Линклар

Шошилинч хабар
21 феврал 2020, Тошкент вақти: 21:35

Ўзбекистон хабарлари

Ўзбекистонда кичик ГЭСлар барпо этиш вазифаси хусусий секторга берилиши мумкин

Иллюстратив сурат.

Ўзбекистонда келажакда электр энергиясининг рақобатли улгуржи бозорини шакллантириш, генерация жараёнига давлат-хусусий шериклик тамойили асосида инвесторларни жалб қилиш ва бунда давлат кафолатини босқичма-босқич камайтириш муҳим. Бу ҳақда Ўзбекистон президенти Шавкат Мирзиёев 13 январь куни электр энергетикаси соҳасини янада ривожлантириш бўйича 2020 йилдаги асосий вазифалар муҳокамасига бағишланган йиғилишда билдирган.

Президент матбуот хизмати тарқатган маълумотга мувофиқ, жорий йилда Ўзбекистонда “электр энергияси истеъмоли 71 миллиард киловатт-соатни ташкил этиб, ўтган йилгига нисбатан ўртача 9 фоизга, яъни иқтисодиёт тармоқлари талаби 10, аҳолиники эса 8,5 фоизга ошиши кутилмоқда”.

Йиғилишда ушбу эҳтиёж қайси манбалар ҳисобидан қопланиши, Жаҳон банки ва Осиё тараққиёт банки билан ҳамкорликда ишлаб чиқилган “йўл харитаси” ижроси муҳокама қилинган.

Ш. Мирзиёев 2020 йилда электр энергияси ишлаб чиқариш, тақсимлаш ва етказиб бериш бўйича белгиланган чора-тадбирларни тўлиқ, сифатли амалга ошириш зарурлигини таъкидлаган.

Айтилишича, жорий йилда иссиқлик электр станцияларида 1177 мегаватт, гидро электр станцияларида 120 мегаватт қувватлар ишга туширилиши режалаштирилган. Шунингдек, тўғридан-тўғри хорижий инвестициялар ҳисобига 3 минг 500 мегаваттли буғ-газ қурилмалари, 400 мегаваттли шамол ва шундай қувватга эга қуёш электр станцияларини қуриш бўйича лойиҳалар шакллантирилган.

Йиғилишда тармоқ корхоналарида рентабелликни таъминлаш, энергия истеъмоли учун қарздорликни бартараф этиш масаласига ҳам алоҳида эътибор қаратилган. Электр энергиясини назорат қилиш ва ҳисобга олишнинг автоматлаштирилган тизими бу борада яхши самара бераётгани қайд этилиб, “Ҳудудий электр тармоқлари” акциядорлик жамиятига йил якунигача яна 4 миллион 500 минг дона замонавий ҳисоблагичлар ўрнатиш вазифаси қўйилган.

Йиғилишда соҳани ривожлантиришнинг узоқ истиқболлари ҳам кўриб чиқилган.

Ҳисоб-китобларга кўра, 2030 йилга бориб Ўзбекистонда электр энергияси истеъмоли ҳозиргига нисбатан 2 баробар кўп бўлиши кутилмоқда. Шу боис Энергетика вазирлигига кейинги ўн йилда умумий қуввати 7 минг 900 мегаваттни ташкил этадиган янги иссиқлик электр станцияларини ишга тушириш бўйича топшириқлар берилган.

Шунингдек, инвесторларни жалб қилган ҳолда, 8 минг мегаватт қувватга эга қуёш ва шамол электр станцияларини қуриш, гидро электр станциялари қувватини 1 минг 935 мегаваттга ошириш, кичик гидро электр станциялар барпо этишни хусусий секторга бериш юзасидан вазифалар белгиланган.

Мутасадди ташкилотларга Олий ва ўрта махсус таълим вазирлиги билан биргаликда электр энергияси соҳасида замонавий технологиялар билан бевосита ишлайдиган ўрта ва кичик бўғин мутахассисларини тайёрлаш бўйича беш йиллик дастур ишлаб чиқиш вазифаси қўйилган.

Ўзбекистонда кўп йиллардан бери кузатиладиган энергетик бўҳрон бу йилги қиш мавсумида ҳам аҳоли норозилигига сабаб бўлди.

Ноябрь ва декабрнинг бошларида мамлакатнинг бир қанча вилоятлари туманларида аҳоли газ ва свет йўқлигига норозилик билдириб автомагистрал йўлларини тўсиб қўйгани ҳақида Озодлик аввал хабар қилганди.

Кун янгиликлари

Ўзбекистон Google, Yandex ва Facebookни фойдаланувчилар маълумотларини Ўзбекистонда сақлашга мажбурламоқчи

Ўзбекистон Google, Yandex ҳамда Facebook ширкатларини ўзбекистонлик фойдаланувчиларига оид шахсий маълумотларини мамлакат ҳудудида сақлашга мажбурлашни режалаштиряпти.

Бу режа Россияда 2014 йил Роскомнадзор қабул қилган мунозарали қонун лойиҳасига ўхшайди. Роскомнадзор қарорига биноан Интернет ширкатларини россиялик фойдаланувчиларга оид маълумотларини Россия ҳудудида сақлашга мажбур.

20 февраль куни Ўзбекистон Республикаси Ахборот технологиялари ва коммуникацияларини ривожлантириш вазирининг биринчи ўринбосари Олимжон Умаров турли хизматлар ҳамда сервер мосламаларини Ўзбекистонга олиб келиш йирик ширкатлар билан ҳамкорликда амалга оширилишини айтди.

Вазирлик эълон қилган билдирувда ушбу чора Ўзбекистонда Интернет тезлигини 10 баробарга ошириш режаси доирасида амалга оширилиши айтилди.

Аммо танқидчилар бу режадан мақсад Интернет фойдаланувчилари устидан назоратни кучайтириш эканлигини айтишмоқда.

Google 2015 йилда Россия қонуни талабларини бажариш учун айрим серверларини Россия маълумот марказларига кўчириб ўтган эди.

Аммо бошқа ширкатлар Москва талабини бажаришдан бош тортиб келади. 13 февраль куни Москва суди Twitter ва Facebook ширкатларига фойдаланувчилар маълумотларини Россияга кўчириб ўтмагани учун 60 минг доллардан жарима тўлашни буюрди.

ЎТЙ: Метродаги тупроқ ўпирилишида ҳалок бўлганларга товон пули берилди

2019 йилнинг 18 декабрида Тошкент метрополитенининг янги қурилаётган Юнусобод йўналишида содир бўлган авария оқибатида ҳалок бўлган Зариф Каримов оиланинг асосий боқувчиси бўлгани сабабли 12 февраль куни иш берувчи ва «Темирйўлсуғурта» суғурта компанияси томонидан унинг беваси Майсара Мавлоновна Ирисовага 281 млн 671 минг сўм миқдоридаги тўловлар ўтказиб берилди.

Бундан ташқари, марҳумнинг дафн маросими харажатлари учун 8 млн сўм ажратилган. Айни вақтда марҳумнинг қарамоғида бўлган беш нафар оила аъзосининг ҳар бирига 650 минг сўм миқдорида нафақа ҳар ой тўлаб борилиши бошланган.

Бу ҳақда «Ўзбекистон темир йўллари» АЖ матбуот хизмати хабар қилди.

Айтилишича, шунингдек, махсус комиссия қарори билан фожиа қурбони бўлган яна 5 марҳумнинг оилаларига ҳам бир марталик нафақа пуллари, шунингдек, меҳнатга лаёқатли бўлмаган оила аъзолари учун ойлик компенсация тўловларини белгилаган. Уларга тўловларни меҳнат шартномасини тузган фирма амалга оширади.

  • 2019 йилнинг 18 декабрида Тошкент метрополитенининг янги қурилаётган Юнусобод йўналишида содир бўлган авария оқибатида 6 қурувчи ҳалок бўлган эди.

Ўзбекистонда 68 мингдан зиёд талабанинг ётоқхона муаммоси ҳал этилмаган

Иллюстратив сурат.

Ўзбекистондаги 115 та олийгоҳ кундузги бўлимларида 356 мингдан зиёд талаба ўқийди. Улар учун 208 та ётоқхона фаолият юритмоқда. Мазкур ётоқхоналарга ҳозир 53 минг чоғли талаба жойлаштирилган, 103 минг талаба ижарада туради, улардан яна 200 минги ўз уйларида яшайдилар. 68 минг талаба эса ётоқхонага муҳтож. Бу маълумотлар Олий ва ўрта махсус таълим вазирлиги томонидан талабаларнинг ётоқхона билан таъминланиши бўйича депутатлар сўровига жавобан йўлланган.

Вазирлик маълумотига кўра, 68 минг 354 талабани ётоқхона билан таъминлаш учун ҳар бири 400 ўринга эга бўлган 170 та ётоқхона қуриш зарур. Бунга эса 3 триллион сўм маблағ лозим.

2030 йилгача олий таълим масканларига кириш учун квота 50 фоизга оширилиши назарда тутилса, яқин 10 йил ичида яна 300 та ётоқхона қуриш керак бўлади.

Тошкент марказида дарахтларга қирон келтирилди

Иллюстратив сурат.

Тошкент шаҳрининг Яккасарой туманидаги Юнус Ражабий кўчасида куни кеча бутун бошли дарахтзор кесиб ташланди. Бу ҳақда “Новости Узбекистана” нашрига пойтахт ҳокимияти қошидаги Жамоатчилик кенгаши аъзоси Абу-Али Ниёзматов билдирган.

“Ахлоқий, маънавий, қонунчиликка оид барча меъёрларга зид равишда бугун Тошкентнинг қоқ марказида бутун бошли дарахтзор ёппасига ва ваҳшийларча кесиб ташланди. Бу ер узоқ йиллар давомида катталарнинг ҳам, болаларнинг ҳам ҳордиқ чиқарадиган жойи бўлиб келган. Дарахтларга амалдаги мораторийга қарамасдан қирон келтирилган, бу эса мазкур ҳужжатни имзолаган давлат раҳбарига ҳам, ватандошларга ҳам, мамлакатга ҳам ҳурматсизликдир”, деган Ўзбекистон Экология партияси аъзоси Ниёзматов.

Унинг айтишича, 80-90 чоғли катта дарахт кесилган. Дарахт қиронини бу жойда уй қурмоқчи бўлган бинокор қурган. Дарахт кесиш учун рухсатномани у шу йил февралида туман ҳокимиятидан олган, бу ҳам ижроия ҳокимияти томонидан йўл қўйилган қонунбузарлик бўлиб ҳисобланади.

Ниёзматов дарахт кесишга алоқадор шахсларнинг амалдаги қонунчиликка мувофиқ равишда жазоланиши учун қўлидан келган барча ҳаракатларни амалга оширишга ваъда берган.

Ўзбекистонда президент фармони билан 2019 йил 1 ноябридан 2020 йил 31 декабригача дарахтлар кесилишига мораторий жорий этилгани ҳақида Озодлик аввал хабар қилганди.

Мирзиёевнинг Туркияга сафари поёнига етди

Ўзбекистон ва Туркия президентлари Анқарадаги Халқ кутубхонасининг очилиш маросимида, 2020 йил 20 феврали.

Ўзбекистон президенти Шавкат Мирзиёевнинг Туркияга 2 кунлик ташрифи ниҳоясига етди.

Президент матбуот хизмати маълумотига кўра, 19 февраль куни Мирзиёев ва Эрдўғон тор доирада музокара ўтказганлар, сўнгра икки президент раислигида Олий даражадаги стратегик ҳамкорлик кенгашининг биринчи йиғилиши ўтказилган.

Музокараларда Ўзбекистон билан Туркия ҳамкорлигига оид барча масалалар ва уларнинг ечимлари, истиқболдаги асосий вазифалар ҳамда қўшма лойиҳалар юзасидан келишувларга эришилган, қатор ҳужжатлар имзоланган.

20 февраль куни эса Мирзиёев Туркиянинг етакчи ширкат ва банклари раҳбарлари билан учрашув ўтказган, Туркия президенти ҳузуридаги Халқ кутубхонасининг очилиш маросимида иштирок этган.

Шу куни Ўзбекистон президенти Тошкентга қайтган. Мирзиёевни “Эсонбуға” аэропортидан туркиялик ҳамкасби Ражаб Тоййиб Эрдўғон кузатиб қўйган.

Туркияда ўзбек ва туркман талабалари норозилик тадбири ўтказишди

Туркияда ўқиётган хорижлик талабаларни Элазиғда содир бўлган зилзила хавотирга солиб қўйган.

Туркиянинг Қаҳрамонмараш шаҳрида ўқиётган ўзбекистонлик, туркманистонлик ва озарбайжонлик талабалар 19 февраль куни норозилик намойиши ўтказишди. “Хроника Туркменистана” нашри хабарига кўра, улар ўзларини авария ҳолатида бўлган ётоқхонадан кўчиришни сўраганлар.

Қаҳрамонмараш Сутчи имом университети (Kahramanmaraş Sütçü İmam Üniversitesi) талабалари уюштирган тадбирда 400 чоғли одам иштирок этган. Митинг ўтаётган жойга сув пуркагич машиналари билан полиция етиб келган.

Талабаларга кўра, уларни Элазиғ ва Малатья вилоятларида содир бўлган зилзилалар ташвишга солиб қўйган. Қарийб бир ой муқаддам Элазиғда рўй берган ер силкиниши 41 киши умрига зомин бўлган, зилзила чоғида 378 бино қулаган, яна 3249 иншоотга жиддий шикаст етганди. Шундан сўнг мутахассислар Истанбул ва Қаҳрамонмарашда ҳам 7-8 балли зилзилалар содир бўлиши мумкинлиги ҳақида ўз тахминларини айта бошлаганлар.

Сутчи имом университети ўқитувчилари мулоҳазасича, ўқув даргоҳига қарашли эски бинолар, шу жумладан, хорижлик талабаларга берилган ётоқҳонанинг йиқилиши учун 3,2 балли зилзила кифоя.

Қаҳрамонмараш расмийлари университетнинг янги биноларини қуриш учун ҳозирча ер ажратиб беролмасликларини айтганлар. Улар талабаларни бошқа ўқув даргоҳларига кўчиришни ҳам истаётганлари йўқ.

Ўқишини кўчираётган талабалар фирибгарларга алданиб қолиш хавфидан огоҳлантирилди

Тожикистон. Садриддин Айний номидаги педагогика университетининг ўзбекистонлик талабалари ҳужжатларини олиш учун навбатда турибди. 2020, 11 февраль.

Қўшни давлатлардаги олий таълим муассасаларидан бирида ўқиганлик тўғрисидаги қалбаки ҳужжат қилиб беришни таклиф этаётган тамагир ва фирибгарларнинг таклифларидан эҳтиёт бўлинг.

Бу огоҳлантирувни Таълим сифатини назорат қилиш давлат инспекцияси эълон қилди.

Инспекцияга кўра, ҳудудий ишчи гуруҳларга фуқаролар томонидан қалбаки (сохта, ясама) ҳужжатлар топширилаётганлиги аниқланмоқда.

Ўқишини қўшни давлатлардаги ОТМлардан кўчириш тўғрисида ариза топширган фуқароларнинг ҳужжатлари тўлиқ текширилишини ва қалбаки ҳужжатлар аниқланган тақдирда талабаликка қабул қилинмаслигини, бундай ҳолатда ҳужжатлар ҳуқуқни муҳофаза қилувчи идораларга тақдим этилажагини эслатган инспекция.

  • 11 февралда Ўзбекистон Республикаси Олий ва ўрта махсус таълим вазирлиги Тожикистон, Қирғизистон ва Қозоғистон олий ўқув юртларида ўқиётган ўзбекистонлик талабалардан ўқишни Ўзбекистонга кўчириш тўғрисидаги аризаларни қабул қилиш муддатини 15 мартга қадар узайтирди.
  • Вазирлик ўз қарорини “талабалар ва уларнинг ота-оналаридан келиб тушган кўплаб мурожаатларни инобатга олган ҳолда, фуқароларга қўшимча қулайлик яратиш мақсади” билан изоҳлаган.
  • Вазирнинг 6 февралдаги буйруғида муддат 7 февралдан 15 февралгача қилиб белгиланган эди.

Тошкентдан Тўйтепагача "яқин истиқболда" метро қурилади

Тошкентдан Нурафшонга — Тошкент вилоятининг маъмурий марказига — метрополитен тармоғини ўтказиш режалаштирилмоқда. Бу ҳақда 19 февраль куни вилоят маъмуриятида ўтказилган йиғилишда Ўзбекистон бош вазирининг биринчи ўринбосари Очилбой Раматов маълум қилгани тўғрисида gazeta.uz хабар қилди.

Нашрнинг Тошкент вилоят ҳокимлиги матбуот хизматига таяниб хабар беришича, Нурафшондаги вилоят ҳокимлиги мажлислар залида ўтказилган йиғилишда президент маслаҳатчиси Шерзод Кудбиев, бош вазирнинг биринчи ўринбосари Очилбой Раматов, бош вазир ўринбосари Жамшид Қўчқоров иштирок этган

«Яқин истиқболда Нурафшон шаҳрига метро қатнови йўлга қўйилади, — деди Очилбой Раматов. — Шунингдек, инфраструктурани ривожлантириш масалалари бўйича айни пайтда вилоят ҳокимлиги билан қатъий иш олиб бораяпмиз. Ичимлик суви, йўл қурилиши, коммуникация ва канализация тармоқларини қуриш бўйича катта ҳажмдаги ишлар жадал давом этмоқда».

2017 йил ёзида Нурафшон шаҳри (собиқ Тўйтепа) Тошкент вилоятининг маъмурий маркази этиб белгиланган эди (илгари вилоятнинг маъмурий маркази бўлмаган). Вилоят ҳокимлиги бу ерга Тошкентнинг марказидан кўчирилди. Ҳозирда шаҳарни тўлиқ қайта қуриш лойиҳаси амалга оширилмоқда. У Ўзбекистоннинг биринчи «ақлли» шаҳрига айланиши кутилмоқда.

Тошкент билан Анқара “мулоқотнинг янги формати”га кўчди

Мирзиёев (ч) ва Эрдўғон (ў) Туркия президенти саройи олдида, Анқара, 2020 йил 19 феврали.

Анқара шаҳрида 19 февраль куни бўлиб ўтган Олий даражадаги Ўзбекистон-Туркия стратегик ҳамкорлик кенгашининг биринчи йиғилиши икки томонлама муносабатлар тарихида янги мулоқот формати ўлароқ баҳоланди.

Президент матбуот хизмати маълумотига кўра,2018 йили икки давлат раҳбарининг Қўшма баёнотига мувофиқ тузилган Кенгаш ўз фаолиятини Ўзбекистон ва Туркия президентлари ҳамраислигида олиб боради.

Сиёсат, хавфсизлик ва мудофаа, савдо ва иқтисодиёт, инвестиция, туризм, энергетика, транспорт ва транзит, қишлоқ ва ўрмон хўжалиги, маданият, таълим, фан ва техника, инновациялар, соғлиқни сақлаш ва бошқа ўзаро манфаатли соҳалардаги ҳамкорликни ривожлантириш стратегиясини белгилайди.

Кенгашнинг мувофиқлаштирувчи органлари икки давлатнинг ташқи ишлар вазирликлари бўлиб ҳисобланади.

Кечаги илк йиғилишда сўзлаган Ражаб Тоййиб Эрдўғон Шавкат Мирзиёев ташрифини қутларкан, икки мамлакат парламентлари, давлат идоралари ва ишбилармон доиралари ўртасидаги алоқалар мустаҳкамланиб бораётганидан мамнунлигини билдириб, Туркия ва Ўзбекистоннинг қўшма лойиҳаларини ҳар томонлама қўллаб-қувватлашини таъкидлаган.

Мезбонга ташаккур этган Ўзбекистон президенти мазкур учрашув икки давлат стратегик шериклиги юксак босқичга кўтарилганининг яққол ифодаси эканини урғулаган.

- Мамлакатларимиз ўртасида ўзаро товар айирбошлаш ҳажмини яқин йилларда беш миллиард долларга етказишга қаратилган устувор вазифаларни бажаришда ҳам ушбу кенгаш, албатта, муҳим замин бўлади. Биз бугунги йиғилиш натижаларини мустаҳкамлаб, келгуси йили бўлиб ўтадиган учрашувнинг кун тартиби ва ҳамкорлигимизнинг асосий йўналишлари ҳақида ҳозирдан ўйлашимиз мақсадга мувофиқдир, - деган Ш. Мирзиёев.

Йиғилишда Ўзбекистон ва Туркия савдо вазирлари сўзга чиқиб, икки томонлама ҳамкорлик ривожи тўғрисида батафсил ахборот берган.

Музокараларда икки давлат ҳамкорлигига оид барча масалалар ва уларнинг ечимлари, истиқболдаги асосий вазифалар ҳамда қўшма лойиҳалар келишиб олинган.

Шавкат Мирзиёев Стратегик ҳамкорлик кенгашининг навбатдаги йиғилишини ўтказиш учун Ражаб Тоййиб Эрдўғонни Ўзбекистонга таклиф қилган.

Президент Мирзиёевнинг Туркияга сафари бугун ҳам давом этади. Унинг етакчи турк тадбиркорлари учрашиши, Халқ кутубхонасининг тантанали очилиш маросимида қатнашиши режаланган.

Ўзбекистон президентининг Туркияга сафари расмий Тошкентнинг яна бир стратегик шериги Москва билан Анқара ўртасидаги муносабатлар Суриядаги вазият туфайли таранглашган бир пайтга тўғри келди.

Асака ИИБ андижонлик блогернинг калтакланишига оид ҳодисани ўрганмоқда

Андижонлик блогер Отабек Нуритдинов.

Асака туман ички ишлар бўлими блогер Отабек Нуритдиновнинг калтакланиши юзасидан терговга қадар суриштирув ҳаракатларини олиб бормоқда. Бу ҳақда Андижон вилоят ички ишлар бошқармаси ахборот хизмати маълум қилади.

Шу йил 18 февраль куни Андижон вилоятининг Асака шаҳрида яшайдиган блогер Отабек Нуритдинов масжид яқинида спиртли ичимликлар билан савдо қилувчи тадбиркор томонидан калтакланганини иддао қилгани ҳақида Озодлик аввал хабар берганди.

“Ҳолат юзасидан Асака тумани ИИБ томонидан олиб борилган дастлабки суриштирув давомида О.Нуритдинов мурожаатида келтирган спиртли ичимликлар билан савдо қилувчи дўкон Асака шаҳри, А.Жомий кўчасида яшовчи “Халилилло қувончи” номли хусусий корхонасигақарашли бўлиб, дўкон фуқаро Ю.Д. га тегишли эканлиги ва шу куни фарзандлари А.Х. ва А.А.лар билан биргаликда О.Нуриддиновнинг фарзанди даволанаётган Турттош кўчасидаги шифохонага бориб, Отабек ва унинг онаси Матлубахон билан суҳбатлашаётган вақтида Ю.Д.нинг ўғли А.А. унинг юз қисмига уриб тан жароҳати етказганлиги маълум бўлди”, дейилади Андижон вилоят ИИБ хабарномасида.

Қайд этилишича, суриштирув давомида О. Нуриддинов юқорида тилга олинган дўкон ҳақидаги суратни ижтимоий тармоқлар орқали кўрганлиги, саҳифасига жойлаганлиги ва муносабат билдирганлиги натижасида Ю.Д. фарзандлари унинг яшаш манзилига келганлиги ва улар ички ишлар органлари ходимларини рўкач қилиб уни қўрқитмоқчи бўлишганлиги аниқланганлигини ва бу ҳолатга ички ишлар органлари аниқлик киритаётганлиги ва ички ишлар органларининг бу ҳолатга алоқаси йўқлигини маълум қилган.

Ҳодиса юзасидан суриштирув ишлари давом этмоқда.

Ўзбекистон Қозоғистонга энг кўп кийим-кечак экспорт қилаётган мамлакатлар учлигига кирди

Олмаота бозорларидан бири (иллюстратив сурат).

Ўзбекистон Қозоғистонга 2019 йили қиймати 19 миллион долларлик 10 минг тонна кийим-кечак экспорт қилган. Бу ҳақда LS нашри хабар қилади.

Қайд этилишича, ўтган йили Қозоғистон хориждан 670 миллион 600 минг долларлик (қарийб 62 минг тонна) енгил саноат маҳсулоти импорт қилган.

Бу маҳсулотларнинг қарийб ярми (31 тоннаси) Хитойдан келган. Бошқача айтганда, хитойликлар Қозоғистонга 181 миллион 800 минг долларлик кийим-кечак сотган.

Иккинчи ўрин бу мамлакатга 10,5 минг тонна кийим-кечак етказиб берган россияликларга насиб қилган. Ўз маҳсулотлари учун улар 195 миллион олганлар.

Учинчи ўриндаги Ўзбекистон Россия билан қарийб бир хил вазнда маҳсулот етказиб берганига қарамай, унинг бу савдодан даромади 10 баробар кам бўлган.

Қозоғистонга енгил саноат маҳсулотлари экспортёрлари орасида Туркия, Бангладеш, Беларусь ва бошқа мамлакатлар ҳам бор.

Генерал Ботир Парпиевга яна ҳукуматдан лавозим берилди

Ботир Парпиев.

Ўзбекистон Давлат солиқ қўмитаси собиқ раиси Ботир Парпиев президент фармони билан янги ташкил этилган маҳалла ва оилани қўллаб-қувватлаш вазирига ўринбосар этиб тайинланди.

Янги лавозимга тайинлангунига қадар Б. Парпиев Фуқароларнинг ўзини ўзи бошқариш органлари фаолиятини мувофиқлаштириш бўйича кенгаши раисининг ўринбосари (2018 йил майидан бери) вазифасида фаолият кўрсатиб келаётган эди.

2018 йилгача эса у қарийб 14 йил давомида Ўзбекистон Давлат солиқ қўмитасини бошқарган. У солиқ қўмитаси раҳбари лавозимидан бўшатилганидан кейин Озодлик суҳбатлашган мулозимларга кўра, генерал-лейтенант Парпиев истеъфога кетиш истагини соғлиғи ёмонлашгани билан изоҳлаган.

Ботир Парпиев Ўзбекистон Миллий хавфсизлик хизматига 23 давомида раислик қилган Рустам Иноятовнинг қудасидир.

Б.Парпиев Ўзбекистоннинг аввалги президенти Ислом Каримов ҳукуматидаги энг қудратли амалдорлардан бири бўлиб ҳисобланарди.

Ботир Парпиев 1946 йилда Андижон вилоятида, милиция генерал-майори Раҳмат Парпиевнинг оиласида туғилган. 1992-1996 йилларда Андижон вилояти ИИБ бошлиғи, 1996-1998 йилларда Ўзбекистон ИИВ Ёнғин хавфсизлиги бош бошқармаси бошлиғи, 1998-2002 – Ўзбекистон ички ишлар вазири ўринбосари, 2002 йилнинг июнь ойидан декабрь ойигача – Ўзбекистон фавқулодда вазиятлар вазири, 2002-2004 – Ўзбекистон Давлат божхона қўмитаси раиси бўлиб ишлаган, 2003 йилда божхона хизмати генерал-лейтенанти унвонини олган. 2004 йилдан буён Давлат солиқ қўмитаси раиси лавозимида ишлаб келган.

Президент Мирзиёев фармони билан куни кеча Ўзбекистонда Маҳалла ва оилани қўллаб-қувватлаш вазирлиги ҳамда унинг Қорақалпоғистон Республикаси, вилоятлар, Тошкент шаҳар ва туман (шаҳар) бўлинмалари ташкил этилганди.

Ўзбекистонда Умра зиёратчиларига хизмат кўрсатадиган янги авиаширкат тузилади

Ўзбекистонликлар авваллари Умрага аксар пайтларда Uzbekistan Airways учоқлари билан борган.

Ўзбекистонда Вазирлар Маҳкамаси ҳузуридаги Дин ишлари бўйича қўмита, Ўзбекистон Мусулмонлари идораси ва Саудия Арабистони подшоҳлигининг “Hidaya Global Groups” ширкати ҳамкорлигида Hidaya Airlines номли янги авиакомпания очилиши кутилмоқда. Бу ҳақда, маҳаллий нашрлар хабарига кўра, бош вазир ўринбосари, Туризмни ривожлантириш давлат қўмитаси раиси Азиз Абдуҳакимов билдирган.

Янги авиакомпаниянинг Ўзбекистон ва Саудия Арабистони ўртасида Умра сафари учун бевосита парвозларни амалга ошириши ҳамда “Умра+” дастури бўйича Индонезия, Ҳиндистон, Малайзия, Бангладеш каби мамлакатлардан Умра зиёратига борувчиларнинг Ўзбекистон орқали парвоз қилишини таъминлаши кўзда тутилган.

Ўзбекистон ва Туркия ўртасида қатор ҳужжатлар имзоланди

Ўзбекистон (ч) ва Туркия (ў) президентлари, Анқара, 2020 йил 19 феврали.

Ўзбекистон-Туркия стратегик ҳамкорлик кенгашининг биринчи йиғилиши дўстона алоқалар тарихида янги саҳифа очган, сиёсий, савдо-иқтисодий, сармоявий, транспорт, маданий-гуманитар соҳаларга оид кўплаб масалалар атрофлича муҳокама қилинган. Бу ҳақда Ўзбекистон президенти Шавкат Мирзиёев 19 февраль куни Анқарада Туркия президенти Ражаб Тоййиб Эрдўғон билан биргаликда оммавий ахборот воситалари вакиллари учун ўтказилган брифингда билдирди.

Туркияга ташрифининг илк куни Мирзиёев Эрдўғон билан музокаралар ўтказган ва улар икки давлат Стратегик ҳамкорлик кенгашининг биринчи йиғилиши натижалари тўғрисида қўшма баёнот имзолаганлар. Президент матбуот хизмати маълумотига кўра, шу куни иқтисодиёт, савдо, технологиялар соҳасига оид ҳужжатлар ҳам имзоланган.

Икки президент брифингида аксарият минтақавий ва халқаро муаммолар борасида, шунингдек, Бирлашган Миллатлар Ташкилоти, Ислом ҳамкорлик ташкилоти ва Туркий тилли давлатлар кенгаши доирасидаги ҳамкорликка ёндашувлар муштарак экани таъкидланган.

Мирзиёев Туркия ташрифи бугун ҳам давом этади.

Бир амалдор бир пайтнинг ўзида икки вазирга ўринбосар бўлди

Ички ишлар вазири ўринбосари Азиз Икромовга янги ташкил этилган Маҳалла ва оилани қўллаб-қувватлаш вазири ўринбосари вазифалари ҳам юклатилди.

Бу ҳақда Ички ишлар вазирлиги ахборот хизматига таяниб, gazeta.uz хабар қилди.

​Маълумотда таъкидланишича, Икромов Ички ишлар вазирлигида ўз лавозим ва вазифаларини сақлаб қолган ҳолда, маҳалла ва оилани қўллаб-қувватлаш вазири ўринбосари вазифаларини ҳам бажаради.

Олий Мажлис Қонунчилик палатасининг 18 февраль куни ўтказилган мажлисида Ўзбекистон президентининг «Жамиятда ижтимоий-маънавий муҳитни соғломлаштириш, маҳалла институтини янада қўллаб-қувватлаш ҳамда оила ва хотин-қизлар билан ишлаш тизимини янги даражага олиб чиқиш чора-тадбирлари тўғрисида"ги фармонини тасдиқлаш ҳақидаги масала кўриб чиқилганди.

Давлат раҳбарининг мазкур фармони билан Ўзбекистон Маҳалла ва оилани қўллаб-қувватлаш вазирлиги ташкил этилиши маъқулланган. Шунингдек, янги тузилма раҳбари лавозимига Раҳмат Маматов номзоди маъқулланган.

Ўзбекистон президенти Анқарага келди

Ўзбекистон Республикаси Президенти Шавкат Мирзиёев Туркия Республикаси Президенти Ражаб Тоййиб Эрдўғоннинг таклифига биноан 19 февраль куни ташриф билан Туркияга келди.

Ўзбекистон раҳбари расмий сайтининг хабар қилишича, "Эсонбуға" халқаро аэропортида Шавкат Мирзиёевни Туркия ҳукумати аъзолари, Анқара музофоти ва шаҳри раҳбарияти, бошқа расмий шахслар кутиб олди.

19 февралда икки давлат раҳбарлари раислигида Олий даражадаги стратегик ҳамкорлик кенгашининг биринчи йиғилиши бўлиб ўтади. Музокараларда кўп қиррали Ўзбекистон-Туркия муносабатлари, аввало сиёсий, савдо-иқтисодий, инвестициявий, молиявий,транспорт-коммуникация, таълим, маданий-гуманитар ва бошқа соҳалардаги ҳамкорликни кенгайтириш масалалари муҳокама қилинади.

“Маҳалла посбони” жамоатчилик тузилмаси тугатилди

Наманган вилоятида эксперимент тарзида қурилган “посбон кулбаси”. 2012 йил.

Ўзбекистон президенти 18 февралда имзолаган фармонга биноан, Фуқароларнинг ўзини ўзи бошқариш органларига юклатилган 46 турдаги ҳамда профилактика инспекторларига юклатилган 13 турдаги вазифа ва функциялар қисқартирилди. Қисқартирилган вазифалар орасида "Маҳалла посбони" тузилмаси ҳам бор.

Адлия вазирлигининг хабар қилишича, Фуқароларнинг ўзини ўзи бошқариш органлари тузилмасида фуқаролар йиғини раисининг ўринбосарлари саналган ижтимоий ва маънавий-маърифий масалалар бўйича маслаҳатчи, тадбиркорлик, томорқа ер эгалари фаолиятига кўмаклашиш ва ободонлаштириш ишлари бўйича маслаҳатчи, ёшлар масалалари бўйича маслаҳатчи, кексалар ва фахрийлар ишлари бўйича маслаҳатчи лавозимлари тугатилди.

Қуйидаги янги лавозимлар киритилди:

фуқаролар йиғини раисининг ҳуқуқ-тартибот масалалари бўйича ўринбосари;

фуқаролар йиғини раисининг оила, хотин-қизлар ва ижтимоий-маънавий масалалар бўйича ўринбосари;

фуқаролар йиғини раисининг ободонлаштириш, томорқа ва тадбиркорлик масалалари бўйича ўринбосари;

оила ва хотин-қизлар масалалари бўйича мутахассис;

фуқаролар йиғини раисининг ёшлар масалалари бўйича маслаҳатчиси;

фуқаролар йиғини раисининг кексалар ва фахрийлар ишлари бўйича маслаҳатчиси.

Шунингдек, қуйидаги жамоатчилик тузилмалари тугатилди:

яраштириш комиссияси;

маърифат ва маънавият масалалари бўйича комиссия;

ижтимоий қўллаб-қувватлаш бўйича комиссия;

вояга етмаганлар, ёшлар ва спорт масалалари бўйича комиссия;

тадбиркорлик фаолияти ва оилавий бизнесни ривожлантириш масалалари бўйича комиссия;

жамоатчилик назорати ва истеъмолчиларнинг ҳуқуқларини ҳимоя қилиш бўйича комиссия;

“Маҳалла посбони” жамоатчилик тузилмаси.

Бундан ташқари қуйидаги комиссиялар ташкил қилинди:

оилавий қадриятларни мустаҳкамлаш комиссияси;

ижтимоий қўллаб-қувватлаш ва жамоатчилик назорати бўйича комиссия.

Маҳалла ва оилани қўллаб-қувватлаш вазирлиги ташкил этилди

Ўзбекистон президенти 18 февралда “Жамиятда ижтимоий-маънавий муҳитни соғломлаштириш, маҳалла институтини янада қўллаб-қувватлаш ҳамда оила ва хотин-қизлар билан ишлаш тизимини янги даражага олиб чиқиш чора-тадбирлари тўғрисида”ги фармонни имзолади.

Бу ҳақда хабар қилган Адлия вазирлигига кўра, фармонга мувофиқ, ҳар бир маҳаллада “Обод ва хавфсиз маҳалла” тамойилига асосланган янги тизим жорий этилади.

Фармон билан Ўзбекистон Республикаси Маҳалла ва оилани қўллаб-қувватлаш вазирлиги ҳамда унинг Қорақалпоғистон Республикаси, вилоятлар, Тошкент шаҳар ва туман (шаҳар) бўлинмалари ташкил этилди.

Жамиятда “Обод ва хавфсиз маҳалла” тамойилининг тўлақонли ва самарали жорий этилишида ҳар томонлама кўмаклашиш, оилалар ва маҳаллалардаги ижтимоий-маънавий муҳитни соғломлаштиришда фуқароларнинг ўзини ўзи бошқариш органлари билан яқин ҳамкорлигини ўрнатиш вазирликнинг асосий вазифа ва фаолият йўналишларидан бири ҳисобланади.

Фармонга кўра, Вазирлар Маҳкамаси ҳузуридаги “Оила” илмий-амалий тадқиқот маркази ҳамда “Маҳалла” ўқув-услубий ва илмий-тадқиқот маркази негизида “Маҳалла ва оила” илмий-тадқиқот институти ташкил этилади ва вазирлик тузилмасига ўтказилади.

Адлия вазирлиги, шунингдек, Ўзбекистон Хотин-қизлар қўмитаси ва Фуқароларнинг ўзини ўзи бошқариш органлари фаолиятини мувофиқлаштириш бўйича республика кенгаши раҳбар органларининг ушбу ташкилотларни тугатиш ҳақидаги қарорлари қабул қилинганини;

Ўзбекистон фахрийларининг ижтимоий фаолиятини қўллаб-қувватлаш жамоат бирлашмаси шаклидаги “Нуроний” жамғармасининг Қорақалпоғистон Республикаси, вилоятлар ва Тошкент шаҳар, туман (шаҳар) бўлимларини тугатиш ҳақидаги қарорлари қабул қилинганини хабар қилди.

Ўзбек чегарачилари 13 нафар қирғизистонликни тутиб кетди

Қирғизистонлик чегарачи (иллюстратив сурат).

Қирғизистоннинг Боткен вилояти Қадамжой туманида ўзбек чегарачилари 13 нафар қирғизистонликни қўлга олган. Қирғизистон Давлат чегара хизмати ходимлари мулоҳазасича, улар айириш белгилари бўлмагани учун чегарани билмасдан кесиб ўтганлар.

Қирғизистонликлар ўзбек чегарачилари томонидан тутиб кетилгани ҳақида Озодликнинг қирғиз хизматига маҳаллий турғунлар маълум қилган. Уларга кўра, ҳодиса 19 февраль куни эрталаб Ўзбекистон билан чегарадош бўлган Чекелик қишлоғида содир бўлган.

Давлат чегара хизматининг ҳудудий бошқармаси вакилларига кўра, қўлга олинган қирғизистонликлар Қадамжой туманига Талас вилоятидан диний даъват учун келганлар. Улар хабари бўлмагани сабабли чегарани бузган бўлишлари мумкин.

Айни пайтда Давлат чегара хизмати қўлга олинганларнинг шахсини аниқлаяпти ва уларни қайтариш бўйича Ўзбекистон томони билан музокара олиб бораяпти.

Ўзбекистонга турист ташийдиган чартер рейслар учун 15 минг долларгача компенсация ваъда қилинди

Туризмни ривожлантириш давлат қўмитаси раиси Азиз Абдуҳакимов.

Сайёҳлар оқими паст бўлган мавсумда Ўзбекистонга хорижлик меҳмон олиб келадиган ҳар бир чартер рейси учун 15 минг долларгача компенсация тақдим этилади. Бу ҳақда Бош вазир ўринбосари, Туризмни ривожлантириш давлат қўмитаси раиси Азиз Абдуҳакимов 19 февраль куни Тошкент шаҳрида иш бошлаган UAALF-2020 халқаро авиация форумида билдирган.

“Ўзбекистон бугунги кунда чартер рейсларга энг катта субсидия тақдим этмоқда. Айтайлик, юқори туристик мавсумда 300 киши ташиладиган бўлса, давлат томонидан ҳар бир рейсга 6 минг АҚШ доллари миқдорида компенсация тақдим этилади. Бошқача қилиб айтганда, ҳар бир авиайўловчи учун 20 доллардан. 15 ноябрдан 15 февралга қадар давом этувчи, оқим паст бўладиган мавсумда 300 ўринга мўлжалланган самолёт Ўзбекистонга хорижий меҳмонларни олиб келса, бу миқдор 15 минг долларгача ошади. Ўйлайманки, бу кўплаб авиаташувчиларда катта қизиқиш уйғотадиган субсидия миқдоридир”, дея иқтибос келтиради А. Абдуҳакимов сўзларидан Кун.уз нашри.

Бош вазир ўринбосари ўз сўзида расмийлар 2025 йилга бориб Ўзбекистонга ҳар йили 12 миллиондан зиёд турист ташриф буюришини кутаётганларини қўшимча қилган.

Ўзбекистон Туризмни ривожлантириш давлат қўмитаси, Транспорт вазирлиги, “Ўзбекистон ҳаво йўллари” МАК, Uzbekistan Airports АЖ ҳамда БААнинг Fair Exhibition Organizers компанияси томонидан ташкиллаштирилган UAALF-2020 анжуманига дунёдаги 130 га яқин халқаро ташкилот жалб қилингани айтилмоқда.

Uzbekistan Airways тўртта учоғини сотувга қўйди

Иллюстратив сурат.

Uzbekistan Airways авиаширкати Boeing русумидаги тўртта учоғини сотувга қўйди.

Авиаширкат сайтида берилган эълонда 2 та Boeing 757-200 ва 2 та Boeing 767-3 самолёти сотилиши айтилган.

Uzbekistan Airways Boeing 757 учоқларини тақрибан 12 млн доллардан, Boeing 767 учоқларини эса тақрибан 22 млн доллардан сотмоқчи.

Ширкат бу чора учоқ паркини янгилаш лойиҳаси доирасида амалга оширилаётганини билдирган.

Мирзиёев Анқарага жўнаб кетди

Ўзбекистон президенти Шавкат Мирзиёев.

Ўзбекистон президенти Шавкат Мирзиёев туркиялик ҳамкасби Ражаб Тоййиб Эрдўғон таклифига биноан 19 февраль куни Туркия пойтахтига жўнаб кетган. Бу ҳақда президент матбуот хизмати маълумот тарқатди.

Анқарада Эрдўғон ва Мирзиёев икки томонлама Стратегик ҳамкорлик кенгашининг биринчи йиғилиши тадбирларини ўтказиши кутилмоқда.

Президент Мирзиёев Туркияда етакчи тадбиркорлар учрашиши, Халқ кутубхонасининг тантанали очилиш маросимида қатнашиши режаланган.

Ўзбекистон президентининг Туркияга сафари Анқара билан Москва ўртасидаги муносабатлар Суриядаги вазият туфайли таранглашган бир пайтга тўғри келди.

Туркманистон сунъий йўлдоши Ўзбекистон телеканаллари трансляциясини тўхтатди

Иллюстратив сурат.

Туркманистонга қарашли TurkmenÄlem 52E / MonacoSat сунъий йўлдоши 10 февралдан Ўзбекистоннинг ўнга яқин телеканали трансляциясини бас қилди. Бу ҳақда Turkmen.News нашри хабар қилади.

Трансляцияси тўхтатилган телеканаллар орасида “Ўзбекистон”, “Ўзбекистон 24”, “Ёшлар”, “Кинотеатр”, “Тошкент”, “Болажон”, “Спорт” ва бошқалар бор.

Айрим тахминларга кўра, бу Ўзбекистондаги Sevimli TV хусусий телеканалининг 21 январь куни“Соядаги олтовлон” фильмини намойиш қилгани билан боғлиқ бўлиши мумкин.

Мазкур фильм хаёлий мамлакат бўлган Тургистан, унинг қонхўр диктатори Ровач Алимовни йўқ қилишга мақсадида ўтказилган махсус амалиёт ҳақида ҳикоя қилади.

Фильмдаги тўқима реаллик билан туркман воқелиги ўртасидаги ўхшашлик ортидан фильм Туркманистонда тақиқланган.

Sevimli TV Туркманистон сунъий йўлдоши орқали трансляция қилинмаса-да, телетомошабинлар тахминича, туркман расмийлари эҳтиёт шарт Ўзбекистоннинг барча телеканалини ўчириб қўйишга қарор қилганлар. Бу борада расмий Ашхобод томонидан бирор-бир изоҳ берилган эмас. Сунъий йўлдош орқали трансляция қилинадиган бошқа телеканаллар, шу жумладан, Тожикистон каналлари аввалгидек ишлаяпти.

Тошкент-Андижон поезди техник сабаб туфайли йўлда қарийб 1,5 соат тўхтаб қолди

Иллюстратив сурат.

Тошкентдан Андижонга кетаётган йўловчи поезди 18 февраль куни соат 18:34 да техник сабаб билан тўхтаб қолган.

Ҳодиса Ақча-Облиқ перегонида содир бўлганини маълум қилган “Ўзтемирйўлйўловчи” АЖга кўра, “кўрилган чора-тадбирлар натижасида соат 19:55 дан бошлаб мазкур поезд ўз йўналиши бўйлаб ҳаракатини давом эттирган”.

Ширкат маъмурияти келтирилган ноқулайлик учун барча йўловчилардан узр сўраган.

34 000 000 киши. Ўзбекистон аҳолиси шунча бўлди

Ўзбекистоннинг доимий аҳолиси январдан буён деярли 100 минг кишига кўпайиб, 18 февраль ҳолатига кўра 34 миллионни ташкил этди.

Бу ҳақда хабар қилган Давлат статистика қўмитасига кўра, 34 миллион кишилик аҳолининг 16,9 миллиони аёллардир.

Йил бошидан бери мамлакатда 127,3 минг киши туғилган, 29,1 минг киши вафот этган.

Ушбу даврда мамлакатга 23,6 минг киши келган, 24,7 минг киши чиқиб кетган.

Давомини ўқинг

Кўрмай қолган бўлсангиз

XS
SM
MD
LG