O‘zbekiston adliya tizimidagi bir-biridan mustaqil bir nechta manbaning Ozodlikka ma’lum qilishicha, 4 va 5 mart kunlari O‘zbekiston Bosh Prokuraturasining bir nechta yuqori mulozimi hibsga olingan. Bosh prokuraturadan esa bunday ma’lumot mavjud emas degan rasmiy javob olindi.
Ularga ko‘ra, Davlat Xavfsizlik Xizmati xodimlari tomonidan 5 mart kuni ushlanganlar orasida Bosh prokuror muovini G‘ayrat Hidoyatov va Prokurorning ma’muriy sud ishlarini yuritishda vakolatlarini ta’minlash boshqarmasi boshlig‘i Ikrom Iskanov bor.
4 mart kuni esa Toshkent shahar prokurorining muovini Yorqin Abdullaev ushlangan edi.
Ozodlik suhbatlashgan adliya tizimdagi manbalarning bildirishicha¸ ushlangan shaxslar O‘zbekiston Jinoyat kodeksining 205-moddasi (“Hokimiyat yoki mansab vakolatini suiiste’mol qilish”) bo‘yicha ochilgan jinoyat ishi figurantlaridir.
Prokuraturadagi yuqori mulozimlarning ushlanishi O‘zbekiston huquq-tartibot idoralarida o‘nlab rahbar xodimlarining hibsga olingani manzarasida yuz bermoqda.
O‘zbekiston Bosh prokuraturasi Ozodlikka 4 va 5 martda yuz bergan hibsga olishlar haqida "bunday ma’lumot mavjud emas" javob qaytardi.