Линклар

Шошилинч хабар
01 декабр 2021, Тошкент вақти: 11:21

Халқаро хабарлар

Қирғизистон: Парламент қонунчиликка ўзгартиш киритган тақдирда, Жапаров сайловда қатнашишга ҳозир

Садир Жапаров.

Қирғизистон президенти вазифасини бажарувчи бош вазир Садир Жапаров “Россия 24” телеканалига берган интервьюсида президент сайловида қатнашишга тайёр эканини билдирди.

Журналистларнинг саволига жавоб берар экан, у Конституция унинг президентликка номзод бўлишига имкон бермаслигини қайд этди..

“Конституцияга мувофиқ, президент вазифасини бажараётган шахс сайловда иштирок этолмайди. Ҳозирги пайтда парламентда депутатлар ва президент сайлови тўғрисидаги қонунчиликка ўзгартишлар ҳозирланмоқда. Агар бу қонундаги бу ўзгартишлар натижасида сайловда иштирок этишга имкон туғилса, мен сайловда қатнашаман, бироқ ҳозирча бу ҳақда гапиришга эрта, бу масала бўйича қарор ҳали қабул қилинганича йўқ”, деди Жапаров.

“Адилет” ҳуқуқий клиникаси ўз таҳлилида Қирғизистон Конституциясининг 68-моддасига мувофиқ, президент вазифасини бажарувчи мансабдор шахслар парламентга муддатидан олдин сайлов белгилаш, ҳукуматни истеъфога чиқариш, муддатидан аввалги сайловда президентликка номзод бўлиш ҳуқуқига эга эмаслигини урғулаган.

Қирғизистонда 4 октябрь куни бўлиб ўтган парламент сайловидан кейин юзага келган сиёсий бўҳрон президент, парламент спикери ва бош вазир истеъфосига сабаб бўлган. 16 октябрь куни парламент депутатлари Сооронбай Жээнбековнинг истеъфосини қабул қилганлар. Унинг ўрнига ғалаён чоғида қамоқдан озодликка чиққан ва парламент томоидан бош вазирликка сайланган Садир Жапаров президент вазифасини бажарувчи мақомини олган.

Кун янгиликлари

АҚШ ҳарбий бюджети “Шимолий оқим-2” газ қувури туфайли Сенатдан ўтмаяпти

“Шимолий оқим-2” газ қувури қисмларидан бири

АҚШ Сенатидаги республикачилар қарийб 770 миллиард долларлик мудофаа бюджетининг “Шимолий оқим-2” газ қувурига қарши санкциялар кучайтирилмасдан қабул қилинишига йўл қўйишмади. Бюджет лойиҳасини 45 киши ёқлаган, 51 киши эса унга қарши овоз берган.

Сенатда ҳарбий бюджет бўйича овоз берилишидан олдинроқ АҚШ матбуоти Оқ уй ва Давлат департаменти сенаторлардан “Шимолий оқим-2”га қарши чекловларни кучайтиришга доир тузатишларни ўтказмасликни илтимос қилгани ҳақида ёзган. Сенатдаги демократлар етакчиси Чак Шумер республикачилар қароридан ғазабланганини айтган.

“Шимолий оқим-2” мухолифлари лойиҳа ишга тушгач, Россия газни Украина орқали етказиб беришни тўхтатишидан хавфсирашмоқда. Аввалроқ, ОАВ маълумотига кўра, Германия ҳукумати газ қувурига қарши янги санкциялар жорий этмасликни сўраб АҚШ Конгрессига мурожаат қилган.

Axios нашри Бундестагнинг махфий ҳужжатига таянган ҳолда хабар беришича, Берлин “транзит сақланган тақдирда лойиҳа Киевга хавф туғдирмайди”, деган фикрни илгари сурмоқда.

Сенатда демократлар ҳарбий бюджет лойиҳасига тузатиш сифатида киритган яна бир ҳужжат кўрилмоқда: у, Россия Украинага бостириб кирган тақдирда, Москвага қарши санкцияларни кучайтиришни, хусусан, газ қувури ва шахсан президент Владимир Путинга нисбатан санкциялар жорий этишни назарда тутади.

Қирғизистоннинг Талас вилоятида сайлов натижасидан норози бўлганлар митингга чиқишди

Таласдаги митинг иштирокчилари, 2021 йил 30 ноябри

Қирғизистоннинг Талас вилояти Қорабура тумани Қизиладир қишлоғида яшовчи аҳоли 20-Манас сайлов округи бўйича ўтказилган сайлов натижаларидан норози бўлиб, митингга чиқди. Сайловчилар парламентнинг собиқ спикери, депутатликка номзод Дастан Жумабеков овоз сотиб олиш билан шуғулланганини иддао қилишиб, уни сайловдан четлатишни талаб қилишган, дея хабар қилди Озодликнинг қирғиз хизмати.

Дастлабки натижаларга кўра, Жумабеков учун мазкур округдан участкага келган сайловчиларнинг 39,37 фоизи овоз берган. Унинг рақиби бўлган номзод Мирлан Нарбеков эса 38,99 фоиз сайловчининг овозини олишга муваффақ бўлган.

Аввалроқ Дастан Жумабеков сайловчилар овозини сотиб олишга оид барча айбловларни рад этган. Бугунги митинг бўйича эса у ҳали изоҳ бергани йўқ.

Қирғизистонда 28 ноябрь куни парламент сайлови бўлиб ўтган. Мамлакатнинг янги конституциясига мувофиқ, бу гал парламентга 90 нафар депутат сайланиши, улардан 54 нафарини партиялар номзодлари, 36 нафарини эса бир мандатли округлардан сайланган кишилар ташкил этиши керак.

Кузбассдаги “Листвяжная” шахтасидан 18 кончининг жасади топилди

Қутқарувчилар 25 ноябрь куни содир бўлган портлаш натижасида “Листвяжная” шахтасида ҳалок бўлган 18 кишининг жасадини топишган. Бу ҳақда “Интерфакс” агентлиги Россиянинг Кемерово вилояти бўйича фавқулодда вазиятлар бошқармасидан олинган маълумотга таянган ҳолда хабар қилди.

“Ҳалок бўлган 18 кишининг жойи аниқланди, улардан 10 нафари транспортировкага тайёрлаб қўйилди. Метан концентрацияси ошиб кетгани туфайли қутқарувчилар шахтадан чиқишга мажбур бўлишган, шунинг учун ҳам ҳалок бўлганларни транспортировка қилиш иши ҳозирча тўхтатилди”, дейишган ФВБ вакиллари.

Шу пайтгача 29 кишининг жасади топилган, улардан 11 таси юзага олиб чиқилган.

“Листвяжная” шахтасида портлаш ўтган пайшанба куни содир бўлганди. Ўшанда кончилар ва қутқарувчилар дохил 51 киши нобуд бўлган. Авария чоғида яна 92 киши жароҳатланган.

Дастлабки тахминларга кўра, кончилар ва қутқарувчилар метан гази портлаш натижасида ҳалок бўлганлар. Аварияда жабрланганларнинг яқинлари иддаосига кўра, сўнгги йилларда “Листвяжная” шахтасида ўнлаб қонунбузарликлар аниқланган, бироқ корхона раҳбарияти уларни бартараф қилмай, кончиларни ҳаёт учун хавфли шароитда ишлашга мажбур қилишган.

Кемерово суди “Листвяжная” шахтасида содир бўлган портлаш ортидан беш нафар гумонланувчини ҳибсга олишга ордер берган. Улар орасида шахта директори, унинг ўринбосари ва участка бошлиғи бор.

КҚТТ Навальнийга нисбатан кимёвий қурол қўллангани учун Россияни яна бир марта қоралади

Кимёвий қуролларни тақиқлаш ташкилоти логоси

“Кимёвий қуролларни тақиқлаш ташкилотига (КҚТТ) аъзо давлатлар Россия Федерациясида 2020 йил 20 август куни Алексей Навальнийга қарши кимёвий заҳарловчи модда қўлланилганини ўта кескин қоралайди. Биз ушбу воқеадан жиддий хавотирдамиз”.

КҚТТ давлатларининг 29 ноябрь куни бўлиб ўтган конференциясида қабул қилинмиш “Алексей Навальний бўйича қўшма баёнот” шундай сўзлар билан бошланади. Ҳужжатга 55 давлат имзо чеккан.

Баёнотда Навальний инсон нерв тизимини зарарловчи “Новичок” моддаси билан заҳарланганини кўрсатган мустақил тадқиқот натижаларига “тўла ишонч” билдирилган. Муаллифлар “Новичок” моддаси 2018 йилда Буюк Британияда ота-бола Скрипалларга қарши қўлланганини ҳам қайд этганлар.

Асабни фалажловчи модда билан ҳар қандай заҳарлаш кимёвий қуролни қўллаш ўлароқ талқин қилинади. Бу халқаро стандарт ва меъёрларга зиддир, дейилган баёнотда.

КҚТТ аъзолари ҳудудида сиёсий мухолифатчи хуружга учраган Россия Федерациясини яна бир карра мазкур ҳужум ҳолатларини ҳар томонлама ўрганиш ва аниқлашда кўмаклашишга чақирган.

2021 йил 5 октябрида КҚТТга аъзо 45 давлат Алексей Навальнийнинг заҳарланиши билан боғлиқ саволларини Россия раҳбариятига йўллаган эди. РФнинг 7 октябрдаги жавоб мактубида мазкур саволларга жавоб берилмаган, дея таъкидланган баёнотда.

Россиянинг КҚТТдаги доимий вакили Александр Шульгин ташкилотнинг 39 ноябрь куни ўтказилган конференциясида “бу ишда фитна, сиёсийлаштириш белгилари бор”лигини айтган. Унга кўра, Россия “мазкур чигал воқеаларда ҳақиқатни юзага чиқариш учун барча ишни қилади”.

Қирғизистонга 1 декабрдан эътиборан манфий натижали ПЗР-тест билан киритилади

Бишкекдаги "Манас" аэропорти (архив сурати)

Қирғизистон шу йилнинг 1 декабридан бошлаб ўз ҳудудига киришда коронавирус инфекциясига чалинмаганлик ҳақида ПЗР-тест натижаси бўлишини шарт қилиб қўймоқда. Ҳукумат матбуот хизматига кўра, мазкур қарор коронавируснинг янги “Омикрон” штамми тарқалишининг олдини олиш мақсадида қабул қилинган.

“Чет эл фуқаролари ва қирғизистонликлар ҚРга кириш учун мажбурий тартибда ПЗР-тестдан ўтишлари ва манфий натижа кўрсатишлари керак бўлади”, дея билдирилган ҳукумат хабарномасида. Манфий тест натижаси ҳатто коронавирусга қарши эмланганлардан ҳам талаб қилиниши айтилмоқда.

Таъкидланишича, янги штамм билан касалланиш ҳолатлари аниқланаётган мамлакатлар фуқароларининг Қирғизистон ҳудудига кириши тақиқланади. Бу мамлакатлар рўйхати эълон қилинганича йўқ.

Янги “Омикрон” штамми пайдо бўлиши муносабати билан Қирғизистон ҳукумати бир неча кун олдин шошилинч тартибда ЖССТ билан маслаҳатлашган.

“Омикрон” ЖАР ва Африка жанубидаги бошқа мамлакатларда жадал суръатлар билан ёйилмоқда. Расман 100 га яқин ҳолат тасдиқланган, аммо аслида янги штаммни юқтирган беморлар сони бир неча баравар кўплигига мутахассисларнинг ишончи комил.

Янги штамм тарқалиши манзарасида қатор мамлакатлар ЖАР ва унга қўшни давлатлар билан авиақатновларни чеклаган ёки бекор қилган ва бу мамлакатлардан келганларни мажбурий карантинга олган.

АҚШ Тожикистон чегара қўшинларига 18 та жип тақдим этди

J8 жипларини топшириш маросими

АҚШ элчихонаси Тожикистон чегаралари хавфсизлигига кўмаклашиш мақсадида мамлакат МХДҚ Чегара қўшинларига 18 та J8 жипини топширди. Бу ҳақда элчихона матбуот хизмати маълумот тарқатди.

Умумий қиймати 1,3 миллион доллардан ортиқ йўлтанламасларни элчи Жон Поммершаймдан Тожикистон МХДҚ Чегара қўшинлари қўмондони Ражабали Раҳмонали қабул қилиб олган. Ушбу автоуловлар тожикистонлик чегарачиларга чегара ҳудудларининг мураккаб географик шароитида амалиётлар ўтказишга ёрдам беради, дея таъкидланган маросимда.

Элчи Марк Поммершаймнинг урғулашича, “мазкур ёрдам АҚШ томонидан Тожикистонга давлат чегараларини қўриқлаш учун техник кўмак кўрсатилаётганига бир мисол, холос”.

“Чегара хавфсизлиги соҳасида яқиндан ҳамкорлик қилаётгани учун Тожикистондан миннатдормиз ва биз ўз ютуқларимиздан фахрланамиз. Бундан кейин ҳам террорчилик, гиёҳванд моддалар айланмаси ва оммавий қирғин қуролларига қарши курашда ҳамкор бўлиб қоламиз. Алоқаларимизнинг тасдиғи сифатида келгуси йилда Тожикистон хавфсизлик соҳасига қарийб 60 миллион доллар сармоя киритишни режалаяпмиз”, деган АҚШ дипмиссияси раҳбари.

Қўшма Штатлар 1992 йилдан бери Тожикистон хавфсизлик соҳасига қиймати 330 миллион доллардан кўпроқ кўмак берган. Ушбу ёрдам доирасида Тожикистон ҳарбийларига жами 11,9 миллион долларлик 378 та транспорт воситаси тақдим этилган. Шунингдек, 13 та чегара заставаси, 9 та назорат-ўтиш маскани ва учта чегарачилар тайёрлов маркази янгидан қурилган ёки тикланган.

Австрияда эмланишдан бош тортганларга 7200 еврогача жарима солиш таклиф қилинмоқда

Венадаги савдо марказида ташрифчиларнинг COVID-19 га қарши эмловдан ўтган-ўтмаганини текшираётган полициячилар

Австрия расмийлари COVID-19 га қарши эмловдан ўтишдан бош тортганларга жарима жорий этишни режаламоқдалар. Бу ҳақда Die Presse газетаси томонидан ёйинланган мажбурий вакцинация тўғрисидаги қонун лойиҳасининг дастлабки версиясида айтилган. Мазкур чора 2022 йилнинг февраль ойидан жорий этилиши мумкин.

Лойиҳага мувофиқ, эмланишдан бош тортганлар 3600 евро жарима тўлаши керак бўлади ёки тўрт ойга озодликдан маҳрум этилади. Агар бирор киши расмийларнинг эмлов заруратига оид огоҳлантирувини икки марта эътиборсиз қолдирса, у 7200 евро миқдорида жаримага тортилади.

Қонун лойиҳасида эмлов Австрия ҳудудида яшаётганларнинг барчаси, жумладан вақтинча яшаётган кишилар учун ҳам мажбурий экани айтилган. Бундан фақат эмланиши мумкин бўлмаган шахслар, ҳомиладор аёллар ва 12 ёшгача бўлган болалар мустасно, холос.

Мажбурий вакцинация тўғрисидаги қонун лойиҳаси расман шу йилнинг 6 декабрь куни очиқланиши кутилмоқда.

Австрия фуқароларнинг 2022 йил 1 февралидан бошлаб коронавирусга қарши мажбурий эмланиши ҳақида эълон қилган Европа Иттифоқида илк мамлакат бўлди. Шу йил 22 ноябридан Австрияда тўлиқ локдаун жорий этилган. У 20 кун давом этиши тахмин қилинмоқда.

Локдаун арафасида Венада чекловларга қарши пандемия бошидан бери энг йирик норозилик акцияси бўлиб ўтди. Расмий маълумотларга кўра, ўшанда шаҳар кўчаларига 35 минг чоғли норози чиққан.

Туркманистон биринчи хонимининг сурати илк бор матбуотда пайдо бўлди

Туркия ва Туркманистон президентлари рафиқалари билан, Ашхобод, 2021 йил 27 ноябри

Турк нашрлари Туркманистон биринчи хоними Ўғулгерек Бердимуҳамедова акс этган фотосуратни чоп этишди. Туркманистон ва Туркия президентларининг рафиқалари билан бирга тушган сурати Ашхободда 27 ноябрь куни бўлиб ўтган зиёфат чоғида олинган.

Эрдўғон Туркманистонга икки кунлик ташрифни амалга ошириш ҳамда Иқтисодий ҳамкорлик ташкилоти саммитида иштирок этиш учун келганди.

Туркманистондаги расмий нашрлар Бердимуҳамедованинг суратини ҳеч қачон чоп қилишган эмас. Туркманистон биринчи хонимининг фотосини биринчилардан бўлиб SonDakika нашри ёйинлаган.

Гурбангули Бердимуҳамедов телевидение экранлари, расмий газета ва журналларнинг биринчи саҳифасида одатда ёлғиз пайдо бўлади, туркман нашрлари унинг рафиқасини ҳеч қачон кўрсатишмайди. Оилавий расмларда эса кўпинча унинг ўғли, қизлари ва набиралари бўлади.

Озодликнинг туркман хизмати Ўғулгерек Бердимуҳамедовага оид фактлар, унинг ёши ва нима билан шуғулланиши кўпчиликка ҳалигача маълум эмаслигини қайд этган. Хорижий сафарларга эса Туркманистон президенти рафиқасини олиб бормайди.

Гурбангули Бердимуҳамедов Туркманистон президенти лавозимини мамлакатнинг тўнғич президенти Сапармурод Ниёзов ўлимидан сўнг – 2007 йилда эгаллаган. “Орқадоғ” унвонига эга бўлган Бердимуҳамедов, расмий маълумотларга кўра, 2012 йилдаги президент сайловида 97,14 фоиз, 2017 йилдаги сайловда эса 97,69 фоиз овоз билан ғалаба қозонган.

ОАВ: Кремль Моргенштерн билан ҳамкорлик имкониятларини кўриб чиқмоқда

Алишер Моргенштерн

Россия президенти маъмурияти Тергов қўмитаси раиси Александр Бастрикин айблови ортидан мамлакатни тарк этган рэпчи Алишер Моргенштерннинг продюсери билан музокара олиб бормоқда. Бу ҳақда президент маъмуриятидаги манбасига таянган ҳолда Znak.com хабар қилди.

Нашрга кўра, музокараларда Моргенштерннинг Россияга қайтиши имконияти муҳокама қилиняпти, Кремль вакиллари 2024 йилда бўладиган президент сайлови арафасида унга ҳамкорлик таклиф этишган. Айтилишича, таклиф рад этилган тақдирда ҳам рэпернинг қайтишига тўсқинлик қилинмайди, аммо мазкур ҳолатда “Тергов қўмитаси томонидан бўлган барча айбловлар амалда татбиқ этилиши мумкин”.

Моргенштерннинг концерт директори Табриз Шаҳидий музокаралар бўлаётганини тасдиқламаган ҳам, инкор ҳам этмаган.

Znak.com қайдича, Кремль Моргенштернни ёшлар орасида ижтимоий фикр етакчиларидан бири деб билади ва унинг машҳурлигидан ўз манфаатлари йўлида фойдаланишни хоҳлайди.

Моргенштерн 24 ноябрь куни – Бастрикин уни “ижтимоий тармоқларда гиёҳванд моддалар сотаётганликда” айблаганидан сўнг Россияни тарк этган. Бундан ташқари, унинг клипларида гўё уларда гиёҳванд моддалар тарғиб қилингани сабабли текширилаётгани ҳақида маълумотлар бор.

ОАВ хабарларига кўра, рэпер айни пайтда Бирлашган Араб Амирликларида яшаб турибди.

Саакашвили илк бор шахсан суд қаршисига чиқди

Саакашвили суд залида

Грузиянинг собиқ президенти, октябрь ойи бошларида мамлакатга қайтиши билан ҳибсга олинган Михаил Саакашвили 29 ноябрь куни илк бор шахсан суд қаршисига чиқди. У маҳкамага Гори шаҳридаги ҳарбий касалхонадан етказиб келинди. Сиёсатчи қамоқда бир ойдан зиёд вақт очлик сақлаганидан сўнг ўша ерда даволанмоқда.

Саакашвили аввалроқ сиртдан озодликдан маҳрум этилгани сабабли қамоқхонага жойлаштирилган. Ҳозирда суд унга нисбатан очилган янги ишни кўриб чиқмоқда. Бу сафар Саакашвили 2007 йил 7 ноябрь куни норозилик акциясини тарқатиш ва тадбиркор Бадри Патаркацишвили мол-мулкини мусодара қилишда ҳокимиятни суиистеъмол қилганликда айбланяпти. Собиқ президент айбини тан олган эмас.

Озодликнинг грузин хизмати хабарига кўра, суд тинглови бошланишидан олдин Саакашвили Грузия суди ва прокуратурасини тан олмаслигини айтган, устидан очилган суд ишини эса “натижаси аввалдан маълум комедия” деб атаган.

Шунга қарамай, Саакашвили суд тингловида шахсан қатнашишга қарор қилган. Аввалроқ расмийлар хавфсизлик важидан уни судга келтиришни рад этишганди, аммо Ғарб мамлакатлари талаб қилгач, ён беришга мажбур бўлишган.

Тбилисида суд биноси ёнидаги йўлни Саакашвили тарафдорлари тўсиб қўйгани маълум қилинган. Улар билан полиция ўртасида тўқнашув чиққан, ҳибсга олинганлар бор.

Суд мажлисига биргина оммавий ахборот воситаси – Грузия Жамоат телерадиоширкатининг Биринчи канали киритилган, холос.

Хоруғ воқеалари: Инсон ҳуқуқлари ташкилотлари Тожикистон президентига мурожаат билан чиқишди

Хоруғда норозилик чиқишлари тўрт кундан буён давом этмоқда

Тожикистон фуқаролик жамияти вакиллари президент Эмомали Раҳмонга мурожаатида Тоғли Бадахшон мухтор вилоятида (ТБМВ) ўзбошимчалик билан қўлга олишлар ва тинч норозилик чоғида юз берган ўлимлар ҳамда кўпсонли фуқароларнинг жароҳат олиши муносабати билан ташвиш билдириб, мамлакат расмийларини ушбу воқеалар юзасидан синчковлик билан тергов ўтказишга чақиришди.

Фаоллар давлат раҳбарини “Хоруғ шаҳри оддий аҳолисига нисбатан керагидан ортиқ куч ва ўқотар қуроллар ишлатишни зудлик билан тўхтатиш”га чақиришган. Расмийлар мурожаатга муносабат билдиришганича йўқ, аммо 27 ноябрь куни ТБМВ прокуратураси намойишчиларни безориликда ва парламент депутатига ҳужум қилганликда айблаган.

Фуқаролик жамияти вакиллари мурожаати 28 ноябрь куни ёйинланган. Ҳужжат остига “Фуқаролик эркинликлари офиси”, “Ҳуқуқ олами”, “Ҳуқуқий ташаббус”, “Жамият соғлиғини сақлаш ва инсон ҳуқуқлари”, “Инсон ҳуқуқлари маркази” дохил жами тўққиз ташкилот вакили имзо чеккан.

Ҳуқуқбонлар мурожаатига мувофиқ, ТБМВда яқинда юз берган воқеалар натижасида тинч аҳоли орасида уч киши қурбон бўлиб, 16 нафардан зиёд киши жароҳатланган. Фаоллар вазиятдан ташвишланишмоқда.

“Биз Гулбидин Зиёбеков ва бошқалар ўлимини тергов қилиш учун барча манфаатдор томонлар иштирокида махсус ишчи гуруҳ тузилишини олқишлаймиз. Мамлакат расмийларини ўз мажбуриятларини бажаришда қатъиятли бўлишга ва можарони тинч йўл билан ҳал этиш ҳамда келгусида инсон ҳақлари бузилишининг олдини олиш учун барча зарур чораларни кўришга чақирамиз”, дейилган мурожаатда.

Фаоллар президент Эмомали Раҳмонни “ҳар бир фуқаронинг тинч йиғилишларда қатнашиш ҳуқуқи”ни таъминлашга ва норозилик намойиши иштирокчиларининг таъқиб этилишига йўл қўймасликка ҳам чақирганлар. Бундан ташқари, улар мухтор вилоят билан барча алоқа йўллари очилишига чақиришган.

Хоруғ шаҳрида сўнгги тўрт кун мобайнида содир бўлган воқеалар тожик жамиятини хавотирга солди. Расмийлар муаммони намойишчилар билан музокара қилиш орқали ҳал этишга уринишаётганини таъкидлашган. Норози аҳоли эса, ўз навбатида, Гулбиддин Зиёбеков ўлимини адолатли тергов қилишни ва айбдорларни жазолашни талаб қилмоқда.

Германия АҚШдан “Шимолий оқим-2”га қарши санкциялар жорий этмасликни сўрамоқда

Германия ҳукумати “Шимолий оқим-2” газ қувурига қарши янги санкциялар жорий этмасликни сўраб АҚШ Конгрессига мурожаат қилди. Axios нашри хабарига кўра, Германиянинг АҚШдаги элчихонаси 19 ноябрь куни конгрессменларга бу тўғридаги махфий ҳужжатни топширган.

Ҳужжатда айтилишича, Германия ҳукумати Украина орқали газ транзитига доир амалдаги шартноманинг 10 йилга узайтирилишига эришиш бўйича мажбуриятига жиддий ёндашади. Россиянинг ушбу транзит йўлидан воз кечиши билан боғлиқ хавотирлар “Шимолий оқим-2” мухолифларининг асосий аргументларидан биридир.

Шунингдек, ҳужжатда, агар Украина ҳудуди орқали газ транзити сақланиб қолса, Болтиқ денгизи тубидан ўтган газ қувури унга хавф солмаслиги айтилган.

Берлин АҚШнинг ўз иттифоқчиси бўлмиш Германияга қарши ҳар қандай санкция жорий этиши “фақат ва фақат Путиннинг ғалабаси” бўлиши ҳамда Германиянинг, жумладан, Украина олдидаги мажбуриятларини бажаришини хавф остига қўйиб, “Трансатлантика бирлиги”га путур етказиши мумкинлигини таъкидлаган.

Мактубда урғуланишича, жаҳон бозорида ҳозирги нархлар кўтарилишини фақат Россиянинг хатти-ҳаракатлари билан боғламаслик керак.

Ҳужжатда Кремль “Шимолий оқим-2”ни сиёсий мақсадларда қўллай бошлаган тақдирда Германия Москвага босим ўтказиш учун бир қанча воситаларни ишга солиши мумкинлиги билдирилган.

Давлат департаменти вакили ҳужжатга изоҳ бераркан, Берлин билан иттифоқчилик алоқаларини сақлаб қолиш ва Украина манфаатларини ҳимоя қилиш бир-бирига зид эмаслигини, Вашингтон икки мақсадига “энг самарали тарзда” эришиш ниятида эканини очиқлаган.

Аввалроқ АҚШ нашрлари, хусусан Foreign Policy ва The Hill Байден маъмурияти сенаторларни “Шимолий оқим-2”га қарши қўшимча санкциялар жорий этиш ташаббусини дастакламасликка ишонтиришга уринаётгани ҳақида хабар қилган.

Сталиннинг эвараси бобокалони жасадини эксгумация қилишда патриархдан ёрдам сўради

Селим Бенсаад

Совет диктатори Иосиф Сталиннинг эвараси Селим Бенсаад Рус православ черкови раҳбари патриарх Кириллдан Сталин жасадини бошқа жойга кўчириш зарурати ҳақидаги мунозарада “ҳакам” бўлишни илтимос қилди. Бенсааднинг мактубини “Блокнот” нашри ёйинлади.

Селим Бенсаад Сталин ўзини Новодевичье қабристонига, иккинчи хотини Надежда Аллилуеванинг ёнига дафн этишларини истаганини иддао қилмоқда. Бундан ташқари, эвара бобокалони заҳарлаб ўлдирилгани тўғрисидаги фаразни текшириш учун унинг жасадини эксгумация қилишни илтимос қилган.

Бенсаадга кўра, у Сталин тақводор одам бўлганига ишончи комил бўлгани сабабли РПЧ патриархига мурожаат қилган. Шунингдек, у гўё Сталинга тегишли бўлган иконани Россия президенти Владимир Путинга ёки Қуролли кучлар бош черковига топширишини айтган.

Сталин 1953 йилнинг март ойида вафот этганидан сўнг унинг жасади дастлаб Қизил майдондаги мавзолейга қўйилган, аммо 1961 йилда “шахсга сиғиниш” сиёсати қаттиқ қоралангач, уни Кремль девори ёнига дафн этганлар.

Бенсаад – Сталиннинг тўнғич ўғли, Иккинчи жаҳон уруши даврида немис асирлигида вафот этган Яков Жугашвилининг набираси саналади. Яков Жугашвилининг қизи Галина Жазоир фуқароси Хосин Бенсаадга турмушга чиққан ва бу никоҳдан Селим туғилган.

У журналист Лана Паршина билан ҳаммуаллифликда “Сталин оиласи сирлари” китобини ёзган.

Қирғизистон: Бир неча партия парламент сайлови натижаларини тан олишдан бош тортди

Қирғизистондаги парламент сайлови натижаларидан норози партиялар вакилларининг Бишкекда ўтган матбуот анжуманидан лавҳа

Қирғизистонда 28 ноябрь куни бўлиб ўтган парламент сайлови иштирокчилари бўлмиш “Ата Мекен”, “Азаттиқ” ва “Улуттар биримдиги” партиялари вакиллари сайловнинг дастлабки натижаларини тан олишдан бош тортишди. Улар сайлов натижаларини бекор қилиш ва МСК сайтида автоматлаштирилган овоз ҳисоблаш тизимида юз берган носозлик юзасидан текширув ўтказишни талаб қилишмоқда.

Душанбага ўтар кечаси Бишкекда ўтказилган матбуот анжуманида мазкур партиялар вакиллари расмийларни сайлов чоғида “яроқсиз бюллетенлардан фойдаланганлик” ва “мухолифат партияларини парламентга киритмаслик учун ҳаммага қарши берилган овозлар миқдорини кўпайтириб қўйганлик”да айблашган.

Марказий сайлов комиссияси сайтида 28 ноябрь оқшомида кузатилган носозликни МСК раиси Нуржан Шайлдабекова техник муаммо билан изоҳлаган. Маълумотлар сайтда қайта акс этган пайтда овозлар миқдори камайиб қолгани кузатилган.

Сайловнинг дастлабки натижаларига кўра, парламентга “Ата-Журт Кыргызстан” (16,85 фоиз), “Ишеним” (13,40 фоиз), “Интимақ” (10,74 фоиз), “Альянс” (8,12 фоиз) , “Бутун Қирғизстан” (6,70 фоиз) ва “Ийман Нуру” (5,98 фоиз) партиялари ўтган.

Парламент сайловида овоз бериш якунланганидан кейин президент Садир Жапаров чиқиш қилиб, сайлов “адолатли ва қонуний” ўтганини билдирган. Унга кўра, сайлов ортидан тинчлик ва барқарорликни асоссиз бузишга ҳаракат қилганларга қарши “кескин чоралар” кўрилади.

Қирғизистонда якшанба куни ўтказилган парламент сайлови ҳақида Озодлик аввалроқ хабар қилган.

Петр Фиала Чехия бош вазири этиб тайинланди

Маросимда ногиронлар аравачасида ҳозир бўлган президент йиғилганлардан махсус шаффоф девор билан ажратилди. 

Чехия Республикасида 28 ноябрь куни Бош вазир Петр Фиалани тайинлаш маросими бўлиб ўтди.

Петр Фиала либерал-консерватив оқим сиёсатчиси. 2012-йилнинг майидан 2013-йилнинг июлигача у Петр Нечас ҳукуматида таълим, ёшлар ва жисмоний тарбия вазири бўлган.

Академик жамоада у Брнодаги Масарик университетининг собиқ ректори ва проректори сифатида танилган.

Фиала 2007-2012 йилларда "Тоталитар Режимларни Ўрганиш Институти" (ÚСТР) бошқарув кенгаши аъзоси ҳам бўлган.

Чехия Республикаси Президентининг сайтида хабар қилинишича, ҳукумат раҳбарини тайинлаш маросими фавқулодда ҳолат ва жорий гигиена чоралари шароитида Конституция талабларига риоя этилишини таъминлайдиган тарзда тайёрланган.

Чехия президенти Милош Земан сал аввал коронавирусга чалингани ҳақда хабар қилинганди.

Маросимда ногиронлар аравачасида ҳозир бўлган президент йиғилганлардан махсус шаффоф девор билан ажратилди.

Шу билан бирга, давлат раҳбари ва тайинланган бош вазир ўртасида визуал ва аудио алоқалар таъминланди.

Петр Фиала етакчилигидаги Фуқаролик демократик партияси Чехияда ўтган ой ўтказилган сайловларда ғолиб чиққанди.

Чехия ҳукуматининг раҳбари Андрей Бабиш партияси сайловда етарли овоз ололмади ва у 11 ноябрь куни истеъфога чиқиш тўғрисида ариза берди.

Давомини ўқинг

XS
SM
MD
LG