Линклар

Шошилинч хабар
08 март 2021, Тошкент вақти: 08:44

Ўзбекистон хабарлари

ДСҚ: Ҳар бир ўзбекистонлик ҳафтасига қарийб 1 килодан гўшт ейди

Ўзбекистонда бир йилда бир киши 43,2 килограмм гўшт ва гўшт маҳсулотларини истеъмол қилади. Республикада аҳолининг гўшт истеъмоли даражаси ўртача. Тожикистон ва Қирғизистондан кўпроқ. Россия, Қозоғистон, Озарбайжон ва бошқа Болтиқбўйи давлатларига нисбатан камроқ гўшт истеъмол қиламиз.

Бу баёнотни Давлат статистика қўмитаси бошқарма бошлиғи Хабибулла Муродхўжаев 30 сентябрь куни, Ахборот ва оммавий коммуникациялар агентлигида бўлиб ўтган йиғилишда бергани тўғрисида kun.uz хабар қилди.

Йиғилиш Давлат статистика қўмитаси марказий аппарати, Тошкент шаҳри ва вилояти статистика бошқармалари мутасаддилари, Кадрларни қайта тайёрлаш ва статистик тадқиқотлар маркази ходимлари иштирокида бўлиб ўтган.

Давлат статистика қўмитаси мулозимига кўра, 2018 йил давомида бир киши ўртача 272 литр сут ва сут маҳсулотлари, 4,8 килограмм балиқ маҳсулотлари, 150 килограмм мева ва резаворлар, 56 килограм картошка истеъмол қилган.

10 сентябрда Фермерлар кенгаши раиси Актам Ҳайитовнинг ўзбекистонликлар жуда кўп гўшт истеъмол қилаётгани, бу эса ўз навбатида гўшт нархининг ошишига сабаблардан бири экани тўғрисидаги баёноти ижтимоий тармоқларда шов-шув бўлган эди.

Кун янгиликлари

Ободонлаштириш тизими ходималарига Тошкент ҳокими Ортиқхўжаев номидан дазмол тарқатилди

Ўзбекистон пойтахти Тошкентда ободонлаштириш тизимида ишлайдиган 4127 нафар аёлга 8 март муносабати шаҳар ҳокими номидан байрам совғалари топширилган. Бу ҳақда Тошкент шаҳар ҳокимлиги матбуот хизмати маълумот тарқатди.

Маълумотларга кўра, пойтахт тозалиги ва кўкаламзорлаштиришга масъул бўлган аёллар бу гал байрам совғаси сифатида дазмолга эга бўлишган.

“Икки йилдан бери ўзи TEFAL (электрчойнак демоқчи – таҳр.) бериларди, энди бу йил дазмол қила қолдик”, деган аёлларни “Жаҳонгир Абидович номидан” табриклаган мулозим.

Эслатиб ўтамиз, Тошкент шаҳар ҳокими Жаҳонгир Ортиқхўжаевга қарашли ARTEL ширкатида электрчойнак ва дазмол каби майда маиший техника буюмларидан ташқари музлаткич, телевизор, чангютгич, кир ювиш машиналари, овқат тайёрлаш учун плиталар ҳамда бошқа ашёлар ишлаб чиқарилади.

Самарқандда Туркия бош консулхонасининг очилиш маросими бўлиб ўтди

Самарқандда Туркия бош консуллиги очилиш маросимидан лавҳа (Самарқанд вилоят ҳокимлиги фотоси)

Самарқанд шаҳрида жорий йил 7 март куни Туркиянинг бош консуллиги очилди.

Вилоят ҳокимлиги маълумотига кўра, мазкур маросимда Ўзбекистон бош вазири ўринбосари Азиз Абдуҳакимов, Ўзбекистон ташқи ишлари вазири Абдулазиз Комилов, Туркия ташқи ишлар вазири Мавлуд Човушўғли ва Самарқанд вилояти ҳокими Эркинжон Турдимовлар иштирок этишган.

Консулликнинг очилиш маросимида сўзга чиққан ташқи ишлар вазири Абдулазиз Комилов Туркиянинг Ўзбекистонда ҳам элчихонаси, ҳам бош консуллиги очилгани икки давлат ўртасидаги муносабатлар ўзига хос юқори поғонага чиққанлигидан далолат беришини урғулаган.

Ўзбекистоннинг бош дипломати ўз нутқида Туркиянинг Самарқанддаги Бош консулхонаси маданий-гуманитар, туризм соҳаларида ҳамкорлик ва ҳудудлараро алоқалар ривожланишига ижобий туртки беришини билдирган.

Вазир Комилов Ўзбекистонда Туркия сармояси иштирокида очилаётган ширкатлар сони тобора ошиб бораётгани, биргина Самарқанд вилоятининг ўзида ҳозирги кунда юздан зиёд қўшма корхоналар рўйхатдан ўтганини қайд этган.

Маросимда сўзлаган Туркия ташқи ишлар вазири Мавлуд Чавушўғли Самарқандда ташкил этилган бош консулхона хорижий давлатлар ичида дастлабкилардан бири эканини айтиб, унинг нафақат туркияликларга, балки ўзбекистонликларга ҳам хизмат кўрсатишини таъкидлаган. Туркия бош дипломати Тошкентда ўтадиган учрашувларда ўзбек расмийлари билан қатор стратегик келишувлар бўйича фикрлашилишини билдирган.

Туркия делегациянинг Ўзбекистонга сафари 9 мартгача давом этиши кутилмоқда. Самарқанд сафари олдидан делегация вакиллари Хоразм ва Бухоро вилоятларида бўлишган.

Самарқандда Туркия Бош консулхонасининг очилишига оид қарор ўтган йил 18 август куни қабул қилингани ҳақида Озодлик аввалроқ хабар қилган.

Соғлиқни сақлаш вазирлиги: 18 ёшгача бўлганларни коронавирусга қарши эмлаш тавсия қилинмайди

Фуқаролар эмланишдан олдин, албатта, тиббий текширувдан ўтказилади.

ОИВ инфекциясига ёки аутоиммун касалликларига чалинган шахсларни, шу жумладан анамнезида оғир аллергик реакциялари мавжуд бўлган шахсларни, ҳомиладорларни, эмизикли аёлларни ва 18 ёшгача бўлган аҳоли қатламини COVID-19 га қарши эмлаш тавсия этилмайди.

Бу ҳақда Соғлиқни сақлаш вазирлиги матбуот хизмати Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабековга таянган ҳолда 7 март куни маълум қилди.

Бундан ташқари коронавирус билан касалланган одамлар билан яқин алоқада бўлган шахслар 14 кунлик карантин тугаганидан кейин, шифокор кўригидан сўнг эмланади.

Эмланган шахслар патронаж тиббиёт ходимлари томонидан эмлангандан сўнг 30 дақиқа давомида кузатиб турилади. Кейинчалик уч кун давомида уйига ташриф буюриш йўли билан мунтазам тиббий кузатувга олинади. Уларнинг соғлиғи, аҳволи кўздан кечирилиб, тегишли ҳужжат билан расмийлаштирилади.

Фуқаролар эмланишдан олдин, албатта, тиббий текширувдан ўтказилади.

Ўзбекистонда COVID-19 инфекциясига қарши рўйхатга олинган илк вакцина - ZF-UZ-VAC 2001 рекомбинант (CHO cell) вакцинаси билан аҳолини оммавий эмлаш март ойи ўртасида бошланиши кутилмоқда.

Тошкентда 10 ёшли ўғил болани зўрламоқчи бўлган таксичи қидирилмоқда

Тошкент шаҳар Ички ишлар бош бошқармаси сайтидан олинган сурат.

Тошкент шаҳрида 10 яшар ўғил болага нисбатан фаҳш ҳаракатлар қилган такси ҳайдовчиси қидирилмоқда. Бу ҳақда Тошкент Ички ишлар бош бошқармаси маълум қилди.

Аввалроқ ижтимоий тармоқларда вояга етмаган ўғил болани “такси ҳайдовчиси зўрламоқчи бўлгани” ҳақида хабарлар тарқалган эди.

Ички ишлар бош бошқармасининг билдиришича, жорий йилнинг 28 февраль куни Чилонзор тумани ИИО ФМБга 30 ёшли Бобур Ж. мурожаат қилган.

“Фуқаро ўз аризасида унинг 10 ёшли ўғлига нисбатан фаҳш ҳаракатлар қилган таксичига нисбатан чора кўришни сўради. Отанинг мурожаатидан сўнг мазкур факт Тошкент шаҳар ИИББ раҳбариятининг назоратига олинди”,-дейилади расмий билдирувда.

Мазкур факт бўйича Жиноят кодексининг 129 - моддаси 1 -қисми асосида жиноят иши қўзғатилди. Гумонланувчининг шахсини ва ҳолатни тафсилотларини аниқлашга қаратилган тезкор-тергов тадбири ўтказилмоқда.

Маҳаллий нашрларга боланинг отаси воқеа тафсилотларини айтиб берган. Унга кўра, ўғли таксига ўтириб бошқа туманда яшайдиган қариндошлариникига кетаётган бўлган. Йўлда таксичи машинасини овлоқ жойга тўхтатиб, орқа ўриндиққа чиқиб ўтирган. Шундан сўнг у шимини ечиб, уятсиз ҳаракатлар қилган.

Болакай йиғлаб, қаршилик кўрсатгач, ҳайдовчи “ўз ишини тўхтатиб”, уни манзилига етказган ва бўлиб ўтган воқеани “ҳеч кимга айтмасликни” маслаҳат берган.

Тадбиркорликни бошламоқчи бўлган аёлларга 36 млн 750 минг сўмгача кредит берилади

Адлия вазирлигининг билдиришича, 5 март куни президентнинг “Хотин-қизларни қўллаб-қувватлаш, уларнинг жамият ҳаётидаги фаол иштирокини таъминлаш тизимини янада такомиллаштириш чора-тадбирлари тўғрисида”ги қарори қабул қилинди.

Қарорга асосан Республика хотин-қизлар жамоатчилик кенгаши ташкил этилади. Бундан ташқари Хотин-қизларни ва оилани қўллаб-қувватлаш давлат мақсадли жамғармаси Хотин-қизларни қўллаб-қувватлаш давлат мақсадли жамғармаси сифатида қайта ташкил этилди.

Жамғармага ҳар йили 300 миллиард сўмгача миқдорда Давлат бюджети маблағлари ажратилади.

Шунингдек, тегишли дастурларни муваффақиятли ўзлаштирган хотин-қизларга туман (шаҳар) маҳалла ва оилани қўллаб-қувватлаш бўлими бошлиғининг биринчи ўринбосари тавсиясига кўра, тадбиркорлик фаолиятини йўлга қўйиш учун 3 йилгача муддат ва 6 ойгача имтиёзли давр билан Марказий банкнинг асосий ставкасида БҲМнинг 150 бараваригача (36 млн 750 минг сўмгача) миқдорда кредитлар берилади.

Халқаро қидирувда бўлган яна тўрт ўзбекистонлик Россиядан Тошкентга олиб келинди

Халқаро қидирувда бўлган 56 нафар ўзбекистонлик Россияда қўлга олингани ва Тошкентга топширилган.

Турли жиноятларни содир этгани учун Ўзбекистон томонидан халқаро қидирувга берилган тўрт шахс Россияда қўлга олинди ва Тошкентга экстрадиция қилинди. Бу ҳақда ТАСС 6 март куни Россия Бош прокуратурасининг расмий вакили Андрей Ивановга таянган ҳолда хабар берди.

Маълум қилинишича, мазкур шахслар Россияда турли даврларда қўлга олинган. Улар махсус конвой ҳамроҳлигида улар Ўзбекистонга олиб кетилган.

Ўзбекистонга топширилганлардан бири А. М., Андижонда 2017 йилда бошқа бировнинг уйини ноқонуний сотиб юборган ва 15 900 долларни ўзлаштирганликда айбланмоқда.

Бундан ташқари, А. Ш., мол-мулк ўғрилигида айбланган. Н.Ж.,эса 30 кишининг пулларини алдов йўли билан ўзлаштирган. Е. М., эса 2008 йил сентябрдан 2009 йил апрелгача наркотик моддалар контрабандасида иштирок этганликда айбланмоқда. Расман билдирилишича, у Россияда 4 килограммдан ортиқ героин сотган.

Бундан аввал халқаро қидирувда бўлган 56 нафар ўзбекистонлик Россияда қўлга олингани ва Тошкентга топширилгани билдирилган эди.

Қорақалпоғистондаги бир хонадонда 5 киши ис газидан заҳарланиб вафот этди

2020 йилда ис газидан 106 киши вафот этган.

Қорақалпоғистон Бош прокуратурасининг билдиришича, Тўрткўл туманидаги “Янгиобод” маҳалла фуқаролар йиғинида 6 март куни 11:30ларда бир оиланинг 4 аъзоси ва ушбу хонадонга меҳмонга келган бир киши ис газидан заҳарланиб вафот этди.

“Фуқаро И.У.,(эркак) ва унинг қизлари Р.С.,(2003 й.т.), Р.А.,(2010 й.т.) ва ўғли Р.М.,(2005 й.т.) ҳамда ушбу хонадонга меҳмонга келган А.Ш., хонадонда ўрнатилан иситиш печидан сизиб чиққан ис газидан заҳарланиб, вафот этган”-дейилади расмий хабарда.

Ушбу ҳолат юзасидан Тўрткўл туман прокуратураси томонидан Ўзбекистон Республикасининг ЖКнинг 259-моддаси 2-қисми “а, б” бандлари билан жиноят иши қўзғатилди.

Мазкур жиноят ишининг тергови Қорақалпоғистон Республикаси прокуратураси томонидан назоратга олинган.

22 февралда Ўзбекистон Бош прокуратураси 20 февраль куни Хоразм вилоятининг Шовот туманидаги Шовот маҳалласида жойлашган “Ортиқ ота” чойхонасида бир оиланинг беш аъзоси ис газидан заҳарлангани, оиланинг икки аъзоси вофеа жойида ўлгани ҳақида билдирган.

12 январь куни Самарқанд вилоятининг Каттақўрғон туманидаги Қозоқовул қишлоғида бир оиланинг беш нафар аъзоси ис газидан заҳарлангани ва оиланинг уч фарзанди заҳарланиш оқибатида вафот этгани хабар қилинганди.

Расмий маълумотларга қараганда, 2020 йилда рўй берган 56 та ис газидан заҳарланиш ва 106 та чақнаш ҳолати оқибатида 106 нафар фуқаро вафот этган, 190 нафари заҳарланган ва куйиш тан жароҳати олган.

Бухорода ОИВни 10дан ортиқ одамга "қасддан" юқтирган аёл қўлга олинди

Бухоро вилоятининг Когон шаҳрида яшовчи 27 ёшли аёл 10 дан ортиқ фуқарога ОИВ инфекциясини қасддан юқтирган ва юқтириш хавфи остида қолдирган.

Бу ҳақда Бухоро вилояти ИИБ ахборот хизмати хабар берди.

Когон шаҳрида яшовчи, 1994 йилда туғилган аёл 2017 йилнинг 21 декабр кунидан бошлаб Бухоро вилоят ОИТСга қарши курашиш маркази томонидан ОИВ инфекциясини юқтириб олган шахс сифатида рўйхатга олинган.

Бухоро вилояти ИИБсига кўра, жорий йилнинг 1 март куни ўтказилган тадбирда ушбу фуқаро ўзининг ОИВ инфекциясига чалинганини била туриб, 2020 йилнинг август ойидан 2021 йилнинг феврал ойига қадар 10 дан ортиқ фуқаро билан Бухоро шаҳрининг турли жойларида ҳимоя воситаларисиз жинсий алоқада бўлиб, ушбу шахсларга ОИВ инфекциясини қасддан юқтириш ва юқтириш хавфи остида қолдириш жиноятини содир қилган.

ИИБ хабарида таъкидланишича, вилоят Ички ишлар бошқармаси Тергов бошқармаси Жиноят кодексининг тегишли моддаси билан жиноят иши қўзғатган. Аёлга нисбатан қамоққа олиш тарзидаги эҳтиёт чораси қўлланган.

Тошкентда бир кунда иккита зилзила рўй берди

Ўзбекистон Фавқулодда вазиятлар вазирлиги Сейсмик прогностик мониторинг маркази Тошкент ва атроф вилоятларда 6 март куни эрталаб иккита зилзила рўй берганини маълум қилди.

Марказга кўра, биринчи зилзила 6 март куни соат 02:52 да содир бўлган. Зилзила эпимаркази Тошкент вилояти Пискент туманида бўлиб, унинг кучи 4,4 баллни ташкил этган. Ўчоқ чуқурлиги — 10 километр бўлган.

Иккинчи зилзила Тошкент вақти билан эрталаб соат 06:04 да Қирғизистоннинг Қадамжой вилояти ҳудудида, Ўзбекистоннинг Фарғона вилояти билан чегараси яқинида содир бўлди (Шимолий кенглик 40,24 даража; шарқий узунлик 71,88 даража), Тошкентдан 252 километр жануби-шарқда.

Зилзила эпимарказида магнитуда 4 балл бўлган, ўчоқ чуқурлиги — 13 километр.

Зилзила Фарғона шаҳрида (эпимарказидан 18 километр узоқликда) 4 балл, Андижонда (72 километр) ва Наманганда (86 километр) 2 баллгача сезилган.

Зилзила оқибатида талафотлар бўлмагани айтилмоқда.

Мирзиёев: Бирор-бир аёл давлат эътиборидан четда қолмайди

Тошкентда 8 март - Халқаро хотин қизлар куни муносабати билан ўтказилган тадбирда сўз олган Ўзбекистон президенти Шавкат Мирзиёев охирги 3 ойда "аёллар дафтари"га киритилган 80 минг нафар хотин-қизнинг муаммоси ҳал этилганини айтди.

Мирзиёевга кўра, улардан 32 минг нафари иш билан таъминланган.

"Биргина ‘Ҳар бир оила – тадбиркор’ дастури доирасида 126 мингга яқин аёлларга имтиёзли кредитлар берилди. Оилавий тадбиркорликни ривожлантириш учун қарийб 215 минг оилага 6 триллион сўмдан зиёд кредит маблағлари ажратилди.

Қарийб 55 минг нафар хотин-қиз тадбиркорлик ва касб-ҳунар марказлари томонидан ўқитилди, ҳунармандчилик ва касаначиликка жалб этилди. ‘Беш муҳим ташаббус’ доирасида чекка-чекка ҳудудларда тикувчилик цехлари ташкил этилиб, 10 минг нафар аёл бандлиги таъминланди.

Уй-жой сотиб олиш учун 1 минг 250 нафар опа-сингилларимизга қарийб 22 миллиард сўмлик бошланғич бадаллар тўлаб берилди", - деди Мирзиёев.

8 март – Халқаро хотин-қизлар куни арафасида жазони ижро этиш муассасаларида оғир, ўта оғир жиноятларни содир этиб, турли муддатларга озодликдан маҳрум этилган 16 нафар маҳкума аёлнинг кассация тартибида берган шикоятлари кўриб чиқилган.

Айни пайтда маҳкамада 2 нафар маҳкума аёлга тайинланган жазолар енгиллаштирилган.

Ўтган йили Ўзбекистон президенти Шавкат Мирзиёев Аёллар байрами арафасида қамоқларда жазо муддатини ўтаётган 83 нафар аёлни афв этиш тўғрисидаги фармонни имзолаганди.

Адолатли, Меҳнаткаш, Халқпарвар. Тўрт нафар депутатга махсус мақомлар берилди

Расул Кушербаевга “Халқпарвар депутат” мақоми берилган

5 март куни Ўзбекистон Республикаси Олий Мажлисининг Қонунчилик палатасида маънавий ва моддий рағбатлантириш бўйича комиссия айрим депутатларга махсус мақомлар берилганини эълон қилди.

Бу ҳақда Олий Мажлис қуйи палатаси матбуот хизмати хабар берди.

Комиссия қарорига кўра, депутат Шуҳрат Полвонов “Адолатли депутат”, Мақсуда Варисова “Меҳнаткаш депутат”, Расул Кушербаев эса “Халқпарвар депутат” ҳамда Полянте Свешникова “Фахрий депутат” мақоми билан тақдирланган.

Мазкур мақомлар президент ташаббуси асосида қонун ҳужжатларини такомиллаштиришда, жойларда сайловчилар билан ишлашда, Қонунчилик палатаси фаолиятини ОАВда ёритишда фаоллик кўрсатган бир гуруҳ депутатларга берилган.

Мақомли депутатлар ҳамда собиқ депутатларга махсус сертификатлар берилган.

Ўзбекистон Республикаси Олий Мажлисининг Қонунчилик палатаси 150 нафар депутатдан иборат бўлиб, палата 5 фракцияни ўз ичига олади.

Ўзбекистон Республикасининг “Ўзбекистон Республикаси Олий Мажлиси Қонунчилик палатаси тўғрисида”ги ҳамда “Ўзбекистонда депутатларнинг мақоми тўғрисида”ги Қонунида юқорида номи тилга олинган “мақом”лар бўйича нормалар мавжуд эмас.

ЕХҲТ матбуот эркинлиги бўйича вакили блогер Отабек Сатторий ишидан ташвиш билдирди

Отабек Сатторий Telegram ва YouTube порталидаги “Халқ фикри” видеоблогидаги танқидий чиқишлари билан танилган.

Европада Хавфсизлик ва Ҳамкорлик Ташкилотининг сўз эркинлиги бўйича вакили Тереза Рибеиро сурхондарёлик блоггер Отабек Сатторийнинг жавобгарликка тортилганидан ташвишда эканини билдирди.

Бу ҳақда AKIpress вгентлиги хабар бермоқда.

Маълум бўлишича, ЕХҲТ вакили Ўзбекистоннинг ташкилотдаги элчиси Абат Файзуллаев билан учрашув чоғида журналист тақдиридан ташвишланаётгани ва бундай ҳодисанинг сўз эркинлигига раҳна солишини билдирган.

Расмийларга кўра, Сатторий Отабек Абдуманонзода Ўзбекистон Республикаси Жиноят кодексининг 165-моддаси 2-қисми “а”,“б” бандлари ва 3-қисми “а” банди (Товламачилик), 139-моддаси 3-қисми “а,г” бандлари (Туҳмат) ҳамда 140-моддаси 3-қисми “а” банди (Ҳақорат қилиш)да айбланиб, унга нисбатан жиноят иши судда кўриш учун юборилган.

Отабек Сатторий Telegram ва YouTube порталидаги “Халқ фикри” видеоблогидаги танқидий чиқишлари билан танилган.

У 30 январь куни соат 17 ларда Термиздаги уйидан фуқаро кийимидаги ходимлар томонидан олиб кетилганди. Шу куни кечқурун соат 10 да, яқинларининг айтишича, Отабек Сатторийнинг хонадонида тинтув ўтказилган. Сатторийга қарашли иккита компьютер процессори, курткаси, 5 та флэшка ҳамда ўғлининг ўйин ўйнайдиган планшети олиб кетилган. Ички ишлар вазирлиги Сатторийнинг товламачиликда гумон қилинаётганини айтган ва у блогерлик фаолияти учун таъқиб қилинаётгани ҳақидаги фаразларни рад этган.

1 февраль куни Сурхондарё ИИБда ўтган ёпиқ маҳкама Отабек Сатторийга нисбатан қамоқ эҳтиёт чорасини белгилаган. Яқинларига кўра, 3 февраль куни вилоят суди биносида ўтган иккинчи ёпиқ маҳкамада адвокатнинг эҳтиёт чорасини ўзгартириш ҳақидаги талаби рад этилган.

Нью-Йоркда жойлашган Журналистларни ҳимоя қилиш қўмитаси - CPJ Ўзбекистон ҳукуматини ҳибсга олинган блогер Отабек Сатторийни озод қилишга чақирди. Ташкилотнинг ишонишича, блогер коррупцияга қарши курашгани ортидан соҳталаштирилган жиноят иши асосида қамоққа олинган.

Отабек Сатторий Термиз шаҳрида 30 январь куни қўлга олинган эди. Суд уни айбдор деб топса, у 15 йилгача озодликдан маҳрум қилиниши мумкин.

Жамоатчилик комиссияси Зангиотадаги болалар қамоқхонасини кўздан кечирди

Аввалроқ жамоатчилик комиссияси Зангиотадаги аёллар қамоқхонасида бўлган

4 март куни Ўзбекистон Республикаси Олий Мажлиси Сенати, Қонунчилик палатаси, жамоат ташкилотлари раҳбарлари ва оммавий ахборот воситалари вакилларидан иборат комиссия Ўзбекистон ИИВ ЖИЭББ тизимидаги 24-сонли колонияга ташриф буюрди.

Бу ҳақда Озодликка комиссия таркибида қамоқхонага борган ҳуқуқ фаоли Абдураҳмон Ташанов хабар қилди.

“Ўзбекистон Омбудсмани еткачилигидаги мазкур мониторинглар миллий превентив механизмлар доирасида амалга оширилмоқда. Эндиликда комиссия таркиби кенгайди ва таркибимизга сенаторлар, депутатлар ва ОАВ вакиллари ҳам қўшилишган”,- деди А. Ташанов.

Ҳуқуқ фаолига кўра, болалар қамохонаси 18 ёшгача бўлган маҳкумларни сақлаш ва тарбиялашга мўлжалланган. Бу ерда ҳозирда 53 нафар маҳкум бўлиб, уларнинг аксарияти босқинчилик, номусга тегиш ва одам ўлдириш сингари ўта оғир жиноятларда айбланган.

Маҳкум болалар жазони ўташ билан бир пайтда таълим олиш, ҳунар ўрганиш ишига сафарбар этилган. Кутубхонаси бой, спорт тўгараклари мавжуд. Колония давлат бюджети маблағлари эвазига капитал таъмирдан чиқарилган.

Бироқ иситиш ва канализация тизимида муаммолар бор. Врачлар етишмайди, стоматология хизмати мутлақо мавжуд эмас. Онлайн таълим учун интернет тармоғи уланмаган, дейди қамоқхонага кирган жамоатчилик вакиллари.

Uzbekistan Airways 28 мартдан учта йўналиш бўйича ички қатновларни йўлга қўяди

Uzbekistan Airways авиаширкати жорий йил 28 мартидан уч йўналиш бўйича маҳаллий қатновлар амалга оширилишини маълум қилди.

Қайд этилишича, ой охиридан Самарқанд – Фарғона – Самарқанд, Самарқанд – Урганч – Самарқанд, Самарқанд – Наманган – Самарқанд йўналишлари бўйлаб кундалик қатновлар йўлга қўйилади.

Аввалроқ Озодлик 11 февралдан эътиборан Урганч – Фарғона – Урганч йўналиши бўйлаб мунтазам авиақатнов йўлга қўйилгани ҳақида хабар қилган.

Президент Шавкат Мирзиёев жорий йил 9 февралида “Ўзбекистон Республикасида ички ва зиёрат туризмини янада ривожлантириш чора-тадбирлари тўғрисида”ги фармонни имзолаган, фармон билан ички ва зиёрат туризмини ривожлантириш доирасида бир ой ичида Фарғона – Урганч – Фарғона, Термиз – Урганч – Термиз ҳамда Қарши – Урганч – Қарши авиарейсларини йўлга қўйиш ва Андижон – Хива – Андижон темир йўл қатнови сонини ошириш, 2021 йил 1 апрелига қадар эса Термиз – Қарши – Хива, Хива –Урганч – Нукус ва Термиз – Қарши – Самарқанд йўналишлари бўйича доимий темир йўл қатновини йўлга қўйиш чораларини кўриш топширилганди.

Сафоев Марказий Осиё иттифоқини тузиш учун ҳали эрта эканини билдирди

Сенат раисининг биринчи ўринбосари Содиқ Сафоев

Интеграциянинг асосий таркибий қисми умумий тамойиллар, умумий қадриятлар ҳамда давлат ва иқтисод тузилишининг умумий туташ механизмлари бўлиб ҳисобланади, Марказий Осиёда эса булар йўқ. Бу ҳақда Олий Мажлис Сенати раисининг биринчи ўринбосари Содиқ Сафоев Alter Ego лойиҳаси доирасида ўтказилган интервью чоғида билдирди.

Сафоевга кўра, Марказий Осиё иттифоқи тузилишига ҳозирда катта қизиқиш борлигига қарамай, интеграцион бирлашма тузишга оид масалани кун тартибига қўйишга ҳали эрта.

Бироқ Ўзбекистон ташқи сиёсатининг сўнгги тўрт йил ичидаги энг асосий ютуқларидан бири - минтақа мамлакатлари билан ўзаро ишончга асосланган ҳамкорликни тиклашга муваффақ бўлинди. Беш-олти йил аввал ҳаводан адоват, гумонсираш, қандайдир агрессивлик уфуриб турарди”, дея Ислом Каримов ҳукмронлиги даврига ишора қилган С. Сафоев ҳозирда Марказий Осиё мамлакатлари билан мулоқот тикланганини қайд этди.

Сенат раисининг биринчи ўринбосарига кўра, ҳозирда минтақа давлатлари билан ўтган йилларда муҳокама қилиш ҳам тақиқланган “чегара бўйича вариантлар” кўриб чиқилмоқда.

Аминманки, чегара делимитацияси ва демаркацияси жараёнларини якунламагунимизча, Ўзбекистонда мустақил давлатни шакллантириш поёнига етгани ёки ўтиш даври тугагани ҳақида гапиришга эрта. Биз бу фундаментал масалани ҳал қилишимиз керак. Сув захираларини бошқариш масаласи ҳаёт-мамот масаласидир. Бугунги кунда муроса вариантларини топиб, олға силжишга муваффақ бўлинди”, деган С. Сафоев бу борада қилинадиган ишлар ҳали кўплиги, аммо икки томонлама ва кўп томонлама ҳамкорлик учун ҳозирнинг ўзида шарт-шароит яратиб бўлинганини қўшимча қилган.

Россия Қашқадарё ва Навоийдаги олти ширкатга помидор олиб киришга изн берди

Россия Ветеринар ва фитосанитар федерал хизмати жорий йил 3 мартидан Ўзбекистондаги яна олтита ширкатга ўз ҳудудига помидор олиб киришга рухсат берди.

Россельхознадзор сайтида қайд этилишича, қарор Ўзбекистон Вазирлар Маҳкамаси қошидаги Ўсимликлар карантини давлат инспекцияси кафолати остида ҳамда Қашқадарё ва Навоий вилоятларида жойлашган олти ширкат помидорларида жигарранг бужмайиши вируси аниқланмагани бўйича лаборатория тадқиқотлари натижасига кўра қабул қилинган.

Россельхознадзор жорий йил 1 январидан Россияга Ўзбекистондаги 34 корхонадан помидор олиб кирилишига рухсат берганди.

Аввалроқ Озодлик ўтган йил 26 ноябридан Фарғона вилоятидан, 4 декабрдан Навоий вилоятидан, 11 декабрдан эса Қашқадарё вилоятидан Россия Федерацияси ҳудудига помидор ва қалампир олиб кириш тақиқлангани ҳақида хабар қилган эди.

Ҳукумат 2025 йилгача суд биноларини қайтадан қуриш тўғрисида қарор чиқарди

Ўзбекистонда суд бинолари қайтадан қурилади. Бу ҳақда Вазирлар Маҳкамаси томонидан шу йил 26 февралида қабул қилинган “2021-2025 йилларда судларнинг бинолари ва хоналарини қуриш ҳамда реконструкция қилиш дастурини тасдиқлаш тўғрисида”ги қарорда айтилган.

Қарорда Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари “Ягона буюртмачи хизмати” инжиниринг компаниялари судларнинг бинолари ва хоналарини қуриш ҳамда реконструкция қилиш бўйича буюртмачи этиб белгиланган.

Ҳужжатга мувофиқ, ҳокимликларга ҳудудларнинг бош режаси асосида Дастурда янгидан қурилиши белгиланган объектлар учун ер участкалари белгиланган тартибда ажратилишини таъминлаш топширилган.

Қарор билан Ўзбекистон бўйича жами 31 та объектни қуриш ва 107 та объектни реконструкция қилиш режалаштирилган. Қурилиш марказлаштирилган маблағлар ҳисобидан молиялаштирилиши, янги объектлар қурилишини молиялаштириш эса маҳаллий бюджет маблағларидан амалга оширилиши қайд этилган.

Ҳукумат қарори президентнинг ўтган йил 24 июлидаги “Судлар фаолиятини янада такомиллаштириш ва одил судлов самарадорлигини оширишга доир қўшимча чора-тадбирлар тўғрисида”ги фармони ижросини таъминлаш мақсадида қабул қилингани айтилган.

Қарор ижросини назорат қилиш бош вазир ўринбосари Очилбой Раматов ва қурилиш вазири Ботир Зокиров зиммасига юкланган.

Туркия ташқи ишлар вазири ҳафта охирида Ўзбекистонга ташриф буюради

Туркия ташқи ишлар вазири Мевлут Чавушўғлу

Ташқи ишлар вазири Мевлут Чавушўғлу бошчилигидаги Туркия делегацияси 6 мартдан 9 мартгача Ўзбекистонда бўлади.

Ўзбекистон Ташқи ишлар вазирлиги матбуот хизмати маълумотига кўра, Анқарадан келган делегация Ўзбекистон ва Туркия ташқи ишлар вазирлари раислигида Стратегияни режалаштириш гуруҳининг иккинчи йиғилишида иштирок этади.

Қайд этилишича, ташриф дастуридан Хива ва Бухоро шаҳарларини зиёрат қилиш, Туркиянинг Самарқанд шаҳридаги Бош консулхонасининг очилиш маросимида иштирок этиш, бошқа вазирлик ва идораларида учрашув ҳамда музокаралар олиб бориш ўрин олган.

Ўзбекистонда февраль ойида 1166 нафар эгизак туғилди

Ўзбекистонда февраль ойида жами 53 460 чақалоқ туғилди. Улардан 1166 нафари эгизак. Бу ҳақда Давлат статистика қўмитаси маълум қилди.

Қайд этилишича, энг кўп чақалоқ Самарқандда туғилган – 6 441 нафар. Туғилиш кўрсаткичи бўйича февралда иккинчи ўринни Фарғона вилояти ( 5 786), учинчи ўринни, Қашқадарё вилояти (5 599) эгаллади.

Андижонда 4 978 нафар, Сурхондарёда 4 855 нафар, Тошкент шаҳрида 4 421 нафар чақалоқ туғилган.

Қолган ҳудудлардаги туғилиш кўрсаткичи эса қуйидагича:

Қорақалпоғистон Республикаси – 2 449 нафар;
Бухоро – 2 400 нафар;
Жиззах – 2 361 нафар;
Навоий – 1 359 нафар;
Наманган – 4 361 нафар;
Сирдарё – 1 430 нафар;
Тошкент вилояти – 4 604 нафар;
Хоразм – 2 416 нафар.

Ўзбекистон “эркин бўлмаган” мамлакатлар рўйхатида қолдирилди

Freedom House халқаро ташкилотининг “Жаҳон давлатларидаги эркинлик” рейтингида Ўзбекистон яна “эркин бўлмаган мамлакатлар” қаторидан жой олди.

Ташкилотнинг 2021 йил учун чиқарилган ҳисоботида Ўзбекистон белгиланган юз балдан фақат 11 балл олди. 2020 йилда Ўзбекистонга 10 балл берилганди.

Ўзбекистонликларнинг сиёсий ҳуқуқлари 40 баллдан 2 балл, фуқаролар эркинликлари даражаси 60 баллдан 9 балл билан баҳоланди.

Марказий Осиёда Ўзбекистондан олдинги ўринларни 28 балл олган Қирғизистон, 23 балл билан Қозоғистон эгаллади. Ўзбекистондан кейинги ўринлар 8 балл олган Тожикистон ва 2 балл олган Туркманистонга берилди.

Рейтингда Марказий Осиё мамлакатларининг барчаси эркин эмас мақомига эга бўлди. Шу кунгача қисман эркин давлатлар қаторида турган Қирғизистон ҳам 11 баллга пастлаб, жорий йилда эркин бўлмаган давлатлар қаторига қўшилди.

Жаҳондаги эркинлик даражаси энг юқори бўлган давлатлар бешлиги эса Швеция, Норвегия, Финляндия, Янги Зеландия, Канада, Уругвай ва Голландия.

Ўзбекистонда 6 талаба ўлимидан сўнг деярли 150 минг талаба ётоқхонага муҳтожлиги айтилди

Вазир Тошқулов ётоқхоналар етишмаслигида ректорларни айблади.

Ўзбекистонда сўнгги йилларда талабалар ётоқхоналари сони 228тага кўпайди, шунга қарамай 149 минг 400 талаба ётоқхонага муҳтож. Бу ҳақда Олий Мажлис Қонунчилик палатасида ўтказилган ҳукумат соатида Олий ва ўрта махсус таълим вазири Абдуқодир Тошқулов маълум қилди.

Унга кўра, 2025 йилгача талабалар учун яна 16та ётоқхона қуриш режалаштирилган. Бу билан яна 6750 талаба ётоқ билан таъминланади.
Вазир ётоқхоналар етишмаслигига бевосита олий ўқув юртлари ректорлари айбдор эканини айтди.

“Чунки ректоратда қурилиш учун масъул бўлган бўлим ҳам, бўлинма ҳам йўқ. Хатто бир марта техник назорат ўтказиш учун мутахассис ёллаш ҳам қийин. Ректорлар, яхшиси ҳеч нарса қурмаган маъқул, деб ҳисоблайди. Агар қурсалар, жавобгар бўлиб қолишдан, текширувлардан қўрқадилар”,-деди Абдуқодир Тошқулов.

Ўзбекистонда талабаларнинг яшаш шароити масаласи Тошкентда бир неча кун олдин 5 талаба ижара уйида ўлик ҳолда топилганидан сўнг кун тартибига чиқди. Бу воқеа содир бўлганидан бир кун ўтиб, яна бир талаба ўзи яшаб ва ишлаб келаётган янги қурилаётган уйнинг лифт шахтасига йиқилиб ҳалок бўлди.

Иқтисодий эркинлик индекси: Ўзбекистон жаҳонда 108, Марказий Осиёда 3-ўринда

Индекс ҳар йили Heritage Foundation томонидан The Wall Street Journal билан ҳамкорликда ишлаб чиқилади.

Ўзбекистон 2021 йил Иқтисодий эркинлик индексида 178 давлат орасида 108-ўринни эгаллади. Бу ўтган йилдагидан 6 поғонага юқоридир.

Мазкур индекс ҳар йили Heritage Foundation томонидан The Wall Street Journal билан ҳамкорликда ишлаб чиқилади.

Индексда Ўзбекистондаги иқтисодий эркинлик даражаси 58, 3 балл даражасида баҳоланган. Мазкур индексда энг юқори даража 100 балл билан баҳоланади.

Ўзбекистон 2020 йилга нисбатан 1,1 балл кўппроқ олган. Индекс тадқиқотчиларига кўра, бу “биринчи навбатда суд тизимининг самарадорлиги оширилгани билан боғлиқ”.

Ўзбекистондан олдинги 107-ўринни Хитой, 109-ўринни Бутан эгаллади.

Марказий Осиё давлатлари орасида Қозоғистон 34-ўринни, Қирғизистон 78-ўринни, Тожикистон 134-ўринни ва Туркманистон 164-ўринни эгаллади.
Индексдаги биринчи бешликдан эса Сингапур, Янги Зеландия, Австралия, Швейцария ва Ирландия жой олди.

Бухорода темир дафтарга кирган оилаларга тадбиркорлик учун контейнерлар тарқатилади

Бухорода контейнерлар замонавий кўринишда таъмирланиб, бизнес юритиш учун имтиёзли кредит асосида вилоятдаги ижтимоий ёрдамга муҳтож оилаларга тарқатилмоқда. Бу ҳақда Бухоро вилояти Божхона бошқармаси маълумот тарқатди.

Қайд этилишича, бу ташаббусга президент Мирзиёевнинг жорий йил Бухоро вилоятига ташрифи чоғида темир дафтарга кирган шахсларни иш ўринлари билан таъминлаш, уларни маиший хизматлар кўрсатиш соҳаларига жалб қилиш мақсадида бўшаган юк контейнерларидан самарали фойдаланиб, замонавий кўринишда жиҳозлаган ҳолда, аҳоли пунктларида ўрнатиш чораларини кўриш бўйича берган топшириғи асос бўлган.

Мазкур кўрсатма асосида вилоят ҳокимлиги, божхона бошқармаси ҳамда “Ремонт механика” заводи билан ҳамкорликда ишчи гуруҳи тузилиб, ҳозирги кунга қадар
республикамизнинг турли ҳудудларидан 1000 донага яқин контейнерлар йиғилмоқда
”, дейилган хабарномада.

Аввалроқ Озодлик 1 март куни Олот туманига борган Бухоро вилояти ҳокими Ботир Зарипов “Давлатбой” маҳалласидаги вагонга жойлашгани, Наманганнинг “Бунёдкор” маҳалласида эса вилоят ҳокими Шавкат Абдураззоқовга атаб контейнер-уй қурилгани ҳақида хабар қилган.

Ўтган йили хориждан 1600 нафардан зиёд муҳожир жасади олиб келинган

Иллюстратив сурат

2020 йилда хорижий юртлардан меҳнат мухожирлигида юриб, вафот этган ўзбекистонликнинг 1629 та жасади олиб келинган. Бу ҳақда Республика патологик анатомия маркази директори Ражаббой Исроилов билдирган.

Қайд этилишича, бу кўрсаткич Ўзбекистоннинг 2020 йилдаги ўлимлар статистикасига кирган, лекин COVID-19 статистикасига кирмаган.

Соғлиқни сақлаш вазирлиги жамоатчилик билан алоқалар бўлими маълумотига кўра, шу кунда Ўзбекистонда коронавирус инфекцияси туфайли вафот этганлар сони 622 нафарни ташкил қилмоқда, мазкур ўлим ҳолатлари махсус лаборатория ҳамда патологоанатомик текширувида ҳам тасдиғини топгандан сўнг қайд этилган.

Вазирлик ўз хабарномасида коронавирусга чалинган беморлар сони ҳамда ушбу инфекциядан вафот этганлар кўрсаткичини яширишидан ҳеч қандай наф йўқлигини урғулаган.

Мирзиёев уй нархини бир квадрат метр учун 4 миллион сўмдан оширмасликни буюрди

Ўзбекистон президенти Шавкат Мирзиёев

Ўзбекистонда вилоят ва туман ҳокимлари бир квадрат метр уй нархини 4 миллион сўмдан оширмаслик учун барча зарур чораларни кўриши керак. Бу ҳақда президент Шавкат Мирзиёев уй-жой қурилиши ва ипотека бозорини ривожлантириш чора-тадбирлари бўйича 3 март куни ўтказилган видеоселектор йиғилишида билдирган.

Мирзиёев йиғилишда аҳоли кўчмас мулк нархидан рози эмаслигини қайд этган.

Энг катта масала – бу уй-жойларнинг нархини адолатли шакллантириш. Бугунги нарх-наводан одамларимиз рози эмас ва ҳокимлар бунинг ичига кирмагани ҳам рост.

Шунинг учун вилоят ва туман ҳокимлари бир квадрат метр уй нархини 4 миллион сўмдан оширмаслик учун барча зарур чораларни кўриши керак”, дея иқтибос келтиради президент сўзларидан Кун.уз нашри.

Йиғилишда Мирзиёев ҳокимлар зиммасига ўз ҳудудида қурилиш таннархи ичига кириб, қайси қурилиш материалларини арзонроқ ва яқинроқдан олиш мумкинлиги, цемент ва металл нархини қандай пасайтирса бўлишига оид саволларга жавоб топиш вазифасини юклаган.

Давомини ўқинг

XS
SM
MD
LG