Линклар

Шошилинч хабар
19 феврал 2020, Тошкент вақти: 02:52

Халқаро хабарлар

ЕИ Қрим аннексиясидан сўнг Россияга қарши жорий этилган санкцияларни яна узайтирди

Брюссель саммити.

Европа Иттифоқи раҳбарлари 12 декабрь куни Украинада давом этаётган ҳарбий можаро сабаб Россияга нисбатан жорий этилган санкциялар муддатини яна олти ойга чўзди.

Қарор Россия ва Украина президентлари Владимир Путин ва Володимир Зеленский Парижда юзма-юз учрашганидан бир неча кун ўтиб қабул қилинди.

Бу учрашувда томонлар йил охирига бориб, ўч очишни тўхтатиш, маҳбусларни алмашиш ва фронт чизиғининг уч жойида “қўшинларни орқага тортиш”га қарор қилган эди.

Лекин улар маҳаллий сайловлар вақти ва Украинанинг Россия билан чегараси устидан назорат ўрнатиш сингари беш йиллик урушга дахлдор мураккаб масалалар юзасидан келишувга эриша олмади.

9 декабрдаги музокарага воситачилик қилган Франция президенти Эммануэл Макрон билан Германия канцлери Ангела Меркель Брюсселда Европа мамлакатларининг бошқа раҳбарларига қисқача ахборот берди, сўнгра Москвага қарши чеклов чораларини бекор қилишни тавсия этди.

Россиянинг молия, энергетика, мудофаа саноатига қарши санкциялар илк марта 2014 йил июлида қўлланган эди.

Бунга Россия Украинанинг Қрим ярим оролини аннексия қилгани, Украина шарқидаги Донецк ва Луганск вилоятларини назорат қилиб турган айирмачиларни дастаклаётгани сабаб бўлди.

Украина шарқидаги уруш ҳаракатлари ҳозирга қадар 13 мингдан кўпроқ одам ҳаëтига зомин бўлди.

Кун янгиликлари

Bellingcat: Чечен айирмачи қўмондони ўлдирилишида ФСБ қўли бор

Зелимхан Хангошвили.

Bellingcat суриштирув журналистлари гуруҳи собиқ чечен айирмачи қўмондони Зелимхан Хангошвилини Берлинда ўлдиришни Россия Федерал Хавфсизлик хизмати (ФХХ) режалаштириб, амалга оширган, деган хулосага келди.

Иккинчи чечен урушида русларга қарши жанг қилган рота командири Хангошвили ўтган йилнинг августида Берлинда отиб ўлдирилган эди.

Германия расмийлари қўлга киритилган далиллар қатл Россия ҳукумати ёки Чеченистон расмийлари буюртмаси билан амалга оширилганини кўрсатишини маълум қилган. Москва эса бу иддаоларни кескин рад этиб келади.

Қатл ортидан кўп ўтмай ҳужумни амалга оширишда гумонланиб Россия фуқароси қўлга олинди. Айни дамда у Германия қамоқхонасида ушлаб турилибди.

Декабрь ойида Bellingcat гуруҳи гумонланувчи Вадим Красиков эканлигини эълон қилди. Айни шахс 2013 йил Москвада ўлдирилган тадбиркор ўлдирилиши билан боғли ишда гумонланувчидир.

Кузатувчилар Хангошвилининг ўлдирилишини 2018 йилда Лондонда собиқ жосус Сергей Скрипалнинг заҳарланишига қиёслади.

Бир ойга чўзилган суриштирув ортидан Bellingcat Хангошвилини ўлдиришга тайёргарлик ишларини собиқ спецназ зобитлари учун тузилган «Вимпел» хайрия фонди раиси Эдуард Бендерский шахсан назорат қилганини хулоса қилди.

Хаага суди Россияга «ЮКОС» сармоядорларига 50 миллиард доллар товон тўлаш мажбуриятини юклади

Михаил Ходорковский

Нидерландия апелляция суди Россия зиммасига собиқ нефть ширкати «ЮКОС» сармоядорларига 50 миллиард доллар товон тўлаш мажбуриятини юклади. Суд бу ҳукми билан бундан 4 йил олдинги ҳукмни бекор қилди.

2016 йилда Хаага туман суди мазкур иш Россия имзолаган, аммо ратификация қилмаган энергетика келишувига таянганини, шунинг учун Арбитраж доимий суди чиқарган қарор асоссиз эканлигини айтиб, товон тўлашга доир ҳукмни бекор қилган эди.

Россия Адлия вазирлиги дарҳол суднинг сўнгги қарори устидан шикоят қилишини билдирди.

Хаага аппеляция суди 2016 йилги қарор нотўғри эканлигини, ундан олдин чиқарилган қарор ўз кучида қолишини билдирди.

Арбитраж суди қарорида 2003 йили Москва «ЮКОС»га улкан солиқлар солиб, уни қўлга олгани айтилади: «Ҳукумат “ЮКОС”ни банкрот қилиб, унинг мулкларини эгаллаб олиш учун “ЮКОС” ва унинг эгаларига кенг кўламли ҳужум қилган, айни дамда Жаноб Ходорковскийни сиёсий саҳнадан сиқиб чиқарган»

Россия ҳукуматининг «ЮКОС»га қарши чоралари ширкат директори, президент Владимир Путиннинг ашаддий рақиби Михаил Ходорковскийни йўқ қилишни кўзлагани айтиб келинади.

Ходорковский 2003 йилда қўлга олинган. Россия қамоғида 10 йил ўтказганидан кейин афв этилиб, мамлакатни тарк этган.

Украина Хитойдан фуқароларини эвакуация қилиш учун учоқ юборади

18 февраль куни Украина 49 фуқароси ҳамда 25 нафар бошқа давлат фуқаросини эвакуация қилиш учун Хитойга учоқ юборилишини маълум қилди.

Бунга Хитойда янги коронавирусдан ҳалок бўлганлар ва вирусга чалинганлар сони ошиб бораётгани туртки бўлди.

Сўнгги хабарларга кўра, Хитойда коронавирусдан ҳалок бўлганлар сони 1900 га етди, унга чалинганлар сони эса 72 минг нафардан ошди.

Киевда соғлиқни сақлаш вазири Виктор Ляшко йўловчилар эпидемия ўчоғи Ухан шаҳридан олиб чиқиб кетилишини айтди.

Ляшко фақат вирус симптомлари йўқ бўлган шахсларгина эвакуация қилинишини билдирди. Шунингдек, вазир йўловчилар Киевда икки ҳафта назорат остида бўлишини қўшимча қилди.

- Саросимага тушишга ўрин йўқ, фақат соғлом шахсларни Украинага олиб келамиз, — деди Ляшко.

Украинанинг Хитойдаги элчихонаси 11 февраль куни мамлакат фуқаролари эвакуация қилинишини эълон қилган эди. Аммо бу режа икки марта кейинга қолдирилди.

Ляшко ҳозирча Япония портида карантинга олинган Diamond Princess круиз кемаси бортидаги 25 нафар украиналикни эвакуация қилиш режаси йўқлигини айтди.

Тожик расмийлари “Хўжа-командир”нинг Дубайдан ватанига экстрадиция қилинганини тасдиқлади

Тожикистон Ички ишлар вазирлиги фуқаролар уруши даврида Халқ фронти дала қўмондони бўлган Хўжа Каримов Бирлашган Араб Амирликларидан экстрадиция қилинганини тасдиқлади.

"Хўжа-командир" ўтган йил июлида Дубайда қўлга олинган, бироқ у экстрадиция иши кўриб чиқилгунгача тилхат асосида уч ҳафтадан сўнг озод қилинган эди.

Вазирлик матбуот марказига кўра, “фуқаро Каримов Хўжа Раҳимович («Хўжа-командир»)… бир қатор жиноятлар: босқинчилик, қотиллик, қийноққа солиш, гаровга олиш ва қонунга зид равишда қурол сақлаганлик жиноятларини содир этганликда гумон қилиниб, расман қидирувда бўлган" ва “Тожикистон ИИВнинг хориждаги субъектлар билан ҳамкорлиги натижасида 2020 йил 16 февраль куни ватанига экстрадиция қилинган”.

Манбаларга кўра, айни дамда Хўжа Каримов сўроқ қилинмоқда.

Тожикистон ва БАА ўртасида Жиноятчиларни топшириш тўғрисида шартнома имзолаган. Бир неча йил муқаддам БАА Тожикистон Халқ фронтининг бошқа бир машҳур дала қўмондони - собиқ генерал Ғаффор Мирзоевнинг укаси Абдурасул Мирзоевни ҳибсга олган ва Душанбега топширган эди.

“Хўжа-командир” 1999 йилда Тожикистондан қочиб кетганидан кейин Малайзияда яшаган ва бизнес билан шуғулланган. У 2008 йил охирида Интерпол линияси бўйича халқаро қидирувга берилган.

Фуқаролар уруши даври гувоҳларига кўра, Хўжа Каримов бошқа дала қўмондонларидан ўзининг шафқатсизлиги билан ажралиб турган.

"Хўжа-командир” тожик парламентининг икки депутатини ўлдирганликда айбланади. Тергов Сияршо Шоев ва Саидшо Шоевни, шунингдек, судья Тағай Шукуровнинг ўлдирилишида унинг қўли борлигини исботловчи далилларга эга", деганди аввалроқ Озодликнинг тожик хизмати билан суҳбатда истеъфодаги полковник Маҳди Собир.

Малайзияга қочиб кетишдан аввал Хўжа Каримов Тожикистон Мудофаа вазирлигининг махсус бригадаси қўмондони биринчи ўринбосари ва Тожикистон Футбол Федерацияси раиси сифатида фаолият кўрсатган.

Трамп Россияни Сурияда "ваҳшийликларни" қўллашни бас қилишга чақирди

АҚШ президенти Дональд Трамп.

16 февраль куни АҚШ президенти Дональд Трамп телефон орқали Туркия президенти Ражаб Тоййиб Эрдўғон билан мулоқот давомида Суриянинг Идлиб шаҳридаги зўравонликлар юзасидан хавотир изҳор қилди.

Бу ҳақда хабар қилган Оқ уй матбуот котиби Жад Дирга кўра, Трамп Россияни Сурия ҳукуматининг зўравонликларини қўллаб-қувватлашни бас қилишга, шунингдек, Суриядаги можарога сиёсий ечим топишга чақирган.

17 февраль куни Сурияда қарама-қарши тарафларни қўллаб келаётган Анқара ва Москва музокара ўтказади.

Россия ҳарбийлари қўллаб келаётган Сурия ҳукумати кучлари 16 февраль куни Ҳалаб вилоятида исёнчилар бошқарувидаги сўнгги ҳудудларни қўлга киритди.

Асад ҳукуматини ағдариш истагидаги исёнчиларни қўллаб келаётган Туркия Россияни Идлибдаги ҳужумларни тўхтатишга чорламоқда. Хусусан, Анқара Сурия кучлари ой охиригача чекинмаса, ҳарбий куч ишлатишини айтиб, таҳдид солмоқда.

Қароргоҳи Лондонда жойлашган Сурия инсон ҳуқуқлари гуруҳи 16 февраль куни кеч Сурия ҳукумати 2012 йилдан бери илк маротаба Ҳалаб атрофидаги барча шаҳар ва қишлоқлар бошқарувини қўлга киритганини билдирди.

Қрим суди Азов денгизида қўлга олинган украиналик балиқчиларни 10 кунга қамади

16 февраль куни Россия бошқарувидаги Қрим суди Азов денгизида қўлга олинган тўрт нафар украиналик балиқчига 10 кунлик қамоқ жазоси тайинлади.

Россия Федерал хавфсизлик хизматининг чегара кучлари балиқчилар Қрим соҳиллари яқинида қўлга олинганини, улар «сувдаги биологик ресурсларни тутиш қоидаларини бузганликда» айбланаётганини билдирди.

Қрим омбудсмени Лариса Опанасюк балиқчилар ёнида ҳужжатлари бўлмаганини ҳамда балиқларни ноқонуний тарзда овлашганини айтди.

2003 йилда Россия ва Украина имзолаган келишув Керчь бўғози ва Азов денгизидан тўсиқсиз фойдаланишни кафолатлайди.

2018 йилнинг 25 ноябрида Керчь бўғозида Россия кучлари чегара бузилганини иддао қилган ҳолда Украина ҳарбий-денгиз кучларига қарашли учта кема ва улардаги 24 нафар денгизчини қўлга олиб, қамаб қўйган эди. Денгизчилар ўн ой деганда маҳбус алмашинуви бўйича эришилган келишув ортидан Украинага қайтди.

Россия 2014 йилда Қримга бостириб кириб, уни аннексия қилиб олган.

Европа Иттифоқи: Болқон давлатларининг иттифоққа қўшилиши эҳтимолдан холи эмас

Европа Иттифоқи комиссияси президенти Урсула фон дер Ляйен.

16 февраль куни Европа Иттифоқи етакчилари Болқон давлатлари билан мустаҳкам алоқа ўрнатиш тарафдори эканини изҳор қилди. Ўтган йилда Албания ва Шимолий Македониянинг иттифоққа қўшилиш умидлари барбод бўлган эди.

16-17 февраль кунлари Брюсселда Европа Иттифоқи ҳамда Ғарбий Болқон давлатлари вакиллари ўртасида норасмий йиғин ўтказилмоқда. Учрашувда қатнашаётган Европа Иттифоқи комиссияси президенти Урсула фон дер Ляйен:

- Ўйлайманки, Ғарбий Болқон давлатларини Европа Иттифоқига иложи борича яқин ушлаш барчамизнинг умумий геостратегик манфаатларимизга мос келади, - деди.

Европа кенгаши президенти Шарль Мишель олти Болқон давлати етакчилари билан «самимий ва очиқ» музокара олиб боришни интиқиб кутаётганини айтди.

Европа Иттифоқи давлатлари Албания ва собиқ Югославиянинг блокка қўшилмаган аъзоларини Ғарбий Болқон давлатлари деб атайди. Октябрь ойида Албания ва Шимолий Македония амалга оширган ислоҳотларга қарамасдан, уларни блокка қўшиб олиш бўйича музокаралар кейинга қолдирилди.

Кейинги ойларда иттифоқ аъзо давлатларни қўшиб олиш стратегиясини ўзгартирмоқда. Фон дер Ляйен янги методология ҳукумат ислоҳотларига урғу беришини, улар келажакда Болқон давлатларига блокка қўшилиш имконини беришини айтди.

Қозоғистон президенти интернетдаги узилишларни бартараф қилиш ҳақида топшириқ берди

Иллюстратив сурат.

Якшанба, 16 февраль куни Қозоғистонда айрим сайтлар, жумладан, Озодлик қозоқ хизматининг сайти, ижтимоий тармоқлар, Youtube платформаси ва Google сервисида узилишлар кузатилди.

Фойдаланувчилар Интернет тезлигининг пастлигидан шикоят қилмоқда. Бир неча кундан бери Telegram мессенжерига кириш билан боғлиқ муаммо кузатилаяпти. Айни пайтда мессенжер VPN орқали узилмасдан ишламоқда.

Қозоғистон президенти матбуот котиби Берик Уали Facebook’даги ўз саҳифасида айни пайтда Германия сафарида бўлган Қ. Тоқаев “барча ахборот ресурслари ишини тиклаш юзасидан топшириқ бергани” ҳақида ёзди.

Қозоғистонда интернет блокировкаси, хусусан, ижтимоий тармоқлар блокировкаси аввалги йилларда асосан тун пайтида кузатиларди. Қозоқ расмийлари бунга “техник муаммо” дея жавоб бериш билан чекланишар, провайдерлар эса тармоқда носозлик борлигини рад этишарди.

Қозоғистонда кенг кўламли интернет блокировкаси ўтган йилнинг 9 май ва 9 июнь кунлари тинч намойиш иштирокчиларининг оммавий қўлга олиниши қабатида кузатилган.

Қозоғистонда куч ишлатар тузилмалар фавқулодда вазиятлар, жумладан, “ижтимоий” ва техноген характердаги ҳолатлар чоғида Интернет ва алоқа воситаларини зудлик билан блоклаш ҳуқуқига эга.

Коронавирус қурбонлари сони 1800 нафарга яқинлашди

Иллюстратив сурат.

Хитойда тарқалган янги коронавирусдан ўлганлар сони, 16 февраль ҳолатига кўра, 1770 кишига етди. Бу ҳақда Хитой Соғлиқни сақлаш миллий комиссияси маълум қилади.

Қайд этилишича, касалликни юқтириб олганлар сони 70 минг 548 кишини ташкил этган. Сўнгги суткада 2048 киши вирусни юқтириб олгани аниқланган.

Хитой давлат оммавий ахборот воситалари 15 февраль куни президент Си Цзинпиннинг яқиндаги баёнотини ёйинлаганлар. Унда Хитой президенти расмийлар коронавирус тарқалиши билан боғлиқ вазиятни энг бошидан бери назорат қилаётганларини урғулаган. Си Цзинпин янги вирусга қарши кураш бўйича шу йил 7 январидаёқ топшириқ берган, 23 январь куни эса вирус марказига яқин шаҳарларни ёпишни буюрган.

Тожикистонда сим-карталарни қайта рўйхатга олиш муддати икки йилга узайтирилди

Сим-карта учун навбатда турган тожикистонликлар.

Тожикистонда ID паспорти бўйича сим-карталарни қайта рўйхатга олиш муддати 2022 йил февралига қадар узайтирилди. Ҳукуматнинг бу борадаги тегишли фармойиши ўтган ҳафта имзоланган.

Тожикистон хукуматининг “Электр алоқа тармоғига уланиш тартиби ва талаблари ҳамда улар билан боғлиқ хизмат кўрсатиш тўғрисида”ги қарори мувофиқ, уяли алоқага уланган барча абонентлар ўз сим-карталарини 2014 йилдан берила бошлаган ID-паспорт бўйича 2019 йил 15 августигача қайта рўйхатдан ўтказишлари керак эди. Август ойида мамлакат президенти қайта регистрация муддатини ярим йилга, яъни 2020 йилнинг 15 февралига қадар узайтирган.

Ҳукуматнинг янги намунадаги паспорт бўйича сим-карталарни қайта рўйхатдан ўтказиш қарори сўнгги пайтларда аҳолининг кўп танқиди ва норозилигига сабаб бўлди. Тожикистонликлар бу қарор бюджетни тўлдиришнинг бир йўли эканини иддао қилсалар, ҳукумат буни хавфсизлик чораларини таъминлаш ўлароқ изоҳлаган.

Тожикистонликларнинг ҳали кўпи янги ID-паспорт олишга муваффақ бўлмагани муаммони янада чигаллаштирмоқда.

НАТО Франция ядровий қуролларини альянс стратегияси марказига қўйиш чақириғини рад этди

НАТО бош котиби Йенс Столтенберг, 13 февраль, 2020 йил, Брюссель

НАТО бош котиби Йенс Столтенберг Франция президенти Эммануэль Макроннинг Франция ядровий қуролларини Европа мудофаа стратегия марказига қўйиш чақириғини рад этди.

Котибнинг сўзларига кўра, АҚШ ва Британия қуроллари Европа Иттифоқини етарли даражада хавфсизлик билан таъминлайди.

15 февраль куни Мюнхен хавфсизлик конференциясида сўзлаган Столтенберг:

- Европа ядровий муҳофазага эга эканини ёддан чиқармаслигимиз керак. 28 ҳамкор давлат буни таъминлаб келади. Бу шунчаки ваъда эмас, балки ўнлаб йилдан бери мавжуд бўлган стратегиядир, — деди.

Столтенберг Франция ўта муҳим ҳамкор эканини ҳамда мамлакат ядровий қуроллари НАТОнинг умумий хавфсизлигини таъминлашда муҳим роль ўйнашини таъкидлади.

Макрон Британия Европа Иттифоқини тарк этгани учун иттифоқ хавфсизлиги стратегиясини қайтадан кўриб чиқишга чорламоқда.

"Брексит" ортидан Франция ядровий арсеналга эга ягона Европа Иттифоқи давлатига айланди. Макрон НАТОни қўллашини изҳор қилиб, бир вақтнинг ўзида Вашингтонга бўлган тобеликни озайтиришни исташини айтган.

Ўтган ҳафтада Макрон Европа давлатларини мудофаа харажатларини оширишга чорлади.

Франция НАТО аъзоси бўлса-да, ўз ядровий қуролларини альянс ихтиёрига ўтказмаган. Париж ўз мустақил ядровий дастури борлигидан фахрланади. Германия эса Вашингтон ёрдами етарли эканини айтиб, Франция қуролларига таянишга қарши чиқиб келади.

Босниядаги лагерда қолаётган муҳожирлар полиция билан тўқнашди

Босниядаги лагерда яшаётган муҳожир, 14 февраль, 2020 йил

Босния ва Герцеговинада лагерда ушлаб турилган юзлаб муҳожир полиция билан тўқнашди.

Хабарларга кўра, муҳожирлар лагердаги шароитлар ҳамда қўшни Хорватия полицияси уларга қарши куч ишлатганидан норозилик билдириб, лагерни тарк этишга уринган.

Ҳодиса 15 февраль куни Босния ғарбидаги Мирал муҳожир лагерида содир бўлган. 700 кишига мўлжалланган лагерда айни дамда 1000 нафар одам ушлаб турилибди.

Гувоҳларнинг айтишича, полиция “Озодлик!”, “Пулимизни қайтаринг!”, “Бизни уришни бас қилинг!” дея ҳайқирган муҳожирлар билан тўқнашган, уларнинг айримларини қўлга олган.

Муҳожирлар, шунингдек, лагердан 10 км масофада жойлашган Хорватия полицияси уларни калтаклагани, уст-бош ва телефонларини тортиб олганини айтиб, шикоят қилган.

Хорватия расмийлари чегарадан ўтишга уринган муҳожирларга қарши кескин куч ишлатилганини рад этди.

Босния расмийларининг сўзларига кўра, 2019 йилда асосан Покистон, Афғонистон, Ироқ, Марокко ва Суриядан келган ва ғарбий Европага боришни кўзлаётган 50 мингга яқин муҳожир Босниядан ўтган.

Айни дамда Боснияда 6 мингга яқин муҳожир лагерларда сақлаб турилибди.

Зеленский октябрда Донецк ва Луганскда маҳаллий сайлов ўтказишга чорлади

Украина президенти Володимир Зеленский, 15 февраль, 2020, Германия.

Украина президенти Володимир Зеленский мамлакат шарқида тинчимаётган конфликтга қарамасдан, жорий йилнинг октябрида мамлакат бўйлаб, жумладан, Донецк ва Луганскда маҳаллий сайлов ўтказишга чорлади.

15 февраль куни Мюнхен хавфсизлик конференциясида сўзлаган Зеленский ғарб давлатларини Киевни Россия дастаклаб келаётган айирмачиларга қарши курашда қўллашда чорлади.

- Биламан, Украинадаги уруш — Европадаги уруш. Қрим аннексияси билан бошланган уруш Иккинчи жаҳон уруши қанча давом этган бўлса, ўшанча пайтдан бери тинчимаяпти. Тасаввур қилинг-а! — деди президент. ​- Бугунги кунда истагимиз Украина ҳудудлари бўйлаб, жумладан, Донецк ва Луганск регионларининг айрим ҳудудларида октябрь ойида маҳаллий сайлов ўтказишдир. Қрим ҳудудида ҳам айни нарсани амалга ошириш ниятимиз бор.

Зеленский Донбасс аҳли “Украина ҳамда бутун дунё легитим деб тан оладиган сайловга муҳтож эканлигини” қўшимча қилди.

Европада коронавирусдан биринчи ўлим қайд этилди

Европада коронавирусдан биринчи ўлим холати қайд этилди. Францияда коронавирусга чалинган хитойлик сайёҳ вафот этган.

Франция Соғлиқни сақлаш вазирлиги маълумотига кўра, 80 ёшли аёл коронавирус ўчоғи ҳисобланган Хубэй вилоятидан 16 январда келган ва 25 январда карантинга олинган бўлган.

Шу пайтгача Хитой ташқарисида коронавирусдан уч киши ҳалок бўлди. Ўлим холатлари Хонг Конг, Филиппин ва Японияда қайд этилди.

Хитойнинг ўзида эса коронавирус 1 ярим мингдан ортиқ одам ёстиғини қуритди.

Дунё бўйлаб 20дан ошиқ давлатда 59 мингдан кўп коронавирусни юқтириш ҳоллари қайд қилинди.

Ўзбекистонда эса, мамлакат Соғлиқни сақлаш вазирлигига кўра, коронавирусга чалинган беморлар йўқ.

Россия Сочи Олимпиадасида олган яна бир олтин медалдан маҳрум этилди

Россиялик биатлончи Евгений Устюгов антидопинг қоидаларини бузганликда айбланиб, спортдан икки йилга четлатилди.

Устюгов пешобида допинг аниқлангач 2014 йил Сочи Олимпиадасида у билан бирга эркаклар эстафетаси мусобоқаларида қатнашган Россия терма жамоаси биатлончилари ҳам олтин медалдан маҳрум этилди.

Шундай қилиб, Россия термаси Сочи Олимпиадаси медаллар ҳисобидаги ғолибликни йўқотди.

Спортчи 21 куни ичида халқаро спорт арбитражига қарор юзасидан даъво киритиши мумкин.

Устюгов бу йил 35 ёшга тўлади. Шу билан унинг спортдаги карьераси тугагани ҳақида ёзмоқда Россия матбуоти.

"Манчестер Сити" Европа кубоги ўйинларидан икки йилга четлатилди

УЕФА "Манчестер Сити" футбол клубини икки йилга Европа кубоги ўйинларидан четлатди.

Бундан ташқари, клуб 30 млн евро миқдорида жаримага ҳам тортилди.

"Манчестер Сити" 2012-2016 йилларда ҳомийлардан олган даромадларини ошириб кўрсатиб, лицензиялаш ва молиявий фэйр-плей қоидаларини жиддий тарзда бузган, дейилади УЕФА баёнотида.

"Манчестер Сити" Британиядаги энг навқирон футбол клублардан саналади.

Клуб Англияда олти марта чемпионликни қўлга киритган.

Помпео “Толибон” билан музокараларда муҳим илгари силжиш борлигини билдирди

АҚШ Давлат котиби Майк Помпео

Кейинги кунларда АҚШнинг “Толибон” ҳаракати билан тинчлик музокараларида “муҳим илгари силжиш” рўй берди¸ деб баëнот берди АҚШ Давлат котиби Майк Помпео.

Вашингтон дипломатлари раҳбарига кўра¸ Дональд Трамп Афғонистонда ўн йиллардан бери давом этаëтган урушга барҳам беришни мақсад қилган сўзлашувларни давом эттириш таклифини маъқуллаган.

2001 йилдан бери АҚШ ҳарбийлари Афғонистонда қолмоқда.

Пайшанба куни АҚШ Мудофаа вазири Марк Эспер «Толибон» билан яқин ҳафталарда жанговар ҳаракатларни тўхтатиш борасида келишувга эришилганини билдирди.

Трамп маъмурияти «Толибон» билан музокараларда жиддий муваффақиятга эришилгани ҳақида бундан олдин ҳам баëнот берган¸ аммо шунга қарамай Афғонистондаги жанговар ҳаракатлар тўхтамаган.

Айни пайтда¸ «Толибон» вакили жума кунидан бошлаб жанговар амалиëтлар қисқариши¸ аммо ҳозирча уларни бутунлай тўхтатиш ҳақида гап бормаëтганини билдирди.

Қирғизистонга Хитойдан яна 40 талаба қайтди

Хитойдан яна 40 нафар қирғизистонлик қайтди. Бу ҳақда Қирғизистон Соғлиқни сақлаш вазирлиги матбуот хизмати маълумот тарқатди.

Улар Қозоғистон томонининг дастаги билан “Пекин-Олмаота” рейсида келишган. Қайтганларнинг ҳаммаси Урумчида таҳсил оладиган талабалардир.

Улар ХХР билан чегаралар ёпилгани ва парвозлар бекор қилингани сабабли аввал харид қилинган чипталар билан келолмаётган эдилар.

ССВ маълумотига кўра, келганларнинг ҳаммаси карантинга жойлаштирилган ва барчасининг аҳволи яхши.

“Келган фуқароларнинг ҳаммаси коронавирус инфекцияси бўйича текширувдан ўтказилади. Карантин вақтида келган шахслар билан фақат тиббиёт ходимларигина мулоқотда бўладилар”, дейилади вазирлик хабарномасида.

Бунгача Қирғизистон Хитойдан 200 дан зиёд фуқаросини олиб чиққан.

Айни дамда Қирғизистонда коронавирус билан боғлиқ ҳолатлар аниқланмаган. Барча назорат-ўтказиш масканлари, Бишкек ва Ўшдаги аэропортларда санитар назорат ўрнатилган. Хитой билан чегарадаги НЎМлар вақтинча ёпилган, ҳаво қатнови тўхтатилган.

Назарбоевнинг набираси оилавий жанжал сабаб Буюк Британиядан бошпана сўраганини билдирди

Нурсултон Назарбоев набиралари Ойсултон (чапда) ва Олтой билан. 1992 йил.

Қозоғистон биринчи президенти Нурсултон Назарбоевнинг Лондонда яшаëтган набираси Ойсултон Буюк Британиядан бошпана сўради.

Ойсултон Назарбоев ўз Facebook саҳифасида оиласидан бўлаëтган босимлар сабаб шундай қарорга келганини ëзди.

Назарбоев набираси Қозоғистон ва Россия ҳукуматлари ўртасидаги коррупцияга оид маълумотга эгалигини ҳам билдирди.

Унинг айтишича¸ Қозоғистон гази ўртакаш компания орқали Газпромга сувтекинга сотилади ва ўртада ишланган пуллар “Путиннинг ҳамëни” бўлган шахслар билан бўлиб олинади¸ сўнгра бу миллионлар Сингапурдаги банк ҳисобларига ўтказилади.

Ойсултон Назарбоевга кўра¸ бу схемадаги ўртакаш компания Қозоғистонга 700 миллион долларга яқин пул беради ва бу пуллар холасининг эри Тимур Кулибоев ва ўзининг собиқ қайнотаси Кайрат Боранбоев томонидан бўлишиб олинади.

Ойсултоннинг айтишича¸ онаси Дариға Назарбоева ва унинг иккинчи эри Кайрат Шарипбоев бу контрактни ўз қўлига олишга уринмоқда¸ томонларнинг очкўзлиги боис¸ ўзи бу можаро марказига тушиб қолган.

Ўз оиласидаги бойлик талашуви ҳақида Британиянинг Times газетасига интервью берганини айтган Ойсултон Назарбоев¸ бунгача наркотик моддалар истеъмол қилиши ҳақидаги хабарлар билан жамоатчиликка танилган эди.

Хусусан¸ ўтган йил октябрь ойида 28 яшар Ойсултон Назарбоев маҳаллий суд томонидан Лондонда полицияга қилган ҳужуми учун шартли равишда бир йил озодликдан маҳрум қилиниб¸ жамоат ишларига жалб қилинган эди.

"Назарбоев гиёҳванд моддалар таъсирида 5 июнь куни Ковент-Гарден туманида полиция ходимига ҳужум қилганликда, уларни уриб ва улардан бири Росс Сэмбрукни тишлаб олганликда айбдор, деб топилди”, деб ëзилган эди суд қарорида.

Бердимуҳаммедов Миллий хавфсизлик вазирини ишдан бўшатди

Генерал Яйлим Бердиев (ўнгда)нинг кейинги тақдири номаълум бўлиб қолмоқда.

Туркманистон президенти Гурбангули Бердимуҳаммедов мамлакат Миллий хавфсизлик вазири Яйлим Бердиевни лавозимидан бўшатди.

22 январь кунги Давлат хавфсизлик кенгаши йиғинида Бердимуҳаммедов Бердиев рутбасини генерал-полковникдан генерал-майор даражасига туширган ва уни Хавфсизлик кенгаши котиби лавозимидан бўшатган эди.

Ўша мажлисда Бердиевга ишда йўл қўйган камчиликлар учун “сўнгги огоҳлантириш” берилган эди.

Ўтган йил ноябрь ойида туркманистонлик врач мамлакатдаги жинсий озчилик ҳаëти ҳақида Озодлик туркман хизматига берган интервьюси учун Миллий хавфсизлик вазирлиги томонидан қийноққа солинган эди.

Бу воқеа халқаро майдонда жиддий эътирозларга сабаб бўлгани ортидан Бердимуҳаммедов Миллий хавфсизлик вазирига огоҳлантириш берган эди.

Ҳозирча Бердиевнинг кейинги тақдирига оид расмий маълумот берилмади.

13 февраль куни Туркманистон давлат телеканаллари полковник Гурбанмурат Аннаевнинг янги Миллий хавфсизлик вазири этиб тайинланганини хабар қилди.

Туркия президенти Россияни Идлибдаги тинч аҳолига ҳужум қилаëтганликда айблади

Идлиб яқинидаги турк ҳарбийлари.

Туркия президенти Ражаб Тоййиб Эрдўғон Россияни Суриянинг Идлиб вилоятидаги тинч аҳолига ҳужум уюштираëтганликда айблади.

Эрдўғон шунингдек турк ҳарбийларига яна ҳужум қилган тақдирда¸ Сурия ҳукумат қўшинларига кескин жавоб ҳужуми берилажагидан огоҳлантирди.

Россия Мудофаа вазирлиги Эрдўғон баëнотини «ҳақиқатдан йироқ»¸ деб баҳолади.


Россия ҳарбийлари¸ Суриядаги террорчи гуруҳлар тинч аҳолидан жонли қалқон сифатида фойдаланиб келаëтганини қўшимча қилди.

Жорий ҳафта бошида турк ҳарбийларининг Идлибдаги кузатув пунктига Сурия ҳукумат қўшинлари ўт очиши оқибатида ўндан ошиқ турк аскари ўлдирилди.

Анқара Кремлдан ўз нуфузидан фойдаланиб Сурия президентини Идлибдаги ҳарбий амалиëтларни тўхтатишга кўндиришга чақирмоқда.

Хитойнинг Хубэй провинциясида коронавирусга чалинганлар сони бир кунда 10 баробарга кўпайди

Хитойлик врач иситма билан келган бемордан анализ олмоқда.

Хитойнинг Хубэй провинциясида коронавирусга чалинганлар сони 13 февралга келиб бир кун олдингига қараганда 10 баробарга кўпайди ва янги беморлар сони 15 мингга етди.

Бу ҳақда хабар қилган маҳаллий расмийларга кўра¸ кейинги 24 соат ичида коронавирусдан ўлганлар сони ҳам икки баравардан ошган ва 242 тага етган.

Бу рақамлар шу пайтгача қайд этилган ўртача кўрсаткичлардан анча баланддир.

12 февраль куни Жаҳон соғлиқни сақлаш ташкилоти коронавирус инфекцияси тарқалиши сусайганини билдирган эди.

Кейинги 24 соат ичида вирусга чалинганлар сонининг кескин ошишини шарҳлаган Хитой соғлиқни сақлаш расмийлари уни касалликни диагностика қилиш методикасидаги ўзгариш билан изоҳлади.

Айтилишича¸ хитойлик врачлар бошқа лаборатория анализлари натижасини кутмасдан¸ компьютер томографияси асосида вирусни дастлабки босқичда аниқлаш методикасини қўллашга ўтган.

Ҳозирга келиб Хитойда коронавирусга чалинганлар сони 60 мингга етди.

Ашхобод мактабларида уяли телефондан фойдаланган ўқувчиларнинг ота-оналари жазоланмоқда

Ашхобод мактабларида уяли телефондан фойдаланган ўқувчиларнинг ота-оналари жаримага тортилаяпти.

Озодлик туркман хизматининг Ашхободдаги мухбирларига кўра, сўнгги ҳафталарда пойтахтдаги иккита мактабда ўқувчиларнинг уяли телефондан фойдалангани аниқланиб, олиб қўйилган.

Мухбирнинг хабар қилишича, ўқитувчилар аввалига ўқувчиларни мактаб директорининг хонасига олиб боришади, директор чақируви бўйича етиб келган полиция ходимлари ўқувчиларни бўлимга олиб кетишади.

Полиция бўлимида ўқувчилардан бундан буён мактабда уяли телефон ишлатмаслик борасида тилхат олинади, аммо олиб қўйилган телефонлар уларга қайтарилмайди. Бундан ташқари, ўқувчиларнинг ота-оналари жаримага тортилади.

“Бўлимга ота-оналар чақирилади ва улардан 100 манат (расмий курс бўйича тақрибан 28,5 доллар - таҳр.) миқдорида жарима тўлаш талаб қилинади. Жарима "Халқбанк" бўлимида тўланади, 100 манатдан ташқари банк хизмат учун1 манат олиб қолади. Тўланганлик ҳақидаги квитанция зудлик билан полиция бўлимига олиб келиниши керак. Шундан кейингина олиб қўйилган телефонлар ота-оналарга қайтарилади”, дея хабар қилади Ашхободдаги мухбиримиз.

Озодликнинг туркман хизмати мамлакат Таълим вазирлигидан бу борада расмий изоҳ ололмаган.

Январь ойи ўрталарида мактабларга уяли телефон олиб келиш ва улардан фойдаланишни тақиқлаш аввалига пойтахт Ашхободда жорий қилинган, сўнгра бу каби чекловлар Балкан, Лебап ва Дашўғиз вилоятларига ёйилган. Чекловга уяли телефоннинг бола тарбиясига салбий таъсири сабаб ўлароқ келтирилган.

Хубэйда коронавирус қурбонлари сони 1300 нафардан ошди

Хитойнинг Хубэй вилоятида COVID-19 деб номланган коронавирусдан ўлганлар сони 1310 нафарга етди, касалликни юқтириб олганлар сони эса 48 минг кишидан ошди. Бу ҳақда вилоят гигиена ва соғлиқни сақлаш масалалари қўмитаси маълумот тарқатди.

Айни пайтда хасталикдан 3441 киши соғайгани айтилмоқда.

Хабарларга кўра, Хитой армияси коронавирусга қарши кураш учун Уханга қўшимча 2,6 минг нафар ҳарбий шифокорни йўллаган. Вирус тарқалганидан бери армия бу шаҳарга 4 минг нафар шифокор ва ҳамшира юборган.

Хитой расмийлари вирус янада кенгроқ тарқалиши олдини олиш учун Хубэй вилоятини изоляция қилган.

Коронавирусга чалиниш ҳолатлари Хитойдан ташқари яна 24 та давлатда қайд этилган.

Демократик партиянинг Нью-Ҳампширдаги қурултойида 78 яшар Берни Сандерс ғолиб бўлди

Сенатор Берни Сандерс.

2020 йилги президент сайловларида қатнашадиган ўз номзодини саралаш жараëнини бошлаган Демократик партиянинг шимол-шарқий Нью-Ҳампшир штатидаги қурултойи ( прамериз)да Берни Сандерс ғолиб бўлди.

«Бу ғалаба Дональд Трамп сўнгининг бошланишидир»¸ деди ўз тарафдорларига қарата қилган чиқишида Сандерс.

Нью-Ҳампшир қурултойида индианалик номзод Пит Буттижич иккинчи ўринни эгаллади.

Ҳозирга келиб¸ 78 яшар сўлчи Сандерс ва мўътадил сиëсатчи 38 яшар Буттижич партия қурултойида ҳозиргача умумиятла 9 тадан делегатга эга бўлди.

Учинчи ўринни 6 делегат билан сенатор Эми Клобушар эгаллади. Демократик партиянинг етакчи номзодлари сифатида кўрилаëтган Элизабет Уоррен ва Жо Байденлар овоз қозона олмади.

Делегатлар сони бўйича кичик бўлишига қарамай¸ Нью-Ҳампшир сайловолди кампаниясида муҳим ўрин тутади ва партия қурултойининг кейинги ривожига муҳим таъсир кўрсатади.

Демократларнинг навбатдаги қурултойи 22 февраль куни Невада штатида бўлиб ўтади.

Демократик партиянинг ялпи қурултойида партиянинг ягона номзоди сайланади ва бу номзод 2020 йил ноябрида ўтказиладиган навбатдаги президент сайловида Дональд Трампга рақиблик қилади.

Давомини ўқинг

Кўрмай қолган бўлсангиз

XS
SM
MD
LG