Оқ уй матбуот котиби Карин Жан-Пьер: "Россия Бриттнини ноҳақ ушлаб турибди"
4 август куни Оқ уй Россияни гиёҳванд моддалар ташишда айбдор деб топилган баскетбол юлдузи Бриттни Грайнерни озод қилиш бўйича Вашингтон ўртага ташлаган таклифни қабул қилишга чорлади.
Оқ уй матбуот котиби Карин Жан-Пьер ва миллий хавфсизлик вакили Жон Кирбининг сўзларига кўра, Россияга наша қўшилган вейп картриджларини олиб кирганликда айбдор деб топилган Грайнер умуман маҳкамага тортилмаслиги керак бўлган.
«Россия Бриттнини ноҳақ ушлаб турибди. У маҳкамага тортилмаслиги керак эди ўзи. Барчангизга маълум бўлганидек, уни ва Пол Уиланни уйга олиб келиш учун жиддий таклиф билан чиқдик. Россияни бу таклифни қабул қилишга чақирамиз», - деди Жан-Пер.
Кирби эса:
«Биламан, ҳамма бу таклиф нима экани ҳақида турли тахминларни қилмоқда. Бу ҳақда батафсил гапирмайман, лекин бу жиддий таклиф. Уларни [таклифимизни] қабул қилишга чақирамиз. Ушбу таклифни бир неча ҳафта олдин таклиф қилганимиздаёқ қабул қилишлари керак эди», - деди.
Икки карра Олимпиада олтин медали совриндори ҳамда АҚШ Аёллар Миллий баскетбол ассоциацияси (WNBA) юлдузи Грайнер февраль ойи ўрталарида Россияда ўйнаш учун борганидан кейин ҳибсга олинган эди.
24 февраль куни Россия Украинага бостириб кирганидан кейин Бриттни АҚШ ва Россия ўртасидаги геосиёсий можаро қурбонига айланди.
Пайшанба куни Россия суди америкалик баскетбол юлдузи Бриттни Грайнерни гиёҳванд модда олиб юрганликда айбланиб, 9 йилга озодликдан маҳрум қилди.
Грайнер вейп картриджларида наша мойи бўлганини тан олган, лекин уларни беихтиёр ўзи билан Россияга олиб бориб, хато қилганини айтган. Россия суди спортчини 1 миллион рубль жаримага ҳам тортди.
5 август куни Россия ташқи ишлар вазири Сергей Лавров Москва Вашингтон билан мавжуд дипломатик канал орқали маҳбус алмашиш масаласини муҳокама қилишга тайёрлигини айтди.
«Россия ва АҚШда судланган шахслар масаласига келсак, аллақачон президентлар томонидан келишилган махсус канал борлигини айтганман. Омма олдида нима дейилаётганидан қатъи назар, бу канал ҳамон бор. Биз бунга тайёрмиз. Бу мавзуни муҳокама қилишга тайёрмиз, лекин президентлар Путин ва Байден томонидан келишилган канал доирасида», - деди Лавров.
31 ёшга тўлган Грайнерга ҳукм чиқарилгани Вашингтон ва Москва маҳбус алмашишига йўл очади.
Украина Россияни кучларни қайта тақсимлашга мажбур қилмоқда
Америка урушни ўрганиш институти маълумотларига кўра, Украина қўшинлари стратегик ташаббусни қўлга олди ва Россияни кучларни қайта тақсимлашга мажбур қилмоқда.
Масалан, қарши ҳужум таҳдидига жавобан рус қўшинлари Славянск ва Северскка жўнатиш ўрнига Херсон ва ғарбий Запороже вилоятларига кўпроқ шахсий таркиб ва техникани жойлаштирмоқда. Мутахассисларнинг фикрича, бу биринчи марта Украина томонига урушнинг боришини фаол шакллантиришга киришиш имконини бермоқда.
5 августга ўтар кечаси рус қўшинлари Харковни яна ўққа тутди, деди Харьков вилояти маъмурияти раҳбари Олег Синегубов.
Натижада уч киши жароҳатланган. Шунингдек, рус қўшинлари Запороже яқинида ракета зарбасини беришди, деб ёзди Запороже вилояти маъмурияти раҳбари Александр Старух. Дастлабки маълумотларга кўра, қурбонлар йўқ.
Украинанинг шарқи ва жанубида кечаю кундуз отишма
Украинанинг шарқий ва жанубий вилоятларидаги бир қатор шаҳар ва аҳоли пунктлари сўнгги соатларда яна Россия қўшинлари томонидан шиддатли ўққа тутилди.
Харковда камида уч нафар тинч фуқаро яраланиб, касалхонага ётқизилди, деди вилоят маъмурияти раҳбари Олег Синегубов.
Мана, Днепропетровск вилоятининг иккита тумани - Кривой Рог ва Никополни ўққа тутиш натижалари. Никопол туманига камида 40 та ракета учирилди, деди Днепропетровск вилояти маъмурияти раҳбари Валентин Резниченко:
Дастлабки маълумотларга кўра, қурбонлар йўқ.
Суми ва Запороже вилоятларининг айрим ҳудудлари кечқурун ва тунда ракета ҳужумларига учраган. Охирги ҳафталарда ҳар куни ўққа тутилган Николаевда кеча тунда бир нечта портлашлар қайд этилди.
4 август куни Донецк вилоятининг Торетск шаҳрида автобус бекатига ракета тушиши оқибатида 8 нафар маҳаллий аҳоли ҳалок бўлди.
Россия бомбардимони оқибатида Торецк шаҳрида 8 киши ҳалок бўлди
Россия армияси 4 август куни Донецк вилоятидаги Торецк шаҳрини бомбардимон қилгани оқибатида тинч аҳолидан 8 киши ҳалок бўлди ва 4 киши яраланди. Бу ҳақда Донецк вилоят ҳарбий маъмурияти раҳбари Павел Кириленко маълум қилди. Унга кўра, яраланганлардан уч нафари бола.
“Дастлабки маълумотларга қараганда замбараклардан отишган. Бир снаряд одамлар тўпланиб турган жамоат транспорти бекатига тушган”,-деди Кириленко.
Бундан ташқари Россия бомбардимони оқибатида черковга, бир нечта кўп қаватли уйга зарар етган ва черков руҳонийси яраланган.
Форум