АҚШ томонидан Россиянинг айрим тадбиркорлари, давлат хизматчилари ва компанияларига нисбатан жорий қилинган сўнгги санкциялар таъсири, Вашингтон истаганидек, самарали бўлди. Бу ҳақда АҚШ молия вазирлиги раҳбари Стивен Мнучин Fox телеканалига берган интервьюсида маълум қилди.
Мнучиннинг сўзларига қараганда, Қўшма Штатлар Россияга нисбатан санкциялар жорий қилишдан “қўрқмайди” ва келажакда санкцияларни янада кескинлаштиришига тайёр, бироқ янги санкциялар қўллаш ҳақида аввалдан эълон қилинмайди.
Якшанба, 15 апрель куни АҚШнинг БМТдаги доимий вакили Никки Хейли бир кундан кейин Сурия президенти Башар Асадни қўллаб-қувватлагани учун Россияга нисбатан янги жазо чоралари қўлланилиши борасида маълум қилган эди. Бироқ, Оқ уй буни рад қилди, шу билан бирга янги санкциялар кўриб чиқилаётганини таъкидлади. Мнучиннинг таъкидлашича, аввалига санкциялар ҳақида қарор қабул қилинган эди, бироқ кейинчалик бекор қилинди, бу борада Хейлини огоҳлантиришга улгурилмади.
6 апрель куни АҚШ молия вазирлиги Россиядаги йирик бизнесменлар, жумладан Олег Дерипаска ва Виктор Вексельберг, шунингдек уларга тегишли компанияларни санкциялар рўйхатига киритди. Бу Москва биржаларида котировка ва рубль курсининг тушиб кетишига, шуниндек жаҳон биржаларида Дерипаскага тегишли "Русал" компанияси акцияларининг баҳоси бирданига тушиб кетишига сабаб бўлди.
