Линклар

Шошилинч хабар
29 март 2020, Тошкент вақти: 12:05

Халқаро хабарлар

Каталония президенти "бир неча кун ичида" мустақиллик эълон қилинишини билдирди

Каталонияда 1 октябрда мустақиллик бўйича референдум ўтказилган эди.

Испаниянинг Каталония мухторияти президенти Карлес Пуижмонт 3 октябрь куни минтақа “бир неча кун ичида ўз мустақиллигини эълолн қилиши”ни айтди.Би Би Си радиосига интервью берган Пуижмонт “бу ишни ҳукумат шу ҳафта охири ёки кейинги ҳафтанинг бошларида амалга оширади” деб билдирди.

Испания ҳукумати ва Қироли Каталония мухториятининг мустақиллик эълон қилиниши тўғрисидаги баёнотларини кескин қоралмоқда. Жумладан, бош вазир ўринбосари Сорайя Саенц де Сантамария:

-Бу ҳаракатлар мафиозларникига ўхшайди. Биз Каталония муниципалитетларининг мафияга ўхшаш ҳаракатларига тоқат қилиб турмаймиз, -деб айтди.

Каталония расмийлари 1 октябрь куни ўтказилган мустақиллик бўйича референдумда овоз берган сайловчиларнинг 90 фоизи ёки 2 миллион 260 минг нафари мустақиллик тарафдори эканини билдирганини маълум қилган. Референдумда овоз бериш ҳуқуқига эга бўлган аҳолининг 42 фоизи иштирок этган.

Испания Конституциявий суди референдумни ноқонуний деб топган. Испания полицияси референдумга тўсқинлик қилиши оқибатида юз берган тўқнашувларда 900га яқин одам жароҳатланган эди.

Кун янгиликлари

Афғонистон ҳукумати Толибон билан музокара ўтказувчи гуруҳ тузди

Афғонистон ҳукумати мамлакатда 18 йилдан бери тинчимаётган урушни тугатиш мақсадида Толибон жангари гуруҳи билан музокара ўтказиш учун 21 аъзоли гуруҳ тузди. Мамлакат расмийлари музокарачилар рўйхати «барча тарафлар билан маслаҳатлашиб» тузилганини билдирди.

Гуруҳга Миллий хавфсизлик бошқармасининг собиқ раиси Масъум Станекзой етакчилик қилади. Қолган аъзолар орасида сиёсатчилар, собиқ расмийлар ҳамда фуқаровий жамият аъзолари бор.

Ҳукумат билдирувида музокаралар қачон ва қаерда ўтказилиши очиқланмади.

Жорий йилнинг февралида Доҳада АҚШ ва Толибон имзолаган келишувга биноан жангари гуруҳ Афғонистон ҳукумати билан музокара олиб боришга рози бўлган эди.

Мазкур келишувда Толибон Афғонистон ҳукумати билан музокара ўтказиш билан бир қаторда хавфсизлик кафолатларини зиммасига олди, бунинг эвазига АҚШ ўз қўшинларини 14 ой ичида мамлакатдан олиб чиқишга рози бўлди.

АҚШнинг Афғонистондаги махсус вакили Залмай Халилзод Афғонистоннинг сиёсий ва фуқаровий жамияти етакчиларини «инклюзив» музокара гуруҳи тузилгани билан табриклади.

Ҳозирча президент Ашраф Ғанининг рақиби Абдулла Абдулла тузилган рўйхатни қўллаши ёки қўлламаслиги номаълум. Абдулла сўнгги президент натижаларини тан олмай, президентликка даъвогарлик қилмоқда

Ҳафта бошида Афғонистон ҳукумати Толибон билан маҳбус алмашиш режасини муҳокама қилиш учун жангари гуруҳ вакиллари билан учрашишини маълум қилган эди.

Россиялик тўрт енгил атлетикачи допинг истеъмол қилишда айбланмоқда

Андрей Сильнов 2018 йилги ёзги Олимпиада ўйинларида юқори сакраш бўйича олтин медални қўлга киритган.

Тўрт нафар россиялик енгил атлетикачи допинг қабул қилишда айбланмоқда. Уларнинг икки нафари Олимпиада ўйинларида олтин медални қўлни киритган.

2018 йилги ёзги Олимпиада ўйинларида юқори сакраш бўйича олтин медални қўлга киритган Андрей Сильнов ҳамда 2012 йилги Олимпиада ўйинларида 400 метрга югуриш эстафетасида олтин медални қўлга киритган Наталья Антюх ман этилган модда ёки услублардан фойдаланишда айбланмоқда.

Айбловларга канадалик ҳуқуқшунос Ричард Макларен Бутунжаҳон антидопинг ташкилоти (WADA) учун ўтказган тергов асос бўлди.

Сильнов 2019 йилгача Бутунроссия енгил атлетика федерацияси вице-президенти бўлган. Енгил атлетикада допингга қарши курашувчи Athletics Integrity Unit (AIU) мустақил ташкилоти спортчини ман этилган стероиддан фойдаланишда айбламоқда.

Шунингдек, россиялик спортчилар Елена Соболева ҳамда Оксана Кондратьевалар ҳам допинг қабул қилишда гумонланмоқда.

Россиялик спортчиларга қўйилган айбловларни Спорт арбитраж суди кўриб чиқади. Аммо ҳали суд эшитишлари санаси белгилангани йўқ.

Шимолий Македония расман НАТО аъзоси бўлди

Шимолий Македония бир неча йилга чўзилган жараён ортидан НАТО ҳарбий альянсига расман аъзо бўлди.

Альянс эълон қилган билдирувда Шимолий Македония Вашингтонда АҚШ Давлат департаментига «аъзо бўлиш инструментини» топшириши билан мамлакатнинг альянсга қўшилиш йўли ўз ниҳоясига етгани айтилади.

Шимолий Македония НАТОга қўшилган 30-давлатдир.

Мамлакат 2018 йилда Греция билан узоқ йиллар давом этган келишмовчиликни ҳал этиш мақсадида ўз номини Шимолий Македонияга ўзгартирган эди.

Натижада 2019 йилнинг февралида Шимолий Македонияга НАТОга аъзо бўлиш протоколи берилди.

20 март куни Шимолий Македония президенти Стево Пендаровский барча НАТОга аъзо давлат парламенти мамлакат аъзолигини ратификация қилишни қўллаши ортидан ҳарбий альянсга аъзо бўлиш йўлидаги якуний ҳужжатни имзолаган эди.

НАТО бош котиби Йенс Столтенберг:

- Шимолий Македония энди 30 давлат ва деярли 1 миллиард одамни қамровчи НАТО оиласининг аъзосидир. Бу оила қандай мушкулликларга дучор бўлишимиздан қатъи назар, биргаликда кучлироқ ва хавфсизроқ бўлишимизга ишонади, — деди.

30 март куни НАТО қароргоҳи жойлашган Брюссель шаҳрида Шимолий Македония байроғи қолган 29 аъзо давлат байроғи қаторига қўшилади.

Путин маъмурияти ходими коронавирусга чалинди

Россия президенти Владимир Путин маъмурияти ходими коронавирусга чалинди.

Кремлнинг маълум қилишича, бу ходим Путин билан тўғридан-тўғри мулоқотда бўлмаган.

Президент матбуот котиби Дмитрий Песков:

- Ҳақиқатан президент маъмуриятида коронавирус юқтириш ҳолати аниқланди, — деди.

- Вирус тарқалиши олдини олиш учун барча керакли санитар ва эпидемиологик чоралар кўрилмоқда. Касалликка чалинган шахс президент билан юзма-юз кўришмаган, — дея қўшимча қилди котиб.

Аммо Песков ушбу ҳолат тафсилотларини очиқламади.

Россияда коронавирус пандемиясига қарши кураш доирасида 28 мартдан бошлаб барча ресторанлар ва кафеларни ёпиш буюрилди.

Сўнгги хабарларга кўра, бугунга қадар Россияда 1036 нафар одам коронавирусга чалинди, тўрт бемор вафот этди.

Жаҳон бўйлаб эса шу пайтгача COVID-19 касаллигини келтириб чиқарувчи коронавирусини юқтириб олганлар сони 600 минг нафардан, вафот этганлар сони эса 27 минг нафардан ошди.

Халқаро валюта жамғармаси коронавирусга қарши кураш учун Қирғизистонга $121 миллион фавқулодда қарз берди

Қирғиз парламенти биноси дезинфекция қилинмоқда.

Халқаро валюта жамғармаси бошқарув кенгаши коронавирус пандемиясига қарши кураш учун Қирғизистон ҳукуматига
$121 миллион фавқулодда қарз ажратишга қарор қилди.

Жамғарма ижроия директори Кристалина Георгиева 26 март кунги баëнотида пандемиянинг қирғиз иқтисодига қаттиқ зарба бергани ва "тўловларни мувозанатга солиш" билан боғлиқ жиддий муаммо туғдирганини билдирди.

“Вирус тарқашини тўхтатишга қаратилган чора-тадбирлар қабул қилиниши ортидан иқтисоднинг барча секторига ниҳоятда кучли зиëн етмоқда”¸ дейилади ХВЖ раҳбари баëнотида.

ХВЖ ажратган қарзнинг Қирғизистонга қарз берган донорлар таянчини қозониш ва коронавирус билан боғлиқ соғлиқни сақлаш тизимидаги харажатларни қоплашга ëрдам бериши кутилмоқда.

Расмий баëнотга кўра¸ Қирғизистон коронавирус пандемияси боис оғир иқтисодий аҳволга тушиб қолган Марказий Осиë давлатлари орасида ХЖВдан қарз олган биринчи давлатдир.

Жон Ҳопкинс университети юритаëтган тадқиқотга кўра¸ 27 мартга келиб Қирғизистонда 44 одамнинг вирус юқтиргани расман қайд этилган¸ ҳозирча ўлим ҳолати кузатилмаган.

Аммо вирусга чалинганлар ҳақиқий сонининг бундан бир неча баравар кўплиги тахмин қилинмоқда.

АҚШ коронавирусга чалинганлар сони бўйича дунёда биринчи ўринга чиқди

Нью-Йорк кўчаларидан бири, 2020 йил 25 марти.

Қўшма Штатлар 26 март оқшомида жаҳон бўйлаб коронавирусга чалинганлар сони бўйича биринчи ўринга чиқди. Бу пайтга келиб мамлакат вирус тарқалишни бошлаган Хитойни ҳам ортда қолдирди.

Жонс Хопкинс университетига қарашли сайт маълумотларига кўра, ҳозирда АҚШда коронавирус инфекцияси 85 минг 505 кишида тасдиқланган.

АҚШ Конгресси Намояндалар палатаси 27 март куни пандемия шароитида ватандошлар ва иқтисодиётни қўллаб-қувватлашга оид қиймати 2 триллион долларга тенг бўлган қонун лойиҳасини маъқуллаши кутилмоқда.

Сўнгги маълумотларга кўра, жаҳон бўйлаб шу пайтгача COVID-19 вирусини юқтириб олганлар сони 531 минг нафардан, вафот этганлар сони эса 24 минг нафардан ошиб кетган.

Қозоғистонда коронавирус билан боғлиқ илк ўлим ҳолати қайд этилди

Коронавирус билан боғлиқ илк ўлим хабарини ахборот вазири Даурен Абаев берди.

Қозоғистонда коронавирусга чалинганлар орасида илк ўлим ҳолати қайд этилди. Бу ҳақда 26 март оқшомида ахборот ва ижтимоий тараққиёт вазири Даурен Абаев маълум қилди.

Абаевга кўра, ҳаётдан кўз юмган бемор аёл киши бўлган.

“Эртага Нур-Султон соғлиқни сақлаш бошқармаси унга оид тиббий кўрсаткичлар бўйича тўлиқ маълумот беради. Бу ҳолат бизга коронавируснинг нақадар хавфли эканини яна бир бор эслатади”, деган вазир марҳуманинг яқинларига ҳамдардлик билдирди.

Бу Марказий Осиёда COVID-19 вируси билан боғлиқ илк ўлим ҳолатидир.

Аввалроқ қозоқ расмийлари коронавирусга чалинганларнинг кўпида симптомлар кўринмаётгани ёки бемор ҳароратининг бироз ошганида акс этаётганини маълум қилгандилар. 26 март куни пойтахт Нур-Султон соғлиқни сақлаш бошқармаси бошлиғи Сауле Кисикова шаҳарда вирусга чалинган тўрт беморнинг аҳволи оғирлигини билдирган.

Сўнгги маълумотларга кўра, Қозоғистонда COVID-19 вирусини юқтириб олганлар сони 120 нафарга етган. Жумладан, пойтахт Нур-Султонда шу пайтгача коронавирусга чалиниш билан боғлиқ 60 та, Олмаотада 47 та, Қарағандада 4 та, Жамбилда 3 та, Чимкентда 2 та, Ақтўбе, Ақмола, Олмаота ва Шимолий Қозоғистон вилоятларида эса биттадан ҳолат қайд этилган.

АҚШ FBI собиқ агентининг тутқунликда ўлгани бўйича Теҳрондан изоҳ талаб қилди

АҚШ ҳукумати Левинсоннинг ватанига тирик қайтиши учун 1 миллион доллар мукофот ваъда қилган эди.

АҚШ маъмурияти Теҳрон ҳукуматидан FBI – Федерал тергов бюросининг собиқ агенти Роберт Левинсоннинг ўлими юзасидан тўлиқ ҳисобот талаб қилди.

Вашингтондагилар бундан 13 йил олдин Эронда бедарак йўқолган Левинсоннинг анча олдин тутқунликда ўлганини тахмин қилмоқда. Йўқолган пайтда 58 ëшда бўлган Левинсон¸ Эрон ҳукуматига яқин нашрлар тарқатган хабарга кўра¸ хавфсизлик хизматлари томонидан ҳибсга олинган. Расмий Теҳрон Левинсоннинг ўз қамоғида эканини тан олган эмас.

Миллий хавфсизлик бўйича АҚШ президенти маслаҳатчиси Robert O'Brien 25 март куни “АҚШ Левинсон ишини қабул қилиши учун¸ Эрон унга нима бўлганига оид тўлиқ ҳисоб бериши шарт”лигини билдирди.

Левинсон оиласи ва ўз маслаҳатчисининг унинг ўлимига оид баëнотидан сўнг президент Трамп¸ FBI собиқ агентининг ўлгани ҳақидаги хабарни “қабул қилмаслиги”¸ ҳамон унинг тирик эканига ишонишини билдирди.

Левинсон 2007 йили Эроннинг Киш оролига борганида ўғирлаб кетилган. АҚШ ҳукумати Левинсоннинг ватанига қайтарилишига ëрдам берадиган маълумот учун 1 миллион доллар мукофот пули ҳам эълон қилган эди.

Ўшандан бери АҚШ ҳукумати Эрондан унинг қаердалигини аниқлаб¸ ватанига қайтаришни сўраб бир неча бор мурожаат қилган¸ аммо Теҳрон Левинсон тақдиридан бехабарлигини айтиб¸ бу сўровларни рад этиб келган.

Украина собиқ Ташқи ишлар вазири қотилликда айбланиб¸ қамоққа олинди

Украина собиқ Ташқи ишлар вазири Леонид Кожара Британиянинг ўтмишдаги Ташқи ишлар вазири¸ ҳозирги Бош вазири Борис Жонсон билан. 2017 йил.

Украина полицияси 25 март куни мамлакат собиқ Ташқи ишлар вазири Леонид Кожарани ҳибсга олди. Шу куниëқ ўтказилган дастлабки суд ҳукми билан Кожара эҳтиëт чораси сифатида қамоқда сақланадиган бўлди.

2012-2014 йилларда россияпараст Виктор Янукович ҳукуматининг бош дипломати бўлган Кожара Inter TV телеканали бош директори Сергей Старицкийни отиб ўлдирганликда гумонланмоқда.

Россияпараст телеканал раҳбари 22 февраль куни Кожаранинг Киев ташқарисидаги уйида ўлик ҳолда топилган эди.

Воқеа пайтида уйда бўлган эр-хотин Кожаралар¸ 56 яшар Старицкийнинг ўз жонига қасд қилганини айтган.

Украина полициясининг билдиришича¸ Кожара ва Старицкий маст ҳолда урушиб қолган ва собиқ Ташқи ишлар вазири тўппончаси билан телемагнатни отиб ўлдирган.

Миллий полиция¸ тергов давомида собиқ вазирга бундай айб қўйиш учун етарли далил тўпланганини билдирди.

57 яшар Кожарага қўйилаëтган қотиллик айби судда тасдиғини топса¸ у 15 йилгача қамалиши мумкин.

Қозоғистонда коронавирусга чалинганлар сони 100 га яқинлашди

Нур-Султон кўчаларида дезинфекция ишларини амалга ошираётган ишчилар, 2020 йил 24 марти.

Қозоғистон Соғлиқни сақлаш вазирлиги 26 март куни тушга яқин пойтахт Нур-Султонда коронавирус юқтириб олиниши билан боғлиқ яна 9 та ҳолат қайд этилгани, шу билан инфекцияга чалинганлар сони 97 нафарга етганини маълум қилди.

Маълумотларга кўра, пойтахт Нур-Султонда шу пайтгача вирусга чалиниш билан боғлиқ55 та, Олмаотада 34 та, Қарағанда ва Чимкентда 2 тадан, Ақтўбе, Жамбил, Олмаота ва Шимолий Қозоғистон вилоятларида эса биттадан ҳолат қайд этилган.

Аввалроқ қозоқ расмийлари вирус юқтириб олгани тасдиқланган икки бемор соғайиб кетганини билдиргандилар.

Россия: 27 мартдан хорижий мамлакатларга барча парвозлар тақиқланади

Россия ҳукумати шу йил 27 мартидан хорижий давлатларга чартер ва мунтазам парвозларни тақиқлаш ҳақида қарор қабул қилди. Бунга оид топшириқ Росавиацияга Коронавирусга қарши кураш бўйича мувофиқлаштирувчи кенгаш президиумининг мажлиси якунига кўра берилган. Бундан фақат россияликларни хориждан қайтараётган рейслар ҳамда “ҳукуматнинг алоҳида қарорига кўра” амалга ошириладиган парвозлар мустасно, холос.

Коронавирус билан боғлиқ ҳолатлар қайд этилган мамлакатлардан келган йўловчиларнинг барчаси инфекция бор-йўқлиги бўйича аэропортнинг ўзида дастлабки текширувдан ўтказилади. Ҳозирда чет элдан қайтаётган россияликлар учун икки ҳафталик мажбурий карантин кўзда тутилган.

Коронавирус инфекцияси тарқалиши қабатида Россия расмийлари аввалроқ бирин-кетин бошқа мамлакатлар билан чегараларини ёпган ва парвозларга чеклов киритган. Бироқ сўнгги пайтгача қатор мамлакатлар пойтахтлари билан ҳаво қатнови бекор қилингани йўқ эди.

Коронавирус қурбонлари сони жаҳон бўйлаб 21 минг нафардан ошди

COVID-19 инфекцияси туфайли ҳаётдан кўз юмганлар сони 21 минг 300 кишига етди.

Қурбонларнинг энг кўпи Италияда (7500 дан зиёд), кейинги ўринларда эса Испания (3600 нафардан кўпроқ) ва Хитой (3287 киши) келмоқда.

Сўнгги маълумотларга кўра, жаҳон бўйлаб коронавирусга чалинганлар сони 471 минг кишидан ошган. Инфекцияни юқтириб олганлар сони бўйича Хитой ҳамон биринчи ўринда (81 мингдан зиёд) турибди.Иккинчи ўринда Италия (74 мингдан кўпроқ), учинчи ўринда эса АҚШ (68 мингдан ортиқ) турибди.

Коронавирус тарқалишининг олдини олиш учун расмийлар томонидан киритилган чекловлар туфайли миллионлаб одам карантин тартибида яшашга мажбур бўлмоқда. Карантин жорий этилган мамлакатлар қаторида Ҳиндистон, Буюк Британия, Италия, Франция, Испания, Исроил, АҚШнинг қатор штатлари бор.

Ўзбекистонда вирус юқтириб олганлар сони, 25 март ҳолатига кўра, 60 кишини ташкил этмоқда.

Путин референдум санасини номаълум муддатга кўчирди

Россия президенти Владимир Путин.

Россия президенти Владимир Путин Конституцияга тузатишлар киритишга оид овоз бериш санаси кўчирилиши ҳақида эълон қилди. Мазкур тузатишлар унга 2036 йилгача ҳокимият тепасида қолиш имконини бериши мумкин.

Кремль сайти орқали ёйинланган ўз мурожаатида Путин аҳоли, кичик ва ўрта бизнес учун имтиёзлар жорий қилиниши, бадавлат россияликлар ва йирик бизнес учун солиқлар оширилишини ваъда қилган.

Россия президенти коронавирус тарқалиши сабабли овоз бериш санасини 22 апрелдан кейинроққа суриш лозимлигини билдирди, бироқ референдумнинг янги санасини очиқлагани йўқ. Бундан ташқари, Путин келаси ҳафтани (30 мартдан 5 апрелгача) Россияда ойлик маоши сақлаб қолинадиган ҳордиқ ҳафтаси, дея эълон қилди. "Ҳозир энг хавфсизи – уйда қолиш", деди Путин.

Россияда коронавирус юқтириб олиш билан боғлиқ ҳолатлар кундан-кунга кўпайиб бормоқда. Ҳозиргача бу мамлакатда COVID-19 вирусига чалинганлар сони 650 нафардан ошган, вирус юқтириб олган уч киши вафот этган.

Машҳур ихтирочи Илон Маск коронавирус билан курашаëтган касалхоналарга 1255 та вентилятор олиб берди

Америкалик дунëга машҳур ихтирочи¸ электромобиллар ишлаб чиқарувчи Tesla ширкати асосчиси Илон Маск коронавирусга қарши курашга ëрдам сифатида Калифорния штати расмийларига 1255 та сунъий нафас олдириш аппаратини топширди.

- Бир неча кун олдин у [Маск] жорий ҳафтада минглаб сунъий нафас олдириш аппаратини олиб келиши мумкинлигини айтган эди. Мосламалар Лос-Анжелесга етиб келди ва [Маск] шифохоналар бирлашмаси ҳамда бошқалар билан аппаратларни ўрнатишни муҳокама қилмоқда, деди Калифорния губернатори Гэвин Ньюсом.

Калифорния штати коронавирусга чалинганлар сони бўйича АҚШда етакчилик қилмоқда ва касалхоналар зарур тиббий ускуналар¸ хусусан¸ коронавирус юқтирганлар ҳаëт-мамотини белгиловчи вентиляторлар етишмовчилигидан бонг урмоқда.

Маск Twitterдаги саҳифасида 1255 дона вентиляторнинг махсус учоқлар билан Хитойдан олиб келинганини билдирди.

«Хитойда ошиқча заҳира бор экан, шунинг учун жума куни кеч 1255 та FDA [Food and Drug Administration, FDA — АҚШ Озиқ-овқат ва фармацевтика идораси] маъқуллаган ResMed, Philips & Medtronic респираторларини харид қилдик ва ЛАга [Лос-Анжелес] учоқларда олиб келдик. Сизга бепул респиратор керак бўлса, бизга хабар беринг!» деб ёзди.

Маск Tesla ширкатининг Хитойдаги бўлими, Хитой чегара назорати расмийлари ҳамда Лос-Анжелес халқаро аэропорти ходимларига тезкорлик билан чора кўргани учун миннатдорчилик билдирди.

Маск коронавирус билан курашаëтган шифохоналарга 250 минг дона N95 ниқоб тарқатишни ҳам ваъда қилди. Ниқобларнинг 50 мингтаси Вашингтон университети Тиббиёт мактабига аллақачон етиб борди.

Маск пандемия ҳақида Twitterда фаол тарзда ўз фикрлари ва сўнгги янгиликларни бўлишмоқда. Хусусан, Маск ўз твитларининг бирида COVID-19 бўйича саросима касалликнинг ўзидан каттароқ зиён келтиришидан огоҳлантирди.

Дунëнинг энг бой одамларидан бири саналган Маск¸ Forbes журналининг ўтган ойги ҳисобича¸ 43 миллиард долларлик бойлик эгаси.

“Ислом давлати” Кобулдаги сикхлар ибодатхонасига ҳужумни зиммасига олди

Сикх ибодатхонасига қилинган ҳужумдан қочаëтганлар.

25 март куни эрта тонгда қуролланган гуруҳ Кобулдаги сикхлар ибодатхонасига ҳужум уюштирди. Ҳужум оқибатида камида тўрт одам ўлдирилди¸ улардан бирининг ëш бола экани айтилмоқда.

Афғонистон Ички ишлар вазирлиги ҳужумчилар сони ва қайси гуруҳга мансублиги ўрганилаëтганини билдирди.

Айни пайтда¸ жаҳондаги жангари гуруҳлар ëзишмаларини кузатиб келадиган SITE Intelligence Group Кобулдаги ҳужум учун Аамақ медиа тармоғида “Ислом давлати” масъулиятни зиммасига олганини билдирди.

Бунгача Толибон ўзининг мазкур ҳужумга алоқаси йўқлиги ҳақида баëнот берди.

Афғонистондаги сикх жамоаси етакчиси¸ афғон парламенти депутати Нарендар Сикх Халса ибодатхонага ҳужум пайтида камида 150 ибодатчи бўлгани, уларнинг кўпчилиги аëллар ва болалар эканини билдирди.

Афғонистонда янги сиëсий бўҳрон юзага чиқиб¸ тинчлик келишуви истиқболини савол остида қолдиргани ортидан АҚШ Кобул ҳукуматига бериб келган молиявий ëрдамини 1 миллиард долларга қисқартиргани ва ҳамкорлик кўламини қайта кўриб чиқажагини билдирди.

Хавфсизлик бўйича таҳлилчилар АҚШ ва Россия ҳарбийларининг Ироқ ва Суриядаги ҳарбий ҳужумларидан сўнг бу икки давлатдаги асосий истеҳкомлари йўқ қилинган “Ислом давлати” жангариларининг кичик-кичик гуруҳларга бўлиниб¸ Ўзбекистонга туташ Афғонистон ҳудудида тўпланаëтганини айтиб келмоқда.

АҚШ ҳукумати коронавирус иқтисодий оқибатларини юмшатиш учун $2 триллион ëрдам ажратади

Мухолиф партияларнинг ëрдам дастури бўйича келишувга эришгани ҳақида Оқ уй расмийси Эрик Уленд хабар қилди.

Оқ уй ва АҚШ Сенати коронавирусдан зиëн кўраëтган мамлакат иқтисодини қайта тиклаш ва соғлиқни сақлаш тизимининг пандемияга қарши курашини қўллаб-қувватлашга қаратилган мисли кўрилмаган 2 триллион долларлик ëрдам дастури устида келишувга эришди.

Ҳафта охирида томонлар муросага кела олмаган республикачилар дастурининг асосий шартлари бўйича ҳар иккала партия сенаторлари билан келишувга эришгани ҳақида Оқ уй расмийси Эрик Уленд 25 март куни эрта тонгда маълум қилди.

2 триллион долларлик ëрдам дастури 25 март куни Сенатда овозга қўйилади. АҚШ Сенатида президент мансуб республикачилар 53-47 нисбатида кўпчиликни ташкил қилади. Ëрдам дастурининг қабул қилиниши учун 60 та овоз талаб этилиши боис¸ республикачилар мухолиф демократ сенаторлардан камида 7 таси овозини қозониши лозим бўлади.

Ëрдам дастури Сенат томонидан маъқуллангандан кейин у демократлар назоратидаги Намояндалар палатасига юборилади. Палата раиси Нэнси Пелоси бу жараëннинг тез бўлишини билдирди.

Конгрессдан ëрдам дастурини зудликда қабул қилишни талаб қилаëтган Дональд Трамп ҳужжатга дарҳол қўл қўяжагини билдирди.

Республикачилар ҳозирлаган ëрдам дастурига қаршилик кўрсатган демократлар¸ ҳужжат лойиҳасида ишчи-хизматчилар ва муҳтож оилалар эмас¸ тиббиëт корпорациялари манфаати ҳимоя қилинганини танқид қилди.

Мухолиф демократлар шунингдек¸ молиявий ëрдам сўраëтган компанияларга ажратиладиган 500 миллиард долларнинг қандай тақсимланишида шаффофлик йўқлиги боис¸ уни ҳам рад қилди.

CPJ Россияни коронавирус мавзусини ёритаётган ОАВни цензура қилишни тўхтатишга чақирди

Москванинг марказий кўчаларидан бирида кетаётган одам,2020 йил 21 марти.

Журналистларни ҳимоя қилиш қўмитаси (Committee to Protect Journalists, CPJ) Россия расмийларини коронавирус ёйилаётгани ҳақида хабар тарқатаётган оммавий ахборот воситаларини цензура қилишни тўхтатишга чақирди.

Қароргоҳи Нью-Йоркда жойлашган ташкилот 24 март куни икки ОАВ ходимлари сўзларига таянган ҳолда, Роскомнадзор жарима билан таҳдид қилароқ журналистларга сайт ва ижтимоий тармоқлардан ўз мақолаларини ўчириб ташлашни буюрганини билдирди.

CPJ маълумотига кўра, ташкилот ходимлари “Эхо Москви” радиостанцияси бош муҳаррири Виталий Рувинский билан боғланганида у Роскомнадзор 20 март куни Кремль танқидчиси бўлган сиёсатшунос билан интервьюни сайтдан олиб ташлашни буюрганини маълум қилган. Роскомнадзор бу топшириғини “коронавирус билан боғлиқ ёлғон маълумот тарқатилишининг олдини олиш чораси” ўлароқ изоҳлаган ва радиостанция бу топшириқни бажарган. Роскомнадзор буйруғида айнан қайси маълумот ёлғон эканига аниқлик киритилмаган. Сиёсатшунос Валерий Соловей 100 минг рубль (тақрибан 1300 АҚШ доллари) миқдоридаги жарима таҳдиди билан юзма-юз қолган.

“Говорит Магадан” хабар сайти бош муҳаррири Татьяна Брайс CPJга ундан коронавирусга чалингани тахмин этилган сибирлик кишининг ўлимига оид материални ўчириб ташлаш талаб этилганини маълум қилган.

Қозоғистон айрим озиқ-овқат маҳсулотлари экспортини тақиқлаб қўйди

Қозоғистонлик аёл Олмаотадаги "Яшил бозор"дан егулик харид қилиб чиқмоқда, 2020 йил 18 марти.

Қишлоқ хўжалиги вазирлиги ҳамда Савдо ва интеграция вазирлигининг қарори билан Қозоғистондан 15 апрелгача “ижтимоий аҳамиятга эга” қатор озиқ-овқат маҳсулотларини экспорт қилиш тақиқланди.

Савдо ва интеграция вазири Бахит Султановнинг Фейсбук тармоғидаги ўз саҳифаси орқали маълум қилишича, бу ерда гап гречка, ун, шакар, картошка, сабзи, шолғом, лавлаги, пиёз, карам, кунгабоқар уруғи ва писта ёғи каби маҳсулотлар ҳақида бормоқда.

Вазир чекловдан мақсад “аҳолини зарур маҳсулотлар билан таъминлашда узилишларга йўл қўймаслик” эканини билдирган. Султанов фикрича, қозоғистонликлар дўконга кирганда истаган маҳсулотни жўяли нархга сотиб олиш имкониятига эга бўлиши керак. Вазир нархлар давлат назоратида бўлишини таъкидлаган ва ишлаб чиқарувчилардан “ватандошлик бирдамлигини сақлаган ҳолда, ички талабни таъминлашда ёрдам бериш”ни сўраган.

Айни пайтда Қозоғистонда коронавирус пандемияси туфайли фавқулодда вазият тартиби амалга бўлиб турибди. Сўнгги маълумотларга кўра, мамлакатда вирусга чалинганлар сони 79 нафарга етган.

Тожикистон Қирғизистон билан чегараларини ёпди

Тожик-қирғиз чегарасидаги назорат-ўтказиш масканларидан бири.

Қирғизистонда коронавирус тарқалиши билан боғлиқ вазият барқарорлашгунига қадар Тожикистон 24 мартдан қўшни давлат билан чегарадаги барча назорат-ўтказиш масканларини ёпишга қарор қилди.

Тожикистон Ташқи ишлар вазирлиги маълумотига кўра, НЎПлардан ўтказиш бўйича чекловлар қуйидаги шахларга нисбатан қўлланилмайди:

- мамлакатга кириб келаётган тожикистонликларга;

- Тожикистондан чиқиб кетаётган хорижликларга;

- юк машиналари ҳайдовчиларига;

- Тожикистонда аккредитациядан ўтган дипломатлар ва уларнинг оила аъзоларига;

- ҳукумат делегациялари аъзоларига.

Расмий маълумотларга кўра, 24 март куни Қирғизистонда коронавирусга чалинганлар сони 42 кишига етган.

Тожикистонда эса ҳали коронавирус юқтириб олиш билан боғлиқ бирорта ҳам ҳолат расман қайд этилгани йўқ.

МОҚ Токио олимпиадасини келаси йилга қолдиришга қарор қилди

24 март куни Халқаро олимпия қўмитаси коронавирус пандемияси сабаб 2020 йилги ëзги олимпиада ўйинларини бир йилга кечиктиришга қарор қилди.

Бу қарор мезбон Япония ҳукумати сўрови асосида қабул қилинди.

Душанба куни парламентда қилган чиқишида Япония Бош вазири Шинзо Абе жорий вазиятда олимпиадани қолдиришдан ўзга чора йўқлигини билдирган эди.

Ҳафта охирида Канада ¸Австралия каби давлатлар Халқаро олимпия қўмитаси ва Жаҳон соғлиқни сақлаш ташкилотига мурожаат қилиб¸ Токио олимпиадасини кечиктиришни сўраган¸ акс ҳолда ўз спортчиларини юбормасликдан огоҳлантирган эди.

2020 йилги олимпиада ўйинларининг 24 июль куни Токиода бошлашини белгиланган эди.

Иқтисодий таҳлилчилар ҳисобича¸ ëзги олимпиада ўйинларини келаси йилга қолдиришдан Япония кўрадиган молиявий зиëн 6 миллиард АҚШ долларига етади.

Ташкилотчиларга кўра¸ олимпиада ўйинларини ўтказишга тайëргарлик доирасида Япония ҳозиргача 10¸5 миллиард доллардан ортиқ маблағ сарфлаган.

ХВЖ коронавирус иқтисодий зарбасини юмшатиш учун Қирғизистонга қарз беради

Халқаро валюта жамғармаси (ХВЖ) жорий ҳафта Қирғизистон ҳукуматининг коронавирус пандемиясининг иқтисодий оқибатларини юмшатиш учун фавқулодда молиявий ëрдам ажратиш сўровини кўриб чиқади.

ХВЖ тарқатган хабарга кўра¸ Қирғизистон дунëда коронавирус пандемияси бошланганидан бери жамғармадан унга қарши кураш учун ëрдам оладиган биринчи давлат бўлади.

Ҳозирча Бишкек ҳукуматига берилиши муҳокама этиладиган маблағ очиқланмади.

Пандемия бошланганидан сўнг Марказий Осиë ва Яқин Шарқ давлатлари биринчилардан бўлиб¸ ХВЖдан унинг иқтисодий зарарини тўхтатиш мақсадида зудлик билан қарз беришни сўради.

Жамғарма бошқарув кенгаши жорий ҳафта Қирғизистон сўровини кўриб чиқиб¸ бу борада қарор беради.

Мутахассисларга кўра¸ ХВЖ аъзо давлатларнинг жорий бўҳронни енгиш ва унинг иқтисодий зарарини чеклашига ëрдам беришнинг қатор воситаларига эга.

ХВЖ дунëдаги энг катта қарз берувчи саналади ва у қарзни бевосита ҳукуматларга ажратади.

Душанба куни ХВЖ¸ коронавируснинг иқтисодга кўрсатаëтган зарбасига дош беролмаëтган давлатларга ëрдам бериш мақсадида 1 триллион доллар қарз ажратишга тайëрлигини билдирди.

Жамғарма раҳбари Кристалина Георгиевага кўра¸ 23 мартга қадар 80 га яқин ҳукумат қарз сўраб мурожаат қилган.

Ўзбекистон президентининг коронавирус пандемиясининг аҳоли ва иқтисодга салбий таъсирини юмшатиш чора-тадбирлари ҳақидаги фармонида¸ халқаро молиявий тизимлардан 1 миллиард АҚШ доллари миқдорида қарз олиш топшириғи ҳам бор.

АҚШ Афғонистонга бериб келган молиявий ëрдамини 1 миллиард долларга қисқартирди

АҚШ Давлат котиби 23 март куни Кобулда президент Ашраф Ғанининг ашаддий рақиби¸ ўзини параллел президент деб эълон қилган Абдуллоҳ Абдуллоҳ билан ҳам учрашди.

АҚШ Давлат департаменти Афғонистонга бериладиган молиявий ëрдамнинг 1 миллиард долларга қисқартирилгани ва мамлакат билан ҳамкорлик кўлами қайта кўриб чиқилажагини эълон қилди.

Бу баëнот Давлат котиби Майк Помпео 23 март куни олдиндан эълон қилинмаган сафар билан Кобулга келиб-кетгани ортидан пайдо бўлди.

Кобулда Помпеонинг Афғонистон президенти Ашраф Ғани ва ўзини параллел равишда президент деб эълон қилган Абдуллоҳ Абдуллоҳ билан ўтказган музокаралари самарасиз тугади.

Айтилишича¸ Помпео Кобулга Ғани ва Абдуллоҳни “афғон халқи манфаати учун зудлик билан ўзаро муросага эришишга кўндириш мақсадида” борган.

Сафар якунида кескин баëнот қилган Помпео¸ АҚШ Ғани ва Абдуллоҳ "давлат бошқаруви¸ тинчлик ва хавфсизлик¸ афғон фуқаролари саломатлиги ва фаровонлигини таъминловчи миллий яраш ҳукумати тузиш" таклифига кўнмаганидан қаттиқ афсусда эканини билдирди.

Ғани ва Абдуллоҳ билан самарасиз сўзлашувлардан сўнг Помпео Толибон етакчилари билан учрашиш учун Форз кўрфазига учиб кетди.

АҚШ ва Толибон ўртасида ўтган ой Доҳада эришилган тинчлик келишувига кўра Вашингтон биринчи қадам сифатида Афғонистондаги Америка қўшинларини 2021 йил ўртасига қадар олиб чиқиш мажбуриятини зиммасига олган.

Қозоғистонда даромадсиз қолганларга нафақа тўланади

Олмаота шаҳри четидаги назорат-ўтказиш масканида ишлаётган тиббиёт ходимлари, 2020 йил 19 марти.

Президент Қасим-Жомарт Тоқаев 23 март куни коронавирус туфайли жорий этилган фавқулодда вазият чоғида қозоғистонликларга нафақа тўлаш ҳақида топшириқ берди.

Дастлабки ҳисоб-китобларга кўра, 16 мартдан фавқулодда вазият жорий этилиши ва Қозоғистоннинг икки йирик шаҳри – Нур-Султон ва Олмаота тўла ёпилиши 500 минг чоғли одамнинг моддий аҳволига салбий таъсир кўрсатган.

“Шу важдан ҳам фавқулодда вазият амалда бўлган пайтда даромадидан мосуво бўлган шахсларга ойда бир марта битта энг кам иш ҳақи миқдорида (42 500 танга ёки 94 доллар) нафақа тўлай бошлаш ҳақида топшириқ бердим. Мазкур ёрдам умумий ҳисобда камида 1,5 миллион юртдошимизга берилади”, дея иқтибос келтирмоқда Қозоғистон президенти сўзларидан маҳаллий нашрлар.

Тоқаев Қозоғистон расмийлари, зарурат туғилгудек бўлса, ёрдам маблағлари турларини, суммасини кўпайтириш ва қамровини кенгайтириш учун барча захираларга эга эканини ҳам қўшимча қилган.

Қозоғистон расмийлари душанба, 23 мартдан бошлаб мамлакатга хориждан, шу жумладан, Евросиё иқтисодий иттифоқи мамлакатларидан (Россия, Беларусь ва Арманистон) келаётган барча кишилар учун карантин жорий қилганлар.

Айни пайтда Қозоғистонда коронавирус инфекциясини юқтириб олганлар сони 68 нафарга етган.

Қирғизистонда коронавирусга чалинганлар 42 киши бўлди, комендантлик соати жорий этилди

Қирғизистонда коронавирус инфекциясини юқтириб олиш билан боғлиқ яна 26 та ҳолат аниқланди. Бу ҳақда соғлиқни сақлаш вазирининг ўринбосари Тўлў Исақов Республика штаби мажлисида маълум қилди.

Вирусга чалинганлар орасида бир ёшга етмаган икки гўдак, 6 яшар бола, 14 ёшли ўсмир бор. Қолганларнинг ёши 16 дан 86 га қадар.

Шу тариқа 24 март ҳолатига кўра Қирғизистонда коронавирус юқтириб олган хасталар сони 42 нафарга етди.

Улар Бишкекдаги юқумли касалликлар шифохонаси, Ўш вилоятлараро клиникаси, Новқат туман шифохонаси, Жалолобод ва Боткен вилоят шифохоналарига ётқизилган.

Коронавирус билан боғлиқ вазият таранглашиб бораётгани туфайли қирғиз расмийлари инфекция аниқланган шаҳар ва туманларда 25 март соат 00:00 дан бошлаб комендантлик соати жорий этишга қарор қилишган. Комендантлик соати оқшомги соат 20:00 дан эрталабки соат 07:00 гача амалда бўлади.

Жаҳон бўйлаб бир миллиарддан зиёд одам карантинга риоя қилишга мажбур бўлмоқда

Дунёнинг 50 мамлакатида яшовчи бир миллиарддан зиёд одам Covid-19 пандемияси важидан карантин тартибига риоя қилишга мажбур бўляпти. Бу ҳақда AFP агентлиги 23 март куни хабар тарқатди.

35 чоғли мамлакат ўз ватандошлари учун мажбурий карантин тартибини жорий этган. Франция, Италия, Испания, Британия, Греция, Аргентина, Ироқ, Руанда ва Калифорния (АҚШ) кабилар шулар жумласидандир.

Бу мамлакатларнинг кўпида жорий этилган тартиб, агар киши ишини уйда қилишга иложи бўлмаган тақдирда, ишхонага боришга, озиқ-овқат харид қилиш учун дўконга ёки шифокор ҳузурига боришгагина имкон беради.

Ўн мамлакатда расмийлар уйдан оқшом пайти ва тунда чиқишни тақиқловчи комендантлик соати жорий этганлар. Айрим мамлакатларда эса муайян шаҳарлар учун карантин тартиби киритилган.

Жонс Ҳопкинс институти тақдим этган сўнгги маълумотларга кўра, шу пайтгача дунё бўйлаб коронавирус инфекцияси қурбонлари сони 16,5 минг нафардан ошган. Вирусга чалинганлар сони эса 381,5 мингга яқинлаган.

Давомини ўқинг

Кўрмай қолган бўлсангиз

XS
SM
MD
LG