Линклар

Шошилинч хабар
28 январ 2020, Тошкент вақти: 00:47

Ўзбекистон хабарлари

Ҳарбий учувчилар жанговар шайлиги текширилди

Иллюстратив сурат

Мудофаа вазирлиги Тошкент вилоятида жойлашган Ҳаво ҳужумидан мудофаа қўшинлари ва Ҳарбий ҳаво кучлари қўмондонлигига қарашли ҳарбий қисмларда кенг кўламли ўқув машғулотлари ўтказди.

Бу ҳақда Мудофаа вазирлиги Ахборот ва оммавий коммуникациялар департаментига таяниб, gazeta.uz хабар қилди.

Ҳарбий хизматчилар жанговар тайёргарлигининг ҳақиқий ҳолатини баҳолаш мақсадида синов машғулотлари соат тонгги 6−00 да берилган «Тревога» сигнали билан бошланди.

"Бу каби ўқувлардан кўзланган асосий мақсад, ҳарбий хизматчиларнинг жанговар тайёргарлигини ҳар томонлама текшириш, улар малакасини ошириб боришдир. Мазкур вазифани бажариш учун дастлаб Мудофаа вазирлиги масъул офицерларидан иборат комиссия аъзоларидан турли йўналишлар бўйича назоратчилар гуруҳи тақсимланди. Ҳар қандай касб эгаси бўлишдан қатъий назар инсонда мослашувчанлик кўникмаси, вазиятни тўғри баҳолай олиш маҳорати, керакли асбоб-анжомлар ва иш қуролларининг бўлиши фаолият самарадорлигини таъминлайди" дейилган хабарда.

Кун янгиликлари

Human хусусий бандлик агентлиги раҳбари Шоҳинур Файзуллаев 10 йилга озодликдан маҳрум қилинди

Пулини ололмаётганлар HUMAN агентлиги биносида. 2019 йилнинг сентябри.

Судланувчидан, шунингдек, 1080 нафардан ортиқ жабрланувчи фойдасига 21 миллиард 192 минг сўмдан зиёд миқдорда моддий зарар ундирилиши белгиланди.

27 январь куни жиноят ишлари бўйича Тошкент вилоят судида судланувчи, Human хусусий бандлик агентлиги Шоҳинур Файзуллаевга нисбатан жиноят ишини кўриб чиқиш бўйича суд жараёни ниҳоясига етди ва суд ҳукми эълон қилинди.

Бу ҳақда Олий суд ахборот хизмати раҳбари Азиз Обидовга таяниб, gazeta.uz хабар қилди.

Дастлабки тергов органи томонидан судланувчи Шоҳинур Файзуллаев Ўзбекистон Республикаси Жиноят кодексининг 168-моддаси («фирибгарлик») 4-қисми «а» банди, 179-моддаси («сохта тадбиркорлик»), 189-моддаси («савдо ёки хизмат кўрсатиш қоидаларини бузиш») 1-қисми, 192−11-моддаси 2-қисми «а» банди («нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суиистеъмол қилиш»), 227-моддаси («ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш») 2-қисми «а» банди ва 243-моддаси («жиноий фаолиятдан олинган даромадларни легаллаштириш»)да назарда тутилган жиноятларни содир этганликда айбланган эди.

Суд ҳукмига кўра, Ш. Файзуллаев Ўзбекистон Республикаси Жиноят кодексининг 227-моддаси 2-қисми «а» банди ва 179-моддаси билан Жиноят-процессуал кодексининг 83-моддаси («реабилитация учун асослар»)нинг тегишли бандларига асосан реабилитация қилинди ҳамда унинг айбловидан Ўзбекистон Республикаси Жиноят кодексининг 192−11-моддаси 2-қисми «а» банди чиқарилди.

Судланувчи Ўзбекистон Республикаси Жиноят кодексининг 168-моддаси 3-қисми «б», «в» бандлари, 189-моддаси 1-қисми ва 243-моддасида назарда тутилган жиноятларни содир этганликда айбли деб топилиб, унга Ўзбекистон Республикаси Жиноят кодексининг 59 («бир неча жиноят содир этганлик учун жазо тайинлаш») ва 61 («жазоларни қўшишнинг ҳисоблаш қоидалари») моддаларига асосан тайинланган ҳар хил турдаги жазоларни қисман қўшиш йўли билан узил-кесил 10 йил озодликдан маҳрум қилиш жазоси тайинланди. Жазони умумий тартибли колонияларда ўташ белгиланди.

Судланувчидан 1080 нафардан ортиқ жабрланувчилар фойдасига 21 миллиард 192 минг сўмдан зиёд миқдорда моддий зарар ундирилиши белгиланди.

Шунингдек, жабрланувчиларга жиноят оқибатида етказилган маънавий зарарларни ундириш масаласида фуқаролик тартибида судга мурожаат қилиш ҳуқуқи тушунтирилди.

  • Тошкентдаги HUMAN хусусий бандлик агентлиги томонидан Германияга деб ёлланган 200 ва Чехияга деб ёлланган 500 ишчи жўнатилмай қолгани, ишчилар агентликка банк орқали тўлаган пулларини қайтариб ололмаётгани тўғрисида биринчи бўлиб Озодлик хабар қилган эди.

Абдулазиз Комилов Ўзбекистоннинг ЕОИИга қўшилиш эҳтимоли юзасидан фикр билдирди

Ўзбекистон ташқи ишлар вазири Абдулазиз Комилов.

"Қайси шаклда, қайси қисмида Ўзбекистон мазкур интеграцион ташкилотларда иштирок этиши мумкинлигини аниқлаймиз. ЕОИИ бўйича кўплаб саволлар пайдо бўляпти. Аввало, бизнинг интеграцияга муносабатимизни билдирсам. Глобаллашув даврида бу - табиий жараён. Ўзбекистон ҳам бу жараёндан четда қолиши мумкин эмас. Биз доим миллий ва давлат манфаатларидан келиб чиқиб, иш тутамиз".

Бу фикрни Ўзбекистон ташқи ишлар вазири Абдулазиз Комилов Халқаро пресс-клубнинг (Тошкент шаҳри) 25 январь куни ўтказилган сессиясида сўзлаган нутқи давомида билдиргани тўғрисида gazeta.uz хабар қилди.

Нутқи давомида Комилов яна бундай деган:

"Ташқи ишлар масаласида асосийларидан бири — йирик, стратегик ҳамкорлик мавжуд давлатлар билан алоқаларни ривожлантириш. Булар, аввало, буюк давлатлар — Хитой, Россия, АҚШ, Япония, Жанубий Корея, Туркия, араб давлатлари ва Европа Иттифоқи, Осиё мамлакатлари. Россия Федерацияси билан нафақат икки томонлама алоқаларни ривожлантирамиз: Ўзбекистон жорий йилда МДҲ раислигини қабул қилган".

Президент мурожаатномасида ташқи сиёсатда интеграция масаласига алоҳида тўхталганди. Шавкат Мирзиёев Евроосиё иқтисодий иттифоқини назарда тутган ҳолда, қуйидаги фикрни билдирган:

"Бу масалани бир йилдан бери ўрганяпмиз. Бу масалани энг аввало халқимизнинг манфаатлари, уларнинг орзу-истакларига таяниб ҳал қиламиз. Депутатлар ва сенаторлар ушбу масалани атрофлича ўрганиб, хулосалар беришни ўз зиммаларига олишлари лозим. Депутатлар қўлига қалам олиб масаланинг ижобий ва салбий томонларини ўргансин. Уларни айтгани бўлади. Маъқул деса — маъқул, номаъқул деса — номаъқул бўлади".

Маданият вазири Озодбек Назарбеков вазирлик жамоасига таништирилди

Маданият вазири Озодбек Назарбеков.

27 январь куни Ўзбекистон Республикаси Маданият вазири Озодбек Ахмадович Назарбековни бош вазир Абдулла Арипов вазирлик ходимларига таништирди.

Бу ҳақда хабар қилган Маданият вазирлиги матбуот хизматига кўра, собиқ Мадания вазири, айни пайтда Сенатнинг Ёшлар, маданият ва спорт масалалари бўйича қўмитаси раиси Бахтиёр Сайфуллаев янги вазирни қутлаган.

"Вазир Озодбек Назарбеков барчага миннатдорчилик билдирган ҳолда, устози Бахтиёр Сайфуллаевни яна бир карра қутлаб, уларнинг тажриба ва маслаҳатларига таянишини билдирди. Шунингдек, вазирлик жамоасига ўз ишончларини айтиб, соҳа ривожи учун камарбаста бўлишларини тилаб қолди", - дейилган хабарда.

Олий Мажлис Қонунчилик палатасининг 22 январь куни ўтган мажлисида депутатларнинг 138 нафари (умумий 150 нафар) Озодбек Назарбеков номзодини маданият вазири лавозимига лойиқ, деб овоз берган эди. Бунга қадар у вазирнинг биринчи ўринбосари лавозимида ишлаган.

ҳукумат раҳбари А. Арипов Ёшлар, маданият ва спорт масалалари бўйича қўмита раиси, Олий Мажлис Сенатининг сенатори Б.Сайфуллаевни бу юксак лавозимлар, шу билан бирга, Ҳурматли Президентимиз томонидан уларга билдирилган ишонч билан қутлади.
Б.Сайфуллаев ўз нутқида, Президентимиз билдирган ишончларига Ватанига, халқига, ишига ва уларга фидоий бўлиб ишлашларига ваъда берди.
Сўнг, бир қатор ташриф буюрганлар М.Ходжиматов, Ф.Абдухаликов, М.Йўлчиева, Ш.Тохтасимовлар Б.Сайфуллаев ва О. Назарбековни қутлаб, сўзга чиқдилар.
Вазир О.Назарбеков барчага миннатдорчилик билдирган ҳолда, устози Б.Сайфуллаевни яна бир карра қутлаб, уларни тажрибалари ва маслаҳатларига таянишини билдирди. Шунингдек, вазирлик жамоасига ўз ишончларини айтиб, соҳа ривожи учун камарбаста бўлишларини тилаб қолдилар.

Ўзбекистон аҳолиси салкам 34 млн. кишига етди

Ўзбекистоннинг доимий аҳолиси сони 2020 йил 1 январь ҳолатига 33905,8 минг кишини ташкил этиб, 2019 йил бошидан 650,3 минг кишига ёки 2,0 фоизга ўсди.

Бу ҳақда Давлат статистика кўмитаси хабар қилди.

Қўмитага кўра, 2020 йил 1 январь ҳолатига Ўзбекистон доимий аҳолиси сонининг 30,5 фоизи меҳнатга лаёқатли ёшдан кичиклар, 58,9 фоизи меҳнатга лаёқатли ёшдагилар ва 10,6 фоизи меҳнатга лаёқатли ёшдан катталардир.

Ўзбекистон аҳолиси 2019 йил 1 октябргача 33 миллион 724 минг 500 кишини ташкил этган.

Соғлиқни сақлаш вазири Хитойга бормай туришни тавсия қилди

Ҳонконгдаги метрода тибниқоб кийиб кетаётган йўловчилар. 2020, 23 январь.

Ўзбекистон соғлиқни сақлаш вазири Алишер Шодмонов фуқароларга «Хитойга, зарурат бўлмаганда, бошқа хорижий давлатларга ҳам вақтинчалик бормасликни» тавсия қилгани тўғрисида вазирлик матбуот хизмати хабар қилди.

Вазирлик баёнотига кўра, Хитойда янги коронавирус оқибатида вафот этганлар сони 80 нафардан, касалланганлар сони эса 2400 нафардан ошган. Хубэй провинцияси ва унинг маъмурий маркази Ухан шаҳрида зарарланишнинг энг кўп ҳолати қайд этилган.

«Коронавирус бўйича юзага келган мураккаб эпидемик вазият дунё миқёсида хавотирли тус олмоқда», — дейди Алишер Шодмонов. Унинг қайд этишича, ушбу эпидемик вазиятга қарши мамлакатда керакли барча чоралар кўрилмоқда. Хаво, автомобиль ва темир йўл транспорти объектларида санитария-эпидемиология ва миграция назорати кучайтирилмоқда. Хитойдан қайтаётган фуқароларга тиббий назорат ўрнатилган.

«Аммо бу хавфсизликни тўлиқ кафолатлайди, дегани эмас. Негаки, коронавирус инфекцияси ҳаво томчилари орқали ўтиши, инсондан инсонга юқиши, шунингдек, касалликнинг яширин даври 1−14 кунгача кечиши жиддий хавотир уйғотмоқда. Шу боис фуқароларимиздан Хитойга, зарурат бўлмаганда, бошқа хорижий давлатларга ҳам вақтинчалик бормасликни тавсия қиламан», — дея вазир сўзлари келтирилган хабарда.

Алишер Шодмонов маълум қилишича, айни пайт Ўзбекистонда коронавирус инфекцияси бўйича эпидемик вазиятнинг барқарорлиги кузатилмоқда. «Хитойдан ва бошқа чет давлатлардан ушбу инфекциянинг кириб келиш ҳолатлари қайд этилмади».

Қашқадарёда 32 ёшли йигит ИИБ ходимлари сўроқ қилганидан кейин оламдан ўтди

Иллюстратив сурат.

Қашқадарё вилоятида тартиб посбонлари билан “мулоқот” ортидан ўлган 32 ёшли йигитга нисбатан мансаб ваколати доирасидан четга чиққанликда гумонланмиш ИИБ ходимлари ҳибсга олинди. Бу ҳақда "Новости Кашкадарьи" Телеграм-канали хабар қилади.

Вилоят прокуратураси маълумотига кўра, ҳодиса 23 январь куни рўй берган. Лангар қишлоғида ўтказилган тезкор-қидирув тадбири чоғида Чироқчи туман ички ишлар идоралари фаолятини мувофиқлаштириш бошқармаси ходимлари қорамол ўғирлаганликда гумонланмиш 32 ёшли эркакни ушлаганлар. Қўлга олинган шахс бўлимга етказилган ва ўша ерда жон берган.

Мазкур ҳодиса юзасидан ИИБнинг камида икки нафар ходимига нисбатан Ўзбекистон Жиноят кодексининг 206-моддаси (Ҳокимият ёки мансаб ваколати доирасидан четга чиқиш) бўйича жиноят иши очилган.

Жиззахда ис газидан уч бола нобуд бўлди

Иллюстратив сурат.

Жиззах вилояти Шароф Рашидов туманидаги Зиёкор маҳалласида уч нафар ака-ука ва уларнинг онаси ис газидан заҳарланган. Бу ҳақда маҳаллий нашрлар Соғлиқни сақлаш вазирлигининг Жамоатчилик билан алоқалар бўлимидан маълумотларига таянган ҳолда хабар қилади.

Фожиа оқибатида 8, 12 ва 14 ёшдаги уч бола ҳаётдан кўз юмган, уларнинг 37 ёшли онаси эса реанимация бўлимида қолаяпти.

Бу йилги қиш мавсумида Ўзбекистонда ис газидан заҳарланишга оид ҳодисалар кўп кузатилмоқда.

Давстатқўм: Ўзбекистонда ўртача ойлик ўтган йили 2 млн 324 минг сўмга етди

Иллюстратив сурат.

Ўзбекистон Республикаси бўйича юридик шахс мақомига эга бўлган корхона ва ташкилотларда ишловчиларнинг ўртача ойлик номинал ҳисобланган иш ҳақи 2019 йил январ-декабр ойларида 2324,5 минг сўмни ташкил этди. Бу ҳақда Ўзбекистон Давлат статистика қўмитасининг галдаги ҳисоботида айтилган.

Мазкур сумма 2018 йилдаги ўртача маошга нисбатан 27,5 фоизга кўпдир.

Ўтган йили энг юқори маошни (ўртача 4 млн 798 минг сўм) банк, суғурта, лизинг, кредит ва воситачилик секторида ишлаганлар олганлар. Энг паст ойлик (1 млн 534 минг сўм) эса соғлиқни сақлаш ва ижтимоий хизматлар кўрсатиш соҳасида ишлайдиганларга берилган.

Ҳудудлар бўйича ўртача ойликнинг энг юқори даражаси Тошкент шаҳри, Навоий ва Тошкент вилоятларида кузатилган. Энг паст даража эса Сурхондарё, Наманган ва Фарғона вилоятларига оиддир.

Маҳаллий нашрлар Хитойда ўқиётган талабаларнинг бир гуруҳи Тошкентга қайтарилганини ёзмоқда

Тошкент аэропорти.

Хитойда таҳсил олаётган ўзбекистонлик талабаларнинг бир гуруҳи Ўзбекистонга қайтарилди. Улар айни пайтда Тошкент халқаро аэропортида ҳар томонлама такомиллаштирилган тиббий текширувдан ўтказилмоқда. Бу ҳақда Дарё нашри 26 январь оқшомида Telegram тармоғидаги “Platforma.uz” канали маълумотига таянган ҳолда хабар тарқатди.

Хабарда Хитойдан Ўзбекистонга қайтган талабалар сонига аниқлик киритмаган. Хитойнинг коронавирус тарқалган Ухан шаҳрида бўлиб турган 30 дан зиёд ўзбекистонлик талаба ватанга қайтарилиши ҳақида аввалроқ Ўзбекистон ташқи ишлар вазирии Абдулазиз Комилов билдирганди.

Ўзбекистон Ташқи ишлар вазирлиги маълумотига кўра, Ухан шаҳрида 250 га яқин ўзбекистонлик талаба яшайди. Уларнинг кўпчилиги семестр якунланганлиги учун янги йил таътилида ватанларига қайтишган.

Айни пайтда Хитой 30 ўзбекистонлик талаба қамалиб қолган Ухандан ташқари яна 9 та шаҳарни ёпиб қўйган.

Сўнгги маълумотларга кўра, ҳозирга қадар Хитой бўйлаб 2000 дан зиёд одамнинг вирус юқтиргани тасдиқланган. Ўлганлар сони эса 56 нафардан ошган.

Спикернинг янги ўринбосари прописка дискриминация эканини айтди

Иллюстратив сурат.

Халқаро ҳуқуқий нуқтаи назардан прописка бу камситиш ёки дискриминациядир. Бу баёнот Қонунчилик Палатаси спикерининг биринчи ўринбосари Акмал Саидов тилидан янгради.

Бу фикрни Акмал Саидов 25 январ куни Халқаро пресс-клубнинг навбатдаги сессияси чоғида айтди.

Тадбирда иштирок этган молия вазири Жамшид Қўчқоров эса прописка тизимининг бекор қилиниши иқтисодиёт ўсишига кўмак беришини урғулади.

“Прописка тушунчаси ҳеч қаерда йўқ. Бизда ҳам йўқ бўлиши керак. Европада нега ривожланиш даражаси юқори, чунки аҳоли у ерда мобил”, деган вазир Ўзбекистонда эса неча йиллардан бери бир шаҳар ёки қишлоқдан силжимасдан яшаб келаётган кишилар борлигини қўшимча қилди.

Ўзбек амалдорлари прописка тизимининг зарарлари ҳақида президент Шавкат Мирзиёев 24 январ куни парламентга йўллаган мурожаатномасида 2020 йил 1 апрелга қадар прописка тизимини ислоҳ қилиш бўйича халқаро тажрибани ўрганиб, аниқ таклифлар ишлаб чиқиш хусусида сўзлаганидан кейин очиқ гапира бошладилар.

Ўзбекистон ўз фуқаролари пойтахтга келиб кетишда махсус рўйхатга туриши керак бўлган ва ва ушбу жараён мураккаблаштириб қўйилган икки давлатдан бири ҳисобланади. Шимолий Корея пойтахти Пхеньянда ҳам Тошкентдаги каби прописка тизими сақланиб қолган.

Ҳуқуқ фаоллари Тошкентдаги прописка тизимининг мантиқсизлиги ҳақида айтиб келишади.

Агентлик: Россиядан депортация қилинган ўзбекистонликлар сони тахминан 300 минг нафар

Ташқи меҳнат миграцияси агентлиги айни пайтда тахминан 300 минг нафар ўзбекистонлик Россиядан депортация қилинганини билдирди.

Kun.uz нашрининг хабар қилишича, агентлик раҳбари Бахтиёр Турсунов, журналистларга берган интервьюсида, бу рақам тахминий экани, аниқ рақамни Ташқи ишлар вазирлиги ойдинлаштириши мумкинлигини айтиб ўтган.

"Биздаги маълумотга кўра, ҳозирги кунда Россия ҳудудидан депорт қилинганлар сони 300 минг нафарни ташкил қилади. Депорт қилинганлар сони статик, яъни ўзгарувчан маълумот бўлиб, депорт қилинганларнинг қўшилиши ёки тақиқнинг ечилиши туфайли мазкур кўрсаткич ўзгариб туради", дея иқтибос келтирди мулозимдан ушбу нашр.

Расман маълум қилинишича, шу кунда хорижда юрган ўзбекистонликлар сони салкам 2 миллионни ташкил қилади.

Буларнинг 80 фоизи Россия, 15 фоизи Қозоғистон, 5 фоизи Жанубий Корея, Туркия, БАА, АҚШ ва бошқа давлатларда ишламоқда.

Айни пайтда, Ташқи ишлар вазирлиги Консуллик-ҳуқуқий департаменти биринчи котиби Рустам Ғозиев ҳозир Россияда бўлган ўзбекистонлик муҳожирлар аниқ сони номаълум эканини ҳам таъкидлаб ўтган.

Қашқадарёга ҳоким бўлган Зойир Мирзаев илк бор "ариқ воқеаси"га изоҳ берди

Қашқадарё вилояти ҳокими Зойир Мирзаев маҳаллий блогерга берган интервьюсида илк бор "ариқ воқеаси"ни изоҳлади.

Мулозим воқеадан катта хулоса чиқаргани, хатолар учун жавоб бериш кераклигини тушуниб етганини айтди.

Қашқадарё вилояти ҳокими Зойир Мирзаев юрист ва блогер Хушнудбек Худойбердиевнинг «Aytingchi…» лойиҳасига интервью берди.

Суҳбатда у Тошкент вилоятининг Оққўрғон туманида олти кишини буғдойни вақтида суғормагани учун жазо тариқаси ариққа туширгани ортидан истеъфога чиқарилгани ҳақида гапирди.

"Ҳеч ким хатодан ҳоли эмас… Келинг, бир нарсани айтай, вақт керак бўлар, балким бир йил ўтар, кўпроқ вақт ўтар, бу нарсанинг таги, негизи нима бўлганини бутун халқимиз билади. Мен, албатта, яна айтаман, бу — менинг хатойим бўлган. Замонни ўзгарганини ҳазм қила олмаганим. Замонга мослаша олмаганим. Сабаби, юқорида айтдимку, очиқлик… Бу нарсани ҳамма ҳам ҳазм қила олмайди", деди Зойир Мирзаев жумладан.

Мулозимларни сувга тушириб таҳқирлагани билан Озодлик муштарийларига яхши таниш бўлган Зойир Мирзаев ўтган йилнинг 29 октябрь куни бош вазир муовини лавозимидан бўшатилганди.

Бунга қадар - 2018 йилнинг октябрида Ўзбекистон Бош вазирининг Қишлоқ ва сув хўжалиги, қишлоқ хўжалиги ва озиқ-овқат маҳсулотларини қайта ишлаш масалалари бўйича ўринбосари лавозимида ишлаб турган пайтида - Зойир Мирзаев Тошкент вилоятининг Оққўрғон туманида 6 кишини ариқдаги сувга тушириб, таҳқирлаган эди.

Президент фармонида Мирзаевнинг ғалла экиш ва суғориш ишларини ташкил этиш жараёнида жиддий камчиликларга йўл қўйгани боис ишдан олингани айтилди. Аммо, Бош вазир Абдулла Арипов "ариқ воқеаси"ни шармандали, деб қоралаган эди.

Ноябрда Зойир Мирзаев Жиззах вилояти Шароф Рашидов тумани ҳокими лавозимига тайинланди, 2019 йилнинг октябрида эса Қашқадарё вилоятига раҳбар бўлди.

ТИВ: Туркиядаги зизилада нобуд бўлганлар орасида ўзбекистонликлар йўқ

Қутқарувчилар зилзиладан кейин вайроналар остида қолиб кетган аёлни олиб чиқмоқда, 25 январь, 2020 йил

Ташқи ишлар вазирилиги (ТИВ) Консуллик-ҳуқуқий департаменти Туркиянинг шарқидаги кучли зилзила оқибатида вафот этган ва жароҳатланганлар орасида Ўзбекистон фуқаролари қайд этилмаганини маълум қилди.

Расмий хабарга кўра, вазият Анқара шаҳридаги элчихона ва Истанбул шаҳридаги Бош консулхона назоратида.

24 январь куни Туркия шарқида 6,8 магнитудали зилзила рўй берди.

Шу кунга қадар нобуд бўлганлар сони 31 кишига етди, вайроналар остида қолиб кетганлар ҳисобига қурбонлар ортиши мумкинлигидан хавотирлар бор. Жароҳатланганлар сони эса 800дан ортиқ.

Зилзила эпимаркази Туркия шарқидаги Элазиғ ва Малатя вилоятларида бўлди. Ерости силкинишлари қўшни Сурия ва Ироқ, шунингдек, Ливанда ҳам сезилди.

Консуллик ҳуқуқий департаменти Туркия ҳудудида бўлиб турган ватандошлардан зарур вазиятда Ўзбекистоннинг Aнқара шаҳридаги элчихонаси (тел.: +90 312-441-17-46, +90 312-441-38-71/72) ёки Истанбул шаҳридаги Бош консулхонасига (тел.: +90 212-323-20-37, +90 212-229-00-75) мурожаат қилишни сўрамоқда.

Комилов Хитойда қамалиб қолган ўзбек талабалари ватанига қайтарилишини айтди

Ўзбекистон Ташқи ишлар вазири Абдулазиз Комилов Хитойнинг коронавирус тарқалган Ухан шаҳрида бўлиб турган 30дан ортиқ ўзбекистонлик талаба ватанга қайтарилишини ваъда қилди.

25 январ куни Тошкентда Халқаро пресс-клуб сессиясида бу ҳақда айтган Комилов аниқ саналарга тўхталмади.

"Ҳозир улар билан бирга ишлаяпмиз. Қайтамиз, дейишса, қолинглар дея олмаймиз-ку, тўғрими? Албатта, уларни олиб келамиз. Соғлиқни сақлаш вазирлиги билан бирга, улар келишлари билан текширувдан ўтказилади", – деди Комилов.

Ўзбекистон Ташқи ишлар вазирлигининг хабар беришича, Ухан шаҳрида 250 нафар атрофида асосан ўзбекистонлик талабалар яшайди.

Уларнинг кўпчилиги семестр якунланганлиги учун янги йил таътилида Ўзбекистонга қайтишганди.

Айни пайтда Хитой 30 ўзбекистонлик талаба қамалиб қолган Ухандан ташқари яна 9 шаҳарни ёпиб қўйган.

Ҳозирга қадар мамлакат бўйлаб 1300дан ортиқ одамнинг вирус юқтиргани тасдиқланган. Ўлганлар сони 40дан ошди.

АҚШ давлат котиби Помпео Ўзбекистонга феврал ойида келиши маълум қилинди

АҚШ давлат котиби Майкл Помпео 2–3 февраль кунлари Тошкентга келади.

Бу ҳақда 24 январь куни АҚШ Давлат департаменти ахборот хизмати хабар қилди.​

Хабарда айтилишича, ташриф Помпеонинг Буюк Британия, Украина, Беларусь, Қозоғистон ва Ўзбекистонга саёҳати доирасида амалга оширилади.

АҚШ давлат котиби Тошкентда президент Шавкат Мирзиёев ҳамда ташқи ишлар вазири Абдулазиз Комилов билан учрашади.

Шунингдек, у "Марказий Осиё—АҚШ" ("C5+1") форматидаги Ўзбекистон, Қозоғистон, Қирғизистон, Тожикистон ва Туркманистон ташқи ишлар вазирлари билан учрашувда иштирок этади.

Помпео Қўшма Штатларнинг Марказий Осиё минтақаси янги стратегиясини қўллаб-қувватлашини тасдиқлаган, дейилади хабарда.

Майкл Помпеонинг Украина, Беларусь, Қозоғистон, Ўзбекистон ва Кипрга ташрифи 3–7 январь кунлари ўтиши режалаштирилганди, аммо Ироқдаги вазиятнинг чигаллашуви, Америка элчихонасига ҳужум туфайли ташриф кечиктирилганди.

Бандлик вазирлиги яна бир хусусий агентлик лицензиясини вақтинча тўхтатди

Жорий йилнинг 17 сентябр куни HUMAN хусусий бандлик агентлигидан пулини ололмаган 70 яқин ўзбек мардикори Ўзбекистон Вазирлар Маҳкамаси биноси олдига норозилик намойишига чиқди.

“Recruit consulting work xususiy bandlik agentligi” МЧЖга Ўзбекистон Республикасидан ташқарида иш излаётган шахсларни ишга жойлаштириш фаолияти билан шуғулланиш учун берилган лицензиянинг амал қилиши вақтинчалик тўхтатилди”¸ деб хабар берди Бандлик ва меҳнат муносабатлари вазирлиги ўз Telegram каналида.

Бундай қарорга вазирликка “Recruit consulting work xususiy bandlik agentligi” МЧЖ фаолияти устидан фуқаролардан келган шикоят аризалари сабаб бўлган.

Вазирлик қарори билан “Recruit consulting work xususiy bandlik agentligi” МЧЖ лицензиясининг амал қилиши 10 иш куни муддатига тўхтатилган ва агентликдан 10 кун давомида фуқаролар билан тузилган шартнома шартларини бажариш талаб этилган.

Вазирликдан лицензия олган хусусий агентликлар қонунчиликка мувофиқ¸ суд ҳукми билан лицензиядан маҳрум қилиниши мумкин.

Ўзбекистонликларни миллионлаб сўм эвазига хориж¸ хусусан¸ Европа давлатларига яхши ҳақ тўлайдиган ишга жўнатишни ваъда қилиб¸ бу ваъдасини бажармаëтган хусусий бандлик агентликлари сони ошиб бормоқда.

Озодликка келаëтган шикоятлар ортидан¸ бундай агентликларнинг бир қанчаси фаолияти тўхтатилди¸ уларга нисбатан жиноят иши қўзғатилди.

Президент коррупцияга қарши курашувчи алоҳида орган ташкил этишни сўради

2019 йилги халқаро ҳисоботда ҳам Ўзбекистон дунëнинг энг коррупциялашган давлатлардан бири бўлиб қолмоқда.

24 январь кунги парламентдаги йиллик мурожаатида президент Шавкат Мирзиëев Ўзбекистондаги коррупцияни тараққиëтга ғов бўлаëтган “ëвуз бало” сифатида таърифлади.

Мирзиëев таъкидича¸ президент номига келиб тушаëтган¸ матбуот ва ижтимоий тармоқлардаги шикоятларнинг аксарияти коррупция¸ хусусан¸ ер ажратиш, кадастр, қурилиш, лицензия, божхона, банк, давлат харидлари каби соҳалардаги коррупция билан боғлиқ.

- Ушбу вазифалар ижросини тизимли ташкил этиш мақсадида парламент ва Президентга ҳисоб берадиган, коррупцияга қарши курашишга масъул бўладиган алоҳида орган ташкил этишни таклиф этсам, сизлар нима дейсизлар?! деб хитоб қилган Мирзиëев ўз администрациясига Олий Мажлис билан биргаликда тегишли фармон ҳозирлашни буюрди.

Ўзбекистондаги ҳуқуқни муҳофаза қилиш идораларининг деярли барчасида коррупцияга қарши курашувчи алоҳида бошқармалар мавжуд.

Аксар ўзбекистонликлар фикрича¸ айнан коррупцияга қарши кураш ваколатли берилган мазкур бошқармаларнинг ўзи энг коррупциялашган тизимга айланган.

Президентликка келганидан кўп ўтмай Мирзиëевнинг ўзи ҳам прокуратура ва МХХ тизими¸ хусусан¸ уларнинг коррупцияга қарши курашга масъул собиқ расмийларини “ўғрилар” деб атаган эди.

Ўтган йили Ўзбекистон собиқ Бош прокурори Рашитжон Қодиров билан бирга судланган 12 нафар собиқ амалдорнинг аксарияти Бош прокуратуранинг Коррупцияга қарши кураш департаментини бошқарган шахслардир.

Узоқ йиллик қамоққа ҳукм этилган ака-ука Ҳаëт ва Жавдат Шарифхўжаевлар эса¸ МХХнинг айнан коррупцияга қарши фаолиятига масъул бўлган собиқ амалдорлардир.

Дунë мамлакатларидаги коррупция вазиятини кузатиб борадиган нуфузли Transparency International ташкилотининг 2019 йилги Коррупция индексида Ўзбекистон 180 давлат рўйхатида 153 ўрин - энг коррупциялашган давлатлар сафига қўйилди.

2018 йилги рўйхатда Ўзбекистон 158-ўринга қўйилган эди.

Мирзиëев суд қарорлари бўйича прокуратура ваколатини чеклашни буюрди

Олий Мажлис палаталарига қилган йиллик Мурожаатида президент Шавкат Мирзиëев судлар мустақиллиги муаммосига ҳам тўхталди.

Дастлабки терговда давом этиб келаётган қонун бузилиш ҳолатларини фақат ва фақат судларнинг ҳақиқий мустақиллигига эришиш орқали бартараф этиш мумкин¸ деган президент адлия тизимидаги ўзгаришлар давом этишини таъкидлади.

Мирзиëев тилга олган бундай ўзгаришлар орасида суд қарорларини прокуратура томонидан чақириб олиб, ўрганиш амалиётини чеклаш талаби бор.

Энди фақат иш юзасидан шикоят келиб тушган ҳолдагина прокурор суд қарорини олиб ўрганиши мумкин”¸ деди ўз мурожаатида Мирзиëев жумладан.

Ўз маърузаси давомида Мирзиëев:

- Давлат идоралари мансабдорлари шуни чуқур англаб олсинлар: судлар мустақиллигини таъминлаш масаласи бундан буён ҳам шахсан Президентнинг қаттиқ назоратида бўлади, деди.

Ўзбекистон Конституциясининг 11-моддасига кўра¸ Ўзбекистон Республикаси давлат ҳокимиятининг тизими - ҳокимиятнинг қонун чиқарувчи, ижро этувчи ва суд ҳокимиятига бўлиниши принципига асосланади.

Конституция ва давлат бошқарувининг халқаро стандартларига кўра¸ президент ижро ҳокимиятини бошқаради ва ҳокимиятнинг бу учала тизими бир-биридан мустақилдир.

1995 йилгача Ўзбекистонга келиб муқим яшаëтган 50 минг одамга автоматик фуқаролик берилиши мумкин

Ўзбекистон президенти 24 январь куни парламентда қилган йиллик мурожаатида “фуқаролик масалаларига оид қонунчиликни такомиллаштириш орқали инсон ҳуқуқларини таъминлаш” зарурати ҳақида гапирди.

Мамлакатимизда узоқ вақтдан бери яшаб келаётган, лекин Ўзбекистон фуқароси деган ҳуқуқий мақомга эга бўла олмаётган минглаб юртдошларимизнинг ана шу муаммосини қонуний ҳал қилиш бўйича ташкилий-ҳуқуқий чораларни кўриш вақти келди, деб ўйлайман.

Хусусан, 1995 йилгача Ўзбекистонга келган ва шундан буён истиқомат қилаётган шахсларга Ўзбекистон Республикаси фуқаролиги автоматик тарзда берилиши даркор.

Бу орқали 50 мингга яқин юртдошларимизнинг фуқаролик билан боғлиқ, узоқ йиллардан буён ечилмай келаётган муаммолари ҳал этилади.

Вазирлар Маҳкамаси бу масалани Олий Мажлис Қонунчилик палатаси билан ҳамкорликда кўриб чиқиб, жорий йил 1 майга қадар тегишли қонун лойиҳаларини тақдим этиши лозим”¸ деди ўз мурожаатида Шавкат Мирзиëев.

СССР тарқаганидан сўнг Ўзбекистонга кўчиб келган¸ хусусан¸ Тожикистондаги фуқаролик урушидан қочган ўн минглаб ўзбеклар Ўзбекистонда муқим яшаб келаëтганига қарамай улар ҳозирга қадар “фуқаролиги йўқ шахс” мақомида қолмоқда.

Мирзиëев ҳокимлар ваколатини қайта кўриб чиқишни топширди (ВИДЕО)

24 январь куни Ўзбекистон Олий мажлисининг иккала палатаси қўшма мажлисида йиллик Мурожаатини тақдим этган президент Шавкат Мирзиëев¸ ҳокимлар ваколатини қайта кўриб чиқиш лозимлигини билдирди.

Амалдаги қонун ҳужжатларида ҳокимликларнинг 300 га яқин вазифа ва функциялари назарда тутилган. Шундан 175 таси мазмун-моҳиятига кўра ҳокимларнинг асосий вазифалари тоифасига кирмайди ва турли идораларнинг функцияларини такрорлайди.

Бу эса иш сифати ва ижро интизомига салбий таъсир кўрсатиши табиий.

Шу сабабли Олий Мажлис Сенатига Адлия вазирлигини жалб этган ҳолда, шу йилнинг биринчи ярмида ҳокимларнинг ваколатларини қайта кўриб чиқиш ва уларга хос бўлмаган ҳамда бир-бирини такрорлайдиган функцияларни тегишли органларга ўтказишни таъминлаш бўйича таклиф тайёрлаш топширилади”¸ деди ўз мурожаатида президент.

Мирзиëев шунингдек вилоят ва туман ҳокимлари ўз дастурлари ва уларнинг ижроси тўғрисида вилоят кенгашларида ҳисобот берадиган тизим жорий қилинишини билдирди.

Шавкат Мирзиëев президентликка келганидан кўп ўтмай у туман¸ шаҳар ва вилоят ҳокимларини ўзининг жойлардаги конституцион вакили сифатида шахсан ўз ҳимоясида эканини таъкидлаган эди.

- Ҳоким президентнинг Конституциявий вакили. Ҳокимнинг айби бўлса, биринчи менга ёзасан, кейин биз бу ҳокимни жазога тортамиз. Сизлар эса олдин ҳокимни қамаб қўйиб, кейин хат ёзасизлар. Ким шу ишни қилса, бу ишни қилган ташкилотнинг раҳбари жиноий жавобгарликка тортилади.Ана шуни ҳамма билиб олсин, -деган эди 2017 йил декабрида Мирзиёев.

Президент "погонликларга" (асосан прокуратура¸ ДХХ назарда тутилмоқда -таҳр.) ҳокимларнинг айтганини хоҳласа ҳам¸ хоҳламаса ҳам қилиши шартлигини ¸ тергов идораси уларни терговга чақирса¸ уларнинг ўзини жиноий жавобгарликка тортишидан огоҳлантирганидан сўнг ҳокимлар қонундан ташқаридаги шахсларга айланди.

Ҳокимларнинг истаган қарор билан фермерлар ерини тортиб олиб¸ истаган ҳудудни бузиш ҳақида ҳеч кимга изоҳ ва ҳисоб бермасдан буйруқ чиқариб¸ бу ишларни амалга ошириб келгани ортидан кейинги уч йил ичида Ўзбекистоннинг турли вилоятларида жиддий норозиликлар кузатилди.

Хусусан¸ Қашқадарëда тадбиркор янги дўконини шахсан ўзи бульдозерга ўтириб бузмоқчи бўлган ҳоким ўринбосари устига бензин сепиб ëқиб юборган бўлса¸ Хоразмда аҳоли уйлари бузилишига қарши намойишга чиққан эди.

Россиядаги ички ишлар идораларида сақланаётган ўзбек муҳожирлари сони 3300 нафардан ошган

Россиядаги депортация марказларидан бири (иллюстратив сурат).

Ўзбекистонлик меҳнат муҳожирларидан 3323 нафари Россия Федерациясидаги ички ишлар органларида сақланмоқда. Бу ҳақда, маҳаллий нашрлар хабарига кўра, Бандлик ва меҳнат муносабатлари вазирлиги ҳузуридаги ташқи меҳнат миграцияси масалалари агентлиги бошлиғи Бахтиёр Турсунов 23 январь куни Ахборот ва оммавий коммуникациялар агентлигида бўлиб ўтган матбуот анжуманида билдирган.

“Аксарият мигрантлар тил билмасдан, касб билмасдан чет элга боришмоқда ва қийинчиликларда қолишмоқда. Бошқа давлатнинг қонунларини билмасдан, ўзлари билмаган ҳолда қоидабузарликлар қилишмоқда. Бунинг оқибатида эса давлатдан чиқариб юборадиган депортациялар олишмоқда", деган Меҳнат вазирлиги мулозими.

Матбуот анжуманида муҳожирлар ҳаёти, иш шароитларини билиш ва уларга ҳуқуқий ёрдам кўрсатиш бўйича 2019 йили Россияда бешта консуллик идораси ташкил қилингани, улар муҳожирлар аҳволини ўрганиш билан бир қаторда турли хил жиноятлар билан қамоққа тушганларни бир йилда икки-уч марта кўриб, яшаш тарзини ўрганиб келаётгани айтилган.

Мирзиёев кластерларнинг 20 фоизи коррупцияга ўтиб кетаётганини эътироф этди

Ўзбекистон президенти Шавкат Мирзиёев.

Ўзбекистон президенти Шавкат Мирзиёев мамлакатда пахта ва ғалланинг харидидан босқичма-босқич воз кечилажагини урғулади. Президент бу ҳақда Олий Мажлис палаталарининг илк қўшма мажлисида сўзлади.

“Пахта, мева-сабзавот, ғаллачилик, балиқчилик соҳаларида дунёқарашимизга кластер деган сўз кириб келяпти. Бу ҳам ҳозир биринчи қадамларимиз. Жойларда назорат бўлмагани учун, кластерларнинг 20 фоизи ҳам коррупцияга ўтиб кетяпти. Нимага десангиз, улар ҳали банк билан ҳисоб-китоб қилишга ишонмаяпти. “Ўғри бўлсам, битта раҳбарга бориб, 20 фоиз берсам, кечаси тинч ухлайман. Банк билан ишласам, тинч ухламайман”, дейди. Мана бизнинг дунёқарашимиз. Бу билан узоққа бора олмаймиз”, дея иқтибос келтиради Ш.Мирзиёев сўзларидан Кун.уз нашри.

Президент кластер фермерни бой қиладиган тизим бўлиши лозимлигини таъкидлаб, Ўзбекистонда фермер давлат томонидан ҳеч қачон камситилмаслигига ваъда берган.

Мирзиёев ўз сўзида “мева-сабзавотчиликда экспорт ҳажмини 2025 йилда камида 5 миллиард доллардан ошириш, бунинг учун кооперация ва кластер тизимини жадал жорий этиш; сақлаш, ташиш ва қайта ишлашнинг яхлит ва замонавий инфратузилмасини ташкил этиш ва янада кенгайтириш лозим”лигига эътибор қаратган.

Ўтган йили 19 мингдан зиёд ўзбекистонлик Россия фуқаролигини олди

Иллюстратив сурат.

2019 йили 19,4 минг нафар ўзбекистонлик Россия Федерацияси фуқаросига айланди.

Россия Ички ишлар вазирлиги тарқатган маълумотга кўра, ўтган йили қарийб 498 минг нафар чет эллик Россия паспортига эга бўлган.

Улардан аксариятини украиналиклар (300 минг) ташкил этган. Ундан кейинги ўринларни Қозоғистон (50,5 минг), Тожикистон (19,4 минг), Ўзбекистон (19,4 минг), Қирғизистон (9,3 минг) ва Туркманистон (1,4 минг) фуқаролари эгаллаган.

Туризмни ривожлантириш қўмитаси раиси бош вазир ўринбосарига айланди

Иллюстратив сурат.

Ўзбекистоннинг янги кабинетида Туризмни ривожлантириш давлат қўмитаси раиси бош вазирга ўринбосар ҳам бўлади. Бу тартиб президент Шавкат Мирзиёев томонидан имзоланган “Ўзбекистон Республикаси Вазирлар Маҳкамасининг ижро этувчи тузилмасини такомиллаштиришга доир қўшимча чора-тадбирлар тўғрисида”ги қарорида акс этган.

Адлия вазирлиги Телеграм-каналида қайд этилишича, ҳужжат билан Бош вазирнинг таълим ва соғлиқни сақлаш масалалари бўйича ўринбосари, Бош вазир ўринбосари – Туризмни ривожлантириш давлат қўмитаси раиси,лавозимлари киритилган, Инвестициялар, экспортни қўллаб-қувватлаш ва ташқи иқтисодий алоқалар масалалари, таълим ва соғлиқни сақлаш масалалари котибиятлари кабилар ташкил этилган.

Айни пайтда Вазирлар Маҳкамаси ижро этувчи тузилмасида Бош вазирнинг биринчи ўринбосари – транспорт вазири лавозими тугатилиб, ўрнига Бош вазирнинг биринчи ўринбосари лавозими киритилган.

Қарор билан ҳукумат ижро этувчи тузилмасида бир қатор лавозимлар ва котибиятлар тугатилиб, бошқа лавозимлар киритилган ва тегишли котибиятлар ташкил этилган. 22 январь куни тасдиқланган янги тузилма 241 нафар штат бирлигидан иборат бўлади.

ССВ: Коронавирус тарқаган Хитойдан Ўзбекистонга келаëтган учқич йўловчилари алоҳида назоратга олинди

Айтилишича¸ Ўзбекистонга Хитойдан бир ҳафтада 11 та авиақатнов йўлга қўйилган.

Хитойда бошланиб¸ бошқа давлатларга ҳам тарқай бошлаган коронавирус эпидемиясининг Ўзбекистонда ëйилиши олдини олиш мақсадида «Uzbekistan Airports» АЖ ҳамда «Ўзбекистон темир йўллари» АЖ Тиббий-санитария хизмати томонидан Хитойдан келаëтганларни тиббий мониторингдан ўтказиш чоралари кўрилмоқда.

Бу ҳақда 23 январь куни Соғлиқни сақлаш вазирлиги ва Санитария-эпидемиологик осойишталик агентлиги расмийлари маълумот берди.

Ахборот ва оммавий коммуникациялар агентлигида мазкур вазиятга оид ўтказилган матбуот анжуманида вазирлик мутахассислари Вирусология илмий текшириш институтида коронавирусга чалингани гумонланган беморларни қабул қилиш учун махсус бокс тайёрлаб қўйилганини билдирди.

Расмийлар Хитойнинг Ухань шаҳрида бошланган бу коронавируснинг Ўзбекистонга кириб келиши олдини олиш мақсадида ҳар бир чегара пунктлари, хусусан 11та аэропорт тепловизорлар билан жиҳозлаб чиқилгани ва ходимларнинг махсус тайёргарликдан ўтказилганини маълум қилди.

Айтилишича¸ Хитойдан Ўзбекистонга келаëтган рейс йўловчилари алоҳида назоратга олинган¸ мамлакат сарҳадларидаги 37 та божхона постига бу вазият бўйича керакли кўрсатмалар берилган.

“Биз нафақат Хитой йўналиши бўйича, балки республикамизга кириб келишнинг барча йўналишлари бўйича эпидемиологик назорат ўрнатганмиз. Барча чегара пунктлари керакли жиҳозлар, жумладан тепловизорлар билан таъминланган”¸ деган жумладан Соғлиқни сақлаш вазирлиги ҳузуридаги Санитария-эпидемиологик осойишталик агентлиги директори Баҳром Алматов.

Айни пайтда Вазирлик матбуот котиби Фурқат Санаев Жаҳон Соғлиқни сақлаш ташкилоти 23 январь куни юборган маълумотда Хитойда кузатилаётган коронавируснинг дунё бўйлаб тарқалиб кетиш хавфи камлиги, жиддий хавотирга ҳожат йўқлиги билдирилганини айтди.

Давомини ўқинг

Кўрмай қолган бўлсангиз

XS
SM
MD
LG