирок этган.

Уларнинг сафида Хотин-қизлар қўмитаси раиси Элмира Боситхонова ва Соғлиқни сақлаш вазири Алишер Шодмоновлар ҳам бўлди.

1991 йил 18 ноябрда “Ўзбекистон Республикасининг давлат байроғи тўғрисида”ги қонун қабул қилинган.

Вазирлик хабарида айтилишича, оддий пойтахтликлару амалдорлар иштирокидаги марафондан мақсад "соғлом турмуш тарғиботи"дир.

Давомини ўқинг

XS
SM
MD
LG