Линклар

Шошилинч хабар
27 май 2020, Тошкент вақти: 12:13

Халқаро хабарлар

Эронда иқтисодий жиноятларда айбдор деб топилган тадбиркор қатл этилди

Эроннинг “битум султони” Ҳамидризо Бағирий-Дерманий судда. 2018, 4 сентябрь.

Эронда “битум султони” сифатида танилган тадбиркор иқтисодий жиноятларда айбланиб қатл этилди. Бу ҳақда 22 декабрь куни Эрон матбуоти хабар қилди.

Ҳамидризо Бағирий-Дерманий пора олиш, фирибгарлик каби жиноятларга қўлга ургани учун “ер юзида коррупция тарқатишда” айбдор деб топилган эди.

Тадбиркорга чиқарилган ўлим жазосини октябрь ойида Эрон Олий суди ўз кучига қолдирди. Унга ҳукмни махсус суд чиқарган бўлиб, бундай судларнинг қарорлари бекор қилинмайди.

Бу махсус судлар жорий йилнинг августида олий раҳбар Оятуллоҳ Али Хоманаий розилиги билан ташкил этилган. Хоманаий иқтисодий жиноятларга қўл урганлар “тез ва адолатли равишда” жавобгарликка тортилиши лозимлигини айтиб келади.

Бағирий-Дерманий ёзда коррупцияга қарши кураш бошланганидан бери қатл этилган учинчи тадбиркордир. Ноябрда Эрон полицияси “тангалар султони” деб атаб келган тадбиркор Ваҳид Мазлўмин ҳамда унинг шериги Исмоил Ғасемийлар қатл этилди. Улар сентябрда валюта бозорини манипуляция қилиш каби жиноятларга қўлга ургани учун “ер юзида коррупция тарқатишда” айбдор деб топилган эди.

Шунингдек, махсус судлар ўнлаб тадбиркорни 20 йилгача бўлган муддатга озодликдан маҳрум қилди.

Эрон расмийлари олтин ҳамда валюта нархларидаги камчиликлар ва ўзгаришлардан фойдаланиб, “иқтисодга путур етказаётган” шахсларга қарши курашишга бел боғлаган.

Инсон ҳуқуқлари ташкилотлари Эронда ташкил этилган махсус судлар фуқароларининг одил судловга бўлган ҳуқуқини қўпол бузишини айтиб келади.

Кун янгиликлари

Чувашия собиқ президенти Владимир Путинни судга берди

Владимир Путин ва Михаил Игнатьев, Москва, 2014 йил 24 июль.

Россия Олий суди Чувашия Республикасининг собиқ раҳбари Михаил Игнатьевнинг президент Владимир Путинга қарши даъво аризасини кўриб чиқади. Бу ҳақдаги маълумот Олий суд сайтида мавжуд.

Игнатьев Путин томонидан ўзининг ноқонуний тарзда истеъфога чиқарилганини иддао қилмоқда.

58 ёшли Игнатьев 2010 йилда Чувашия президентлигига ўша пайтдаги Россия президенти Дмитрий Медведев тавсияси билан тайинланган эди. 2015 йилнинг июнида у истеъфо берган ва ўша йилнинг сентябрида сайловда номзод сифатида иштирок этиб, 65, 54 фоиз овоз олган ҳамда президентлик лавозимига қайта сайлаганди.

2020 йилнинг январида Путин Чувашия президентини ишончни йўқотганликда айблаб, ишдан бўшатган. Бунга Игнатьев матбуот кунида ҳукуматни танқид қиладиган журналистларни “адабини бериш”га чақиргани ва Фавқулодда вазиятлар вазирлигига янги ўт ўчириш машиналарини топшираётганда ўт ўчирувчиларни итдек ирғишлашга мажбурлагани сабаб бўлган. Бу икки видео ижтимоий тармоқларда тарқаб кетганидан сўнг Игнатьев “Единая Россия” партияси аъзолигидан ҳам чиқарилган эди.

ЖМТ: Коронавирус пандемияси вазиятида ёзнинг иссиқ келиши саломатликка салбий таъсир кўрсатади

Иссиқдан сақланиш учун ўзларини сувга отаётган покистонлик болалар. 28 апрель, Карачи.

Жаҳон метеорологиия ташкилоти – ЖМТ жорий йилда ёзнинг ўта иссиқ келиши коронавируснинг тарқалишини ҳисобга олганда инсон саломатлиги учун катта салбий таъсир кўрсатиши ҳақида маълум қилди.

AFP агентлигининг ташкилотга таяниб хабар беришича, ўта иссиқда кондиционердан чиққан ҳаво коронавирус пандемияси даврида тавсия этиладиган санитария меъёрларига жавоб бермайди.

Жаҳон метеорологиия ташкилоти расмий вакили Клэр Нуллис 26 майда Женевада ўтган матбуот анжуманида бу йил метеокузатувлар тарихидаги энг иссиқ йил бўлишини айтди.

Май ойининг ўрталарида ЖМТ 2020 йил ёзида Ер юзида аномал об-ҳаво - тропик кенгликлардаги окен сатҳи ҳароратининг кўпайиши,Жанубий Америка ва Ҳиндистон ярим оролида ёғингарчиликларнинг кўп бўлиши кузатилишини билдирган эди.

Қирғизистон Хитойдан қарзларни тўлашда енгиллик берилишини илтимос қилди

Хитой ва Қирғизистон байроқлари.

Қирғизистон ташқи ишлар вазири Чингиз Айдарбеков хитойлик ҳамкасби Ван И билан 26 майда телефон орқали қилган мулоқотида Хитойга қарзни тўлаш масаласини муҳокама қилди.

“Чингиз Айдарбеков коронавируснинг Қирғизистон иқтисодиётига келтирган зарарини ҳисобга олган ҳолда, ҳамкасби Ван Ини Хитойдан олинган қарзларни тўлашда енгиллик бериш масаласига эътибор қаратишга чақирди”, - дейилади Ташқи ишлар вазирлиги маълумотида.

Жорий йилнинг апрелида президент Сўўронбай Жээнбеков ҳам Хитой раҳбари Си Цзиньпин билан телефон орқали суҳбатлашиб, Хитойдан олинган қарзларни тўлашда Қирғизистонга енгиллик берилишини илтимос қилган эди.

Расмий хабарларда айтилишича, Қирғизистоннинг ташқи қарзи 3 миллиард 700 миллион долларни ташкил қилади. Бу қарзнинг 1 миллиард 700 миллион доллари Хитойдан олинган.

АҚШ Марказий Осиё муҳожирларини қўллаб-қувватлаш лойиҳасига 2 миллион доллар ажратади

Ўзбекистонга қайтолмай Россия-Қозоғистон чегарасида тўпланиб турган муҳожирлар.

АҚШ халқаро тараққиёт агентлиги – USAID COVID-19дан жабрланган марказий осиёлик меҳнат муҳожирлари эҳтиёжларини таъминлаш учун 2 миллион доллар маблағ ажаратади. Бу ҳақда Ўзбекистоннинг АҚШдаги элчихонаси маълум қилди.

Мазкур ёрдам айни пайтда амалга оширилаётган “Марказий Осиёда хавфсиз миграция” лойиҳаси доирасида берилади. Лойиҳани Winrock International ташкилоти амалга оширмоқда.

“COVID-19 пандемияси Марказий Осиёдаги миллионлаб муҳожирларнинг гуманитар ва молиявий инқирозига олиб келди, уларнинг аксарияти Марказий Осиё бўйлаб транзит ва ўтиш жойларида қийинчиликларга дуч келмоқда”- дейилади расмий маълумотда.

Билдирувда айтилишича, иш ва четдан юборилаётган пул маблағларини йўқотиш оилаларни тегишли ресурсларсиз ҳамда ҳуқуқий ҳимоясиз қолдирди. Шунингдек, мигрантлар ўзларини вирусдан қандай ҳимоя қилиш тўғрисида маълумот ва ресурсларга эга эмас.

“USAID «Марказий Осиёда хавфсиз миграция» лойиҳаси доирасида жуда зарур бўлган ёрдамни тақдим этади, шу жумладан ахборот манбалари билан таъминлайди, асосий хизматларга йўлланмалар беради, муқобил турмуш тарзини қўллаб-қувватлайди, муҳожирларга ушбу қийин вазиятни енгишда ёрдам бериш учун кўникмалар ва тренинглар ўтказади. Шунингдек, лойиҳа юридик ва психологик ёрдам кўрсатиш орқали муҳожирларнинг ҳуқуқларини ҳимоя қилади”, - дейилади расмий билдирувда.

Пентагон Россия томонидан Ливияга жанговар учоқлар ташланганини билдирди

Ливияга йўллангани тахмин қилинаётган Россия жанговар учоғи.

АҚШ Қуролли кучларининг Африка қўмондонлиги 26 май куни Россия яқинда генерал Халифа Ҳафтар қуролли гуруҳи томонида жанг қилаётган ёлланма аскарларни дастаклаш учун Ливияга жанговар учоқлар ташланганига оид баёнот тарқатди.

АҚШ қўмондонлиги сайтида, иддаоларга кўра, Ливияга келгани тахмин қилинаётган учоқлар суратлари келтирилган.

Баёнотда Россиядаги ҳаво базасидан парвоз қилган учоқлар даставвал Сурияга қўнгани, Сурияда улар Россия авиациясига мансуб экани билинмаслиги учун белгилари бўялгани айтилади.

Африка қўмондонлиги раҳбари генерал Стивен Таунсендга кўра, Россия анчадан бери Ливиядаги зиддиятга аралашганини рад этиб келган, бироқ эндиликда “буни яширмай қўйган”. Унинг таъкидлашича, Ҳафтар етакчилигидаги Ливия миллий армиясида ҳам, у томонда туриб жанг қилаётган “Вагнер хусусий ҳарбий ширкати” ёлланма аскарларида ҳам Ливияга келган тўртинчи авлод жанговар учоқлари йўқ. “Россиялик ёлланма учувчилар Россиядан етказиб берилган учоқларда парвоз қилиб, ливияликларни бомбалайди”, деди америкалик генерал.

Баёнотда Россия хатти-ҳаракатлари Ливияда зиддият давом этиши ва қурбонлар сони кўпайишига олиб келиши урғуланади. Айни пайтда Ҳафтарни дастаклаш орқали Россия узоқни кўзловчи стратегик мулоҳазаларга таянмоқда. АҚШ қўмондонлигига кўра, Россия Ливия соҳилига яхшилаб ўрнашиб олиб, у ерда кириш ва манёвр учун чеклов ва тақиқ системасини жойлаштиришга уринмоқда, бу эса, ўз навбатида, жанубий Европани хавф остига қўяди. Россиянинг Ливиядаги хатти-ҳаракатлари Европага муҳожирлар оқими ошишига ҳам сабаб бўлади.

Россия Мудофаа вазирлиги АҚШ қўмондонлиги иддаолари юзасидан ҳали изоҳ берганича йўқ.

Ливияга Россияники экани тахмин қилинган камида саккизта ҳарбий учоқ ташлангани ҳақида аввалроқ Bloomberg агентлиги хабар қилганди. Агентлик учоқлар Ливияга Суриядаги Хмеймим ҳарбий базасидан етиб келганини иддао қилган. Таъкидланишича, авиация Ҳафтар амалиётини дастаклаши лозим. Москва бу хабар юзасидан ҳам изоҳ берган эмас.

Ливияга келган учоқлар суратларини таҳлил қилган The Drive сайти аввалроқ уларнинг Россияга тегишлилигини шубҳа остига олган. Бу учоқлар ичида камида олтита МиГ-29 қирувчиси ва иккита Су-24 ҳужум учоғи бор, айни пайтда МиГ-29 учоқлари Суриядаги ҳаво кампаниясида қўлланилган эмас. Материалда, манбалардан олинган маълумотларга кўра, қирувчи учоқларни Ҳафтар қўшинларига Бирлашган Араб Амирликлари Беларусдан сотиб олиб, етказиб берган бўлиши мумкинлиги иддао қилинади. Уларни Мисрдан етказиб берилгани ҳам истисно қилинаётгани йўқ. Бу мамлакатлар Ҳафтарни дастакламоқда ва тез-тез қурол-аслаҳа билан таъминлаб турибди.

Ҳафтар ўзи билан курашаётган Миллий муроса ҳукумати қўшинларга қарши ҳаво зарбаларини кучайтиришга тайёрлигини билдирган. Бироқ Ҳафтар кучлари Триполи остонасидаги жангларда муваффақиятсизликларга учраётганига қарамай, ҳали Ливияга яқинда келган учоқларнинг жанговар ҳаракатларда иштирок этгани ҳақида хабар қилингани йўқ.

Аввалроқ Туркия матбуоти “Вагнер ХҲШ” жангчилари жанг майдонини тарк этиб, фронт орқасига эвакуация қилингани ҳақида хабар берганди.

Ливияда айни пайтда фуқаролар уруши кетяпти. Ҳозирда мамлакат ғарби ва пойтахт Триполини Миллий муроса ҳукумати ўз назорати остида тутиб турибди. Уни БМТ, ғарб мамлакатлари, Туркия ва Қатар дастакламоқда. Мамлакат шарқи ва жанубининг бир қисмини Ливия намояндалар палатаси назорат қилмоқда. 2014 йилда сайланган бу гуруҳ “Тобрукдаги ҳукумат” сифатида танилган. Уни яқинда ўзини мамлакатдаги ягона ҳокимият деб эълон қилган генерал Халифа Ҳафтар бошчилигидаги Ливия миллий армияси дастакламоқда. Унга, ўз навбатида, БАА ва Миср кўмак бермоқда. Ҳафтар бир неча бор Москвага ташриф буюриб, россиялик юқори лавозимли амалдорлар билан музокаралар олиб борган. Россия расман ўзаро кураш олиб бораётган томонларнинг ҳеч қайсисини дастаклаётгани йўқ.

Жорий йил бошида Владимир Путин ва Туркия президенти Ражаб Тоййиб Эрдўғон 12 январдан Ливияда жанговар ҳаракатларни тўхтатиш ташаббуси билан чиққан эдилар. Ҳафтар бу таклифни рад этган. Эрдўғон Ҳафтар томонида 2 минг чоғли россиялик ёлланма аскар жанг қилаётганини иддао қилган. Расмий Москва, Ливияда россиялик фуқаролар бор бўлган тақдирда ҳам, улар Россия куч ишлатар тузилмаларини тамсил этмаслигини билдириб келади.

Тожикистонда тантанали тўй маросимлари тақиқланди

Коронавирус пандемияси туфайли Тожикистонда тўй тантаналарини ўтказишга тақиқ қўйилди. Бунга оид қарор Дин, анъана, тантана ва маросимларни тартибга солиш қўмитаси томонидан олинган. Бу ҳақда Озодликнинг тожик хизмати қўмита матбуот котиби Афшин Муқим сўзларига таянган ҳолда хабар қилди.

Мулозимга кўра, муқаддас Рамазон ойи тугаганидан кейин қўмитанинг маҳаллий бўлимларига фуқаролардан тўй ўтказиш бўйича аризалар келиб туша бошлаган. Уларнинг ҳаммасига “COVID-19 га қарши кураш бўйича республика штаби тавсияларига мувофиқ” рад жавоби берилган. Тўйларга тақиқ эпидемиологик вазият яхшиланганидан кейин бекор қилишини режаланмоқда. Афшин Муқим ФДҲЁлар аввалгидек никоҳларни қайд этавериши, бироқ тантаналар бўлмаслигини қўшимча қилган.

Тўй ўтказишга тақиқ қўйилгани ресторанларни қийин аҳволга солиб қўйган. Душанбедаги “Дидор” ресторани ходимлари журналистларга тақиқ жорий этилганидан кейин мижозлар банкет ўтказиш учун гаров сифатида ташлаб кетилган пулларини қайтариб беришни талаб қила бошлаганлар. Шу важдан ресторан солиқ ва ойликларни тўлашда қийинчиликларга йўлиққан.

Расмий маълумотларга кўра, мамлакатда ҳар йили 80 мингга яқин никоҳ қайд этилади. Ҳар никоҳнинг олтинчиси эса ажралиш билан тугайди.

Аввалроқ Тожикистонда коронавирус инфекцияси ёйилишининг олдини олиш учун ўқув муассасалари, кийим-кечак бозорлари, масжидлар, гўзаллик салонлари, автомобилларни ювиш шохобчалари ёпилган. Айни пайтда тиббиёт муассасалари, дорихоналар ва фармацевтика ширкатларининг барчаси туну кун ишлаш тартибига ўтказилган.

Сўнгги маълумотларга кўра, Тожикистонда коронавирусга чалинганлар сони 3266 нафарга етган, 1417 нафар соғайиб кетган, 47 нафари эса оламдан ўтган.

Европа Иттифоқи COVID-19 га қарши вакцина учун 9,5 млрд евро йиғди

Европа Иттифоқи коронавирус инфекциясига қарши эмдори ишлаб чиқиш учун 9,5 миллиард евро маблағ тўплади. Бу ҳақда Еврокомиссия раҳбари Урсула фон дер Ляйен билдирди.

4 май куни ЕИ лидерлари COVID-19 га қарши курашга маблағ йиғиш учун виртуал саммит ўтказгандилар. Урсула фон дер Ляйенга кўра, биринчи босқичда зарур бўлган 7,5 миллиард евро йиғилган. Кейин эса хусусий шахслар, давлат тузилмалари ва жамғармалар хайрияни давом эттирганлар.

ЕИ мулоҳазасича, жамғарилган маблағ коронавирусни глобал миқёсда тадқиқ қилиш ҳамда кейинги босқичда вакцина ва дори-дармонлар ишлаб чиқаришга йўналтирилади. Дори-дармонлардан барча давлатлар, шу жумладан, энг қашшоқ мамлакатлар ҳам фойдалана олиши лозим.

Коронавирус вакцинаси синовини айни пайтда бир неча ўн тадқиқот гуруҳи олиб бормоқда. Бир неча препарат тест учун тайёр ёки аллақачон одамларда синалмоқда. Бироқ мутахассислар эмдори бозорда бир йилдан аввал пайдо бўлмаслиги мумкинлигини тахмин қилмоқдалар.

Сўнгги маълумотларга кўра, дунё бўйлаб коронавирусга чалинганлар сони 5,6 миллиондан ошган, қурбонлар сони эса 350 мингга яқинлаб қолган.

Москвада Ғалаба паради 24 июнь куни ўтказиладиган бўлди

Россия президенти Владимир Путин мудофаа вазири Сергей Шойгуга Москвада Иккинчи жаҳон уруши тугаганининг 75 йиллигига бағишланган Ғалаба паради ўтказишга тайёргарликни бошлаш ҳақида топшириқ берди. Парад 24 июнга режаланган. Президент иштирокидаги расмийлар мажлисини “Россия-24” телеканали трансляция қилган.

“Барҳаёт полк” юриши ва анъанавий Ҳарбий-денгиз паради 26 июль куни ўтиши керак, деди В. Путин.

Россия президенти, агар пандемия туфайли иштирокчилар учун хавф сақланиб қоладиган бўлса, юриш яна бир ой кейинга кўчирилиши мумкинлигини қайд этди.

1945 йил 24 июнида Москвадаги Қизил майдонда тарихий парад бўлиб ўтган. Парадни маршал Георгий Жуков қабул қилган, қўшинларга маршал Константин Рокоссовский қўмондонлик қилган.

Анъанавий парад ва “Барҳаёт полк” юриши май ойида коронавирус эпидемияси туфайли ўтказилмай қолганди. Даставвал расмийлар 9 май куни кенг кўламли тантана ўтказишни режалаган, ҳатто бу маросимга бир неча давлат лидерини ҳам таклиф қилиб қўйгандилар.

Бу йилги парадда 15 минг одам ва қарийб 400 дона техника иштирок этиши керак эди. Бу режага ўзгартиш киритилганми-йўқми – ҳозирча маълум эмас.

Кобул Толибон тарафдори бўлган яна 900 нафар маҳкумни озод қилади

Афғонистон хавфсизлик кучлари ходими Рамазон ҳайитининг илк кунида, Кобул, 2020 йил 24 майи.

Афғонистон расмийлари оташкесимнинг сўнгги куни бўлган 26 майда Толибонга алоқадор яна 900 нафар маҳкумни қамоқдан озод этишни режалаяпти. Душанба куни расмий Кобул 100 нафар маҳкумни озод қилганди.

Афғонистонда Рамазон ҳайити муносабати билан 24 майдан бошлаб эълон қилинган жанг ҳаракатларини вақтинча тўхтатиш амалиётига, расмийларга кўра, мамлакатнинг аксар ҳудудларига риоя қилинмоқда.

Толибон вакилларининг оташкесим таклифига жавобан Афғонистон ҳукумати мазкур ҳаракатга алоқадор икки минг нафаргача жангарини озодликка чиқаришни ваъда қилган.

“Бугун 900 кишини озод қилиш бўйича қарор қабул қилинган”, деди Афғонистон миллий хавфсизлик кенгаши матбуот котиби Жовид Файсал 26 май куни. У ҳуқуқий процедуралардан келиб чиққан ҳолда якуний рақам ўзгариши мумкинлигини қўшимча қилган.

Февраль ойида Қўшма Штатлар ва толиблар АҚШ тарихидаги энг узоқ ҳарбий амалиётни поёнига етказишга йўналтирилган битимни имзолагандилар. Ҳужжат Толибон зиммасига хавфсизликни таъминлаш бўйича мажбуриятлар юклаш эвазига АҚШ қўшинларини Афғонистондан олиб чиқиб кетиш тартибини белгилайди. Битим билан Кобул Толибон тарафдори бўлган тақрибан беш минг маҳкумни озод этиши, Толибон эса ҳукумат тарафдори бўлган мингга яқин асирни озод қилиши лозимлиги ҳам шартлашилган. Бу чоралар Афғонистонда ички музокаралар бошланишига туртки бериши керак, деб ҳисобланмоқда.

Афғонистон президенти Ашраф Ғани ҳукумат узоқ йиллардан бери давом этаётган урушни тўхтатиш учун асосий омил ўлароқ кўрилаётган толиблар билан тинч музокаралар олиб боришга ҳозирлигини билдирган.

Тожикистонга Ўзбекистондан яна 24 тонна дори-дармон йўлланди

Ўзбекистон президенти Шавкат Мирзиёевнинг топшириғига биноан Душанбега галдаги инсонпарварлик ёрдами жўнатилди. Бу сафарги 24 тоннали юк дори-дармонлардан, асосан, антибиотиклардан иборатдир.

Душанбе мэриясидаги манба Asia-Plus нашрига Душанбега етиб келган ёрдам юки пойтахт соғлиқни сақлаш ва аҳолини ижтимоий ҳимоялаш бошқармасига топширилганини маълум қилган.

Манбага кўра, Душанбе мэри тегишли тузилмаларга олинган дори-дармонларни ўз ўрнида ва коронавирусга чалинганларни бепул даволаш учун ишлатилишини назорат қилишни топширган.

Қайд этилишича, инсонпарварлик ёрдами ўлароқ келган дори-дармонлар “Samarkand England Eco-Medical” Ўзбекистон-Британия қўшма корхонасида ишлаб чиқарилган.

Ўзбекистон Тожикистонга шу йил 9 апрель куни 18 вагонда ун, тозалаш воситалари, тиббий халатлар, қўлқоплар, ниқоблар, кўзойнаклар, респиратор ва пирометрлардан иборат гуманитар ёрдам йўллаганди.

Шу йил 8 май куни Ўзбекистон президенти Шавкат Мирзиёев топшириғи билан қўшни мамлакатга яна 10 тонна тиббий жиҳоз ва воситалар, жумладан, 10 та ўпка сунъий вентиляцияси аппарати етказилган. 9 май куни Душанбега Ўзбекистондан яна 144 та мобил тиббий контейнер етиб борган.

Россияда бир ҳафта ичида иккинчи Ми-8 ҳарбий вертолёти ҳалокатга учради

Ми-8 ҳарбий вертолёти.

Россиянинг Чукотка минтақасида Ми-8 ҳарбий вертолёти қўниш пайтида ҳалокатга учради. Оқибатда вертолёт экипажининг 4 аъзоси ҳалок бўлди.

Вертолёт ҳалокатига техник носозлик сабаб бўлгани айтилмоқда. У ерга қўниши билан ёниб кетган. Россия Мудофаа вазирлигининг 26 май куни билдиришича,“Угольние Копи” аэродроми ҳудудида ҳалокатга учраган Ми-8 ўқув машғулотини амалга ошираётган эди.

20 майда ҳам Москва вилоятида Ми-8 ҳарбий вертолёти ўқув машғулотни амалга ошираётган пайтда ҳалокатга учраган ва экипажнинг 4 аъзоси ҳалок бўлгани хабар қилинган.эди. Вертолёт экипажи 2017-2019 йилларда ҳарбий билим юртини битирган ёш йигитлардан иборат бўлган. Мазкур вертолёт қулашига ҳам техник носозлик сабаб қилиб қўрсатилган.

Россияда жосусликда айбланиб қўлга олинган АҚШ фуқаросига прокурор 18 йил қамоқ сўради

Пол Уилан Москвада 2018 йилнинг декабрида қўлга олинган эди.

Прокурор Москва судидан АҚШ фуқароси Пол Уиланга 18 йиллик қамоқ жазоси берилишини талаб қилмоқда. Бу ҳақда “Интерфакс” Уиланнинг адвокати Владимир Жеребенковга таянган ҳолда хабар берди.

Судда жосусликда айбланаётган Уилан айбсизлигини ва шунинг учун уни озод этишни илтимос қилган.

Озодлик радиоси рус хизматининг ёзишича, Уиланга нисбатан якуний суд мажлиси 25 майда Москва шаҳар судида ўтган. Уиланга ҳукм 15 июнда ўқилиши айтилган. Уиланга нисбатан суд жараёни 20 апрелда бошланган эди.

Адвокатнинг айтишича, судда ўнга яқин гувоҳ кўрсатма берган ва улар Уилан ўзларини жосусликка ёлламоқчи бўлгани ҳамда махфий маълумотларни тўплагани тўғрисидаги тергов иддаоларини инкор қилишган.

АҚШ собиқ ҳарбий денгизчиси Пол Уилан Москвадаги меҳмонхоналарнинг бирида 2018 йилнинг декабрида қўлга олинган эди. 49 ёшдаги Уилан Канада, Ирландия ҳамда Британия фуқаролигига ҳам эга.

АҚШ ҳукумати бир неча маротаба Уиланнинг айбсиз эканига ишонишларини билдириб, Россия ҳукуматини уни озод этишга чақирган.

Россия қонунчилигига асосан жосусликда айбланганлар 20 йилгача қамоқ жазосига ҳукм қилиниши мумкин.

Коронавирус: Бир кунда Қозоғистонда 438, Қирғизистонда 35 бемор аниқланди

Олмаотадаги савдо марказларидан бирига кириш йўлаги.

Қозоғистонда 25 май ҳолатига кўра, 438 кишида коронавирус аниқланган. Озодлик радиоси қозоқ хизматининг билдиришича, бу мамлакатда коронавирус бўйича илк ҳолат аниқланган 13 мартдан бери рекорд кўрсаткичдир.

Қозоғистонда шу кунгача коронавирусга чалинганлар сони 8 969 нафарга етди. Улардан 4 515 нафари соғайди, 35 нафари вафот этди.

Қирғизистонда сўнгги бир сутка ичида яна 35 кишида коронавирус аниқланди. Бу ҳақда 26 май куни соғлиқни сақлаш вазири ўринбосари Нурбўлўт Усўнбаев маълум қилди.

Бу билан Қирғизистонда коронавирус юққанлар сони 1468 одамга етди. Беморлардан 16 киши вафот этди ва 1015 бемор соғайди.

Туркман шоу-бизнесининг гейликда айбланиб қўлга олинган таниқли вакилларига ҳукм ўқилди

Туркманистондаги қамоқхоналардан бири.

Ашхобод суди гейликда айбланган машхур туркман шоуменини икки йилга озодликдан маҳрум қилди.

Озодлик радиоси туркман хизматининг 25 майда хабар беришича, ҳукм 7 майда ўқилган, аммо бу ҳақда фақат бугунга келиб маълум бўлган. Қамалган шоуменнинг исми айтилмаяпти, унинг исми хабарларда Г.С., сифатида келтирилмоқда. Маълум қилинишича, унинг отаси Туркманистонда таниқли бўлган дипломатдир.

Хабарда айтилишича, Г.С., билан биргаликда гейликда айбланган яна бир неча кишига ҳам ҳукм ўқилган. Лекин уларнинг аниқ сони ҳақида маълумот йўқ. Уларниг барчаси айбловни тан олгани билдирилган.

Хабарда айтилишича, судланганлар Рамазон ҳайити муносабати билан президент эълон қилган амнистияга тушишларини умид қилганлар. Лекин улардан бирортаси афв этилмаган.

Озодлик радиоси 16 апрелда март ойининг иккинчи ярмида Туркманистондаги машҳур шоумен, артист ва бошловчи (исми Озодликка маълум) гейликда гумонланиб қамоққа олингани тўғрисида хабар берганди.

Мазкур машҳур шоумен билан биргаликда яна ўнга яқин одам, жумладан, унинг йигити деб иддао қилинган шахс ҳам ҳибс қилинган. Хабарда иддао қилинишича, ҳибс қилинганлардан айримлари пора бериб қамоқдан чиқишга муваффақ бўлган.

Туркманистонда гомосексуализм жиноят ҳисобланади. Жиноят кодексининг 135-моддаси (гомосексуализм)да гейларни икки йилгача озодликдан маҳрум қилиш назарда тутилган.

Помпео Толибонга алоқадор 2 минг маҳкумни озод қилгани учун Кобулга миннатдорчилик билдирди

Майк Помпео, Ашраф Ғани ва Абдулла Абдулла (архив сурати).

АҚШ Давлат котиби Майкл Помпео “Толибон” радикал ҳаракатининг 2 минг нафар тарафдорини қамоқхоналардан озод қилиш қарори учун Афғонистон расмийларига ташаккур изҳор этди. Бу ҳақда Афғонистон президенти Ашраф Ғани Twitter микроблогидаги ўз саҳифаси орқали маълум қилди.

Помпео куни кеча Ашраф Ғани ва Афғонистон миллий ярашув олий кенгаши раҳбари Абдулла Абдулла билан телефон орқали суҳбатда “Толибонга алоқадор 2 минг нафаргача кишини озод қилиш бўйича жасоратли жараён учун афғон расмийларига миннатдорчилик билдирган”. У Вашингтон Афғонистонда ўт очишни узоқ муддатга тўхтатишга ҳамда Кобул ва “Толибон” ҳаракати ўртасида бевосита музокараларнинг бошланишига эришишга ҳаракат қилаётганини ҳам билдирган.

Эслатиб ўтамиз, аввалроқ Афғонистон президенти Рамазон ҳайити пайтида қуролли рақиблар ўртасида эълон қилинган сулҳга жавобан яхши ният ифодаси ўлароқ “Толибон” тарафдорларидан 2 минг кишини қамоқхоналардан озод қилиш ҳақида буйруқ берган. Ашраф Ғани мамлакат хавфсизлик кучларига муваққат яраш аҳдини тутишни топширган.

Февраль ойида Қўшма Штатлар ва толиблар АҚШ тарихидаги энг узоқ ҳарбий амалиётни поёнига етказишга йўналтирилган битимни имзолагандилар. Ҳужжат Толибон зиммасига хавфсизликни таъминлаш бўйича мажбуриятлар юклаш эвазига АҚШ қўшинларини Афғонистондан олиб чиқиб кетиш тартибини белгилайди. Битим билан Кобул Толибон тарафдори бўлган тақрибан беш минг маҳкумни озод этиши, Толибон эса ҳукумат тарафдори бўлган мингга яқин асирни озод қилиши лозимлиги ҳам шартлашилган. Бу чоралар Афғонистонда ички музокаралар бошланишига туртки бериши керак, деб ҳисобланмоқда.

COVID-19: Тожикистондаги беморлар сони Ўзбекистондагига яқинлашди

Иллюстратив сурат.

Тожикистонда коронавирусга чалинганлар сони Ўзбекистондаги беморлар сонига яқинлашиб қолди. Тожикистон Соғлиқни сақлаш ва аҳолини ижтимоий ҳимоялаш вазирлиги, 25 май соат 19:00 ҳолатига кўра, мамлакатда COVID-19 инфекцияси 3100 кишида аниқланганини билдирди.

Ўзбекистоннинг ён қўшниси бўлган бу мамлакатда коронавирус важидан ҳаётдан кўз юмганлар сони 46 нафарга етган, айни пайтда беморларнинг 1395 нафари соғайиб кетгани айтилмоқда.

Ўзбекистонда эса, СВВнинг маълум қилишича, 25 май соат 16:30 ҳолатига кўра, коронавирусга чалинганлар сони 3189 нафарни ташкил қилмоқда. Беморлардан 2607 нафари соғайиб кетган, 13 киши оламдан ўтган.

Бу орада Тожикистонда Интернет тармоғида COVID-19 қурбонлари бўйича тузилаётган “халқ рўйхати”да пневмония ва коронавирус туфайли нобуд бўлганлар сони 340 нафардан ошиб кетди. Рўйхат оммавий ахборот воситалари хабарлари, ижтимоий тармоқлар ва қурбонларнинг яқинларидан олинган маълумотлар асосида тузилмоқда. Мутахассислар ва фуқаронинг кўпи расмий статистиканинг ҳаққонийлигига анчадан бери ишонмай қўйган.

Қирғизистон ҳукумати транспортда ниқоб тақмаганларга чора кўрилишидан огоҳлантирди

Жамоат жойлари ва транспортда ниқоб тақмаган фуқароларга нисбатан чора кўрилади. Бу ҳақда, Қирғизистон ҳукумати матбуот хизматининг маълум қилишича, Республика тезкор штаби мажлисида бош вазир ўринбосари Қубатбек Бўрўнов билдирган.

Мулозим савдо марказлари ва дўконлар хавфсизлик хизматлари ходимларининг мижозлар ва ходимлар томонидан санитария меъёрларига риоя қилишини назорат қилиш бўйича жавобгарлигини кучайтириш муҳимлигини алоҳида таъкидлаган.

“Бугун, 25 майдан иқтисодий фаолиятнинг қатор турлари ўз ишини қайта бошлади, шаҳарларда жамоат транспорти ишга туширилди. Шу боис шаҳар мэрияси ходимлари, автотранспорт корхоналари раҳбарлари Соғлиқни сақлаш вазирлигининг санитария-дезинфекция чораларига қатъий риоя қилиш бўйича тавсиялари ижросини назорат қилишлари шарт. Ниқобсиз юрган фуқароларнинг коронавирус юқтириб олиш хавфи анча юқори бўлиб қолмоқда. Шунинг учун ҳам жамоат жойларида фуқаролар ниқобда юришлари шарт”, деди бош вазир ўринбосари.

Аввалроқ Бишкек мэрияси пойтахт кўчаларига 110 та троллейбус ва 112 автобус чиққани, аммо микроавтобуслардан 800-900 тасигина ишга қайтгани, бу эса бутун автопаркнинг 50 фоизини ташкил этишини маълум қилганди. Расмийлар жамоат транспорти салонлари ҳар рейс учун алоҳида дезинфекция қилинишини, ҳайдовчилардан эса фақат ўриндиқлар сонига қараб йўловчи олишни талаб қилмоқда.

Хитой расмийлари Ҳонконгда “террорчилик кучайгани”ни иддао қилмоқда

Ҳонконгдаги норозилик акциясидан лавҳа, 2020 йил 24 майи.

Аксилҳукумат намойишлари қабатида Ҳонконгда “террорчилик кучайгани” кузатилмоқда. Бу ҳақда 25 май куни Пекиннинг Ҳонконгдаги бир неча юқори лавозимли амалдори баёнот берди.

Полиция маълумотларига кўра, норозилик намойишлари бошланган ўтган йил июнидан бери фаоллар камида 14 маротаба портловчи модда қўллаганлар. Норозилардан айримларининг ёнидан ўқотар қурол ва ўқ-дори топилиб, мусодара қилинган.

Куни кеча Ҳонконгда минглаб одам Хитойнинг мухторият миллий хавфсизлигига оид янги қонунини қабул қилиш режасига қарши намойишларда иштирок этди. Ҳужжат Хитойга Ҳонконгда миллий қонунларни қўллаш ва у ерда махсус хизматлар ваколатхоналарини очиш ҳуқуқини беради. Пекин иддаосича, қонун шаҳарда айирмачиликни тийиб туриш имконини беради. Хитой расмийлари COVID-19 эпидемиясига қарши курашни ҳам миллий хавфсизлик жабҳасига киритганлар. Ўз навбатида, норозилар ҳужжат “битта мамлакат, иккита система” тамойилига зид келишини айтмоқдалар.

Ҳонконгда якшанба куни бўлиб ўтган намойиш коронавирус эпидемияси бошланганидан бери ўтказилган оммавий норозилик тадбирларининг биринчиси эди. Эпидемия туфайли кескин карантин чоралари жорий қилинган Ҳонконгда ҳалигача бир жойда 8 нафардан кўп одам йиғилиши тақиқланган. Бироқ бу тақиқ одамларнинг норозилик акциясига чиқишига монеъ бўлолмади. Айрим жойларда полиция намойишчиларга қарши кўздан ёш сиздирувчи газ қўллади, 200 чоғли одамни тутиб кетди.

Ҳонконг миллий хавфсизлик тўғрисида ўз қонунини зудлик билан қабул қилиши лозимлиги ҳақида Хитой расмийлари апрель ойида билдирганлар. ХХР томонидан дастакланган минтақа маъмурияти ҳужжатнинг тезлик билан қабул қилинишини ёқламоқда.

Қўшма Штатлар Ҳонконгга янги қонунни тиқиштираётгани учун Хитойни қоралаб чиқди. Вашингтон Пекинга санкциялар билан таҳдид қилди. ХХР эса АҚШни унинг ички ишларига аралашаётганликда айблади.

“Битта мамлакат, иккита система” ғояси ўтган асрнинг 80-йиллари бошида Хитой лидери Дэн Сяопин томонидан таклиф этилган. Мазкур ғояга мувофиқ, Ҳонконг, Макао ва Тайван каби мухториятлар ўз иқтисодий ва сиёсий системасига эга бўлиши мумкин, айни пайтда Хитой билан бир мамлакат бўлиб қолаверади.

Ўтган йил ёзида Ҳонконгнинг пекинпараст раҳбарияти жиноятда гумонланганларни қитъа Хитойига экстрадиция қилиш тўғрисида қонун қабул қилиш қарорини олганди. Бу оммавий норозилик намойишларига сабаб бўлган. Норозилик чиқишлари чоғида полиция билан тўқнашувлар кузатилган. Оммавий намойишлардан сўнг расмийлар қонун лойиҳасидан воз кечганлар, бироқ норозилар кўчаларга чиқиб, Хитойдан янада мустақил бўлиш ва қўлга олинган фаолларнинг барчасини озод этишни талаб қилишда давом этганлар. Бироқ эпидемия бошланганидан бери оммавий норозилик тадбирлари ўтказилган эмас.

Қозоғистон президенти тинч йиғилишлар тўғрисидаги янги қонунни имзолади

Қозоғистон президенти Қасим-Жомарт Тоқаев ҳимоя ниқобида, 2020 йил 19 майи.

Қозоғистон президенти Қасим-Жомарт Тоқаев 25 май куни тинч йиғилишлар тўғрисидаги қонун ҳамда тинч йиғилишларни ташкил этиш ва ўтказиш масалалари бўйича айрим қонун ҳужжатларига тегишли ўзгартиш ва қўшимчалар киритишга оид ҳужжатни имзолади.

Ҳуқуқ фаоллари мазкур қонун лойиҳаси халқаро стандартларга зид келишини бир неча бор қайд этганлар. Улар ҳукуматни қонун лойиҳасини парламентдан чақириб олиш ҳамда экспертиза учун БМТ ва ЕХҲТга йўллашга чақиргандилар.

Ҳужжат парламентнинг икки палатасидан ўтганидан кейин фаоллар президентнинг унга вето қўйиш ҳуқуқи борлигини қайд этгандилар.

Фаолларга кўра, ҳужжатда баён этилган тартиб феълан йиғилиш ўтказиш билан боғлиқ барча ишлар учун расмийлардан “изн”олишни талаб қилади.

Уларнинг хавотир билан қайд этишларича, расмийлар фавқулодда вазият ва ҳаракатланишга нисбатан чеклов жорий этилган бир шароитда қонун лойиҳасини парламентдан апил-тапил ўтказиб олишга уринганлар, ФВ эса жамоатчиликнинг мазкур лойиҳага қарши сафарбар бўлишини қийинлаштирган.

Қозоғистон президенти маъмурияти 25 май кунги хабарномасида қонун матни матбуотда эълон қилинишини билдирган.

Қонун расман ёйинланганидан 10 кун ўтиб кучга киради. Унинг кучга кириши 1995 йил 17 мартида қабул қилинган қонунни бекор қилади. Ваҳоланки, 25 йил аввалги қонун ҳам ҳуқуқ фаоллари томонидан халқаро стандартларга зид ҳужжат ўлароқ танқид қилиб келинган.

Оммавий норозилик намойишлари қабатида 2019 йилнинг июнь ойида ўтказилган президент сайловида ғолиб топилган Тоқаев қасамёдга келтириш маросимидан сўнг митинглар тўғрисида янги қонун қабул қилишга ваъда берган. Президент ваъдасига мувофиқ, янги қонун бўйича ташкилотчилар митинг учун расмийлардан рухсат олиб ўтирмай, уларни огоҳлантириб қўйиши кифоя қилиши керак эди.

Февраль ойида Ахборот ва ижтимоий тараққиёт вазирлиги тинч намойишларга оид қонун лойиҳаси тақдимотини ўтказган. Ҳужжатни ўрганиб чиққан ҳуқуқшунослар ҳукумат янги қонун лойиҳасига ҳам мавжуд чекловларни олиб ўтишга уринаётганини сезиб қолганлар.

1995 йилги қонун қозоғистонликлардан оммавий намойишлар ўтказиш учун маҳаллий расмийлардан рухсат олишни талаб қилади. Митинглар ва бошқа шу каби тадбирларни ўтказиш учун топширилган аризалар кўпинча ҳокимликлар томонидан турли баҳоналар билан рад этилади.

Ҳуқуқ фаоллари ва халқаро ташкилотларга кўра, янги қонун ҳам 1995 йилги қонун сингари фуқаровий ва сиёсий ҳуқуқ ва мажбуриятлар соҳасида Қозоғистон ўз зиммасига олган халқаро стандартларга мувофиқ эмас.

Тува раҳбари коронавирусга чалинди

Тува раҳбари Шўлбан Қара-оол.

Россия Федерацияси таркибидаги Тува республикаси раҳбари Шўлбан Қара-оол коронавирус инфекциясини юқтириб олган. Бу ҳақда унинг ўзи Instagram тармоғидаги саҳифаси орқали маълум қилди. У билан биргаликда минтақа ҳукуматининг бир неча амалдори ҳам коронавирусга чалингани боис касалхонага ётган.

Тува раҳбари “жиддий иллат” туфайли касалхонага ётқизилганини билдирди.

Қара-оол туваликларга жамоат жойларига ниқоб ва қўлқопсиз бормаслик, қўлларни ювиш ва биноларни дезинфекциялашни тавсия қилди.

У Қизил шаҳридаги коронавирусга чалинганлар учун мўлжалланган касалхонага ётқизилган. Кадрлардан унинг оддий палатада ётганини билиш мумкин.

Сўнгги маълумотларга кўра, Тувада айни пайтгача коронавирус инфекциясини юқтириб олиш билан боғлиқ 706 та ҳолат қайд этилган, бир киши оламдан ўтган.

Тува раҳбари минтақани масофадан туриб бошқаришни ваъда қилиб, одамларни қўрқитмаслик учун соғлиғи ҳақида бошқа маълумот бермаслигини айтган ҳамда яна бир бор ҳаммани карантин чораларига қатъий риоя қилишга чақирган.

Қирғизистон парламентининг собиқ раиси коронавирусдан вафот этди

70 ёшли Чўлпўнбаевда 5 май куни коронавирус аниқланган эди.

Коронавирус оқибатида вафот этган Қирғизистон парламентининг собиқ раиси Мукар Чўлпўнбаев 25 май куни Бишкекдаги “Ала-арча” қабристонига дафн этилди.

Таниқли жамоат ва давлат арбоби бўлган Мукар Чўлпўнбаев 24 майда республика юқумли касалликлар шифохонасида вафот этган. 70 ёшли Чўлпўнбаевда 5 май куни коронавирус аниқланган эди. У 12 майда реанимацияга ётқизилган.

Расмий хабарда таъкидланишича, коронавирус ортидан унда икки томонлама пневмония, нафас олиш етишмовчилиги каби қатор касалликлар авж олган. Чўлпўнбаев Қирғизистонда COVID-19дан ўлган 15-бемор бўлди.

Мукар Чўлпўнбаев 1995-1996 йилларда парламент спикери лавозимида ишлаган. У спикерлик даврида собиқ президент Асқар Ақаев сиёсатини очиқ танқид қилган.

Қирғизистонда коронавирус бўйича илк ҳолат аниқланган 18 мартдан то шу кунгача коронавирусга чалинганлар сони 1433 кишига етди. Улардан 16 нафари вафот этди, 992 нафари соғайди. Айни пайтда 12 беморнинг аҳволи оғир экани, улардан 4 нафари реанимацияга ётқизилгани хабар қилинди.

Минскда юзлаб одам мухолифатни қўллаб-қувватлаш тадбирида иштирок этди

Имзо чекишни истаганлар навбати бир неча кварталга чўзлиб кетди.

Минскда юзлаб одам Беларус президентлигига мухолифатдан президентликка номзод Светлана Тихановская ва Владимир Непомняшихни қўллаб-қувватлаш мақсадида ўтказилган имзо тўплаш тадбирида иштирок этди. Одамлар коронавирус туфайли ижтимоий масофани сақлагани ортидан имзо чекишни истаганлар навбати бир неча кварталга чўзлиб кетди.

Светлана Тихановская таниқли видеоблогер Сергей Тихановскийнинг рафиқаси. Сергей Тихановский номзодликка ҳужжат топшириш пайтида ҳибсда бўлгани учун унинг номзоди рўйхатга олинмаган. Тадбирда рафиқаси ўрнига Сергей Тихановскийнинг ўзи иштирок этди. У 20 кун давомида мамлакатнинг бошқа шаҳарларида ҳам имзо тўплаш тадбирлари ўтказилишини айтди.

Непомняших эса мухолифат лидерларидан бири бўлган Владимир Статкевичнинг тарафдори.

Статкевич ўз тарафдорларидан 30 нафарини “норозилик номзодлари” сифатида президентликка кўрсатишини билдирган. Бироқ фақат Непомняших ташаббус гуруҳигина расман рўйхатга олинди. Статкевич ҳам ушбу тадбирда иштирок этди.

Ҳар икки мухолифатчи ўзларининг асосий мақсадлари сайловда иштирок этиш эмас, балки имзо йиғиш тадбири доирасида имкони борича кўпроқ одамларни намойишларга йиғиш эканини билдирмоқда. Президентликка номзод сифатида рўйхатга олиниш учун 20 кун ичида бу икки номзоднинг ҳар бири камида юз минг сайловчи имзосини тўплаши зарур.

Беларусда президентлик сайлови 9 августда ўтказилади. Амалдаги президент Александр Лукашенка ўз номзодини олтинчи марта президентликка кўрсатмоқда.

Франция тарихида биринчи марта трансгендер аёл мэрликка сайланди

Мари Ко уни трансгендер бўлгани учун эмас, балки сайловолди дастури аҳолига ёққани учун мэрликка сайлашганини айтди.

Франция шимолидаги кичкинагина Тиюа-ле-Маршенн шаҳрининг мэрлигига мамлакат тарихида биринчи марта трансгендер аёл сайланди. 55 ёшли Мари Ко 24 майдан бошлаб 600 киши яшайдиган шаҳарча мэри лавозимини бажаришга киришди.

Мари Ко номзодини шаҳар кенгашининг 15 депутатидан 14 нафари қўллаб-қувватлади, 1 депутат бетараф қолди.

Le Figaro умуммиллий газетаси март ойида ўтган маҳаллий кенгашга сайловда Мари Ко раҳбарлигидаги номзодлар камида 63 фоиз овоз олганини ёзди.Тиюа-ле-Маршенн шаҳарчасида 455 сайловчи бор. Овоз беришда уларнинг 300 нафари иштирок этган.

AFP агентлигига интервью берган Мари Ко уни трансгендер бўлгани учун эмас, балки сайловолди дастури аҳолига ёққани учун мэрликка сайлашганини айтди. Мари Конинг уч фарзанди бор.

Исроилда Бош вазир Нетаняҳу устидан суд жараёни бошланди

Нетаняҳунинг мухолифлари унга қарши 24 май куни намойиш ўтказди.

Қуддус шаҳрида 24 май куни Исроил Бош вазири Бинямин Нетаняҳуга нисбатан суд жараёни бошланди. У коррупцияга аралашганликда гумонланмоқда.

Нетаняҳу судда унга нисбатан жиноят иши сохталаштирилганини айтди ва суд мажлиси телевидение орқали жонли эфирда намойиш этилишини талаб қилди.

Бош вазирга нисбатан жараёнга судя Ривка Фельдман-Фридман раислик қилмоқда. У коррупция билан боғлиқ ишларни олиб боришда тажрибага эга. Фридман 2015 йилда Нетаняҳудан олдинги Бош вазир Эхуд Олмерт ишини кўриб чиққан суд таркибида бўлган.

Нетаняҳунинг иши бўйича 300 гувоҳ сўроқ қилинади. Унга нисбатан айблов 2019 йилнинг ноябрида билдирилган. Прокуратура Бинямин Нетаняҳу ва унинг оиласи 2007 йилдан 2016 йилгача америкалик продюсер Арнон Милчен ва австралиялик бизнесмен Жеймс Пакердан 250 миллион евро миқдоридаги совғаларни, жумладан, қимматбаҳо тақинчоқларни олган, деб ҳисоблайди.

Нетаняҳу 17 май куни яна бир муддатга Бош вазир сифатида қасамёдга келтирилган эди. Агар суд уни айбдор деб топса, у истеъфо беришга мажбур бўлади.

НАТО расмийси: 2019 йилда 290 марта Европага яқинлаган рус ҳарбий учоқлари йўлини тўсдик

Исмини ошкор қилмаслик шарти билан Озодлик радиоси билан суҳбатлашган НАТО расмийси альянс учоқлари 2019 йилда деярли 300 марта НАТО ҳаволарига яқин келган Россия ҳарбий учоқлари йўлини тўсганини билдирди.

Расмий Озодликка юборган электрон мактубида Россия ҳарбий учоқлари 2014 йилдан буён Қора денгиз ҳамда Европанинг бошқа ҳудудлари яқинида тобора кўпроқ қайд этилаётганини айтди.

Расмийнинг сўзларига кўра, 2019 йилда НАТО қирувчи учоқлари Европа бўйлаб рус учоқларини кузатиб қўйиш ёки уларнинг изидан тушиш учун 290 марта ҳавога кўтарилган.

Ҳафтада бошида Россиянинг иккита «Ту-22» бомбардимончиси ҳамда иккита «Су-27» қирувчи учоғи Болгария, Руминия ва Туркия ҳаволарига яқинлашиши ортидан ушбу давлатлар ҳарбий учоқлари ҳавога кўтарилди.

Болгария мудофаа вазири Красимир Каракачанов Россия НАТОга аъзо давлатлар ҳарбий имкониятлари ва жавоб реакцияси суратини аниқлаш учун тез-тез шундай амалиётларни ўтказишини айтди.

Россия 2014 йилда Қримни аннексия қилиб олганидан бери Қора денгиз ҳудудида ҳарбий фаолияти кўламини оширди. Бунга жавобан НАТОга аъзо давлатлар ҳарбий назорат ва кузатишни кучайтирди.

Давомини ўқинг

OzodTa'sir

XS
SM
MD
LG