Линклар

Шошилинч хабар
01 июн 2020, Тошкент вақти: 22:03

Халқаро хабарлар

Россиядаги бомба заводида портлаш бўлди, сабаблар номаълум қолмоқда

A still image, taken from a video footage, shows smoke rising from the site of blasts at an explosives plant in the town of Dzerzhinsk, Nizhny Novgorod Region, Russia June 1, 2019. Elena Sorokina via REUTERS THIS IMAGE HAS BEEN SUPPLIED BY A THIRD PARTY

Россия расмийлари 1 июнь куни Дзержинск шаҳрида жойлашган портловчи моддалар заводида содир бўлган портлашни тергов қилмоқда.

Фавқулодда вазиятлар вазирлиги расмийси Валерий Цинков портлаш ортидан 700 нафар ишчи ҳодиса жойига сафарбар қилинганини маълум қилди.

Россия Соғлиқни сақлаш вазирлиги портлашлар ортидан 89 нафар одам тиббий ёрдам сўраб шифохонага мурожаат қилганини билдирди.

Вазирлик расмийси жароҳат олганларнинг аксари ўткир жисмлардан жароҳат олганини таъкидлади.

Расмий маълумотларга кўра, “Кристалл” заводида уч портлаш содир бўлган. Завод Россия Мудофаа вазирлиги учун кучли бомбалар тайёрлаб келган.

Кун янгиликлари

Путин Конституцияга ўзгартишлар киритиш бўйича овоз бериш санасини 1 июлга белгилади

Россия президенти Владимир Путин.

Россия президенти Владимир Путин мамлакат Конституциясига ўзгартишлар киритиш бўйича овоз бериш санасини 1 июлга белгилашга қарор қилди. Бу ҳақда Путиннинг ўзгартишларни ҳозирлаш бўйича ишчи гуруҳи ҳамраислари билан 1 июнь куни ўтказган учрашувида эълон қилинди.

Овоз беришни 1 июлга белгилаш қарорини Россия Марказий сайлов комиссияси раиси Элла Памфилова ҳам дастаклади. Айни пайтда у овоз бериш участкаларда одам тўпланишининг олдини олиш учун расмий санадан 6 кун аввал бошланишини билдирди. Памфиловага кўра, 2-3 минтақада масофадан туриб электрон овоз бериш ташкил этилиши мумкин.

Путин Конституцияга ўзгартиш киритиш бўйича овоз беришни Ғалаба паради ўтказиладиган 24 июнгача белгилаш таклифлари бўлгани, бироқ у бу икки воқеани бир-бирига аралаштирмасликка қарор қилганини билдирди.

Ишчи гуруҳ ҳамраиси Павел Крашенинников овоз бериш 25 июнданоқ бошланиши ва 1 июлга бориб тугашини тасдиқлади.

Роспотребнадзор раҳбари Анна Попова эпидемиянинг “юксалиши бўйича чўққидан ўтиб бўлингани”, хасталик юқтириб олаётганлар сони эса пасайиб бораётганини айтиб, овоз беришни 1 июль санасига белгиланиши фикрига қўшилди.

1 июль овоз бериш санаси ўлароқ белгиланиши мумкинлиги ҳақида турли оммавий ахборот воситаларининг манбалари аввал ҳам айтган. Бу санага муқобил сифатида 8 июль санаси қолаётганди.

Асосий қонундаги ўзгартишлардан бири амалдаги давлат раҳбарининг президентлик муддатини “нолга тушириш” бўлади.

Конституцияга ўзгартишлар киритиш бўйича овоз бериш санаси даставвал 22 апрелга белгиланганди, бироқ коронавирус инфекцияси эпидемияси туфайли у номаълум муддатга қолдирилган. Сўнгги кунларда овоз беришга тайёргарлик қайта бошлангани ҳақида маълумотлар пайдо бўла бошлади.

Россия Марказий сайлов комиссияси 20 майдан Конституцияга ўзгартишлар бўйича овоз беришга ҳозирликни қайтадан бошлаган. МСК Роспотребнадзор билан биргаликда эпидемия шароитида овоз беришни ўтказиш бўйича тавсиялар ишлаб чиққан. Бу тавсияларга кўра, овоз бериш участкалари очиқ ҳавода ҳам ташкил этилиши мумкин.

Арманистон бош вазири коронавирус инфекциясини юқтириб олди

Арманистон бош вазири Никол Пашинян.

Арманистон бош вазири Никол Пашинян коронавирусга чалинди. Бу ҳақда у Фейсбукдаги ўз саҳифаси орқали маълум қилди.

Пашинянга кўра, коронавирус инфекцияси унинг оила аъзоларида ҳам аниқланган. Хасталик ташқи аломатларсиз ва юқори ҳароратсиз кечмоқда, бироқ бош вазир бошқа ҳамкасбларига инфекция юқтирмаслик учун маълум муддат уйидан туриб ишлашга қарор қилган.

Арманистонда шу пайтгача коронавирус инфекциясини юқтириб олиш билан боғлиқ 9 минг 282 та ҳолат қайд этилган. Хасталик туфайли 131 бемор нобуд бўлган.

16 мартдан бу мамлакатда фавқулодда вазият тартиби жорий қилинган бўлиб, расмийларнинг сўнгги қарорига мувофиқ, у 13 июнгача чўзилган.

18 майдан Арманистонда жамоат транспорти ишга тушди, бироқ йўловчилардан ниқоб ва қўлқоп тақиш талаб қилинмоқда. Мамлакатда шу кунда савдо марказлари ва умумий овқатланиш жойлари тўла очилган.

Америкалик полициячилар норозиларга ҳамдардлик ўлароқ тиз чўкишди

АҚШда полициячилар ҳамкасбининг қилган айби учун халқдан тиз чўкиб узр сўрамоқда
Илтимос кутинг

Айни дамда медиа-манба мавжуд эмас

0:00 0:02:15 0:00

АҚШнинг Жанубий Флорида штатида турли муассасада ишлайдиган полициячилар Миннеаполисда қазо қилган афроамерикалик Жорж Флойд ўлимини қоралаган норозилар билан ҳамдард эканлари белгиси ўлароқ тиз чўкишди ва улар билан бирга дуо қилишди.

Бу ҳолат акс этган фотосуратни Майами-Дейд округининг полиция департаменти Фейсбукдаги ўз саҳифасига жойлади. “Биз буни тўғри йўл узра дуруст қадам, деб ҳисоблаймиз”, дейилади расмга илова қилинган ёзувда.

АҚШнинг кўп шаҳарларида ўтган ҳафта полиция томонидан аёвсизларча қўлга олиниши важидан жон таслим қилган Жорж Флойднинг ўлими ортидан норозилик намойишлари олти кундан бери давом этмоқда. Айрим жойларда норозилик чиқишлари зўравонлик касб этиб, полиция билан тўқнашувларга айланиб кетган. Тартибсизликлар ортидан Лос-Анжелес, Майами, Детройт ва Филадельфия дохил тақрибан 40 шаҳарда оқшом тушганидан сўнг кўча намойишларини ўтказиш тақиқлаб қўйилган.

Азимжон Асқаров ўзига қарши айблов ёғдирганларга жавоб мурожаати билан чиқди

Жалолободлик ҳуқуқ фаоли Азимжон Асқаров суд залида (архив сурати).

Бундан 10 йил муқаддам Қирғизистон жанубида содир бўлган қонли воқеалар ортидан умрбод қамоқ жазосига ҳукм қилинган ҳуқуқ фаоли Азимжон Асқаров Қирғизистоннинг қатор сиёсатчилари ва собиқ депутатларига очиқ мурожаат билан чиқди.

У қамоқхонада ноҳақ ўтирганини, милиционер Сулаймановнинг ўлимига ўз ҳамкасблари сабаб бўлганини айтиб, ноҳукумат ташкилотлари (НҲТ) тўғрисидаги лойиҳанинг парламентдаги муҳокамаси чоғида ўзига қарши билдирилган фикрларга жавоб берди.

Асқаровнинг мурожаатида: “Менга қарши ёлғон иддаолар юқори минбарлардан 10 йилдан бери бетўхтов айтиб келинмоқда. Бейшенбек Абдразақов ва Дуйшўн Абдилдаев менинг ишимга тўхталиб, тарафдорларимни “сотқин” деб аташди. Миллатчилик инсоннинг энг ёмон хусусияти. Июрь воқеалари тўғрисида етарли фактларни келтирганман, агар улар етмаса, ундан ҳам кўп маълумот бера оламан”, дейилган.

22 май куни парламент биносида НҲТ тўғрисидаги қонун лойиҳаси бўйича муҳокама бўлиб ўтганди. Бу мажлисга бир қанча ташкилот вакили қатнашиб, уларнинг кўпи қонун лойиҳасини қўллаб, нутқ сўзлаган. Муҳокамага қатнаша олмай қолган 70 чоғли ташкилот мазкур қонунга қаршилигини билдириб, баёнот тарқатган.

Парламентдаги муҳокама иштирокчиси, собиқ депутат Бейшенбек Абдразақов ўз сўзида: “Июнь воқеаси чоғида 500 киши қазо қилган. Булар Азимжон Асқаровнинг, Қодиржон Ботировнинг ёнини олиб, Бирлашган Миллатлар Ташкилотигача бориб юришибди. Нима учун қамоқда ётган бошқа фуқароларимизнинг, аёлларнинг, ҳомиладор аёлларнинг ёнини олмайди? Шунинг учун ҳам қонунни тез орада қабул қилиш керак”, деган.

Қирғизистондаги жамоатчилик жамғармаларидан бирининг раҳбари Дуйшўн Абдилдаев эса: “Жинояти тўла исботланиб, ўлим жазосига ҳукм қилинган кишиларнинг ҳуқуқини ҳимоя қилиб, озод қилишни талаб қилишяпти. Азимжон Асқаров, Қодиржон Ботировгача”, деган.

Ёши 70 ни қоралаган жалолободлик Азимжон Асқаров 2010 йил июнь воқеалари чоғида оммавий тартибсизликлар уюштирганлик ва милиция ходимни ўлдирганликда айбланиб, умрбод қамоқ жазосига ҳукм қилинган эди. Олий судгача бўлган барча инстанциялар илк инстанция суди қарорини ўз кучида қолдирган.

2016 йили БМТнинг Инсон ҳуқуқлари қўмитаси Асқаров қамоқхонада қийноққа дучор этилгани, тиббий кўмак ва адолатли суд билан таъминланиш ҳуқуқидан маҳрум этилганини қайд этган. Қирғизистон томони бу иддаони рад этган.

Шу йил 1 июнидан Бишкек шаҳар маъмурий суди ҳуқуқ фаоли Азимжон Асқаровнинг қирғиз ҳукуматига нисбатан шикоятини кўриб чиқа бошлади.

АҚШда намойишлар давом этмоқда, Трамп бир муддат бункерга яширинди

Оқ уй олдидаги намойишчилар, Вашингтон, 2020 йил 31 майи.

АҚШда ижтимоий тенгсизликка қарши намойишларнинг олтинчи туни бир неча шаҳар кўчаларида тартибсизлик ва зўравонлик қабатида кечди.

Норозилик чиқишларига Миннесота штатининг Миннеаполис шаҳрида полициячилар томонидан тутилган афроамерикалик Жорж Флойднинг ўлими сабаб бўлган.

Тартибсизликлар туфайли тақрибан 40 шаҳарда комендантлик соати жорий этилганига қарамай, одамлар аксар ҳолларда чекловларга эътибор қилгани йўқ. Нью-Йорк, Чикаго, Филадельфия ва Лос-Анджелесда норозилар билан полиция ўртасида тўқнашувлар содир бўлгани хабар қилинмоқда. Оломонни тарқатиш учун полиция кўздан ёш сиздирувчи газ ва резина ўқларни ишга солган. Бир неча шаҳарда талончилик ҳолатлари қайд этилган. Одамлар дўконларга бостириб кириб, талон қилганлар, полиция автомобилларини ёқиб юборганлар.

АҚШда расмийлар томонидан фавқулодда вазиятлар чоғида ишга солинадиган Қуроллик кучларнинг махсус тури – Миллий гвардия 15 та штат ва пойтахт Вашингтонда тартибни сақлаш учун ҳозирда ўзининг беш минг чоғли жангчиси сафарбар қилинганини маълум қилди. Вашингтонда оломон яна Оқ уй олдида йиғилган. Норозилар гулханлар ёққанлар, махсус бўлинма ходимлари томонга эса вақти-вақти билан тош отилиб турган.

Бунгача АҚШ президентининг қароргоҳи олдида ғала-ғовурли намойишлар жума ва шанба кунлари бўлиб ўтганди. АҚШ махфий хизмати олти киши ҳибсга олинганини маълум қилган. Норозиларнинг қўриқчилар билан тўқнашгани қайд этилган. Намойишчиларнинг айримлари тўсиқлари қўпориб ташлашга уринган, махфий хизмат ходимларига қарши ғишт, тош, шиша, петарда ва бошқа буюмларни отишган.

Жума куни президент Дональд Трамп рафиқаси ва ўғли билан бирга хавфсизлик важидан бир муддатга Оқ уй остидаги бункерга жойлаштирилгани маълум бўлди.

Намойишчилар 25 май куни қўлга олинганидан кейин Миннеаполис касалхонасида жон берган 46 ёшли Флойд ўлимида ўйнаган роли учун оқ танли тўрт нафар полициячи судланишини талаб қилишмоқда. Флойд сохта банкнотадан (пул) фойдаланганликда гумонланган. Полицейчи Дерек Шовин афроамерикаликни зарарсизлантиришга ҳаракат қилиб, тиззаси билан унинг бўйнини босган ва тутилган шахснинг ҳаво етишмаётганига оид шикоятларига эътибор бермаган. Ҳодиса акс этган видеоёзув ижтимоий тармоқларда яшин тезлигида тарқаган.

Жорж Флойдни қўлга олишда иштирок этган тўрт полициячининг ҳаммаси хизмат текшируви тугагунига қадар ишдан четлатилган. Шовин ҳибсга олинган. У эҳтиётсизлик оқибатида одам ўлдирганликда айбланмоқда.

Аввалроқ президент Трамп Твиттер орқали аъзолари шу кундаги зўравонлик тўлқинига алоқадор бўлиши мумкин бўлган “Антифа” ультрасўл ҳаракатининг террорчи ташкилот ўлароқ тан олинишига эришиш ниятида эканини билдирган. Бундан ташқари, Трамп тартибсизликларни тийиб туришдаги ғайрати учун Миллий гвардияга миннатдорчилик билдирган. Шунингдек, АҚШ президенти оммавий ахборот воситаларига танқид ёғдирган. Унга кўра, ОАВ “нафрат ва анархияни авж олдириш учун қўлларидан келган барча ишни қилмоқдалар”.

Рейхстагни “ғилофлаган” рассом Христо Явашев оламдан ўтди

Христо Явашев.

АҚШнинг Нью-Йорк шаҳрида табиат ва меъморий объектларни “ғилофлаш” каби йирик лойиҳалари билан танилган рассом Христо Явашев 84 ёшида вафот этди. Унинг энг машҳур лойиҳаларидан бири Берлиндаги Рейхстаг биносини (1995) ғилофлаш бўлган.

Христон Явашев Болгариянинг Габрово шаҳрида 1935 йили дунёга келган. 1957 йилда унинг муҳожирлик ҳаёти бошланган. Даставвал у Прагага борган, ундан Вена, сўнгра Женевага ўтган. 1958 йили Парижга бориб, ўрнашган ва ўша ерда уйланган. 1964 йили рассом оиласи билан Нью-Йоркка кўчиб ўтган.

Бу ерда эр-хотин бирга ижод билан машғул бўлган ва ўз асарларига “Христо ва Жан-Клод” деб имзо қўйишган. Хотинининг ўлимидан (2009) кейин Явашев бир ўзи ишлашда давом этган.

Унинг режалари орасида Париждаги Зафар дарбозасини ғилофлаш бор эди ва бу лойиҳани амалга ошириш иши 2021 йил кузига белгиланганди.

2020 йил кузида Париждаги Помпиду марказида Христо Явашевнинг кўргазмаси бўлиб ўтиши керак эди.

Қозоғистонда 1 июндан карантин чоралари юмшатилди

Ҳукумат савдо марказлари, умумий овқатланиш жойлари, ҳаммомлар ва сауналар фаолиятига рухсат берди.

Олмаота ва Нур-Султон шаҳарларига кириш-чиқиш жойларига ўрнатилган блок постлар 1 июнга ўтар кечаси олиб ташланди. Кўп ҳудудларда шаҳарлараро автобуслар қатнови тикланди. Нур-Султон ҳокимияти шаҳар атрофига қатновчи барча маршрутлар қайта тикланганини билдирди.

Ҳукумат савдо марказлари, умумий овқатланиш жойлари, ҳаммомлар ва сауналар фаолиятига рухсат берди. Айни пайтда Соғлиқни сақлаш вазирлиги жамоат жойларида 50 нафардан ортиқ одам тўпланмаслигини, кафе ва ресторанларда столлар бир-биридан икки метр оралиқда ўрнатилишини ва дезинфекция ишларини амалга оширишни талаб қилмоқда.

Олмаотада шаҳар ташқарисидаги ва мактаблар қошидаги лагерлар ёзда ишламайди. Бироқ Чимкентда лагерлар болаларни қабул қилади.

Соғлиқни сақлаш вазирлигининг билдиришича, 31 май ҳолатига кўра, Қозоғистонда коронавирусга чалинганлар сони 11 308 нафарга етди. 5 404 бемор соғайди, 41 бемор вафот этди.

Азимжон Асқаровнинг қирғиз ҳукуматига нисбатан шикояти юзасидан суд жараёни бошланди

Жараён Бишкек шаҳар маъмурий судида ўтмоқда.

Умрбод қамалган ҳуқуқ фаоли Азимжон Асқаровнинг қирғиз ҳукуматига нисбатан шикояти Бишкек шаҳар маъмурий судида 1 июнь куни кўрила бошланди.

Озодлик радиоси қирғиз хизматининг билдиришича, судда ҳукумат ва омбудсмен вакиллари қатнашмоқда.

Асқаровнинг шикояти 11 май куни Бишкек шаҳар туманлараро судида кўриб чиқиши кутилаётган эди. Бишкек туманлараро суди фаолиятининг тўхтатилгани сабаб, Асқаров шикоятини кўриб чиқиш бошқа кунга қолдирилганди.

Асқаров Қирғизистон ҳукуматини БМТ Инсон ҳуқуқлари қўмитаси тавсияларини бажармаётганликда айбламоқда. 2016 йилда БМТнинг Инсон ҳуқуқлари қўмитаси Асқаров қамоқда қийноқларга солингани, у тиббий ёрдам ва адолатли судлов ҳуқуқидан маҳрум қилингани ортидан уни қамоқдан озод қилиш шартлиги тўғрисида қарор қабул қилганди.

69 ёшли Азимжон Асқаров 2010 йил июнь воқеалари пайтида оммавий тартибсизликларни уюштирган ва милиция ходимни ўлдирган деган айблов билан умрбод қамалган эди. Халқаро ҳамжамият Асқаровга нисбатан жиноят иши сохталаштирилганига ишонилишини таъкидлаган ҳолда, қирғиз ҳукуматидан ҳуқуқ фаолини зудликда қамоқдан чиқаришни талаб қилиб келади.

Трамп "Катта еттилик" саммитини бошқа муддатга қолдирмоқчи. Унга кўра G7 "Жуда эскирган" гуруҳ

АҚШ президенти Дональд Трамп июнда ўтказилиши режалаштирилган “Катта еттилик” (G7) саммитини бошқа муддатга қолдириш ниятида эканини билдирди. Трампга кўра, у бу саммитга бошқа мамлакатларни, жумладан, Россияни ҳам таклиф қилмоқчи.

Трам АҚШ, Канада, Германия, Британия, Япония, Италия ва Франциядан иборат “Катта еттилик”ни “Жуда эскирган давлатлар гуруҳи”, деб атади.

“Мен G7 жаҳонда нималар бўлаётганини етарли даражада тасаввур қила олмайдиган давлатлар бўлиб қолганини ҳис этяпман”,- деди Трамп журналистларга.

Трампга кўра, саммитни сентябрда ўтказиш ва унга Россия, Австралия, Ҳиндистон ҳамда Жанубий Кореяни таклиф қилиш мақсадга мувофиқ бўлади.

Россияда коронавирусга чалинганлар сони расман 400 мингдан ошди

Россияда коронавирусга чалинганлар сони уч кундан бери мунтазам кўпайиб бормоқда.

Россияда коронавирусга чалинганлар сони 405 843 кишига етди. Бу ҳақда коронавирус бўйича Россия оператив штаби хабар берди. Сўнгги 24 соат ичида коронавирус яна 9268 кишига юққан. Россияда коронавирусга чалинганлар сони уч кундан бери мунтазам кўпайиб бормоқда.

Сўнгги бир кун ичида 138 одам коронавирусдан ўлган. Расмий статистиканинг билдиришича, бу билан COVID-19дан ўлганлар сони 4693 кишига етган. Расман билдирилишича, 171 минг бемор соғайди.

Айни пайтда жаҳон бўйлаб янги коронавирусга чалинганлар сони 6 миллиондан ошди.

Сўнгги маълумотларга кўра, бугунга қадар жаҳон бўйлаб 367 мингдан ошиқ одам коронавирус инфекцияси туфайли нобуд бўлди. Аммо мутахассислар бу кўрсаткич аслида анча юқори эканини айтишмоқда.

Сабаби кўплаб давлатда анализ олиш кўлами чекланган. Қолаверса, айрим ҳукуматлар вирусга чалинганлар ва ундан вафот этганлар сонини атайин озайтириб кўрсатаётгани айтилмоқда.

Саудия Арабистони ва Қуддусда масжидлар қайта очилди

Намозхонларга коронавирус тарқалишининг олдини олиш учун санитария талабларига қатъий риоя қилган ҳолда масжидларда ибодат қилишга рухсат берилди.

Икки ойлик танаффусдан сўнг Саудия Арабистонида минглаб масжидлар ўз фаолиятини қайта бошлади. Намозхонларга коронавирус тарқалишининг олдини олиш учун санитария талабларига қатъий риоя қилган ҳолда масжидларда ибодат қилишга рухсат берилди.

Бироқ мусулмонлар учун муқаддас бўлган Макка шаҳри зиёрат учун ёпиқ қолмоқда.

Мусулмонлар учун Макка ва Мадинадан сўнг учинчи муқаддас жой бўлган Қуддусдаги Ал Ақсо масжиди ҳам ибодат учун қайта очилди. Бу масжид ҳам март ойида ёпилган эди.

Хабарда айтилишича, Саудияда жойнамозлар, таҳоратхоналар ва Қуръон нусхалари сақланадиган жавонлар дезинфекция қилингани ортидан 90 мингта масжид очилди.

SpaceX коинот кемаси Халқаро фазо станциясига муваффақиятли туташди (ВИДЕО)

SpaceX ширкатининг Crew Dragon кемаси 30 май куни учирилган эди.

SpaceX ширкатининг Crew Dragon кемаси 31 май куни Халқаро фазо станциясига муваффақиятли равишда туташди. Кемани австронавитлар Даглас Хёрли ва Роберт Бенкен бошқарди.

Crew Dragon кемасининг Халқаро фазо станцияга туташгани тўғрисидаги жонли эфир АҚШ коинот агентлиги – NASA томонидан олиб борилди.

Тарихда илк бор астровнавтлар бошқарувидаги хусусий компания коинот кемаси Халқаро фазо станциясига туташди. Америкалик астронавтлар станцияда тўрт ой қолиши кутилмоқда.

Херли ва Бенкен 2011 йилдан бери Америка тупроғидан фазога учган илк фазогирлардир. Сўнгги тўққиз йил ичида ХФСга фазогирлар фақат Россиянинг «Союз» ракеталари бортида чиқариб келинади, чунки NASA ўзининг Space Shuttle дастурини 2011 йилда тўхтатиб қўйган.

Таниқли тадбиркор Илон Маск асос солган SpaceX ширкати парвозини АҚШ президенти Доналд Трамп ҳам кузатди. Президент бу ютуқ мураккаб кунларда америкаликлар руҳини кўтаришини айтди.

АҚШда афроамерикалик ўлдирилганига қарши намойишлар ортидан комендантлик соати жорий этилди (ВИДЕО)

Оқ Уй олдида ёқиб юборилган автомобиль. Вашингтон шаҳри, 30 май, 2020 йил.

Якшанба, 31 майга ўтар кечаси АҚШдаги норозилик намойишлари тартибсизликларга айланиб кетгани ортидан бир қатор шаҳрларда комендантлик соати жорий этилди.

Намойишлар Миннеаполис шаҳрида оқ танли полициячи камида 20 киши гувоҳлигида афроамерикалик Жорж Флойни бўғиб қўйгани ортидан бошланиб кетди. Тинч намойишлардан ташқари, айрим норозилар биноларга ва автомобилларга ўт қўйди, полицияга қаршилик кўрсатди ва дўконларни талон қилди.

Нью-Йорк, Вашингтон, Атланта, Чикаго ва Лос-Анжелесда энг йирик намойишлар бўлиб ўтди.

Беш кун давом этган намойишлар ортидан 30 май куни АҚШнинг 20дан ортиқ йирик шаҳарларда комендантлик соати жорий этилган эди. Миннеаполис, Атланта, Лос-Анжелес, Сиэтл, Чикаго, Филадельфия, Питтсбург, Денвер, Майами ва бошқа шаҳарларда Иккинчи жаҳон урушидан бери биринчи марта Миллий Гвардия намойишларни бостириш учун жалб қилинди.

46 ёшли афроамерикалик Жорж Флойни оқ танли полициячи Дерек Шовин қалбаки доллардан фойдаланганликда гумонлаб қўлга олган эди. Қўлга олиш жараёнида у Жорж Флойни ерга йиқитиб, қўлига кишан урган ва тиззаси билан унинг томоғини босиб турган.

Жорж Флой полициячига бир неча маротаба “Мен нафас ололмаяпман”, деб айтган. Бу воқеага гувоҳ бўлган 20дан ортиқ киши полициячини тартибга чақирмоқчи бўлган. Аммо уларга бошқа полициячилар тўсқинлик қилган.

Жорж Флойд Миннеаполис касалхонасида 25 май куни вафот этди. Полициячи Дерек Шовин “қасд қилмасдан одам ўлдиришлик” айблови билан ҳибсга олинди.

Сўнгги маълумотларда айтилишича, АҚШнинг 22 шаҳрида норозилик намойишларида тартибни бузган 1669 одам ҳибсга олинди.

АҚШ президенти Дональд Трамп норозилик намойишлари пайтида тартибсизликларни содир этганларга нисбатан жиддий жазо чоралари қўлланиши ҳақида аҳолини огоҳлантирди.

SpaceX капсуласи Халқаро фазо станциясига туташишга ҳозирлик кўрмоқда

Space X Falcon 9 ракетасининг учирилиши, 30 май, 2020

Тарихда илк бор хусусий компания кемаси бортида фазога парвоз қилган америкалик астронавтлар Даг Херли ва Роберт Бенкен Халқаро фазо станциясига (ХФС) туташишга ҳозирлик кўрмоқда.

30 май куни Флоридадаги Кеннеди фазо станциясидан SpaceX ширкати ракетаси билан парвоз қилган астронавтлар Тошкент вақти билан 19:30 да ХФСга ўтади. Уларни ХФС бортидаги уч фазогир кутиб олади. Америкалик астронавтлар станцияда тўрт ой қолиши кутилмоқда.

Херли ва Бенкен 2011 йилдан бери Америка тупроғидан фазога учган илк фазогирлардир. Сўнгги тўққиз йил ичида ХФСга фазогирлар фақат Россиянинг «Союз» ракеталари бортида чиқариб келинади, чунки NASA ўзининг Space Shuttle дастурини 2011 йилда тўхтатиб қўйган.

Таниқли тадбиркор Илон Маск асос солган SpaceX ширкати парвозини АҚШ президенти Доналд Трамп ҳам кузатди. Президент бу ютуқ мураккаб кунларда америкаликлар руҳини кўтаришини айтди.

Айни дамда АҚШ коронавирус пандемиясига қарши курашмоқда. Миннеаполисда эса ҳафта бошида оқ танли полиция ходимлари қора танли шахсни қўлга олаётиб ўлимига сабаб бўлиши ортидан норозилик намойишлари бошланиб кетди.

COVID-19: Вирусга чалинганлар 6 миллиондан ошди, аммо чекловларни бекор қилиш давом этмоқда

Самарқандда карантин ҳудудини қўриқлаётган ҳарбийлар, 28 май, 2020

Жаҳон бўйлаб коронавирус пандемияси туфайли жорий қилинган чекловлар бирин-кетин бекор қилинмоқда.

Аммо вирус тарқалишда давом этяпти: 30 май куни жаҳон бўйлаб янги коронавирусга чалинганлар сони 6 миллиондан ошди.

Кейинги ҳафтада, вирусга чалиниш ҳамда ўлимлар сони озая бошлагани ортидан, АҚШ ва айрим Осиё ва Европа давлатларида мактаб ва ресторанлар очилади.

Аммо Лотин Америкасида вазият бошқача. Бразилия, Чили, Мексика каби давлатлар вирус тарқалишини чеклаш учун зўр бериб курашмоқда.

Бразилияда COVID-19 инфекцияси туфайли ҳалок бўлганлар сони 29 мингга яқинлашди. Мамлакатда вирусга чалинганларнинг умумий сони эса 500 мингдан ошди.

Сўнгги маълумотларга кўра, бугунга қадар жаҳон бўйлаб 367 мингдан ошиқ одам коронавирус инфекцияси туфайли нобуд бўлди. Аммо мутахассислар бу кўрсаткич аслида анча юқори эканини айтишмоқда.

Сабаби кўплаб давлатда анализ олиш кўлами чекланган. Қолаверса, айрим ҳукуматлар вирусга чалинганлар ва ундан вафот этганлар сонини атайин озайтириб кўрсатаётгани айтилмоқда.

HRW Туркманистон хукуматини гейликда айбланиб қамалган актёрни озодликка чиқаришга чақирди

Human Rights Watch (HRW) ташкилоти Туркманистонда таниқли актёр ҳамда унинг ҳамкасблари гомосексуализмда айбланиб, қамоқ жазосига ҳукм қилинганини қоралади ва мамлакат расмийларини уларга қўйилган айбловларни зудлик билан бекор қилишга чақирди.

Ташкилотга кўра, шоумен 7 май куни айбдор деб топилиб, 2 йилга озодликдан маҳрум қилинган.

Апрель ойида мустақил маҳаллий нашр таниқли актер ўнга яқин ҳамкасби билан қўлга олинганини хабар қилган эди.

Озодликнинг Ашхободдаги манбаси ўша пайтда актёр қўлга олинганини тасдиқлади, аммо расмийлар бу ҳолатни изоҳлашдан бош тортди.

Туркманистонда гомосексуализм учун 2 йилгача озодликдан маҳрум қилиш жазоси белгиланган.

Ўтган йили ашхободлик ёш кардиолог Қасимберди Гараев гейлигини ошкор қилиб, Туркманистонда гомосексуал инсонлар дучор бўладиган муаммолар ҳақида Озодликка сўзлаб бергани учун тазйиққа учраган эди.

2017 йилда БМТнинг Инсон ҳуқуқлари қўмитаси бир жинсли жуфтликларнинг ўз иштиёқи билан алоқа қилишини жазолаш асоссиз эканлигини айтиб, Туркманистон ҳукуматини гомосексуализмни жиноятлар қаторидан чиқаришга чорлаган эди.

Россияда журналист қамалиши ортидан намойишга чиққан ўнлаб одам ҳибсга олинди

Москва полицияси таниқли журналист Илья Азар ҳибсга олинишига қарши норозилик намойишига чиққан 32 нафар намойишчи, жумладан, давлат думаси аъзоси, мэрия ишчилари ҳамда журналистларни қўлга олди.

«ОВД-Инфо» нашрининг маълум қилишича, Санкт-Петербургда ҳам фаоллар қўлга олинган. Қўлга олинганларнинг аксари тез орада қўйиб юборилган.

26 май куни 35 ёшдаги Азар Россиянинг намойишга чиқиш бўйича қонунларини бузишда айбланиб, 15 кунга қамалди. У Россия ҳуқуқ-тартибот идораларидаги қонунбузарликларни фош қилган фаол қўлга олинганини қоралаб норозилик намойишига чиққан бўлган.

Азар ва унинг тарафдорлари коронавирус пандемияси туфайли жорий қилинган чекловларга биноан бир кишилик намойишга чиққан бўлган.

Фаоллар биргина одам чиққан намойишларни оммавий намойиш ўлароқ талқин қилиб бўлмаслигини айтишмоқда. Шу сабабдан улар Азар озодликка чиқишини талаб қилиб намойишга чиқишда давом этмоқчилар.

Бу орада Москва шаҳри полицияси карантин чекловлари боис Москвада «ҳар қандай оммавий тадбир” бекор қилинганини билдирди.

АҚШ генерали: Россия Ливияга ҳарбий учоқ юборгани шубҳасиз

АҚШ Қуролли кучларининг Африка қўмондонлиги (AFRICOM) Россиянинг Ливияга ҳарбий учоқ юбормагани ҳақидаги иддаосини рад этди.

29 май куни қўмондонлик директори ўринбосари генерал Грегори Хедфилд 14 та МиГ-29 қирувчиси ва Су-24 ҳужум учоғи Россиядан учиб кетиб, Ливиянинг Жуфра ҳаво базасига етиб борганини, АҚШ бу жараённи яқиндан кузатганини таъкидлади.

АҚШ Москвани генерал Халифа Ҳафтар қуролли гуруҳи томонида жанг қилаётган ёлланма аскарларни дастаклаш учун мамлакатга ҳарбий учоқ юборишда айбламоқда.

Россия хатти-ҳаракатлари Ливияда Ҳафтарнинг тан олинмаган Ливия миллий армияси ҳамда БМТ тан олган Миллий муроса ҳукумати ўртасидаги зиддиятни кучайтириб, қурбонлар сони кўпайишига олиб келиши мумкин.

Ливияда айни пайтда давом этаётган фуқаролар урушида Ҳафтар қўшинларини бир неча давлат, жумладан, Россия, Франция, Миср, Иордания ҳамда Бирлашган Араб Амирликлари қўллаб келади. Триполидаги Миллий муроса ҳукуматини эса Туркия, Сурия, Қатар ва Италия қўлламоқда. Ҳозирда мамлакат ғарби ва пойтахт Триполини Миллий муроса ҳукумати назорат қилиб турибди.

Хедфилд Россия ўз ҳаракатлари ортидан нефтга бой Ливияда муҳим ҳаво базасига ҳарбий учоқларини етказиб олганини таъкидлади. Генерал Россия Европага жуда яқин жойлашган ҳаво базасидан фойдаланаётгани АҚШни ташвишлантиришини қўшимча қилди.

Россия АҚШ иддаоларини рад этиб келади. Федерация Кенгаши қўмитаси раиси Виктор Бондарев АҚШ иддаоларини «аҳмоқлик» дея таърифлади.

- Ливияда ҳарбий учоқлар бўлса, улар совет учоқлари, Россия учоқлари эмас, - деди Бондарев.

Майкл Флиннниг рус дипломати билан суҳбати транскрипти очиқланди

Флинн Россиянинг Вашингтондаги элчиси Сергей Кисляк билан ўз музокаралари мазмуни ҳақида АҚШ вице-президенти Майк Пенсга нотўғри маълумот берганидан кейин 2017 йил бошида ишдан бўшатилганди.

АҚШда республикачи сенаторлар Россиянинг 2016 йилги Америка сайловларига аралашуви бўйича тергов давомида тўпланган телефон суҳбатлари транскриптларини эълон қилди.

Уларнинг бирига кўра, президент Дональд Трампнинг миллий хавфсизлик бўйича собиқ маслаҳатчиси Майкл Флинн Россия элчисини собиқ президент Барак Обама Москвага қарши жорий қилган жазо чораларига «сипо ва сокин» жавоб қайтаришга чорлаган.

Транскриптдаги суҳбат 2016 йилнинг 29 декабрида – Обама 35 нафар Россия разведкаси жосусини бадарға қилиш қарорини қабул қилган кун содир бўлган.

Демократлар Флинн суҳбати тафсилотлари у Федерал разведка бюросига (ФРБ) берган интервьюси давомида ёлғон сўзлаганини таcдиқлашини айтиб, уни амалдаги президентга қарши иш юритишда айблашмоқда.

Аммо президент Трампнинг тарафдорлари ФРБда Флинни тергов қилишга сабаб бўлмаганини, транскриптда ҳеч қандай муаммо йўқлигини айтишмоқда.

Флинн Россиянинг Вашингтондаги элчиси Сергей Кисляк билан ўз музокаралари мазмуни ҳақида АҚШ вице-президенти Майк Пенсга нотўғри маълумот берганидан кейин 2017 йил бошида ишдан бўшатилганди.

Киев яқинида юз чоғли одам иштирокида отишма содир бўлди

Бровари шаҳрида полиция ходимлари томонидан қўлга олинган отишма иштирокчилари, 2020 йил 29 майи.

Киев вилоятининг Бровари шаҳрида 29 май куни юзга яқин одам иштирокида отишма содир бўлди. Бу ҳақда Украина Ички ишлар вазири Арсен Аваков маълум қилди. Расмийлар отишмани “йўловчи ташиш билан шуғулланувчи тадбирлар” билан боғламоқдалар.

Аваков буни “йўловчи ташиш юзасидан квоталарни белгилашдаги коррупциянинг акс-садоси, йўловчи ташиш йўналишлари учун курашга тўдаларни жалб қилиш”, деб атади.

Отишма ортидан 10 га яқин киши ушланган, қолган иштирокчилар қидирилмоқда.

“Қуролли одамлардан 10 нафари қўлга олинди”, дея маълум қилди Киев вилояти полицияси матбуот котиби Виталия Грохольская. Унга кўра, улар “Украинанинг бошқа минтақаларидан келган одамлар”дир.

“Факти” нашри маълумотларига кўра, ўнлаб одам эрталабки 7 ларда Олимпийский кўчасида жойлашган йўналишли таксилардан бирининг тураргоҳига ҳужум уюштирган.

Қирғизистон расмийлари ички авиақатновларни 8 июндан тиклашга қарор қилишди

Бишкек яқинидаги "Манас" аэропорти, 2020 йил 3 майи.

Қирғизистонда жорий йил 8 июнидан ички мунтазам авиақатновлар тикланади. Бишкек-Ўш йўналиши бўйлаб қатнов кунига бир марта амалга оширилади. Бу ҳақда 29 май куни бўлиб ўтган брифингда бош вазир ўринбосари Қубатбек Бўрўнов маълум қилди.

У рейслар санитария-эпидемиология меъёрларига қатъий равишда амал қилган ҳолда ўтказилишидан огоҳлантирди. Айни пайтда эпидемиологик вазиятдан келиб чиққан ҳолда ўзгаришлар бўлиши ҳам мумкин.

Қирғизистонда мунтазам авиақатновлар коронавирус тарқалиши қабатида март ойи ўрталаридан тўхтатилган. 22 мартдан мамлакатда фавқулодда вазият тартиби жорий қилинган, 25 мартдан эса йирик шаҳарларда ва айрим туманларда янада қатъийроқ бўлган фавқулодда ҳолат тартиби ўрнатилган.

1 майдан ҳукумат турли соҳада фаолият юритадиган корхоналарга босқичма-босқич равишда иш бошлашга рухсат бермоқда.

Тожикистонлик журналист уч ҳафта ичида иккинчи марта калтаклаб кетилди

Абдуллоҳ Ғурбатий.

“Азия-Плюс” ахборот агентлиги журналисти Абдуллоҳ Ғурбатий 29 май куни яна ҳужумга учради. Уч нафар номаълум шахс журналистни Хатлон вилоятининг Хуросон туманида калтаклашган. Ғурбатий у ерда шиддатли селдан жабрланганлар ҳақида материал ҳозирлаётган эди.

Журналистга кўра, ҳужумчилардан бири ўзини қишлоқ раиси, деб таништирган. “У қўполлик билан мени фитна қўзғаётганликда айблади. Мен ўзимни таништириб, яқинда содир бўлган табиий офатдан жабрланганлар ҳақида материал тайёрлаётганимни айтдим. Туйқусдан улардан бири юзимга мушт туширди. Зарба кутилмаган эди, мен йиқилиб тушдим. Номаълум киши мени калтаклашда давом этди”, деган Абдуллоҳ Ғурбатий Озодликнинг тожик хизматига.

Журналистнинг айтишича, ҳодисадан сўнг учовлон Opel Саravan машинага ўтириб, жўнаб кетишган.

Кўнгилсиз воқеа содир бўлган Айни қишлоғи кенгаши раиси Озодликка берган суҳбатида бу ҳақда эшитиши билан милиция бўлимига чопганини айтган. “У ерда менга воқеа тафсилотлари ҳақида кейинроқ гапириб беришларини айтишди. Ҳозир уларнинг қўнғироғи кутяпман”, деган раис.

Хуросон тумани раҳбари Раҳматулло Сафарзода журналистнинг калтаклашини ҳақида унга маълум эмаслигини билдирди, аммо бу хабар уни қаттиқ ранжитганини эътироф этган.

Абдуллоҳ Ғурбатий милицияга ариза ёзиб, унда маҳаллий аҳоли вакиллари калтакланишининг гувоҳи бўлганларини билдирган.

Хуросон туманида 14 май куни содир бўлган сел тошқини туфайли икки киши нобуд бўлган, уйлар ва йўллар сув остида қолган. Расмий маълумотларга кўра, табиий офат важидан икки қишлоқдаги 10 дан зиёд уйга шикаст етган, бироқ маҳаллий турғунлар зарар кўлами янада кенгроқ эканини иддао қилмоқдалар. 17 май куни жабрланганлардан ўнлаб одам Бохтар-Душанбе йўлини тўсиб қўйган ҳамда расмийлардан уларнинг муаммоларига эътибор қаратиш ва шикастланган уйларни тиклашда кўмак беришни талаб қилганлар.

Журналист Абдуллоҳ Ғурбатийга Душанбеда 11 май оқшомида ҳам ҳужум қилинганди. Журналистнинг айтишича, икки номаълум шахс ўз уйи йўлагида унга ҳужум қилиб, калтаклай бошлаган. Жабрланувчининг айтишича, улар ниқобда бўлганлар. Ғурбатий ёрдамга чақира бошлаганидан кейин ҳужумчилар кўздан ғойиб бўлганлар. Журналистнинг тиббий кўмак учун касалхонага мурожаат қилишига тўғри келган.

Ғурбатийнинг ҳамкасблари ҳужум унинг касбий фаолияти билан боғлиқ, деган фикрдалар.Чунки сўнгги пайтларда Абдуллоҳга номаълум шахслар томонидан тез-тез таҳдидлар бўлиб турган. Журналист коронавирус ёйилиши ортидан Тожикистондаги тиббий муассасаларда юзага келаётган муаммоларни фаол ёритиб келган.

БМТ COVID-19 иқтисодий оқибатлари ва муҳтамал очарчилик ҳақида огоҳлантирди

БМТ бош котиби Антониу Гутерриш.

Бирлашган Миллатлар Ташкилоти бош котиби Антониу Гутерриш коронавирус пандемияси ривожланаётган мамлакатларда оммавий очарчиликка олиб келиши мумкинлигини билдирди.

28 май куни юқори даражадаги учрашувда сўзлаган БМТ раҳбарига кўра, COVID-19 пандемияси очарчилик ва ишсизлик қабатида “бутун дунё бўйлаб тасаввур қилиб бўлмайдиган тушкунлик ва кулфат”га сабаб бўлиши мумкин.

Гутерриш қарз юкини енгиллатиш дохил глобал миқёсда зудлик билан мувофиқлаштирилган чоралар кўришга чақирди. Бош котиб жаҳондаги ишлаб чиқариш даражасидаги қисқариш 8,5 триллион долларни ташкил қилиши мумкинлигини айтди. Бу таназзул, унга кўра, АҚШдаги “Буюк депрессия” давридан бери энг кескини бўлади.

Коронавирус ёйилиши даставвал ўтган йил охирида Хитойда қайд этилган. АҚШдаги Жонс Хопкинс Университети маълумотига кўра, айни пайтда дунё бўйлаб коронавирусга чалинганлар сони 5,9 миллион нафарга етиб қолган, қурбонлар сони эса 350 мингдан ошиб кетган.

Олмаотада 30 майдан масжидлар очилади

Олмаотадаги масжидлардан бири.

Қозоғистоннинг Олмаота шаҳрида 30 майдан ибодатхоналар ўз фаолиятини қайта бошлайди. КТК телеканали хабарига кўра, бунга оид қарор шаҳар бош санитар врачи Жандарбек Бекшин томонидан чиқарилган.

Айни пайтда жамоа бўлиб диний маросимлар ўтказиш учун тақиқ сақланиб қолади. Бу ерда гап жума намозлари, черковлардаги шанба ва якшанба кунги ибодатлар ҳақида бормоқда. Мазкур чеклов коронавирус инфекциясини тарқалишига йўл қўймаслик мақсадида қабул қилинган.

Ибодат чоғида руҳонийлар ниқоб ва тиббий қўлқоплар тақиб юришлари ҳамда ижтимоий масофага риоя қилишлари шарт. Ташрифчилар масжид ёки черков ичида 15-20 дақиқадан кўп бўлмасликлари керак, уларнинг ҳам ниқоб тақиши мажбурий экани айтилмоқда. Бу жойларга ўткир юқумли касаллик белгилари бўлган (ҳарорати юқори бўлган, йўталаётган, томоғи оғриётган, нафас олишда қийналаётган) кишилар қўйилмайди.

Қозоғистонда коронавирус инфекцияси энг кўп тарқалган жойлардан бири бўлмиш Олмаота шаҳрида май ойи ўрталаридан карантин чекловлари аста-секинлик билан юмшатила бошланган. Айни пайтда шаҳарда коронавирусга чалинган беморлар сони 2462 нафарга етган. Куни кеча Олмаота ҳокими Бақитжан Сағинтаев, агар коронавирус юқтириб олиш билан боғлиқ вазият ёмонлашиб кетгудек бўлса, шаҳар қатъий карантин тартибига қайтиши мумкинлигини билдирди.

Трамп ижтимоий тармоқларни тартибга солишга оид фармон имзолади

АҚШ президенти Дональд Трамп.

АҚШ президенти Дональд Трамп ижтимоий тармоқларни тартибга солиш тўғрисидаги фармонни имзолади. Ҳужжат матни Оқ уй сайти орқали эълон қилинди.

Мазкур фармон асосида 1996 йилда қабул қилинган “Оммавий ахборот воситаларининг виждонан ишлаши тўғрисида”ги қонуннинг 230-моддаси ўзгартирилиши мумкин. Мазкур модда ижтимоий тармоқларни фойдаланувчи томонидан ёйинланган контент учун жиноий таъқиб қилинишидан ҳимоя қилади. Бу қонунда ижтимоий тармоқлар ношир ўлароқ эмас, балки “майдон” сифатида қайд этилган бўлиб, бу уларни тармоқдаги постлар учун жавобгарликдан озод қилади.

Фармон ижтимоий тармоқлар маъмуриятининг ёйинланган контентни модерация қилиш имкониятини ҳам чеклаб қўйиши мумкин.

Трампга кўра, фармондан мақсад ифода эркинлиги ва демократияни ҳимоя қилишдир, чунки катта онлайн-платформалар у ёки бу ҳодисани талқин қилиш, маълумотни цензура қилиш ёки ўчириб ташлаш бўйича “назорат қилиб бўлмайдиган ҳокимият”га эга бўлиб қолганлар.

Ҳужжатда Twitter микроблоги “айрим твитларга атайлаб огоҳлантирув илова қилаётгани, бу эса унинг сиёсий нохолислигини очиқ акс эттираётгани” алоҳида қайд этилади.

Аввалроқ Twitter Дональд Трампнинг твитларида муҳтамал ноаниқликлар бўлиши мумкинлиги ҳақида обуначиларни огоҳлантира бошлаганидан кейин АҚШ президенти ижтимоий тармоқ хизматларини танқид қилиб чиққан. Бу ерда гап Трампнинг сайлов бюллетенлари почта орқали йўлланганида овоз бериш натижалари “сохталаштирилиши” мумкинлигига оид твитлари ҳақида кетмоқда. Twitter бош директори Жек Дорси Трампнинг твитлари почта орқали овоз бериш тартиби тўғрисида нотўғри таассурот уйғотиши мумкин бўлгани учун уларга “чалғитувчи” маълумот белгиси қўйилганини билдирган.

Twitter вакиллари Трампнинг ижтимоий тармоқларни тартибга солиш тўғрисидаги фармонини “реакцион ва сиёсийлашган” деб баҳолаганлар. Facebook вакиллари эса , агар ижтимоий тармоқлар ўз фойдаланувчилари гапираётган ҳар бир гап учун жавобгар бўладиган бўлсалар, улар “бирор кишини хафа қилиши мумкин бўлган ҳамма нарсани цензура қилиш”га мажбур бўлишларини билдирганлар. Фармонни Google ҳам қоралаб чиққан.

Экспертларнинг аксарияти президент фармони судда тортишилади, деган фикрда.

Давомини ўқинг

Кўрмай қолган бўлсангиз

XS
SM
MD
LG