АҚШнинг БМТдаги вакили Никки Ҳейли Эрон масаласида БМТ Хавфсизлик кенгаши «чора кўрадиган вақт келди», деб баёнот берди.
Ўтган ойда Теҳрон Ямандаги ҳутий исёнчиларига қарши жорий қилинган қурол-аслаҳа эмбаргосини бузгани ҳақида БМТ ҳисоботи эълон қилинган эди.
- Ушбу ҳисобот биз бир неча ойдан бери айтиб келаётган гапни тасдиқлайди: Эрон Хавфсизлик кенгашининг бир неча резолюциясига зид равишда ноқонуний йўл билан қурол-аслаҳа юбориб келмоқда, - деди Ҳейли.
БМТ ҳисоботида ёзилишича, 2015 йилда ҳутий исёнчиларни қурол билан таъминлашга эмбарго қўйилган бўлишига қарамасдан, Эрон баллистик ракеталари ва бошқа қурол-аслаҳалар Яманга олиб кирилган. Ҳисобот муаллифлари Эрон бунинг олдини олиш учун чора кўрмаган, дея хулоса қилган.
Бошқа бир БМТ резолюциясига биноан Эрон Хавфсизлик кенгашининг рухсатисиз қурол-аслаҳа транспорт қила олмайди.
Расмий Теҳрон эса, ҳутийларни қурол билан таъминлаганини рад этиб келади.
