Линклар

Шошилинч хабар
18 август 2019, Тошкент вақти: 07:51

LIVE BLOG: Абитуриент кундалиги

Фақат 5 та олийгоҳга 24 соат давомида ҳужжат топшириш мумкин

Ўтган ҳафта Давлат хизматлари агентлиги ОТМларга ҳужжатни 24 соат давомида топшириш мумкинлигини эълон қилган эди. Озодлик мобил мухбири Тошкентдаги бир қанча олийгоҳларга бориб вазиятни ўрганди. Маълум бўлишича, олийгоҳлар соат 19:00дан кейин ҳужжат қабул қилишни тўхтатмоқда. Жумладан, Низомий педагогика университети, Шарқшунослик, Жаҳон тиллари олийгоҳларида соат 19:00дан бошлаб қабул тўхтатилаётгани аниқланди. ​“Эрталаб соат 5:00да келинг. Келиб навбат оласиз. Университет дарвозаси соат 7:30да очилади. Кейин ўша навбат орқали ҳаммага “номер” тарқатилади. Кейин шу “номер” орқали навбатингиз келганда ҳужжат топширасиз”, деди педагогика олийгоҳи ходими. Давлат хизматлари агентлигига кўра, айни пайтда агентлик орқали мамлакат бўйича фақат 5 та олийгоҳга кечаю кундуз ОНЛАЙН тарзда ҳужжат топшириш мумкин:

1. Тошкент давлат юридик университети;

2. Қорақалпоқ давлат университети;

3. Гулистон давлат университети;

4. Фарғона давлат университети;

5. Самарқанд давлат университети;

Давлат Тест маркази ўзининг Телеграмдаги саҳифаси орқали онлайн ҳужжат топширишга оид қуйидаги маълумотларни эълон қилди:

  • Шунчаки абитуриентлар паспорт ва дипломининг серияси ва рақамини, шахсий идентификация рақамини (ПИН ФЛ) киритса кифоя, бошқа нарса керак эмас. Паспорт ва дипломларнинг сканери ҳам шарт бўлмайди, рақамларини киритса бўлди;

  • Лайфхак: мабодо кимдир паспорти ва дипломини йўқотиб қўйган бўлса ва янгисини олишга улгурмаслигига кўзи етса, унда онлайн ҳужжат топширсин. Ҳеч кимга ҳужжат кўрсатиш шартмас, рақамларини билсангиз кифоя. Имтиҳонга эса паспорт столдан олинган вақтинчалик паспорт (09-шакл) билан кирса бўлади;
  • Ягона порталдан ҳужжат топшириш хизмати текин бўлади;
  • Фақат ўтган йили тугатган абитуриентлар Ягона порталдан ҳужжат топширмоқчи бўлса, 101.365 сўм тўлов қилинади;
  • Ягона портал орқали аввал ҳужжат топширганлар йўналишини ўзгартира олмайди! Бунинг учун қабул комиссиясига бориш керак;
  • Ягона портал орқали рўйхатдан ўтишда ўта ҳушёр бўлиш керак, маълумотлар нотўғри киритилса, уни портал орқали тузатиб бўлмайди. Бунинг учун давлат хизматлари марказига бориш керак;
  • Қуйидаги абитуриентлар онлайн ҳужжат топшира олмайди:
    - алоҳида имтиёзга эга бўлганлар (яъни турли мукофот соҳиблари, олимпиада ғолиблари ва ҳ.к.);
    - фуқаролик паспорти бўлмаган шахслар (масалан, 16 ёшга тўлмаганлар);
    - фуқаролиги бўлмаган шахслар.

    Ушбу тоифадагилар давлат хизматлари марказига шахсан ўзлари боришлари шарт.

Мамлакатдаги барча олийгоҳлар фақат бир кун: ҳужжат топширишнинг охирги куни - 15 июль куни соат 24:00гача ишлайди.

Бу ҳақда Озодлик мобил мухбири суҳбатлашган Тошкентдаги олийгоҳлар ходимлари маълум қилишди.

Айни пайтда мамлакат бўйлаб деярли барча олийгоҳларда узундан -узун навбатлар давом этмоқда.

Кун янгиликлари

Эртага кириш имтиҳонларининг охирги куни

Иллюстратив сурат

Олийгоҳларнинг бакалавриат йўналишларига кириш имтиҳонлари эртага - 15 август куни ниҳоясига етади.

Тест синовлари 29 июль куни бошланиб, жами 18 кун давом этди.

ДТМ хабарига кўра, ҳозиргача 8та вилоятда тест синовлари ниҳоясига етди:

  • 8 август: Сурхондарё;
  • 10 август: Тошкент шаҳри, Сирдарё, Наманган;
  • 12 август: Қашқадарё
  • 13 август: Жиззах, Фарғона ва Навоий вилоятларида тест синовлари якунланган.

Бугун, 14 август куни жами 5 та вилоятда: Андижон, Бухоро, Хоразм, Самарқанд ва Қорақалпоғистонда имтиҳонлар ўтди.

Улардан тўрттасида бугун тестнинг охирги куни эди.

Эртага биргина Бухоро вилоятида тест синовлари ўтади.

ДТМ: Ёши 50дан ошган абитуриентлар сони 672 нафардир

Тест топширишга келган абитуриентларнинг ҳужжатлари текширилмоқда.

Давлат тест маркази жорий йилда тест имтиҳонларида ёш чеклови бекор қилингани сабабли катта ёшдаги минглаб одамлар ҳам “талаба бўлиш умидида олий ўқув юртларига ҳужжат топширгани”ни билдирди.

13 август куни матбуотга тақдим этилган маълумотда айтилишича, 25 ёшдан кичик абитуриентлар сони 862 977 нафарни, 25-30 ёш оралиғидагилар 103 276 нафарни, 40-50 ёшлилар 14 014 нафарни ва 50 ёшдан катталар сони 672 нафарни ташкил этади.

Июль ойида сурхондарёлик 80 ёшли Тўхтамиш Султонов Ўзбекистондаги энг ёши катта абитуриент бўлгани хабар қилинган эди.

Тўхтамиш Султонов Самарқанд давлат университетининг Биологияни ўқитиш методикаси ҳамда Тошкент тиббиёт академияси Термиз филиалининг даволаш ва педиатрия иши йўналишида ўқиш учун ҳужжат топширган.

Аввалроқ Фарғонада ҳам 72 ёшли аёл бирданига учта олийгоҳга ўқишга кириш учун абитуриент сифатида ҳужжат топширганди.

Шунингдек, Навоийнинг Қизилтепа туманида яшовчи 67 яшар Шарофат Ташева ҳам Навоий давлат педагогика институтига ҳужжат топширган. Онахон институтнинг она тили ва адабиёти факультетига ўқишга киришни режалаган.

ДТМ томонидан техник хатога йўл қўйилган тест саволи учун максимал балл берилажаги айтилди

ДТМ томонидан техник хатога йўл қўйилган тест саволи учун максимал балл берилади. Бу ҳақда Давлат тест маркази бош бошқарма бошлиғи Диёрбек Қўчқоров баёнот берди.

Лекин Қўчқоров бундай ҳолат неча марта қайд этилгани тўғрисида маълумот бермади.

Давлат тест маркази бош бошқарма бошлиғи Ахборот ва оммавий коммуникациялар агентлигида ўтказилган бирифингда қуйидаги маълумотларни келтирган:

12 август куни Ўзбекистон бўйлаб 43 та бинода тест синовлари икки сменада бўлиб ўтди. Жами 53 минг 162 нафар абитуриентдан 51 минг 667 нафари тест синовларига келди. 1464 нафари эса турли сабабларга кўра иштирок этмади. Шу куни 11 нафар абитуриент ҳудудга киришда, 20 нафари эса бинода қоидани бузганлиги учун тест синовларидан четлатилди.

Қўчқоровга кўра, 10 август куни бакалавр йўналишининг кундузги шакли бўйича Тошкент давлат ўзбек тили ва адабиёти университетининг филология ва тилларни ўқитиш факултети абитуриенти энг юқори балл тўплаган — 231,9 балл (173,9 балл тест синовлари натижаси, 58 балл касбий (ижодий) имтиҳон натижаси); сиртқи таълим шакли бўйича Фарғона давлат университетининг филология ва тилларни ўқитиш йўналиши — 174,2 балл, кечки таълим шакли бўйича Тошкент давлат шарқшунослик институтининг тарих таълим йўналишида — 172,6 балл.

8 август куни Сурхондарё вилоятида, 10 август куни эса Сирдарё ва Наманган вилоятлари ҳамда Тошкент шаҳрида тест синовлари якунлангани маълум қилинди.

Қўқонлик абитуриентлар тест натижаларига норозилик билдирди

Қўқонлик абитуриентлар норозилиги
Илтимос кутинг

Айни дамда медиа-манба мавжуд эмас

0:00 0:04:10 0:00

Бир гуруҳ абитуриентлар ва уларнинг ота-оналари Қўқон Давлат педагогика институтида ўтказилган ижодий имтиҳон натижаларига норозилик билдириб, олийгоҳ раҳбарияти олдига киришди. "Қўқон Давлат Педагогика институтида ўтказилган ижодий имтиҳонда фақат таниш билишчилик бўлди. Ҳақиқий иқтидорли ёшларга энг паст балл қўйилди. Мана норозилик", дея қўқонлик муштарий ушбу видеони Озодликка йўллади.

Тест пайти синглисига ёрдам бермоқчи бўлган назоратчи ишдан бўшатилди

Иллюстратив сурат

Тест синовлари жараёнида назоратчи сифатида иштирок этаётган самарқандлик белгиланган қоидаларни бузган пайти ушланди.

Бу ҳақда хабар қилган Телеграмдаги Xushnudbek.uz тармоғига кўра, назоратчи имтиҳон пайти синглисига ноқонуний равишда ёрдам бермоқчи бўлганида қўлга тушган.

Воқеа 7 август куни Самарқанд шаҳрида ўтган тест синовлари пайти содир бўлган. Имтиҳонлар жараёнида назоратчи сифатида иштирок этаётган шахс синглисига ёрдам бериш мақсадида унинг саволлар варақасини видеога олаётган пайти ушланган.

Қўлга тушган назоратчи Самарқанд шаҳридаги мактаблардан бирида маънавий-маърифий ишлар бўйича директор ўринбосари бўлган.

Ушбу воқеа ошкор бўлган у мактабдан ҳам ҳайдалган.

Тест жараёнларида назоратчи сифатида қатнашаётганларга бир кунга 200 минг сўмдан ҳақ тўланмоқда.

 Бу йил ҳам супер-контракт бўлади

Иллюстратив сурат

Жорий йилда ҳам имтиҳонда етарли балл тўплай олмаган абитуриентлар супер-контракт тўлаб талаба бўлишлари мумкин.

Бу ҳақда Олий ва ўрта махсус таълим вазирлигидаги исмини очиқламаётганимиз манба маълум қилди.

Ўтган йили энг арзон супер-контракт нархи 82 миллион 935 минг сўм бўлса, энг қиммати 276 миллион 450 минг сўм этиб белгиланган эди.

Супер-контрактнинг бу йилги нархи ҳали эълон қилинмади.

Абитуриент супер-контракт орқали ўқишга кириш учун камида 56,7 балл тўплаши лозим.

Ўтган йили тест синовларида олийгоҳга ўтиш балли (56,7)ни тўплай олмаган абитуриентлар ҳам талаба бўлиш имконига эга бўлганди. Бунинг учун абитуриент суперконтрактнинг икки баробаригача яъни 165 миллиондан 552 миллионгача тўлаган эди.

Вазирликдаги манбага кўра, бу йил ҳам бу тартиб йўлга қўйилади.

Супер-контрактнинг битта шарти: Абитуриент мактаб ёки коллежни бу йил тугатган бўлиши лозим. Бир йил аввал мактабни тугатганлар бундай имкониятдан фойдалана олмайди.

Кимё фани бўйича эътирозларни инобатга олишадими?

Иллюстратив сурат

Озодликка абитуриентлардан келган мурожаатлардан бирида яна кимё фани бўйича саволларга эътироз билдирилган:

"Агар ҳозир ёзганларимни ўқиб инобатга олсангиз, бутун Ўзбекистон абитуриентларнинг кўнглидаги дардига оз бўлсада шифо топишга ёрдам берган бўлардингиз. Гапни чўзмай айтиб қўя қолай.

6 август куни Ўзбекистон тиббиёт институтларида имтиҳон бўлиб ўтди.Кимё фанидан тушган тестларни тарифлашга тил ожиз. Худди у тестлар абитуриентлар ўқишга кириб , ўз йўлини топсин деб эмас, йиқилсин деб тузилгандек.

Русча имтиҳон топширганларга , ўзбекча тестларни тушунарсиз , нотўғри ва кўплаб орфографик хатоликлар билан таржима қилишган.

Наҳотки Ўзбекистон бўйича битта тузук таржимон топилмаган бўлса?

Ундан ташқари 30 саволдан 28 таси масала эди ва масалалар ҳам шу даража қийинки, уларни ишлаш учун кимё ўқитувчиси эмас, математика ўқитувчиси бўлиш керак, ҳа, албатта тўғри ўқидингиз ўқитувчи. У саволларни ўқувчилар ишлаши учун камида 5-6 йил тайёргарлик кўриши лозим.

Ҳаммага маълум, имтиҳонларимизда калькулятор ишлатиш мумкин эмас. Энди ўйлаб кўрингда, бизга берилган атиги 3 соат ичида биз фақат битта фан ишлаймизми? Ёки таваккал қилиб кетаверамизми?

Кимё ўз номи билан кимё. Олий математика эмас!

Булардан ташқари тест тузилиш шаблони хато, ҳеч қачон 1 вариантни ичида 28 масала бўлмайди. 15 масала ва 15 назарий бўлиши керак.

Давлат тест маркази директори томонидан айтилган гаплар қаерда қолди?
Вариант 15 та масала ва 15 назари бўлади деб ўз оғзи билан айтган. Абитуриентлар бу гапларга ишониб, кечаю кундуз китобни ҳар бир қаторини ёдлаб чиқишди.

Айтай десам гап кўп. Ахборотнома деган китоб бор, ичидаги саволларга ўхшаш саволлар тушади деб роса ваъдаларни беришди.

Уни қанчадан қанча абитуриентлар пул кетқазиб сотиб олдилар. Лекин ҳеч бирига ўхшаш савол тушгани йўқ. Бу гапим билан нима демоқчи бўлганимни тушунган бўлсангиз керак. Биринчидан, аҳмоқ қилишди ва бир тийинга қиммат китобларини сотиб, пул ишлашди.

Таълим системаси бу кетишда кетаверса, ёш, билимга чаноқ, шиддатли ўқувчилар бундай адолатсизликларни кўриб, чет элда таълим олганим минг бора яхши деб четга ўқишга кетиб, ўша ерда қолиб кетишаверади. Албатта тўғрида адолатсизлика чидаб ўтиргандан кўра ўз йўлини топгани маъқул. Ўзбекистон эса шундай ёшларини йўқотиб , билимсизлик қарига ғарқ бўлаверади", дейилади абитуриент мактубида.

Бу тест синовларида кимё фани бўйича тушган саволлар бўйича илк эътироз эмас.

Бошқа бир абитуриент ҳам худди шундай мазмундаги эътирозли мактуб йўллаган эди:

“Бу йил биз Тошкент Тиббиёт академиясига топширдик. Тест синовларидан чиққан абитуриентлар билан суҳбатимизда ҳаммаси химия фанидан қийналишганини айтишди. Аввал ДТМ раҳбари билан бўлган суҳбатда бу йил фақат мактаб программаси бўлишини айтган бўлганига қарамай жудаям қийин саволлар тушган, шу сабабли 3 та фанга берилган 3 соатда улгурмаганлар ҳам бўлган. Шунга қарамай баьзи болаларнинг 186 балл йиғишгани ҳайрон қолдирди. Кейин эса шу тестларни 3000$га тест кунидан бир кун аввал сотишгани маьлум бўлди. Қачон бизнинг давлатда тугаркин шу каби ноҳақликлар? Порахўрликнинг охири бормикин? Билимли болаларимизни четга жўнатиб, ўзимизнинг давлат пора бериб кирганларга колаяптику?!, дея ёзади исмини очиқламасликни сўраган муштарий.

Кимё фани бўйича саволларнинг қийинлиги борасида Телеграмдаги
Xushnudbek.uz тармоғида ҳам ёзилди:
“Кимё фани бўйича саволлар юзасидан жуда кўп эътирозлар келиб тушмоқда. Агар 1-2 киши ёзганда ҳам эътибор бермаса бўларди, лекин эътирозлар сони анчайин кўплиги сабабли, уларда жон бор, деб ҳисоблаш мумкин. Бу бўйича ДТМ мутахассисларига эътирозларни етказдим, ҳозирда бу ҳолатни ўрганишаётган экан, тез орада расмий муносабат кутиб қоламиз”.

 Ҳайит кунги имтиҳонлар бошқа кунга кўчирилди

Иллюстратив сурат

Қурбон Ҳайити муносабати билан 11 август, якшанба кунига белгиланган тест синовлари бошқа кунга кўчирилди. Бу ҳақда ДТМ хабар қилди: Қашқадарё вилоятида - 12 август куни; Фарғона, Жиззах ва Навоий вилоятларида -13 август куни; Қорақалпоғистон Республикаси, Андижон, Хоразм ва Самарқанд вилоятларида - 14 август куни; Бухоро вилоятида – 15 август куни ўтказилади. ДТМ хабарига кўра, абитуриент рухсатномасида кўрсатилган бино ва соат ўзгаришсиз қолади. ​Бу ўзгариш фақат 11 август куни тестга кирадиган абитуриентларга тааллуқли, бошқа кундагилар белгиланган кунда тест синовларига киришади.

Наманганда тест пайти уч "Калла" ушланди

Наманганда 3 август кунги имтиҳонлар пайти ўтказилган рейд давомида абитуриент ўрнига “калла” сифатида кираётган уч талаба ушланди.

Бу ҳақда 7 август куни хабар қилган Kun.uz нашрига кўра, Тошкент ахборот технологиялари университети, Наманган давлат университети ва Наманган муҳандислик технология институтининг талабалари “Калла” ролини бажараётган пайти ушланган.

Маълум бўлишича, 34 ёшли норинлик шахс абитуриентларни "Калла"лар ёрдамида ноқонуний йўллар билан ўқишга киритишини ташкиллаштирган. Ҳозирда у қўлга олиниб, унга нисбатан жиноий иш қўзғатилган.

Норинлик шахс абитуриентларни "Калла" ёрдамида 3500 доллар эвазига ўқишга киритишга ваъда берган. "Калла"лар билан эса 800 долларга келишган.

P.S. Бировнинг ўрнига кирадиган “Калла” кимлиги ҳақида: Бирор олий ўқув юртининг домласи - уни “Танка” деб атаймиз. “Танка” ҳар йили тест имтиҳонлари олдидан аълочи талабалардан битта гуруҳ тузади. Бу гуруҳга бошқа институтлардаги аълочи талабалар ҳам жалб қилинади. Ўша гуруҳдаги талаба “Калла” бўлади. Уларга маълум суммада пул таклиф қилинади. Ўзаро келишилади. Июн ойида ўқиш тугагач, “Калла” талаба “Танка”нинг уйида яшайди. “Танка” турар-жой, квартира ва еб-ичиш билан таъминлайди. Агар “Калла” ўз билимига ишонса, “Танка”га шарт ҳам қўйиши мумкин. Нарх ва шароитлар бўйича. “Калла” тест синовларига тайёрланади. Одатда, “Калла” ўқишга ўз кучи билан кирган, аълочи талабалардан иборат бўлади.

“Калла” имтиҳонга тайёрланаётган пайтда “Танка” унга бошқа бировнинг паспортини олиб келиб беради. Бу одам ўша олийгоҳга ҳужжат топшириб, ДТМ варағини олган бўлиши керак. Энг асосийси, бу одам “Калла”га ўхшаб кетадиган бўлиши керак. У ўзи институтга кирмоқчи эмас. Лекин унинг паспорти билан ДТМ қоғози “Калла”нинг тест бўладиган аудиторияга кириши учун зарур.

Озодликда эълон қилинган собиқ «Калла» ҳикоясини қуйида тўлиқ ўқишингиз мумкин:

"Х вариант 2000 долларга пулланаяпти" (ФОТО)

"Абитуриент кундалиги" жонли блогига келган мурожаатлардан бирида тест синовлари пайти бўлаётган ғирромликлар ҳақида ёзилган: "Тест имтиҳонларининг софлиги ҳақида баъзи маълумотларни маълум қилмоқчи эдим. Ўқув марказларида тайёрланаётган абитурентларнинг айтишича, имтиҳондан бир кун олдин Х вариантлар чиқаётган экан. 1та блоги 1000$ 3та блоги эса 2000$. Ўқувчиларга ўқув марказининг директорлари бу ҳақида айтишган, рози бўлганларни бир киши билан учраштирган. 2000$ га Х вариант олган талабаларга 600та саволни ёдлатишган. Шу абитурентлар ҳозиргача 23-24тадан тўғри жавобларни ёзиб чиқишмоқда. Яна бир нарса: Х вариант олганларга варақни тарқатмаслиги учун Қуръон китоб билан қасам ҳам ичтиришибди. Х вариант ололмаган, неча йилдан бери тайёрланаётган абитурентлар яна куйиб қолишмоқда. Илтимос шу мавзуни ўрганиб чиқинг. Ҳали яна қанча абитурентлар имтиҳонга киради", дея иддао қилинади Озодликка келган мактубда.

Кимё фани бўйича саволларга эътирозлар

Озодликка келган мурожаатлардан бирида кимё фани бўйича саволларга эътироз билдирилган: “Бу йил биз Тошкент Тиббиёт академиясига топширдик.Тест синовларидан чиққан абитуриентлар билан суҳбатимизда ҳаммаси химия фанидан қийналишганини айтишди. Аввал ДТМ раҳбари билан бўлган суҳбатда бу йил фақат мактаб программаси бўлишини айтган бўлганига қарамай жудаям қийин саволлар тушган, шу сабабли 3 та фанга берилган 3 соатда улгурмаганлар хам булган. Шунга қарамай баьзи болаларнинг 186 балл йиғишгани ҳайрон қолдирди. Кейин эса шу тестларни 3000$га тест кунидан бир кун аввал сотишгани маьлум бўлди. Қачон бизнинг давлатда тугаркин шу каби ноҳақликлар? Порахўрликнинг охири бормикин? Билимли болаларимизни четга жўнатиб, ўзимизнинг давлат пора бериб кирганларга колаяптику?!”, дея ёзади исмини очиқламасликни сўраган муштарий.

Кимё фани бўйича саволларнинг қийинлиги борасида Телеграмдаги
Xushnudbek.uz тармоғида ҳам ёзилди: “Кимё фани бўйича саволлар юзасидан жуда кўп эътирозлар келиб тушмоқда. Агар 1-2 киши ёзганда ҳам эътибор бермаса бўларди, лекин эътирозлар сони анчайин кўплиги сабабли, уларда жон бор, деб ҳисоблаш мумкин. Бу бўйича ДТМ мутахассисларига эътирозларни етказдим, ҳозирда бу ҳолатни ўрганишаётган экан, тез орада расмий муносабат кутиб қоламиз”.

Ҳожатхонадан чиқаётган “шпаргалка”лар  

Иллюстратив сурат

Айрим абитуриентларнинг имтиҳон пайти ҳожатхонага кириб, “шпаргалка” ёки мобил телефонларни олиб чиқиш ҳолатлари ҳам учрамоқда.

Бу ҳақда бугун Давлат тест маркази бошқарма бошлиғи Барно Ражабов тест синовлари билан боғлиқ ўтган навбатдаги брифинг пайти маълум қилди.

Барно Ражабов бу каби абитуриентлар қўлга тушаётгани ва улар имтиҳондан четлатилаётганини таъкидлади.

Бироқ Ражабов ҳожатхоналарда шпаргалка ва телефонлар қандай пайдо бўлиб қолаётганини очиқламади.

ДТМ маълумотига кўра, 4 август кунги имтиҳонларда 2 минг 259 нафар абитуриент иштирок этмаган.

Жумладан, 17 нафар абитуриент тестга кириш пайти ичкарига қўйилмаган, 32 нафари эса имтиҳондан чиқариб юборилган.

Иккала ҳолатда ҳам тест синовлари қоидалари бузилгани айтилди.

“Абитуриентлардан аппеляция аризаси олинмаяпти”

Фарзанди Миллий рассомлик ва дизайн институти абитуренти бўлган ота-оналардан бири Озодликка боғланиб, кам балл олган абитуриентлардан аппеляция аризаси олинмаётганидан шикоят қилди: “Бугун биз имтиҳон жавобларини олишга борган эдик. Камолиддин Беҳзод институтига яъни Миллий рассомлик ва дизайн институти. Бу ерда имтиҳонлар ижодий бўлгани учун 3 кун имтиҳон бўлди, чизишди. Бугун жавобларни олишга борсак, ҳаммага яъни кўпчиликкка ноҳақ балл қўйилган. Менинг фарзандимда ҳам шундай. Апелляция беришга ота- оналарни киргизмасдан абитурентларнинг ўзини киргизишяпти. Уларга ариза ёздирамиз деб, ҳар-хил баҳоналар қилиб, аризасини кўрмасдан “шу баллинга рози бўлгин” деб чиқартириб юборишяпти”, дея ёзди исмини очиқламасликни сўраган ота-оналардан бири.

Сохта гувоҳнома билан тестга кирмоқчи бўлган абитуриент ушланди

1 август куни абитуриент гувоҳномасини сохталаштирган йигит ушланди. ДТМ хабарига кўра, у 2 август куни тест синовида қатнашиши керак бўлган. Бугун эса сохта ҳужжат билан бировнинг ўрнига кирмоқчи бўлган. Бу йил абитуриентлар рўйхати видеофиксация орқали аниқланмоқда. Сохта ҳужжат қилган абитуриент видеофиксация пайтида рўйхатда йўқлиги аниқланган. Яна бир абитуриент телефондан фойдаланган пайти ушланган. У саволлар китобчасини суратга олиб, мессенжер орқали танишига жўнатган пайти ушланган. Иккала абитуриент ҳам бу йилги тест имтиҳонларидан бутунлай четлаштирилган.

Ҳукумат инспекцияси Қашқадарёдаги “халқаро университет” фаолияти ноқонуний эканидан огоҳлантирди

Вазирлар Маҳкамаси ҳузуридаги Таълим сифатини назорат қилиш давлат инспекцияси абитуриент ва ота-оналарни ноқонуний равишда ҳужжат қабул қилаётган “халқаро университет”дан эҳтиёт бўлиш ҳамда ёлғон маълумотларга ишонмасликка чақирди (“Оила даврасида”, 1 август). Қашқадарё вилоятида “Халқаро ижтимоий-иқтисодиёт унивeрситeти” нодавлат олий таълим муассасаси 2019/2020 ўқув йили учун абитуриентлардан ҳужжат қабул қила бошлаган. Таълим инспекциясига кўра, мазкур муассаса лицензия олиш учун бир неча бор ариза билан мурожаат қилган, лекин амалдаги талаб ва нормаларга жавоб бермагани боис сўрови рад этилган. Ушбу муассасанинг норасмий фаолияти бўйича Қашқадарё вилояти ҳокимлигига хат юборилгани маълум қилинган.

Тестнинг учинчи куни: 54 абитуриент имтиҳондан ҳайдалди

Тестнинг учинчи куни – 31 июлда 1570 абитуриен тест синовларига келмади. Шунингдек, 18 нафар абитуриент имтиҳонга қўйилмади, 36 нафар абитуриент имтиҳондан чиқариб юборилди. ДТМ хабарига кўра, 31 июль кунги имтиҳонда Ўзбекистон миллий университетининг Математика йўналишига ҳужжат топширган абитуриент 181,6 балл олган. Бу мамлакат бўйича имтиҳоннинг учинчи кунида энг кўп тўпланган баллдир.

Тест синовлари: Шпаргалка, пора, жазирамада қолган ота-оналар

Тест синовлари: Шпаргалка, пора, жазирамада қолган ота-оналар
Илтимос кутинг

Айни дамда медиа-манба мавжуд эмас

0:00 0:03:18 0:00

.

Икки кунда 5000 абитуриент имтиҳонда иштирок этмади

Ёш чекловининг олингани абитуриентлар сонининг ошишига сабаб бўлди. Бу йил 1 миллиондан зиёд абитуриент имтиҳон топширмоқда ва бу ўтган йилга нисбатан қарйиб 31 фоизга кўпдир. Давлат тест маркази маълумотига кўра, тест синовларининг дастлабки икки кунида 5000дан зиёд абитуриент имтиҳонда иштирок этмади. Улардан 91 нафари тартибни бузгани, жумладан, шпаргалка ёки алоқа воситаларини олиб киргани учун имтиҳондан чиқариб юборилган. 4446 нафар абитуриент имтиҳонга келмагани айтилди. Бироқ нима сабабдан келмагани очиқланмади. Рухсатнома берилмаган 57 минг абитуриентнинг тақдири ҳам ҳануз мавҳум қолмоқда. Қабул пайтидаги камчиликлар сабаб рухсатномасиз қолган бу абитуриентлар имтиҳонга қўйилмаслик хавфи қаршисида қолган.

Айни пайтда имтиҳонлар 2 сменада -эрталаб ва тушдан кейин бўлиб ўтмоқда. Олдингидай олийгоҳларнинг ўзида эмас, махсус ажратилган биноларда ўтказилаётган имтиҳонлар кучайтирилган назорат остида ўтаяпти. Тест пайти имтиҳонлар бўлаётган бинолар яқинидаги кўчалар тўсилиб, машиналар қатнови чеклаб қўйилмоқда.

ИИБ, миллий гвардия ва бошқа орган ходимлари тест синовларига жалб қилинган. Назоратнинг кучлилиги тармоқларда танқидларга сабаб бўлаяпти. Абитуриентлар билан боғлиқ ҳолатлар махсус зоналардаги вазиятларга қиёсланаяпти.

Пойтахтда абитуриентларнинг яқинлари учун махсус шароит яратилгани айтилди. Бироқ вилоятларда ота- оналар куннинг жазирамасида, асфалтда ўтириб, болаларини кутишга мажбур бўлаётгани кузатилди.

Жорий тест пайтидаги шаффофлик имтиҳон хоналарида камераларнинг кўплиги, видео тасвирларнинг монитор орқали намойиш қилинаётгани билан изоҳланди. Шунингдек, тест натижаларининг эълон қилиниш тартиби ҳам шаффофликка мисол тарзида келтирилмоқда. Бу йил абитуриентлар балли онлайн тарзда эълон қилинаяпти.

Бу йил олийгоҳларга қабул коррупциядан ҳоли тарзда ўтиши ваъда қилинди. Имтиҳонлар бошланиши арафасида Олий ва ўрта махсус таълим вазирлиги мамлакат олийгоҳларида коррупция ҳолатлари борлигини тан олди ва мамлакат олийгоҳлари ректорлари пора олмасликка сўз беришди.

Ҳозирча коррупция билан боғлиқ иккита ҳолат матбуотга ошкор бўлди. Бош прокуратура маълумотига кўра, Тошкент Тиббиёт академиясига ўқишга киритиш учун 25 минг долларни олаётган қашқадарёлик шахс қўлга олинган. Андижон давлат университети мудири эса уч абитуриентдан 12 минг доллар олаётганда ушланди.

Жорий йилда тест синовлари кўплаб ўзгаришлар билан ўтмоқда. олийгоҳга ҳужжат топшириш илк бор пуллик бўлди. Фақат мактабни бу йил битирганларга бепул топшириш имкони берилди. Мактабни аввалги йил битирганлар 101минг сўмдан зиёд пул тўлаши лозим бўлди. Абитуриентлар жами 53 миллиард сўмга яқин пул тўлашди. Бу маблағ имтиҳон пайтидаги ғирромликларни аниқлайдиган техникаларни сотиб олишга сарфланиши айтилди.

Абитуриент қиз операциядан чиқиб, тўғри имтиҳонга келди

Бу йилги тест жараёнида қизиқ ҳолатлар ҳам кузатилаяпти. Жумладан, 31 июль куни андижонлик абитуриент Дилноза Ассабова имтиҳонга тез ёрдам машинасида олиб келинди. Бир кун аввал жарроҳлик операциясини ўтказган Дилноза Андижон давлат университетининг чет тиллар факультетига ҳужжат топширган. Бухоролик абитуриент Гулбаҳор Атоева эса фарзандлик бўлганининг эртасига туғруқхонадан келиб ҳужжат топширганди.

Андижонда тест имтиҳонларига қандай кирилди? (ВИДЕО)

Тестнинг биринчи куни: 2538 абитуриент имтиҳонда қатнашмади

Тест синовларининг биринчи куни жами 2538 нафар абитуриент имтиҳонда иштирок этмади. Бу ҳақда хабар қилган Давлат Тест марказига кўра, тартиб қоидани бузганлиги туфайли 13 нафар абитуриент имтиҳон ўтказиладиган ҳудудга кириш чоғида, 53 нафар абитуриент бевосита имтиҳон давомида тестдан четлаштирилган. Бошқа абитуриентларнинг тестда қатнашмагани сабаби очиқланмаган.29 июль куни мамалакат бўйлаб жами 66та бинода тест синовлари ўтказилган. Тест синовларининг биринчи кунида жами 71 минг 340 нафар абитуриент иштирок этиши лозим бўлган, шулардан 68 минг 736 нафари имтиҳонларда қатнашган.

Журналистлар тест синовларини фақат 20 дақиқа кузатиши мумкин

Ўзбекистонда 29 июль куни тест синовларига старт берилди. Ушбу жараённи кузатиш учун журналистларга атиги 20 дақиқа вақт ажратилган. Белгиланган тартибга кўра, журналистлар 1-сменадаги имтиҳонларда 10.00дан 10.20гача, 2-сменадаги имтиҳонларда 17.00дан 17.20гача тест синовларига киритилади. Бу пайтда улар жараённи видео ва фото тасвирга олишлари мумкин. Бошқа вақтда улар абитуриентларнинг ота-оналари сингари ташқарига ўрнатилган мониторлар орқали тест жараёнларини кузатиши мумкин.

Кириш имтиҳонлари бошланди, йўллар ёпилди

Иллюстратив сурат.

Душанба, 29 июль куни соат 8:00 ҳамда 15:00 да 2019-2020 ўқув йилги олий таълим муассасаларига кириш имтиҳонлари бошланади. Тошкент шаҳар ҳокимлиги матбуот хизматининг маълум қилишича, кириш имтиҳонлари Юнусобод тумани Амир Темур кўчасидаги “Ўзэкспомарказ” Миллий кўргазмалар мажмуаси, Мирзо Улуғбек тумани Ниёзбек йўли кўчасидаги олий ўқув юртлариаро спорт мажмуаси, Шайхонтоҳур тумани Беруний кўчасидаги Халқ истеъмол товарларининг кўргазма ярмарка савдоси республика маркази, Юнусобод тумани, Ифтихор кўчасидаги спорт мажмуаси, Шайхонтоҳур тумани Ислом Каримов шоҳ кўчасидаги «Ёшлик» спорт мажмуаси каби ҳудудларда ўтказилади.Имтиҳон кунлари йўловчиларга қулайлик яратиш, транспорт қатнови узлуксизлигини таъминлаш мақсадида “Тошшаҳартрансхизмат” АЖ 29 июлдан бошлаб ўз тасарруфидаги йўналишларга автобусларни одатдаги ҳаракат жадвалидан бир соат олдин чиқариши айтилмоқда. Айни пайтда Тошкент шаҳар Ички ишлар бошқармасининг маълум қилишича, имтиҳон кунлари, яъни 29 июлдан 10 августга қадар соат 05:00 дан 20:00 гача бўлган вақт оралиғида, пойтахтнинг Юнусобод туманидаги Кўргазма, Корхожиота, Ифтихор, ва Ниёзбек йўли каби кўчалар транспорт воситаларининг ҳаракати учун вақтинча беркитилади.

Олийгоҳлар ректорлари пора олмасликка қасамёд қилишди

Ўзбекистон олий ва ўрта махсус таълим вазирлиги расмий сайтида олийгоҳлар ректорлари номидан эълон қилинган баёнотда пора олмасликка сўз берилган. “Биз, олий таълим тизими раҳбарлари, кўп сонли ректорлар, профессор-ўқитувчилар ва жамоатчилик вакиллари билан биргаликда коррупцияга қарши курашиб, фарзандларимизнинг келажаги ва Ватанимиз тараққиёти йўлида сидқидилдан хизмат қилишга ваъда берамиз”, дейилади баёнотда. Олий ва ўрта махсус таълим вазирлиги мамлакат олийгоҳларида коррупция ҳолатлари борлигини тан олган: ​“Тан олишимиз керак, гуруч курмаксиз бўлмаганидек, тизимда масъул ходимлар ўртасида коррупция билан боғлиқ ҳолатлар йўқолмаган”.

Порахўрлик қилаётган ходимларнинг таълим соҳасига тасодифан кириб қолгани ва улар туфайли таълим муассасалари обрўсизлангани таъкидланади.

Обрўни кўтариш ва коррупцияга қарши курашишга бел боғлаганини айтаётган олийгоҳлар ректорлари вазиятни яхшилаш учун махсус чора-тадбирлар режаси ишлаб чиқилганини айтишган.

Ушбу режага кўра, эндиликда олийгоҳларда ҳалол ва пок виждонли, масъулиятли профессор-ўқитувчи ва ходимлар ишлайди.

“Жамоатчилик кенгаши” ташкил қилиниб, абитуриентларнинг олий ўқув юртларига қабул қилиш жараёнига, касбий (ижодий) имтиҳонларни ўтказишга, талабалар билимини баҳолашга ҳамда ўқишини кўчириш ёки қайта тиклашга, ўқишларини бошлаши учун турли хил сунъий тўсиқларга, фуқаролардан ҳар хил ноқонуний тўлов ундирилишига йўл қўйилмаслиги таъминланиши ваъда қилинган.

Коррупцияни енгиш учун мурожаат эгалари етти қадамдан иборат режа таклиф қиладилар. Мурожаатнома Ўзбекистонда қабул имтиҳонлари бошланиши арафасида пайдо бўлди.

“Талабаларнинг ўқишни кўчириш ва қайта тиклаш тўғрисидаги мурожаатларини рад этиш, ортиқча ҳужжатлар талаб қилиш ҳолатларининг олди олинишини, шунингдек, фуқароларнинг аризаларини ўз вақтида кўриб чиқилиши ҳамда ортиқча оворагарчиликларга йўл қўйилмаслигини таъминлаб берамиз”, дейилади баёнотда.

Халқаро ташкилотлар чиқарган ҳисоботларда Ўзбекистон коррупцияга ботган давлатлар рўйхатидан жой олиб келади.

Тошкентдаги "Ижтимоий фикр” жамоатчилик фикрини ўрганиш маркази томонидан яқинда ўтказилган коррупция бўйича сўровда қатнашганларнинг 66,5 фоизи Ўзбекистонда коррупция кенг тарқалганини эътироф этган.

Бухорода сўнгги абитуриент туғруқхонадан келиб ҳужжат топширди 

Иллюстратив сурат

Бухоро давлат университетидаги энг сўнгги абитуриент – бир кун олдин янги чақалоқ туққан Гулбаҳор Атоева бўлди. «Дарё» нашри хабарига кўра, ғиждувонлик 36 яшар Гулбаҳор Атоева 14 июль куни тунда ўғил фарзандни дунёга келтирган. Орадан бир кун ўтиб, у туғруқхонадан Бухоро университетига келиб, ҳужжат топширган ва яна туғруқхонага қайтиб кетган. Гулбаҳор 15 июль куни соат 23:58да олийгоҳга ҳужжат топширган ва энг охирги абитуриент бўлиб рўйхатга олинган. Атоева Бухоро Давлат университети, Навоий Давлат педагогика институти ҳамда Самарқанд Давлат университетининг Бошланғич таълим ва спорт-тарбиявий иш йўналишларига ҳужжат топширган.

  • Жорий йилдан бошлаб Ўзбекистон олий таълим муассасаларига ҳужжат топширишда ёшга доир чекловлар олиб ташланган.
  • ДТМ маълумотига кўра, жорий йилда Ўзбекистонда абитуриентларнинг энг ёши 14, энг каттаси 87 ёшда бўлган.
  • Мамлакат бўйича жами 60та олийгоҳ ва уларнинг 30та филиалига кириш учун 1 миллион 66 минг 925 нафар абитуриент рўйхатдан ўтказилган.
  • Ўтган йилга нисбатан 251 минг 973 нафар ёки 30,91 фоиз кўп ҳужжат топширилган.

Жорий йилги қабул жараёни ўтган йилларга нисбатан тартибсиз кўринишда ўтгани борасидаги кўплаб шикоятлар бўлди. Деярли барча олийгоҳлардаги қабул ур-йиқит, тўполонлар, турнақатор навбатлар билан ўтгани ҳақида Озодликка ўнлаб хабарлар келди. Бу ҳолатлар акс етган видео ва фото тасвирларни "Абитуриент кундалиги" жонли блоги орқали томоша қилишингиз мумкин.

Давомини ўқинг

XS
SM
MD
LG