Линклар

Шошилинч хабар
29 октябр 2020, Тошкент вақти: 07:20

Абитуриент кундалиги

Расман: Тест пайти информатикадан саволлар бўлмайди

2019/2020 ўқув йилида «Математика» фанидан бериладиган тест топшириқлари таркибида «Информатика» фанидан саволлар бўлмайди. Шу пайтгача рўйхатдан ўтган абитуриентларга берилган «Абитуриентнинг қайд варақаси»да «Математика (информатика билан)» деб ёзилган. Эндиликда «Математика» фанидан бериладиган тест топшириқларига «Информатика» фанидан саволлар қўшилмайди.

Жорий йил 4 июль кунги «Ўзбекистон Республикаси таълим муассасаларига ўқишга қабул қилиш бўйича Давлат комиссиясининг йиғилиши 1-сон баёни 12-иловасига мувофиқ «Ўзбекистон Республикаси олий таълим муассасалари таълим йўналишлари рўйхати ва тест бўйича уларга мувофиқ келувчи фанлар мажмуаси» тасдиқланди. Янги ўзгариш ушбу ҳужжатга мувофиқ белгиланган.

Кун янгиликлари

Қабул-2020: ҳужжат онлайн топширилади, 2 та фандан имтиҳон олинади, 5 та йўналиш учун танловда қатнашиш мумкин бўлади

Олий ўқув юртига кириш имтиҳони, 2017 йил

Президент қарори билан Олий ўқув юртларига бу йилги Қабул жараёни ва талабалар квоталари белгиланди.

Қарорга кўра, бу йил абитуриентлар Давлат хизматлари марказлари орқали ёки онлайн ҳужжат топшириши мумкин. Имтиҳонлар эса ижтимоий масофа сақланган ҳолда ўтказилиши айтилмоқда.

Кириш имтиҳонлар фақат 2 фандан бўлиши аввал маълум қилинган эди.

13 июнь куни президент Шавкат Мирзиёевнинг "2020-2021 ўқув йилида Ўзбекистон Республикасининг олий таълим муассасаларига ўқишга қабул қилишнинг давлат буюртмаси параметрлари тўғрисида"ги қарори эълон қилинди.

Қарорга асосан 2020-2021 ўқув йили учун Олий таълим муассасалари бакалавриат йўналишига ҳужжатлар 20 июндан 20 июлга қадар (20 июль куни ҳам) бўлган муддатда ўз ҳудудидан ёки онлайн тарзда:

- Давлат хизматлари марказлари орқали,

- Ягона интерактив давлат хизматлари портали орқали,

- Давлат тест марказининг расмий веб-сайти орқали қабул қилинади.

Тест синовлари ўтказиладиган биноларда ҳар бир абитуриент учун камида 3 кв.м жой ажратилади, уларнинг ниқоб, қўлқоп билан тестда иштирок этиши таъминланиши айтилмоқда.

Шунингдек, ушбу қарор билан абитуриентларга бакалавриат таълими учун 5 тагача йўналиш бўйича танловда қатнашиш имкони берилди.

Президент қарори билан 2020-2021 ўқув йили учун олий таълим муассасаларига қабул квоталари белгиланди.

Келгуси ўқув йилида Ўзбекистон олий таълим Бакалавриат йўналишида кундузги таълим учун 103 575 нафар талаба қабул қилинади.

Сиртқи бўлимларига 31 350 нафар, кечки бўлимларига 5 025 нафар, магистратурага эса 10 425 нафар талаба қабул қилинади.

Кириш имтиҳонлари эса танланган таълим йўналиши бўйича асосий 2 та фандан ўтказилади.

Спорт йўналиши бўйича олий таълим муддати президент қарори билан оптималлаштириладиган бўлди. Қарор билан “Спорт фаолияти (фаолият турлари бўйича)” бакалавриат таълим йўналиши бўйича ўқиш муддати уч йил этиб белгиланди.

Магистратура босқичи учун ҳужжатлар 1 июлдан 30 июлгача, Олий ва ўрта махсус таълим вазирлиги сайти орқали онлайн қабул қилинади.

Президент қарорида Фарғона вилоятининг Сўх туманидаги ёшлар учун ваъда қилинган қўшимча давлат гранти асосидаги 500та ўрин ҳам қайд этилди.

Шунингдек, хотин-қизларга қўшимча тўрт фоизли давлат гранти асосида квота ажратилади.

Маҳалла ва оилани қўллаб қувватлаш вазирлиги томонидан бериладиган тавсияномаси билан, хотин-қизлар бакалавриатнинг кундузги таълим бўлимида, қўшимча 4 фоизли давлат гранти асосида қабул қилинади.

Ўзини ўзи мояливий таъминлайдиган Олий таълим муассаларига эса, бу йилги ўқув йилидан, контракт тўлови қийматини белгилаш ҳуқуқи берилди.

Шунингдек, математика фанидан Магистратура босқичидаги таълим йўналишига давлат гранти бериладиган бўлди.

Кейинги ўқув йилидан эса, давлат фақат ўзи пулини тўлайдиган грант асосидаги талабалик ўрни учун квота белгилаши, контракт асосидаги талабалик ўрни учун таълим муассасаларининг ўзлари квота белгилаши кўзда тутилмоқда.

Абитуриент-2020: Онлайн қабул, хотин-қизлар квотаси, сўхликлар учун грант

Жорий йилги олийгоҳларга қабул жараёни карантин сабаб қатор ўзгаришлар билан ўтмоқда.

Ҳужжатларни 20 июндан 20 июлга қадар онлайн тарзда топшириш мумкин.

Кириш имтиҳонлари танланган таълим йўналиши бўйича асосий 2 та фандан ўтказилади.

Абитуриентларга бакалавриат таълими учун 5 тагача йўналиш бўйича танловда қатнашиш имкони берилди.

ОТМга кириш синовлари 1 августдан бошланади.

Жорий йилги қабул жараёнига оид янгиликларни "Абитуриент кундалиги" жонли блоги орқали биргаликда кузатамиз.

Бўлажак абитуриентлар ўзларини қизиқтираётган саволлар ёки қабул жараёнига оид хабарлари билан Озодликка мурожаат қилишлари мумкин.

Telegram, WhatsApp: +420 724 971 539; +420 724 740 755.

Электрон почтамиз: ozodlikmail@gmail.com.

Хориждаги абитуриент тестдан уч ҳафта олдин Ўзбекистонга келиши шарт

Кириш имтиҳонларида иштирок этиш учун хориждан туриб рўйхатдан онлайн ўтган абитуриентлар Ўзбекистонга тест синовлари бошланишидан камида уч ҳафта олдин келиши керак. Бу ҳақда 25 июнда АОКАда ўтган брифингда Давлат тест маркази бош бошқарма бошлиғи Барно Ражабов билдирди.

Хориждан камида уч ҳафта олдин келган абитуриент коронавирус пандемияси муносабати билан жорий қилинган карантин талабларини тўлиқ бажарганидан сўнг, Санитария-эпидемиология ва осойишталик агентлиги тақдим этган хулосалари асосида тест синовларига киритилади.

Расмийнинг билдиришича, имтиҳонларда абитуриентларнинг ота-оналари учун алоҳида кутиш ёки тўпланиш жойлари ташкил қилинмайди, улар барча бинолардаги тест синовларини test2020.uz сайти орқали онлайн кузатиб боришлари мумкин.​

Иситмаси бор абитуриентлар тестга киритилмайди

Олийгоҳларга кириш имтиҳонига тана ҳарорати 37 даражадан юқори бўлган абитуриентлар киритилмайди. Бу ҳақда АОКАда ўтказилган брифингда маълум қилинди.

Билдирилишича, тана ҳарорати 37 даражадан юқорилиги аниқланган абитуриент тест синовларига киритилмайди. Унга нисбатан Санитария-эпидемиология ва осойишталик агентлиги масъул ходимлари ва Давлат тест маркази вакили иштирокида далолатнома тузилади ва тиббий текширувдан ўтказилади.

Текширувда коронавирус аниқланмаган абитуриентлар учун республика бўйича тест синовлари тўлиқ якунлангандан сўнг тўртинчи куни тест синовлари ўтказилади.

Тест синовлари якунлангандан 4 кун ўтгач ўтказиладиган имтиҳонларда ҳам абитуриентда тана ҳароратининг юқорилиги аниқланса, у имтиҳонда иштирок эта олмайди.

2020/2021 ўқув йили қабулида тест синовларини ҳар бир абитуриент учун биноларда 3 квадрат метрдан кам бўлмаган жой ажратиб, қоида тариқасида, бир кунда икки ёки уч сменада ўтказиш режалаштирилмоқда.

Хотин-қизлар учун 940та квота

Янги ўқув йилида хотин-қизлар учун ОТМлар бакалавриатнинг кундузги таълим шаклига қўшимча 940 та квота ажратилди.

Олий ва ўрта махсус таълим вазирлиги хабарига кўра, хотин-қизлар учун тўрт фоизли қўшимча давлат гранти асосидаги қабул кўрсаткичларининг ҳудудлар кесимидаги тақсимоти тасдиқланган.

Ижодий имтиҳонларни ўтказиш тартиби белгиланди

Олий ва ўрта махсус таълим вазирлиги маълумотига кўра, жорий йилда ҳужжат топширган абитуриентлар учун касбий (ижодий) имтиҳонларни ўтказиш тартиби белгиланди:

  • касбий (ижодий) имтиҳонлар дастурларини бакалавриат таълим йўналишлари хусусиятидан келиб чиқиб соддалаштирилади;
  • абитуриент касбий (ижодий) имтиҳон учун бир марта келади ва ортиқча вақт сарфламасдан топшириши таъминланади;
  • тест синовлари билан бир қаторда ўтказиладиган касбий (ижодий) имтиҳонлар жорий йилнинг 25 июлгача ўтказилади;
  • алоҳида иқтидор талаб этиладиган таълим йўналишлари кириш имтиҳонларини 25 июлдан 20 августгача ўтказилади;
  • касбий (ижодий) имтиҳонлар видеокузатувлар орқали қатъий назорат қилинади ва интернетда жамоатчилик кузатуви таъминланади.

Парламент депутати ОТМга киришдаги ўринсиз имтиёзларни танқид қилди

Ўзбекистон Конституциясида барча фуқаролар тенг ҳуқуққа эга эканлиги белгиланган. Демак, ота-онаси қаерда хизмат қилиши ёки фуқаронинг айрим ютуқларга эга бўлиши Конституцияда белгиланган меъёрдан устун қўйилиши мумкин эмас. Бу ҳақда Олий Мажлис Қонунчилик палатаси депутати, ЎзХДП фракцияси аъзоси Мақсуда Ворисованинг Ўзбекистон Халқ демократик партияси сайтида ёйинланган мақоласида айтилган.

Ворисова айрим абитуриентларга олий таълим муассасаларига киришда турли имтиёзлар берилишини савол остига олган.

Муаллифга кўра, нима учундир мактабни аъло баҳоларга битириб, олтин медаль соҳиби бўлган абитуриентга ҳеч қанақа имтиёз йўқ, лекин республика фан олимпиадалари ғолибларига имтиёз белгиланган. Депутат Зулфия номидаги давлат мукофоти соҳибалари учун олий таълимга имтиҳонсиз кириш имтиёзи берилгани юзасидан ҳам таажжуб изҳор қилган.

“Мудофаа ва ҳуқуқ-тартибот идоралари тизимидаги ходимлар фарзандлари учун белгиланган имтиёзни ҳам тушуниш қийин. Шундоғам бу тизимлардаги ходимлар катта имтиёзларга эга. Энди уларнинг ҳисобидан фарзандларига ҳам имтиёз берилиши қанчалик ижтимоий адолат тамойилига тўғри келади? Айтайлик, оддий деҳқон ёки боғбоннинг ўқишни дунёдаги ҳамма нарсадан кўпроқ истайдиган қора кўз фарзанди кимларгадир имтиёз берилгани учунгина “йиқилса”, жамият, сиз билан биз унга адолатсизлик қилган бўлмаймизми? Бундай фарзандларнинг қалби синмайдими? Дили оғримайдими?..” дея савол ташлайди Мақсуда Ворисова.

Депутатнинг фикрича, қаерда ўринсиз имтиёз яратилса, ўша жойда коррупция, деган балога кенг эшик очилади.

“Шунинг учун ҳам узоқ ҳаёт йўлининг бошида турган фарзандларимизни коррупция оғуси билан суғормайлик, бошқаларини эса адолатсизлик билан ҳаётдан норози қилмайлик”, дея хулоса қилади мақола муаллифи.

Кириш имтиҳонини топшираётган фарзандларини ташқарида кузатиб ўтирган ота-оналар (архив сурати).
Кириш имтиҳонини топшираётган фарзандларини ташқарида кузатиб ўтирган ота-оналар (архив сурати).

Ўзбек расмийлари қўшни давлатлардаги ўқиш тавсия қилинмайдиган ОТМлар номини очиқлади

Қирғизистон ва Тожикистондаги айрим олий таълим муассасаларининг таълим сифати Ўзбекистоннинг меҳнат бозори талаб даражасига мос эмас. Бу ҳақда Вазирлар Маҳкамаси ҳузуридаги Таълим сифатини назорат қилиш давлат инспекцияси томонидан ҳозирланган “Қўшни давлатлардаги олий таълим ташкилотларининг таълим сифати даражасини аниқлаш бўйича тавсия”да айтилган.

Инспекция мазкур тавсия қўшни давлатлардаги олий таълим ташкилотларида таълим бериш жараёнини турли ахборот манбалари ҳамда Ўзбекистонда хорижий давлатларда таълим олганлик бўйича синовлар натижаларини таҳлилий ўрганиб чиқиш асосида тайёрланганини қайд этади.

Ўзбек расмийларига кўра, таълим сифати талаб даражасида бўлмаган ОТМлар сирасига Қирғизистондаги Марказий Осиё халқаро университети, Қирғиз-Ўзбек университети, Халқаро тиббиёт олий мактаби, Боткен давлат университетининг Қизил-Қия гуманитар-педагогика университети, Ўш гуманитар-педагогика институти, Жалолобод давлат университети, Ўш давлат юридик институти, Майлуу-Суу иқтисодиёт ва бошқарув институти, шунингдек, Тожикистондаги Хўжанд давлат университети, Тожикистон очиқ университети, Тожикистон давлат педагогика университети, Тожикистон тадбиркорлик ва сервис институти, Тожикистон солиқ ва ҳуқуқ институти, Тожикистон давлат тиллар институти, Қўрғонтепа давлат университети, Тожикистон давлат ҳуқуқ, бизнес ва сиёсат университети кабилар киритилган.

“Исталмаган университет ва институтлар” қаторида Қозоғистондаги конкрет ОТМ номи қайд этилмаган бўлса-да, бу мамлакатдаги “айрим рейтинг кўрсаткичи юқори ОТМлар ўзбекистонлик ёшларни имтиҳонсиз қабул қилиши, ўқишларни масофадан ташкил этиши, буни сиртқи деб номлаши орқали одамларни чалғитиши натижасида таълим сифати таъминланмаётганлиги ҳолатлари ҳам кузатилаётгани” таъкидланади.

Баён якунида Таълим сифатини назорат қилиш давлат инспекцияси ўзбекистонликларга хорижий давлатларда таълим олишда энг аввало сифатли таълим берадиган, миллий ва халқаро тан олинган ташкилотлар рейтингида юқори ўринларда бўлган олий таълим ташкилотларида таълим олишларини тавсия этган.

Зеро, келажакда юқори малакали кадр бўлиб етишиш, республикамиз меҳнат бозорида ўз ўрнига эга бўлиш учун таълим сифати юқори бўлган таълим ташкилотларида таҳсил олиниши мақсадга мувофиқдир”, дейилади тавсияномада.

Ўзбек расмийлари "таълим сифати талаб даражасига мос эмас" деб топган Ўш давлат юридик институти биноси.
Ўзбек расмийлари "таълим сифати талаб даражасига мос эмас" деб топган Ўш давлат юридик институти биноси.

Тошкентда яна бир университет ташкил этилди

Вазирлар маҳкамасининг 23 июндаги 404-сон қарорига асосан “Tashkent International University of Education” халқаро университети ташкил этилди. Бу ҳақда Адлия вазирлиги маълум қилди.

Мазкур университет масъулияти чекланган жамият шаклидаги нодавлат олий таълим ташкилоти ҳисобланади. Университетда ўқиш тўлов-контракт асосида амалга оширилади. Кадрлар тайёрлаш кундузги, сиртқи, кечки, махсус сиртқи ва масофавий таълим шакллари бўйича ўзбек, инглиз ҳамда бошқа тилларда амалга оширилади.

Адлия вазирлигининг билдиришича, университетнинг магистратурасини битирганлар Халқ таълим вазирлиги ҳамда Вазирлар Маҳкамаси ҳузуридаги Президент, ижод ва ихтисослаштирилган мактабларни ривожлантириш агентлигининг раҳбар кадрлари захирасига киритилади.

Бундан ташқари, Халқ таълими вазирлигига истисно тариқасида университет фаолиятини йўлга қўйиш учун энг яхши шартларни таклиф этган потенциал инвесторни танлаш ҳамда инвестициявий ва ижтимоий мажбурият шартларини белгилаш ҳуқуқи берилди.​

Ўзбекистондаги университетлардан бири.
Ўзбекистондаги университетлардан бири.

ОТМга кириш синовлари 1 августдан бошланади

Ўзбекистонда олий таълим муассасаларига кириш синовлари 1 августдан бошланиши мумкин. Бу ҳақда Бош вазирнинг ижтимоий ривожлантириш масалалари бўйича ўринбосари Беҳзод Мусаев 15 июнь куни АОКАда 2020/2021 ўқув йили қабул жараёнини ташкил этиш юзасидан долзарб вазифаларга бағишланиб ўтказилган брифингда маълум қилган.

Б. Мусаев даставвал расмийлар тест синовларини 5 августдан бошлашни режалаганлари, кейинчалик бор имкониятларни ишга солиб, тест санасини 1 августга кўчиришга қарор қилганларини билдирган.

Ўзбекистонда ОТМга кириш учун тест синовлари ҳар йили одатда 1 августдан бошланади.

Спорт йўналишида ўқиш 3 йилга туширилди

Спорт йўналиши бўйича олий таълим муддати президент қарори билан оптималлаштириладиган бўлди.

Бу ҳақда “2020/2021 ўқув йилида Ўзбекистон Республикасининг олий таълим муассасаларига ўқишга қабул қилишнинг давлат буюртмаси параметрлари тўғрисида”ги президент қарорида қайд қилинган

Қарорга кўра, “Спорт фаолияти (фаолият турлари бўйича)” бакалавриат таълим йўналиши бўйича ўқиш муддати уч йил этиб белгиланди.​

Сўхлик ёшлар учун 500 ўрин ва бу йилги бошқа грантлар

Президент қарорида Фарғона вилоятининг Сўх туманидаги ёшлар учун ваъда қилинган қўшимча давлат гранти асосидаги 500та ўрин ҳам қайд этилди.

Шунингдек, хотин-қизларга қўшимча тўрт фоизли давлат гранти асосида квота ажратилади.

Маҳалла ва оилани қўллаб қувватлаш вазирлиги томонидан бериладиган тавсияномаси билан, хотин-қизлар бакалавриатнинг кундузги таълим бўлимида, қўшимча 4 фоизли давлат гранти асосида қабул қилинади.

Ўзини ўзи мояливий таъминлайдиган Олий таълим муассаларига эса, бу йилги ўқув йилидан, контракт тўлови қийматини белгилаш ҳуқуқи берилди.

Шунингдек, математика фанидан Магистратура босқичидаги таълим йўналишига давлат гранти бериладиган бўлди.

Кейинги ўқув йилидан эса, давлат фақат ўзи пулини тўлайдиган грант асосидаги талабалик ўрни учун квота белгилаши, контракт асосидаги талабалик ўрни учун таълим муассасаларининг ўзлари квота белгилаши кўзда тутилмоқда.

Абитуриентга 5та йўналиш бўйича танловда қатнашиш ҳуқуқи берилди

Жорий йил абитуриентларга бакалавриат таълими учун 5 тагача йўналиш бўйича танловда қатнашиш имкони берилди.

Ўтган йили абитуриентларга бакалавриат йўналиши бўйича бир вақтнинг ўзида 3та олийгоҳга ҳужжат топширишга рухсат берилганди.

Президент қарори билан 2020-2021 ўқув йили учун олий таълим муассасаларига қабул квоталари белгиланди.

Келгуси ўқув йилида Ўзбекистон олий таълим Бакалавриат йўналишида кундузги таълим учун 103 575 нафар талаба қабул қилинади.

Сиртқи бўлимларига 31 350 нафар, кечки бўлимларига 5 025 нафар, магистратурага эса 10 425 нафар талаба қабул қилинади.

Кириш имтиҳонлари эса танланган таълим йўналиши бўйича асосий 2 та фандан ўтказилади.

Магистратура босқичи учун ҳужжатлар 1 июлдан 30 июлгача, Олий ва ўрта махсус таълим вазирлиги сайти орқали онлайн қабул қилинади.

Cўхлик ёшлар ОТМга киришда ўз она тиллари – тожик тилида имтиҳон топширади

Сўхлик ёшлар эндиликда олий ўқув юртларига қабул қилинаётганида ўз она тиллари – тожик тилида имтиҳон топшириш имкониятига эга бўлади. Бу ҳақда 3 июнь куни бош вазир Абдулла Арипов раҳбарлигида Сўх тумани ҳокимлигида бўлиб ўтган йиғилишда билдирилган.

Сўх туман ҳокимлиги ахборот хизмати маълумотига кўра, кечаги йиғилишда эксклавда олий маълумотли кадрлар етишмовчилиги ҳақида ҳам сўз юритилган ва Тошкентдан келган расмийлар томонидан Республика раҳбари сўхлик ёшларнинг олий ўқув юртларига қабул қилиниши учун 500 та квота ажратажаги билдирилган.

Шунингдек, туманда яқин келажакда таълим соҳасидаги бошқа муаммолар ҳам тўлиқ бартараф этилиб, янги мактаб ва қўшимча бинолар қурилиши режалаштирилган.

Ҳужжат қабул қилиш бошланди

Қарорга асосан 2020-2021 ўқув йили учун Олий таълим муассасалари бакалавриат йўналишига ҳужжатлар 20 июндан 20 июлга қадар (20 июль куни ҳам) бўлган муддатда ўз ҳудудидан ёки онлайн тарзда:

- Давлат хизматлари марказлари орқали,

- Ягона интерактив давлат хизматлари портали орқали,

- Давлат тест марказининг расмий веб-сайти орқали қабул қилинади.

Тест синовлари ўтказиладиган биноларда ҳар бир абитуриент учун камида 3 кв.м жой ажратилади, уларнинг ниқоб, қўлқоп билан тестда иштирок этиши таъминланиши айтилмоқда.​

Бу ҳақда президент Шавкат Мирзиёевнинг "2020-2021 ўқув йилида Ўзбекистон Республикасининг олий таълим муассасаларига ўқишга қабул қилишнинг давлат буюртмаси параметрлари тўғрисида"ги қарорида қайд қилинган.

Тошкентда Туркия иқтисодиёт ва технология университети филиали очилади

Тошкент давлат иқтисодиёт университети базасида Туркия иқтисодиёт ва технология университетининг филиали ташкил этилади. Бу ҳақда Олий ва ўрта махсус таълим вазирлиги ўз Телеграм-канали орқали маълумот тарқатди.

Қайд этилишича, жорий йил 4-7 март кунлари Ўзбекистон делегацияси Туркия иқтисодиёт ва технология университетига ташриф буюриб, мазкур олий таълим муассасасининг Тошкент шаҳридаги филиалини очиш юзасидан ҳамкорлик келишуви имзоланган.

Келишувга кўра, Туркия иқтисодиёт ва технологиялар университети ҳамда Тошкент давлат иқтисодиёт университети ўртасида кадрлар тайёрлаш, олий таълим соҳасида ҳамкорликни ривожлантириш, электрон ва масофавий таълим технологияларини қўллаган ҳолда инглиз тилида ўқитишни йўлга қўйиш каби вазифалар белгилаб олинган.

Ушбу масала юзасидан икки мамлакат масъуллари ўртасида ўтказилган онлайн конференцияда ТОВВ ЕТU (Туркия иқтисодиёт ва технология университети) бренди, веб-сайти, платформа ва бошқа материаллардан университетнинг Тошкент шаҳридаги филиалини ривожлантириш учун фойдаланиш, қолаверса ТОВВ ЕТU дипломини бериш, талабаларнинг қабул қилиш шартлари ва муддатларини келишиш ва кутубхона фондини, шунингдек таълим соҳасидаги ўқув, илмий ва услубий қўлланмаларни шакллантиришга кўмаклашиш каби ишларни тезкор амалга оширилиш масалалари муҳокама қилинган ва мазкур масалалар бўйича ижобий тўхтамга келинган.

Айни пайтда анжуманда филиалга 2020/2021 ўқув йилидан бошлаб талабаларни қабул қилиш, таълим жараёнларини тўлақонли жорий этиш ҳамда шу соҳага Туркиянинг етакчи ўқитувчи-профессорларини жалб қилишга ҳам келишиб олинган.

Тошкентда Туркия иқтисодиёт ва технология университети филиалини ташкил этиш қарори Ўзбекистон президенти Ш.Мирзиёевнинг жорий йил февраль ойида Туркияга ташрифи чоғида олинган.
Тошкентда Туркия иқтисодиёт ва технология университети филиалини ташкил этиш қарори Ўзбекистон президенти Ш.Мирзиёевнинг жорий йил февраль ойида Туркияга ташрифи чоғида олинган.

Қўшни давлат университетларидан Ўзбекистонга қайтган талабалар ўқишсиз қолганидан хавотирда

Ўзбекистон Олий ва ўрта махсус таълим вазирининг февраль ойидаги буйруғи асосида ўқишларини қўшни давлатлардан ўз юртига кўчириш учун ватанига қайтиб келган баъзи ўзбекистонлик талабалар ўқишга қабул билан боғлиқ муаммолар қаршисида қолган.

Қозоғистон, Қирғизистон ва Тожикистоннинг олий ўқув юртларидаги ўқишини ташлаб ўз юртига қайтиб келган талабалар Озодлик билан суҳбатда ўз вилоятларидаги олийгоҳлар уларни ўқишга қабул қилмаётгани, оқибатда уч ой ўқишсиз қолиб кетганларини айтди.

Олий ўқув юртлари мутасаддиларига кўра, қайтиб келган талабаларни ўқишга қабул қилиш, уларнинг ҳужжатларини текшириш Ўзбекистон ва қўшни давлатлардаги коронавирус билан боғлиқ вазият туфайли чўзилмоқда.

Шу йилнинг 7 февралидан Ўзбекистондаги олийгоҳлар Қозоғистон, Қирғизистон ва Тожикистоннинг олий ўқув юртларида ўқиётган ўзбекистонлик талабалардан ўқишини кўчириш бўйича аризаларни қабул қила бошлаган эди.

Ҳужжатларни қабул қилиш 15 мартгача қабул қилиниши, ўқишни кўчиришда ҳеч қандай қўшимча талаблар ва синовлар ҳамда бюрократик муаммолар бўлмаслиги ваъда қилинган эди.

Абитуриент нечта олийгоҳга ҳужжат топшириши мумкин?

Ўтган йили абитуриентларга бакалавриат йўналиши бўйича бир вақтнинг ўзида 3та олийгоҳга ҳужжат топширишга рухсат берилганди. Хўш, бу йил ҳам бу тартиб сақланиб қолдими?

Озодликнинг бу саволига жавоб берган ДТМ ходими жорий йилда ҳам абитуриентлар бир пайтнинг ўзида 3та олийгоҳга ҳужжат топширишлари мумкинлигини айтди:

"Абитуриентлар худди ўтган йилдаги каби бу йил ҳам бир вақтнинг ўзида учта таълим йўналиши бўйича танловда иштирок этиши мумкин. Бироқ бунда бир қанча шартлар мавжуд яъни тест синови топшириладиган фанлар мажмуаси бир хил бўлиши шарт. Бундан ташқари таълим шакли ва таълим тили ҳам бир хилда бўлиши лозим. Абитуриент 3та олийгоҳнинг кундузги ва сиртқи бўлимидан фақат биттасини танлаши лозим. Яъни 3та олийгоҳда ҳам фақат кундузги ёки фақат сиртқи бўлимлар танланиши лозим. Тил масаласи ҳам худди шундай - 3та олийгоҳда ҳам фақат битта тилдаги йўналишлар танланиши лозим".

Тест синовлари қай кўринишда ўтади?

ДТМнинг хабар қилишича, жорий йилда тест синовлари ўтказиладиган биноларда кўпи билан 700 тагача ўрин тайёрланади, ҳар бир абитуриент учун камида 3 кв.м жой ажратилади, санитария-гигиена талабларига биноан, уларда ниқоб, қўлқоп билан тестда иштирок этиши таъминланади.

Абитуриентнинг тана ҳарорати ўлчангач, бинога киритилади. Бинолар камида 4 маротаба дезинфекция қилинади.

ДТМга кўра, буларнинг бари тест топширувчилар, гуруҳ назоратчилари ва жараёнга жалб этилган бошқа шахсларнинг саломатлигини ҳимоялаш мақсадида амалга оширилади.

Бу йилги кириш имтиҳонларида ўзгариш борми?

ДТМдан олинган маълумотга кўра, карантин сабаб жорий йилда кириш имтиҳонларига истисно тарзида ўзгариш киритилади.

Амалдаги тартибга кўра, кириш имтиҳонлари жами 5 та – учта мажбурий ва иккита мутахассислик фани бўйича ўтказилиши белгиланган.

ДТМ коронавирус билан боғлиқ вазиятни инобатга олиб, тест синовларини мажбурий фанларсиз, 2 та мутахассислик фанлари асосида ўтказишни режалаштирмоқда.

Карантин сабаб қабул жараёнида ўзгариш бўладими?

2020/2021 ўқув йили учун абитуриентлардан ҳужжат қабул қилиш онлайн кўринишда бўлиши мумкин.

Бу ҳақда 30 апрель куни президент Шавкат Мирзиёев иштирокидаги олий таълимга бағишланган йиғилиш пайти маълум қилинди.

Йиғилишда жорий йилда таълим муассасаларига масофадан, онлайн шаклда, интернет орқали ҳужжат топшириш имкониятини яратиш зарурлиги таъкидланди.

Бироқ ҳозирча бу жараённинг қай кўринишда бўлиши расман эълон қилинмади.

Олтин ва кумуш медаллар абитуриентга имтиёз берадими?

Озодликка йўлланган ушбу саволга жавоб излаш давомида қуйидагиларни аниқладик:

Мактаб битирувчилари орасидаги иқтидорли ёшларнинг олтин ва кумуш медал билан тақдирланиши уларнинг олий таълим муассасаларига киришида ҳеч қандай имтиёз бермайди.

Битирувчиларнинг олтин ёки кумуш медал билан тақдирланиш тартиби Вазирлар Маҳкамасининг “Умумий ўрта таълим муассасалари ва академик лицейларнинг иқтидорли битирувчиларини олтин ва кумуш медаллар билан тақдирлаш тартиби тўғрисидаги низомга асосан амалга оширилади.

ДТМдан олинган маълумога кўра,ушбу низомда олтин ва кумуш медаллар билан тақдирланган ўқувчиларга имтиёзлар берилиши кўзда тутилмагани сабаб медали бор абитуриентнинг олийгоҳга кириши учун ҳеч қандай имтиёз берилмайди. ​

Тиббиёт коллежлари Абу Али Ибн Сино номидаги техникумларга айлантирилади

2020/2021 ўқув йилидан бошлаб Ўзбекистондаги 47 та тиббиёт коллежи Абу Али ибн Сино номидаги Жамоат саломатлиги техникумлари этиб қайта ташкил этилади. Бу ҳақда Соғлиқни сақлаш вазирлиги 7 апрель куни билдирди.

Расмий билдирувда айтилишича, бу иш президентнинг “Тиббий-санитария соҳасида кадрларни тайёрлаш ва узлуксиз касбий ривожлантиришнинг мутлақо янги тизимини жорий этиш чора-тадбирлари тўғрисида”ги қарорига асосан амалга оширилади.

Мазкур техникумларда тиббий-санитария мутахассислари тайёрланади. Техникумларда валеология, тиббий психология, диетология, кинезиология, реабилитология каби фанлар ўқитилади.

“Яна бир аҳамиятли жиҳати, мазкур техникумларнинг муваффақиятли битирувчилари тиббиёт олий таълим муассасаларида имтиҳонсиз, суҳбат орқали бакалавриатнинг 2-курсидан ўқишни давом эттириш имкониятига эга бўлади”, дейилди хабарда.

Жами 47 тиббиёт коллежи энди техникум бўлади.
Жами 47 тиббиёт коллежи энди техникум бўлади.

Битирувчиларга аттестатлар бу йил электрон шаклда берилади

Ўзбекистонда 2019-2020 ўқув йилида мактабни битирганлар аттестатларни электрон (сканерланган) шаклда оладилар. Бу ҳақда Халқ таълими вазирлиги матбуот хизмати ўз Телеграм-канали орқали маълум қилди.

Хабарномада аттестатлар (шаҳодатномалар) карантин муддати тугагунга қадар таълим муассасаларида сақланиши, карантин якунланганидан сўнг эгаларига топширилиши айтилган, бироқ битирув имтиҳонлари қачон бўлиши ҳақида билдирилмаган.

Ўзбекистонда карантин тартиби жорий йил 16 мартидан жорий этилган. Республика комиссияси қарорига кўра, карантин муддати камида 1 июнгача давом этади.

Шарқшунослик институти университетга айлантирилади ва ўзини ўзи молиялашга ўтказилади

Тошкент давлат шарқшунослик институти университетга айлантирилади. Бу борада президент Шавкат Мирзиёев 16 апрель куни “Шарқшунослик соҳасида кадрлар тайёрлаш тизимини тубдан такомиллаштириш ва илмий салоҳиятни ошириш чора-тадбирлари тўғрисида”ги қарорни имзолади.

Қарорга асосан Тошкент давлат шарқшунослик университети ўзини ўзи молиялаштириш тизимига ўтказилади.

Қарорда Тошкент шаҳар ҳокимлигига 2021 йил 1 августга қадар Университетнинг янги 9 қаватли биноси ва спорт мажмуасини қуриш ва фойдаланишга топшириш кўрсатмаси берилди.

Шунингдек, 2020/2021 ўқув йилидан бошлаб Университетга ўқишга қабул қилишда шарқ тилларидан (турк, араб, форс, дари, ҳинд, урду, хитой, корейс, уйғур, япон тиллари) топшириладиган кўп балли тизим бўйича имтиҳонлар ўрнига тест синовлари ўтказилиши йўлга қўйилади.

Бундан ташқари “2021/2022 ўқув йилидан бошлаб ушбу тажрибани бошқа тиллар (испан, итальян, тожик, қозоқ, туркман, қирғиз тиллари ва бошқалар) бўйича республикадаги барча давлат олий таълим муассасаларига ўқишга қабул қилишда жорий этиш тўғрисидаги таклифларига розилик берилсин”, дейилади қарорда.

Давлат инспекцияси ёшларни Россия институтининг ёлғон тарғиботидан огоҳлантирди

Ўзбекистон Вазирлар Маҳкамаси ҳузуридаги Таълим сифатини назорат қилиш давлат инспекцияси Россиянинг Шарқий Европа институти Ўзбекистонда ноқонуний таълим фаолияти билан шуғулланаётганини қайд этиб, ёшларни дипломи тан олинмайдиган олий таълим муассасалари тарғиботига ишонмасликка чақирди.

Инспекцияга кўра, мазкур институт масофавий олий таълим хизматларини Ўзбекистонда белгиланган тартибда нодавлат таълим хизматлари кўрсатиш учун лицензия олмасдан Сурхондарё вилояти Термиз шаҳридаги 22-сонли мусиқа, санъат ва бахшичилик мактаби биносида таълим фаолияти билан шуғулланмоқда.

“Шунингдек, карантин сабабли юртимиздаги олий таълим муассасаларида таълим жараёнлари масофавий шаклда ташкил этилгани ниқоби остида кўплаб консалтинг ташкилотлари ўз рекламаларида “дипломи Ўзбекистонда тўғридан-тўғри тан олинади” каби асосланмаган маълумотлар билан масофадан таълим берадиган хорижий олий таълим муассасаларини тарғибот қилишмоқда”, дейилади инспекция хабарномасида.

Давлат инспекцияси Ўзбекистон Республикаси “Таълим тўғрисида”ги қонунида ишлаб чиқаришдан ажралган ва ажралмаган ҳолда (кундузги, сиртқи ҳамда кечки таълим шакллари кўзда тутилган) таълим олиш белгилангани, лекин масофавий таълим шакли ушбу қонун ҳужжатларида кўзда тутилмаганини эслатган. Бундан масофавий таълим шаклида ўқиб олинган ҳужжатлар Ўзбекистонда тан олинмаслиги келиб чиқади.

Инспекция ёшларга турли ташкилотлар ёки фуқаролар томонидан оммавий ахборот воситалари ва ижтимоий тармоқларда хорижий давлатларда масофавий таълим олиш бўйича кенг жамоатчиликка берилаётган рекламаларга ишонмасликни тавсия қилган.

Хива ва Наманганда шарқ тиллари бўйича техникумлар ташкил этилади

Шарқ тиллари соҳасида ўрта бўғин профессионал кадрларни тайёрлаш, шунингдек, истеъдодли ёшлар селекциясини амалга ошириш мақсадида Наманган ва Хива шаҳарларида шарқ тиллари бўйича техникумлар ташкил этилади.

Олий ва ўрта таълим вазирлиги Телеграм-канали маълумотига кўра, бу иш Ўзбекистон президенти томонидан 16 апрель куни қабул қилинган “Шарқшунослик соҳасида кадрлар тайёрлаш тизимини тубдан такомиллаштириш ва илмий салоҳиятни ошириш чора-тадбирлари тўғрисида”ги қарор асосида амалга оширилади.

Хабарномада вазирлик томонидан 2020 йил 1 августига қадар мазкур техникумларни шарқ тилларини ўқитишга мослаштириш, малакали педагог кадрлар билан тўлдириш ва моддий-техника базасини мустаҳкамлаш чоралари кўрилиши айтилган.

TEAM нодавлат университети ташкил этилди

Ўзбекистонда ҳукумат қарори билан TEAM университети ташкил этилди ва унинг асосий вазифалари белгиланди. Бу ҳақда Адлия вазирлигининг "Ҳуқуқий ахборот" Телеграм-канали маълумот тарқатди.

Университет тадбиркорлик ва бошқарув ҳамда бошқа соҳаларда юқори малакали олий маълумотли кадрларни тайёрлаш дохил қатор вазифаларни бажаради.

Маълумотларга кўра, университет “TEAM University” МЧЖ муассислигидаги устав фондида давлат улуши бўлмаган нодавлат олий таълим ташкилоти ҳисобланади. Бу ерда таълим жараёни инглиз, ўзбек ва бошқа тилларда ташкил этилиши, таълим фаолияти 2020/2021 ўқув йилидан бошланиши кутилмоқда.

Университетда таълим олиш тўлов-контракт асосида, шунингдек юридик шахслар – потенциал иш берувчилар тақдим этадиган таълим грантлари, ҳомийлик хайриялари ва бошқа манбалар ҳисобига амалга оширилади.

Уч вилоят марказидаги университетларда юридик факультетлар очилади

Самарқанд, Наманган ва Термиз давлат университетларида юридик факультетлар ташкил этилади ва “юриспруденция” йўналиши бўйича белгиланган тартибда шакллантириладиган ва тасдиқланадиган квоталар бўйича қабул, шу жумладан, табақалаштирилган тўлов контракт асосида қўшимча қабул амалга оширилади.

Бу ҳақда президент Ш. Мирзиёев томонидан 29 апрель куни имзоланган “Ўзбекистон Республикасида юридик таълим ва фанни тубдан такомиллаштириш бўйича қўшимча чора-тадбирлар тўғрисида”ги фармонда айтилади.

Фармонга мувофиқ, Тошкент давлат юридик университети “юриспруденция” мутахассислиги бўйича юридик кадрларни тайёрлаш, қайта тайёрлаш бўйича базавий олий таълим ва илмий-методик муассаса этиб белгиланган.

Ҳужжатда, шунингдек, давлат, ҳуқуқ ва сиёсий-ҳуқуқий фикр соҳасида фундаментал ва амалий тадқиқотларни амалга оширадиган Фанлар академиясининг Давлат ва ҳуқуқ институти ташкил этилиши қайд этилган.

Тошкентда янги ўқув йилидан Британия менежмент университети иш бошлайди

Ўзбекистон пойтахтида нодавлат таълим хизматларини кўрсатувчи Британия менежмент университети ташкил этилади. Бунга оид қарор, “Ҳуқуқий ахборот” канали маълумотига кўра, 2020 йил 8 май куни Вазирлар маҳкамаси томонидан қабул қилинган.

Университетда ўқитиш Ўзбекистонда амалда мавжуд таълим шакллари ҳамда инглиз тилида тўлов-контракт асосида амалга оширилиши кутилмоқда.

Университетда таълим фаолияти 2020/2021 ўқув йилидан бошланади ҳамда дастлабки босқичда бакалавриатга “Лойиҳаларни бошқариш”, “Логистика ва етказиб бериш занжирларини бошқариш”, “Тадбиркорлик ва инновациялар”, “Халқаро электрон тижорат” ва “Рақамли иқтисодиёт” каби таълим йўналишлари бўйича талабалар қабул қилинади.

Битирувчиларга Ўзбекистонда олий маълумот тўғрисидаги ҳужжат сифатида эътироф этиладиган белгиланган намунадаги диплом берилиши кўзда тутилган.

Битирувчиларга аттестатлар бу йил электрон шаклда берилади

Ўзбекистонда 2019-2020 ўқув йилида мактабни битирганлар аттестатларни электрон (сканерланган) шаклда оладилар. Бу ҳақда Халқ таълими вазирлиги матбуот хизмати ўз Телеграм-канали орқали маълум қилди.

Хабарномада аттестатлар (шаҳодатномалар) карантин муддати тугагунга қадар таълим муассасаларида сақланиши, карантин якунланганидан сўнг эгаларига топширилиши айтилган, бироқ битирув имтиҳонлари қачон бўлиши ҳақида билдирилмаган.

Ўзбекистонда карантин тартиби жорий йил 16 мартидан жорий этилган. Республика комиссияси қарорига кўра, карантин муддати камида 1 июнгача давом этади.

Тошкентда янги ўқув йилидан Британия менежмент университети иш бошлайди

Ўзбекистон пойтахтида нодавлат таълим хизматларини кўрсатувчи Британия менежмент университети ташкил этилади. Бунга оид қарор, “Ҳуқуқий ахборот” канали маълумотига кўра, 2020 йил 8 май куни Вазирлар маҳкамаси томонидан қабул қилинган.

Университетда ўқитиш Ўзбекистонда амалда мавжуд таълим шакллари ҳамда инглиз тилида тўлов-контракт асосида амалга оширилиши кутилмоқда.

Университетда таълим фаолияти 2020/2021 ўқув йилидан бошланади ҳамда дастлабки босқичдабакалавриатга “Лойиҳаларни бошқариш”, “Логистика ва етказиб бериш занжирларини бошқариш”, “Тадбиркорлик ва инновациялар”, “Халқаро электрон тижорат” ва “Рақамли иқтисодиёт” каби таълим йўналишлари бўйича талабалар қабул қилинади.

Битирувчиларга Ўзбекистонда олий маълумот тўғрисидаги ҳужжат сифатида эътироф этиладиган белгиланган намунадаги диплом берилиши кўзда тутилган.

Давлат инспекцияси ёшларни Россия институтининг ёлғон тарғиботидан огоҳлантирди

Иллюстратив сурат.

Вазирлар Маҳкамаси ҳузуридаги Таълим сифатини назорат қилиш давлат инспекцияси Россиянинг Шарқий Европа институти Ўзбекистонда ноқонуний таълим фаолияти билан шуғулланаётганини қайд этиб, ёшларни дипломи тан олинмайдиган олий таълим муассасалари тарғиботига ишонмасликка чақирди.

Инспекцияга кўра, мазкур институт масофавий олий таълим хизматларини Ўзбекистонда белгиланган тартибда нодавлат таълим хизматлари кўрсатиш учун лицензия олмасдан Сурхондарё вилояти Термиз шаҳридаги 22-сонли мусиқа, санъат ва бахшичилик мактаби биносида таълим фаолияти билан шуғулланмоқда.

“Шунингдек, карантин сабабли юртимиздаги олий таълим муассасаларида таълим жараёнлари масофавий шаклда ташкил этилгани ниқоби остида кўплаб консалтинг ташкилотлари ўз рекламаларида “дипломи Ўзбекистонда тўғридан-тўғри тан олинади” каби асосланмаган маълумотлар билан масофадан таълим берадиган хорижий олий таълим муассасаларини тарғибот қилишмоқда”, дейилади инспекция хабарномасида.

Давлат инспекцияси Ўзбекистон Республикаси “Таълим тўғрисида”ги қонунида ишлаб чиқаришдан ажралган ва ажралмаган ҳолда (кундузги, сиртқи ҳамда кечки таълим шакллари кўзда тутилган) таълим олиш белгилангани, лекин масофавий таълим шакли ушбу қонун ҳужжатларида кўзда тутилмаганини эслатган. Бундан масофавий таълим шаклида ўқиб олинган ҳужжатлар Ўзбекистонда тан олинмаслиги келиб чиқади.

Инспекция ёшларга турли ташкилотлар ёки фуқаролар томонидан оммавий ахборот воситалари ва ижтимоий тармоқларда хорижий давлатларда масофавий таълим олиш бўйича кенг жамоатчиликка берилаётган рекламаларга ишонмасликни тавсия қилган.

Уч вилоят марказидаги университетларда юридик факультетлар очилади

Президентнинг янги фармонига кўра, ТДЮУ юридик кадрларни тайёрлаш бўйича базавий олий таълим ва илмий-методик муассаса этиб белгиланган.

Самарқанд, Наманган ва Термиз давлат университетларида юридик факультетлар ташкил этилади ва “юриспруденция” йўналиши бўйича белгиланган тартибда шакллантириладиган ва тасдиқланадиган квоталар бўйича қабул, шу жумладан табақалаштирилган тўлов контракт асосида қўшимча қабул амалга оширилади.

Бу ҳақда президент Ш. Мирзиёев томонидан 29 апрель куни имзоланган “Ўзбекистон Республикасида юридик таълим ва фанни тубдан такомиллаштириш бўйича қўшимча чора-тадбирлар тўғрисида”ги фармонда айтилади.

Фармонга мувофиқ, Тошкент давлат юридик университети “юриспруденция” мутахассислиги бўйича юридик кадрларни тайёрлаш, қайта тайёрлаш бўйича базавий олий таълим ва илмий-методик муассаса этиб белгиланган.

Ҳужжатда, шунингдек, давлат, ҳуқуқ ва сиёсий-ҳуқуқий фикр соҳасида фундаментал ва амалий тадқиқотларни амалга оширадиган Фанлар академиясининг Давлат ва ҳуқуқ институти ташкил этилиши қайд этилган.

TEAM нодавлат университети ташкил этилди

Иллюстратив сурат.

Ўзбекистонда ҳукумат қарори билан TEAM университети ташкил этилди ва унинг асосий вазифалари белгиланди. Бу ҳақда Адлия вазирлигининг "Ҳуқуқий ахборот" Телеграм-канали маълумот тарқатди.

Университет тадбиркорлик ва бошқарув ҳамда бошқа соҳаларда юқори малакали олий маълумотли кадрларни тайёрлаш дохил қатор вазифаларни бажаради.

Маълумотларга кўра, университет “TEAM University” МЧЖ муассислигидаги устав фондида давлат улуши бўлмаган нодавлат олий таълим ташкилоти ҳисобланади. Бу ерда таълим жараёни инглиз, ўзбек ва бошқа тилларда ташкил этилиши, таълим фаолияти 2020/2021 ўқув йилидан бошланиши кутилмоқда.

Университетда таълим олиш тўлов-контракт асосида, шунингдек юридик шахслар – потенциал иш берувчилар тақдим этадиган таълим грантлари, ҳомийлик хайриялари ва бошқа манбалар ҳисобига амалга оширилади.

Хива ва Наманганда шарқ тиллари бўйича техникумлар ташкил этилади

Хива манзараси.

Шарқ тиллари соҳасида ўрта бўғин профессионал кадрларни тайёрлаш, шунингдек, истеъдодли ёшлар селекциясини амалга ошириш мақсадида Наманган ва Хива шаҳарларида шарқ тиллари бўйича техникумлар ташкил этилади.

Олий ва ўрта таълим вазирлиги Телеграм-канали маълумотига кўра, бу иш Ўзбекистон президенти томонидан 16 апрель куни қабул қилинган “Шарқшунослик соҳасида кадрлар тайёрлаш тизимини тубдан такомиллаштириш ва илмий салоҳиятни ошириш чора-тадбирлари тўғрисида”ги қарор асосида амалга оширилади.

Хабарномада вазирлик томонидан 2020 йил 1 августига қадар мазкур техникумларни шарқ тилларини ўқитишга мослаштириш, малакали педагог кадрлар билан тўлдириш ва моддий-техника базасини мустаҳкамлаш чоралари кўрилиши айтилган.

Аввалроқ Озодлик президентнинг юқорида зикр этилган қарори билан Тошкентдаги Шарқшунослик институти университетга айлантирилиши ҳақида хабар қилган эди.

Шарқшунослик институти университетга айлантирилади ва ўзини ўзи молиялашга ўтказилади

Университетнинг янги 9 қаватли биноси қурилади.

Тошкент давлат шарқшунослик институти университетга айлантирилади. Бу борада президент Шавкат Мирзиёев 16 апрель куни “Шарқшунослик соҳасида кадрлар тайёрлаш тизимини тубдан такомиллаштириш ва илмий салоҳиятни ошириш чора-тадбирлари тўғрисида”ги қарорни имзолади.

Қарорга асосан Тошкент давлат шарқшунослик университети ўзини ўзи молиялаштириш тизимига ўтказилади.

Қарорда Тошкент шаҳар ҳокимлигига 2021 йил 1 августга қадар Университетнинг янги 9 қаватли биноси ва спорт мажмуасини қуриш ва фойдаланишга топшириш кўрсатмаси берилди.

Шунингдек, 2020/2021 ўқув йилидан бошлаб Университетга ўқишга қабул қилишда шарқ тилларидан (турк, араб, форс, дари, ҳинд, урду, хитой, корейс, уйғур, япон тиллари) топшириладиган кўп балли тизим бўйича имтиҳонлар ўрнига тест синовлари ўтказилиши йўлга қўйилади.

Бундан ташқари “2021/2022 ўқув йилидан бошлаб ушбу тажрибани бошқа тиллар (испан, итальян, тожик, қозоқ, туркман, қирғиз тиллари ва бошқалар) бўйича республикадаги барча давлат олий таълим муассасаларига ўқишга қабул қилишда жорий этиш тўғрисидаги таклифларига розилик берилсин”, дейилади қарорда.

Тиббиёт коллежлари Абу Али Ибн Сино номидаги техникумларга айлантирилади

Жами 47 тиббиёт коллежи энди техникум бўлади.

2020/2021 ўқув йилидан бошлаб Ўзбекистондаги 47 та тиббиёт коллежи Абу Али ибн Сино номидаги Жамоат саломатлиги техникумлари этиб қайта ташкил этилади. Бу ҳақда Соғлиқни сақлаш вазирлиги 7 апрель куни билдирди.

Расмий билдирувда айтилишича, бу иш президентнинг “Тиббий-санитария соҳасида кадрларни тайёрлаш ва узлуксиз касбий ривожлантиришнинг мутлақо янги тизимини жорий этиш чора-тадбирлари тўғрисида”ги қарорига асосан амалга оширилади.

Мазкур техникумларда тиббий-санитария мутахассислари тайёрланади. Техникумларда валеология, тиббий психология, диетология, кинезиология, реабилитология каби фанлар ўқитилади.

“Яна бир аҳамиятли жиҳати, мазкур техникумларнинг муваффақиятли битирувчилари тиббиёт олий таълим муассасаларида имтиҳонсиз, суҳбат орқали бакалавриатнинг 2-курсидан ўқишни давом эттириш имкониятига эга бўлади”, дейилди хабарда.

Андижон Аграр университети талабалари ётоқхона етишмаслиги сабаб кўчада қолди

Аграр университети раҳбарияти талабаларга ётоқхонада "реконструкция ишлари тугагунча бошқа жойда яшаб туринглар", деб айтган. 

Тошкент давлат Аграр университетининг Андижон филиалининг вилоятлардан келган юзлаб талабаси ётоқхона берилмагани боис кўчада қолди.

Университетнинг талабаларни ётоқхоналар билан таъминлаш бўйича масъулига кўра, бу йил бошқа вилоятлардан ўқишга талаба кўп қабул қилингани боис ётоқхонада жой етишмовчилиги юзага келган.

Айни пайтда масъул ётоқхонада қўшимча таъмирлаш ишлари кетаётгани ва талабаларни ётоқхона билан таъминлаш ҳаракатлари бўлаётганини таъкидлади.

Тошкент давлат Аграр университетининг Андижон филиали талабаларининг Озодликка йўллаган мурожаатига кўра, ўқув масканида вилоятдан келган ва ётоқхонага муҳтож бўлган талабаларга билим юрти раҳбарияти "ётоқхона таъмирланяпти, икки ҳафта бошқа жойда амаллаб туринглар" деб айтган.

Исми сир қолиши шарти билан Озодликка гапирган талаба ётоқхона берилмагани боис кўчада қолганини айтди:

- Борадиган жойим ҳам, бирор танишим ёки қариндошим ҳам йўқ. Ётоқхона беришларига умид қилиб келган эдим

- Борадиган жойим ҳам, бирор танишим ёки қариндошим ҳам йўқ. Ётоқхона беришларига умид қилиб келган эдим. Кўчада қолдим. Кейин бирга ўқийдиган курсдошим вақтинча уйига олиб кетди, - дейди талаба.

Озодлик суҳбатлашган бошқа талаба ётоқхона берилмагани сабаб меҳмонхонада туришга мажбур бўлаётганини айтди:

- Ижарага турай десам вақтинча олишмас экан. Меҳмонхонага жойлашдим, ётоқхона беришса кейин кўчаман. Контракт асосида ўқийман,оиламиз ўртаҳол, лекин нима қилайлик, - дейди талаба.

Талабалар ётоқхонасиз қолганидан уларнинг ота-оналари хавотир олишмоқда.

- Ҳозирги ҳар-хил ғоялар хавф солиб турган пайтда талабаларни ётоқхонасиз сарсон бўлиб юриши, айниқса қизлар учун хавфли эмасми? Ётоқхонада назорат бор. Уларнинг ўз ҳолича қўйиб қўйилиши ақлга сиғмайди. Юрак ҳовучлаб ўтирибмиз. Ахир биз улар бориши билан ётоқхона беришади, деган умид билан ўқишга жўнатганмиз, - дейди бу йил Андижон шаҳридаги Аграр университетига қабул қилинган талабанинг отаси аноним қолиш шарти билан.

Андижон Аграр университетининг талабаларни ётоқхоналар билан таъминлаш бўйича масъул ходими Озодликка бу йил аввалги йилларга нисбатан чекка вилоятлардан ўқишга талаба кўпроқ қабул қилингани боис ётоқхонага талабгор ортгани, лекин таъмирлаш тугаши билан барча талабаларга узоқ-яқинига қараб ётоқхона берилишини айтди.

Бу йил чекка вилоятлардан ўқишга кўп киришган. Хоразм, Қорақалпоғистондан ҳам бор талабалар. Бирор жойга жойлашиб туринглар деб айтилган. Ҳозир аризаларни қабул қиляпмиз

- Реконструкция бўляпти, яна 10 кун чўзилади, деб уларга айтилган эди. Бу йил чекка вилоятлардан ўқишга кўп киришган. Хоразм, Қорақалпоғистондан ҳам бор талабалар. Бирор жойга жойлашиб туринглар деб айтилган. Ҳозир аризаларни қабул қиляпмиз. Талабаларни узоқ-яқинига қараб ётоқхона берамиз. 2 минг атрофида талабани ётоқхонага жойлаштира оламиз, - деди университет масъули.

Университет сайтидаги маълумотга кўра, олийгоҳда жами 2307 нафар талаба таҳсил олади.

Нега Андижон шаҳридаги Аграр университетида ётоқхона таъмири ўқиш бошланадиган кунга қадар тугалланмади?

Бу саволни университет масъули жавобсиз қолдирди.

Ўзбекистон Олий ва ўрта махсус таълим вазирлигининг 2006 йил 17 январида қабул қилинган “Талаба ва ўқувчиларни турар жой билан таъминлаш” тўғрисидаги 11-сонли буйруғи асосида мамлакатдаги олий ўқув юртлари ўқишга қабул қилинган талабаларни ётоқхона билан таъминлаши керак.

Ҳар бир олийгоҳ раҳбарияти зиммасига ётоқхонага жойлаштирилган талабани ётоқ анжомлари билан таъминлаш, талабанинг яшаши учун барча шароитлар, жумладан, иситиш системалари, иссиқ-совуқ сув, газ ва ёруғлик билан таъминлаш вазифалари ҳам юклатилган.

Ўзбекистон Олий ва ўрта махсус таълим вазирлигидаги Озодлик манбасига кўра, ҳозир Тошкентдаги олийгоҳлар ётоқхонага эҳтиёжи бор талабаларнинг 25-30 фоизинигина турар жой билан таъминлашга қодир.

Сирдарёлик абитуриент: Вилоятимизга ажратилган квоталарни бошқа вилоятликлар эгаллаб олмоқда (ВИДЕО)

(Иллюстратив фото)

Ўзбекистоннинг тиббиёт олий ўқув юртларига қабул қилиш учун вилоятларга ажратилган мақсадли қабул квоталари бўйича берилган грантлар, Озодликка арз қилган сирдарёлик баъзи абитуриентлар иддаосича, бошқа вилоятликлар томонидан эгаллаб олинмоқда.

Тошкент Тиббиёт Академияси қабул комиссияси аъзоларидан бирининг Озодликка айтишича, ҳужжатларни онлайн қабул қилиш тартиби абитуриентларга истаган ҳудудда пропискага туриб, ҳужжат топширишга имкон беради.

Президент Мирзиёев 2017 йилнинг 5 майида имзолаган “2017/2018 ўқув йилида Ўзбекистон Республикасининг олий таълим муассасаларига қабул тўғрисида”ги қарорга биноан, 2017/2018 ўқув йилидан бошлаб, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари буюртмаларига биноан вилоятлар учун Ўзбекистон тиббиёт олий таълим муассасаларига давлат грантлари асосида бакалавриат йўналиши бўйича мақсадли қабул бўйича квоталар ажратилиб келмоқда.

Ҳукумат шу тариқа юқори малакали тиббиёт кадрларига ҳудудларда бўлган ўткир талабни қондиришни режалаштирган эди.

Бироқ Озодликка бир гуруҳ сирдарёлик абитуриентлар номидан мурожаат қилган 20 яшар Мадина Амирова Сирдарё вилоятига ажратилган квоталарни бошқа вилоятликлар эгаллаб олаётгани учун, икки йилдан буён Тошкент тиббиёт институтларига ҳужжат топшириб, ўқишга киролмаётганини иддао қилди:

- Бу квоталар нотўғри тақсимлашаяпти. Ўтган йили Тошкент Тиббиёт Академиясининг Даволаш факультетига ажратилган 35 грант ўриндан 21 тасини сирдарёликлар олибди, қолганлари бизнинг вилоятдан эмас. Бу йил ҳам Тошкент Тиббиёт Академиясида Сирдарё вилоятига ажратилган 47 та ўриннинг катта қисмини бошқа вилоятдагилар эгаллади.

Мадинанинг айтишича, у бу маълумотларни Тиббиёт Академиясида ўқиётган ва масалани атайлаб ўрганган юртдошларидан олган.

Мадина Амированинг ишонишича, айрим мактаб битирувчилари ўтиш балли пастроқ бўлган Сирдарё вилоятига “прописка”га туриб, шу вилоятдан тиббиёт олийгоҳларига ҳужжат топширмоқда:

- Бизнинг вилоятимизга келиб, вақтинчалик прописка олиб, топширворишаяпти. Бизнинг вилоятда 100 фоиз яхши тест ечадиганлар йўқ, билим даражаси пастроқ. Мен 134 балл йиғдим, ўтиш балли эса 149 бўлди. Энг кўп сирдарёликлар номидан грант олган бола хоразмлик экан. Улар медицина институтларини битириб, ўз вилоятларига қайтиб кетади. Сирдарёдан “врач чиқсин” деб ҳукумат берган грантлардан сирдарёлик ёшлар фойдалана олмаса бу квоталардан нима наф?!

Сирдарëлик абитуриент: Бошқа вилоятдагилар ўринларимизни олиб қўймоқда
Илтимос кутинг

Айни дамда медиа-манба мавжуд эмас

0:00 0:02:07 0:00

Абитуриент Мадинанинг бу иддаоларини Тошкент тиббиёт олийгоҳида ўқиётган сирдарёлик бир неча талаба ҳам такрорлади.

Исмини очиқламасликни сўраган сирдарёлик талабалардан бири бу йил Тошкент Тиббиёт Академиясининг 1- курсини битирганини, Сирдарё вилоятига ажратилган 35 грант ўринга қабул қилинган курсдошларидан 14 нафари бошқа вилоятликлар эканини айтди.

Талабанинг бу иддаоси рост-ёлғонлигини Академия маъмуриятидан сўраб билишнинг имкони бўлмади.

Абитуриент Мадинанинг айтишича, 20 га яқин ота-оналар квоталар масаласида Сирдарё вилоят ҳокимиятига шикоят билан чиққан ва ҳокимлик мутасаддисидан “бу масалада кейинги йил тартиб ўрнатамиз” деган жавобни олган.

Озодлик Мадина айтган "квоталар масаласига жавобгар Умид исмли Сирдарё вилоят ҳокимлиги мутассадиси" билан боғланди. Бироқ у саволни эшитдию жавоб бермай алоқани узиб қўйди.

Тошкент Тиббиёт Академиясининг қабул комиссияси аъзоларидан бири, Озодликнинг вилоятларга ажратилаётган квоталар масаласида берган саволига жавобан, ҳужжатларни онлайн қабул қилишга оид янги тартиб абитуриентларга истаган ҳудудда пропискага туриб, ҳужжат топширишга имкон беради деди:

- Ҳужжат топширган пайтда яшаш жойидаги паспорт маълумоти бизга келиб тушади. Пропискаси қаерда бўлса ўша жойдан ҳужжат топширилади. Қабул комиссияси унинг пропискасини назорат қила олмайди! Ҳаммаси қонуний бўлса, демак абитуриент бошқа вилоятга пропискага туриб, тиббиёт институтига ҳужжат топшириши мумкин. Бу квоталар ўша ҳудудларда тиббий мутахассислар етишмаслиги учун жорий қилинган эди. Лекин улар олийгоҳни битирганидан кейин ўз вилоятига бориб ишлаб беришлари шарт.

Олийгоҳ ходими сўзларига кўра, Вазирлар Маҳкамаси ҳузуридаги Ўзбекистон Республикаси таълим муассасаларига қабул қилиш бўйича Давлат комиссияси олий таълим муассасалари имкониятларидан келиб чиқиб, вилоятлардан келган абитуриентларни Давлат гранти асосида ўқишга қабул қилиш кўрсаткичларини белгилаб беради.

Мақсадли қабул орқали ўқишга кирган абитуриент олийгоҳни битиргач, ўз ҳудудида Давлат комиссиясининг алоҳида қарори билан белгиланадиган ва шартномада кўрсатилган муддатда, масалан, уч-беш йилгача ишлаб бериши шарт. Борди-ю, у шартномада белгиланган шартлар бўйича ишлашдан бош тортса, юборилган жойда ишлашни истамаса, бунинг сабаблари ўрганилиб, шартномада белгиланган тартибда иш кўрилади.

Қабул комиссияси аъзоси ўқишни битириб, ўз вилоятига қайтиб ишлаб беришдан бош тортган тиббиёт мутахассисидан давлат томонидан ўқишга сарфланган маблағ суд орқали ундирилиши мумкинлигини ҳам айтиб ўтди.

2019/2020 ўқув йилида Ўзбекистон Республикаси олий таълим муассасаларига давлат буюртмаси асосида бакалаврлар тайёрлаш бўйича кундузги таълим шаклига 80 430 нафар, сиртқи таълим шаклига 19 985 нафар; кечки таълим шаклига 1 985 нафар, магистратурага 7 695 нафар талаба қабул қилиш белгилаб қўйилган.

Бугун тест синовлари натижалари эълон қилиниши кутилмоқда

Тест синови пайтида.

Давлат тест маркази бакалавриат таълим йўналишлари бўйича топширилган тест синовлари натижаларини 22 август куни эълон қилиши кутилмоқда.

Маҳаллий нашрларнинг билдиришича, 21 август куни ўтган матбуот анжуманида ДТМ расмийси Барно Ражабов: «Тест синовлари 15 августда якунланди ва қонунчиликка мувофиқ, мандат тест жараёнлари тугаганидан сўнг 1 ҳафта ичида эълон қилиниши лозим. Мандат натижалари бугун кечқурун ёки эртага кундузи эълон қилинади», деб маълум қилган.

Президентнинг 2019 йил 14 майдаги қарорида тест натижаларини эълон қилишнинг охирги муддати 22 август деб белгилаб берилган эди.

Барно Ражабовнинг айтишича, жорий йилда 1 миллион 66 минг 925 нафар абитуриент ҳужжат топширган. Бу 2018 йилга нисбатан 250 минг нафарга кўпдир. Олийгоҳлардаги бир ўринга 10 нафардан кўпроқ абитуриент тўғри келди. Имтиҳонларда 954 минг 75 нафар абитуриент қатнашди.

Эртага кириш имтиҳонларининг охирги куни

Иллюстратив сурат

Олийгоҳларнинг бакалавриат йўналишларига кириш имтиҳонлари эртага - 15 август куни ниҳоясига етади.

Тест синовлари 29 июль куни бошланиб, жами 18 кун давом этди.

ДТМ хабарига кўра, ҳозиргача 8та вилоятда тест синовлари ниҳоясига етди:

  • 8 август: Сурхондарё;
  • 10 август: Тошкент шаҳри, Сирдарё, Наманган;
  • 12 август: Қашқадарё
  • 13 август: Жиззах, Фарғона ва Навоий вилоятларида тест синовлари якунланган.

Бугун, 14 август куни жами 5 та вилоятда: Андижон, Бухоро, Хоразм, Самарқанд ва Қорақалпоғистонда имтиҳонлар ўтди.

Улардан тўрттасида бугун тестнинг охирги куни эди.

Эртага биргина Бухоро вилоятида тест синовлари ўтади.

ДТМ: Ёши 50дан ошган абитуриентлар сони 672 нафардир

Тест топширишга келган абитуриентларнинг ҳужжатлари текширилмоқда.

Давлат тест маркази жорий йилда тест имтиҳонларида ёш чеклови бекор қилингани сабабли катта ёшдаги минглаб одамлар ҳам “талаба бўлиш умидида олий ўқув юртларига ҳужжат топширгани”ни билдирди.

13 август куни матбуотга тақдим этилган маълумотда айтилишича, 25 ёшдан кичик абитуриентлар сони 862 977 нафарни, 25-30 ёш оралиғидагилар 103 276 нафарни, 40-50 ёшлилар 14 014 нафарни ва 50 ёшдан катталар сони 672 нафарни ташкил этади.

Июль ойида сурхондарёлик 80 ёшли Тўхтамиш Султонов Ўзбекистондаги энг ёши катта абитуриент бўлгани хабар қилинган эди.

Тўхтамиш Султонов Самарқанд давлат университетининг Биологияни ўқитиш методикаси ҳамда Тошкент тиббиёт академияси Термиз филиалининг даволаш ва педиатрия иши йўналишида ўқиш учун ҳужжат топширган.

Аввалроқ Фарғонада ҳам 72 ёшли аёл бирданига учта олийгоҳга ўқишга кириш учун абитуриент сифатида ҳужжат топширганди.

Шунингдек, Навоийнинг Қизилтепа туманида яшовчи 67 яшар Шарофат Ташева ҳам Навоий давлат педагогика институтига ҳужжат топширган. Онахон институтнинг она тили ва адабиёти факультетига ўқишга киришни режалаган.

ДТМ томонидан техник хатога йўл қўйилган тест саволи учун максимал балл берилажаги айтилди

ДТМ томонидан техник хатога йўл қўйилган тест саволи учун максимал балл берилади. Бу ҳақда Давлат тест маркази бош бошқарма бошлиғи Диёрбек Қўчқоров баёнот берди.

Лекин Қўчқоров бундай ҳолат неча марта қайд этилгани тўғрисида маълумот бермади.

Давлат тест маркази бош бошқарма бошлиғи Ахборот ва оммавий коммуникациялар агентлигида ўтказилган бирифингда қуйидаги маълумотларни келтирган:

12 август куни Ўзбекистон бўйлаб 43 та бинода тест синовлари икки сменада бўлиб ўтди. Жами 53 минг 162 нафар абитуриентдан 51 минг 667 нафари тест синовларига келди. 1464 нафари эса турли сабабларга кўра иштирок этмади. Шу куни 11 нафар абитуриент ҳудудга киришда, 20 нафари эса бинода қоидани бузганлиги учун тест синовларидан четлатилди.

Қўчқоровга кўра, 10 август куни бакалавр йўналишининг кундузги шакли бўйича Тошкент давлат ўзбек тили ва адабиёти университетининг филология ва тилларни ўқитиш факултети абитуриенти энг юқори балл тўплаган — 231,9 балл (173,9 балл тест синовлари натижаси, 58 балл касбий (ижодий) имтиҳон натижаси); сиртқи таълим шакли бўйича Фарғона давлат университетининг филология ва тилларни ўқитиш йўналиши — 174,2 балл, кечки таълим шакли бўйича Тошкент давлат шарқшунослик институтининг тарих таълим йўналишида — 172,6 балл.

8 август куни Сурхондарё вилоятида, 10 август куни эса Сирдарё ва Наманган вилоятлари ҳамда Тошкент шаҳрида тест синовлари якунлангани маълум қилинди.

Қўқонлик абитуриентлар тест натижаларига норозилик билдирди

Қўқонлик абитуриентлар норозилиги
Илтимос кутинг

Айни дамда медиа-манба мавжуд эмас

0:00 0:04:10 0:00

Бир гуруҳ абитуриентлар ва уларнинг ота-оналари Қўқон Давлат педагогика институтида ўтказилган ижодий имтиҳон натижаларига норозилик билдириб, олийгоҳ раҳбарияти олдига киришди. "Қўқон Давлат Педагогика институтида ўтказилган ижодий имтиҳонда фақат таниш билишчилик бўлди. Ҳақиқий иқтидорли ёшларга энг паст балл қўйилди. Мана норозилик", дея қўқонлик муштарий ушбу видеони Озодликка йўллади.

Тест пайти синглисига ёрдам бермоқчи бўлган назоратчи ишдан бўшатилди

Иллюстратив сурат

Тест синовлари жараёнида назоратчи сифатида иштирок этаётган самарқандлик белгиланган қоидаларни бузган пайти ушланди.

Бу ҳақда хабар қилган Телеграмдаги Xushnudbek.uz тармоғига кўра, назоратчи имтиҳон пайти синглисига ноқонуний равишда ёрдам бермоқчи бўлганида қўлга тушган.

Воқеа 7 август куни Самарқанд шаҳрида ўтган тест синовлари пайти содир бўлган. Имтиҳонлар жараёнида назоратчи сифатида иштирок этаётган шахс синглисига ёрдам бериш мақсадида унинг саволлар варақасини видеога олаётган пайти ушланган.

Қўлга тушган назоратчи Самарқанд шаҳридаги мактаблардан бирида маънавий-маърифий ишлар бўйича директор ўринбосари бўлган.

Ушбу воқеа ошкор бўлган у мактабдан ҳам ҳайдалган.

Тест жараёнларида назоратчи сифатида қатнашаётганларга бир кунга 200 минг сўмдан ҳақ тўланмоқда.

 Бу йил ҳам супер-контракт бўлади

Иллюстратив сурат

Жорий йилда ҳам имтиҳонда етарли балл тўплай олмаган абитуриентлар супер-контракт тўлаб талаба бўлишлари мумкин.

Бу ҳақда Олий ва ўрта махсус таълим вазирлигидаги исмини очиқламаётганимиз манба маълум қилди.

Ўтган йили энг арзон супер-контракт нархи 82 миллион 935 минг сўм бўлса, энг қиммати 276 миллион 450 минг сўм этиб белгиланган эди.

Супер-контрактнинг бу йилги нархи ҳали эълон қилинмади.

Абитуриент супер-контракт орқали ўқишга кириш учун камида 56,7 балл тўплаши лозим.

Ўтган йили тест синовларида олийгоҳга ўтиш балли (56,7)ни тўплай олмаган абитуриентлар ҳам талаба бўлиш имконига эга бўлганди. Бунинг учун абитуриент суперконтрактнинг икки баробаригача яъни 165 миллиондан 552 миллионгача тўлаган эди.

Вазирликдаги манбага кўра, бу йил ҳам бу тартиб йўлга қўйилади.

Супер-контрактнинг битта шарти: Абитуриент мактаб ёки коллежни бу йил тугатган бўлиши лозим. Бир йил аввал мактабни тугатганлар бундай имкониятдан фойдалана олмайди.

Кимё фани бўйича эътирозларни инобатга олишадими?

Иллюстратив сурат

Озодликка абитуриентлардан келган мурожаатлардан бирида яна кимё фани бўйича саволларга эътироз билдирилган:

"Агар ҳозир ёзганларимни ўқиб инобатга олсангиз, бутун Ўзбекистон абитуриентларнинг кўнглидаги дардига оз бўлсада шифо топишга ёрдам берган бўлардингиз. Гапни чўзмай айтиб қўя қолай.

6 август куни Ўзбекистон тиббиёт институтларида имтиҳон бўлиб ўтди.Кимё фанидан тушган тестларни тарифлашга тил ожиз. Худди у тестлар абитуриентлар ўқишга кириб , ўз йўлини топсин деб эмас, йиқилсин деб тузилгандек.

Русча имтиҳон топширганларга , ўзбекча тестларни тушунарсиз , нотўғри ва кўплаб орфографик хатоликлар билан таржима қилишган.

Наҳотки Ўзбекистон бўйича битта тузук таржимон топилмаган бўлса?

Ундан ташқари 30 саволдан 28 таси масала эди ва масалалар ҳам шу даража қийинки, уларни ишлаш учун кимё ўқитувчиси эмас, математика ўқитувчиси бўлиш керак, ҳа, албатта тўғри ўқидингиз ўқитувчи. У саволларни ўқувчилар ишлаши учун камида 5-6 йил тайёргарлик кўриши лозим.

Ҳаммага маълум, имтиҳонларимизда калькулятор ишлатиш мумкин эмас. Энди ўйлаб кўрингда, бизга берилган атиги 3 соат ичида биз фақат битта фан ишлаймизми? Ёки таваккал қилиб кетаверамизми?

Кимё ўз номи билан кимё. Олий математика эмас!

Булардан ташқари тест тузилиш шаблони хато, ҳеч қачон 1 вариантни ичида 28 масала бўлмайди. 15 масала ва 15 назарий бўлиши керак.

Давлат тест маркази директори томонидан айтилган гаплар қаерда қолди?
Вариант 15 та масала ва 15 назари бўлади деб ўз оғзи билан айтган. Абитуриентлар бу гапларга ишониб, кечаю кундуз китобни ҳар бир қаторини ёдлаб чиқишди.

Айтай десам гап кўп. Ахборотнома деган китоб бор, ичидаги саволларга ўхшаш саволлар тушади деб роса ваъдаларни беришди.

Уни қанчадан қанча абитуриентлар пул кетқазиб сотиб олдилар. Лекин ҳеч бирига ўхшаш савол тушгани йўқ. Бу гапим билан нима демоқчи бўлганимни тушунган бўлсангиз керак. Биринчидан, аҳмоқ қилишди ва бир тийинга қиммат китобларини сотиб, пул ишлашди.

Таълим системаси бу кетишда кетаверса, ёш, билимга чаноқ, шиддатли ўқувчилар бундай адолатсизликларни кўриб, чет элда таълим олганим минг бора яхши деб четга ўқишга кетиб, ўша ерда қолиб кетишаверади. Албатта тўғрида адолатсизлика чидаб ўтиргандан кўра ўз йўлини топгани маъқул. Ўзбекистон эса шундай ёшларини йўқотиб , билимсизлик қарига ғарқ бўлаверади", дейилади абитуриент мактубида.

Бу тест синовларида кимё фани бўйича тушган саволлар бўйича илк эътироз эмас.

Бошқа бир абитуриент ҳам худди шундай мазмундаги эътирозли мактуб йўллаган эди:

“Бу йил биз Тошкент Тиббиёт академиясига топширдик. Тест синовларидан чиққан абитуриентлар билан суҳбатимизда ҳаммаси химия фанидан қийналишганини айтишди. Аввал ДТМ раҳбари билан бўлган суҳбатда бу йил фақат мактаб программаси бўлишини айтган бўлганига қарамай жудаям қийин саволлар тушган, шу сабабли 3 та фанга берилган 3 соатда улгурмаганлар ҳам бўлган. Шунга қарамай баьзи болаларнинг 186 балл йиғишгани ҳайрон қолдирди. Кейин эса шу тестларни 3000$га тест кунидан бир кун аввал сотишгани маьлум бўлди. Қачон бизнинг давлатда тугаркин шу каби ноҳақликлар? Порахўрликнинг охири бормикин? Билимли болаларимизни четга жўнатиб, ўзимизнинг давлат пора бериб кирганларга колаяптику?!, дея ёзади исмини очиқламасликни сўраган муштарий.

Кимё фани бўйича саволларнинг қийинлиги борасида Телеграмдаги
Xushnudbek.uz тармоғида ҳам ёзилди:
“Кимё фани бўйича саволлар юзасидан жуда кўп эътирозлар келиб тушмоқда. Агар 1-2 киши ёзганда ҳам эътибор бермаса бўларди, лекин эътирозлар сони анчайин кўплиги сабабли, уларда жон бор, деб ҳисоблаш мумкин. Бу бўйича ДТМ мутахассисларига эътирозларни етказдим, ҳозирда бу ҳолатни ўрганишаётган экан, тез орада расмий муносабат кутиб қоламиз”.

 Ҳайит кунги имтиҳонлар бошқа кунга кўчирилди

Иллюстратив сурат

Қурбон Ҳайити муносабати билан 11 август, якшанба кунига белгиланган тест синовлари бошқа кунга кўчирилди. Бу ҳақда ДТМ хабар қилди: Қашқадарё вилоятида - 12 август куни; Фарғона, Жиззах ва Навоий вилоятларида -13 август куни; Қорақалпоғистон Республикаси, Андижон, Хоразм ва Самарқанд вилоятларида - 14 август куни; Бухоро вилоятида – 15 август куни ўтказилади. ДТМ хабарига кўра, абитуриент рухсатномасида кўрсатилган бино ва соат ўзгаришсиз қолади. ​Бу ўзгариш фақат 11 август куни тестга кирадиган абитуриентларга тааллуқли, бошқа кундагилар белгиланган кунда тест синовларига киришади.

Наманганда тест пайти уч "Калла" ушланди

Наманганда 3 август кунги имтиҳонлар пайти ўтказилган рейд давомида абитуриент ўрнига “калла” сифатида кираётган уч талаба ушланди.

Бу ҳақда 7 август куни хабар қилган Kun.uz нашрига кўра, Тошкент ахборот технологиялари университети, Наманган давлат университети ва Наманган муҳандислик технология институтининг талабалари “Калла” ролини бажараётган пайти ушланган.

Маълум бўлишича, 34 ёшли норинлик шахс абитуриентларни "Калла"лар ёрдамида ноқонуний йўллар билан ўқишга киритишини ташкиллаштирган. Ҳозирда у қўлга олиниб, унга нисбатан жиноий иш қўзғатилган.

Норинлик шахс абитуриентларни "Калла" ёрдамида 3500 доллар эвазига ўқишга киритишга ваъда берган. "Калла"лар билан эса 800 долларга келишган.

P.S. Бировнинг ўрнига кирадиган “Калла” кимлиги ҳақида: Бирор олий ўқув юртининг домласи - уни “Танка” деб атаймиз. “Танка” ҳар йили тест имтиҳонлари олдидан аълочи талабалардан битта гуруҳ тузади. Бу гуруҳга бошқа институтлардаги аълочи талабалар ҳам жалб қилинади. Ўша гуруҳдаги талаба “Калла” бўлади. Уларга маълум суммада пул таклиф қилинади. Ўзаро келишилади. Июн ойида ўқиш тугагач, “Калла” талаба “Танка”нинг уйида яшайди. “Танка” турар-жой, квартира ва еб-ичиш билан таъминлайди. Агар “Калла” ўз билимига ишонса, “Танка”га шарт ҳам қўйиши мумкин. Нарх ва шароитлар бўйича. “Калла” тест синовларига тайёрланади. Одатда, “Калла” ўқишга ўз кучи билан кирган, аълочи талабалардан иборат бўлади.

“Калла” имтиҳонга тайёрланаётган пайтда “Танка” унга бошқа бировнинг паспортини олиб келиб беради. Бу одам ўша олийгоҳга ҳужжат топшириб, ДТМ варағини олган бўлиши керак. Энг асосийси, бу одам “Калла”га ўхшаб кетадиган бўлиши керак. У ўзи институтга кирмоқчи эмас. Лекин унинг паспорти билан ДТМ қоғози “Калла”нинг тест бўладиган аудиторияга кириши учун зарур.

Озодликда эълон қилинган собиқ «Калла» ҳикоясини қуйида тўлиқ ўқишингиз мумкин:

"Х вариант 2000 долларга пулланаяпти" (ФОТО)

"Абитуриент кундалиги" жонли блогига келган мурожаатлардан бирида тест синовлари пайти бўлаётган ғирромликлар ҳақида ёзилган: "Тест имтиҳонларининг софлиги ҳақида баъзи маълумотларни маълум қилмоқчи эдим. Ўқув марказларида тайёрланаётган абитурентларнинг айтишича, имтиҳондан бир кун олдин Х вариантлар чиқаётган экан. 1та блоги 1000$ 3та блоги эса 2000$. Ўқувчиларга ўқув марказининг директорлари бу ҳақида айтишган, рози бўлганларни бир киши билан учраштирган. 2000$ га Х вариант олган талабаларга 600та саволни ёдлатишган. Шу абитурентлар ҳозиргача 23-24тадан тўғри жавобларни ёзиб чиқишмоқда. Яна бир нарса: Х вариант олганларга варақни тарқатмаслиги учун Қуръон китоб билан қасам ҳам ичтиришибди. Х вариант ололмаган, неча йилдан бери тайёрланаётган абитурентлар яна куйиб қолишмоқда. Илтимос шу мавзуни ўрганиб чиқинг. Ҳали яна қанча абитурентлар имтиҳонга киради", дея иддао қилинади Озодликка келган мактубда.

Кимё фани бўйича саволларга эътирозлар

Озодликка келган мурожаатлардан бирида кимё фани бўйича саволларга эътироз билдирилган: “Бу йил биз Тошкент Тиббиёт академиясига топширдик.Тест синовларидан чиққан абитуриентлар билан суҳбатимизда ҳаммаси химия фанидан қийналишганини айтишди. Аввал ДТМ раҳбари билан бўлган суҳбатда бу йил фақат мактаб программаси бўлишини айтган бўлганига қарамай жудаям қийин саволлар тушган, шу сабабли 3 та фанга берилган 3 соатда улгурмаганлар хам булган. Шунга қарамай баьзи болаларнинг 186 балл йиғишгани ҳайрон қолдирди. Кейин эса шу тестларни 3000$га тест кунидан бир кун аввал сотишгани маьлум бўлди. Қачон бизнинг давлатда тугаркин шу каби ноҳақликлар? Порахўрликнинг охири бормикин? Билимли болаларимизни четга жўнатиб, ўзимизнинг давлат пора бериб кирганларга колаяптику?!”, дея ёзади исмини очиқламасликни сўраган муштарий.

Кимё фани бўйича саволларнинг қийинлиги борасида Телеграмдаги
Xushnudbek.uz тармоғида ҳам ёзилди: “Кимё фани бўйича саволлар юзасидан жуда кўп эътирозлар келиб тушмоқда. Агар 1-2 киши ёзганда ҳам эътибор бермаса бўларди, лекин эътирозлар сони анчайин кўплиги сабабли, уларда жон бор, деб ҳисоблаш мумкин. Бу бўйича ДТМ мутахассисларига эътирозларни етказдим, ҳозирда бу ҳолатни ўрганишаётган экан, тез орада расмий муносабат кутиб қоламиз”.

Ҳожатхонадан чиқаётган “шпаргалка”лар  

Иллюстратив сурат

Айрим абитуриентларнинг имтиҳон пайти ҳожатхонага кириб, “шпаргалка” ёки мобил телефонларни олиб чиқиш ҳолатлари ҳам учрамоқда.

Бу ҳақда бугун Давлат тест маркази бошқарма бошлиғи Барно Ражабов тест синовлари билан боғлиқ ўтган навбатдаги брифинг пайти маълум қилди.

Барно Ражабов бу каби абитуриентлар қўлга тушаётгани ва улар имтиҳондан четлатилаётганини таъкидлади.

Бироқ Ражабов ҳожатхоналарда шпаргалка ва телефонлар қандай пайдо бўлиб қолаётганини очиқламади.

ДТМ маълумотига кўра, 4 август кунги имтиҳонларда 2 минг 259 нафар абитуриент иштирок этмаган.

Жумладан, 17 нафар абитуриент тестга кириш пайти ичкарига қўйилмаган, 32 нафари эса имтиҳондан чиқариб юборилган.

Иккала ҳолатда ҳам тест синовлари қоидалари бузилгани айтилди.

Давомини ўқинг

Кўрмай қолган бўлсангиз

XS
SM
MD
LG