Линклар

Шошилинч хабар
17 апрел 2021, Тошкент вақти: 09:55

Ўзбекистон хабарлари

Cирдарёга Қирғизистондан яна инсонпарварлик ёрдами етиб борди

Сирдарёга гуманитар юк етказиб берган Қирғизистон фуралари (Сирдарё вилояти ҳокимлиги ахборот хизмати фотосурати),

Қирғизистон Сардоба тошқинида жабр кўрган сирдарёликлар учун яна гуманитар ёрдам йўллади.

Сирдарё вилояти ҳокимлиги ахборот хизмати маълумотига кўра, мазкур ёрдамни вилоятга Қирғизистоннинг Ўзбекистондаги элчиси маслахатчиси Нурлан Джумалиев бошчилигидаги делегация олиб келган.

Қайд этилишича, қирғиз халқи томонидан йўлланган ёрдам юки 20 тонна макарон, 20 тонна гуруч, 10 тонна ўсимлик ёғи, 10 тонна шакар, 5 тонна сув ва 10 тонна картошкадан иборат.

Сардоба сув омбори тўғонининг ўпирилиши ортидан жабрланган ўзбекистонликларга Қирғизистон 11 май куни ҳам инсонпарварлик ёрдами жўнатганди. Ўшанда қўшнилар сирдарёликларга 1 000 тонна цемент, 100 тонна гуруч ва 10 тонна ўсимлик ёғи йўллаган.

1 май куни Сардоба сув омбори тўғонининг ўпирилиши ортидан юзага келган табиий офат натижасида минглаб уй сув остида қолган, 90 минг нафар аҳоли эвакуация қилинган эди.

Кун янгиликлари

Президент Мирзиёев Сардоба фожиасидан "юзи ёруғ бўлгани"ни айтди

Президент Мирзиёев сардобаликлар учун қурилган хонадонда

16 апрель куни Самарқанд вилояти фаоллари иштирокидаги йиғилишда президент Шавкат Мирзиёев Сардоба фожиасини эслаб, ўша пайтда қийналгани, кейинчалик эса "юзи ёруғ бўлгани"ни таъкидлади.

“Ёдингизда бўлса, Сардобадаги сув тошқинида айтгандим: “Ҳали шундай пайтлар бўлади, одамлар орасида “Нега бизнинг кўчамизга шу сув келмади?” дейдиганлар бўлади, дегандим.


Мана, ҳамма шароитларини яратиб, кўчириб чиқардик аҳолини. Лекин мен ўша пайтдаги ҳолатни кўриб жуда қийналгандим. Бу синов қайдан келди, деб ўйлангандим. Худога шукр, халқимизнинг олдида юзимиз ёруғ бўлди”, деди президент.


Айнан Сардоба воқеаларини эслай туриб, Мирзиёев фаоллар йиғинида Самарқанд вилояти Паст Дарғом тумани ҳокими Худойбердиевдан ҳисобот талаб қилди. Туман ҳокими эса шу йилнинг сентябрига қадар Ёшлар, Аёллар ва Темир дафтарда фақат ногиронларнигина қолдиришга ваъда берди.


1 май куни Сардоба сув омбори тўғонининг бузилиши оқибатида Сардоба, Оқолтин ва Мирзаобод туманларида, расмий маълумотларга кўра, 2 570 та уй-ҳовли, 76 та кўп қаватли уй яроқсиз ҳолга келган, 1781 ҳовли, 52 та кўп қаватли турар жой қисман зарарланган.

Уйлари бузилганлар орасида ҳануз бошпанасиз яшаётганлари бор ва улар давлат идораларига мунтазам шикоят қилиб келмоқда.

Ўтган йил охирида Сардоба тошқинида уйлари вайрон бўлган бир гуруҳ фуқаролар ҳукумат ваъда қилган 40 миллион сўмлик ёрдам пули ва уй-жой ўзларига берилмаганидан арз қилиб, Вазирлар Маҳкамасига боришганди.

Жабрланганларни бошпана билан таъминлашда коррупция ҳолатларидан шикоят қилган бир неча сардобалик ички ишлар ходимлари томонидан сўроқ қилингани ва маъмурий жазога тортилгани хабар қилинган.

Давлат тили тўғрисидаги қонунчиликни бузганлик учун жавобгарлик кучайтирилмоқда

Ўзбекистон Республикаси Олий Мажлисининг Қонунчилик палатаси Ўзбекистон Республикасининг “Давлат тили тўғрисида”ги қонунини қайта кўриб чиқмоқда ва эндиликда мазкур қонун ҳужжатларини бузганлик учун жавобгарлик кучайтирилади.

Бу ҳақда парламент депутати Расул Кушербаев ўзининг Телеграм-каналида маълум қилди.

Қонундаги жавобгарликни кучайтириш масаласи парламент фракцияларида кўриб чиқилмоқда. Муҳокама жараёнларида мақсад давлат тилининг мавқеи, фуқароларнинг ижтимоий-сиёсий ҳаётидаги ролини кучайтиришга қаратилгани айтилади.

Таклиф қилинаётган ўзгартиришларга кўра, давлат тили, шу билан бирга, Ўзбекистон Республикасида яшовчи бошқа миллатлар ва элатларнинг тилларини менсимаслик, базавий ҳисоблаш миқдорининг уч бараваридан беш бараваригача миқдорда жарима солишга сабаб бўлиши мумкин.

Депутатга кўра, шундай ҳуқуқбузарликлар маъмурий жазо чораси қўлланилганидан сўнг бир йил давомида такрорланса, БҲМнинг беш бараваридан етти бараваригача миқдорда жарима солишга сабаб бўлади. Ҳолбуки, шу пайтга қадар бундай ҳуқуқбузарлик учун БҲМнинг бир бараваридан икки бараваригача миқдорда жарима белгиланган.

Тошкент шаҳар маъмурий судининг истеъфодаги судьяси Озодлик билан суҳбатда мазкур қонун ҳужжатларининг бузилишига нисбатан чора кўриш амалиётда деярли учрамаслиги, бу тартибдаги маъмурий ишларнинг судгача келмаганини эътироф этди.

1989 йили ўзбек тилига давлат тили мақоми берилганига қарамай¸ тилнинг¸ айниқса¸ давлат бошқаруви тизимида тўлиғича муомалага киритилмай қолаëтгани¸ ўзбек тилининг ривожланишидаги қатор муаммоларнинг эътиборсиз қолаëтгани мутахассис ва кенг жамоатчилик танқидига учраб келмоқда.

2019 йил 22 октябрь куни президент Шавкат Мирзиëев “Ўзбек тилининг давлат тили сифатидаги нуфузи ва мавқеини тубдан ошириш чора-тадбирлари тўғрисида” фармон чиқариб¸ унда хусусан¸ Вазирлар Маҳкамаси ҳузурида 9 мутахассисдан иборат Давлат тилини ривожлантириш департаменти ташкил этишни топширган эди.

Ўзбекистон Халқ артисти Мирза Азизов коронавирусдан вафот этди

Мирза Азизов Чингиз Айтматов асарларини саҳналаштиришдаги хизматлари учун Қирғизистоннинг Чингиз Айтматов академияси махсус мукофоти билан тақдирланган эди. Бишкек, 2019 йил, февраль.

16 апрель куни Ўзбекистон халқ артисти, Муқимий номидаги Ўзбекистон давлат мусиқали театри директори Мирза Азизов 58 ёшида вафот этди.

Бу ҳақда Ўзбекистон Маданият вазирлиги хабар берди.

Актёрнинг яқинларидан олинган маълумотга кўра, Азизов коронавирус инфекциясидан вафот этган. Ҳукуматнинг 1-стационар клиник шифохонасида бир ойдан бери даволанишда бўлган актёрнинг вафотига ундаги юрак-ишемик хасталиклари ҳам сабаб бўлгани айтилмоқда.

Актёрнинг жанозаси 16 апрель аср намозида ўзи истиқомат қилган Тошкент шаҳрининг Халқлар дўстлиги даҳасида ўқилади. Марҳум асрдан сўнг Чиғатой қабристонида тупроққа берилади.

Ўтган йили коронавирус хасталигидан Миллий театр директори, таниқли актёр Фатхулла Маъсудов ҳам оламдан ўтган эди.

Мирза Азизов 1963 йил 22 майда Наманган вилоятининг Чуст туманида туғилган. 1987 йилда ҳозирги Ўзбекистон давлат санъат ва маданият институтини тугатган. Мирза Азизовнинг театр ва кино соҳасида меҳнатлари 2015 йилда эса Ўзбекистон халқ артисти унвони билан тақдирланган.

Актёр саҳнада “Юсуф ва Зулайҳо”да Фиръавн, “Фарҳод ва Ширин” да Баҳром, “Нодирабегим” мусиқали драмасида Мадалихон, “Алпомишнинг қайтиши” спектаклларида Алмомиш сингари қатор образларни жонлантирган.

Муқимий номидаги ўзбек давлат драма театри раҳбари бўлган Мирза Азизов 2019 йилнинг 12 февралида Бишкекда Чингиз Айтматов асарлари асосида спектакллар саҳналаштиришда жонбозлик кўрсатгани учун Чингиз Айтматов жамоатчилик академияси махсус мукофоти билан тақдирланган эди.

Олмалиқда савдогар аёлларни судраб-хўрлаган солиқчилар ишдан олинди

Солиқчилар сотувчи аёлни боласи кўз ўнгида ерда судраб, буюмларини тортиб олди
Илтимос кутинг

Айни дамда медиа-манба мавжуд эмас

0:00 0:04:11 0:00

Олмалиқда савдогар аёлларга нисбатан куч ишлатиб, уларни судраб, молларини тортиб олган уч нафар солиқчи ҳамда шаҳар давлат солиқ инспекциясининг яна 8 нафар ходими ишдан олиниб, уларнинг махсус унвонлари бекор қилинган. Бу ҳақда Давлат солиқ инспекцияси матбуот хизмати маълумот тарқатди.

Қайд этилишича, ҳодиса ортидан Тошкент вилояти ДСБ бошлиғи ўринбосари ҳамда Олмалиқ шаҳар давлат солиқ инспекцияси бошлиғига ҳам ҳайфсан берилди.

Хабарномада “Солиқчи-кўмакчи” тамойили асосида шу пайтга қадар ноқонуний фаолият юритган аёлларга тегишли ҳуқуқий ёрдам кўрсатилиб, фаолияти қонунийлаштирилгани урғуланган.

“Уларга Олмалиқ шаҳридаги савдо марказидан тегишли жой ажратиб берилди. Шунингдек, кредит олишда амалий ёрдам кўрсатилиб, улардан бирига тикув машинаси ҳадя этилди”, дейилган ДСҚ хабарномасида.

Олмалиқлик солиқчилар акс этган видео тарқаб, ижтимоий тармоқларда қизғин муҳокамаларга сабаб бўлгани ортидан Давлат солиқ қўмитаси раиси Шерзод Кудбиев воқеага муносабат билдириб, жуда уятли иш бўлганини эътироф этган, солиқчилар жазоланишини билдирган ҳамда халқдан узр сўраган эди.

Коронавирус юқтириб олганлар сони 86 минг нафардан ошди, яна бир бемор вафот этди

Ўзбекистонда коронавирус инфекцияси қайд этилганлар сони, 2021 йил 16 апрель ҳолатига кўра, 86 минг 22 нафарни ташкил этган.

Соғлиқни сақлаш вазирлиги қайдича, ўтган кеча-кундузда Андижон, Бухоро, Жиззах, Қашқадарё, Наманган, Самарқанд, Сирдарё, Сурхондарё, Фарғона, Хоразм, Тошкент вилоятлари ҳамда Тошкент шаҳрида жами 292 киши коронавирус юқтириб олган.

Айни пайтда пайшанба куни Қорақалпоғистон Республикаси, Бухоро, Наманган, Сирдарё, Тошкент вилоятлари ва Тошкент шаҳрида 187 нафар бемор соғайиб, тузалганларнинг жами 83 минг 649 нафарга етган.

Касалхоналарда муолажаси давом этаётган беморлар 1738 нафарни ташкил этмоқда.

ССВ коронавирусга чалинган беморлардан бир нафари вафот этгани, шу тариқа хасталикдан вафот этганларнинг умумий сони 635 нафарга етганини расман билдирган.

Тошкентдаги полиэтилен маҳсулотлари ишлаб чиқарувчи цехда катта ёнғин содир бўлди

Тошкентнинг Сергели туманидаги Саъдий кўчасида жойлашган полиэтилен маҳсулотлари ишлаб чиқарадиган цехда 16 апрелга ўтар кечаси йирик ёнғин содир бўлган.

Бу ҳақда маълумот тарқатган Фавқулодда вазиятлар вазирлиги матбуот хизмати ёнғинга оид хабар вазирлик навбатчи қисмига 15 апрель соат 23:08 да келиб тушганини билдирган.

Бунинг ортидан ҳодиса юз берган жойга 12 та ёнғин-қутқарув экипажи етиб борган. Дастлабки маълумотларга кўра, аланга тақрибан 1000 квадрат метр майдонни қамраб олган. Қутқарувчилар 16 апрель куни соат 00:10 ларда ёнғинни жиловлашга, соат 02:05 да эса ўчиришга муваффақ бўлганлар.

ФВВ ёнғин натижасида қурбон бўлган ва жароҳатлар олган йўқлигини маълум қилган. Ёнғин сабаблари ҳамда ундан етган зарар миқдори мутахассислар томонидан аниқланмоқда.

Биринчи чоракда Ўзбекистондан хорижга йўлланган пул ўтказмалари миқдори 30 фоизга ошди

Жорий йилнинг январь-март ойларида Ўзбекистондан чет давлатларга юборилган халқаро пул ўтказмалари миқдори 353 миллион АҚШ долларига етди. Бу ўтган йилнинг шу даврига нисбатан 107 миллион долларга ёки 30,3 фоизга кўпдир.

Айни пайтда, Марказий банк матбуот хизмати маълумотига кўра, 2021 йил илк чорагида Ўзбекистонга келиб тушган трансчегаравий пул ўтказмалари ҳажми қарийб 1 миллиард 420 миллион долларни ташкил қилган. Бу 2020 йилнинг шу даврига нисбатан 336 миллион долларга ёки қарийб 24 фоизга кўп.

МБ қайдича, шу тариқа биринчи чоракда трансчегаравий пул ўтказмалари бўйича ижобий сальдо қарийб 1 миллиард 60 миллион долларга етган.

Допинг-тест натижалари ёмон чиққан 7 нафар спортчи тўрт йилга мусобақалардан четлатилди

Ўзбекистон Миллий антидопинг агентлиги ҳузуридаги аҳлоқ комиссияси оғир атлетика бўйича миллий терма жамоа аъзолари Мансур Алмуродов (73 кг), Шахмердан Кемалов (+109 кг), Ҳаётбек Зокиров (96 кг), Маҳмудбек Юсупов (+109 кг), Ҳикматулло Фазлиддинов (81 кг), Фозилбек Жуманазаров (96 кг) ва Худоёр Мелиқўзиевларни (67 кг) 4 йилга дисквалификация қилиш ҳақида қарор қабул қилди.

Антидопинг агентлиги матбуот хизмати маълумотига кўра, мазкур спортчиларнинг барчаси ўтган йилнинг 15 октябр куни Оғир атлетика бўйича Ўзбекистон Чемпионати давомида допинг-тест топшириш учун танланган бўлиб, уларнинг допинг-синамаларида S.1 – Анаболик стероид гормонлар гуруҳига мансуб метандиенон, метастерон, тестостерон, канренон каби тақиқланган моддалар аниқланган.

Қайд этилишича, спортчиларнинг дисквалификация муддати 2021 йил 31 мартидан бошланиб, 2025 йил 30 мартига қадар давом этади.

Агентлик мусобақалардан четлатилган спортчиларнинг 2020 йил 15 октябридан бошлаб олган барча медаль ва бошқа совринлари ҳамда рейтинг очколари бекор қилинишини билдирган.

Энг коррупциялашган учта вазирлик ҳақида маълумот берилди

Иллюстратив сурат.

Ўтган йилда Соғлиқни сақлаш вазирлиги, Халқ таълими вазирлиги ҳамда Қурилиш вазирлиги энг коррупциялашган ташкилот сифатида тан олинди. Бу ҳақда Коррупцияга қарши курашиш агентлиги расмий вакили Бекзод Раҳмонов 15 апрель куни ўтган матбуот анжуманида маълум қилди.

Унинг айтишича, Халқ таълими вазирлиги тизимида жами 78 миллиард сўм маблағ ноқонуний ўзлаштирилган. 214 нафар амалдорга интизомий жазо чоралари қўлланилган, 34 мансабдор лавозимидан озод этилган.

Соғлиқни сақлаш тизимида 16 миллиард сўмлик молиявий қонунбузарликлар аниқланган. Бу вазирлик тизимида бюджетдан ажратилган 22 миллиард сўмнинг мақсадсиз сарфланишининг олди олинди.

Расмий Қурилиш вазирлиги бўйича маълумотларни ошкор қилмади.

2021 йилнинг 24 март куни президент Шавкат Мирзиёев раислигида ўтган видеоселектор йиғилишида ҳақда бош прокурор ўринбосари Акмалхўжа Мавлонов Ўзбекистонда 2020 йилда манзилли дастурларни амалга ошириш учун ажратилган 10 триллион сўмнинг 845 миллиард сўми талон-торож қилингани ҳақида гапирган эди.

Тошкент метросидаги соат таблосига хакерлар ҳужум қилгани айтилди

Тошкентдаги метро бекатларидан бирига кириш йўлаги.

Сергели йўналишининг “3-Бекат” станциясидаги соат таблосига 12 апрель куни соат 16:40да ҳакерлар томонидан киберҳужум содир этилгани аниқланди. Бу ҳақда “Ўзбекистон темир йўллари” 15 апрель куни расман маълум қилди.

Аввалроқ ижтимоий тармоқларда мазкур “киберҳужум тафсилотлари акс этган видео”лар тарқалган эди. Унда соат таблоси ўрнига ножўя сўзлар ёзилганини кўриш мумкин.

Расман билдирилишича, ҳолат юзасидан ички хизмат текшируви ўтказилган.

“Ушбу дарча электрон тизимли бўлиб, Wi-Fi орқали бошқарилади. Ҳужум қилганлар соатга ўрнатилган паролни бузиб, унга ножўя гапни ҳаракатланувчи сатрга жойлаштирган. Таъкидлаш жоизки, мазкур гап 4 дақиқа ичида олиб ташланган”,-дейилади билдирувда.

“Ўзбекистон темир йўллари” айни пайтда ҳуқуқни муҳофаза қилиш органлари томонидан айбдорлар қидирилаётгани ва уларга нисбатан тегишли чоралар кўрилиши ҳақмда ҳам маълум қилган.

Коронавирусга чалиниш бўйича кунлик антирекорд янгиланди

Янги касалланиш ҳолатларининг 129 нафари Тошкент шаҳрида аниқланди.

Соғлиқни сақлаш вазирлиги 14 апрель куни коронавирусга чалинганлар сони бўйича кунлик рекорд янгилангани тўғрисида маълум қилди. 2021 йил бошидан бери биринчи марта 14 апрель куни Ўзбекистонда 227 кишида коронавирус аниқланди.

Янги касалланиш ҳолатларининг 129 нафари Тошкент шаҳрида, 42 нафари Тошкент вилоятида, 25 нафари Самарқанд вилоятида топилган. Қолган 31 бемор Ўзбекистоннинг 10та вилоятида аниқланган.

Бу билан Ўзбекистонда коронавирус инфекцияси қайд этилганлар сони 85730 кишини ташкил этмоқда.

Касалликдан соғайганлар жами 83462 нафарга етди ва соғайиш кўрсаткичи 98 фоизни ташкил қилмоқда.

Айни пайтда тиббиёт муассасаларида даволанаётган 1634 нафар бемордан 229 нафари оғир, 104 нафари эса ўта оғир аҳволда.

Пандемия бошланган 2020 йилнинг мартидан то шу кунгача камида 633 бемор вафот этган.

Коронавирусдан эмланганлар 300 мингдан ошди

Мамлакатда коронавирусга қарши эмлаш 1 апрель куни бошланган эди.

Соғлиқни сақлаш вазирлигининг билдиришича, 14 апрель куни Ўзбекистонда яна 43 896 нафар киши COVID-19 га қарши эмланди. Бу билан жами эмланганлар сони жами 300 854 нафарга етди.

Жами эмланганлар сони бўйича Фарғона вилояти биринчи ўринни эгаллаб турибди. Бу ерда 47 946 киши эмланган. Иккинчи ва учинчи ўринларда Андижон (37 344 нафар) ва Наманган (33 446 нафар) вилоятлари бормоқда.

Вазирлик эмланганлар орасидаги ножўя таъсир ҳақида маълумот бермаган. Мамлакатда коронавирусга қарши эмлаш 1 апрель куни бошланган эди.

Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков 7 апрель куни АОКАда ўтказилган брифингда коронавирусга қарши 6 апрелга қадар эмланган 49 200 кишидан 71 нафарида ножўя таъсир сезилгани ҳақида маълум қилганди.

Ўн беш йиллик танаффусдан сўнг IREX Ўзбекистонда ўз фаолиятини давом эттирадиган бўлди

Ўзбекистон Адлия вазирлиги масъуллари томонидан IREX вакилларига тақдим этилган гувоҳнома (Адлия вазирлиги фотоси)

Адлия вазирлиги шу йилнинг 12 апрель куни қароргоҳи АҚШда бўлган Халқаро тадқиқотлар ва алмашувлар кенгашининг (IREX) Ўзбекистондаги филиалини давлат рўйхатидан ўтказган. Бу ҳақда вазирлик матбуот хизмати маълумот тарқатди.

Хабарномада филиалнинг асосий мақсад ва вазифалари ўлароқ Ўзбекистонда фаровон ва тенг ҳуқуқли жамият қурилишига ҳисса қўшиш, Ўзбекистон ёшларининг имкониятларини кенгайтириш ва бўлажак раҳбарларни тарбиялашга, сифатли таълим ва ахборот олиш имкониятларини кенгайтиришга кўмаклашиш ҳамда Ўзбекистон Республикасига инглиз тили соҳибларини жалб қилган ҳолда ўқитувчилар малакасини оширишга ҳамда талабаларни инглиз тилини интенсив равишда ўрганишини таъминлашга кўмаклашиш кабилар кўрсатилган.

Филиал ўз мақсад ва вазифаларини Ўзбекистон Халқ таълими, Инновацион ривожланиш, Олий ва ўрта махсус таълим вазирликлари ҳамда Ёшлар ишлари агентлиги билан ўзаро ҳамкорликда амалга ошириши айтилган.

Ташкил этилганига ярим асрдан ошган IREX ваколатхонаси дунёдаги юздан зиёд мамлакат қаторида 1994 йили Ўзбекистонда ҳам очилиб, 10 йилдан зиёд фаолият юритган. Андижон воқеалари ортидан ўзбек расмийлари 2005 йил кузида бошқа халқаро ташкилотлар қаторида IREX ваколатхонасининг ҳам фаолиятини олти ойга тўхтатиб қўйган. Ўшанда Адлия вазирлиги бунга ташкилотнинг ўтган бир йил мобайнида АҚШда таълим олганлар тўғрисида тўлиқ маълумот беришни рад этганини сабаб сифатида келтирганди. Мазкур муддат ўтганидан кейин (2006 йили) халқаро ташкилотнинг Ўзбекистондаги ваколатхонаси суд қарори билан ёпилган эди.

Ўзбек расмийлари электрон ҳукуматни ривожлантириш бўйича эстонияликлар билан ҳамкорлик қилмоқда

Иллюстратив сурат

Ахборот технологиялари ва коммуникацияларини ривожлантириш вазирининг биринчи ўринбосари О. Пекос 14 апрель куни Эстония Электрон бошқарув академиясининг ижрочи директори Х. Асток билан учрашиб, у билан икки мамлакат ўртасида электрон ҳукумат ва рақамли ривожланиш йўналишларида ўзаро ҳамкорликни йўлга қўйиш, жумладан давлат хизматларини электрон шаклга ўтказиш, аҳоли ва тадбиркорлик субектларига хизматларни кўрсатишда электрон алмашинув механизмларини такомиллаштириш масалаларини муҳокама қилган.

Бу ҳақда маълумот тарқатган Ахборот технологиялари ва коммуникацияларини ривожлантириш вазирлиги матбуот хизмати Эстониянинг бугунги кунда электрон ҳукуматни жорий этиш ва ривожлантириш бўйича Европа ҳамда дунёда етакчилардан бири бўлиб ҳисобланишини урғулаган.

“Болтиқбўйи давлатининг тажрибаси мамлакатимизда "Электрон ҳукумат" тизимини ривожлантириш учун жуда муҳимдир”, дейилган вазирлик хабарномасида.

Қайд этилишича, учрашув якунида томонлар ўзаро ҳамкорликнинг асосий масалалари ва йўналишларини акс эттирадиган меморандумни имзолаганлар.

Андижонда Польша университетининг филиали очилди

Андижон шаҳридаги истироҳат боғининг кириш қисми

Ўзбекистон ҳукуматининг жорий йил 14 апрелидаги қарори билан “Collegium Humanum” Варшава менежмент университети Андижон филиали ташкил этилди.

Адлия вазирлиги Телеграм-канали қайдича, нодавлат олий таълим ташкилоти ҳисобланган филиалда ўқитиш Варшава менежмент университети томонидан тасдиқланадиган ўқув режалари ва фан дастурларига мувофиқ кундузги таълим шаклида, инглиз, рус ва ўзбек тилларида тўлов-контракт асосида амалга оширилади.

Филиалда дастлабки босқичда “Молия ва бухгалтерия ҳисоби”, “Транспорт ва логистикада менежмент”, “Халқаро бизнес ва маркетинг”, “Туризм, меҳмонхона иши ва умумий овқатланишда менежмент ва маркетинг”, “Кичик ва ўрта бизнесни бошқариш” ҳамда “Ахборот-коммуникация технологиялари” мутахассисликлари бўйича (бакалавриат) талабалар қабул қилинади.

Филиалда ўқиш 2021/2022 ўқув йилидан бошланади. Битирувчиларга Ўзбекистонда олий таълим тўғрисидаги ҳужжат сифатида тан олинадиган диплом берилади.

Филиалда таълим бериш учун 70 фоизгача малакали профессор-ўқитувчи Польша Республикаси ва Европанинг бошқа давлатларидан жалб қилиниши айтилмоқда.

Хорижда пулсиз қолганлар элчихоналардан бир сутка учун 50 дан 150 долларгача қарз олиши мумкин

Ўзбекистон ҳукумати хорижий давлатда яшаш учун маблағсиз қолган фуқароларга вақтинча қарз бериб туришга қарор қилгани ҳақида Озодлик 13 апрель куни хабар қилган.

Блогер Хушнудбек Худойбердиев чоршанба куни ўз Телеграм-канали орқали турли давлат ва шаҳарларда пулсиз қолган ўзбекистонликларга элчихона ва консулликлар томонидан берилажак ёрдам суммасини ёйинлади:

  • Австрия - $100 (суткалик яшаш учун), $800 (транспорт учун)
  • Ақтау шаҳри (Қозоғистон) - $50 (суткалик яшаш учун), $100 (транспорт учун)
  • АҚШ - $100 (суткалик яшаш учун), $1000 (транспорт учун)
  • Афғонистон - $50 (суткалик яшаш учун), $250 (транспорт учун)
  • Афина шаҳри (Греция) - $100 (суткалик яшаш учун), $600 (транспорт учун)
  • Бирлашган Араб Амирликлари - $125 (суткалик яшаш учун), $300 (транспорт учун
  • Бангкок шаҳри (Таиланд) - $70 (суткалик яшаш учун), $600 (транспорт учун)
  • Беларусь - $65 (суткалик яшаш учун), $500 (транспорт учун)
  • Бельгия - $150 (суткалик яшаш учун), $1000 (транспорт учун)
  • Буюк Британия - $100 (суткалик яшаш учун), $800 (транспорт учун)
  • Владивосток шаҳри (Россия) - $50 (суткалик яшаш учун), $800 (транспорт учун)
  • Германия - $100 (суткалик яшаш учун), $600 (транспорт учун)
  • Гуанжоу шаҳри (ХХР) - $100 (суткалик яшаш учун), $700 (транспорт учун)
  • Дубай шаҳри (БАА) - $125 (суткалик яшаш учун), $300 (транспорт учун)
  • Екатеринбург шаҳри (РФ) - $50 (суткалик яшаш учун), $400 (транспорт учун)
  • Жидда шаҳри (Саудий Арабистони) - $100 (суткалик яшаш учун), $600 (транспорт учун)
  • Индонезия - $100 (суткалик яшаш учун), $1000 (транспорт учун)
  • Испания - $100 (суткалик яшаш учун), $600 (транспорт учун)
  • Исроил - $100 (суткалик яшаш учун), $600 (транспорт учун)
  • Истанбул шаҳри (Туркия) - $100 (суткалик яшаш учун), $400 (транспорт учун)
  • Италия - $100 (суткалик яшаш учун), $600 (транспорт учун)
  • Корея - $100 (суткалик яшаш учун), $500 (транспорт учун)
  • Қувайт - $100 (суткалик яшаш учун), $1000 (транспорт учун)
  • Қирғизистон - $50 (суткалик яшаш учун), $100 (транспорт учун)
  • Қозоғистон - $50 (суткалик яшаш учун), $100 (транспорт учун)
  • Қозон шаҳри (РФ) - $50 (суткалик яшаш учун), $400 (транспорт учун)
  • Латвия - $100 (суткалик яшаш учун), $600 (транспорт учун)
  • Малайзия - $70 (суткалик яшаш учун), $600 (транспорт учун)
  • Миср - $70 (суткалик яшаш учун), $800 (транспорт учун)
  • Мозори Шариф (Афғонистон) - $50 (суткалик яшаш учун), $100 (транспорт учун)
  • Новосибирск шаҳри (РФ) - $50 (суткалик яшаш учун), $400 (транспорт учун)
  • Нью-Йорк шаҳри (АҚШ) - $100 (суткалик яшаш учун), $1000 (транспорт учун)
  • Озарбайжон - $50 (суткалик яшаш учун), $400 (транспорт учун)
  • Олмаота шаҳри (Қозоғистон) - $50 (суткалик яшаш учун), $100 (транспорт учун)
  • Покистон - $70 (суткалик яшаш учун), $500 (транспорт учун)
  • Польша - $100 (суткалик яшаш учун), $800 (транспорт учун)
  • Россия - $50 (суткалик яшаш учун), $400 (транспорт учун)
  • Ростов-Дон шаҳри (РФ) - $50 (суткалик яшаш учун), $400 (транспорт учун)
  • Санкт-Петербург шаҳри (РФ) - $50 (суткалик яшаш учун), $400 (транспорт учун)
  • Саудия Арабистони - $100 (суткалик яшаш учун), $600 (транспорт учун)
  • Сингапур - $125 (суткалик яшаш учун), $800 (транспорт учун)
  • Тожикистон - $50 (суткалик яшаш учун), $100 (транспорт учун)
  • Туркия - $100 (суткалик яшаш учун), $400 (транспорт учун)
  • Туркманистон - $70 (суткалик яшаш учун), $200 (транспорт учун)
  • Украина - $100 (суткалик яшаш учун), $500 (транспорт учун)
  • Ўмон - $70 (суткалик яшаш учун), $600 (транспорт учун)
  • Франкфурт-Майн шаҳри (Германия) - $100 (суткалик яшаш учун), $600 (транспорт учун)
  • Франция - $100 (суткалик яшаш учун), $650 (транспорт учун)
  • Хитой - $100 (суткалик яшаш учун), $600 (транспорт учун)
  • Ҳиндистон - $100 (суткалик яшаш учун), $500 (транспорт учун)
  • Шанхай шаҳри - $100 (суткалик яшаш учун), $600 (транспорт учун)
  • Эрон - $70 (суткалик яшаш учун), $400 (транспорт учун)
  • Япония - $150 (суткалик яшаш учун), $1000 (транспорт учун)

“Ўзбекистон фуқароларига хорижий давлат ҳудудида яшаш учун маблағларсиз қолган тақдирда, молиявий ёрдам кўрсатиш тартиби тўғрисида”ги низомга мувофиқ, хориждаги консуллик округи ҳудудига вақтинча кирган фуқаро яшаш учун маблағсиз қолган пайтда дипломатик идорага молиявий ёрдам сўраб, мурожаат қилиши мумкин.

Низомда қарз олган ўзбекистонлик олинган пулни 30 кунда республика бюджетига қайтариши шартлиги белгилаб қўйилган.

Олтин-валюта захиралари миқдори қарийб 600 миллион долларга камайди

Ўзбекистоннинг олтин-валюта захиралари март ойи мобайнида 589 миллион 100 минг долларга камайган. Марказий банк қайдича, 2021 йилнинг 1 апрель ҳолатига кўра, захиралар 31 миллиард 647 миллион 600 минг долларни ташкил этган. 1 мартгача бу миқдор 32 миллиард 419 миллион 400 долларга тенг бўлган.

Марказий банк 2021 йил бошига нисбатан Ўзбекистоннинг соф халқаро захиралари 2 миллиард 200 миллион долларга ёки 6,5 фоизга камайганини билдирган.

“Бунда олтин ҳажми йил бошига нисбатан ошган бўлса-да, олтин нархининг йил бошидаги 1891,10 доллардан 1685,35 долларгача ёки 10,9 фоизга пасайиши халқаро захиралар қийматининг 2,4 млрд долларга камайишига сабаб бўлди”, дейилган МБ хабарномасида.

Регулятор маълумотига кўра, захираларнинг 19 миллиард 283 миллион 200 минг доллари олтин шаклида, 13 миллиард 15 миллион 600 минг доллари эса хорижий валюта ва депозитлар шаклида сақланмоқда.

Олтин-валюта захираси ҳар бир мамлакатнинг “қора кун”га асралган мулки бўлиб ҳисобланади.

Наманган ИИБ “Наманганда диндорларга қарши қатағон” бўлганини инкор қилди

Ўзбекистондаги мактаблардан бири. Иллюстратив сурат.

Наманган вилояти ИИБ ижтимоий тармоқларда тарқалган "Диндорларга қарши қатағон Наманган вилоятида давом этади” сарлавҳаси остида тарқатилган хабарга расмий муносабат билдирди. Мазкур хабарга илова қилинган фотосуратда ҳижобдаги ўқувчи қизларнинг ҳуқуқ-тартибот идораси ходими қаршисида тик тургани акс этган эди.

ИИБнинг билдиришича, бу хабар асоссиздир. Ҳижобли қизларга ҳеч қандай босим кўрсатилмаган ва улар билан мактабга белгиланган формада келиши юзасидан профилактик суҳбат ўтказилган.

Расман маълум қилинишича, 8 апрель куни Янгиқўрғон туманидаги 10-сонли мактаб рахбарияти туман ИИБга мактабда аввалига 5 нафар, охирги кунларда 10 нафар қиз мактабга формада эмас, балки ҳижобда келаётгани тўғрисида “алоқа хати” жўнатган.

Туман ИИБ инспектори мазкур хат ортидан 10 апрель куни мактабга келиб, алоқа хатида кўрсатилган қизлар билан профилактик суҳбат ўтказган. Суҳбат давомида “ўқувчи қизларга рўмол ўрашлари мумкинлиги, бироқ, мактабга белгиланган тартибда кийиниб келишлари тушунтириб ўтилган”.

Наманган ИИБ билдирувида таъкидланишича, Вазирлар Маҳкамасининг 2018 йил 15 август кунги 666-сонли қарори билан “Ўзбекистонда аҳоли турли миллат ва диний конфессиялар вакилларидан иборатлиги ҳамда мажбурий умумий ўрта таълим дунёвий характерга эгалиги муносабати билан ўқувчиларнинг мактаб формасига турли дин конфессиялари ҳамда субмаданиятларга мансубликни акс эттирувчи элементларни (ҳижоб, кипа, кашая, хоч ва бошқалар) қўшишга йўл қўйилмайди”.

МСК Ўзбекистон президенти сайловига тайёргарликни бошлади

Ўзбекистонда бўлажак сайловлар "халқаро стандартларга амал қилинган ҳолда" ўтказилиши иддао қилинди.

Ўзбекистон Марказий сайлов комиссияси - МСК 14 апрелдан президентлик сайловига тайёргарлик кўриш ишларини бошлади. Бу ҳақда МСК матбуот хизмати маълум қилди.

Расман билдирилишича, МСКнинг 14 апрель куни ўтган йиғилишида президент сайловига тайёргарлик кўриш бўйича асосий тадбирлар дастури ва Марказий сайлов комиссиясининг президент сайловига оид қатор низомлари лойиҳалари муҳокама қилинди.

“Йиғилишда мамлакат тараққиётини янги босқичга кўтариш йўлида ўз олдига буюк мақсадни қўйган Янги Ўзбекистонда Президент сайлови бу йил янги миллий сайлов қонунчилиги, умумэътироф этилган халқаро стандартларга амал қилинган ҳолда, демократик тамойиллар асосида ва ва бутунлай янгича муҳитда ўтиши алоҳида таъкидланди”,- деб иддао қилинади МСК расмий билдирувида.

Ўзбекистон сайлов қонунчилигига 2021 йил февраль ойида киритилган ўзгартишларга биноан эндиликда президент сайлови, Олий Мажлис Қонунчилик палатаси депутатлари, маҳаллий давлат ҳокимияти вакиллик органлари депутатлари сайлови уларнинг конституциявий ваколат муддати тугайдиган йилда – октябрь ойи учинчи ўн кунлигининг биринчи якшанбасида ўтказилади.

ЕХҲТ раиси Ўзбекистонда фуқаролик жамияти вакиллари билан учрашди

Линде хоним 13 апрелда Тошкентга келган.

Европада Хавфсизлик ва Ҳамкорлик ташкилотининг амалдаги раиси, Швеция ташқи ишлар вазири Анн Кристин Линде 14 апрель куни Тошкентда фуқаролик жамияти вакиллари билан учрашди. Озодликка бу ҳақда ЕХҲТ раиси билан учрашувда иштирок этган “Эзгулик” инсон ҳуқуқлари жамияти раиси Абдураҳмон Ташанов маълум қилди.

“Қисқа учрашувларда “Эзгулик” жамияти, Демократия ва инсон ҳуқуқлари институти, Журналистларни қайта тайёрлаш халқаро маркази, “Истиқболли авлод” сингари ноҳукумат ташкилотлари вакиллари иштирок этишди. Фуқаролик жамияти вакиллари мамлакатдаги аҳвол, ижтимоий-сиёсий вазиятга турли тарафлардан баҳо беришди”, - дейди А. Ташанов.

Учрашувда “Эзгулик” ташкилоти вакиллари мамлакатда сўз эркинлиги кузатилаётган бир пайтда бошқа тизимларда ислоҳотлар олға силжимаётгани ҳақида гапирганлар.

Ташановга кўра, “мамлакатда ягона ташаббускор бўлган президентнинг чақириқлари, ислоҳотлар жамиятда уни қўлловчи институционал тизим бўлмагани боис ўрта бўғинда синмоқда. Хусусан, инсон ҳуқуқлари соҳасида ҳам”.

13 апрелда Тошкентга келган Линде хоним ташрифи доирасида Олий Мажлиси Сенати ва Ташқи ишлар вазирлигида икки томонлама музокаралар ўтказиши кўзда тутилган.

Ўзбекистон президенти матбуот котиби Шерзод Асадов Тошкентга сафари доирасида Анн Линденинг Шавкат Мирзиёев қабулида бўлиши ҳам режаланганини билдирган.

Ўзбекистонга ташрифи олдидан ЕХҲТнинг амалдаги раисаси Қозоғистон ва Қирғизистонда бўлган. Тошкент сафаридан сўнг мулозиманинг Тожикистонга йўл олиши кутилмоқда.

Маълумотларга кўра, Анн Линде 16 апрель куни видеоалоқа воситасида Туркманистон ташқи ишлар вазири билан музокара ўтказиши ҳам режаланган.

Ёшлар билан ишлай билмаган уч нафар ректор ва айрим ҳокимлар ишдан олинди

Ёшлар билан ишлашни ўз ҳолига ташлаб қўйгани учун Фарғона давлат университети ректори Равшанжон Мақсудов, Самарқанд давлат архитектура-қурилиш институти ректори Султон Аҳмедов ҳамда Қўқон давлат педагогика институти ректори Мамиржон Отажонов лавозимидан озод этилади.

Бу ҳақда Ўзбекистон президенти Шавкат Мирзиёев ёшлар бандлигини таъминлаш ва бўш вақтини мазмунли ташкил этиш борасида белгиланган вазифалар ижроси юзасидан 13 апрель куни ўтказилган видеоселектор йиғилишида билдирган. Мирзиёев бошқа ректорлар ҳам қатъий огоҳлантирилишини таъкидлаган.

Йиғилишда қайд этилишича, ёшлар билан ишлашни лозим даражада ташкил этмагани учун Сурхондарё вилояти ҳокимининг ёшлар масалалари бўйича ўринбосари, Фурқат ва Улуғнор тумани ҳокимлари, Шофиркон, Қамаши, Хива, Чуст, Хўжайли ва Ангор туманларидаги айрим сектор раҳбарлари лавозимидан озод этиладиган бўлган. Яна қатор мутасаддилар қатъий огоҳлантирилиб, вазиятни ўнглаши учун муҳлат берилган.

Қашқадарёда ўқитувчининг калтакланиши бўйича жиноят иши қўзғатилди

Чироқчилик муаллим Ш. Оққўзиев

Қашқадарё вилоятининг Чироқчи туманидаги 134- умумтаълим мактабининг инглиз тили ўқитувчиси Шоҳнур Оққўзиев калтакланганлиги ҳолати юзасидан туман ИИО ФМБ ҳузуридаги тергов бўлими томонидан шу йил 13 апрель куни Жиноят кодексининг 277-моддаси 2-қисми “б” банди билан жиноят иши қўзғатилган. Бу ҳақда Халқ таълими вазирлиги матбуот хизмати маълумот тарқатди.

Чироқчидаги 134-мактаб ўқитувчиси Ш. Оққўзиев ўқувчисига "2" баҳо қўйгани учун унинг акалари томонидан калтаклангани ҳақида Озодлик ўтган ҳафта хабар қилган. Ўшанда туманнинг Умакай маҳалласи профилактика инспектори, катта лейтенант Сардор Аҳмедов ўқитувчининг калтакланиши юзасидан терговгача суриштирув олиб борилаётганини айтганди.

"Терговгача суриштирув кетяпти. Ҳозир калтакланган ўқитувчига етказилган жароҳат бўйича экспертиза ўтказдик, натижасини кутяпмиз. Шуни натижасига қараб ҳуқуқбузарларга баҳо берилади", деганди С. Аҳмедов Озодликка.

ХТВ қайдича, айни пайтда мазкур ҳодиса бўйича қўзғатилган жиноят иши юзасидан тергов ҳаракатлари олиб борилмоқда.

Мирзиёев уч кунлик расмий сафар билан Тожикистонга боради

Ўзбекистон президенти Ш. Мирзиёев тожикистонлик ҳамкасби Э. Раҳмон билан, Душанбе, 2019 йил 14 июни (архив фотоси)

Ўзбекистон президенти Шавкат Мирзиёев тожикистонлик ҳамкасби Эмомали Раҳмон таклифига биноан жорий йилнинг 10 июнидан 12 июнигача Душанбега расмий сафар билан боради. Бу ҳақда “Азия-Плюс” агентлиги Тожикистон ҳукуматидаги ўз манбаларидан олинган маълумотга таянган ҳолда хабар қилди.

Ташриф чоғида икки давлат раҳбарлари барча соҳалар бўйича Ўзбекистон билан Тожикистон ўртасидаги алоқалар истиқболини муҳокама қиладилар.

Мирзиёевнинг Тожикистонга сафари якунида Тошкент билан Душанбе ўртасида транспорт, энергетика, савдо-сотиқ, молия, қишлоқ хўжалиги, маданият ва фан соҳаларида шартномалар имзоланади.

Ташриф доирасида Душанбеда икки давлат санъаткорлари иштирокида “Дўстлик кечаси” номли қўшма концерт ўтказилиши ҳам режаланган.

Президент Мирзиёев Тожикистонга 2018 йил мартида давлат ташрифи билан борган, ўша йил сентябрида Душанбеда МДҲ давлат раҳбарлари кенгаши мажлисида иштирок этган, сўнгра эса 2019 йил июнида Осиёда ҳамкорлик ва ишонч чоралари кенгаши саммитида қатнашган эди.

ЕХҲТнинг амалдаги раисаси Анн Линде Марказий Осиё сафари доирасида Ўзбекистонга келди

ЕХҲТнинг амалдаги раисаси Анн Линде, Бишкек, 2021 йил 13 апрели

Европада хавфсизлик ва ҳамкорлик ташкилотининг амалдаги раисаси, Швеция ташқи ишлар вазири Анн Кристин Линде 13 апрель куни икки кунлик ташриф билан Ўзбекистонга келган.

“Дунё” ахборот агентлиги хабарига кўра, Линде хонимнинг ташрифи дастурида Ўзбекистон Олий Мажлиси Сенати ва Ташқи ишлар вазирлигида икки томонлама музокаралар ўтказиш кўзда тутилган. Мазкур учрашувларда ЕХҲТ доирасидаги ўзаро ҳамкорликнинг долзарб масалалари ҳамда Ўзбекистон-Швеция алоқаларини ривожлантириш истиқболларини муҳокама қилиниши кутиляпти.

Ўзбекистон президенти матбуот котиби Шерзод Асадов Тошкентга сафари доирасида Анн Линденинг Шавкат Мирзиёев қабулида бўлиши ҳам режаланганини билдирган.

Ўзбекистонга ташрифи олдидан ЕХҲТнинг амалдаги раисаси Қозоғистон ва Қирғизистонда бўлган. Тошкент сафаридан сўнг мулозиманинг Тожикистонга йўл олиши кутилмоқда. Маълумотларга кўра, Анн Линде 16 апрель куни видеоалоқа воситасида Туркманистон ташқи ишлар вазири билан музокара ўтказиши ҳам режаланган.

Маданият вазирлигига бир ой ичида “Туркистон” саройига кўчиш топширилди

Тошкентдаги “Туркистон” санъат саройи

Ўзбекистон президенти Маданият вазирлиги раҳбарияти зиммасига бир ой ичида вазирликни “Туркистон” санъат саройига кўчириш вазифасини юклади.

Бунга оид топшириқни Шавкат Мирзиёев, Газета.уз нашри хабарига кўра, ёшлар бандлигини таъминлаш ва бўш вақтини мазмунли ташкил этиш борасида белгиланган вазифалар ижроси юзасидан 13 апрель куни ўтказилган видеоселектор йиғилиши чоғида берган.

Йиғилиш чоғида президент Ш. Мирзиёев маданият вазири О. Назарбековга маданият муассасаси ҳозирда қарийб фойдаланилмаётган бинода жойлашиши кераклигини айтган.

Президент вазирга “Туркистон” саройидан фойдаланиш самарадорлигини ошириш ҳамда бинодан тадбирлар ва ижодий кечалар ўтказишда фаол истеъфода этиш ҳақида топшириқ берган.

Пойтахтдаги "Туркистон" санъат саройи 1993 йилда фойдаланишга топширилган.

Маданият вазирлиги айни пайтда Тошкентнинг Шевченко кўчасидаги тарихий бинода жойлашган. 1898 йилда қурилган бу бинодан вазирлик 2017 йилдан бери фойдаланиб келаётган эди.

Давомини ўқинг

XS
SM
MD
LG