Ухан шаҳри ва Хитойнинг бошқа ҳудудларидан олиб келинадиган ўзбекистонликлар икки ҳафта давомида карантин остида сақланади. Бу ҳақда коронавируснинг кириб келиши ва тарқалишини олдини олиш юзасидан чора-тадбирлар дастурини тайёрлаш бўйича Республика махсус комиссиясининг 3 февраль куни ўтказилган мажлисида билдирилган, дея хабар қилади ЎзА.
Қайд этилишича, мажлисда Хитойдан қайтариладиган ўзбекистонликларнинг икки ҳафта мобайнида оила-аъзолари билан учрашиши таъқиқланиши, яқинлари билан фақат махсус телефон алоқаси орқали мулоқот қилиши мумкин бўлиши урғуланган.
Ўзбекистонга коронавируснинг янги тури кириб келиши ва тарқалишининг олдини олиш юзасидан чора-тадбирлар дастурини тайёрлаш бўйича республика махсус комиссияси мамлакат президентининг 29 январдаги фармойиши билан ташкил этилган.
Хитойдаги ўзбекистонликларни мамлакатга қайтариш учун чартер рейслар ташкил қилинган. Бу қатновлар 4-5 февраль кунлари амалга оширилиши айтилмоқда.
Сўнгги маълумотларга кўра, Хитойда тожли вирусга чалинганлар сони 20 минг нафардан ошган, қурбонлар сони эса 425 нафарга етган.
