Кремль тарғиботини адабийлаштирган “Спящие” драмаси режиссёри Юрий Биков сериал кескин танқидга учрагани учун кино санъатини тарк этишини билдирди.
Сериалда Россия Хавфсизлик хизмати ходимлари мамлакатда тартибсизлик келтириб чиқариш ва Хитой билан имзоланиши керак бизнес шартномани барбод қилиш ниятидаги “уйқудагилар” билан курашади. “Рангли революция” уюштириш ниятидаги америкаликлар Алексей Навальнийга ўхшаш қаҳрамон ўлимида Россияни айбдор қилиб кўрсатишга уринади. Шунингдек, россиялик дипломатлар Ливиядаги Россия элчихонасида исломий жангарилар ҳужуми қурбони бўлади.
Танқидчилар Биковни Кремлга ёқишга уринишда айблаб, уни кескин танқид қилиши ортидан режиссёр мухлисларидан узр сўраб, кино санъатини тарк этишини билдирди.
Биков “ВКонтакте” ижтимоий тармоғида Кремлни “ҳимоя қилиш” орқали мухислари ишончини оқламаганини айтди.
9 октябрь куни премьера қилинган “Спящие” сериали Интернетда кескин танқид қилинди.
Фильмни маъқул кўрган консервативлар унга бўлган салбий муносабатни “либерал истерика” ўлароқ баҳолашди.
Илк эпизодда фильм қаҳрамонларининг бадиий тўқима меваси эканлиги айтилади. Аммо сериал сюжети ва қаҳрамонлари Кремль тарғиботига мос тушади.
Фильмни қисман Россия Маданият вазирлиги молиялаштирган. Унга Фёдор Бондарчук продюсерлик қилган. Сериал сюжетини кремлпараст ёзувчи ва журналист Сергей Минаев ёзган.
Биков ўзининг “Майор” ва “Дурак” фильмлари билан шуҳрат қозонган. Ҳар икки фильмда замонавий Россиядаги коррупция ва ахлоқий таназзул тасвирланган.
Шу сабаб ҳам бўлса керак, Кремлга мойдек ёқадиган янги фильми учун ресжиссёр кескин танқидга учради.
“Дождь” мустақил телеканали журналисти Павел Лобков сериални “президент туғилган кунида ТВ совға” ўлароқ баҳолади.
Халқаро миқёсда шуҳрат қозонган рус фильмлари Россиянинг ўзида унча яхши кутиб олинмаган. Мамлакатда Кремль тарафдори бўлган режиссёрларгина олқишланади. Замонавий Россияга танқидий назар билан ёндашадиган санъаткорлар эса эътибордан четда қолади.
Фильмларнинг ҳукумат томонидан молиялаштирилишини Маданият вазирлиги назорат қилиб туради. Вазирликнинг ҳозирги етакчиси Владимир Мединский “ватанпарвар” фильмларни олқишлаб, танқидчи режиссёрлар ишларини танқид қилиб келади.
