Линклар

Шошилинч хабар
21 январ 2021, Тошкент вақти: 04:27

Bosh prokuratura Rashitjon Qodirov ishi doirasida 24 shaxsga ayblov e’lon qilinganini bildirdi


O‘zbekistonning 15 yillik Bosh prokurori Rashitjon Qodirov hozirda og‘ir jinoyatlarda ayblanmoqda.

5 iyun kuni O‘zbekiston Respublikasi Bosh prokuratura binosida ommaviy axborot vositalari vakillari uchun matbuot brifingi o‘tkazildi.

Bu haqda xabar bergan mahalliy nashrlarga ko‘ra¸ brifing mamlakatda ijtimoiy adolat va qonun ustuvorligini ta’minlash borasida belgilangan chora-tadbirlar ijrosi mavzusida bo‘lgan.

Kun.uz nashrining xabar qilishicha¸ savol-javob tarzida o‘tkazilgan uchrashuvda O‘zbekiston sobiq bosh prokurori Rashidjon Qodirov ishi bo‘yicha borayotgan tergov jarayoniga oid ayrim tafsilotlar ochiqlangan.

Rasmiy bayonotga ko‘ra¸ Qodirov ishi doirasida jami 24 shaxsga nisbatan ayblov e’lon qilingan va ulardan 21 nafari hibsga olingan.

Kun.uz Uyushgan jinoyatchilik va korrupsiyaga qarshi kurash boshqarmasi boshlig‘i o‘rinbosari Mansur O‘rolovning quyidagi bayonotini iqtibos keltirdi.

«Bosh prokuraturaning uyushgan jinoyatchilik va korrupsiyaga qarshi kurashish boshqarmasi tomonidan sobiq bosh prokuror lavozimida ishlagan Rashidjon Qodirovga nisbatan tergov harakatlari olib borilmoqda. Tergov jarayonida sobiq bosh prokuror tomonidan pora evaziga lavozimga tayinlash, pora olish va boshqa jinoyat alomatlari aniqlangan. Hozirda 24 nafar shaxsga nisbatan ayblov e’lon qilingan. Shulardan 21 nafariga qamoqqa olish ehtiyot chorasi qo‘llanilgan. Tergov holatlari hanuz davom etmoqda. Tergov yakunlari bo‘yicha albatta OAVga albatta ma’lumot beriladi.»

O‘zbekiston sobiq Bosh prokurori Rashitjon Qodirovga nisbatan jinoiy ish ochilib¸ uning 2018 yil 22 fevral kuni hibsga olingani haqida birinchi bo‘lib Ozodlik radiosi Ichki ishlar vazirligi va Bosh prokuratura mulozimlariga tayanib turib xabar qilgan edi.

23 fevral kuni bu xabarni inkor etishga uringan Bosh prokuratura 24 fevral kuni Qodirovning hibsga olinganini tasdiqlagan edi.

Shuningdek Ozodlik 20 mart kuni Qodirov ishi doirasida bir kunning o‘zida 25 shaxsning qo‘lga olingani¸ so‘roqdan so‘ng ular ayrimlarining tilxat bilan chiqarilgani¸ aksariyatining esa¸ hibsga olinganini xabar qilgan edi.

Bosh prokuratura rasmiysining 5 iyun kungi bayonoti bu hibsga olishlar haqidagi Ozodlik xabarini tasdiqladi.

5 iyun kungi brifingda prokuratura vakillari Qodirov ishi doirasida ayblov e’lon qilingan va hibsga olingan shaxslar nomini e’lon qilmadi.

Ozodlikning Qodirov ishi tafsilotlaridan xabardor manbalari¸ sobiq Bosh prokurorning hibsxonada yuqori darajali hukumat amaldorlari¸ qolaversa xorijga qochib ketgan o‘z o‘g‘li Alisher Qodirovga qarshi ko‘rsatma berayotganini bildirgan.

Huquq tizimlaridagi bu mulozimlar¸ Qodirov qon bosimining oshishi ortidan bundan uch haftacha oldin Sangorodga o‘tkazilganini ham ma’lum qildi.

22 fevralda hibsga olingan Qodirov, Bosh prokuratura rasmiy xabariga ko‘ra, O‘zbekiston Jinoyat kodeksining "Tovlamachilik" (165-moddasi), "Hokimiyat yoki mansab vakolatini suiiste’mol qilish" (205-modda) va "Pora olish" (210-modda) moddalarida ko‘zda tutilgan jinoyatlarni sodir etganlikda ayblanmoqda.

66 yashar Rashitjon Qodirov 2000 yildan boshlab 15 yil davomida O‘zbekiston bosh prokurori vazifasida ishlagan.

Uning o‘g‘li Alisherbek Qodirov Ichki ishlar vazirligi tarafidan 2018 yilning 5 mart kuni xalqaro qidiruvga berilgan.

39 yashar Alisherbek Qodirovga nisbatan Jinoyat Kodeksining 165-moddasi (Tovlamachilik) va 168-moddasida (“Firibgarlik”) ko‘zda tutilgan jinoyatlarda gumonlanmoqda.

Ota va o‘g‘ilga qarshi olib borilayotgan tergov amaliyoti davomida hozirga qadar ulardan jabr ko‘rganlardan umumiy qiymati yarim milliard AQSh dollariga teng da’vo arizalari olingan.

O‘zbekiston Bosh prokuraturasida ishlaydigan va ismi aytilishini istamagan xodimga ko‘ra, mazkur jinoyat ishi doirasida “o‘nlab sobiq va amaldagi mulozimlar so‘roq qilinmoqda".

Prezident Shavkat Mirziyoev 17 mart kuni Samarqandda qilgan ma’ruzasida sobiq bosh prokuror Rashitjon Qodirov o‘z qo‘l ostidagilardan har oyda katta miqdorda pora olib kelgani uchun qamalganini ta’kidlagandi.

“Bosh prokurorni nega qamadim? Hammasi o‘g‘ri edi. Har bir tuman prokurori qanchadan pul berganini bulbuldek sayrab yotibdi turmada. Samarqandda ham 7 tuman prokurori har oyda berib turgan. Har oyda 2 ming dollardan bergan, prokuror bo‘lish uchun 35-40 ming dollardan bergan. Tayloq tumani prokurori 40 ming bergan bo‘lsa, bu pulni qaytarishi uchun Tayloqni sotishi kerak-ku? Mana qanday vaziyatda yashaganmiz”, deb iqtibos keltirdi prezident so‘zlaridan "Kun uz" nashri.

19 may kuni Andijon viloyatining Ulug‘nor tumanida viloyat faollari bilan uchrashuvida esa Shavkat Mirziyoev sobiq prokurorni "ikki-uch oy ichida" televidenie orqali gapirtirishini aytdi.

- Sobiq bosh prokuror butun jamoasi bilan qamoqda. Million-million dollar topshirib yotibdi. Ikki-uch oy ichida televidenie orqali o‘zini gapirtiraman. Negaki, korrupsiyalashtirib yuborgandi, har bir tuman prokuroridan 30-40 ming dollar olgan. Hammasini qaytarib beryapti. Qodirov kim o‘zi? Qip qizil o‘g‘ri odam bo‘lgan. Shuning uchun, prokuraturada 70 foiz odam almashdi, halol odamlarni qo‘ydim. Kim xiyonat qilsa, shunday yo‘ldan boradi, - degan edi 19 may kungi chiqishida prezident Shavkat Mirziyoev.

Алоқадор

XS
SM
MD
LG