Линклар

Шошилинч хабар
03 июн 2020, Тошкент вақти: 02:56

Халқаро хабарлар

Олти ойдан бери намойишлар тинмаётган Ҳонконгда маҳаллий кенгашларга сайлов бўлиб ўтди

Ҳонконгдаги намойишлар пайтида олинган сурат.

Олти ойдан бери аксилҳукумат намойишларини бошидан кечираётган Ҳонконгда 24 ноябрь куни маҳаллий кенгашларга сайлов бўлиб ўтди. Сайловда 2 миллион 900 минг сайловчи овоз бергани айтилмоқда.

-Биз жорий йилда сайловларни ўтказишда жиддий қийинчиликларга дуч келдик, аммо мен 30 мингдан ортиқ давлат хизматчисининг ҳатти -ҳаракатлари билан нисбатан тинч вазият юзага келганини ва сайлов муваффақиятли ўтганини эълон қилишдан мамнунман,- деди Ҳонконг ҳокими Кэрри Лэм.

Мазкур сайлов кўпроқ демократик эркинликлар берилиши талаб қилиниб намойишлар ўтаётган Ҳонконгнинг амалдаги ҳукумати учун имтиҳон бўлди.

Полиция норозиларни тарқатиш учун куч ишлатиб, кўздан ёш сиздирувчи газ ва резина ўқлардан фойдаланишга мажбур бўлди. Норозилар эса полицияга қарши “Молотов коктейллари” ва тошларни қўлладилар.

Кун янгиликлари

Қозоқ-ўзбек чегарасидаги тожикистонликлар юртига қайтолмай сарсон бўлмоқда

Қозоқ-ўзбек чегараси яқинидаги автовокзалда яшаётган тожикистонликлар, Туркистон вилояти, 2020 йил 2 июни.

Қозоғистонда мардикорлик билан кун кўрган юзлаб тожикистонлик 10 ҳафтадан бери Ўзбекистон орқали ватанига ўтиб кетиш илинжида қозоқ-ўзбек чегарасида юрибди. Маълумотларга кўра, Ўзбекистон томони уларни ўз ҳудудига қўймаяпти, Тожикистон расмийлари эса уларни олиб чиқиб кетишга шошилмаяпти.

Ораларида аёллар, қариялар ва болалар бўлган тожикистонликлар Озодликнинг қозоқ хизмати мухбирига Қозоғистон билан Ўзбекистон ўртасидаги “Жибек жўли” божхона маскани яқинида жойлашган автовокзал ҳудудида яшаётганларига 2,5 ойдан ошганини маълум қилганлар.

Чегарада қолиб кетган тожикистонликлар ҳукумат уларни ватанга қайтаролмай, кўчада қолдирганидан норозилик билдирганлар. Бу ерда одамлар озиқ-овқат тақчиллигига дуч келганлар. Ерда ётишга мажбур бўлаётган бу одамларнинг ювинадиган жойлари ҳам йўқ..

Озиқ-овқатни бизга маҳаллий турғунлари олиб келиб бериб турибди. Ухлаш ва ювинишга жой йўқ. Ким нима олиб келса, шуни еяпмиз”, деди исмини айтишни истамаган тожикистонликлардан бири.

“Жибек жўли” қишлоқ округи ҳокими Талгат Азимбердиев автовокзал ҳудудида 260 дан зиёд одам яшаётганини маълум қилди. Унга кўра, Тожикистоннинг Қозоғистондаги элчихонасига аввалроқ бу одамлар ҳақида хабар берилган, бироқ тожик расмийлари ҳалигача улар учун транзит ташкил қилмаган.

Божхона масканида юрган ва ўзини Тожикистоннинг Қозоғистондаги элчихонаси ходими деб таништирган киши вазият бўйича изоҳ беришдан бош тортган.

Озодликнинг қозоқ хизмати мухбири божхона масканида турган пайтида бу ердан ўзбекистонлик меҳнат муҳожирлари ўтаётганини кўрган. Ўзбекистоннинг Қозоғистондаги элчихонаси ходими Бахтиёр Камолов бу ердан ҳар куни Ўзбекистонга мингга яқин одам ўтаётганини айтган. Айни пайтда у юртига ўтиб кетмоқчи бўлган тожикистонликларга Ўзбекистон чегарасидан ўтишга нима учун рухсат берилмаётганини изоҳлай олмаслигини билдирган.

Қозоғистон ва Ўзбекистон коронавирус ёйилишига тўсқинлик қилиш учун март ойида чет элликлар учун ўз чегараларини ёпган. Ўзбекистонда COVID-19 инфекциясига чалинишга оид илк ҳолат 15 март куни қайд этилган.

Қозоғистон Ташқи ишлар вазирлиги расмийси Айбек Смадияров 2 июнь куни ўз мамлакати тожикистонликларнинг чиқиб кетишига тўсқинлик қилмаётгани ва юзага келган вазият ҳақида Тожикистонни хабардор қилганини билдирган. Смадияровга кўра, Тожикистон томони ўз фуқароларини автобусда олиб чиқиб кетиш учун Тошкент билан музокаралар олиб бормоқда ва ҳозирда ўзбек расмийларидан бу борада жавоб кутмоқда.

Ўзбекистон Қозоғистоннинг Туркистон шаҳрида 5 минг кишилик масжид қурмоқда

Туркистонда 5 мингдан зиёд кишига мўлжалланган улкан масжид қуриляпти. Ўтган йили тамал тоши қўйилган масжид, Kazinform ахборот агентлиги хабарига кўра, Ўзбекистоннинг Туркистонга туҳфасидир.

Мазкур лойиҳа Ўзбекистон президенти Шавкат Мирзиёев томонидан қўллаб-қувватланаётганини қайд этган агентликнинг ёзишича, Туркистон шаҳрида барпо этилаётган масжиднинг умумий майдони 5 минг квадрат метрни ташкил қилади. Масжид ташқарисида эса яна 3 минг киши намоз ўқиши мумкин.

Архитектура мажмуасидан мусулмон маросимлари ўтказиладиган жойлар, конгресс зали, тўй саройи, 180 ўринли мадраса, кутубхона, ошхона, спорт майдончаси, 500 машинага мўлжалланган автопарк ва фаввора жой олиши режаланган.

АҚШ коронавирусга қарши кураш доирасида Туркманистонга қўшимча 500 минг доллар ажратди

Туркманистондаги шифохоналардан бири.

АҚШ ҳукумати COVID-19 нинг олдини олиш бўйича Туркманистон кўраётган чора-тадбирларни дастаклаш учун бу мамлакатга қўшимча 500 000 доллар маблағ ажратди.

АҚШнинг Туркманистондаги элчихонаси томонидан 1 июнь куни тарқатилган маълумотга кўра, Қўшма Штатлар бу мамлакатдаги барча ҳамкорларига тақдим этган давлат ресурсларининг умумий ҳажми 1 миллион 420 минг долларга етган.

Қўшимча молиялаштириш коронавирус инфекциясининг олдини олиш ва унга қарши курашиш уринишлари ва хатарлари тўғрисида маълумот тарқатиш ишини яхшилаш учун Туркманистондаги ЮНИСЕФ (БМТнинг болалар жамғармаси) ташкилотига тақдим этилади.

Тақдим этилган маблағлар ҳисобидан Туркманистон Таълим вазирлиги гигиена амалиётини олға суради ҳамда мактабларда ва бошқа муассасалардда COVID-19 профилактикаси учун қўшимча материаллар тақдим қилади.

АҚШ элчихонаси қайдича, “Туркманистон ўз ҳудудида COVID-19 билан боғлиқ тасдиқланган бирор-бир ҳолат ҳақида маълум қилган эмас, бироқ COVID-19 ёйилишининг олдини олиш ва келажакдаги муҳтамал ҳолатларга ҳозирлик кўриш бўйича чоралар кўрган”.

Шу йил апрель ойида АҚШ COVID-19 пандемиясидан ҳимояланиш учун тиббий кўмак шаклида Туркманистон учун 920 минг доллар ажратганди.

Жаҳон бўйлаб коронавирус туфайли оламдан ўтганлар сони 375 мингдан ошди

Бразилиялик врачлар коронавирусга чалинган бемор билан, 2020 йил май ойи.

Коронавирус инфекцияси туфайли ҳаётдан кўз юмганлар сони дунё бўйлаб 375 минг нафардан ошиб кетди. Жаҳон бўйлаб коронавирусга чалинганлар сони эса 6 миллион 300 минг нафарга етиб қолди.

Жонс Хопкинс университети маълумотига кўра, ҳозирда коронавирус қурбонлари сони бўйича АҚШ дунёда биринчи ўринда бормоқда. Қўшма Штатларда бу иллат туфайли қазо қилганлар сони 105 мингдан ошган. Ўлимлар сони бўйича иккинчи ўринни Буюк Британия (39 мингдан кўпроқ ўлим ҳолати), учинчи ўринни эса Италия (қарийб 33 минг ўлим) эгаллаб турибди.

Сўнгги маълумотларга кўра, шу кунда Бразилия пандемиянинг янги марказига айланган. У ерда COVID-19 инфекциясини юқтириб олиш билан боғлиқ 526 мингдан зиёд ҳолат қайд этилган. Бу мамлакат ҳозирда коронавирусга чалинганлар сони бўйича АҚШдан кейин (1,8 миллиондан кўпроқ бемор) иккинчи ўринга чиқиб олган. Коронавирус юқтириб олганлар сони бўйича дунёда учинчи ўринда Россия (423 мингдан кўпроқ) бормоқда.

Петербурглик тадбиркор ўзбекистонлик муҳожирлар томонидан калтакланганидан шикоят қилди

Петербург полициясига 1 июнь куни бир тадбиркор мурожаат қилиб, ўзини ўзбекистонлик муҳожирлар калтаклаб, фуқаролик никоҳидаги хотинини олиб қочиб кетганини маълум қилган. Бу ҳақда Piter.TV ҳуқуқ-тартибот идораларидаги манбаси сўзларига таянган ҳолда хабар қилди.

Аризачига кўра, 1 июнь оқшомида “Автово” метро станцияси олдида унинг “Лада” автомобилига ўзбекистонлик икки киши ўринган. Улар Тярлево қишлоғигача бирга кетганлар. Ўша ерда ўзбекистонликлар тадбиркорни машинадан тушириб, калтаклашган. Кейин эса улар автомобилга ўтириб, жабрланувчининг хотини билан бирга йўлда давом этганлар.

Жиноят қидурув бўлими ходимлари тез орада машина билан аёлни топганлар. Аёл талончилар унга пичоқ ўқталиб, ёнидаги 3 минг рублни олиб қўйганларини айтган. Шундан сўнг улар ҳодиса жойидан ғойиб бўлганлар.

Қирғиз расмийси Ўзбекистон билан Сўх-Риштон йўли масаласи муҳокама қилинмаганини айтмоқда

2019 йили бир муддатга очилган Сўх-Риштон йўли.

Қирғизистон билан Ўзбекистон расмийлари Сўх-Риштон йўлини очишга оид масалани муҳокама қилганлари йўқ.

Бу ҳақда Озодликнинг қирғиз хизматига бош вазир ўринбосари Акрам Мадумаров 2 июнь куни билдирган.

Ҳукумат мулозими чегарадаги можаронинг келиб чиқишига аввало чегарада аниқланмаган участкалар борлиги, яйлов ва сувдан фойдаланиш масалалари сабаб бўлганини айтаркан, Сўх-Риштон йўлини очиш учун икки томоннинг розилиги билан бир қаторда бунинг Евросиё Иқтисодий Иттифоқи тартиб-қоидаларига тўғри келиши талаб қилинишини айтди.

“Йўлни очиш масаласи ҳеч қачон бир томонлама ҳал бўлмайди. Албатта иккинчи томоннинг розилиги лозим. Агар сўхликлар Ўзбекистон бош вазири олдига масала қўяётган бўлса, бу ҳукумат даражасида ҳал қилиниши шарт. Ҳал қилинганда ҳам икки томоннинг манфаатларини эътиборга олиш билан ҳал этилиши керак. Шу сабабли бу масала ҳал бўлди, дейишдан йироқмиз. Бу музокараларнинг асосий кун тартибига киритиладиган масаладир. Қирғизистон ЕОИИ аъзоси, Ўзбекистон эса бу ташкилотга аъзо эмас. Шу важдан чегара ҳудудлари, савдо-сотиқ масаласи ЕОИИ низоми ва халқаро шартномалар асосида кўриб чиқилади. Бугунги кунда бу масала муҳокама қилингани йўқ”, деди А. Мадумаров.

Шу йил 31 май куни Ўзбекистоннинг Фарғона вилояти Сўх тумани ва Қирғизистоннинг Боткен вилояти Қадамжой тумани турғунлари орасида жанжал юз бериб, икки мамлакат фуқаролари бир-бирларини тошбўрон қилди.

Чегарадаги можаро ортидан 1 июнь куни сўхликлар билан шахсан учрашган бош вазир Абдулла Арипов қирғиз расмийлари билан Сўх-Риштон йўлини очиш тўғрисида гаплашганини айтган ва уларга йўл масаласида талаб қўйганини билдирган эди.

31 май кунги можаро оқибатида, қирғиз расмийлари маълумотига кўра, 25 нафар қирғизистонлик тан жароҳати олган.

Айни пайтда Сўх тумани ҳокимлиги 31 майдаги можаро ортидан туман шифохонасига ўқ еган ва жароҳатланган 187 ўзбекистонлик келтирилгани, 15 нафари вертолётда вилоят шифохоналарига олиб кетилганини расман маълум қилган.

Сўх тумани тиббиёт бирлашмасидан олинган маълумотга кўра, яраланганлардан 13 нафари ўқ еган, айримларининг жароҳати оғир.

2 июнь куни Фарғона вилояти ҳокимлиги матбуот котиби Муҳаммаджон Обидов 3 киши ов милтиғидан яраланганини расман маълум қилди.

Бу ярадорлар ҳолидан 1 июнь куни Сўх туманига борган Ўзбекистон бош вазири Абдулла Арипов ҳам хабар олди.

Ўзбекистонга қарашли Сўх тумани Қирғизистон ҳудудидаги эксклав бўлиб ҳисобланади. 2013 йили қирғиз-ўзбек чегарасидаги можародан кейин Сўх-Риштон йўли ёпиб қўйилган. 2019 йилда бу йўл 2 кунга очилиб, кейин яна ёпилган.

Қирғиз чегарачилари тожикистонликларни ўқотар қурол қўллаганликда айбламоқда

Қирғиз-тожик чегараси яқинидаги йўл.

Қирғизистон Чегара хизмати 2 июнь куни қирғиз-тожик чегарасида ўқотар қурол қўллаш билан боғлиқ можаро содир бўлганини маълум қилди.

Қирғиз чегарачилари тарқатган маълумотда Боткен туманининг Эки-Таш деган жойида ўтган тун соат 01:20 ларда Тожикистон томонидан номаълум кишилар Ўш-Исфана автойўли бўйлаб кетаётган қирғизистонлик Б.Б.нинг машинасига қарата ов милтиғидан бир неча бор ўқ узгани қайд этилади.

“Ҳайдовчи ўқотар қуролдан енгил тан жароҳати олган ва Самарқандек қишлоғи касалхонасига етказилган. Тунда икки томони ҳуқуқ-тартибот идоралари вакилларининг учрашуви бўлиб ўтди. Айни пайтда воқеа жойида милиция ходимлари ишламоқда, улар ҳодиса юз берган жойни ва автомашинани кўздан кечириб, бошқа тергов тадбирларини олиб боряптилар”, дейилади Қирғизистон Чегара хизмати хабарномасида.

Тожикистон томони ҳали мазкур ҳодиса юзасидан изоҳ берганича йўқ.

Бу сўнгги ойда қирғиз-тожик чегарасида ўқотар қурол қўллаш билан боғлиқ можароларнинг тўртинчисидир. 27 май куни Қирғизистоннинг Кўктош қишлоғи турғуни Исфаранинг Чоркўҳ қишлоғида яшайдиган Шукрона Шаропова томонга қарата ўт очган, натижада у ўнг билагидан яраланган. 24 май куни тожик-қирғиз чегарасидаги отишмада Тожикистон Чегара қўшинларининг 19 ёшли ҳарбийси жароҳатланган. 8 май куни эса Қирғизистон билан Тожикистон чегараолди ҳудудлари аҳолиси ўртасида можаро юз бериб, у ерда ов милтиғи ва миномет ишга солинган. Ўшанда Қирғизистон томонидан уч чегарачи, Тожикистон томонидан икки маҳаллий турғун тан жароҳати олган.

Тожикистон билан Қирғизистон ўртасидаги чегара 970 километрга узанган. Ундан 519 километри аниқланган, қолган қисми эса баҳсли участка бўлиб ҳисобланади.

Россия Мудофаа вазирлиги коронавирусга қарши вакцинани одамларда синашни бошлади

Мудофаа вазирлиги коронавирусга қарши вакцина излаб топиш лойиҳасида иштирок этаётгани апрель ойида маълум қилинган эди.

Россия Мудофаа вазирлиги ҳарбий хизматчилар орасида COVID-19 вакцинасини синаб кўриш учун 50 нафар ихтиёрчини танлаб олди. Бу ҳақда вазирликка таянган ҳолда ахборот агентликлари хабар берди.

Маълум қилинишича, ҳарбий хизматчиларда Мудофаа вазирлигига қарашли 48-Марказий илмий-тадқиқот институти ўйлаб топган вакцина синалади. Ихтиёрчиларнинг биринчи гуруҳи институтга 3 июнь куни олиб келинади.

Мудофаа вазирлиги коронавирусга қарши вакцина излаб топиш лойиҳасида иштирок этаётгани апрель ойида маълум қилинган эди.

Бош вазир ўринбосари Татьяна Голиковага кўра, айни пайтда Россия мутахассислари томонидан COVID-19га қарши вакцина ўйлаб топиш бўйича 47 лойиҳани амалга оширмоқда.

Британия собиқ ташқи ишлар вазирлари Ҳонконг халқаро мониторинг гуруҳи ташкил этишни таклиф қилмоқда

Ҳонконгда ўтган йили Хитойга қарши 7 ой намойишлар бўлган эди.

Британиянинг етти нафар собиқ ташқи ишлар вазири Бош вазир Борис Жонсонга Ҳонконг бўйича халқаро экспертлардан иборат мониторинг гуруҳини ташкил этиш таклифи билан мурожаат йўллади.

Мурожаатни Малькольм Рифкинд, Маргарет Бекетт, Уильям Хейг, Жереми Хант, Дэвид Милибэнд, Дэвид Оуэн ва Джек Стро имзолаган. Муаллифлар Британия “Катта еттилик” давлатларини халқаро мониторинг гуруҳини ташкил этишга жалб қилиши зарур, деб ҳисоблайдилар.

Уларга кўра, халқаро мониторинг гуруҳи 1990 йилларда Болқон инқирозини мувофиқлаштириш учун ташкил этилган ташкилот принциплари асосида иш олиб бориши мумкинлигини айтмоқдалар. Бу ташкилотга АҚШ, Британия,Франция, Германия, Италия ва Россия бирлашган эди.

1997 йилгача Британия тасарруфида бўлган Ҳонконг Хитой ҳукумати қабул қилишни режалаштираётган “Миллий хавфсизлик” тўғрисидаги қонун ортидан мухторият ҳуқуқини йўқотиши мумкин.

Хитой Ҳонконгни “Бир давлат-икки тузим” принципи асосида бошқаришга ваъда берган эди. Бироқ янги қонун қабул қилиниши билан Хитой Ҳонконгда сўз эркинлиги ва демократияни бостириш имкониятига эга бўлади.

Хитой ҳукумати мазкур қонун ўтган йили Ҳонконгда 7 ой давом этган норозлик намойишларидан сўнг минтақада “террорчилик ва экстремистликка барҳам беришиши”ни таъкидламоқда. Мазкур намойишларда иштирок этган миллионлаб ҳонконгликлар жиноятларда гумонланганларни Хитойга топшириш тўғрисидаги қонун лойиҳасига қарши чиққан эди. Оқибатда Ҳонконг ҳукумати бу қонунни муҳокама қилишни тўхтатган.

“Миллий хавфсизлик” тўғрисидаги қонун лойиҳаси ҳам Ҳонконгда минглаб одамлар иштирок этган норозилик намойишларига сабаб бўлди.

Бунга қадар Хитойнинг Ҳонконгга нисбатан сиёсатини Британия, АҚШ, Австралия ва Канада танқид қилиб чиққан эди.

Канада ва Британия Россиянинг "Катта еттилик" саммитига таклиф қилинишига қарши

Канада Бош вазири Жастин Трюдо.

Канада Бош вазири Жастин Трюдо 1 июнь куни Оттавада ўтган йиллик анъанавий матбуот анжуманида Россиянинг “Катта еттилик” саммитига таклиф қилинишига қарши эканини билдирди.

“Россия “Катта саккизлик”дан Қримга бостириб кирганидан сўнг чиқарилган эди. Россия ҳозир ҳам халқаро тартиб-қоидаларга ҳурматсизлик қилишда давом этмоқда. У “Катта еттилик”дан ташқарида ва бундан буён ҳам шундай бўлиб қолаверади”,- деди Трюдо.

Аввалроқ Британия ҳам Россиянинг “Катта еттилик” саммитига таклиф қилинишига қарши эканини билдирган эди.

31 май куни АҚШ президенти Дональд Трамп июнь ойида ўтказилиши режалаштирилган “Каитта еттилик” саммитини сентябрга қолдирмоқчи экани ва унга Россия, Австралия, Ҳиндистон ҳамда Жанубий Кореяни таклиф қилмоқчилигини айтганди.

Трамп АҚШ, Канада, Германия, Британия, Япония, Италия ва Франциядан иборат “Катта еттилик”ни “Жуда эскирган давлатлар гуруҳи”, деб атади.

1 июнда Трамп президент Владимир Путин билан телефон орқали мулоқотда Россиянинг саммитдаги иштирокини муҳокама қилгани айтилди.

Ўша куни Россия президенти матбуот котиби Дмитрий Песков ҳозирча Трамп Россияни қандай шартлар асосида “Катта еттилик” саммитига таклиф қилиши номаълум эканини билдирди.

Қозоғистонда коронавирусга чалинганлар сони 11,5 мингдан ошди

Қозоғистонда 1 июндан карантин чоралари юмшатилди.

Қозоғистонда расмий маълумотларга қараганда, 1 июнь ҳолатига кўра, 263 одамда коронавирус аниқланди. Беморлар сонининг ўсиш кўрсаткичи 2,3 фоизни ташкил қилди.

Коронавирус билан касалланиш ҳолатлари авваллари Қозоғистоннинг барча ҳудудларида кузатилган бўлса, 1 июнь куни Оқмўла, Шимолий Қозоғистон ва Қўстанай вилоятларида коронавирусга чалинган бирорта одам аниқланмади.

Сўнгги бир сутка ичида 183 бемор соғайди. Бу билан соғайганлар сони расман 5 587 киишга етди.

Қорзоғистонда коронавирус ҳолати илк бор аниқланган 13 мартдан бери 11 571 бемор аниқланди. Улардан 41 нафари вафот этди.

Қозоғистонда 1 июндан карантин чоралари юмшатилди. Ҳукумат савдо марказлари, умумий овқатланиш жойлари, ҳаммомлар ва сауналар фаолиятига рухсат берди.

Қирғизистонда коронавирусдан 17-бемор вафот этди

Вафот этган 79 ёшли аёлнинг коронавирус туфайли эски касалликлари кучайиб кетган.

Қирғизистонда 2 июнь ҳолатига кўра, яна 28 одамда коронавирус аниқланди. Бу билан бу мамлакатда коронавирус юққанлар сони 1845 кишига етди.

Соғлиқни сақлаш вазири ўринбосари Нурбўлўт Усенбаевнинг билдиришича, беморлардан бир нафари 1 июнь куни Норин шаҳрида вафот этди. Вафот этган 79 ёшли аёлнинг коронавирус туфайли эски касалликлари кучайиб кетган.

“Норин вилоят касалхонасида 13 майдан бери даволанаётган бемор вафот этди. Унинг аҳволи 1 июнда кескин ёмонлашган. Унинг диагнози пневмониянинг ўта оғир кўриниши. Бундан аввал бу одам ишемик инсульт, мия инфаркти, қанд​ диабети билан оғриган экан”, -деди Нурбўлўт Усенбаев.

Бу билан Қирғизистонда коронавирусдан ўлганлар сони 17 кишига етди.

Қирғизистонда коронавирус илк марта аниқланган 18 мартдан 2 июнгача 1219 бемор соғайди.

Трамп губернаторлар қатъий чоралар кўрмаса, намойишларни ҳарбий куч билан бостиришга ваъда берди

Вашингтондаги норозилик намойишлари ортидан пайдо бўлган манзара.

АҚШ президенти Дональд Трамп афроамерикалик Жорж Флойднинг оқ танли полициячи томонидан ўлдирилиши оқибатида бошланиб кетган норозилик намойишларини барча федерал захираларни, ҳарбий ва фуқаролик кучларини ишга солган ҳолда бостиришга ваъда берди.

Трамп губернаторларга тезкорликда ўз штатларида Миллий Гвардия аскарлари сонини норозилардан устун келадиган даражада кўпайтиришни таклиф қилди. Трампга кўра, губернаторлар бу таклифга рози бўлмасалар, у ҳарбий кучни ишга солади.

АҚШ президенти Америкадаги фуқаролар уруши даврида қабул қилинган “Исёнлар тўғрисида”ги қонунга асосан айрим ҳолатларда ҳарбийлардан тартибни сақлаш мақсадида фойдаланиш ҳуқуқига эга.

АҚШда расмийлар томонидан фавқулодда вазиятлар чоғида ишга солинадиган Қуроллик кучларнинг махсус тури – Миллий гвардия 15 та штат ва пойтахт Вашингтонда тартибни сақлаш учун ҳозирда ўзининг беш минг чоғли жангчиси сафарбар қилинганини маълум қилди.

АҚШда намойишлар 25 май кун Миннеаполис шаҳрида оқ танли полициячи камида 20 киши гувоҳлигида афроамерикалик Жорж Флойни бўғиб қўйгани ортидан бошланиб кетди. Тинч намойишлардан ташқари, айрим норозилар биноларга ва автомобилларга ўт қўйди, полицияга қаршилик кўрсатди ва дўконларни талон қилди.

Намойишчилар 25 май куни қўлга олинганидан кейин Миннеаполис касалхонасида жон берган 46 ёшли Флойд ўлимида ўйнаган роли учун оқ танли тўрт нафар полициячи судланишини талаб қилишмоқда.

Испанияда биринчи марта коронавирусдан ўлим ҳолати қайд этилмади

Испания коронавирусдан энг кўп жабрланган мамлакатлардан бири.

Испанияда коронавирус эпидемияси бошланганидан бери биринчи марта сўнгги бир кунда COVID-19дан ўлим ҳолати қайд этилмади. Бу ҳақда соғлиқни сақлаш вазирлиги расмийси Фернандо Симон 1 июнда маълум қилди.

Испания Италия, Британия ва Франция каби коронавирусдан энг кўп жабрланган Европа мамлакатидир.

Испанияда коронавирусдан шу кунгача 27 мингдан кўпроқ одам вафот этган. Испанияда икки ой аввал COVID-19 авжига чиққан ва бир кунда ўлим ҳолатлари 960 кишига етган эди. Испанияда жами 240 минг киши коронавирусга чалинган.

Netflix, Nike ва Adidas АҚШда ирқчиликка қарши намойиш ўтказаётганларни қўллаб-қувватлади

АҚШда ирқчиликка қарши намойишлар 25 майда бошланган эди.

АҚШнинг технологиялар, банк, мода ва шоу-бизнес соҳасида ишловчи ширкатлари афроамерикаликларга нисбатан полициячиларнинг ноинсоний муносабатига қарши намойишга чиққанларни қўллаб-қувватловчи баёнотни эълон қилди.

Жумладан, Netflix твиттер саҳифасида ширкатда ишловчи афроамерикаликлар олдида муносабат билдиришга масъул эканини билдирган ҳолда, “Жим туришлик жиноятга шериклик билан баробар”, деб баёнот берди.

Google бош саҳифасида ирқий тенглик учун курашаётган барча одамлар қўллаб-қувватланиши тўғрисидаги ёзув пайдо бўлди.

Twitter ўзининг расмий аккаунтида #BlackLivesMatter – "Қора танлиларнинг ҳаёти ҳам муҳим” хештегини жорий этди.

Citibankнинг молиявий директори, афроамерикалик Марк Мэйсон ўз блогида “Ирқчилик бизнинг мамлакатимиздаги энг оғриқли ва хунук кўриниш бўлиб қолмоқда”, деб ёзди.

Nike твиттерда “Ирқчиликка эътиборсиз бўлманг. Бегуноҳ одамларнинг ҳаётига тажовуз қилинишига қараб турманг” деган видеороликни эълон қилди. Nike рақобатчиси бўлган Adidas эса бу твитни репост қилди.

АҚШда намойишлар 25 май кун Миннеаполис шаҳрида оқ танли полициячи камида 20 киши гувоҳлигида афроамерикалик Жорж Флойни бўғиб қўйгани ортидан бошланиб кетди. Тинч намойишлардан ташқари, айрим норозилар биноларга ва автомобилларга ўт қўйди, полицияга қаршилик кўрсатди ва дўконларни талон қилди.

Британия, Италия ва Швейцария карантин чораларини юмшатмоқда

Лондондаги ижтимоий масофаланиш, 2020 йил майи.

Европадаги қатор мамлакатлар коронавирус пандемияси туфайли жорий йилинган карантин чораларини 1 июндан юмшатди.

Англияда 10 ҳафта муқаддам ёпилган бошланғич мактаблар қайта очилмоқда. Олти кишигача гуруҳ бўлиб йиғилишга рухсат берилди, кўча бозорлари ҳам иш бошлаяпти. “Хавф гуруҳи”га кирган кишиларга март ойи охирларидан бери илк бор уйдан чиқишга рухсат берилди.

Британия Европадаги бошқа кўплаб мамлакатлардан кейинроқ карантин жорий қилган, шу важдан ҳозирда уларга қараганда секинроқ карантиндан чиқмоқда, айни пайтда мутахассисларнинг кўпи чеклов чораларини юмшатиш учун инфекцияга чалиниш ва ўлим ҳолатлари билан боғлиқ рақамлар ҳали анча юқори, деган фикрдалар.

Ҳолландияда 1 июндан барлар ва ресторанлар очилди. Швейцарияда 6 июндан кинотеатрлар ва тунги клублар қайта ишга тушади.

Италияда 3 июндан ҳудудлараро сафарларга чекловлар бекор қилиниши ва Европа Иттифоқи ватандошлари учун чегараларнинг очилиши кутилмоқда. Италияга қўшни бошқа давлатлар эса, инфекциянинг тарқалиш даражаси ҳали мамлакатда юқори эканини айтиб, ҳозирча ўз чегараларини очишга шошилаётганлари йўқ.

Европа мамлакатларининг кўпида инфекция юқтириб олиш ва ўлим ҳолатлари аста-секинлик билан камайиб боряпти. Германия, Франция, Испания ва Италия каби мамлакатлар эпидемия чўққисидан ўтиб бўлган, деб ҳисобланмоқда.

Путин Конституцияга ўзгартишлар киритиш бўйича овоз бериш санасини 1 июлга белгилади

Россия президенти Владимир Путин.

Россия президенти Владимир Путин мамлакат Конституциясига ўзгартишлар киритиш бўйича овоз бериш санасини 1 июлга белгилашга қарор қилди. Бу ҳақда Путиннинг ўзгартишларни ҳозирлаш бўйича ишчи гуруҳи ҳамраислари билан 1 июнь куни ўтказган учрашувида эълон қилинди.

Овоз беришни 1 июлга белгилаш қарорини Россия Марказий сайлов комиссияси раиси Элла Памфилова ҳам дастаклади. Айни пайтда у овоз бериш участкаларда одам тўпланишининг олдини олиш учун расмий санадан 6 кун аввал бошланишини билдирди. Памфиловага кўра, 2-3 минтақада масофадан туриб электрон овоз бериш ташкил этилиши мумкин.

Путин Конституцияга ўзгартиш киритиш бўйича овоз беришни Ғалаба паради ўтказиладиган 24 июнгача белгилаш таклифлари бўлгани, бироқ у бу икки воқеани бир-бирига аралаштирмасликка қарор қилганини билдирди.

Ишчи гуруҳ ҳамраиси Павел Крашенинников овоз бериш 25 июнданоқ бошланиши ва 1 июлга бориб тугашини тасдиқлади.

Роспотребнадзор раҳбари Анна Попова эпидемиянинг “юксалиши бўйича чўққидан ўтиб бўлингани”, хасталик юқтириб олаётганлар сони эса пасайиб бораётганини айтиб, овоз беришни 1 июль санасига белгиланиши фикрига қўшилди.

1 июль овоз бериш санаси ўлароқ белгиланиши мумкинлиги ҳақида турли оммавий ахборот воситаларининг манбалари аввал ҳам айтган. Бу санага муқобил сифатида 8 июль санаси қолаётганди.

Асосий қонундаги ўзгартишлардан бири амалдаги давлат раҳбарининг президентлик муддатини “нолга тушириш” бўлади.

Конституцияга ўзгартишлар киритиш бўйича овоз бериш санаси даставвал 22 апрелга белгиланганди, бироқ коронавирус инфекцияси эпидемияси туфайли у номаълум муддатга қолдирилган. Сўнгги кунларда овоз беришга тайёргарлик қайта бошлангани ҳақида маълумотлар пайдо бўла бошлади.

Россия Марказий сайлов комиссияси 20 майдан Конституцияга ўзгартишлар бўйича овоз беришга ҳозирликни қайтадан бошлаган. МСК Роспотребнадзор билан биргаликда эпидемия шароитида овоз беришни ўтказиш бўйича тавсиялар ишлаб чиққан. Бу тавсияларга кўра, овоз бериш участкалари очиқ ҳавода ҳам ташкил этилиши мумкин.

Арманистон бош вазири коронавирус инфекциясини юқтириб олди

Арманистон бош вазири Никол Пашинян.

Арманистон бош вазири Никол Пашинян коронавирусга чалинди. Бу ҳақда у Фейсбукдаги ўз саҳифаси орқали маълум қилди.

Пашинянга кўра, коронавирус инфекцияси унинг оила аъзоларида ҳам аниқланган. Хасталик ташқи аломатларсиз ва юқори ҳароратсиз кечмоқда, бироқ бош вазир бошқа ҳамкасбларига инфекция юқтирмаслик учун маълум муддат уйидан туриб ишлашга қарор қилган.

Арманистонда шу пайтгача коронавирус инфекциясини юқтириб олиш билан боғлиқ 9 минг 282 та ҳолат қайд этилган. Хасталик туфайли 131 бемор нобуд бўлган.

16 мартдан бу мамлакатда фавқулодда вазият тартиби жорий қилинган бўлиб, расмийларнинг сўнгги қарорига мувофиқ, у 13 июнгача чўзилган.

18 майдан Арманистонда жамоат транспорти ишга тушди, бироқ йўловчилардан ниқоб ва қўлқоп тақиш талаб қилинмоқда. Мамлакатда шу кунда савдо марказлари ва умумий овқатланиш жойлари тўла очилган.

Америкалик полициячилар норозиларга ҳамдардлик ўлароқ тиз чўкишди

АҚШда полициячилар ҳамкасбининг қилган айби учун халқдан тиз чўкиб узр сўрамоқда
Илтимос кутинг

Айни дамда медиа-манба мавжуд эмас

0:00 0:02:15 0:00

АҚШнинг Жанубий Флорида штатида турли муассасада ишлайдиган полициячилар Миннеаполисда қазо қилган афроамерикалик Жорж Флойд ўлимини қоралаган норозилар билан ҳамдард эканлари белгиси ўлароқ тиз чўкишди ва улар билан бирга дуо қилишди.

Бу ҳолат акс этган фотосуратни Майами-Дейд округининг полиция департаменти Фейсбукдаги ўз саҳифасига жойлади. “Биз буни тўғри йўл узра дуруст қадам, деб ҳисоблаймиз”, дейилади расмга илова қилинган ёзувда.

АҚШнинг кўп шаҳарларида ўтган ҳафта полиция томонидан аёвсизларча қўлга олиниши важидан жон таслим қилган Жорж Флойднинг ўлими ортидан норозилик намойишлари олти кундан бери давом этмоқда. Айрим жойларда норозилик чиқишлари зўравонлик касб этиб, полиция билан тўқнашувларга айланиб кетган. Тартибсизликлар ортидан Лос-Анжелес, Майами, Детройт ва Филадельфия дохил тақрибан 40 шаҳарда оқшом тушганидан сўнг кўча намойишларини ўтказиш тақиқлаб қўйилган.

Азимжон Асқаров ўзига қарши айблов ёғдирганларга жавоб мурожаати билан чиқди

Жалолободлик ҳуқуқ фаоли Азимжон Асқаров суд залида (архив сурати).

Бундан 10 йил муқаддам Қирғизистон жанубида содир бўлган қонли воқеалар ортидан умрбод қамоқ жазосига ҳукм қилинган ҳуқуқ фаоли Азимжон Асқаров Қирғизистоннинг қатор сиёсатчилари ва собиқ депутатларига очиқ мурожаат билан чиқди.

У қамоқхонада ноҳақ ўтирганини, милиционер Сулаймановнинг ўлимига ўз ҳамкасблари сабаб бўлганини айтиб, ноҳукумат ташкилотлари (НҲТ) тўғрисидаги лойиҳанинг парламентдаги муҳокамаси чоғида ўзига қарши билдирилган фикрларга жавоб берди.

Асқаровнинг мурожаатида: “Менга қарши ёлғон иддаолар юқори минбарлардан 10 йилдан бери бетўхтов айтиб келинмоқда. Бейшенбек Абдразақов ва Дуйшўн Абдилдаев менинг ишимга тўхталиб, тарафдорларимни “сотқин” деб аташди. Миллатчилик инсоннинг энг ёмон хусусияти. Июрь воқеалари тўғрисида етарли фактларни келтирганман, агар улар етмаса, ундан ҳам кўп маълумот бера оламан”, дейилган.

22 май куни парламент биносида НҲТ тўғрисидаги қонун лойиҳаси бўйича муҳокама бўлиб ўтганди. Бу мажлисга бир қанча ташкилот вакили қатнашиб, уларнинг кўпи қонун лойиҳасини қўллаб, нутқ сўзлаган. Муҳокамага қатнаша олмай қолган 70 чоғли ташкилот мазкур қонунга қаршилигини билдириб, баёнот тарқатган.

Парламентдаги муҳокама иштирокчиси, собиқ депутат Бейшенбек Абдразақов ўз сўзида: “Июнь воқеаси чоғида 500 киши қазо қилган. Булар Азимжон Асқаровнинг, Қодиржон Ботировнинг ёнини олиб, Бирлашган Миллатлар Ташкилотигача бориб юришибди. Нима учун қамоқда ётган бошқа фуқароларимизнинг, аёлларнинг, ҳомиладор аёлларнинг ёнини олмайди? Шунинг учун ҳам қонунни тез орада қабул қилиш керак”, деган.

Қирғизистондаги жамоатчилик жамғармаларидан бирининг раҳбари Дуйшўн Абдилдаев эса: “Жинояти тўла исботланиб, ўлим жазосига ҳукм қилинган кишиларнинг ҳуқуқини ҳимоя қилиб, озод қилишни талаб қилишяпти. Азимжон Асқаров, Қодиржон Ботировгача”, деган.

Ёши 70 ни қоралаган жалолободлик Азимжон Асқаров 2010 йил июнь воқеалари чоғида оммавий тартибсизликлар уюштирганлик ва милиция ходимни ўлдирганликда айбланиб, умрбод қамоқ жазосига ҳукм қилинган эди. Олий судгача бўлган барча инстанциялар илк инстанция суди қарорини ўз кучида қолдирган.

2016 йили БМТнинг Инсон ҳуқуқлари қўмитаси Асқаров қамоқхонада қийноққа дучор этилгани, тиббий кўмак ва адолатли суд билан таъминланиш ҳуқуқидан маҳрум этилганини қайд этган. Қирғизистон томони бу иддаони рад этган.

Шу йил 1 июнидан Бишкек шаҳар маъмурий суди Азимжон Асқаровнинг қирғиз ҳукуматига нисбатан шикоятини кўриб чиқа бошлади. Жалолободлик ҳуқуқ фаолининг иши бўйича кейинги суд мажлиси 14 июнга белгиланган.

АҚШда намойишлар давом этмоқда, Трамп бир муддат бункерга яширинди

Оқ уй олдидаги намойишчилар, Вашингтон, 2020 йил 31 майи.

АҚШда ижтимоий тенгсизликка қарши намойишларнинг олтинчи туни бир неча шаҳар кўчаларида тартибсизлик ва зўравонлик қабатида кечди.

Норозилик чиқишларига Миннесота штатининг Миннеаполис шаҳрида полициячилар томонидан тутилган афроамерикалик Жорж Флойднинг ўлими сабаб бўлган.

Тартибсизликлар туфайли тақрибан 40 шаҳарда комендантлик соати жорий этилганига қарамай, одамлар аксар ҳолларда чекловларга эътибор қилгани йўқ. Нью-Йорк, Чикаго, Филадельфия ва Лос-Анджелесда норозилар билан полиция ўртасида тўқнашувлар содир бўлгани хабар қилинмоқда. Оломонни тарқатиш учун полиция кўздан ёш сиздирувчи газ ва резина ўқларни ишга солган. Бир неча шаҳарда талончилик ҳолатлари қайд этилган. Одамлар дўконларга бостириб кириб, талон қилганлар, полиция автомобилларини ёқиб юборганлар.

АҚШда расмийлар томонидан фавқулодда вазиятлар чоғида ишга солинадиган Қуроллик кучларнинг махсус тури – Миллий гвардия 15 та штат ва пойтахт Вашингтонда тартибни сақлаш учун ҳозирда ўзининг беш минг чоғли жангчиси сафарбар қилинганини маълум қилди. Вашингтонда оломон яна Оқ уй олдида йиғилган. Норозилар гулханлар ёққанлар, махсус бўлинма ходимлари томонга эса вақти-вақти билан тош отилиб турган.

Бунгача АҚШ президентининг қароргоҳи олдида ғала-ғовурли намойишлар жума ва шанба кунлари бўлиб ўтганди. АҚШ махфий хизмати олти киши ҳибсга олинганини маълум қилган. Норозиларнинг қўриқчилар билан тўқнашгани қайд этилган. Намойишчиларнинг айримлари тўсиқлари қўпориб ташлашга уринган, махфий хизмат ходимларига қарши ғишт, тош, шиша, петарда ва бошқа буюмларни отишган.

Жума куни президент Дональд Трамп рафиқаси ва ўғли билан бирга хавфсизлик важидан бир муддатга Оқ уй остидаги бункерга жойлаштирилгани маълум бўлди.

Намойишчилар 25 май куни қўлга олинганидан кейин Миннеаполис касалхонасида жон берган 46 ёшли Флойд ўлимида ўйнаган роли учун оқ танли тўрт нафар полициячи судланишини талаб қилишмоқда. Флойд сохта банкнотадан (пул) фойдаланганликда гумонланган. Полицейчи Дерек Шовин афроамерикаликни зарарсизлантиришга ҳаракат қилиб, тиззаси билан унинг бўйнини босган ва тутилган шахснинг ҳаво етишмаётганига оид шикоятларига эътибор бермаган. Ҳодиса акс этган видеоёзув ижтимоий тармоқларда яшин тезлигида тарқаган.

Жорж Флойдни қўлга олишда иштирок этган тўрт полициячининг ҳаммаси хизмат текшируви тугагунига қадар ишдан четлатилган. Шовин ҳибсга олинган. У эҳтиётсизлик оқибатида одам ўлдирганликда айбланмоқда.

Аввалроқ президент Трамп Твиттер орқали аъзолари шу кундаги зўравонлик тўлқинига алоқадор бўлиши мумкин бўлган “Антифа” ультрасўл ҳаракатининг террорчи ташкилот ўлароқ тан олинишига эришиш ниятида эканини билдирган. Бундан ташқари, Трамп тартибсизликларни тийиб туришдаги ғайрати учун Миллий гвардияга миннатдорчилик билдирган. Шунингдек, АҚШ президенти оммавий ахборот воситаларига танқид ёғдирган. Унга кўра, ОАВ “нафрат ва анархияни авж олдириш учун қўлларидан келган барча ишни қилмоқдалар”.

Рейхстагни “ғилофлаган” рассом Христо Явашев оламдан ўтди

Христо Явашев.

АҚШнинг Нью-Йорк шаҳрида табиат ва меъморий объектларни “ғилофлаш” каби йирик лойиҳалари билан танилган рассом Христо Явашев 84 ёшида вафот этди. Унинг энг машҳур лойиҳаларидан бири Берлиндаги Рейхстаг биносини (1995) ғилофлаш бўлган.

Христон Явашев Болгариянинг Габрово шаҳрида 1935 йили дунёга келган. 1957 йилда унинг муҳожирлик ҳаёти бошланган. Даставвал у Прагага борган, ундан Вена, сўнгра Женевага ўтган. 1958 йили Парижга бориб, ўрнашган ва ўша ерда уйланган. 1964 йили рассом оиласи билан Нью-Йоркка кўчиб ўтган.

Бу ерда эр-хотин бирга ижод билан машғул бўлган ва ўз асарларига “Христо ва Жан-Клод” деб имзо қўйишган. Хотинининг ўлимидан (2009) кейин Явашев бир ўзи ишлашда давом этган.

Унинг режалари орасида Париждаги Зафар дарбозасини ғилофлаш бор эди ва бу лойиҳани амалга ошириш иши 2021 йил кузига белгиланганди.

2020 йил кузида Париждаги Помпиду марказида Христо Явашевнинг кўргазмаси бўлиб ўтиши керак эди.

Қозоғистонда 1 июндан карантин чоралари юмшатилди

Ҳукумат савдо марказлари, умумий овқатланиш жойлари, ҳаммомлар ва сауналар фаолиятига рухсат берди.

Олмаота ва Нур-Султон шаҳарларига кириш-чиқиш жойларига ўрнатилган блок постлар 1 июнга ўтар кечаси олиб ташланди. Кўп ҳудудларда шаҳарлараро автобуслар қатнови тикланди. Нур-Султон ҳокимияти шаҳар атрофига қатновчи барча маршрутлар қайта тикланганини билдирди.

Ҳукумат савдо марказлари, умумий овқатланиш жойлари, ҳаммомлар ва сауналар фаолиятига рухсат берди. Айни пайтда Соғлиқни сақлаш вазирлиги жамоат жойларида 50 нафардан ортиқ одам тўпланмаслигини, кафе ва ресторанларда столлар бир-биридан икки метр оралиқда ўрнатилишини ва дезинфекция ишларини амалга оширишни талаб қилмоқда.

Олмаотада шаҳар ташқарисидаги ва мактаблар қошидаги лагерлар ёзда ишламайди. Бироқ Чимкентда лагерлар болаларни қабул қилади.

Соғлиқни сақлаш вазирлигининг билдиришича, 31 май ҳолатига кўра, Қозоғистонда коронавирусга чалинганлар сони 11 308 нафарга етди. 5 404 бемор соғайди, 41 бемор вафот этди.

Азимжон Асқаровнинг қирғиз ҳукуматига нисбатан шикояти юзасидан суд жараёни бошланди

Жараён Бишкек шаҳар маъмурий судида ўтмоқда.

Умрбод қамалган ҳуқуқ фаоли Азимжон Асқаровнинг қирғиз ҳукуматига нисбатан шикояти Бишкек шаҳар маъмурий судида 1 июнь куни кўрила бошланди.

Озодлик радиоси қирғиз хизматининг билдиришича, судда ҳукумат ва омбудсмен вакиллари қатнашмоқда.

Асқаровнинг шикояти 11 май куни Бишкек шаҳар туманлараро судида кўриб чиқиши кутилаётган эди. Бишкек туманлараро суди фаолиятининг тўхтатилгани сабаб, Асқаров шикоятини кўриб чиқиш бошқа кунга қолдирилганди.

Асқаров Қирғизистон ҳукуматини БМТ Инсон ҳуқуқлари қўмитаси тавсияларини бажармаётганликда айбламоқда. 2016 йилда БМТнинг Инсон ҳуқуқлари қўмитаси Асқаров қамоқда қийноқларга солингани, у тиббий ёрдам ва адолатли судлов ҳуқуқидан маҳрум қилингани ортидан уни қамоқдан озод қилиш шартлиги тўғрисида қарор қабул қилганди.

69 ёшли Азимжон Асқаров 2010 йил июнь воқеалари пайтида оммавий тартибсизликларни уюштирган ва милиция ходимни ўлдирган деган айблов билан умрбод қамалган эди. Халқаро ҳамжамият Асқаровга нисбатан жиноят иши сохталаштирилганига ишонилишини таъкидлаган ҳолда, қирғиз ҳукуматидан ҳуқуқ фаолини зудликда қамоқдан чиқаришни талаб қилиб келади.

Трамп "Катта еттилик" саммитини бошқа муддатга қолдирмоқчи. Унга кўра G7 "Жуда эскирган" гуруҳ

АҚШ президенти Дональд Трамп июнда ўтказилиши режалаштирилган “Катта еттилик” (G7) саммитини бошқа муддатга қолдириш ниятида эканини билдирди. Трампга кўра, у бу саммитга бошқа мамлакатларни, жумладан, Россияни ҳам таклиф қилмоқчи.

Трам АҚШ, Канада, Германия, Британия, Япония, Италия ва Франциядан иборат “Катта еттилик”ни “Жуда эскирган давлатлар гуруҳи”, деб атади.

“Мен G7 жаҳонда нималар бўлаётганини етарли даражада тасаввур қила олмайдиган давлатлар бўлиб қолганини ҳис этяпман”,- деди Трамп журналистларга.

Трампга кўра, саммитни сентябрда ўтказиш ва унга Россия, Австралия, Ҳиндистон ҳамда Жанубий Кореяни таклиф қилиш мақсадга мувофиқ бўлади.

Давомини ўқинг

Кўрмай қолган бўлсангиз

XS
SM
MD
LG